ހިރާސް 2 (07)

އަލަށް އައި ދުވަހު ސުވާލް ކުރި ގޮތައް އޭނާއާއި ލިއަމް ވާހަކައެއް ނުދައްކައެވެ. ރުއާނާ ވެސް ނުދައްކައެވެ. ލިއަމްގެ މޫނުން ނަޒަރު ވަކިކޮށްލަމުން ފަސްޖެހިފައި ހުރެމެ ރުއާނާ އަތް ހިއްލާލިއެވެ. އޭނާ އަތް ނެގީ އިތުރު އެއްވެސް ގޮތެއް ނެތިގެންނެވެ. ރުއާނާގެ ހިތް ވިރިގެންދާ ފަދަ ހިނިތުންވުމެއް ރައްދު ކުރުމަށްފަހު ލިއަމް، މޭޒު ދަށުން ތެދުވެ އައިސް ހުއްޓުނީ ރުއާނާގެ މޭޒުގެ މަގަތުގައެވެ. ލިއަމް އެއްޗެއް ނުބުނުމުން ރުއާނާ އިނގިލިން ނޭނގޭ ސުވާލް ދައްކާލިއެވެ. ލިއަމް ކިޔައިދޭންފެށިއެވެ.

އެ ފިރިހެންވަންތަ އަޑު އެހާ ގާތުން އިވެމުން ދިޔައިރު ރުއާނާގެ ހަށީގައި ވީ ހުރިހާ ނާރުތަކަކާއި އެ ނާރުތަކުގައި ހިނގަމުން ދިޔަ ލޭގެ ހިނގުން އިޙްސާސްވަމުން ދިޔައެވެ. އޭނާ ބޭނުންކޮށްފައި ހުރި ފިރިހެން ސެންޓްގެ ވަހުގެ އަސަރު ރުއާނާގެ ސިކުނޑިއާއި ހަމައަށް ފޯރިއެވެ. ލިއަމްގެ މޫނަށް ނުބަލަން މަސައްކަތް ކުރަމުން ދިޔަ ނަމަވެސް ބައެއްފަހަރު އޭނާގެ ހިތް ލަގަނުން ދޫވަމުން ދިޔައެވެ.

***

“ކްލިއާރ؟“ ލިއަމް މަޑުމަޑުން އަހައިލިއެވެ. ރުއާނާ ބޯ ޖަހައިލުމަކުން ފުއްދާލިއެވެ. އޭރު ގަޑިޖެހިފައި ވުމުން މަޑު ނުކޮށް ލިއަމް ނުކުމަތެވެ.

ބާކީހުރި ގަޑިތައް ނަގާ ނިމުމުން ކްލާހުން ނުކުމެ، އިޒްވާ އާއި އީތަންއާއި އެކު ރުއާނާ ނުކުތީ ހޮސްޕިޓަލްގެ ޑިއުޓީ ފެށުމަށްޓަކައެވެ. އެދުވަހަކީ ކައިވަން ކުރުމަށް ހަމަޖެހިފައިވާ ސާޖަރީ ވެސް އޮތް ދުވަސްކަމުން އެކުވެރިންނާއި، ރުއާނާ އެވާހަކަ ހިއްސާކޮށްލިއެވެ. ދެ އެކުވެރިން އުފަލުން އޭނާއަށް މަރްހަބާ ކިއެވެ.

”އާހްހް ރުއާ..ޔޫ އާރ ސޯ ލަކީ“ ރުއާނާއަށް އެފަދަ ފުރުސަތެއް ލިބުމުން އީތަން ހުރީ ނުހަނު އުފަލުންނެވެ. އީތަން ހިއްސާކޮށްލީ އަލާނިޔަލްއާއި އެކު އޭނާ މީގެ ދުވަސްކޮޅެއް ބައިވެރިވި ސާޖަރީއެއްގެ ހަނދާނެވެ.

”ދެޓް ވޯޒް އައުޓްސްޓޭންޑިންގ.. މަށާއި ޑޮކްޓާރ ޝާއިން އެދުވަހު އެސިސްޓް ކޮށްދިނީ.. ހިޒް ހޭންޑް ސްކިލްސް އާރ ވޯހް.. ވަރަށް ފާސްޓް.. ވަރަށް ކްލީން.. ހަމަ ބަލަހައްޓައިގެން ހުރެވެނީ ..ހެހެހެ“ އީތަން ކިޔައިދިނެވެ. އެވާހަކައިން ރުއާނާ ހަނދުމަވީ އޭނާ ބަލާ އުޅޭ، އަހަރުތަކެއް ކުރިން ޑޮކްޓާރ އިޒާން ކޮށްފައިވާ ސާޖަރީތަކުގެ ލައިވް ރިކޯޑްތަކުގެ މަތިންނެވެ. އިޒާން މޫނު ނުފެނުނަސް، އެހާ ކުޅަދާނަ ޑޮކްޓާރެއް ރުއާނާ އަދި އެއް ނުދެކެއެވެ. އެހެން ބުނަން އުޅެފައިވެސް އެހިޔާލް ދޫކޮށްލިއެވެ.

”ދޮންތިބޭ ވަރަށް ކޫލް ވާނެ .. ވަރަށް ފްރެންޑްލީވާނެ.. އަމް ސޯ ހެޕީ ފޯރ ޔޫ ރުއާ“ ރުއާނާ އަތުގައި  އިޒްވާ އަތް އަޅުވާލިއެވެ. ލޫކް މި ހަފްތާ ފެށުނު ފަހުން ނުފެންނާތީ އީތަން އަހައިލިއެވެ. އޭރު ލިފްޓް އައިސްފައި ހުރުމުން ތިންމީހުން އެރިއެވެ.

”އޭނާ އުޅެނީ ފާޑެއްގެ ހުމެއް ހިފައިގެން..އެހެންވެ މަޑުކޮށްގެން އެހުރީ.. މޭބީ ނެކްސްޓް ވީކްގަ އަންނާނެ..“

”ސޯ ޓްމޯރޯ… އާފްޓާރ ޑިއުޓީ އިޒީ ބުނި ތަނަށް ގޮސްފަ، ވީ ޝުޑް ވިޒިޓް ހިމް ދޯ..؟ ލެޓްސް ގޯ އީތަން ވެސް “ ރުއާނާގެ ބަހައް ތާއިދު ކުރަމުން އިޒްވާ ބަލައިލީ އީތަންގެ މޫނަށެވެ. އިރުކޮޅަކު ވިސްނާލުމަށްފަހު އީތަން ބޯ ޖަހައިލުމުން އިޒްވާ އާއި ރުއާނާ ހީލިއެވެ.

މަންޒިލަށް އާދެވުމުން ’ސައިން އިން‘ ވެލުމަށްފަހު ރުއާނާ އާއި އިޒްވާ މިސްރާބު ޖެހީ އެމީހުންގެ ކޮޓަރިއަށެވެ. ކޮޓަރީގެ ތެރޭގައި ސްކްރަބް ބަދަލް ކުރުމަށް ވަކިން ހުންނަ  ޗޭންޖިންގް ރޫމަށް ވަދެ، ސްކްރަބް ލުމަށްފަހު، ލައިގެން ހުރި އަންނައުނު އެމީހެއްގެ ލޮކަރ އަށް ލުމަށްފަހު އެތަނުން ނުކުމަތް އިރު މައުވާ ނިކަން ހަމަޖެހިލާފައި މޭޒް ދޮށުގައި އިނެވެ. ރުއާނާ ފެނުމުން އޭނާގެ މޫނުމައްޗަށް ވެރިވި ހަސަދައިގެ ބާނިތައް ރުއާނާ ދުއްޓެވެ. އެކަމާއި އަޅާނުލާ އޭނާގެ މޭޒުމަތީގައި ކުރިން ސުރެން ބާއްވާފައި އޮތް ވޫލްކޮޅު ނެގުމަށްފަހު، މިނިވަންކަމާއި އެކު ވިހުރެމުން ދިޔަ ފަން އިސްތަށިގަނޑު ހައްޔަރުކޮށްލިއެވެ.

”އޯލް ދި ބެސްޓް ދޫނި“ ޑޮކްޓަރ ކޯޓު ލައިގެން ރުއާނާ ނުކުންތަން ފެނި އިޒްވާ ގޮވާލިއެވެ. އިޒްވާއަށް، ރުއާނާ ހީލަމުން ނުކުތެވެ.

”ކޮންކަމަކަށް ؟“ ރުއާނާ ނުކުންތަން ފެނި މައުވާ އަހައިލިއެވެ. އޭނާއާއި ގުޅުމެއް ނެތް ކަމަކާއި ސުވާލް ކުރި އިރުވެސް، ކުއްލިޖަހާލާފައި އެހިގޮތުން އިޒްވާ ގާތައް ހިނިއަންނަ ގޮތްވިއެވެ.

”ރުއާ، ދޮންތިބެއާއި އެއްކޮން ސާޖަރީއަކަށް އަރާކަން އެނގުނީމަ މީނަ ފުފޭނެ.. އޭނަ އެ ހުންނަނީ އެކަހަލަ ޗާންސެއް ނުލިބިގެން ރާޑިވެފަ.. މީ ރަނގަޅު ފުރުސަތެއް މި ބިޗ* އަށް ލެސަން އެއް ނަގާދޭން“ އިޒްވާއަށް ހިތާހިތާ ކިޔާލެވުނު އިރު މޫނުގައި ފެވިފައި ހުރީ ލާނެތް ހިނިތުން ވުމެކެވެ.

”އެހެމް އެހެމް.. ނޭނގޭތަ މައުވާ އަކަށް.. ރުއާ އެދިޔައީ ޑޮކްޓާރ ކައިވާންގެ ސާޖަރީ އެއް އެސިސްޓް ކޮށްދޭން.. އެނގޭތަ ކާކާއި އެއްކޮން ކަން.. ޑޮކްޓާރ ލިއަމް އާއި އެއްކޮން“ ކަރުކެހިލަމުން އިޒްވާ ބުނެލި އިރު، މައުވާގެ މޫނައް އެރި ކުލަވަރުން އިޒްވާގެ ގާތައް އައީ ނުލަފާ ހިންޏެކެވެ. މޫނު ރަތްވެފައިވީ އިރު އޭނާގެ މުށްކެވިފައި އޮތް އަތް ފެނި، އިތުރަށް ކޮންޓްރޯލް ކުރަން ނުހަދާ  އިޒްވާ ހީގަތެވެ.

”މައުވާއަށް ހަޖަމް ނުވެފައި އިން ވައްތަރު ހާދަ އެބަ ޖަހައޭ..“ އިޒްވާގެ ޖުމްލައާއި އެކު ގައި ހުރި ބާރެއް ލާފައި މައުވާ އިންތަނުން ތެދުވިއެވެ.

”ބުނަންތަ ވާހަކައެއް! މަ ފަހަރިއަކަށް ވާ އަންހެނެއްގެ ފުރަތަމަ ޝަރުތަކީ ކެތްތެރި މީހަކަށް ވުން… މަށާއި އެއްކޮން އުޅެން ވިސްނާއިރު އެމީހަކު ވާނެ އަހަންނަކީ ކިހާ އުނދަގޫ ބޮޑު އަދި ކިހާ އަނގަގަދަ މީހެއްކަން ދެނެގަންނަން.. ބަލާ މިހާރުވެސް މަ އެވަރު އެއްޗެއް ބުނީމަ ފުފިގަތް ގޮތް.. ފުރަތަމަ ވެސް މައުވާ ފެއިލް“ އިޒްވާގެ ވާހަކައިން މައުވާގެ ރުޅިވީ އިތުރެވެ. އޭނާގެ މޫނުމަތީގައި މައުވާ ޖަހަން ހިތްލާލި އަތުގައި ހުށިޔާރު ކަމާއިއެކު ހިފަހައްޓާމުން ކޮއްޕާލިއެވެ. ނުކުމެގެން ދަމުން އިޒްވާ ދޮރުގައި ހިފަހައްޓާލައިގެން ހުރެ، މައުވާއަށް ނަޒަރު ދިއްކޮށްލަމުން ދޫ ނެރެލާފައި ވައްތަރެއް ޖައްސާލިއެވެ. އެހިނދު މައުވާ މޭޒު ކައިރިން ނުކުމެދޮރާއި ދިމާލަށް އަންނަން ދިމާކޮށްލިއެވެ.ކުރިއަށް ވުރެން ބާރަށް ހޭންފަށަމުން އިޒްވާ ބާރަކަށް ދޮރު ޖެހިއެވެ.

”ކުޑަ އިބިލީސް.. ހުރޭ ބަލަން އޭނައަށް ތޯ މަށައް ތޯ ލިއަމް ލިބެނީ.. އަދި އެ އަންހެން ގޮލާއަށް ކީއްވެތަ ހުރިހާ މޮޅެއް ލިބެން ޖެހެނީ.. މަ މިތާގަ ޑޮކްޓަރަކަށް އުޅޭތާ ވަރުބަލިވީ ފަހުން އޭނަ އެ އައީ.. ޑޮކްޓަރު ކައިވާން މެންނާއި އެއްކޮން ސާޖަރީ އަށް އެރުމަކީ އޭނާގެ ލެވެލްއެއް ނޫން ..  އެވެސް ލިއަމް އާއި އެއްކޮން“ މައުވާގެ ރުޅި ގަދަވެފައި ހުރިވަރުން ތުރުތުރު އަޅަމުންދިޔައެވެ. އަތުގެ ދެތިން ހަމަލާ އޭނާގެ މޭޒަށް ދެވުނު އިރުވެސް ރުޅި ފިނިވާ ގޮތެއް ނުވިއެވެ. އެންމެ ފަހުން މުޅިމޫނު ރަތްކޮށްލައިގެން ސޯފާއަށް ޖެހިގަތްތަނުން އޭނާގެ ސިކުނޑި އަށް ހިޔާލެއް އައެވެ. ވަގުތުން އެ ތުންފަތައް މަތީގައި ދުވެލީ ނުބައި ހިނިތުންވުމެކެވެ.

”ރުއާނާ.. ކުޑަ ކުޑަ ބިޗ*.. ޖަސްޓް ވެއިޓް އެންޑް ވޮޗް..އައި ޑިޒާވް ދެޓް ޗާންސް މޯރ ދެން އެނީވަން އެލްސް“ އިންތަނުން ތެދުވެ މައުވާ މިސްރާބު ޖެހީ އޭނާގެ ޕްލޭނާއި އެއްގޮތައް މަސައްކަތް ކުރަން ދިއުމަށެވެ.

ހޮސްޕިޓަލްގައި ދިހަ ތީއޭޓަރ ކޮމްޕްލެކްސް އިންނަ އިރު އެއިން ކޮންމެ ކޮމްޕްލެކްސް އެއްގައި ހަތަރު ތީއޭޓާރ ހުރެއެވެ. ރުއާނާ ވަނީ ހަވަނަ ނަމްބަރު ޖަހާފައިވާ ކޮމްޕްލެކްސްގެ  ތިންވަނަ ތީއޭޓާރގެ ’ޗޭންޖިންގ ރޫމް’ގެ ތެރެއަށެވެ. އެތަނަކީ ސާޖަރީތަކަށް ދިޔުމުގެ ކުރިން ޑޮކްޓަރުން ތައްޔާރު ވާން ވަންނަ ތަނެވެ. ސްކްރަބް ޒޯނާއި، ތީއޭޓާރގެ ތެރެއަށް ވަނުމުގެ ކުރިން ސާފް ވުމަށްޓަކައި ވާ ހާއްސަ ޒޯން ވެސް ހުންނަނީ އެތަނުގެ ތެރޭގައިއެވެ. އަންހެން ޑޮކްޓަރުންނަށް ހާއްސަ ކޮން  ހުރި ސްކްރަބް ޒޯނަށް ވަދެ ލައިގެން ހުރި ސްކްރަބްގެ ބަދަލްގައި ތީއޭޓަރުގެ ތެރޭގައި ބޭނުން ކުރާ މަޑު ނޫކުލައިގެ ސާޖިކަލް ސްކްރަބް ލައިގެން އޭނާ ނުކުމަތެވެ. ބޮލުގެ އިސްތަށިގަނޑު ރަނގަޅަށް އެއްސުމަށްފަހު ކޯރި އަޅުވާލަމުން ލޯގަނޑުން ބަލައިލިއެވެ. ފުޅާ ސިންކްގެ ކައިރިއަށް ހުއްޓި ސިންކުގެ މަތީގައިވާ ދިގު ކަބަޑުން ހަތަރެސްކަން ޕެކެޓެއް ނަގައި، ކަނޑާލަމުން އޭގެތެރޭގައި ވާ“ސްޓެރައިލް“ ބުރުސް އަތުގައިގައި ކާއްތާލަމުން އިސްކޫރާއި ދިމާލަށް އަތް ދިއްކޮށްލިއެވެ. އެ ހިނދު އިސްކޫރުން ހޯސްލާފައި ފައިބަން ފެށި ފެންތަކުން އޭނާގެ ދެ އަތް ތެތްމާލިއެވެ. އިނގިލީގެ ނިޔަފަތިތަކުން ފެށިގެން އުޅަބޯއްޓާއި ހަމައަށް އުނގުޅަމުން ދިޔައިރު އޭގެން ދުވަމުން ދިޔަ އަޔަޑިން ވަހުން، ތަން އެއްވަސް ކޮށްލާފިއެވެ.

އެމަސައްކަތް ނިމިގެން، ދެއަތް މައްޗަށް ހިއްލާލައިގެން ހުރެ ނުކުންނަ ދޮރާއި ހިސާބަށް ދިޔަ ހިނދު އޭނާއަށް ހުއްޓެން މަޖުބޫރުވީ ދޮރުގެ ކުރިމަތީގައި ނިކަން ހަމަޖެހިލާފައި ހުރި މައުވާ ފެނިއެވެ. ރުއާނާ އެކަމަށް އަޅާލުމެއް ނެތި ނުކުމެގެން ދާން ވެގެން މިސްރާބު ޖެހިއެވެ. ނަމަވެސް އަނެއްކާ ވެސް ހުއްޓެން މަޖުބޫރުވީ އޭނަގެ ކޮނޑުގައި، މައުވާ އަތުން އަޅާ ފަހަތައް ކޮއްޕާލުމުންނެވެ. ރުއާނާގެ މޫނުމަތިން ފެނިގެން ދަނީ ނުތަނަވަސް ކަމެވެ. މައުވާ ދެކެ ބިރަކުން ނޫނެވެ. އޭނާ ނޫން އެންމެން ތީއޭޓާރގައި މިވަގުތު ތިބޭނެއެވެ. މަދުވާނީ އޭނާއެވެ.  ފުރަތަމަ އޮޅުމަކުން ނުބައި ތީއޭޓަރަކަށް ވަދެވުމުން ވަގުތު ކޮޅެއް ވެސް ވަނީ ބޭކާރުވެފައެވެ.

”ޑޮކްޓާރ މައުވާ.. ކެން ޔޫ ޕްލީޒް ސްޓޭ އަވޭ ފްރޮމް ދި ޑޯރ“ ދެތުންފަތް ފިއްތާލަމުން ރުއާނާ ދޮރާއި ދިމާލަށް އަތް ދިއްކޮށްލިއެވެ.

”ނޯ ވޭ.. އަހަރެން ހުއްޓަ ކަލެއަކަށް ހައްގެއް ނޫން މިއަދުގެ ސާޖަރީ އަކުން އެ ޕްލޭސް އެއް.. އެވެސް ލިއަމްއާއި އެކު..ޔޫ ބެޓާރ ޓް ސްޓޭ އަވޭ ފްރޮމް ހިމް“

”ސީރިއަސްލީ މައުވާ… އައި ހޭވް ޒީރޯ އިންޓްރެސް އިން ހިމް..ޔޫ ކެން ހޭވް ހިމް.. މީހަކު އަދި އަޅުވާ ކިޔަކަސް ތި ވަރު ވާކަށް ނުވާނެ…މައުވާ މި ސަކަރާތް  ހުއްޓާފަ އެއްކައިރި ވާންވީނު“

”އަޑެއް ނީވޭތަ .. މިބުނީނު ކަލޭގެ ލެވެލްއެއް ނޫނޭ އެއީ.. މިތާގަ މިއަދު ހުރެލާ ދެން.. ހަނދާން ކުރާތި މީގެން އެއްވެސް ވާހަކައެއް އެކަކާއި ހިސާބަށް ވެސް ގޮސްފިއްޔާ ކަލޭގެ ވަޒީފާ ގެއްލޭނެ..“

“ އަހަރެން ބުނެފީމެންނު ލިއަމް ސާރ އަކާއި އެއްވެސް ގުޅުމެއް ނެތޭ.. އެންމެ ކުޑަމިނުން ވާހަކަ ދައްކާ އުޅޭ މީހެއް ނަމަ ވެސް ރަނގަޅު..މައުވާ ތަ ތިއީ މިތަނުގަ ވަޒީފާ ބަހާ މީހަކީ.. ހަހް..“

”ކަލޭ މިހާ އަވަހަށް ހަނދާނުން ކެހުނީތަ .. ދެ ހަފްތާ ކުރިން ކީއްވެކަން ނަރުހުންގެ މުސާރަ ބޮޑުކުރަން އެންމެންގެ ވޯޓް ލިބިފަ އޮއްވަ ވެސް އެކަން ނުވީ؟..“ އެ ސުވާލާއި އެކު މައުވާ ޖަހައިލީ މަލާމާތުގެ ހިނިގަނޑެކެވެ.

ރުއާނާގެ ހިތުގައި ބިރުވެރިކަން އުފެދުނެވެ. ހިނދުކޮޅަކަށް ނަމަވެސް މައުވާގެ ބާރު ރުއާނާ ހަނދާން ނެތުނީއެވެ. އޭނާއާއި އިތުރަށް ޖަދަލް ނުކޮށް ރުއާނާ ނުކުންނަން ދިޔަ ވަގުތު ، އޭނާގެ ބަނޑުގައި ކޮޅުފައިން ޖެހުމަށްފަހު ދުރަށް ކޮއްޕާލާފައި އިތުރު ހަރަކާތެއް ގެނެވުމުގެ ކުރީގައި، ނުހަނު ހަލުވިކޮން މައުވާ ދޮރު ޖެހިއެވެ.

”އާހްހް“ ބަނޑަށް ވީ ތަދުން ރުއާނާއަށް އިންތަނުން ތެދުވަން ވީ ވެސް ބޮޑު ވޭނަކަށެވެ. ފާރުގައި އެއް އަތް ވިއްދާލަމުން އަނެއް އަތުން ބަނޑުގައި އަތް އަޅާއިގެން ހުރެ ދޮރާއި ދިމާލަށް ދިޔައެވެ. ނަމަވެސް ބޭރުން މައުވާ ތަޅުލި އަޑު އިވިގެން ރުއާނާއަށް ހަޅޭއްލަވައިގަނެވުނެވެ.

ސާޖަރީއަށް އައުމުން އޭނާއައީ ވެސް މޭޒުމަތީގައި ފޯނުވެސް ބާއްވާފައެވެ. އަނެއްކޮޅުން ކައިވަން ފަދަ ޑޮކްޓަރަކާއި އެކު ކުރިއަށް ގެންދާ ސާޖަރީއަކަށްވެ ގަޑި ޖެހިގެން ވެސް ދާކަށް ރުއާނާ ބޭނުމެއް ނުވިއެވެ.

”ޝިޓ*“ ރުޅި ގަދަވި ވަރުން ރުއާނާގެ ދެލޮލުން ކަރުނަތައް އޮހެން ފެށިއެވެ. އެއީ ލިއަމް އާއި އެކުވެސް ބައިވެރި ވެވޭ ފުރަތަމަ ސާޖަރީއެވެ. އެންމެން ގެ ތެރޭގައި އޭނާގެ އަގު ވެއްޓޭނެއެވެ. އެހެންވާކަށް ރުއާނާ ބޭނުމެއް ނުވިއެވެ.

”މައުވާ..އަމް ބެގިން ޔޫ.. ޕްލީޒް.. ދޮރު ހުޅުވަބަ..ޕްލީޒް“ ދެއަތުގައި ހުރި ބާރެއްލާފައި ދޮރުގައި ތަޅަމުން ދިޔައިރު ، މެދުކެނޑުމެއް ނެތި ރުއާނާގެ ދެލޮލުން ކަރުނަ ފައިބަމުން ދިޔައެވެ. މައުވާ އެހާ ވަރު ކޮށްލަން އޭނާއަށް ކުށެއް ކުރެވުނީއެއް ވެސް ނޫނެވެ.

”އައި ޑޯންޓް ވޮނަ ގެޓް ކޯޓް.. ހޭވް ފަން ބިޗ*“ ރުއާނާ އަށް އިވޭ ވަރަށް މައުވާ ގޮވާލަމުން، ބޭރު ފާރުގައި ހުރި އެތަނުގެ ހުރިހާ ސްވިޗްއެއް އޮފްކޮށްލިއެވެ. ވަގުތުން މުޅިތަނަށް ވެރިވެގަތީ ކަނު އަނދިރިކަމެވެ. ރޮމުން ދިޔަ ރުއާނާއަށް މަޑުޖެހެވުނީ އެވަގުތުއެވެ. އަހަރުތަކެއް ކުރިން ދިމާވި ހާދިސާގެ ފަހުން އަނދިރި ތަންތަން ދެކެ ރުއާނާ ބިރު ގަންނަނީ އިންތިހާއަށެވެ. ދެލޯ ބޮޑުވެފައި ހުރި ރުއާނާ ބިރުން ތެޅި ފޮޅިގަތެވެ.

“ ބައްޕާ.. ..މީހެކޭ…  އިޒީ… މީހެކޭ ..ނޫން.. ނޫން “ ބިރުން ގޮސް ރުއާނާއަށް ކޮޅަށް ހުރެވޭވަރު ވެސް ނުވިއެވެ. ދެފައި ތުރުތުރު ލަމުން ގޮސް ފާރު ބުޑަށް ޖެހުނެވެ. ދެލޮލުން ފައިބަމުން ދިޔަ ކަރުނަތައް ވެސް ހުއްޓި، މުޅި ކުއްޖާ ދާހިތްލާ ގަތެވެ.

”ސަމް..ސަމމްވަން..ޕް..ޕްލީޒް..ހެލް..ޕްޕް“ އަނގައިގާ ވާތްގަތް ވެސްނެތެވެ. މުޅި ހަށިގަނޑުގައި އަޅަމުން ދިޔަ ތުރުތުރަށް ކެތްނުވެގެން އެންމެފަހުން ރުއާނާ އަރި އަޅާލައިގެން ވެއްޓެން ދިޔައެވެ.

***

”މޭރީ ސިސްޓާ.. ޑޮކްޓާރ ރުއާނާ ކޮބާ؟“ ކައިވަން ވަދެގެން އައިތަން ފެނި ލިއަމް މޭރީކުރެން އަހައިލިއެވެ. އޭރު ރުއާނާ ނޫން އެންމެން ހެން ތީއޭޓާރގެ ތެރޭގައި ހުއްޓެވެ.

”ރުއާނާގެ ބަދަލްގަ އަހަރެން މިއައީ.. ޑޮކްޓާރ މައުވާ“ ސާޖިކަލް ގައުންގައި އެތެރެއަށް ވަދެގެން އައި މައުވާ ފެނި އެތަނުގައި ތިބި އެންމެން އެކަކު އަނެއްކަކުގެ މޫނަށް ބަލައިލިއެވެ. ލިއަމްގެ ނިތައް ރޫ އަރައިގެން ދިޔައިރު މައުވާގެ ގާތައް ޖެހިލަމުން ބަލައިލީ އިތުރަށް ކިޔާދޭށޭ ބުނާފަދަ އަކުންނެވެ. މައުވާގެ ވައްތަރުން އޭނާގެ އެއްވެސް އޮޕަރޭޝަނެއްގައި މައުވާ ނުހިމެނުމަށް އަދްރެކްގެ ގާތުގައި ލިއަމް އޮންނާނީ ބުނެފައެވެ. ލިއަމްގެ މޫނުން އިންތިހާ ދަރަޖައަށް ހިތްހަމަ ނުޖެހުން ފާޅުވަމުން ދިޔައެވެ.

”ޝީ ސެއިޑް ޝީ ކޭންޓް ޑޫ އިޓް ..އެޓް ދި ވެރީ ލާސްޓް މޯމެންޓް..ސޯ މެނީ ޕޭޝަންޓްސް އެންޑް ބްލާ ބްލާ..ސޯ އައި ސްޓެޕްޑް އިން..“ މައުވާގެ ޖަވާބު އަހާފައި ލިއަމްގެ ދެއަތް މުށްކެވުނެވެ. ރުޅި ގަދަ ވި ވަރުން އެންމެ ކައިރީގައި ހުރި އައިވީ ސްޓޭންޑްއަށް ނުހަނު ބާރަށް ފިތާލެވުނެވެ.

”ލިއަމް.. ލިއަމްގެ ސްޓާފް އިން ރަނގަޅަށް ޓްރެއިން ކުރަން ފެނޭ.. ލާސްޓް މޯމެންޓްގަ މިކަހަލަ އިޝޫތައް އައުން ބަލައެއް ނުގަނެވޭނެ.. މިއީ ސަޑެން ސާޖަރީ އެއްނޫން.. ދުރާލާ ރޭވިގެން ޝެޑިއުލް ވެފަ އިން ސާޖަރީ އެއް..ނެކްސްޓް ޓައިމް ބީ ކެއާރފުލް ބިފޯރ ޗޫސިންގް ޑޮކްޓާރސް ޓް ޕާފޯމް ސަޗް ކްރިޓިކަލް ސާޖަރީސް.. އަދި އެއްވާހަކަ..  ހޮސްޕިޓަލްގެ އެސް އޯ ޕީ ތަކާއި ހިލާފް ވާ ސްޓާފުންނަށް އޮންނަ އުސޫލްތައް އެނގެ އެންނު.. ޓޭކް ކެއާރ އޮފް ހާރ“ ޕޭޝަންޓް ބޭއްވިފައިވާ މޭޒުގެ ގާތައް ހުއްޓެމުން ކައިވަން ބުނެލި އިރު އަޑުގައިވީ ހިތްހަމަ ނުޖެހުން އެކަކަށް ވެސް ނޯޅެއެވެ.

ކައިވަން ދެއްކި ވާހަކަތަކަށް ބޯޖަހާލި އިރު ލިއަމް ހުރީ ލަދުގަންނަ ގޮތްވެފައެވެ. ރުއާނާގެ ސަބަބުން ލިއަމްގެ ގާތައް އައިސް ހުރި ރުޅި އިހުނަށް ވުރެން ގަދަވާ ގޮތްވިއެވެ. އޭނާއަކީ އަމިއްލަ މީހާގެ އަގު ހިފެހެއްޓުމަށް، އަބަދުވެސް އިސްކަންދޭ ޒުވާނެކެވެ. އޭނާގެ ނަމަށް ކިލަނބުކަމެއް އަތުވެދާނެ ފަދަ އެއްވެސް ކަމެއް ވެގެން ދާތަން ބަލާކަށް ނުހުންނާނެވެ. އޭނާގެ ދަށުން މަސައްކަތް ކުރާ މީހުންނަށް ވެސް އެކަން އޮންނާނީ އަންގާފައެވެ. ކައިވަންގެ ފުށުން ހިތްހަމަ ނުޖެހުމުގެ ބަސްތައް އަޑުއަހަން ޖެހުނީތީ ، އެކަމާއި އޭނާ ކެތްކުރަމުން ދިޔައީ އިންތިހާއަށެވެ. ކައިވަން އެ ބުނީވެސް ދޮގު ވާހަކައެއް ނޫނެވެ. އަނެއްކޮޅުން މައުވާ އާއި އެކު ފަޅި ސިކުންތު ކޮޅަކަށް ވެސް ހުންނަން އޭނާގެ ހިތް ނޭދެއެވެ. ރުޅި އަންނަން ބޭނުން ނުވިއަސް ރުއާނާ ދެކެ އޭނާއަށް ރުޅި އާދެވެމުން ދިޔައެވެ.

”އިޓްސް އޯކޭ.. ފޯކަސް“ ސާޖަރީ ފެށިގެން ދިޔައިރު ލިއަމްގެ މޫނުމަތީގެ ކުލަވަރު ބަދަލް ނުވެ ހުރުމުން ކައިވަން އަށް ފާހަގަ ވެގެން ބުނެލިއެވެ. ލިއަމް ހީލި ނަމަވެސް އިންތިޒާރް ކުރަމުން ދިޔައީ ސާޖަރީ ނިމޭނެ އިރަކަށެވެ.

ލިއަމްއާއި ޖެހޭ ނުޖެހޭ ހިސާބުގައި ހުރިއިރު، މައުވާގެ ތުންފަތުގައި ވަނީ ކަމިޔާބީގެ ހިނިތުންވުމެކެވެ.

***

އާލިއާ އިނީ ނިއުރޮލޮޖީ ޑިޕާރޓްމަންޓްގައި ވާ ނާރސިން ސްޓޭޝަނުގައި މަޑުކޮށްލައިގެންނެވެ. ޑެސްކްޓޮޕެއްގެ ކައިރީގައި އިން އިރު އިސްކްރީނުން ފެނިގެންދާ އެކްސެލް ޝީޓެއްގައިވާ ބަލިމީހުންގެ ރިކޯޑްތަކެއް ބެލުމުގައި އޭނާ އިނެވެ. ފުރަތަމަ ދުވަސްކަމުގައި ވެފައި ، އޭނާގެ މައިގަނޑު މަސައްކަތައް މިއަދު ވެފައީ ’އޮބްސާރވް‘ ކުރުމެވެ.

”ހޭއި..ނިއު ގާރލް“ އޭނާ ސިހުނީ ދާދި ގާތުން މީހެއްގެ އަޑު އިވިފައެވެ. ބަލާލި އިރު ކުރިމަތީގައި ހުރީ ކީވާންއެވެ. ގޭތެރޭގައި އެއްވެސް ވަރަކަށް ވާހަކަ ނުދައްކާފައި ހޮސްޕިޓަލުން ފެނުމުން ވާހަކަ ދެއްކުމުން އާލިއާއަށް ލޯ ހަނިކޮށްލެވުނެވެ. އޭނާ ވަކި އެއްޗެއް ނުބުނެ އެ އިންގޮތައް އިނދެ ހީލަމުން އަނެއްކާ ވެސް ނަޒަރު ހުއްޓުވާލީ ސްކްރީނަށެވެ.

”ކައިފިންތަ؟“ ކީވާން އަނެއްކާ ވެސް އަހައިލިއެވެ. މިފަހަރުވެސް އާލިއާ ބޯޖަހައިލިއެވެ. އޭނާ ހީކުރީ އަނގައިން ނުބުނުމުން ކީވާން ދާނީ ކަމަށެވެ. ނަމަވެސް ސިހުނީ ހައިރާން ކޮށްލާފައި ކީވާން އައިސް އޭނާއާއި ޖެހިގެން އިން ގޮނޑީގައި އިށީންނުމުންނެވެ. އާލިއާގެ އަނގަހުޅުވުނެވެ. އަނެއްކާ ކީވާންއަށް އޭނާއަކީ ކާކު ކަމެއް ނޭނގުނީ  ބާވެއޭ ހީވެ ތަންކޮޅެއް ރަނގަޅާށް ކީވާންގެ މޫނަށް ބަލައިލިއެވެ.

”ކިހިނެތް ވީ؟“ އާލިއާގެ ހައިރާން ކަމުގެ އަސްލު އެނގުނު ނަމަވެސް ، ކީވާން އަހައިލިއެވެ. އާލިއާ ބަލަހައްޓައިގެން އިންލެއް މައުސޫމް ކަމުން ކީވާންގެ ގާތައް ހިނިއަންނަ ގޮތްވިއެވެ.

”އޭމް އައި ޑޭ ޑްރީމިންގ؟ މައި އެކްސް ބީ އެފް އިޒް ޓޯކިންގ“ އާލިއާގެ ޖުމްލައިން ކީވާންއަށް ދެލޯ މަރާލެވުނެވެ. އާލިއާ ހިނިތުންވެފައި އިނދެ ބުނެލި ނަމަވެސް، އެ އަޑުގައި ވީ މޮޅިވެރިކަން ކީވާން އަށް ފަހްމް ވިއެވެ.

”ވީ ޝުޑް ޓޯކް“

”އޭސް ޔޫ ވިޝް“ އާލިއާ ބުނެލިއެވެ. ނަމަވެސް ކީވާންއަށް ގަބޫލްކުރަން އުނދަގޫވިއެވެ. އޭނާ ހީކުރީ އާލިއާ، އޭނައަށް ވާހަކަ ދެއްކުމަށް ވެސް ފުރުސަތު ނުދޭނެ ކަމަށެވެ.

“މްމް …ކެން ވީ ޑޫ ދެޓް… މްމްމް …ގެއަށް ގޮސް؟“ ވަށައިގެން ވީ މާހައުލަށް ނަޒަރެއް ދެމުން ކީވާން ބޯޖަހައިލިއެވެ. އާލިއާ ހޫމް އަޅުވާލިއެވެ. ކީވާން އެ ވާހަކަ ދައްކަން ބޭނުންވީ ހަމަޖެހިލައި ގެންނެވެ. އެފަދަ މާހައުލެއްގައި ހާމަކަން ބޮޑުގޮތެއްގައި ވާހަކަ ދެއްކުން ރަނގަޅުކަމުގައި ހީނުވީއެވެ. ދެމީހުންގެ ދެމަދަށް ދެން ވެރިވެގެންދިޔައީ ހަމަހިމޭންކަމެވެ.

”ގާއިޒް..ރުއާ ދުށިންތަ؟ “ ދުވެލާފައި ކަހަލަ ގޮތަކަށް އެދިމާލަށް އައި އަދްރެކް ފެނި ކީވާންއަށް ނިތް އަރުވާލެވުނެވެ. ކީވާން ނޫނެކޭ ބުނެލި ހިނދު އަދްރެކް އަތުން ނުހަނު ބާރަށް ޖަހައިލީ ކައުންޓަރު މަތީގައިއެވެ. ދެމީހުން ދިޔައީ ސިހިގެންނެވެ.

”އޭ..އޭ.. ކިހިނެތް ތި ވަނީ“ އަދްރެކްއަށް ވެފައި ހުރި ގޮތުން، ކައުންޓަރު ދަށުން ނުކުމެ ކީވާން އަހާލިއެވެ.

”އެނގެ އެންނު ޑޮކްޓާރ ކައިވަންގެ ސާޖަރީ އެއް އެބަ ކުރިއަށް ދާކަށް.. ލިއަމް އާއި އެކު މަށައް އެއަށް ޖޮއިން ވާން ޗާންސް ލިބުނީ.. ބަޓް މިއަދަށް އަހަރެންގެ ޕޭޝަންޓް އެއްގެ އަރޖެންޓް ސާޖަރީ އެއް ރޭވުނީމަ، އެ ޗާންސް އަހަރެން ދިނީ ޑޮކްޓާރ ރުއާނާއަށް.. ސޯ އަހަރެން ހީކުރީ ރުއާ ޖޮއިން ވީ ކަމަށް.. އަހަރެން ވެސް މިއައީ ސާޖަރީ އިން ނިމިގެން… އެމީހުންގެ ސާޖަރީ އިން ވަން މިނެޓްގެ ބްރޭކް އެއް ލިބިގެން މޭރީ ސިސްޓާރ ދެންމެ މަށައް ގުޅާފަ ބުނީ ރުއާ ނާންނަ ވާހަކަ.. ލިއަމް ވަރަށް ބޮޑަށް ހިތްހަމަ ނުޖެހިފަ ޔޯ ހުރީ.. އަހަރެން މުޅި ހުރިހާ ތަނެއް ބަލައިފިން .. އައި ކާންޓް ސީ ހާރ“ އަދްރެކް ހާސްވެފައި ހުރެ ކިޔައިދިނެވެ. ކީވާންއަށް ވެސް ކީކޭހޭ އަހައިލެވުނެވެ.

”ދަ ތިންގް އިޒް.. މޭރީ ސިސްޓާރ ބުނީ އެތެރެއަށް ވަނީ މައުވާ އޭ.. މައުވާ ވަދެފަ ބުންޏޯ ޑޮކްޓާރ ރުއާނާ ބުންޏޭ މި ސާޖަރީއަކަށް ޖޮއިން އެއް ނުވެވޭނެ އޭ ..ބިކޯޒް ބައިވަރު ޕޭޝަންޓްސް އިން ތިބީމަ.. އެކަމަކު މަ ކިހިނެތް އެ ވާހަކަ ގަބޫލް ކުރާނީ.. މަށާ އީތަން ސާޖަރީއަށް ވަނުމުގެ ކުރިން ރުއާއާއި ބައްދަލް ވި.. ބައި މިސްޓޭކް ރުއާއަށް ފުރަތަމަ ވަދެވުނީ އަހަރެމެންގެ ކޮމްޕްލެކްސް އަށް..“

އަދްރެކްގެ ޖުމްލަތަކުން ކީވާންއަށް ވެސް ކަމަކާއި ޝައްކެއް ވެލިއެވެ.

“އަނެއްކާ މައުވާ ކަމެއް ކުރީބަ؟ އެންޑް ވީ އޯލް ނިއު ދޯ މައުވާ ދެކެ ލިއަމް ރުޅި އަންނަވަރު.. އޭނާއާއި އެކު ސާޖަރީއަށް މައުވާ އެރުވުން ވެސް މަނާ ކޮށްފަ އޮންނަނީ“

”އާން މަ ވެސް  ބިރުގަންނަނީ އެހެންވެ.. މަގޭ ފުށުން އޭތި އެދިޔައީ ވެސް މައުވާ އާއި ހަމައަށް.. ރުއާ ވަރަށް ހޯދިއްޖެ .. އީތަންއާއި އިޒީގެ ކައިރީގަ މުޅި ކޮމްޕްލެކްސް ތެރެ ރަނގަޅަށް ބަލައިލަން ބުނެފަ މަ ވެސް މި ހިސާބު ބަލަން މި*“

އަދްރެކް ޖުމްލަ ފުރިހަމަ އެއް ނުވިއެވެ. ފެނުނީ އީތަންގެ އަތްދަނޑި މައްޗަށް ރުއާނާ ލައިގެން ދުވަމުން އައިތަނެވެ. ރުއާނާ އޮތް ގޮތުން އެއްވެސް ހަރަކާތެއް ނުވާކަން ދެނެގަނެވުނެވެ. އިޒްވާ ފަހަތުގައި ހުރިއިރު އޭނާއަށް ހުރީ ރޮވިފައެވެ.

”މޫވް..މޫވް“ އީތަން ހަޅޭއްލަވަމުން އައިގޮތައް ވަނީ އެމަޖެންސީގެ ތެރެއަށެވެ. އޭރު އެހިސާބު ގަނޑުގައި ތިބި ބައެއް ނަރުހުންނަށް ރުއާނާ ކަން އެނގިގެން ގާތްވާން އުޅެން ފެށުމުން އީތަން ހަޅޭއްލަވައިގަތެވެ. ރުއާނާ ލާފައި ހުރި ސްކްރަބުގައި ވެސް ނޭފަތުން އައިސް ހުރި ލޭގެ އަސަރު ހުއްޓެވެ. އަދްރެކްއާއި ކީވާންއަށް އެ މަންޒަރު ފެނުމުން ތެޅިގަނެފައި އެތެރެއަށް ވަނެވެ.

”ވަޓް ހެޕެންޑް؟“ އީތަން އެންމެ މަގަތައް ހުރި ހުސް އެނދުގައި ރުއާނާ ބޭއްވުމުން ކަށިގަނޑު އަޅުވާލަމުން އަދްރެކް ގާތްވެލިއެވެ. އޭނާ ކަށިގަނޑު އަޅުވަމުން ރުއާނާ ބެލުމުގައި އިނެވެ. އޭރު ނަރުހަކު އައިވީ ކެނިއުލާ ގުޅުމަށް ޓްރޭ ގެނެސް ކައިރިކޮށްލިއެވެ.

”ޝީ އިޒް ސްޓޭބަލް ނައު… އިޓް ވޯޒް އަ ޕެނިކް އެޓޭކް… ނޯސް ބްލީޑިންގް ޕްލަސް، ޕަލްސް ވެސް ފާސްޓް ވެފަ ހުރީ.. ކުރީ ފަހަރުވެސް ޕެނިކް އެޓޭކްއެއް ދޯ ޖެހުނީ.. ކިހިނެތް ބާ މި ވީ.. ކިހިނެތް ތަ ރުއާ ފެނުނީ؟“ އަދްރެކް ރުއާނާ އާއި ގާތުން ދުރަށް ޖެހިލަމުން ބުނެލިއެވެ. އޭރު ނަރުހުން ވެސް ރުއާނާގެ ހިދުމަތުގައި އުޅެމުން ދިޔައެވެ.

“ ހުރިހާ ތަނެއް ބަލަމުން ގޮސް އެ ކޮމްޕްލެކްސްގެ ޗޭންޖިންގ ރޫމް ވެސް ބެލީ.. ސްޓްރޭންޖް ދޯ މިތަނަކީ އެއްވެސް ޗޭންޖިންގް ރޫމެއް އަދި ޓޮއިލެޓް އެއް ތަޅުލާފަ ހުންނަ ތަނެއް ނޫން.. މެއިންޓެނެންސް އަށް ނަގަންޏާ ވެސް ބޯޑު އިންނާނެ.. އެތާގަ ބޭރުން ތަޅުލާފަ ބޮކި ނިއްވާލާފަ ހުރީ.. ސޯ ޝައްކެއް ވެގެން ބެލި އިރު ރުއާ އޮތް ހާލު މި“

”ތަޅުލާފަ އޭ؟ބޮކި ނިއްވާލާފައޭ؟ “ އިޒްވާގެ ޖުމްލަތައް ކީވާންއަށް ގަބޫލް ނުކުރެވިގެން އަހާލިއެވެ. އިޒްވާ ބޯޖަހާލިއެވެ.

“ޕުއަރ ގާލް…އެއް ދުވަހު ރުއާ ބުނި އަނދިރި ތަންތަނުގައި ޝީ ކާންޓް ސްޓޭ އޭ.. ”ރުއާނާގެ ގާތުގައި އިށީންދެ އެއަތުގައި އިޒްވާ ހިފާލިއެވެ. އެއާއި އެކު ތިން މީހުންނަށް ވެސް ރުއާނާގެ މޫނަށް ބަލައިލެވުނީ ހަމްދަރްދީއާއި  އެކުއެވެ. ދެލޯ މެރިފައިވީ އިރު މުޅި މޫނަށް ވަނީ ރަތްކަމެއް ފާއްދާލާފައެވެ. އެތައް އިރަކު ރޮއެފައިވާ ކަން އެމޫނުމަތިން ހާމަވިއެވެ.

”ލިއަމް ނުކުތީމަ ބުނާނަން ކެމެރާގެ މަންޒަރު ބަލަން..ވަރަށް ހީވޭ ކަމެއް އުޅޭހެން“ ކީވާންއަށް ހަމަ ޝައްކުވަނީއެވެ. މައުވާގެ ކަމަކަށް ވެދާނެ ބާއޭ ހީވަނީއެވެ. ކޮންމެގޮތެއް ވިޔަސް  ކެމެރާގެ މަންޒަރުން ޔަގީންވާނެތާއެވެ.

ގަޑި އިރެއް ވަންދެން ރުއާނާ ބެލުމުގައި އުޅުމަށް ފަހު އަދްރެކްއާއި ކީވާންއާއި އީތަން އެތަނުން ނުކުމަތީ ޕްރައިވެޓް ކޮޓަރިއަކަށް ރުއާނާ ބަދަލްކުރުމުން، ރުއާނާ ގެ ހެދުން ބަދަލް ކުރަން ބޭނުންވާ ވާހަކަ ނަރުހުން ބުނުމުންނެވެ. ރުއާނާ ލައިގެން ހުރި ސްކްރަބް ބޭލުމަށްފަހު، ބަލިމީހުން ލެއްވުމަށް ހާއްސަކޮށްފައި ވާ ހެދުން ލެއްވިއެވެ. ނަރުހުން އެ މަސައްކަތް ނިންމާފައި ދިޔުމުން އިޒްވާ ، ރުއާނާގެ ގައިމަތީގައިވާ ހުދު ރަޖާ ރަނގަޅު ކޮށްލަ ދިނެވެ. އެވަގުތުވީ ރާބިއު އައިސް އެކޮޓަރީގެ ތެރެއަށް ދުވަމުން ދުވަމުން ވަތް ވަގުތަށެވެ. ރުއާނާގެ ފޯނުން ރާބިއު އަށް ގުޅީ އިޒްވާ އެވެ.

”ޕެނިކް އެޓޭކްއެއް.. އިރާދުކުރެއްވީތީ ސްޓޭބަލް މިހާރު .. ޑޮކްޓާރ އަށް ރުއާގެ ބަނޑުން އިންޖަރީއެއް ފެނުނީމަ ވީ އޯލްރެޑީ ޓޫކް އަލްޓްރާސައުންޑް ސްކޭން އެއް.. ނަތިންގް ޓް ވޮރީ.. ބޭހުން ޕެއިން ރަނގަޅުވާނެ … ހިއާސް ދި މެޑިސިން… އައި ވިލް ކަމް ބެކް ލޭޓާރ“

ރާބިއުއަށް ރުއާނާގެ ހާލަތު ކިޔައިދީފައި، ފަހުން އަންނާނަން ކަމުގައި ބުނެ އިޒްވާ ނުކުމެލިއެވެ. އޭނާ ބޯޖަހައިލުމަށްފަހު އިށީންދެލީ ރުއާނާގެ އެނދާއި މަގަތުގައި އިން ގޮނޑީގައެވެ. ރުއާނާގެ އަތުގައި ހިފާލައިގެން އިނދެ އެ މޫނުގައި ރާބިއު ފިރުމާލިއެވެ. ނިދިފައި އޮތް އިރު ވެސް މޫނުމަތީގައިވާ ވަރުބަލިކަން ފެނި ރާބިއުގެ ހިތައް ތަދުވިއެވެ.

”މައި ސްވީޓް އޭންޖަލް“ ރުއާނާގެ އަތްތިލަ، އޭނާގެ ދެއަތުގެ ތެރެއަށް ލާ ފިތާލަމުން ބޮސްދިނެވެ. އިޒްވާ ގުޅާފައި ވީ ގޮތް ކިޔައިދީފައި ވާތީ، ރުއާނާއަށް އެ ހާލު ޖެއްސި މީހަކާއި މެދު އޭނާގެ ހިތުގައި އުފެދިފައި ވަނީ އާދަޔާއި ހިލާފް ރުޅިއެކެވެ.

“އައި ވިލް ނެވާރ ފޮގިވް އެނީވަން ހޫ ޑެއާރސް ޓް ލޭ އަ ހޭންޑް އޮން މައި ޑޯޓާރ“ ރާބިއު ތުރުތުރު އަޅާއިގަތް އިރު އެ ދެލޮލުގައި ހުންނަ ހޭޒަލް ކުލައިގެ ކަޅީގެ ކުލަ ގަދަވެ ވިދައިގެން ދިޔައެވެ. އޭނާގެ ކަނާއަތް ނަގާ ބާއްވާއިލީ ރުއާނާގެ ނިތްކުރި މަތީގައިއެވެ. ރާބިއު ދެލޯ މަރާލި ހިނދު، މަދު ސިކުންތުކޮޅެއްގެ ތެރޭގައި އޭނާގެ ދެލޮލަށް މަންޒަރު ތަކެއް ސިފަވެގެން ދިޔައެވެ. ފުރަތަމަ ފެނިގެންދިޔައީ ރުއާނާ ސްޓެރެއިލް އިން އަތް ދޮންނަމުން ދިޔަ މަންޒަރެވެ. ދެން ދޮރާއި ހިސާބަށް ދިޔަ މަންޒަރެވެ. ނަމަވެސް ރުއާނާއަކަށް ކުރިއަކަށް ނުދެވެއެވެ. ދޮރު މަތީގައި ހުރި ޒުވާން އަންހެން ކުއްޖާ އައި ގޮތައް ރުއާނާގެ ބަނޑުގައި ފައިން ޖަހާލާ އިރު ރުއާނާ ވިއްސައިގެން ގޮސް ފާރު ބުޑަށް ޖެހެއެވެ. ބަނޑުގައި އަތް އަޅާއިގެން ހުރެ ރުއާނާ ތެދުވެ ދޮރާއި ދިމާލަށް އައެވެ. ނަމަވެސް ދޮރު ލައްޕާލާފައި އޭނާ ނުކުމެގެން ދާއިރު އިސާހިތަކު މުޅިތަން އަންދިރިވެއެވެ.

ރާބިއުއަށް ދެލޯ ހުޅުވާލެވުނު އިރު އައިސް ހުރި ރުޅި އިތުރަށް ފުންވެގެން ދިޔައެވެ. އެނދުގެ އަތްގަނޑަށް ބާރުކޮށްލެވުން ގޮތުން އަޑެއް ކިޔާފައި އެ ދަގަނޑު ގަނޑު ބަނޑިވެގެން ދިޔައެވެ. އެހެން އިނދެ އިނދެފައި އޭނާ ބޭރަށް ނުކުމަތީ ފޯނެއް ކޮށްލުމަށްޓަކައެވެ.

ލަސްލަހުން ދެލޯ ހުޅުވާލެވުނު އިރު ރުއާނާއަށް ބޮލުގައި އަތް ޖައްސާލެވުނީ ބޮލުގައި ހަރުލާފައިވާ މަޑުން ރިހުން އިޙްސާސް ކުރެވުމުންނެވެ. ރުއާނާ ބަލައިލި އިރު އެކަކުވެސް ފެންނާކަށް ނެތެވެ. މަޑުމަޑުން ތެދުވެ އެނދުގެ ހެޑްބޯޑުގައި ލެގިލަމުން، އަތައް ގުޅާފައިވާ ކެނިއުލާއަށް ނަޒަރެއް ދެވުނެވެ. ފޯނު ކޯލަށް ފަހު ރާބިއު ބޭރުން އައިސް ވަނީ ވެސް އޭނާ އެހެން އިންދައެވެ. ރުއާނާ ތެދުވެ އިންތަން ފެނި ރާބިއު ހަލުވި ހިނގުމުގައި އައިސް ގާތައް ހުއްޓުނެވެ.

”ދަރިފުޅާ.. ކިހިނެތް؟ ބަނޑަށް ތަދުވޭތަ؟ އެހެން ތާކަށް ތަދުވޭތަ؟ ރަނގަޅު ތަ؟“ ރުއާނާގެ ކޮނޑުގައި އަތް ލަމުން ރާބިއު އެތައް ސުވާލެއް އެއްފަހަރާ ކޮށްލިއެވެ. ބައްޕަގެ އަޑުގައިވީ ނުތަނަވަސްކަން ފެނި ރުއާނާއަށް ހީލެވުނެވެ.

”މިހާރު ރަނގަޅޭ ބައްޕާ.. ޑޯންޓް ވޮރީ..“

”ދަރިފުޅާ ޔަގީން ތަ ހަމަ.. އައި ސޯ އެވްރީތިންގް.. އޭނާއަކަށް ސަލާމަތެއް ނުވެވޭނެ.. ކާކުތަ އެ އަންހެން ޑޮކްޓަރަކީ“ ރާބިއު އެބުނީ ކީކޭ ކަން އެނގުމުން ރުއާނާއަށް ހިންދިރުވާލެވުނެވެ. ރާބިއުގެ އަތުގައި ހިފަހައްޓާލަމުން އަވަސް އަވަހަށް ބޯހޫރުވާލެވުނެވެ. އޭނާގެ ސަބަބުން ކަމެއް ގޯސްވާކަށް ރުއާނާ ނޭދެއެވެ.

”ރުއާ ކީއްކޮށްގެން ތަ މިހެން ހެދީ؟.. އަހަރެންގެ ދަރިފުޅު އަނދިރީގެ ތެރެއަށް ދޫކޮށްލި މީހަކަށް ކިހިނެތް މާފް ކުރާނީ“

”ބައްޕާ ދޫކޮށްލާ އެކަންތައް.. ރުއާ ހަމަ ބަރާބަރު.. އޭނާ ކޮށްލާ އެންމެ ކަމަކުން ވެސް ރުއާގެ ޖޮބް ގެއްލިދާނެ .. އައި ހޭވް ޓް ބީ ވެރީ ކެއާރފުލް..އެހެން ނޫނަސް އޭނާއަކަށް ނޭނގޭނެ އެންނު ރުއާއަށް އަނދިރީގަ ކެތެއް ނުކޮށްލެވޭނެ ކަން.. މިތަނުގަ އޮންލީ އިޒީ ނޯސް އެބައުޓް އިޓް“ ތުންފަތައް ހިނިތުންވުމެއް ކޮށްލަމުން ރުއާނާ ބުންޏެވެ.  ރާބިއުގެ ރުޅި ފިނިވެގެން އަލުން ގޮނޑީގައި އިށީނެވެ. ނަމަވެސް ހިތްހަމަ ނުޖެހިފައި ހުރިކަން އެމޫނުން ދޭހަވެއެވެ.

”ދަރިފުޅަށް ކަމެއް ކުރެވުނީތަ؟ “ ރާބިއު ދެވަނަ ފަހަރަށް އެ ސުވާލް ކޮށްލުމުން ރުއާނާ ތުންފަތުގައި ދަތް އަޅާލިއެވެ. ލިއަމް އާއި އޭނާ އެއްވެސް ގުޅުމެއް ނެތި ބަޔަކު އަޅުވާ ކިޔާ ކަމަށްޓާކައި ކުރި ވަރޭ ބުނާކަށް ނުކެރުނެވެ. އެހެންނޫނަސް ލިއަމް އަކީ ކާކުކަމެއް ބުނެދޭނެ ގޮތެއް ވެސް އޭނާއަކަށް ނޭނގެއެވެ. އޭނާއާއި ލިއަމްގެ އެއްވެސް ގުޅުމެއް އޮތީއެއް ނޫނެވެ. އެންމެ ކުޑަމިނުން ވާހަކަ ދައްކަނީ އެއްވެސް ނޫނެވެ.

”ރުއާއަށް އޮޕޮޗިއުނިޓީއެއް ލިބުނީ ޑޮކްޓާރ ކައިވާންގެ ސާޖަރީއެއް އެސިސްޓް ކޮށްދޭން.. އޭނައަށް އެ ޗާންސް ނުލިބި ރުއާ އަށް ލިބުނީ.. ދެޓްސް ވަޓް ހެޕެންޑް.. ނަތިން އެލްސް .. ދެން ބައްޕަ އެކަމާއި އަޅާ ނުލައްޗޭ“ ރުއާނާ ބުނެދިނީ އެވަރަށެވެ.

”ޑޮކްޓާރ ކައިވާން އޭ؟“ ރާބިއުގެ ނިތައް ރޫ އަރައިގެން ދިޔައެވެ.

”ނިއުރޮލޮޖިސްޓް ޑޮކްޓާރ ކައިވާން؟ “ ދެވަނަ ފަހަރަށް ރާބިއު އެހުމުން ކުޑަކޮން ބުމަ ހިތްލާލައިގެން އިނދެ ރުއާނާ ބޯޖަހައިލިއެވެ. އެ ބޮޑު ހޮސްޕިޓަލްގައި ވެސް ކައިވާން ކިޔާ އުޅެނީ އެންމެ ޑޮކްޓަރެކެވެ.

”ޑޮކްޓާރ ކައިވާން އެއީ ބައްޕަގެ ގާތް ރައްޓެއްސެއް.. އަންހެންނުން ނަށް ކިޔަނީ ޔޫމީން؟ “

“ ވަޓް؟ ރިއަލީ؟ ޔޫމީން؟ ތިއެއް ނޭނގޭ އަޅުގަނޑަކަށް. ކައިވާން ކިޔާ އެންމެ ޑޮކްޓާރ އެއް މިތާގަ ވޯކް ކުރަނީ..ދެޓް ވަން ފޭމަސް ޑޮކް“ ހައިރާން ވެގެން ރުއާނާ އިނީ އަނގަހުޅުވިފައެވެ. ކައިވާން އާއި ރާބިއު އަކީ  އެކުވެރިން ކަމެއް އޭނާ ނުދެނެ ހުއްޓެވެ.

”ޔާހް.. ބައްޕަ އާއި ކައިވާން އަކީ ރާއްޖޭގައި އުޅުނު އިރު އެކުވެރިން. ދެތާގަ އުޅުނު ނަމަވެސް އަބަދު ވެސް ވަރަށް ގުޅުން ރަނގަޅުވާނެ.. ފޯނު އޮތިއްޔާ މިހާރު މީ ހާސްވާން ޖެހޭ ޒަމާނެއް ނޫނެއްނު..ވަރަށް ޒަމާންތަކަކަށް ފަހު ކުރިން ދުވަހަކު މިދިމާވީ.. ބައްޕަ ބުނިން ދަރިފުޅު އުޅޭ ވާހަކަ.. ވަރަށް އެދުނު ބައްދަލް ކޮށްދޭން ވެސް.. އެކަމަކު ބައްޕަ ބުރަކޮން އުޅޭތީ އެކަން އަދި ނުވެފަ“ ރާބިއު ކިޔައިދިނެވެ. ރުއާނާ ހައިރާން ކަމުގައި އިނދެ ވެސް އުފާވެރި ގޮތަކަށް ހީލެވުނެވެ.

***

ދިހަ ގަޑިއިރުގެ ސާޖަރީއަށް ފަހު، ލިއަމްއަށް ތީއޭޓަރުން ނުކުމެވުނީ އެރޭގެ ދިހައެއް ޖަހަން އުޅެނިކޮންނެވެ. އެހެން މީހުން ތީއޭޓަރުން ނުނިކުންނަނީސް ލިއަމް ނުކުމެގެން އައީ އޭރުވެސް އޭނާގެ ރުޅި ފިނި ނުވާތީއެވެ. ލިއަމް ނުކުމެގެން އައި އިރު އިންތިޒާރުގައި ކީވާންއާއި އަދްރެކް އޭނާގެ  ކޮޓަރީގެ ތެރޭގައި ތިއްބެވެ. އެމީހުންގެ މޫނުމަތީން އެހެންޏާ ފެންނަ މަޖާ ކަމުގެ ބަދަލްގައި ހުރި ސީރިއަސް ކަމެވެ. އެކަމަކު އަމިއްލަ މީހާ ހުރި ހާލަތުން އެކަމެއް އޭނާއަކަށް ފަޙުމް ވާ ގޮތެއް ނުވިއެވެ. އެތެރެއަށް ވައިން ބާރު މިނުގައި ގޮސް ހުއްޓެވުނީ މޭޒު ދޮށުގައި އެވެ.

ސްކްރަބްގެ މަތިން ލާފައި ހުރި ޑޮކްޓާރ ކޯޓު ގައިން ވަކިކޮށްލަމުން ގުޅައަކަށް ދުރަށް ހޫރުވާލިއެވެ. މޫނުމަތީގައި ވީ ރުޅިވެރި އަސަރްތަކާއި އެކު ގައި ހުރި ބާރެއް ލާފައި މޭޒުގައި އަތުން ޖެހިއެވެ. ކީވާން އާއި އަދްރެކް ވެސް ތިބީ ހިސާބަކަށް ނުތަވަސްވެފައެވެ.

”ލިއަމް..ލިއަމް ކާމް ޑައުން.. ވަޓްސް ރޯންގް؟“ ޖެހިލުން ވެފައި ހުރެ ލިއަމްގެ ކޮނޑުގައި ކީވާން އަތްލިއެވެ. ލިއަމްގެ ދެލޮލުން އެކަނިވެސް އޭނާ އައިސް ހުރި ރުޅި ހާމަވެއެވެ.

”ރުއާނާ ކޮބާ؟“ ލިއަމްގެ އަޑު ބާރެވެ. ޖެހިލުންވެފައި ހުރެމެ، ރުއާނާ އެޑްމިޓް ކޮށްފައި އޮތް ޕްރައިވެޓް ކޮޓަރީގެ ނަމްބަރު، އަދްރެކް ބުނެދިނެވެ. އިތުރަށް އަދްރެކްއަށް އެއްޗެއް ނުބުނެ ދެވެނީސް ހަލުވި ހިނގުމުގައި ލިއަމް އެތަނުން ނުކުމަތެވެ. އޭނާގެ ފަހަތުން އަދްރެކްއާއި ކީވާން ވެސް ނުކުތެވެ.

”ބްރޯ.. ފުރަތަމަ އަޑު އަހާބަލަ.. އޭތް! އޭތް!“ ކީވާން ގޮވަގޮވާ އޮތްވާ ލިއަމް ލިފްޓްއަށް އަރައިގެން ދިޔައެވެ.

”މިދާ ރޭޓް އިން މަށަކަށް ހިއެއް ނުވޭ ރުއާއަކަށް ސަލާމަތް ވާނެ ހެންނެއް .. ވީ ނޯ ދެޓް، ރުއާ އިޒް އިނަސެންޓް..“ އަދްރެކް ފުން ނޭވާއެއް ދޫކޮށްލަމުން ޖެހިގެން ހުރި ލިފްޓް ހުޅުވާލަމުން ވަނެވެ.

”ޖޮބް އިން ވެސް ކަނޑާލަފާނެ“ކީވާންއަށް ދެފަރާތައް ބޯހޫރުވާލެވުނެވެ.

ހަލުވި ފިޔަވަޅު ތަކުގައި ލިއަމް އައިސް ވަނީ އަދްރެކް ބުނި، ކޮޓަރީގެ ތެރެއަށެވެ. ދޮރު ހުޅުވާލި އިރު އެނދުމަތީގައި އިށީންދެ އިނީ ފިރިހެނެކެވެ. ރުއާނާ ފެންނާކަށް ނެތެވެ. ކޮންމެވެސް ތާކުން ދުށް ފިރިހެނެއްހެން ލިއަމް އަށް ހީވި ނަމަވެސް އެކަމާއި ވިސްނޭވަރަށް ވުރެން އޭނާގެ ސަމާލްކަން ހުރީ ރުއާނާ ހޯދުމަށެވެ. އެހެން ހުއްޓާ ފާހާނާގެ ދޮރުން ހުޅުވާލާފައި ނުކުތް ރުއާނާ ފެނި ލިއަމްއަށް ހުއްޓުން އެރިއެވެ. ރުއާނާގެ މައުސޫމް މޫނު ފެނިރުޅި ފިނިވާން ވެސް އުޅުނެވެ. ނަމަވެސް ކައިވަންގެ ބަސްތަކާއި، މައުވާއާއި އެކު ސާޖަރީގައި ބައިވެރިވާން ޖެހުނު ހަނދާންވެ ރުޅިގަނޑު އިޔާދަވެގެން ދިޔައެވެ.

”ޑޮކްޓާރ ރުއާނާ.. ވީ ނީޑް ޓް ޓޯކް“

ކުއްލިއަކަށް ލިއަމް އައިސް ހުއްޓާ ފެނުމުން ރުއާނާ ދިޔައީ ވެސް ސިއްސައިގެންނެވެ. މީހަކު ނުބުނެ ދިން ނަމަވެސް ލިއަމްގެ މޫނުމަތީގައި ވި ކުލަވަރުން ، މައުވާ އެއްޗެއް ކީކަން ރުއާނާގެ ސިކުނޑިއަށް ދެނެގަނެވުނެވެ. ކްލާހުން ބޭރުން ދުވަހަކުވެސް ލިއަމްއާއި އަނގައިން ބުނެފައެއް ނުވެއެވެ. އެއްޗެއް ބުނަން އުޅެފައިވެސް އޭނާ ބަލައިލީ އެނދުމަތީގައި އިން ރާބިއުގެ މޫނަށެވެ. ލޮލުގެ އިޝާރާތުން އެތަނުން އިހަށް ދިޔުމަށް އެދުނެވެ. ރުއާނާ އެހެން ހެދީ ފަހުން ބައްޕަގެ ސުވާލްތައް އަންނާނެކަން އެނގިހުރެއެވެ. އެކަމަކު ލިއަމްގެ މޫނުން އެހާ ބޮޑަށް ރުޅިވެރިކަން ފެނި ރާބިއު ބަހައްޓާއިގެން ވާހަކަ ދައްކަން ބޭނުން ނުވީއެވެ. އެއްޗެއް ނުބުނެ ރާބިއު ވެސް އެތަނުން ނުކުމަތެވެ.

ރާބިއު ނުކުންތަން ބަލަން ހުރެފައި، ލިއަމް އައި ބާރު މިނުގައި ހުއްޓުނީ ރުއާނާއާއި ޖެހޭ ނުޖެހޭ ހިސާބުގައެވެ.

”މި ހޮސްޕިޓަލްގެ ވަޒީފާގައި ތިއުޅެނީ މިތަނުގެ ގަވާއިދު އެނގިގެންތަ؟“ ލިއަމްގެ ރުޅިވެރި އަޑުން އަހާލިއެވެ. ރުއާނާ ބޯޖަހައިލިއެވެ.

”އެހެންވީ އިރު ހީކޮށްގެން ތިހުންނަނީ މީ އަމިއްލަ ގެ ކަމަށްތަ؟ ނޫނީ މީ ރުއާނާގެ އަމިއްލަ ހަރުމުދާ ގަނޑެއް ކަމަށްތަ؟ އެނގޭތަ އަހަންނަށް އެންމެ ތަހައްމަލް ކުރަން އުނދަގުލީ ކޮންކަމެއްކަން؟“ ލިއަމް ވާހަކަ ދައްކަމުން ދިޔަ ގޮތުން ރުއާނާގެ ހިތުގައި ޖެހޭ ގޮތްވިއެވެ. މީހަކު މާ ބާރަށް ވާހަކަ ދައްކާ ނަމަ ފަސޭހައިން ރުއާނާއަށް ރޮވޭނެއެވެ. ރުއާނާގެ ގާތައް އޭނާ ޖެހެމުން ދާން ފެށުމުން ބިރުން ހުރެ ރުއާނާ ފަހަތައް ޖެހެމުން ދިޔައެވެ.  ރުއާނާ މަތަވީ ފާރުގައި ޖެހިފައެވެ. އެވަރުން ވެސް ރުއާނާގެ އަނގައިން އަޑެއް ވެސް ބޭރު ނުކުރެއެވެ.

”މި ދުނިޔެ މަތިން ވެސް އަހަންނަށް އެންމެ ތަހައްމަލް ކުރަން އުނދަގޫ ކަމަކީ އަހަރެންގެ އަމިއްލަ އަގަށް ނޫނީ ބެކްރައުންޑަށް އެހެން މީހެއްގެ ފުށުން ނޭދެވޭ އަސަރެއް ކުރާތަން ދެކުން.. މަށަކީ ކުރާ ކޮންމެ ކަމެއް ފުރިހަމައަށް ކުރަން ވިސްނާ މީހެއް.. މީހެއްގެ ފުށުން އަހަންނާއި ރިލޭޓެޑް އެއްވެސް ކަމެއްގެ ކޮމްޕްލެއިން އައުމަކީ..އާހްހް މަށައް އެންމެ ކެތް ނުކުރެވޭނެ ކަންތައް… އެކަމަކު ރުއާނާގެ ސަބަބުން މަށައް މިއަދު އެކަންތަކާއި ވެސް ކުރިމަތިލާން ޖެހިއްޖެ.. އެވެސް މުޅި ތީއޭޓަރުގެ ތެރޭގައި ތިބި އެންމެންގެ ކުރިމަތީގަ..“ ރުއާނާ ލައްވެގެން ހުރި ފާރަށް ލިއަމްއަށް ގޮށްމުށުގެ ހަމަލާއެއް ރައްދުކޮށްލެވުނެވެ.

”އަހަންނަކީ ތަނަކުން ފެންނަހާ އަންހެނަކާ ވާހަކަ ދައްކާ މީހެއް ނޫން… އެހެން އަންހެނުން ހެން ރުއާނާ ވެސް ބޭނުންވީ ދޯ މަ ފަހަތުން އުޅެން.. އެވަރަށް ރުއާނާ ކަޅި ޖަހާނުލާ ބަލާއިރު ވެސް މަ ވާހަކަ ނުދެއްކީމަ ނައު ޔޫއާރ ޓްރައިނަ ސެޑިއުސް މީ މުޅިން ތަފާތު ކޮން.. އެހެންނު؟“ ދެވަނަ ހަމަލާ ފާރަށް އަރުވާލިއިރު އިރު ރުއާނާއަށް ދެލޯ މަރާލެވުނެވެ.

”ބުނަންތަ ރަނގަޅު ވާހަކައެއް!.. ސާޖަރީ ތަކަށް ޗޫސް ކޮށްފަ ތިބޭ މީހުން އެވަގުތު ނުދުވާނެ އެހެން ޕޭޝަންޓުންގެ ފަހަތަކުންނެއް..އާރ ޔޫ ދެޓް ސްޓުޕިޑް؟ އެހާ ސިމްޕަލް ކަމެއް މަގޭ އެމްޕްލޮއީ އަކަށް ނޭނގޭނެ ކަމަކަށް ދުވަހަކުވެސް ހިއެއް ނުކުރަން.. ކަމެއް ވީމަ ޝެޑިއުލްތައް ހަދާފަ ހުންނަނީ..މީގެ ފަހުން މިކަހަލަ ކަމެއް ވެއްޖަނަމަ ހީކުރޭ އެހުރީ ވަޒީފާއިން ކަނޑާލާފައޭ“

ލިއަމްގެ ހިތައް ހަމަޖެހުމެއް ލިބުނީ ކިޔަން ބޭނުންވި ހުރިހާ އެއްޗެއް ކިޔާލެވުނީމައެވެ. ތިންވަނަ ހަމަލާ ފާރަށް ދޫކޮށްލަމުން ރުއާނާއާއި ދުރަށް ޖެހިލިއެވެ. ރުއާނާގެ އެސްފިޔަތަކަށް ކެތް ނުވެގެން ހޯސްލާފައި ދެލޮލުން ފައިބަމުން ދިޔަ ކަރުނުތަކާއި އެކު ހުރެވުނު އިރު އަމިއްލަ ދިފާއުގައި އޭނައަށް ބަހެއް ބޭރެއް ނުކޮށްލެވުނެވެ. މިއިން ޒަމާނަކު ދެރަނުވާ ވަރަށް އޭނާ ހުރީ ދެރަވެފައެވެ. އެހާމެ ރުޅި ވެސް  ގަދަވެފައެވެ. އޭނާ އެންމެ ހިތައް އުނދަގުވީ، ލިއަމްއާއި ދިމާ އޭނާ ބެލިއްޔޭ ބުނުނުމުންނެވެ. އޭނާއަށް ގިނަ ފަހަރު ފެންނަނީ ލިއަމްވެސް އޭނާއާއި ދިމާއަށް ބަލާ މަންޒަރެވެ. ލިއަމްގެ ރީތި ސިފައަށް އޭނާގެ ހިތް ފާޑަކަށް ލެނބެމުން ދަނިކޮން ހިސާބަކަށް ފޫހިކަން އެހިތައް ވެރިވެގަތެވެ.

ދެ ޒުވާނުން ފަސް އެނބުރުނީ ކޮޓަރީގެ ދޮރު ހުޅުވުނު އަޑުއަހާފައެވެ. ދޮރު ކުރިމަތީގައި ހުރި ރާބިއު ފެނި ރުއާނާ އަވަސްއަވަހަށް ދެލޯ ފުހެލަން އުޅުނެވެ. ރާބިއުގެ މޫނު ހުރިގޮތުން އެތަނުގައި ދެކެވުނު ވާހަކަ އޭނާ އަޑުއެހިކަން ރުއާނާއަށް އެނގުނެވެ. ރާބިއު އައިގޮތައް ލިއަމްގެ ގާތައް ހުއްޓި އޭނާގެ މޫނުމަތީގައި ހަށިގަނޑުގައި ހުރި ބާރެއް ލާފައި ޖަހާލިއެވެ. އޭރު ރާބިއުގެ ދެލޮލުން އަލިފާން ކަނި ބުރައެވެ.

****

(ނުނިމޭ)