މި ޖިސްމުގާ ވަނީ 16

”ބަޓް.. ހައިކަލް އެގްރީޑް… އެކަމަކު އޭގެ ކުރިން ހައިކަލް އާއި އޭނާގެ އަންހެނުން އެބަ އެދޭ ޓެސްޓް ރައުންޑަކަށް ދާން.. ރެސްޓޯރެންޓްގައި ހެޑް ޝެފް އަކަށް އުޅޭނީ ހައިކަލްގެ އަންހެނުން އާމިލާ.. މާދަމާ ހަވީރް އެމީ ގާތު ރެސްޓޯރެންޓްއަށް ދިއުމަށް އެދުނީ .. އެމީ ކުރަންވީ ކަމަކީ އެތަނަށް ގޮސްފަ ހައިކަލް އާއި އާމިލާ އިމްޕްރެސްވާ ވަރުގެ ކެއުމެއް ތައްޔާރު ކޮށްދޭންވީ ވިތިން އޭން އަވާރ.. ކާތަކެއްޗަށް އިންސާފް ކުރުމަށްފަހު އެމީހުން އެތަނުގަ ގޮތެއް ނިންމާނެ.. އެމީހުން ސެޓިސްފައި ވަންޏާ ނޯ މޯރ ޓްރެއިނިންގަ ސްޓްރެއިޓް ޓް ދި ޖޮބް.. އިމްޕްރޫވްމަންޓް އެއް ބޭނުން ވަންޏާ ތްރީ މަންތްގެ މުއްދަތަކަށް ޓްރެއިން ކޮށްދޭ ގޮތަކަށް..“ނަދީމް ވަރަށް ތަފްސީލާއި އެކު ކިޔައިދިނެވެ.

އޭނާގެ ވާހަކަ އެއްކޮން ނުނިމެނީސް އަމީރާގެ ތުންފަތުން ފަނޑުވި ހިނިތުންވުން އަލުން އެ ތުންފަތުގައި ފެވިލިއެވެ. ހައިކަލް އާއި އޭނާގެ އަނބިމީހާ ހިތްހަމަޖެހޭ ފެންވަރަށް އެ މަސައްކަތް ކޮށްދެވޭނެއެވެ. ކެއްކުމަކީ އޭނާއަށް އެއްވެސް ކަމެއް ނޫނެވެ. އަމިރާއަށް އަމިއްލަ ނަފްސާއި މެދު ޔަގީންކަން އޮތެވެ. އަމީރާ ހީލަމުން ބޯ ޖަހައިލިއެވެ.

***

”ބޭބޭ.. އައި ކެން ޑޫ އިޓް.. އިންޝާﷲ“ އަމީރާ އެ ހިނިތުންވުމުގައި އިނދެ ބުނެލިއެވެ. އެހިނދު މަޖުދާއާއި ނަދީމް، އެކަކު އަނެއްކަކުގެ މޫނަށް ބަލއިލެވުނެވެ. ދެމީހުންގެ މޫނުމަތިން ވެސް ފެނުނީ ހިތްހަމަޖެހުމެވެ.

”އެމީ.. ހިނގާ މާދަމާ މެންދުރު ދިޔުމުގެ ކުރިން ގޭގަ ޕްރެކްޓިސް ކޮށްލަން.. ދައްތަ އެހީވާނަން“ މަޖުދާ އަމީރާގެ އަތުގައި ހިފާލުމުން، އަމީރާއަށް އުފަލާއި އެކު އެކަމާއި އެއްބަސްވެވުނެވެ.

”އަޅެ މާޝާﷲ ލޯބި ކުއްޖެއް މީ“ އަމީރާގެ މައުސޫމް ހިނިތުންވުން ދެކެން އިނދެ އޭނާގެ ކޯތާފަތުގައި މަޖުދާ ނިކަން ލޯބިން ހިފާލިއެވެ. އަމީރާއަށް ހީލެވުނު އިރު އެމޫނުން ފެނިލީ ލަދުުރަކި ކަމެވެ.

”މަންމަ ވެސް ދޯ.. ދައްތި ލަދުގަންނަ ވާލީ އޭ.. ހެހެހެ.. ދައްތީ ފައިޓިންގް.. ނީޝް ދުއާ ކުރާނަން ތި ޖޮބް ލިބޭތޯ“ އަމީޜާގެ ގައިގާ ނީޝަން ބައްދާލިއެވެ.

”ކޮން ފައިޓިންގ އެއްތަ ނީއްކޯ..މި މަންޖެ  ކޮރެއާ ސޮރުމެންނަށް ބަލަން ފެށިފަހުން އެ ނޫން އެއްޗެއް ކިޔޭކަމަކަށް ނުވޭ.. އެމީ ދައްތި އެއުޅެނީ ހަނގުރާމައަކަށް ނުކުންނާކަށް ނޫނިއްޔަ ފައިޓް ކުރާށޭ މިކިޔަނީ“

”ބައްޕާ.. ބައްޕާ ..ހަހަހަހަހާ.. ފައިޓް ކުޜާކަށް ނޫނޭ މިބުނީ.. އެއީ ކޮރެއާ މީހުން ،މީހަކު ކަމަކަށް ކުރިމަތިލާން އުޅެންޏާ ހިތްވަރު ދީ ހެދުމަށް ބުނެ އުޅޭ ގޮތެކޭ.“ ނަދީމްގެ ވާހަކައިން ނީޝާން ހެމުން ހެމުންބުނެލިއެވެ. މަޖުދާއާއި އަމީރާގެ ގާތައް ވެސް އައީ ހިންޏެވެ.

އިރުގަނޑެއް ވަންދެން އެކި އެކި ވާހަކަ ދައްކަން ތިބެފައި ނަދީމްއާއި މަޖުދާ ދާންވެގެން ނުކުތުމުން ނީޝަން ވެސް އެމީހުންގެ ފަހަތުން އެތެރެއަށް ވަނެވެ. އަމީރާ ބޭނުންވި ފަދަ ހަމަހިމޭން މާހައުލެއް އޭނާއަށް ލިބުމުން އުނދޯލީގައި ރަނގަޅަށް ހަމަޖެހިލެވުނެވެ. ނަމަވެސް އެހުރިހާ އިރު ތުންފަތުގައި ވީ ހިނިތުންވުން ފަނޑުވެގެން ދިޔައެވެ. އުނދޯލީގައި ދިގު ދިގަށް އަމީރާ އޮށޯވެލިއެވެ. އޭރު ދުނިޔެ މައްޗަށް ފެތުރިފައި އޮތް އިރުއޮއްސޭ މަންޒަރުގެ ރީތިކަން ފަނޑުވެ، އެ ރަންއަލިތަކުގެ މައްޗަށް އަނދިރިކަން ވަނީ ލަސްލަހުން ކުރި ހޯދަން ފަށާފައެވެ. އިޔާން އާއި އެކު ސްޕެއިންގަ އުޅުނު ގޭޣެ ބެލްކޮނީގައި އިރު އޮއްސޭ މަންޒަރުބެލުމަށް ހޭދަކޮށްލާ ގޮތް އޭނާ ހަނދާނުން ނުފިލައެވެ. ހިތިހިނިތުން ވުމެއް އަމީރާގެ ތުންފަތުގައި ފެވިގެން ދިޔައެވެ.

”ވެއާރ ޔޫ މާކް؟.. ޒަން.. ކީއްވެތަ އެދުވަހު އަތުން ދޫކޮށްލީ..އެހެން ނޫން ނަމަ މިއަދު އަހަންނަކަށް ތިމީހުން ނުގެއްލުނީސް“ އެހެން އޮތްވާ މާކިންއާއި ޒަންޔާގެ ހަނދާން އާވެގެން ދިޔައެވެ. ހިތައް ކުރުވި މޮޅިވެރި އަސަރަކުން ދެލޯ ފެންކަޅިވެގެން ދިޔައެވެ. އެންމެ ފަހުން  ޒަންޔާ އޭނާގެ ލޯ މައްޗަށްގެއްލުނު ގޮތް ސިފަވި ހިނދު، އޭނާގެ ހިތައް ވަކިން އުނދަގޫވަމުން ދިޔައެވެ. މާކިންއަށް އަނިޔާ ކުރި ނަމަވެސް  އޭނާ މަރާލަން ހޫގޯ ދެކޮޅުވާނެކަން ޒަންޔާ ބުނި ފަދައިން އޭނާއަށް އެނގެއެވެ. އެކަމަކު ޒަންޔާ އެމީހުންގެ އަތްދޮށު ވެއްޖެއްޔާ ވާނީ ކިހިނެތް ހެއްޔެވެ. ޒަންޔާ އަކީ ލައިލާގެ ދަރިއެއްކަމާއި މަސައްކަތް ކުރީ އަމީރާ  ސަލާމަތް ކުރަން ކަން ހޫގޯއަށް އެނގޭނެއެވެ. ހޫގޯގެ އަތްދޮށަށް ޒަންޔާ ގޮސްފިނަމަ ވާނެ ގޮތެއް ހިތައް އަރުވާލާކަށް ވެސް އަމީރާ ބޭނުމެއް ނުވިއެވެ.

***

”އާދަމް .. ދެންމެ އެންމެ ރަނގަޅު ދެން ގެޔަށް ދިޔަސް“ ދިހަ ފަންގިފިލާއަށް ހުރި އިމާރާތުގެ ކުރިމައްޗަށް ކަޅުކުލައިގެ ބީ އެމް ޑަބްލިއު ކާރު ހުއްޓުމުން އާމިލާ ފޭބިއެވެ. ހިނިތުންވުމަކާއި އެންމެ ރަނގަޅު ކަމަށް ބުނެ ޑްރައިވަރު އާދަމް ވެސް އަލުން އެނބުރި ދިޔައެވެ.

ކުރިމަތީގައި ހުރި އިމާރާތައް ވަދެނުކުމެ އުޅޭ ފަރާތް ތަކަށް އޭނާ ފެނުމުން، ހައިކަލްގެ އަންހެނުންކަން އެނގިގެން ހީލައެވެ. ރައްދުގައި އޭނާ ވެސް ހިނިތުންވުމެއް ވެރި ކޮށްލިއެވެ.

”ޕިސް.. ޕިސް.. އެކުއްޖާ އަންނަން ބުނި ގަޑީގެ މާކުރިން ދޯ މިއާދެވުނީ“ އަތުކުރީގައި އޮތް ގަޑިއަށް ބަލައިލި އިރު ތިނެއް ނުޖަހާ ކަން އެނގުމުން އާމިލާއަށް އަނގައިން އަޑެއް ލައްވާލެވުނެވެ. އޭނާ ގަޑި ބަލައި ނުލާ ކާރަށް އަރައިގެން އައީ ތިންގަޑި ބައި ވެއްޖެ ކަމުގައި ހީކޮށްފައެވެ. އިމާރާތުގެ ތެރެއަށް ވަންނަން އައި އިރު އެންޓްރެސްގެ ސިޑިކޮޅުގެ ދެފަރާތުގައި ތިބި ސެކިއުރިޓީ މީޙުން އޭނާއަށް ހީލިއެވެ.

ދިހަ ފަންގިފިލާގެ އެންމެ މަތީގައި ހުންނަ ހަ ފަންގިފިލާއާއި ޓެރެހަކީ ’ގޯލްޑެން ފޯރކް‘ ރެސްޓޯރެންޓްއަށް ހާއްސަ ބައިތަކެވެ. އޭގެ އެންމެ ތިރީގައި ހުންނަ ހަތަރު ފަންގިފިލާ ހާއްސަ ކުރެވިފައި ވަނީ ’ގޯލްޑެން ފޯރކް’ގެ އިތުރުން ’ކްރަސްޓް އެންޑް ކޯ‘ ގެ  އޮފީސް މަސައްކަތަށެވެ. ދެ ރެސްޓޯރެންޓް ވެސް ހިންގަނީ ވިޝާމްގެ ހާއްސަ ބެލުމުގެ ދަށުން ކަމުގައި ވާތީ އޭނާގެ އޮފީސް ވެސް އިންނަނީ އެއިމާރާތުގެ ހަތަރުވަނަ ފަންގިފިލާގައެވެ. އަދި އޭނާގެ މުވައްޒަފުން ވެސް މަސައްކަތް ކުރަނީ އެ ބަޔާއި އެއާއި ޖެހިގެން ތިރިއަށް ވާ ތި ބައިގައެވެ. އެ އިމާރާތުން ފެށިގެން ހަތަރު ވަރަކަށް މިނެޓުން ހިނގާލާފައި ދެވޭ ހިސާބުގައި  ތިން ފަންގިފިލާއަށް ހުރީ  ’ކްރަސްޓް އެންޑް ކޯ’ގެ އިމާރާތެވެ.

”މަންމާ.. އަންގާ ވެސް ނުލައޭ ތިއައީ.. ދޮންބެ ގުޅާފަ ބުނި މަންމަ ހިގައްޖެއޭ..  އެހެންވެ މި ނުކުމަތީ“ ލިފްޓްއިން ފޭބި ވިޝާމް އަށް އާމިލާ ފެނިގެން އައިސް ގާތުގައި ހުއްޓުނެވެ. އާމިލާ ހީލާފައި ވިޝާމްގެ އަތުގައި ހިފައިގެން އަލުން ލިފްޓަށް ވަނެވެ.

”ހޫމްމް.. މަންމަ އަންނަ ވާހަކަ ބުންޏެކޭ ކިޔާފަ، ދަރިފުޅުމެން ތިން ބެއިންނާއި ބައްޕައަށް ގެއަށް ދެވޭނެ ތަ ބަލާ.. ދެން ހުރީ މާއިން.. އޭނާގެ ވާހަކަ އިރު އަލިވާ ހިސާބުގައި ދައްކަން ހެޔޮވާނެތަ؟ އެހެންނޫނަސް ބައްޕަ ވެސް ގުޅާފަ ބުނި އޮފީހުގައި ނުހަނު ބިޒީ ވި ވާހަކަ.. އާދަމްބެ އާއި އެއްކޮން މިއައީ“ އާމިލާ ބުންޏެވެ.

”އާންން މަންމާ.. ޝެޑީ ބުނި ކޮންމެ ވެސް އެއް ރިޟޯޓަކުން ކަރަންޓް ދާ ވަރުން ގެސްޓްންގެ ޝަކުވާ އަންނާތީ އެކަމާއި އޭ މިއުޅެނީ“ ޔުމާން އާއި ސަދަފް މަސައްކަތް ކުރަނީ ހައިކަލްއާއި އެކު ކުންފުނީގެ މައި އޮފީހުގައެވެ. ހައިކަލްގެ ރިޟޯޓްތަކާއި ކުންފުނިން އަލަށް ފެށީ  ކޮންސްޓްރަކްޝަންގެ މަސައްކަތްތައް ބަލަހައްޓަނީ އެތަނުގައެވެ.

”މާއިން ކޮންތާކަށް ދިޔައީ؟“

“ މާއިން ހެނދުނު ނުކުތް މީހާ އަދި ލޮލަށް ދައްކާ ނުލާ.. އުޅޭ ތަނެއް ކުރާ ކަމެއް އެނގެނީއެއް ނޫން..“ އާމިލާގެ މޫނު ފެނިގެންދަނީ މޮޅިވެރިކަމެވެ.  މާއިންގެ ވާހަކަ ބުނުމުން ވިޝާމްގެ ގާތައް ރުޅި އަންނަ ގޮތްވިއެވެ. ކުރީ ދުވަހުގެ ހާދިސާއަށް ފަހު އޭނާ އަދި މާއިން އަކާއި ވާހަކައެއް ނުދައްކައެވެ.  މާއިން ދެފަހަރަށް ވާހަކަ ދައްކަން އުޅުމުން ވެސް ވިޝާމް އަޅާނުލައެވެ. އޭނާގެ ގާތައް އެދުވަހު އައި ރުޅި ފިނި ނުވާތީ އަނގައިން ބުނާހިތް ވެސް ނުވީއެވެ.

”ދަރިފުޅު ބޮޑު މީހާ ދެން ގޮތް ދޫކޮށްފަ ވާހަކަ ދައްކާ..ރަހިމުގެ ގުޅުން ހީނަރު ވާ ފަދަ ކަމެއް ކުރާކަށް ނުވާނެ.. މާއިން އަކަށް ނުވާނެ އެ ނޫން ގޮތެއް“

”ނޫން މަންމާ.. އޭނާއަށް އެއްޗެއް ވިސްނެންދެން މިފަހަރު ހުންނާނަން.. ބަލާބަލަ ޝެޑީ.. މާއިންއާއި ސޭމް އޭޖް.. އެކަމަކު އެހުންނަ ހަރުދަނާ ކަން ދެކިބަލަ..މާއިން ހަމައެކަނި ކަންނެތީ އެއް ވެސް ނޫން.. މީހާ ހަމަ ނުލަފާކަން ވެސް އިންތިހާއަށް ހުންނަނީ“ މާއިން އާއި މެދު ހިތްހަމަ ނުޖެހިފައި ހުއްޓާ އާމިލާގެ ވާހަކަ އެހެން ހުރުމުން ވިޝާމްއަކަށް ކަމަކު ނުދިޔައެވެ. ނަމަވެސް އޭނާ ވާހަކަ ދެއްކީ މަޑުމައިތިރި ކަމާއި އެކުއެވެ. އާމިލާ ވެސް އިތުރަށް އެއްޗެއް ނުބުނި ނަމަވެސް އެކަމާއި އެއްބަސް ވުމުގެ ގޮތުން ބޯޖަހާލިއެވެ. ލިފްޓުން އަރައިގެން މައްޗަށް ދެވުނުއިރު ތަނަވަސް ރެސްޓޯރެންޓް ތެރޭގައި ފުދޭވަރަކަށް މީހުން ގިނައެވެ. ދެމީހުން ހިނގާލާފައި ގޮސްވަނީ ކައްކާ ބަޔަށެވެ. އެތެރެއަށް ވަދެވުނު އިރު ކާތަކެތީގެ މީރުވަހުން ބަނޑުފުރޭހާ ވެއެވެ. ތަފާތު ބާވަތް ބާވަތުގެ ކާ އެއްޗިހި ތައްޔާރު ކުރުމުގައި އެވަގުތުވެސް ފަނަރަ ވަރަކަށް ކައްކާއިން ހަރަކާތްތެރި ވަމުންދިޔައެވެ. މަސައްކަތު މީހުން، ބަދިގެތޭރޭގެ ތަންތަން ސާފްކުރުމުން ފެށިގެން ކައްކާއިންނަށް އަތް ގާތް ކޮށްދީ ހަދަމުން ދިޔައެވެ. ގިނަ އަދަދެއްގެ ވެއިޓަރުން ވެސް ކަސްޓަމަރުންގެ ހިދުމަތުގައި އަވަދިނެތި އުޅެމުން ދިޔައެވެ.

”ބައްޕަ އެގުޅަނީ.. ކީކޭ ހައިކަލް .. އޭ.. އެހެންތަ..އާން.. އާން އޯކޭ“ އާމިލާއަށް ހައިކަލްގެ ފޯނެއް އައިސްގެން ނަގާފައި ވާހަކަ ދައްކަން ފެށިއެވެ.

”ކީކޭތަ ބައްޕަ ބުނީ؟“

”އޮފީހުން ނިމިގެން ދޮންބެއާއި ބައްޕައާއި ވެސް އަންނަނީއޯ މިކޮޅަށް އެ..“ އާމިލާގެ ޖަވާބުން އެހެންހޭ ބުނެ ވިޝާމް ހީލިއެވެ.

****

ގަލޮޅު ”މާވިނަ“ ގޭގެ ކުރިމައްޗަށް ހުއްޓާލެވުނު ކަޅުކުލައިގެ ކާރު އައިސް ގޭޓާއި ހަމަވުމުން، ’އޮޓޮމޭޓިކް ގޭޓް‘ ހުޅުވިގެންދިޔައެވެ. ކާރު އެތެރެއަށް ވަދެ އައިސް މަޑުކޮށްލީ ގެއަށް ވަދެވެން އޮންނަ ވޯކްވޭގެ ކުރިމައްޗަށެވެ. ޑްރައިވަރު ސީޓުގެ ދޮރު ހުޅުވާލުމަށް ފަހު ނުކުތީ މެދުއުމުރުގެ ފިރިހެނެކެވެ.

ކާރުގެ ކައިރިއަށް ހުއްޓުނު ނޯކަރަކު، ޒާހިރް ދަބަސްތައް ދިއްކޮށްލުމުން އެ ހިފައިގެން އޭނާ ގޭތެރެއަށް ވަންނަން ދިޔައެވެ.

”ދަރިފުޅާ ނުކުމޭ.. ދަރިފުޅާ ޒަން.. މިއޮތް އާދެވުނީ ގެޔަށް“ ޒާހިރް ގޮވާލި ނަމަވެސް ޒަންޔާ އަކަށް އެއަޑު ނީވޭ ކަހަލައެވެ. ކާރުގެ ފަހަތު ސީޓުގައި އިން އިރު އޭނާ އިނީ އެއް ދިމާލަކަށް ކަޅި ހުއްޓާލައިގެން ގެއްލިފައެވެ. ދެލޮލުގެ މިޔަކަނުގައި ވެސް ކަރުނައިގެ ތެތްކަން ހުއްޓެވެ. ޒަންޔާގެ ހާލަތު ފެނުމުން ޒާހިރްގެ ހިތައް ތަދުވިއެވެ. އެއްޗެއް ނުބުނެ ޒަންޔާގެ އަތުގައި ހިފާލައިގެން ކާރުން ނެރެދިނެވެ.

ގެއަށް ވަދެވުނު އިރު ލިވިންގރޫމު ސޯފާގައި އެމީހުންގެ އިންތިޒާރުގައި ލައިލާ އިނެވެ. ކަޅުކުލައިގެ ގަޔަށް ދޫ ޖިލްބާބާއި ވަށް ބުރުގާގެ ތެރެއިން ލައިލާގެ މޫނު ފެންނަނީ ނުހަނު ފުރިހަމަ ކޮންނެވެ. ޒަންޔާ ފެނުމުން އިން ތަނުން ތެދުވެ އަވަސް ފިޔަވަޅު ތަކެއްގައި އޭނާ އައިސް ހުއްޓިފައި ޒަންޔާގެ ގައިގާ ބައްދާލިއެވެ.

ލައިލާގެ އޯގާތެރިކަން އިޙްސާސް ވި ހިނދު ޒަންޔާއަކަށް އިތުރަކަށް ކެތެއް ނުވިއެވެ. އެ ހުރިހާ އިރު ހިފަހައްޓާލައިގެން ހުރި ކަރުނުތައް ދޫކޮށްލެވުނެވެ. ކުޑަ ކުއްޖެއް ފަދައިން ލައިލާގެ ގައިގާ ބައްދާލައިގެން ހުރެ ރޮމުން ދިޔައިރު އެ މަންޒަރު ބަލަން ޒާހިރްއަށް ވެސް ހުރީ ކެތްކުރަން އުނދަގޫވެފައެވެ. ދެމައިންގެ ފަހަތުން އޭނާ ވެސް ބައްދާލިއެވެ.

ޒާހިރް ދުރުވެލީ ޒަންޔާ ގޮވައިގެން ލައިލާ އެންމެ ގާތައް ހުރި ކޮޓަރިއަށް ވަނުމުންނެވެ. ލައިލާ އެނބުރި އަންނާނެ އިރެއްގެ އިންތިޒާރުގައި ޒާހިރް އިށީންދެލީ ސޯފާގައިގައެވެ.

”ބައްޕާ.. ދޮންތި މެން އައީތަ..އެއްކަލަ ދައްތައާއި މާކް ބޭބެ ވެސް އައި ދޯ؟ ކާންޓް ވެއިޓް ޓް މީޓް ދެމް“ ގޭގެ ޑްރައިވަރަކާއި އެކު ގެޔަށް ވަދެގެން އައީ އުމުރުން ތޭރަ އަހަރުގެ ޒާރާއެވެ. އޭނާގެ މޫނުމަތީގައި ހުރި އުފާވެރިކަން ފެނި ، ޒާހިރް ހިތި ގޮތަކަށް ހީލިއެވެ.

”ކޮބާ ދަރިފުޅާ ޓިއުޝަން ކިހިނެތް؟ “ ޒާހިރް އަހާލުމާއި ޒާރާ ރަނގަޅު ކަމުގައި ބުނެ ހީލިއެވެ.

”ބައްޕާ އަޅުގަނޑު މިއަދު ފޮނުވާ ދީ ފާނަންތަ ނީޝަން މެން ގެޔަށް.. ކުރިއަށް އޮތީ ވީކެންޑް ވީމަ ވީ ޕްލޭންޑް ހޭންގްއައުޓް ކޮށްލަން.. އައި ޕްރޮމިސް އެގޭ ބޮޑު މީހަކާއި އެކު ނޫނީ ބޭރަކަށް ނުނިކުންނާނަން“ ނުހަނު އުއްމީދާއި އެކު ޒާރާ އެދުނެވެ.

”އަމް ސޮރީ ޒިޒީ.. މްމްމް އެކްޗްއަލީ ދޮންތި އެކަނި އައީ..މާކް ބޭބެ އާއި އެ ދައްތަ ނާދެ“

”ވަޓް!.. ބަޓް.. ބައްޕަ ސްޕެއިންއަށް ދިޔައީ އެމީހުން ބަލަ އެއްނޫންތަ؟“ ޒާހިރްގެ އެއްވެސް ޖުމްލައެއް ޒާރާއަކަށް ނުވިސްނުނެވެ. އޭނާގެ މޫނުމަތީގައިވީ ކޮޅުނެތް ކޮޅަށް ހައިރާންކަމެވެ.

ޒާރާއަށް ޖަވާބެއް ދެވުމުގެ ކުރިން ، ކޮޓަރިން ނުކުމަތް ލައިލާ ފެނި ޒާހިރްއަށް ބުމަ އަރުވާލެވުނެވެ. ޒާހިރްއާއި މަގަތުގައި ލައިލާ އިއްތާލި އިރު އޭނާގެ މޫނުމަތިން ފެނިގެންދަނީ މާޔޫސް ކަމެވެ. ޒާހިރް ލޮލުގެ އިޝާރާތުން ޒާރައަށް އިހަށް އެތަނުން ދިޔުމަށް އެދުމުން އޭނަ ބޯޖަހާލާފައި އެތަނުން ދިޔައެވެ.

”ވާހަކައެއް ނުދެއްކި.. މާ ބޮޑަށް ދެރަވެފަ އެހުރީ.. އެމީހުންގެ ވާހަކަ އަހަރެން ބުނީން ސުރެން ޒަން އެކަމާއި އުޅުނު ގޮތް އަހަންކަށްނު ފެންނާނީ..އެކުއްޖާ ލޮލު ފިޔައެއް ނުޖަހާ އެކަމަށް ތައްޔާރު ވީ އިރު… ޒަން ހާދަ މަސައްކަތެއް ކޮށްފިއޭ.. ދެމީހުންނަށް އެހެންވީމަ އޭނާ ދެރަވާނެ އެންނު.. “ ލައިލާގެ އުދާސީ އަޑުން ބުނެލިއެވެ. ޒާހިރްއަށް ވެސް ސޯފާގައި ލެނގިލެވުނު އިރު ފުން ނޭވާއެއް ދޫކޮށްލެވުނެވެ.

”އަހަންނަށް ޔަގީން މާކް ސަލާމަތުން ހުރިކަން… އެކަމަކު ކަންތައް ބޮޑީ އަމީރާ ގާލް އާއި މެދު.. އެކުއްޖާ ވީތަނެއް ވެސް ނޭނގޭތީ..“

”އިންޝާﷲ ފެންނާނެ.. ލައިލާ އެކޮޅުން ހަޔާރ ކުރި ޒުވާނާގެ ހަބަރެއް އިވޭތަ؟ ހީވޭތަ އަހަރެމެންނަށް ވަފާތެރި ވާނެހެން؟ “

”ލިއޯ ތަ؟.. އަދި ނުގުޅާ .. އެކަމަކު އޭނާ އެ މަސައްކަތް ކުރާނެ.. އެއީ އަހަރެންގެ އެކޮޅު ރަހްމަތްތެރި އެއްގެ ދަރިއެއް.. އޭނާގެ މަންމަގެ ކެންސާރ ބަލީގެ ޓްރީޓްމަންޓްއަށް އެހީވެދިނީ އަހަރެމެންނެއްނު.. އެހެންވެ އޭނާ ވަރަށް ބަލާނެ އަހަންނަށް.. އަދި ލިއޯއަށް އިތުބާރު އެބައޮތް.. ލެޓްސް ވެއިޓް ފޯރ ހިޒް ކޯލް“ ލައިލާގެ ޖަވާބު އާހާފައި، ޒާހިރްވެސް ބޯޖަހާލިއެވެ. ޒާހިރްގެ އަތްމަތީގައި ލައިލާ އަތް ބާއްވާލިއެވެ. މާކިންއާއި މެދު އޭނާ ނުވިސްނަނީއެއް ނޫނެވެ. ނަމަވެސް ކެތްތެރިވެގެން ތިބުން ނޫން ގޮތެއް ވެސް ނެތެވެ.

***

ކަޅުކުލައިގެ ޖީންސަކާއި މަޑު އަޅިކުލައިގެ ކޮޓްން ގަމީހެއް ލައިގެން އަމީރާ ލޯގަނޑުން ބަލައިލިއެވެ. އެއްވެސް މޭކަޕެއް ނެތިވެސް ނުހަނު ރީއްޗެވެ. މޭކަޕް ކުރުމަކީ އެއް އިރެއްގައިވެސް އޭނާ ކުރިވެސް ކަމެއް ނޫނެވެ. އަމީރާ އުޅެން ފެށީ އިސްތަށިގަނޑަށް ގޮތެއް ހެދުމަށެވެ. އާންމު ގޮތެއްގައި އޭނާގެ ރާޅުބާނީ އިސްތަށިގަނޑު އޮންނާނީ ފަހަތައް ދޫކޮށްލާފައެވެ. ނުވަތަ އައްސާފައެވެ. ނަމަވެސް އިންޓަވިއުއަކަށް ދާއިރު ކުޑަކޮން ތަފާތުކޮށްލަން އޭނާ ބޭނުންވިއެވެ.

”މި އިސްފިރޭނު ގަނޑަށް ވެސް އަބަދު ހެން ތެޅިލަ ތެޅިލަ އޮންނަން އެނގޭނީ“  އަމިއްލަ ސޫރައަށް ބަލަން ހުރެ ހުރެފައި އަމީރާ ކުދި ކިޔާލިއެވެ.

”އެމީ ކޮބާ ރެޑީ ވެވިއްޖެތަ“ އަމީރާގެ އިންތިޒާރުގައި ބޭރުގައި އިނދެ އިނދެފައި އިރަމް ކޮޓަރި ތެރެއަށް ވަނީ އޭނާ ނުނިކުމެ ލަސްވުމުންނެވެ. އަމީރާ ހުރިގޮތް ފެނި އިރަމްއަށް ނިތްއަރުވާލެވުނެވެ.

“ކެން ވީ އެކްސްޗޭންޖް އަޥާރ ހެއާރސް“ އަމީރާ ދިޔަ ގޮތައް ގޮސް ހުއްޓި އަތް ޖައްސާލި އިރާމްގެ ފަންފަން އިސްތަށިގަނޑުގައެވެ. ތުންފިއްތާލައިގެން ހުރެ އަމީރާ ކިޔާލި ގޮތުން، އޭނާގެ ގާތައް ހިނިއައެވެ.

”ޔެސް ޔެސް.. އައި ވީޝް އައި ކެން ޑޫ އިޓް… އޭރުން ރޮއެރޮއެ ގެން ވެސް މި ހެއާރ އަތުލާނަން..އަހަރެން ހާދަ މަސައްކަތް ކުރަމޭ ކާލް ކުރަން..ކިޙާ ލޯބި އެމީގެ ހެއާރ.. މާޝާﷲ“

”ސިއަސްލީ އިރޫ؟ އައި ހޭޓް ދިޒް.. ފުނާ އަޅަން މީހަކު ހަޔާރ ކުރަން ވީ.. މީ ވާވަރު ކަމެއް ނޫން“ އިރަމްގެ ޖަޥާބު އަހާފައި އަމީރާ ވަގުތުން ދެކޮޅަށް ބޯ ހޫރުވަން ފެށިއެވެ. އިރަމް ހިނިގަނޑެއް ޖަހާލާފައި އަމީރާގެ އިސްތަށިގަނޑު  ދޫކޮން ގަތާލާފާއި ގެނެސް ކޮނޑުމަތިން ކުރިއަށް ގެނައެވެ. އެ މަސައްކަތް ނިންމާލާފައި އިރަމް ލޮލުގެ އިޝާރާތުން ލޯގަނޑުން ބަލައިލުމަށް އަމީރާއަށް އަންގާލިއެވެ.

”ވޯޙް..ވަޓް އަ ބިއުޓީ.. ހާދަ ލޯބިއޭ މިހާރު.. ލޫކްކް“ ދެއަތް ޖޯޑުކޮށްލަމުން އިރަމް އުފާވެރި ގޮތަކަށް ބުނެލިއެވެ. އެކި އަރިއަރިއަށް ހުއްޓި ލޯގަނޑުން ބެލި އިރު ހިތްހަމަ ޖެހޭ ވަރު ވުމުން އަމީރާވެސް ހީލިއެވެ.

”ތޭންކިއު އިރޫ.. ކޮންމެ ދުވަހަކު އިރޫގެ ޖޮބް އެއް މިއީ އެހެންވީމަ.. އަހަރެންގެ ބޮލުގަ ފުނާ އަޅުވާދޭން“

”އުފަލާއި އެކު ބަލައި ގަންނަން.. އިރޫ ތަންކޮޅެއް ކުޑައިރު އިންނަން ދޮންތަ ނޫނީ ދޮންބެގެ ކޮނޑަށް އަޜާފަ… ފުނާ އަޅާލަ އަޅާލަ.. ދޮންތި މެރީ ކޮށްގެން ދިޔައީމަ ދެން ދޮންބެއަށް އުނދަގޫ ކުރަނީ އަބަދު ވެސް.. އޭނާ އޭލެވެލް ނިމި ޕޮލިހަށް ވަނުމުގެ ކުރިން ހުންނާނީ ހެއާރ ދިގުކޮށްފަ.. މީރާން އާއި ނީޝާން ވަރަށް ރުޅި އަންނާނެ އިރޫ ފުނާ އަޅަން ބުނެފިއްޔާ.. ބިކޯޒް މިޙާ ލޯބިންނެއް ނާޅުވާ ދެން އެމީހުން ބޮލަކު ..އުނދަގޫ ކުޜާ ވަރުން އަބަދުވެސް ޕެއިންފުލްކޮން އެކަން ކޮށްދެނީ..“ އިރަމް ހިނިގަނޑެއް ޖަހާލަމުން އަމީރާގެ އަތުގައި ހިފައިގެން ކޮޓަރިން ނުކުންނަން ދިޔައެވެ.

އިޔާންގެ ވާހަކަ ބުނެލުމުން އަމީރާގެ ހިތައް ޒާތެއްގެ ފިންޏެއް ވެގެން ދިޔައެވެ. ހިސާބަކަށް ހައިޜާން ވެސް ވިއެވެ.  އިޔާންގެ އިސްތަށިގަނޑު ދިގުކޮށްފައި ހުއްޓާ ފޮޓޯއަކުން ވެސް އަމީރާ ނުދެކެއެވެ. ދެކިލަން ޝައުގުވެރި ވިއެވެ. ހިތް އެދުނަސް އެކަމަށް އިޖާބަ ދޭކަށް އޭނާ ބޭނުމެއް ނޫނެވެ. އިއްޔެގެ ހާދިސާއަށް ފަހު އޭނާއަކަށް އަދި އިޔާންއަށް ނުފެނެއެވެ.

ސިޑީން ރޫމަށް ނުކުތް ހިނދު، އޭނާ ފެނުމުން މަޖުދާ އާއި ނަދީމް ނުހަނު ލޯބިން ގޮޥާލިއެވެ.

”އޯލް ދި ބެސްޓް އެމީ.. އިޔާ ވެއްޖެ ތިރީގަ.. ބުނިން އެމީ ގެންގޮސްދޭށޭ.. އޭނާ ވަންނާނެ އެމީއާއި އެއްކޮން ދާންޖެހޭ ހިސާބަށް..“ އިޔާން ފެންނަން ނެތުމުން ހަމަޖެހުމުގެ ނޭވާއެއް ލީ ހިނދު މަޖުދާ ބުނެލި ޖުމްލައިން ލައިލައި ހުރި ނޭވާ ވެސް ހީ ތާށިވެގެން ދިޔަހެންނެވެ. އޭނާގެ މުޅި ހަށިގަނޑު ފިނިވެގެން ދިޔައެވެ.

”ދައްތަ ވެސް ދާން އުޅުނީ..އެކަމަކު މީރާންގެ ޕޭރެންޓް މީޓިންގ އެއް މިރޭ އިންނާތީ ވެ ނުދެވުނީ.. ބަޓް އިޔާ ގެންގޮސްދޭނެ އާމިލާ މެންނާއި ހަމައަށް އެމީ.. ގެއަށް ވެސް ގެނެސްދޭން ބުނިން.. އެހާ ބޮޑަށް ހާސް ނުވެ މެންދުރު ގޭގަ ކެއްކިފަދަ ކެއުމެއް ހެދޭތޯ ބަލާލަ.. ޔަގީން އެމީ އަށް އެކަން ވާނެކަން.. “  މަޖުދާ ދެމުން ދިޔަ ހިތްވަރުން ހަމައަކަށް އެޅެމުން ދިޔަ ނަމަވެސް، އިޔާންއާއި އެކު ދާން ޖެހޭކަން އިޙްސާސްވެ އަމީރާއަށް ވަރަށް އުނދަގޫވަމުން ދިޔައެވެ.

އެމީހުންގެ ހިތައް އެއްޗެއް އެރުމުގެ ކުރިން ފުރިހަމަ ހިނިތުންވުމެއް ހަދިޔާ ކޮށްލާފައި އިރަމްގެ ފަހަތުން ނުކުމަންނަން ދިޔައެވެ. ލިފްޓުން ފެށިގެން ދޮރާއި ހަމައަށް ދެވެންދެން އިރަމް ހުއްޓުމެއް ނެތި ވާހަކަ ދައްކަމުން ދިޔައިރު އަމީރާއަށް ހުރެވުނީ އާން ހޫން ކިޔާލަ ކިޔާލައެވެ.

ގަރާޖުން ނެރެފައި އޮތް އިޔާންގެ ކާރު ފެނި އަމީރާ ހަނދާނެ ގޮތެއް ނޭގިފައި ހުއްޓާ، އިރަމް ވެސް އެތެރެއަށް ވަންނަން ދިޔައެވެ. ހިތް ނެގިނެގިފައި ޖެހެމުން ދިޔަ ގޮތުން މޭގައި އަތް އަޅާލައިގެން ހުރެ ހަމަޖެހިލުމަށްޓަކައި އަމީރާ ދެތިން ނޭވާ ލިއެވެ.

ދޮރުމަތީގައި ހުރި އަމީރާ ފެނި އިޔާންއަށް ކަޅިޖަހާނުލަ ދިޔައީ ބެލެމުންނެވެ. އެ ރީތި އަންހެން ކުއްޖާގެ ކޮންމެ އަދާއެއް އޭނާގެ ހިތުގައި ޤައިދުވެގެން ދަނީ އަޖައިބެއް ފަދަ ގޮތަކަށެވެ. އެ މޫނުގައި ބޮސްދޭން ހިތް އެދެމުން ދިޔައެވެ. ރޮމުން އެ ފައިބުޑަށް އަދި އެއްފަހަރު ވެއްޓި ވާހަކަ ދައްކާތޯ އާދޭސް ކުރަން އޭނާގެ ޒަމީރް އެދި ގޮވަމުން ދިޔައެވެ.   ކެތްކޮށްލައިގެން ދުރުގައި ހުރުން ނޫން ގޮތެއް އަދު ނެތެވެ. ދެލޮލުގެ މިޔަކަން ތެމޭހެން ހީވެގެން ހިންދިރުވާލާފައި އިޔާން ކާރު އަނބުރާލާފައި ގޮސް މަޑުކޮށްލީ އަމީރާގެ ކުރިމައްޗަށެވެ. އެއްޗެއް ނުބުނެ އޭނާ ހުއްޓެވެ. ނަމަވެސް އަމީރާ ކާރަށް އަރާކަށް ނޫޅުނެވެ.

”ގެޓް އިން!“ ކުރިއަށް ފިޔަވަޅެއް އަޅަން ވެސް ނުކެރިފައި ހުއްޓާ އެންމެ ފަހުން އަމީރާއަށް އިސްއުފުލާލެވުނީ ކާރުގެ ލޯގަނޑު ތިރިކޮށްލާފައި އިޔާން ގޮވާލުމުންނެވެ. އެހެން ބުނި އިރު ވެސް އަމީރާގެ މޫނަށް އިޔާން ބަލައިވެސް ނުލިއެވެ. އެއަޑުގައި ހުރި ބީރައްޓެހި އަސަރަކުން ހިތައް ވީ ތަދު ފޮރުވަމުން އޭނާ ގޮސް ހުޅުވާލީ ކާރުގެ ފަހަތު ސީޓެވެ. ފުރަތަމް ވެސް ފެނުނީ ރަތް ކުލައިގެ ފިނިފެންމާ ބޮނޑިއެކެވެ. އަމީރާއަށް ހުއްޓުންއެރިއެވެ. މާ ބޮނޑި އެއްކައިރިއަށް ޖައްސާލަމުން އަމީރާ ސީޓުގައި ހަމަޖެހިލިއެވެ. ދޭތެރެއަކުން އެއަށް ނަޒަރެއް ދެވެއެވެ. އެހެން އިންދާ އިޔާން ކާރު ދުއްވާލިއެވެ.

”މިޙާ އަވަހަށް އަހަރެންގެ މަތިން އިޔާ ހަނދާން ނައްތާލީ ދޯ.. އަހަންނަށް މިއުޅެނީ ސައުވީސް ގަޑިއިރަށް ވެސް ކެތް ނުކޮށްލެވިގެން..“ ހިތާއިހިތުން ކިޔާލެވުނު އިރު، ދެލޮލަށް ޖަމާވަމުން ދިޔަ ކަރުނުތައް ހުއްޓުވާލުމަށް ޓަކައި މަސައްކަތް ކުރަމުން، އޭނަ ކާރުގެ ބިއްލޫރި ގަނޑުން ބޭރު ބަލަން ފެށިއެވެ. ނުބަލަން ހިތްވަރު ކުރަމުން ދިޔަ ނަމަވެސް އިޔާންގެ މޫނަށް އަމީރާއަށް ނަޒަރެއް ދެވުނެވެ. ޑްރައިވަރު ސީޓުގެ ކުރިއަށް، އިން ލޯގަނޑަށް ހަނި ނަޒަރެއް ދިން އިރު އިޔާންގެ ފިރިހެންވަންތަ ސޫރަ ފެނުމުން އަމީރާއަށް ހިންދިރުވާލެވުނެވެ. ތުނބުޅީގައިވާ  އިސްތަށިތައް ކުރިއަށް ވުރެން  ދިގުވުމުން ވަކިން ފުރިހަމައެވެ. އެ ރަތް ތުންފަތުގައި އެއްވެސް ކަހަލަ ހިނިތުންވުމެއް ނެތެވެ. މަގަށް ނަޒަރު ހިންގާލައިގެން އިނދެ ދުއްވަމުން ދިޔައިރު އެ މޫނުމަތިން ހަރުކަށިކަން ވެސް ފެންނަން ހުރިހެން އަމީރާއަށް ހީވިއެވެ. އިޔާން ބަލާލަން އުޅޭހެން ހީވެގެން އަމީރާ އިސްޖެހިއެވެ.

ބުރިޖް ހުރަސްކޮށް، މާލޭގެ ބޮޑެތި މަގުތަކުން ދުއްވާފައި އައިސް އެ އިމާރާތުގެ ތެރެއަށް އިޔާޏް ކާރުގައި ވަނެވެ. ޕާކިންގ ޒޯނުގައި ކާރު ބޭއްވުމަށްފަހު އިޔާން ކާރުން ފޭބިއެވެ. ނަމަވެސް އަމީރާއަށް ފައިބާކަށް ނުކެރުނެވެ. އޭނަ މަޑުން އިނީ އިޔާން އެއްޗެއް ބުނަންދެނެވެ. ނަމަވެސް އިޔާންގެ އަނގަޔަކުން ބަހެއް ބޭރެއް ނުކޮށްލިއެވެ. އޭނާ ފޭބިގޮތައް އައިސް އަމީރާ އިން ފަޅީގެ ދޮރު ހުޅުވާލަދިނެވެ. ތުންފިއްތާލަމުން އަމީރާވެސް ބަހަކުން ބަހެއް ނުބުނެ ފޭބުމަށް އުޅޭގެން ހިނދު އޭނާއަށް ފައި އެޅުނު ގޮތަކުން ފުރޮޅުނެވެ.

”އާތްތްހްހް“ އަމީރާ ހީކުރީ އޭނާ ވެއްޓެން ދިޔައީ ކަމަށެވެ. ދެލޯ މަޜާލާ ބާރުކޮށްގެން ހުރެ، ތޫލިއަޑަކުން ހަޅޭއްލަވައި ގަނެވުނެވެ. ނަމަވެސް އިޔާން ހުށިޔާރު ކަމާއި އެކު އެ ބާރުގަދަ ދެއަތުގެ ތެރޭގައި އަމީރާ ހައްޔަރު ކޮށްލަމުން ގަޔާލާ ފިތާލިކަން ކަން އިޙްސާސްވެގެން އަމީރާއަށް ދެލޯ ހުޅުވާލެވުނެވެ. އެ ހަށިގަނޑުގެ ހޫނުކަން އޭނާއަކަށް ނޯޅޭނެއެވެ. އެތައް ދުވަހަކަށް ފަހު އެފަދަ ގާތްކަމެއް އިޙްސާސްވެގެން ދިޔައިރު ދެހިތުގައި އުފެދެން ފެށީ ތަފާތު އަސަރެކެވެ. އެކަކު އަނެއްކަކުގެ ހަތަރު ކަޅި ހަމަވެގެން ދިޔައެވެ. އަޑު ނީއްވިނަމަވެސް ހީވީ ދެހިތުގައި ބަދެފައިޥާ ޝަކުވާތައް ދެމީހުންނަށް އިއްވާލަ ދޭން އުޅުނު ހެންނެވެ.

”އެހެމް އެހެން“ ދެމީޙުން ސިހުނީ ދާދި ގާތުން މީހަކު ކަރުކެހިލުމުންނެވެ. ތިބެވުނުގޮތް އިޙްސާސްވީ ވެސް ދެނެވެ. އަމީރާއާއި ދުރަށް ޖެހިލަމުން އިޔާން ބަލައިލި އިރު ލާނެތް ހިންޏެއް ހީލައިގެން ކުރިމަތީގައި ހުރި ވިޝާމް ފެނި އިޔާންއަށް ނިތް އަރުވާލެވުނެވެ. ވިޝާމްއާއި ފުރަގަސްވާހެން އަމީރާ ހުރުމުން ވިޝާމްއަކަށް  އޭނާއެއް އެރަކު ނުފެނެއެވެ.

”މިތަގަ ކީއްތިކުރަނީ.. އަހަރެންގެ ކެބިން ވަރަށް ހުސްވާނެ މިވަގުތު“ ކިތަންމެ އުނދަގޫ ހާލަތެއްގައި ހުރި ނަމަވެސް ވިޝާމްގެ ލާނެތް ޖުމްލައިން އިޔާންގެ ގާތއް ހިނިއަންނަ ގޮތްވިއެވެ. އަމިރާއަށް ނީވޭހާ މަޑުން ބުނެލިކަން ވެސް ނަސީބެކޭ ހިތައް އެރިއެވެ.

ބުނި އެއްޗެއް ނޭނގުނު ނަމަވެސް ފަހަތުގައި ހުރި މީހަކު ކޮންމެ ވެސް އެއްޗެއް ބުނެފައި ހޭން ފެށި އަޑު އިވިގެން، އަމީރާ ވެސް ފަސް އެނބުރުނެވެ. އެހިނދު ކުރިމަތީގައި ސޫރަ ފެނި އޭނާއަށް ފާޑަކަށް ހުއްޓުން އެރިއެވެ. ކީއްވެކަމެއް ނޭނގުނެވެ. އެއީ އޭނާ އައި ދުވަހު ޔުމާން ފެނުނު ހިނދު ވީ ގޮތެވެ. ކޮންމެ ވެސް ތާކުން ކުރިން ދެކެފައިވާ މީހެއް ހެން ހީވިއެވެ.

ވިޝާމްއަށް ވެސް ހުއްޓިފައި ހުރެވުނު އިރު ޒާތަކަށް ނެގިމަޑުވިއެވެ. ވީ ގޮތެއް ވެސް ނޭނގުނެވެ.  ގައިމުވެސް އެއީ ކުރިމަތީގައި ކުއްޖާ ރީތިވެގެން ހނުވަތަ ހިތްކިޔައިގެން ހިތައް ކުރުވި އަސަރެއް ނޫނެވެ. މޫނުމަތީގެ ކުލަވަރު ފޮރުވާލުމަށްފަހު އޭނާ ގަދަކަމުން ހިނިތުން ވެލެވޭތޯ ބެލިއެވެ. އެކަން ވެސް ކުރަން ވީ އުދަގޫ ކަމަކަށެވެ.

”އެހާ ވަރަށް ނުބަލާ .. ޝީ އިޒް މައިން“ ވިޝާމްއަށް ވެގެން ދިޔަ ގޮތް އިޔާންއަކަށް ސިއްރެއް ނުވިއެވެ. ދިމާކޮށްލާފައި އޭޏާގެ ކޮނޑަށް އަތް ވައްޓާލައިގެން ހުރެ ހިނގައިގަތެވެ.އިޔާން ދަމުން ފަސް އެނބުރިފައި، އެމީހުންގެ ފަހަތުން އައުމަށް އެދި އަމީރާއަށް އަތުން އިޝާރާތް ކޮށްލިއެވެ.

”މުހައްމަދު އިޔާން.. އާރ ވީ ބެސްޓް ފްރެންޑްސް؟“ އަމިއްލަ މީހާއަށް ވެފައި ހުރި އުނދަގޫތައް އެއްފަޜާތް ކޮށްލަމުން ވިޝާމް އޭނާގެ ލާނެއްކަމުގައި ބުނެލިއެވެ. އިޔާންގެ ތުންފަތުގައި ދުވެލީ ފަނޑު ހިނިތުންވުމެކެވެ.

”ބީ އީޒީ އޮން ހާރ… ޝީ ބިލޯންގްސް ޓް މީ.. ކޮފީއަކަށް އަރާ ކަހަލަތަ ؟ އެބަހުރި ލައްކަ ވާހަކަ“

”މައްސަލަ އެއް ނޯންނާނެ..“އިޔާންގެ ކޮނޑުގައި ޖަހާލާފައި ވިޝާމް އިތުރަކަށް އެއްޗެއް ނުބުންޏެވެ.

އިސްޖަހައިގެން ހުރެ، ލިފްޓުގެ ތެރެއަށް ވަދެފައި އަމީރާ މަޑުކޮށްލީ ދޮރާއި ގާތުގައެވެ. ބަހަކުން ބަހެއް ނުބުނެ އޭނާ ހުރި އިރު އިޔާންގެ ސަބަބުން ހިތައް ވެރިވެފައިވަ މޮޅިވެރިކަން ހައްތަހާ ދިޔައީ ފުންވަމުންނެވެ. ”އެޓްލީސްޓް ބުނެވިދާނެ އެންނު ގުޑް ލަކް އޭ ވެސް..“ އަމީރާއަށް ލޯ މަރާލެވުނެވެ.

”ލެޓްސް ގޯ“ އަތްވަނަ ފަންގިފިލައަށް ލިފްޓް ހުއްޓުމާއި އެކު އަމީރާއަށް އިވުނީ ވިޝާމްގެ އަޑެވެ. އަމީރާ ހުރިގޮތުން އޭނާ ނުފައިބަނީސް އެމީހުންނަކަށް ނުފޭބެނެއެވެ. އަމިރާ ލިފްޓުން ނުކުމެ ހުއްޓިލީ އެމީހުންނަށް ކުރިމަތި ވާނެހެންނެވެ. ދެން ހަދާނެ ގޮތެއް ނޭނގޭތީ އެމީހުން އެއްޗެއް ބުނަންދެން އަމީރާ މަޑުކޮށްލިއެވެ.  އޭރު ވިޝާމް ފޯނު ނަގައިގެން ހުރެ ކޮންމެވެސް މީހަކަށް ގުޅަން ވެގެން އުޅެމުންދިޔައެވެ. އިޔާން ވެސް ފޯނު ނަގައިގެން ހުރެ ބަލަމުން ދިޔަ ގޮތުން އަމީރާއަށް ފާޑަކަށް އެކަނިވެރިކަން އިޙްސާސް ކުރެވެމުން ދިޔައެވެ. ހިލޭ ތާކަށް ގެނެސް ވެސް އިޔާންގެ ފުށުން އެއްވެސް ވަރަކަށް އަޅާލުމެއް ނުފެނުނީތީ އަމީރާގެ ހިތް ޝާކުވާއިން ފުރެމުން ދިޔައެވެ.

ނަމުގައި ފޯނަށް ނަޒަރު ހުއްޓާލައިގެން ހުރި ނަމަވެސް އިޔާންގެ ހުރިހާ ސަމާލްކަމެއް ހުރީ އަމީރާއަށެވެ. އެ މައުސޫމް ދެލޮލުން އޭނާގެ މޫނަށް ބަލަހައްޓާއިގެން ހުރި ނަޒަރް އޭނާ ދެކުނެވެ. އެ ނަޒަރުގައި ލޯބި ނޫން އިތުރު ކުލައެއް ނުވެއެވެ. ނަފްރަތާއި އެކު އެތަކެއް އިންޒާރު ދިން ނަމަވެސް އެހިތުގައި އިޔާންއާއި މެދު އުފެދިފައިވާ ލޯބި އަދިވެސް އެގޮތުގައި ވާކަން އެ ދެލޯ ހެކިދެއެވެ.

”މަންމަ އެބައާދޭ އެނގޭ.. ލެޓްސް ގޯ އިންސައިޑް“ ހިތްހެޔޮ ހިނިތުންވުމަކާއި އެކު ވިޝާމް ބުނެލިއެވެ. އޭނާގެ ޖުމްލައިން އަމީރާގެ ތުންފަތައް ވެރިވި ހިނިތުންވުން ދެކެފައި ވެސް ވިޝާމްއަށް ބަލަހައްޓައިގެން ހުރެވުނެވެ. ”ފްރޮމް ވެއާރ.. ފްރޮމް ވެއާރް.. ފްރޮމް ވެއާރރ..“ ވިޝާމްއަށް ހީވީ އެ އަންހެން ކުއްޖާ ކޮންމެ ވެސް ތާކުން އެތަކެއް ފަހަރު ފެނިފައިވީ ހެންނެވެ. ހަނދާން ކުރަން މަސައްކަތް ކުރި ނަމަވެސް ހަނދާނެއް ނުވިއެވެ.

”މްމްމް.. ވޮޝް..ވޮޝް ރޫމް އިންނަނީ ކޮންތާކު..“ ޖެހިލުން ވެފައި ހުރެ އަމީރާ އަހައިލިއެވެ. ވިޝާމް އަތުގެ އިޝާރާތުން ދައްކައިލީ ލިފްޓާއި ޖެހިގެން ހަނިކޮން އޮތް ގޯޅިއަކަށެވެ. އެތަނުގައި ފާހާނަ ބަރި އިންނާނެ ކަމަށް ބުނުމުން ޝުކުރު އަދާ ކުރުމަށްފަހު އަމީރާ އެދިމާލަށް ހިނގައިގަތެވެ.

ފަސޭހަކަމާއި އެކު ފާހާނަ ބަރި ފެނުމުން އޭނާ އެތެރެއަށް ވަނެވެ. އެތެރޭގައި ހުރި ތިން ފާހާނާގައި ވެސް މީހުން އުޅޭތީ އަތް ދޮންނަ ސިންކްތައް ހުރި ކެބިނެޓްގައި ލައްވެލައިގެން އަމީރާ މަޑުކޮށްލީ އެތަނުން އެއް ފާހާނައެއް ހުސް ވަން ދެންނެވެ. އެގޮތުގައި ހުންނަތާ ސިކުންތު ކޮޅެއްފަހުން އެއް ދޮރު ހުޅުވާލާފައި އަންހެން ކުއްޖަކު ނުކުމަތެވެ.  ވަންނަން ދަމުން އަމީރާ ހީލުމުން އޭނާ ވެސް ހިނިތުންވެލިއެވެ.

“ ޝިއުނާ އެނގޭތަ.. ސްޕެނިޝް ކެއުންތައް ކެއްކުމަށް އުޅޭ ސެމިއުލް ޝެފް ޖޮބް އިން ކަނޑާލާފަ ފޮނުވާލަނީއޯ.. ކެން ޔޫ ބިލީވް ދިޒް؟ މިތަނުގެ އެންމެ ފޭމަސް ކަމަކީ ވެސް މިތަނުން ލިބޭ ސްޕެނިޝް ރަހަތައް.. ސެމިއުލް އަކީ  ތަނުގެ އެންމެ ގިނަ ދުވަސް ވީ އަދި އެންމެ ތަޖުރިބާ ވެސް ހުރި ޝެފް އެއީ.. މިތަން ހިންގަން މިއުޅޭ މީހުން ކިހިނެތް ހަދާނަމޭ ހިތާތަ އެއުޅެނީ“ އަމީރާ ފާހާނާ ތެރޭގައި އުޅެނިކޮން އިވުނީ ދެ އަންހެން ކުއްޖަކު ވާޙަކަ ދައްކާ އަޑެވެ. ފާހާނާކޮށް ނިމުމުން ވެސް ނުނިކުމެ މަޑުކޮށްލައިގެން ހުރީ އެމީހުން ދައްކާ ވާހަކަ އަޑުއަހާލާން އެވަގުތު ހިތައް އެރުމުންނެވެ.

”ހޫމްމް އާލާ.. އަޑު އެހީމޭ ތި ވާހަކަ.. އަށާރަ އަހަރު ވެސް ނުވާ މަންޖެ އެއް ކަމަށް ވަނީ އެ ގެންނަނީ.. ގައިމު ތަޖުރިބާ އެއްވެސް ހުންނާނީ އެއް ނޫން.. އެއީ ހަމަ ކިރިޔާ ސްކޫލުން ކިޔަވާ ނިމިގެން އައި ގޮލައަކަށް ވާނީ.. ހުސް ގޯލްޑްޑިގާރސް ވިއްޔަ އުޅެނީ..  ވިޝާމް ފަހަތުން އަޅުވާ ނުލައިފިއްޔާ ވާ ރަނގަޅު..“ ޝިއުނާ ބުނެލަމުން ، އޭނާގެ ކުޑަ އަތް ދަބަސް ތެރެއިން ލިޕްސްޓިކް ފުޅި އެއް ނެގިއެވެ. ދެތުންފަތުގައި ވި ގަދަ ރަތް ކުލަ އިތުރަށް ފަވާލަމުން ލޯގަނޑުގެ ކުރިމަތީގައި ހުރެ ދެފަރާތައް އަރިވެލިއެވެ.

”ކޮން ނަމެކޭ ތަ ކިޔަނީ.. އަމީނާ އެއްތަ.. އަމީރާ އެއް ތަ.. އާގްގް.. ކޮންފަދަ ފޫހި ނަމެއް“ އަނގަޔަށް ވައްތަރެއް ޖައްސާލައިގެން ހުރެ ޝިއުނާގެ ވާހަކައަށް އާލާ ވެސް ބާރުދެމުން ދިޔައެވެ. އެ ޥާހަކަތައް އަހަން ހުރި އިރު އަމީރާގެ ދެލޯ ކަރުނުން ފުރުނެވެ. އެހާމެ ރުޅިވެސް އައެވެ. ރުޅިއައި ކަމުގައި ވީ ނަމަވެސް ދެރަވީ ކަމުގައި ނަމަވެސް އޭނާއާއި އެންމެ ގާތުގައި އަބަދުވެސް ވާ އެއްޗަކީ ކަރުނައެވެ. ނުހަނު އުނދަގުލުން ކަރުނުތައް ހިންދާލަމުން އޭނާގެ މޫނުމަތި ރީތިކޮށްލަމުން ފާހާނައިގެ ތެރެއިން އޭނާ ނުކުތެވެ. އެ ވަގުތުވީ ޖެހިގެން ހުރި ފާހާނައަށް ވަދެގެން އުޅުނު މީހާ ވެސް ނުކުތް ވަގުތަށެވެ. އޭރު ލޯގަނޑުގެ ކާރީގައި ތިބި މީހުން އެތަނުގައި ތިއްބެވެ. އެތަނުން އެކަކީ އޭނާ ފާހާނައަށް ވަންނަން އައި ތަނުން ދިމާވި ޒުވާނާކަން އަމީރާ ދެނެގަތެވެ. ފަހަތުގައި އަނެއް ފާހާނައިން ނުކުތް މީހާ ވެސް ހުރިކަން އެނގުނު ނަމަވެސް ހުރީ ކާކުތޯ ބަލާ ވެސް ނުލާ އަމީރާ އައިސް މަޑުކޮށްލީ ދެ އަންހެން ކުދިންގެ ގާތުގައެވެ.

”ހެލޯ ލޭޑީސް..“ އަމީރާ ހިނިތުން ވެލަމުން ގޮވާލިއެވެ. އެދެމީހުން ވެސް ނިކަން ހިނިއައިސްފައި ތިބެ ބޯޖަހައިލިއެވެ. އެމީހުންގެ މޫނުމަތިން ފެނުނު ހިނިތުންވުމުން އަމީރާއަށް ދަތްކުނޑި ވިކާލެވުނެވެ.

”ނައިސް ޓް މީޓް ޔޫ.. އަމީރާ ހިއާރ.. ދި ގޯލްޑް ޑިގާރ ޔޫ ގާއީޒް ޖަސްޓް ނައު މެންޝަންޑް“ އަމީރާ އިތުރުކޮށްލި ޖުމްލައިން ދެ ޒުވާނުންގެ މޫނުމަތިން ފެނިލި ހިނިތުން ވުން ފޭދެން މާ ގިނަ އިރެއް ނުވިއެވެ. ރުޅިގަދަވެފައި ހުރި ނަމަވެސް، އެމީހުންގެ މޫނަށް ވެގެން ދިޔަ ގޮތުން އަމީރާގެ ގާތައް ހިނި އައި ވަރުން ޝަހާދަތް އިނގިލިން ތުންފަތުގައި ޖައްސާލަން ޖެހުނެވެ.

”އެހެމް..އެހެމް .. “ ފަހަތުން މީހަކު ކަރުކެހިލި ހިނދު ދެ ޝިއުނާއާއި އާލާ އެކުއެކީގައި ބަލައިލި އިރު ދެމީހުން ސިހިގެން ގޮސް ފަހަތައް ޖެހެވުނެވެ.

”މެޑް..މެ..މެޑަމް އާމިލާ“ ޝިއުނާގެ އަނގައިން ލަސްލަހުން ނުކުތްއިރު އަމީރާއަށް ވެސް އެނބުރިލެވުނެވެ. ހަށަމްބަދެލައިގެން ފަހަތުގައި އެހުރި މެދުއުމުރުގެ އަންހެނެއް ފެނުނެވެ. އެހިނދު މުޅި ކުއްޖާ ދެލޯ ބޮޑުވެގެން ދިޔައެވެ. ވީ ގޮތެއްވެސް އަމީރާއަކަށް ނޭނގުނެވެ. ތުރުތުރުއަޅާއި ގަނެގެން އޭނާއަށް ފައި މައްޗަށް ކޮޅަށް ވެސް ނުހުރެވުނެވެ. އަމީރާގެ ސިކުނޑީގައި މީހަކު ހީވީ ބާރު ހުރި އެތިފަހަރެއް ޖަޙާލިހެންނެވެ. ކުޑަ އަންހެން ކުއްޖަކާއި އަންހެނެއްގެ ހުނުމުގެ އަޑު އޭނާގެ ކަންފަތައް ފޯރިހެން ހީވެގެން  އިތުރަށް މުޅި ކުއްޖާގެ ހަށީގައި ހިފާލާފައިވާ ތުރތުރު ދެގުނަވެގެންދިޔައެވެ. ދެ ކަންފަތް މަތީގައި އެޅުނު އިރު އޭނާއަށް  ތިރިވެވުނީ ބޮލަށް ވެސް ވަމުން ދިޔަ ތަދަކާއި ހުރެއެވެ. އެހެން ހުއްޓާ އަމީރާ ލަސްވެގެން އިޔާންއާއި ވިޝާމް ވެސް އެތަނުގެ ތެރެއަށް ވަދެގެން އައިސްފިއެވެ. ދެމީހުންގެ ފަހަތުގައި ހުރި އިތުރު ފިރިހެނެއްގެ ސޫރަ ފެނި ބޮލުގައި އަޅަމުން ދިޔަ ގަދަ ފަދަ ވޭން އޭނާއަށް ތަހައްމަލް ކުރެވޭވަރަށް ވުރެން ގަދަވިއެވެ.

”މަ..މަ..މަންމާ..އާހްހް“ ނޭފަތުން އޮހިގަތް ލޭތަކާއި އެކު އަމީރާ ވެއްޓެން ދިޔަ ހިނދު އިޔާންއަށް ހުރެވުނު ތަންވެސް ނޭނގުނެވެ.  ދުވެފައި އައިސް އޭނާއަށް، އަމީރާ ބިންމަތީގައި ޖެހުމުގެ ކުރިން ހިފެހެއްޓުނެވެ.

އާމިލާގެ ހާލަކީ ތޯއެވެ. ނުވެސް ދަންނަ އަންހެން ކުއްޖަކު ފެނިގެން ހުއްޓުން އެރިގޮތައް، ހުރެވުނީއެވެ. ނޭނގިހުއްޓާ ދެލޮލުން ކަރުނުތައް އޮހޮރިގަތެވެ. އެހެންވާން މެދުވެރިވި އެއްވެސް ސަބަބެއް ވެސް ނުވިސްނުނެވެ. ކުއްލިއަކަށް އަމީރާ، ވެއްޓެން ދިޔަ ހިނދު އާމިލާއަށް އެދިމާލަށް ދުއްވައި ގަނެވުނެވެ.

***

(ނުނިމޭ)