މި ޖިސްމުގާ ވަނީ 35

ގަހުގެ އޮފިތަކުގެ ދޭތެރެއިން ދަތުރުކޮށްލާފައި އައި އިރުގެ ރަން ދޯދިތައް އިރަމްގެ ދޮން މޫނަށް ބޮސްދެމުން ދިޔައެވެ. މަޑުމަޑުން ލޯ މަރާލިއެވެ. އެވަގުތަކީ އޭނާގެ ނަފްސަށް އާދަޔާއި ހިލާފް ހިތްހަމަ ޖެހުމެއް ލިބިގެންދާ ވަގުތެކެވެ. ދުވަހުގެ އެންމެ ކަމުދާ ވަގުތުކޮޅެކެވެ. ލުއި ވައިރޯޅި ތަކުން ފަން އިސްތަށިކޮޅު ވަޔަށް ވިހުރިލަމުން ދިޔައިރު، އިރަމް އެހިތްހަމަޖެހުމަށް ހިތް ދޫކޮށްލައިގެން އިނެވެ. އެހެން އިންދާ ސިހުނީ މީހެއްގެ އަޑު ދާދި ގާތުން އިވިފައެވެ. އިރަމް ލަސްލަހުން ލޯ ހުޅުވާލި އިރު ކުރިމަތީގައި ފެންނަން ހުރި ސޫރައަކުން ސިހިއްޖެއެވެ.

*****

”މާއިން؟“ ކުރިމަތިގައި އެހުރީ މާއިން ނޫން ދެވަނަ މީހެއް ނޫނެވެ. ލިބުނު ހައިރާންކަން ފިލާ  ހިތުގެ ތެޅުން ބާރުވެ، މުޅި މީހާ ނުތަނަވަސްކަމުގެ ފުން ކަނޑަކަށް ގެނބިގެން ދާން އިރުތަކެއް ނުނެގިއެވެ. ނަމަވެސް އިރަމް އެ އަސަރުތައް ފޮރުވާލަމުން ގަދަކަމުން މާއިންއަށް ހިނިތުން ވެލިއެވެ.

”މިމަގުން ދަނިކޮން ދަންނަހެން ހީވާ ކުއްޖަކު ފެނިގެން މި ހުއްޓުނީ.. ބަލައިލި އިރު އިރަމް“ މާއިން ނިޔަނެތިގޮތަކަށް ވާހަކަ ދެއްކިއެވެ. އޭނާ ހީލުމުން އިރަމް އެހެންހޭ ބުނެ ބޯޖަހައިލިއެވެ. އިރަމްއަށް ފުން ނަޒަރަކުން މާއިންގެ މޫނަށް ބަލައިލެވުނެވެ. އެންމެ ފަހުން ނާޔާގެ ގާތައް އެގެޔަށް ދިޔަ ހިނދު ފެނުނު އިރު ހުރިގޮތާއި މިއަދު ތަފާތުކަމުން އެކަމާއި ވިސްނާލަން ޖެހުނެވެ. އެދުވަހު ލާފައިހުރި ގަޔަށް ދޫ ގޯންޔެއްހެން ހުރި ގަމީހާއި ސޯޓުގެ ބަދަލުގައި، މިއަދު އޭނާ ފެންނަނީ ނުހަނު ތަރުތީބުކޮށެވެ. ލާފައި ހުރީ ކަޅުކުލައިގެ ޖިންސަކާއި، ހަށިގަނޑާ ހެޔޮވަރު ވަރަކަށް ހުރި ޓީޝާޓެކެވެ. ދިގުވާން ފަށާފައިވާ އިސްތަށިގަނޑު ކޮށާ އެއްކޮން ތުނި ކޮށްލާފައި ހުރިގޮތުން ބޮޑަށް ވައްތަރީ  ފުލުހުންގެ ތަމްރީނަށް ދިޔުމަށް ތައްޔާރުވެފައިވާ މީހެއް ހެންނެވެ. ކަޜާއި އަތުގައި އޮތް ރިހި ފަތްތައް ވެސް ވަނީ ނަގާފައެވެ. ތަންކޮޅެއް މާތް ފާޑު ޖަހައެވެ. އެހެނަސް ސަދަފްގެ އިންޒާރު ވާހަކަ ހަނދާންވެ އަވަސްއަވަހަށް މޫނު އަނބުރާލިއެވެ.

”ގެއަށްދާން ރެޑީ ވެގެން ދޯ ތި އިނީ.. މަ މިދަނީ ފޭސް ޓޫއަށް ދާން ވެގެން.. ރައިޑެއް ދެވިދާނެ.. އަންނަގަ؟“ މާއިން ނުގޮތަކައް އަހާލިއެވެ.

”ނޫނޭ.. ދޮންބެ އަންނާނެ މިހާރު ..“ އިރަމްގެ އޭނާގެ ހިތުގެ އަޑިން އެދުނީ އެންމެ ކަމަކަށެވެ. ކޮންމެ ގޮތަކުން ނަމަވެސް މާއިންގެ އެ ހުށަހެޅުމުން ސަލާމަތްވުމަށެވެ. އިރުކޮޅަކު ވިސްނާލުމަށްފަހު، އެކަމުން މަނާވެގަތެވެ. އޭނާއާއި އެކު އެކަނި ދިއުމަކީ އިރަމްގެ ޟަމީރު އެއްގޮތަކަށްވެސް ރުހޭ ކަމެއް ނޫނެވެ. ދެމެދުގައި އެކުވެރިކަމުގެ ފިނި ހިޔަލެއް ނެތްއިރު، ފަހަކަށް އައިސް  އޭނާ ފެންނަ ކޮންމެ ފަހަރަކު، މާއިން ވާހަކަ ދައްކަން އުޅެމުން ދާ ގޮތުން އެކަމާއި އިރަމްއަށް ވިސްނެން ވެސް ވަނީ ފަށާފައެވެ. އެފަދަ ކޮންމެ ވަގުތަކު ކޮންމެވެސް ވަރަކަށް ހިތްބިރުވެސް ގަނެއެވެ.

އެހެން ހުއްޓާ އިޔާން ގުޅާތަން ފެނިގެން ހިތްހަމަޖެހުމުގެ ނޭވާއެއް ދޫކޮށްލެވުނެވެ. އިރަމް ފޯނު ނަގާ ކަންފަތުގައި ޖަހައިގެން ހުރެ ދުރަށް ޖެހިލިއެވެ.

”ސޮރީ އިރޫ .. އެމީ ޑޮކްއަށް ދައްކަން ވެގެން މާދަމާ އަށް ހެއްދި އެޕޮއިންޓްމެންޓް އެބައިން މިރެއަށް އަވަސް ވެފަ.. ވަރަށް އަވަސް ނަމްބަރެއް އިނީ ލިބިފަ…  އަނެއްކޮޅުން އަދި ގެއަށް ވެސް ނުދެވޭ.. އަވަހަށް ނިމޭނެ ކަމަށް މަޑުކުރަން ބުނާކަށް ނުކެރޭނެ.. އެހެންވެ ދޮންބެއަށް ނުދެވިގެން ބައްޕަ އެބަ ފޮނުވާލަން އިނގޭ“ އިޔާންގެ ވާހަކަތައް އިވުމާއެކު، އިރަމްގެ ހިތުގައި އުފެދުނު އުންމީދުގެ ދަންމަރު ނިވި، މާޔޫސްކަމުގެ ސާލެއް ވަށާލައިފިއެވެ. ހިތާ ދެކޮޅަށް ނަމަވެސް، މަޑުމައިތިރި އަޑަކުން އާއެކޭ ބުނެ ފޯނު ބޭއްވިއެވެ. މާއިން ވާހަކަ ދައްކަން އުޅޭނެކަން އެނގޭތީ، ނަދީމް އަންނަންދެން އިރަމް އުޅުނީ ކޮލެޖް އިމާރާތުގެ ތެރެއަށް ވަންނާށެވެ.

”ހެލޯ؟ އާދެބަ ދާން.. އިޓްސް އޯކޭ އޭ.. މަ ނޫޅޭން ކަމެއް ކުރާކަށް އިނގޭ.. ހެހެހެ.. ކޮމްފޯޓަބަލް ނޫނިއްޔާ ފަހަތު ސީޓުގަ ވެސް އިނދެވޭނެ“ އިރަމްއަށް ވެގެން ދިޔަ ގޮތުން މާއިން ސިއްރުވެރި ގޮތަކަށް ހީލިއެވެ.  ފޯނަށް ބަލަހައްޓައިގެން ހުރި އިރަމްގެ މޫނުމަތިން ފާޅުވަމުންދިޔަ ކޮންމެ ކުލަވަރަކުން، އޭނާގެ ހިތުގައި ހިނގަމުންދާ ހައިޖާނު މާއިންއަށް ވަރަށް ރަނގަޅަށް ނަގައިގަނެވުނެވެ. މާއިން ބެލީ ވީހާ ވެސް ދުރުދުރުން އިރަމްއާއި ގާތް ގުޅުމެއް އުފެއްދޭނެ އުކުޅުތަކެވެ.

ކޮލެޖާއި ދާދި ގާތުގައި ހުންނަ މިސްކިތުން މަޤްރިބް ނަމާދުގެ ވަގުތުވީކަން އިއުލާން ކުރީ އެވަގުތެވެ. ބަންގީގެ އަޑު ކަންފަތުގައި ހަރުލައިގެން ދިއުމުން ލަސްވެފައިވީ ވަރު އަންދާޒާ ކޮށްލެވުނެވެ. “ބައްޕަ އަންނަން ދެން ހުރެގެން ނަމާދު ވަގުތު ވެސް ފަހަނަ އަޅާގޮސްފާނެ … މާދަމާ އެގްޒާމް، މިތާގަ އައި ކޭންޓް ވެއިޓް އެހާ ގިނައިރު ވަންދެން ..އެކަމަކު އެއްގޮތަކަށް ވެސް މާއިން އާއެއްކޮން ދާކަށް ބޭނުމެއް ނޫން.. އޯޙް ގޯޑް، ކިހިނެތް ހަދާނީ؟… މްމްމް ފަހަތު ސީޓަށް އަރައިގެން ދާން ވީ ކަންނޭގެ.. އެންމެ ފުރަތަމަ އަދި ފަހު ފަހަރު ކަމަށް ބަލާފަ“ އަމިއްލަ ނަފްސަށް އިވޭވަރަށް އިރަމް ވާޙަކަ ދައްކަމުން ދިޔައެވެ. އެންމެ ފަހުން އިޔާންއަށް މެސެޖެއް ކޮށްލީ އެކުވެރިއަކާއި ދާ ކަމުގައި ބުނެފައެވެ. އަވަހަށް ގެއަށް ދާން ބޭނުން ވެފައި ހުރިވަރުން މާއިންއާއި ދިމާ ބަލައިލަމުން ބޯޖަހައިލިއެވެ.

”ރިއަލީ؟“ ގަބޫލް ނުކުރެވިފައި ހުރެ މާއިން އެއްސެވެ. އިރަމް ބޯޖަހައިލަމުން މާއިންގެ ފަހަތުން ހިނގައިގަތެވެ. މޭގައި ދަބަސް ޖައްސާލައިގެން ހުރިއިރު ވެސް އޭނާގެ ހިތް ގޮތަކަށް ތެޅެމުން ދިޔަކަން އިހްސާސް ވިއެވެ. ނުތަވަސް ވެފައި ވީ އިރު ސަދަފްގެ މަތިން ހަނދާން ވަމުން ދިޔައެވެ.  އިރަމް ފަހަތު ސީޓުގައި ހަމަ ޖެހިލުމުން މާއިން ކާރު ދުއްވާލިއެވެ.

***

ކާރު ޕާކް ކޮށްލި ހިނދު ނާޔާ ގުޅަން ފެށުމުން ސަދަފް އިއަރޕޮޑު ފޯނާއި ގުޅުވާލިއެވެ. ކޯލް ނަގައި ވާހަކަދައްކަމުން ކާރުން ފޭބިއެވެ. ”ކީކޭ ދޮންބެދައްތަ؟.. މިއާދެވުނީ އެހިސާބަށް.. ނަމާދުކޮށްގެން އައީމަ ކުޑަކޮން ލަސްވީ“

”އެހެންތަ..  ދޮންބެގެ ފްރެންޑްސް ކޮޅެއް ދިމާވެގެން މަޑުކޮށްލީމަ އަދި ލަސް ވެދާނެ، ގެއަށް ގޮސް މަންމަ ކައިރީގަ ބަހައްޓާލަ އިނގޭ“

”އޯކޭ ވާނެ.. ޔޫވީ ގޮވައިގެން ކުޑަކޮން ދުއްވާލާފަ ދާނަން ގެއަށް.. އަނެއްހެން ވަރަށް ފްރީކޮން މިހުރީ.. ޓޭކް ޔޯ ޓައިމް“ ސަދަފް ހީލަމުން ޖަވާބު ދިނެވެ. ނާޔާ ޝުކުރު އަދާކުރަމުން ފޯނު ކުރުކޮށްލިއެވެ. ކާރުގެ ތެރެއިން ނެގި ކޮތަޅެއް ހިފައިގެން ސަދަފް މަގު ހުރަސްކޮށްލުމަށްފަހު އެގެއަށް ވަނެވެ.

”އައުޗް، މަންމަ ކޯއްޗެއް އަޅާފަބަ .. ހާދަހާ ބަރޭ“ އެއީ އެގެޔަށް އަންނަކަން އެނގުމުން މަޖުދާއަށް ދިނުމަށްޓަކައި އާމިލާ ހަވާލް ކުރި ސާމާނެވެ.

ނުހަނު ހަމަޖެހިލައިގެން ހުރެ ލިފްޓާއި ހިސާބަށް ދެވުނު އިރު ސަދަފްއަށް ހުއްޓެން މަޖުބޫރުވީ ލިފްޓުގެ ކައިރީގައި ތިބި އިރަމްއާއި މާއިން ފެނިފައެވެ. އޭނާގެ ފިޔަވަޅުތައް ވެސް ހީވީ ގަނޑުވެގެން ދިޔަހެންނެވެ.  ސިހުނު ވަރުން ކޮތަޅުވެސް އަތުން ދޫނުވީ ކިރިއާއެވެ. އެއީ އެއްގޮތަކަށް ވެސް ފެންނާނެ ކަމަށް އުއްމީދު ކުރި މަންޒަރެއް ނޫނެވެ. އިރަމްގެ ގާތުގައި މާއިންއާއި ދުރުން އުޅުމަށް ތަކުރާރްކޮން ބުނުމުން ވެސް  އޭނާގެ ބަހުގައި ކޮޅުން ފައިން ޖެހީތާއެވެ. ހަމައެކަނި މާއިންއާއި ވާހަކަ ދެއްކީއެއް ނޫނެވެ. ގޭގެ ދޮރު މައްޗަށް ވެސް ގެނައީއެވެ. އިރަމް ހީލައިގެން ހުރިގޮތުން ހީވަނީ ދެމެދުގައި ގާތް ގުޅުމެއް އޮތްހެންނެވެ. ސަދަފްގެ ހިތައް ކުރުވީ ތަފާތު އަސަރެކެވެ. އިރަމްގެ މޫނަށް ބަލައިލެވުނީ ޝަކުވާގެ ނަޒަރަކުންނެވެ. އޭނާ ފެނުމާއި އެކު އެ މޫނުގެ ކުލަ އޮއްސި ހިނިތުންވުން ވަޅުޖެހުނުގޮތް ފެނި އެތަނުގައި ހުންނާކަށް ވެސް ސަދަފް ބޭނުމެއް ނުވިއެވެ.

ހިތައް ކުރުވި އަސަރާއި އެކު ނަފްސަށް ވެރިވި ރުޅިވެރިކަމާއި އެކުވެސް ސަދަފް ހަނު ހުއްޓެވެ. ދެމީހުންގެ ގާތުން އަޅާފައި ޖެހިގެން ހުރި ލިފްޓްއަށް ވަންނަން ދިޔަ މަގުމަތީގައި މާއިންއަށް އޭނާ ބަލައިލީ ރުޅިން އަންދާލާ ފަދަ ނަޒަރަކާއި އެކުއެވެ. މާއިންގެ މޫނުން ތަފާތު އަސަރެއް ނުދެއްކި ނަމަވެސް އެދެލޮލުގައިވީ މަކަރުވެރި ޝުއޫރު ސަދަފްއަކަށް ނޯޅެއެވެ.

ލިފްޓުން ފޭބުމަށްފަހު، ހިތްދަތިކަމުގެ މައްޗަށް ގަދަވެގަނެ، ތުންފަތަށް މަސްނޫއީ ހިނިތުންވުމެއް ވެރިކޮށްލިއެވެ. ނަފްސަށް އައިސްފައިވާ ލޮޅުން އެހެން މީހަކަށް ދައްކާކަށް ބޭނުމެއް ނުވިއެވެ. ގޭގެ ބެލް ޖަހާލި ވަގުތު، އެތެރެއިން އިވުނު މަޖުދާގެ އަޑާއެކު ސަދަފް އެތެރެއަށް ވަދެގެން ދިޔައީ ހިތުގެ ރިހުންތައް ފޮރުވަމުންނެވެ.

”ޝެޑީ ތަ؟.. ދެން ދޮރުގަ ޖަހާ އެއްޗެއް ނޫނޭ.. ހީވަނީ ދުރު މީހެއްހެން“ ސަދަފް ފެނުމުން ސޯފާގައި އިނދެފައި މަޖުދާ ތެދުވިއެވެ. ގާތުގައި އިން ނަދީމް ވެސްއިސް އުފުލާލި އިރު  ހިނިތުންވެލިއެވެ. ނަދީމްގެ ހިނިތުންވުމުން ކުޑަކޮން ހައިރާންވިއެވެ. އިޔާން އާއި ޖެހުނު މައްސަލައަށް ފަހު ނަދީމް އޭނާއާއި ޥާހަކަ ދެއްކުން މުޅިން ހުއްޓުމަކަށް އައެވެ. އެފަހުން ވާހަކަ ދައްކަން ފެށީ އިރަމްއަށް ދިމާވި ކަންތަކަށް ފަހު އޭނާގެ އެހީވި ހިސާބުންނެވެ. ނަމަވެސް ވާހަކަ ދައްކަނީ ކޮންމެހެން ވާހަކަ ދައްކަން ޖެހިއްޖެ ހާލަތެއްގައި އެކަންޏެވެ. އެކަމަކު އެގޮތައް ހީލީ މުޅިން އަލަށެވެ. ލިބުނު ހިތް ހަމަޖެހުމުން އޭނައަށް ވެސް ހީލެވުނެވެ.

”ހެހެ.. ގޭގައި މީހަކު އުޅޭތޯ މި ބަލާލި.. މީ މަންމަ ދިން އެއްޗެއް“ ސަދަފް އަތުގައި އިން ކޮތަޅު ސޯފާގެ ކައިރީގައި ބެހެއްޓިއެވެ. “ ކޮބާ ޔޫވީ؟“

”ވެއްޖެ ރީއްކޮއާއި އެއްކޮން .. އެމީ ނައިސްގެން ރީއްކޮ ބޮޑާ ވާން ފެށީމަ ޔޫވީ ވެސް ރޯން ފަށައިފި.. މަޖާ ދެމީހުން އެއީ، އެކަކު ރޮންޏާ އަނެއްކަކު ވެސް ރޯނެ.. އެންމެފަހުން ނީޝަން އެބައިން ދެމީހުން ގޮވައިގެން އަހަހަހަ..“ ހިނިއައިސް ހުރެ މަޖުދާ ޖަވާބު ދިނެވެ.

މަޖުދާގެ ވާހަކަ އަޑުއަހާފައި ސަދަފްވެސް ހީލިއެވެ. މަޖުދާ ޔޫވީން ބަލާ އެތެރެއަށް ދިއުމުން، ސަދަފް މަޑުކޮށްލީ ސޯފާގެ ކައިރީގައި ކޮޅަށެވެ. ނަދީމް އެތަނުގައި އިނުމުން، އިށީންނަން ކުޑަކޮށް ޖެހިލުންވީއެވެ. އަތުގައި އޮތް ފޯނާ ކުޅޭކަމަށް ހެދިގެން ހުރި ނަމަވެސް، ސަދަފްގެ މުޅި ވިސްނުން ވަނީ ދާދި ދެންމެއަކު ލިފްޓް ކައިރިން ފެނުނު މަންޒަރުގައެވެ. އިރަމް އާއި މާއިންގެ އެ ގާތްކަމާއި، އިރަމްގެ އެ ހިނިތުންވުން އޭނާގެ ހިތުގައި ބިންވަޅު ނެގިފައިވީ ފުން ޒަޚަމެއް ފަދައިންނެވެ.

”ކޮޅަށް ނުހުރެ އިށީންދޭ.. މިގެއިން ކައިގެން ދާން މަޑުކުރަން ވީނު.. އިޔާން ކީ މިރޭ ވިޝާމް ވެސް  އަންނާނެއޭ“ ސަދަފް ސިހުނީ ނަދީމްގެ އަޑަށެވެ. އެހާ ގާތްކޮން ވާހަކަ ދެއްކުމުން އޭނައަށް ހުރެވުނީ އަންތަރީސްވެފައެވެ. ހައިރާންކަން ފޮރުވާލަމުން ސޯފާގައި އިށީންދެލިއެވެ. ނަމަވެސް އިރަމްގެ ސަބަބުން ތަބީއަތު ހަރާބުވެފައި ހުރުމުން ކާ ހިތެއް ވެސް އެވަގުތު ނެތެވެ.

”ވަރަށް ފަހުން ސައި ބުއީ، އެހެންވެ އެހާ ބަނޑުހައެއް ނޫން.. އެހެން ފަހަރަކުން ދޯ“ ސަދަފްގެ ޖަޥާބާއި އެކު ނަދީމް އަނެއްކާ ވެސް ހީލިއެވެ. އޭނައަށް އެއްޗެއް ނުބުނެވި އުޅެނިކޮން އިރަމް ވަތްތަން ފެނުމުން ގޮވާލައިފިއެވެ. ފަސްދީގެން އިނަސް ފިޔަވަޅުތަކުގެ އަޑުން އިރަމްކަން ސަދަފްއަށް ނަގައިގަނެވުނެވެ.

”ކޮން އެކުވެރިއެއްތަ އެއީ؟ ބައްޕަ ގެއިން ނުކުންނަނިކޮށް ދޮންބެ ގުޅާފައި ބުނި އިރޫ ފްރެންޑަކާ އެކީގައި އަންނަ ވާހަކަ،“ ނަދީމްގެ އެ ސުވާލަކީ ސަދަފްގެ ހިތުގައި ރޯވެފައިވާ އަލިފާންގަނޑަށް ދަރު އެޅުން ފަދަ ކަމަކަށް ވިއެވެ. އަތްތިލަ މުށްކެވި، މޫނުމަތީގެ ކުލަވަރު ބަދަލުވިއެވެ. ހިތުގެ އުދާސްތައް ފޮރުވަން ކުރަމުންދިޔަ ހިތްވަރު ވެސް  އެލެމުން ދިޔަ ކަހަލައެވެ.

”މި.. މިހާރު ގޮސްފި،“ އިރަމް ވަރަށް މަޑުމަޑުން، ޖެހިލުންވެފައި ހުރެ ބުނެލިއެވެ.

”އެކުވެރިއެކޭ؟“ ސަދަފްގެ ހިތަށް އެރިއެވެ. އޭނާ ހުރީ މަޖުދާ ޔޫވީ ގޮވައިގެން އަންނާނެ ވަގުތެއްގެ އިންތިޒާރުގައެވެ. އެ މާހައުލުގައި ހޭދަކުރާ ކޮންމެ ސިކުންތަކީ އޭނާގެ ކެތްތެރިކަން ކޮޅުންލާ ކަމަކަށް ވިއެވެ.

”ކުޑަބޭ..“މަޖުދާގެ ފަހަތުން އައިސް މަޑުކޮށްލި ޔޫވީން އަށް ސަދަފް ފެނުމުން، ގައިގާ އޮޅިގަތެވެ. ގަދަކަމުން ސަދަފް ހީލަން މަސައްކުރަމުން ދަނިކޮން ޔޫވީންގެ އެއާދައިން އެ މަސައްކަތައް ފަސޭހަވިއެވެ.

“މާމައާއި ކާފައަށް ބާއި ކިޔާލަ.. ބުނޭ މާދަމާ އަންނާނަމޭ“ ޔޫވީން އުރާލަމުން ނަދީމްއާއި މަޖުދާއާއި ވީ ފަރާތައް އެނބުރިލަމުން ސަދަފް ނުހަނު ލޯބިން ޔޫވީންއާއި ވާހަކަ ދެއްކިއެވެ. އިރަމްއަކީ އެތަނުގައި ހުރި މީހަކަށްވެސް ހަދާނުލިއެވެ. އެމީހުން ޔޫވީންއާއި އިރުކޮޅަކު ވާހަކަ ދައްކާލަން ހުރުމުން ސަދަފްއަށް ނުކުމެވުނީ، އިރަމްގެ މޫނުމަތިން ދުރަށްދާން ބޭނުން ވެފަ ހުންނަތާ އިރުކޮޅެއްވީ ފަހުންނެވެ.

”ކާކާއި އެއްކޮންތަ ގެއަށް އައީ؟ ބައްޕަ ހީކުރީ ނާޔޫ ފޮނުވައިގެން ޝަދަފްއާއި އެއްކޮން ކަމަށް ފަހުން އައީ.. ނާޔޫ ގުޅި ވިއްޔަ ސަދަފް އަންނާނެއޭ ޔޫވީ ރެޑީ ކޮށްލާށޭ ކިޔާފަ“ ނަދީމް ޒާތަކައް ހީލައިގެން ހުރެ އިރަމް ކުރެން އެހިއެވެ. އޭނާ ވާހަކަ ދެއްކީ ސަދަފް ނުކުމެ ދޮރު ލައްޕާލި ފަހުންނެވެ.

ނަދީމްގެ ވާހަކައިން އިރަމްއާއި މަޖުދާއާއި ދެމީހުންނަށް ވެސް  ސިހުމެއް ލިބުނެވެ. އެހާ ހިނިއައިސް ހުރެ ސަދަފްގެ ވާހަކައެއް ފެށުމުން ގަބޫލް ނުކުރެވިފައި ބަލަހައްޓައިގެން ތިބެވުނީއެވެ.

”ފްރެންޑަކާއި އެއްކޮން އައީ.. ސަދަފްއަކީ ފްރެންޑެއް ނޫން“ މާއިންގެ ނަން ހާމަކުރަން ބޭނުން ނުވާތީ އިރަމް ކުރު ގޮތަކަށް ބުނެލިއެވެ. އޭނާއަށް ސިފަވަމުން ދިޔައީ މާއިންއާއި އެކު ލިފްޓު ކައިރިން ފެނުނީން ސުރެން ސަދަފްގެ މޫނަށް ވެރިވެފައިވީ ކުލަވަރެވެ. އެ ދެލޮލުން ހިތްދަތިކަމާއި އެއްވަރަށް ރިހުން ފެނުނު ހެން ހީވިއެވެ. އެ އަސަރުތަކުގެ މައްޗަށް ރުޅިވެރި ކަން ސަދަފް ވެރިކޮށްލި ގޮތް އިރަމް ދެކުނެވެ. ހަގީގަތުގައި މާއިން ކައިރީގައި އެގެޔަށް ވަންނާކަށް އިރަމް ނުބުނެއެވެ. އިރަމްގެ ފަހަތުން އޭނާ އައީއެވެ. އެވާހަކަ ބުނަން ބޭނުންވެ މަޖުދާއާއި ނަދީމް ތިބުމުން ހަނުހުންނަން މަޖުބޫރުވިއެވެ. ސަދަފް ދާންވެގެން ނުކުމެފައި އެންމެ ފަހަރަކުވެސް އިރަމްއާއި ދިމާ ބަލައި ނުލުމުން އިރަމްގެ މެއިން ދިޔައީ ނުބައި ޒާތަކަށް ދިލަ ނަގަމުންނެވެ.

”މާދަމާ އެގްޒާމް އޮތީމަ އެހެންވެ އަވަހަށް ގެއަށް އަންނަން ބޭނުން ވެގެން އައީ .. ބައްޕަ އާންމުކޮން މި އަންނަނީއޭ ބުނެފިއްޔާ އަންނާނީ ބައިގަޑިއިރު ފަހުން“ އިރަމްގެ ޖަވާބުން މަޖުދާއާއި ނަދީމްއާއި ދެމީހުންގެ ފުށުން ވެސް އިވިލީ ލުއި ހިނިތުންވުމެކެވެ.

އިރަމް ދިޔައީ ސަދަފްގެ ފޯނަށް ގުޅޭތޯ މަސައްކަތް ކުރަމުންނެވެ. ދިހަ ވަރަކަށް ފަހަރު ގުޅުމުން ވެސް ފޯނު ކަނޑާލަނީއެވެ. އެންމެ ފަހު ފަހަރު ގުޅުމުން ފޯނު ނިއްވާލިއެވެ. އިރަމް މަސައްކަތް ކުރަމުން ދިޔައީ ސަދަފްއާއި ވާހަކަ ދެއްކޭނެ ގޮތެއް ވޭތޯއެވެ. ފެންކަޅިވެގެން ދިޔަ ހިނދު ކަރުނަތައް އޮއްބަލަމުން އިރަމް ހަމަޖެހިލަން އުޅުނެވެ. އެމީހުންނަށް ފަސްދެވުނީ ކިރިޔާއެވެ. ދެލޮލުގައި ބޮނޑިކޮށްފައި ހުރި ކަރުނުތައް އެސްފިޔަތަކައް ކެތް ނުވެގެން އެންމެ ފަހުން އޮހިގަތީއެވެ. ދަބަސް ބޮނޑިކޮށްލައިގެން ހުރެ ކޮޓަރިއަށް ވަދެ ދޮރު ލެއްޕިއެވެ.

”ނަދީމް.. އަހަންނަށް މިހުރެވުނީ ގަބޫލް ކުރަން ދަތި ވެފަ.. ސަދަފްގެ ވާހަކަ ބުނި އިރު ހާދަ ހިނިއައިހޭ ތިހުރީ“

”މްމްމް، ގެއަށް އައީ ސަދަފްއާއި އެކު ހޭ އިރޫ ކުރެން މި އަހާލީ.. އަނެއްހެން ވަކި ކަމެއް ވެގެންނެއް ނޫން… ދެތިންފަހަރަކު ސަދަފް އައެއްނު ނާޔޫ ބުނެގެން އިރޫ ގޮވައިގެން ..ދެން މިއަދު އައީމަ އެހެންވެ އަހާލި..މަޖޫ، އަހަންނަށް ހީވަނީ މާޒީގަ ހިފައިގެން ނުދަމާ އޭނަ އާއިވެސް ވާހަކަ ދައްކަން ވީހެން.. މަޖޫ ބުނާހެން އަހަރެންގެ ހިތް ވެސް އެއްބައި ފަހަރު ބުނޭ ސަދަފް އިނޮސެންޓޭ ވެސް.. އެކަމަކު އިޔާ އެދުވަސްކޮޅު އުޅުނު ހާލުން ސަދަފް ފެންނައިރަށް އެހެން ހިތައް އަރަނީ.. އެހެންވެ ވާހަކަ ނުދައްކާ ހުރެވެނީ…މިހާރު އެދެމީހުން ވެސް ވާހަކަ ނުދެއްކިއަކަސް، ވިޝާމްއާއި އެއްކޮން ބޭރަށް ދޭ ..  ކޮންމެ ވެސް ވަރަކަށް ގުޅުން ރަނގަޅު ކުރަން ބޭނުންވާތީ ކަންނޭގެ ދޯ.. އެހެންވެ އަހަރެން ވެސް ވަރަށް އެކަމާ ވިސްނައިފިން.. އަނެއްކޮޅުން ހައިކަލްމެން އެހާ ރަނގަޅު އިރު އެކަމާއި ވެސް ވިސްނަން ވާނެ އެންނު“ ނަދީމްގެ ވާހަކަތަކުން މަޖުދާއަށް ލިބުނީ ބުނެދޭން ނޭނގޭފަދަ އުފާވެރިކަމެކެވެ. ލިބުނު ހިތްހަމަޖެހުމާއި އެކު ނަދީމްގެ އަތުގައި ހިފާލައިގެން އިނދެ އަވަސްއަވަހަށް ބޯޖަހައިލިއެވެ.

****

އޮފީހުން ނިމުނު ގޮތައް ކާރު ނެރެގެން އައިސް އިޔާން މަޑުކޮށްލީ ރެސްޓޯރެންޓްގެ އެއް ފަރާތުގައެވެ. ގަޑި ބަލައިލި އިރު އަށެއް ޖެހުމާއި ދޭތެރޭގައި މާގިނަ ވަގުތެއް ނެތެވެ. އަމީރާ ނުކުންނަން އަދި ވަގުތުކޮޅެއް ނަގާނެ ކަމުގައި ބުނެ މެސެޖް ކުރުމުން އިޔާން ފައިބާކަށް ނުހަދައެވެ. ލޯގަނޑު ތިރިކޮށްލަމުން އޭނާގެ އިސްތަށިގަނޑު ހުރިގޮތް ބަލައިލިއެވެ.

ކާރުގެ ތެރޭގައި ގުގުމަމުންދިޔަ މަޑު މިއުޒިކުގެ ރާގަށް ތުމުން ފުމެމުން ދިޔައިރު، އިޔާންގެ މޫނުމަތިން ފެންނަނީ ހިތްހަމަޖެހުމެވެ. އިސްތަށިގަނޑުން އަތް ދޫކޮށްލީ ހިތްހަމަޖެހޭ ވަރު ވުމުންނެވެ. ރީތި ހިނިތުންވުމެއް ތުންފަތުގައި ދުވެލީ އަމީރާގެ ކޯލެއް އަންނަން ފެށުމުންނެވެ. ކުޑަދޮރުން ބޯ އަރިކޮށްލުމަށް ފަހު ބޭރު ބަލައިލި އިރު، ރެސްޓޯރެންޓްގެ ދޮރު ކައިރީގައި ހުރިތަން ފެނުމުން އިޔާން ފޯނު ނަގާކަށް ނޫޅުނެވެ.

ފަހަތު ސީޓުގައި އޮތް ތާޒާ ރަތް ފިނިފެންމާ ބޮނޑި ނަގައި، އޭގެ ފުރިހަމަކަމަށް ހިތްހަމަޖެހިފައިވާ ނަޒަރަކުން ބަލައިލުމަށްފަހު އިޔާން ކާރުން ފޭބިއެވެ. އަދި މާބޮނޑި ފުރަގަހަށް ލައި ފޮރުވައިގެން، ސިއްރު ސިއްރުން އަމީރާއާ ގާތަށް ފިޔަވަޅުތައް އެޅިއެވެ.

”ހޭއި ލަވް“ އިޔާންގެ މަޑުމައިތިރި އަޑު އިވުމާއެކު، އިސްޖަހައިގެން ހުރެ އިޔާންގެ ފޯނަށް ގުޅަން މަސައްކަތް ކުރަމުންދިޔަ އަމީރާ ކުޑަގޮތަކަށް ސިހިގެން ދިޔައެވެ. ނަމަވެސް އިޔާން ފެނުމާއިއެކު މުޅި މޫނު އުޖާލާވެގެން ދިޔައީ ކަޅުވިލާގަނޑެއްގެ ތެރެއިން ސާފު ހަނދުވަރުގެ ރިހި އަލި ފެތުރިގެންދާ ފަދަ ގޮތަކަށެވެ.

“މިގުޅަނީ އަދި.. ހީކުރީ އޮފީހުން ނުނިމެނީ ކަމަށް“ އަމީރާ ލޯބިވެތި ގޮތަކަށް ބުނެލިއެވެ. މުޅި ދުވަހު މަސައްކަތުގެ ބުރަ މާހައުލުގައި އުޅުމަށްފަހު ނުކުމެ އައިއިރުވެސް، އަމީރާގެ އެ ދޮން މޫނުމަތީގައިވި ތާޒާކަމާއި ހިތްގައިމުކަމުން އިޔާންއަށް އިރުކޮޅަކު ގެއްލިފައި ހުރެވުނެވެ.

އިޔާންގެ ތޫނު ކަޅި އަމީރާގެ މޫނަށް ހުއްޓިފައި ހުރިލެއް ފުންކަމުން، ލަދުރަކި ހިނތުންވުމެއްގައި ހުރެ ދިގު އެސްފިޔައް ތިރިކޮށްލައިފިއެވެ.

”ނޫނޭ.. ގުޅަން ފެށީމަ ބަލައިލި އިރު، ދޮރުމަތީގައި ހުއްޓަ ފެނިއްޖެ .. އެހެންވެ މިއައީ“ އިޔާން ހިނިތުންވުމަކާއެކު ޖަވާބުދިނެވެ. އަދި ފަހަތަށް ފޮރުވައިގެން ހުރި އަތް މަޑުމަޑުން ކުރިއަށް ނެރެލަމުން، ތާޒާކަމުން ވިދާލަވިދާލަ އޮތް ރަތް ފިނިފެންމާ ބޮނޑި އަމީރާއަށް ދިއްކޮށްލިއެވެ.

އެހިނދު އަމީރާ މޫނަށް ވެރިވެފައިވި ހިނިތުންވުމުން ލޮލާއި ހަމައަށް ދެމުނެވެ. އަނގަމަތީގައި އަތް އަޅުވާލައިގެން ހުރިއިރު އެފަދަ ކަމަކަށް އޭނާ ހުރީ އުއްމީދު ކޮށްގެން ހުއްޓާ ނޫންކަން ދޭހަވެއެވެ. ”ތެންކިއު“ މާބޮނޑި މޭގައި ޖައްސާލައިގެން ހުރެ ތުން ނެރެލަމުން އިޔާންގެ މޫނަށް ބަލައިލިއެވެ. ދެވަނަ ސިކުންތު އިޔާންގެ މޭގައި ލައްވެލިއެވެ.

“އޮހް އޮހް މައި ސްވީޓް ލިލް ޕަމްޕްކިން… ހައު ވޯޒް ޔޯ ޑޭ؟“އަމީރާ ތުން ނެރެލި ހެން އިޔާން ވެސް ތުން ނެރެލަމުން އެމޭގައި ރަނގަޅަށް ފޮރުވާލިއެވެ. އޮތްގޮތައް އޮވެ ރަނގަޅުކަމަށް ބުނެ ބޯޖަހައިލިއެވެ. އެހެން ތިއްބާ ރެސްޓޯރެންޓުގެ ތެރެއިން ބަޔަކު ނުކުތްތައް ފެނި އިޔާންގެ ގާތުން ދުރުވެލިއެވެ.  އެއަތުގައި ހިފައިގެން އިޔާންވެސް ގޮސް ކާރަށް އެރިއެވެ.

”އަސްލުވެސް… މަށަށް އެނގޭ އިޔާ ވަރަށް ގިނައިން ބުކޭ ދޭކަން. އެކަމަކު މިރޭ މިކަހަލަ ސަޕްރައިޒެއް އެއްގޮތަކަށްވެސް އުންމީދެއް ނުކުރަން.. އަލަށް ޖޮއިންވި ގާލްގެ ބީ އެފް އައީ ފްލާވަރ ބުކޭއެއް ހިފައިގެން އޭނަ ޑިއުޓީ އިން ޕިކް ކުރަން.. ހައު ރޮމޭންޓިކް..  އެހެންވެ، ލައި އާއި ދެމީހުން ފްލާވާރސްއަށް ކްރޭވް ކޮށްފަ ތިއްބަ އައި ގޮޓް ދިސް“ އިޔާން ސީޓް ބެލްޓް އަޅުވާލަދީފައި ދުރަށް ޖެހިލިމުން މާތަކުގައި ދެއަތުން ވަށާލައިގެން އިނދެ އަމީރާ ބުނެލިއެވެ. އިޔާންގެ ފުށުން އިވިލީ ލުއި ހިނިތުންވުމެއްގެ އަޑެވެ. “ ލައި ބުނީ ސައިމަން އަކަށް ނޭނގޭނެ އޯ ހިންޓް ނުދެނީސް ރޮމޭންޓިކް އެއްކަމެއް ވެސް ކުރާކަށް“

”އެކަމަކު ޑިއުޓީގަ ވެސް ހުސްވަގުތެއް ލިބިއްޖެއްޔާ އޭނަގެ ކަމަކީ ޕިންޓްރެސްޓުން ރޮމޭންޓިކް ޑޭޓް އައިޑިއާސް ހޯދުން.. އަދި ބަލަ ބަލާފަ މަހުދީ ކައިރީގަ ކިޔާނެ ވައިފްއަށް ވެސް ނިކަން މި ކަހަލަ ސަޕްރައިޒްއެއް ދީބަލާށޭ..ހަހަހަ“  އިޔާން ޖަވާބު އަހާފައި އަމީރާއަށް ހެވުނެވެ.

”ފިރިހެން ކުދިން ވެސް ޕިންޓްރެސްޓު އައިޑިއާސް ހޯދާ ތަ؟.. އެމީ ހީކުރީ ގާލްސް އެކަނި ކަމަށް އެހެން އުޅެނީ“

”މްމްމް.. ބައެއް މީހުން އުޅޭ.. މިސާލަކަށް ސައިމަން “ އިޔާން ތުންފަތުގައި ދަތް އަޅުވާލައިގެން އިނދެ އެއްމިޔަކަނުން ހީލިއެވެ. ހުދު އޭނާ އަމިއްލައަށް ވެސް އެ ބަލައިގެން ކަންކަން ދަސްކުރެއެވެ. އެކަމަކު އެހެން އަމީރާގެ ގާތުގައި ބުނާކަށް ބޭނުމެއް ނުވިއެވެ. އެ ސުވާލާއި އެކު ވީހާ ވެސް އަވަހަކަށް ސައިމަންގެ ބޮލަށް ޖަހާލީ އެހެންވެއެވެ. އިޔާންގެ ގާތައް ހިނިވެސް އައެވެ.  އެހެން އިނދެ އިރުކޮޅަކާއި ހެން އަމީރާގެ މޫނަށް އިޔާންއަށް ބަލައިލެވެއެވެ. ލޯބިން ފުރިގެންވާ ފަދަ ނަޒަރަކުން މާތަކަށް ބަލަހައްޓާއިގެން އިން އިރު އިޔާން ކާރުގައި އިން ކަމެއް ނުދެނެ ހުރި ފަދައެވެ. ފޯނު ނަގާ ދެތިން ފޮޓޯވެސް ނަގައިފިއެވެ. އިޔާން ވާހަކަ ދެއްކި ނަމަވެސް ހޫމް އަޅުވާލާފައި އިތުރަށް އެއްޗެއް ނުބުންޏެވެ. އެހާ ކުޑަ ކަމަކުން ވެސް އަމީރާ އުފާވެފައި އިންވަރު ފެށި އިޔާންގެ ހިތައް ނުހަނު ހަމަޖެހުމެއް ލިބުނެވެ.

އަމީރާ ބަލައިލީ ކާރު ހުއްޓާލުމުންނެވެ. ދޮރު ހުޅުވާލާފައި ފައިބަން އުޅުނު ހިނދު އިޔާން ގޮވާލުމުން ހުއްޓިއްޖެއެވެ. “ދޫނީ، ހޭއި ހޭއި ގެޔަކަށް ނޫނޭ މިއައީ“

އިޔާން ގޮވާލުމުން ލޯގަނޑުން ބޭރަށް ބޯ ދިއްކޮށްލިއެވެ. ”އީ-މެޑް ހޮސްޕިޓަލް“ ޒަމާނީ ފެންވަރަށް ފަރުމާކޮށްފައިވާ އެ ބިޔަ އިމާރާތުގެ ބޭރުގައި ދިއްލިފައިވާ ނަންބޯޑު ފެނުމާއެކު އަމީރާގެ ދެލޯ ބޮޑުވިއެވެ. އޭނާ ހައިރާންކަމާއެކު އިޔާންގެ މޫނަށް ބަލައިލީ، އެއްވެސް އިޝާރާތެއް ނެތި މިތަނަށް މިއައީ ކީއްކުރަންތޯ ސުވާލުކުރާ ފަދަ ގޮތަކަށެވެ.

”އެމީ ޑޮކް އަށް ދައްކަން.. ނިއުރޯ އަކަށް ދައްކާލަން ވެގެން…އަސްލު މާދަމާ އަށް އިނީ.. އެކަމަކު ހަވީރް މެސެޖް ކޮށްފި މިރެއަށް އަވަސްވެގެން“ އަމީރާގެ ހިތުގައި އުފެދުނު ސުވާލުތަކަށް އިޔާން ޖަވާބު ދިނެވެ.

”އެކަމަކު އަހަރެން އަތަކު އައިޑީ ކާޑެއްވެސް ނެތް،“ ކަންބޮޑުވެފައި އަމީރާ ބުންޏެވެ.

“އައި ހޭވް“ އިޔާން ދައްކާލީ ފޯނެވެ. އޭގައި އަމީރާގެ އައިޑެންޓިޓީ ކާޑްގެ ސާފް ފޮޓޯއެއް އިނެވެ. އެއިން ވެސް ދައްކާލެވޭނެއޭ އިޔާން ބުނުމުން އަމީރާ ހިތްހަމަ ޖެހުނެވެ. އެކަމަކު، މުޅި ދުވަހު ޑިއުޓީގައި އުޅުމަށްފަހު،  ތާޒާވެލުމުގެ ފުރުސަތެއްވެސް ނުލިބި މިފަދަ ތަނަކަށް އަންނަން ޖެހުމުން އެކަމާއި ޝަކުވާ ކޮށްލެވުނެވެ. ކުޑަކޮށް މޫނު ހަދާލިއެވެ.

އަނެއް ކޮޅުން އެ އަނެއްކޮޅުން ’އީ-މެޑް ހޮސްޕިޓަލް‘ އަކީ އާދައިގެ ތަނެއް ނޫނެވެ. އެއީ މުއްސަނދިންނާއި މަހުޖަނުންނަށް ހާއްސަ، މަތީ ފަންތީގެ ހޮސްޕިޓަލެކޭ ބުންޏަސް ދޮގަކަށް ނުވަނެއެވެ. އެތަނުގެ ކޮންމެ ހިދުމަތަކީވެސް އަތްނުފޯރާ ފަށުގައިވާ އަގުބޮޑު ހިދުމަތްތަކެކެވެ. އެންމެ ކުޑަމިނުން މެމޯއެއްގެ އަގަކީ ވެސް ސަތޭކަ ޑޮލަރެވެ. ނަމަވެސް މާލޭގެ އެހެން ހޮސްޕިޓަލް ތަކަށް ވުރެން އެތަނުން ދެވޭ ހިދުމަތްތައް މާ ބޮޑުތަނުން ވެސް ފުރިހަމަ ވެފައި ރަނގަޅެވެ.

”އިޔާ، ވައި ޑިޑިންޓް ޔޫ ޗޫޒް ރެގިއުލަރ ހޮސްޕިޓަލް؟.. ދިސް ސީމްސް އެކްސްޕެންސިވް“ އަމީރާގެ ކަންބޮޑުވުމުން އެކުލެވިފައިވާ އަޑު އިވުމުން އިޔާން ޖަހައިލީ ލުއި ހިނިތުންވުމެކެވެ. އަދި ދެފަރާތައް ބޯހޫރުވާލިއެވެ.

”އިޓްސް ނޮޓް ހަނީ.. މިތާގަ ތިބޭނެ ވަރަށް ރަނގަޅު ޑޮކްޓަރސް.. ހިދުމަތް ލިބެނިކޮން އެވީ.. ހާސް ނުވެބަ..“ ލޯބިން ފުރިފައިވާ ނަޒަރަކުން ބަލައިލަމުން އަމީރާގެ ކޮލުގައި ލުއިގޮތަކައް ހިފާލިއެވެ. އަމީރާ ތުން ދަމައިގެން ހުރެ ވެސް އިތުރަށް އެއްޗެއް ނުބުންޏެވެ. ކާރުން ނުކުމެ،  އަމީރާގެ އަތުގައި ހިފާލައިގެން ހުރެ ބަލަން ހަމަޖެހިފައިވާ ޑޮކްޓަރު ކޮޓަރިއަށް ދިޔުމަށް މިސްރާބު ޖެހިއެވެ.

“ އެނގޭތަ ދޮންތަ ވޯކް ކުރާނީ މިތާގަ.. އެކަމަކު މިވަގުތު އެމީހުންގެ ޑިއުޓީ ނިމޭނެ“

”ރިއަލީ؟“

”ޔެސް.. މަންމަ ވެސް ކުރިން ވޯކް ކުރީ މިތާގަ.. މި އެންމެން ވަރަށް ލޯބިވާނެ މަންމަ ދެކެ.. ރީއްކޮ ގެނައިތަނާ އޭރު ވަރަށް ކުއްލިގޮތަކަށް މަންމަ ކެނޑުނީ..  ވޯކް ކުރި ލާސްޓް ޑޭގަ ވެސް ހުރިހާ އެންމެން އެކަމާއި ދެރަ ވެގެން ރުއި ކަމަށް ވަނީ.. ދެން ފަހުން ދޮންތަ ޖޮއިން ވިތަނާ މަންމަގެ ދަރިއެއްކަން އެނގޭތީ ދޮންތައަށް ވެސް ވަރަށް ބަލާނެ.. ދޭ ލަވް ހަރ.. މިހާރު ވެސް އަން-“ ފޯރީގައި އަމީރާއަށް ކިޔައިދެމުން ދިޔަ ވާހަކަ މެދު ކަނޑާލަން އިޔާން އަށް މަޖުބޫރުވީ ހޮސްޕިޓަލްގެ ތެރެއަށް ވަންނަން އައި ޒުވާނާ ފެނިފައެވެ. އެއީ އޭނައަށް އޮޅޭނެ ސޫރައެއް ނޫނެވެ. އިޔާންގެ މޫނުން ހައިރާންކަމާއި އެއް ވަރަށް ސިހުން އިންތިހާއަށް ފާޅޫވެއެވެ. އޭނާ އައިސް އިށީނީ އަމީރާ ދައްކަން ވަންނަން ޖެހޭ ކޮޓަރިއާއި ޖެހިގެން ހުރި ގޮނޑިބަރީގައެވެ. ގޮނޑީގައި އިށީންދެ ޖީބުން ނެގި މާސްކުން މޫނު ފޮރުވާލި އިރު ހީވަނީ އޭނާގެ ސޫރަ މީހަކަށް ފެނިދާނެތީ އުޅުނު ހެންނެވެ.

”ރަވީހް؟“ އަމިއްލަ ފެނުމާމެދު ޝައްކު ކުރެވޭ ފަދަ ހައިރާންކަމެއް އޭނާގެ މުޅި ހަށިގަނޑަށް ސަވާރުވިއެވެ. އެސްފިތައް ތަޅުވާލި ނަމަވެސް މަންޒަރު ބަދަލެއް ނުވިއެވެ. އެއީ ދެވަނަ އިތުރު މީހެއް ނޫނެވެ.  އިރަމްގެ މައްސަލައިގާ ހައްޔަރުކޮށް ޖަލަށް ލެވިފައިވާ ރަވީހެވެ. އޭނާ ގުނަމުންދަނީ ފަންސަވީސް އަހަރުގެ ޖަލު ހުކުމެވެ. މިނިވަންކަމާއެކު މިފަދަ ތަނަކުން ފެނުމަކީ ބުއްދި ގަބޫލުކުރެވޭނެ ކަމެއް ނޫނެވެ.

ޖަލުގެ ތޭރިތަކުގެ ފުރަގަހުގައި އޮންނަންޖެހޭ މީހަކު، މިނިވަން މާހައުލެއްގެ ތެރޭގައި އުޅެވޭނެ އެއްވެސް ގާނޫނީ ސަބަބެއް އޮވެދާނެބާއެވެ؟ އިޔާންގެ ސިކުނޑި ސުވާލުން ފުރުނެވެ. ބަލިމީހަކު ޑޮކްޓަރަށް ދައްކަން ގެންދާނަމަ، އަމަލުކުރާ އުސޫލުތައް އިޔާންއަށް ނޭނގި ނުހުންނާނެތާއެވެ. ޖަލުގައި ހުންނަ ސިއްހީ ފަރުވާދޭ ސެންޓަރަށް ގައިމު އޭނާ ގެންގޮސްފައެއް ނުވެއެވެ. ފުރަތަމަ ބޭރަށް ނެރެވޭނީ ވެސް އެތަނަށް ދެއްކުމަށްފަހު އެތާގައި ތިބޭ ސިއްހީ މާހިރުން އިރުޝާދު ދީފިއްޔާއެވެ. ޑޮކްޓަރަށް ދެއްކުމަށް ނުވަތަ އެނޫން ގޮތަކަށް ރަވީހް ގެންދާ ވާހަކަ އިވިފައި ވެސް ނެތެވެ.

މިއީ ގައިމު ސަރުކާރު ހޮސްޕިޓަލެއް ނޫނެވެ. އަނެއްކޮޅުން ޑޮކްޓަރަށް ދެއްކުމަށް ގެންދާނަމަ ދެއަތުގައި ހުންނާނީ ބިޑިއެޅުވިފައި ތާއެވެ. ކައިރީގައި ޖަލު ބަލަހައްޓާ އޮފިސަރުން ތިބޭނެއެވެ. ގެންދަންޏާ ފުރަތަމަ ގެންދާނީ ވެސް ސަރުކާރު ހޮސްޕިޓަލް ތަކަށެވެ. އެ ހޮސްޕިޓަލް ތަކުން ނުދެވޭނެ ހިދުމަތެއް ހޯދަން މިފަދަ ތާކަށް އައިސް ހުންނަ ވަރު ބައްޔެއް ނޫނެވެ. ހުރީ ވެސް އެކަނިންނެވެ. ފުލުހުންގެ އޮފިސަރަކު ވެސް ފެންނާކަށް ނެތެވެ.

ފޯނު ނަގާފައި މަހުދީއަށް ގުޅާލަން އުޅުނު ހިނދު ސިހުނީ އޭނަގެ ގާތައް އައިސް ހުއްޓުނު ފިރިހެނެއް ފެނިފައެވެ. ދެލޯ ބޮޑުކޮށްލައިގެން ހުރެ އިޔާންއަށް ބެލުނެވެ. ރަވީހްގެ ގާތައް އައިސް ހުއްޓުނީ އާޝިއު އެވެ. ޖެހިގެން ހުރި ގޮނޑީގައި އިށީނދެ ރަވީހްއާއި ވާހަކަ ދައްކަން ފެށި ގޮތުން ދެމެދުގައި އޮތީ އާދައިގެ ގުޅުމެއް ނޫންކަން އިޔާންގެ ތޫނުފިލި ސިކުނޑި ނަގައިގަތެވެ. .

”މަންހާ ދޮން ބައްޕަ؟ ވަޓްޓް؟“  ލިބިފައި ޝޮކުން އިޔާންއަށް ބުނެވުނީ ފުދޭވަރަކަށް ބާރަށެވެ. އޭނާގެ އަމީރާގެ ސަމާލުކަން ވެސް ހުއްޓިއްޖެއެވެ. އިޔާން ބަލަމުން ދިޔަ ދިމާލަށް އަމީރާއަށް ވެސް ބަލައިލެވުނެވެ. ދެމީހުން ތިބީ އޭނާއަށް ފުރަގަސް ވާހެން ކަމުން މޫނެއް ނުފެނެއެވެ. އަމީރާއަށް ބަލައިލެވުނީ އިޔާންގެ މޫނަށެވެ. ރަނގަޅަށް ހުރި ތަބީއަތު މުޅިން ބަދަލުވެފައި ހުރި މަންޒަރު ފެނި އޭނާގެ ބަނޑުގައި އަމީރާއަށް ކޮއްޓާލެވުނެވެ.

ޖަވާބު ނުދެވިގެން އުޅުނިކޮން، އެދެމީހުން ފަސް އެނބުރިލަން އުޅޭހެން ހީވެގެން އަމީރާ ގޮވައިގެން އިޔާން އެންމެ ގާތައް ހުރި ހިމަ ގޯޅީގެ ތެރެއަށް ވަނެވެ.

“އިޔާ ކިހިނެތް ވީ؟‘ އަމީރާއަށް އަހާނުލާ ނުހުރެވުނެވެ.

”ވެއިޓް ހަނީ“ ބޯ އަރިކޮށްލާފައި އަމީރާ ވަނުމަށް ހުރި ކޮޓަރީގެ ނަންބަރު ބޯޑު ބަލައިލުމަށް ފަހު އަމީރާގެ ކުރިއަށް ދެމީހުން އަދި ތިބުމުން އެތަނަށް ދާ ހިޔާލެއް އިޔާން ނުކުރިއެވެ. ތަންކޮޅެއް ދުރުގައި ހުރި ގޮނޑިއެއް ގެނެސް ކައިރި ކޮށްލާފައި އަމީރާ ބައިންދާލަމުން، އޭނާ ގުޅާލީ މަހުދީއަށެވެ. އެ ނޫނީ ސިކުނޑިއަށް ހަމަޖެހުމެއް ދެނެއް ނުލިބޭނެއެވެ. ދެތިން ފަހަރު ގުޅުމުން ވެސް އޭނާ ފޯނެއް ނުނެގިއެވެ. އެންމެފަހުން މެސެޖްއެއް ކޮށްލުމަށްފަހު ބަލައިލި އިރު އަމީރާގެ ނަމްބަރު ޖެހިއްޖެއެވެ.

”އެއް ނަމްބަރ މިސް ވީ ކަންނޭގެ..ލެޓްސް ގޯ“ ރަވީހްއާއު އާޝިއު ފެންނަން ނެތުމުން ހިތްހަމަޖެހިފައި ހުރެ، އަމީރާގެ އަތުގައި ހިފައިގެން ގޮސް ކޮޓަރީގެ ތެރެއަށް ވަނެވެ.

”ޔަގީންތަ ކަލެއަށް؟ އެއީ އިޔާން ނޫންކަން؟“ އާޝިއު ހުރީ ހިސާބަކަށް ނުތަވަސް ވެފައެވެ. ރަވީހް ދިގު އިސްތަށިގަނޑުގެ ތެރެއަށް އަތް މަހާލަމުން ބޯޖަހައިލިއެވެ.

”އާން.. ހީވި ހީވުމެއް ހެން ބޮޑަށް ހީވަނީ.. އޭނަ ކަހަލަ އާދައިގެ ފުލުސް އޮފިސަރަކަށް މިކަހަލަ ތާކަށް އާދެވޭނެ ތަ.. މިއީ މަހުޖަނުންގެ ހޮސްޕިޓަލް“ މަލާމާތުގެ ރާގެއްގައި ރަވީހް ބުނެލިއެވެ.  އާޝިއު ވެސް ބޯޖައިލަމުން، ޖަހައިލީ ޒާތެއްގެ ހިނިގަނޑެކެވެ.

”މިހާރު އެ ޑޮކްޓަރުގެ އަނގަ ބަންދުވާނެ ދޯ؟ ކިހާ ވަރެއްގެ ޔަގީން ކަމެއް ދެވޭނެތަ؟“ އާޝިއު އަހައިލިއެވެ.

”އެއީ މަ ބައްޕަގެ ގާތް މީހެކޭ… މިހެން ދެތިން ފައިސާ ފޮތި އެއްލަނިކޮން އޭނަ ވިކޭނެ.. އަލަކަށް ކުރާ ކަމެއް ނޫނޭ މިއީ..ހަހަހަ“ ރަވީހްގެ ކުޑަ ދެލޮލުން ފެންނަނީ މަކަރުވެރި ވިދުވަރެވެ.    ހޮސްޕިޓަލް ތެރެއިން ނުކުމަތް އިރު ޕްރައިވެޓް ކާރެއް އިންތިޒާރުގައި އޮތެވެ. އެމީހުން އެރުމާއި އެކު ބާރު ދުވެލީގައި ކާރު ނައްޓާލިއެވެ.

***

”އެކޮޅުން އެބުނިހެން ޑައިރެކްޓްކޮށް ސްޓްރޯކެއް އަދި ނުޖެހޭނެ.. އެކަމަކު މާ ގިނައިން އެހެން ޕެނިކްވެ، ނޯސް ބްލީޑް ވަންޏާ އެއީ ނޯމަލް ކަމެއްގެ ގޮތުގައި ދެކިގެން ނުވާނެ އިނގޭ.. ތި ބުނުއްވީނު ބޮލުގައި ރިއްސާ ވާހަކަ، އެފަދަ ވަގުތެއްގަ ކިހިނެއްތޯ ތިކޮޅުން އެ ޕެއިން ރޭޓް ކުރާނީ؟ މިސާލަކަށް ދިހައަކުން ބަލާނަމަ؟“ ޑޮކްޓަރ ޝަހުމާ ނުހަނު ރަނގަޅަށް އަމީރާ ބަލަމުން ދިޔައެވެ. ގާތުގައި އިޔާން އިން އިރު ޑޮކްޓަރު ދައްކަމުން ދިޔަ ވާހަކަ ކަނުލާ އަޑުއަހަމުން ދިޔައެވެ.

”މްމްމް.. ރިއްސަން ފަށާ އިރު، ކެން ސޭ ނައިން“ އަމީރާގެ ޖަވާބާއި އެކު ޝަހުމާގެ މޫނުމަތިން ކަންބޮޑުވުން ފެންނަން ފެށިއެވެ. އިތުރު ސުވާލްތައް އަމީރާ ކުރެން އަހަމުން ދިޔައެވެ.

[އަލުން އެމް.އާރް.އައި އާއި ސީ.ޓީ ސްކޭންއެއް ރިޕީޓްކޮށްލާފައި މިކޮޅަށް ދުރުވެލާ އެނގޭ.. ވީހާވެސް އަވަހަށް.. އޭގެ ރިޒަލްޓްސް ސްޓަޑީކޮށްފައި އިތުރު އެއްޗެއް ބުނެލާނަން،“ ޑޮކްޓަރުގެ ވާހަކަތަކަށް ފަހު އަމީރާ އާއި އިޔާން ނުކުތެވެ.

”އަމް ސޮރީ“ ނުކުތް ގޮތައް އިޔާން ބުނެލިއެވެ. އަމީރާ ކިހިނެތްވީހޭ އަހާލަމުން ނިތް އަރުވާލިއެވެ. ”ފޯރ ބިއިންގ އަ ލިލް ކެއަރލެސް އެބައުޓް ޔޫ.. އެކަމަކު ދެން އެހެން ނުވާނެ .. އައި ޕްރޮމިސް“ އިޔާންގެ ޖަވާބު އަހާފައި އަމީރާ ދެފަރާތައް ބޯ ހޫރުވާލިއެވެ. ކާރާއި ހަމައަށް ދެވުމުން އޭނާގެ އަތުގައި ވިކާލިއެވެ.

”ދެން ކިޔާ އެއްޗިހި.. އެއްކަލަ ގަޑީގަ ކިހިނެތް ވީތަ؟ ދަންނަ މީހަކު ފެނުނީތަ؟ “

”ނޫނޭ.. ހީވީ ދަންނަ މީހަކު ފެނުނު ހެން… އެކަމަކު ހީވި ގޮތެއް އެއީ.. މާދަމާ ޓެސްޓް ހަދަން  އެޕޮއިންޓްމަންޓް ބުކް ކޮށްފަ ހިނގާ އެއްޗެއް ކާން… ބަނޑުން އެބަ އަޑުކިޔާ“ އިޔާންގެ ބަހަށް ބޯ ޖަހައިލަމުން އަމީރާ ހީލިއެވެ.

****

އިރުގެ ރަން ދޯދިތައް ދުނިޔެ މައްޗަށް ފެތުރިގަތް ހިތްގައިމު ވަގުތެވެ. ފިނިފިނި ރޯޅިތަކުން ހިތަށް ތާޒާކަން ގެނުވައިދެމުން ދިޔަ އެވަގުތު، ލައިލާ އިނީ ބެލްކޮނީގައި ވިސްނުމަކަށް ގެއްލިފައެވެ. ބޭރަށް ނަޒަރު ހުއްޓާލައިގެން އިން ނަމަވެސް، އޭނާގެ މުޅި ސަމާލުކަން ހުރީ އަތުގައި އޮތް ފޯނަށެވެ. ކޮންމެ ސިކުންތަކީ އޭނާއަށް ގަރުނެއް ފަދަ ދިގު އިންތިޒާރެކެވެ. ދޭތެރެއަކުން ފޯނުގެ ސްކްރީނަށް ބަލައިލެވެނީ އުއްމީދީ ކޯލެއްގެ އިންތިޒާރުގައެވެ.

ދުންއަރަމުންދިޔަ ކޮފީ ޖޯޑެއް ހިފައިގެން މަޑުމަޑުން ހިނގާފައި ޒާހިރް ބެލްކޮންޏަށް ނުކުތެވެ. ”ކޮބާ ލިއޯ ގުޅައިފިތަ؟“ ލައިލާ އިން ގޮނޑީގެ ހުސް ޖާގައިގާ އިށީންދެލަމުން ކޮށްލި ސުވާލާއި އެކު ލައިލާ ދެފަރާތައް ބޯހޫރުވާލިއެވެ.

”ލިއޯ ބުނި ރާއްޖެ ގަޑީން އަށެއް ޖަހާކަށް ހާއިރު އޭ ދެވޭނީ އެހިސާބަށް.. ފޯނު ކުރަންވާ ކޮންމެ ފަހަރަކު އޭނާ އެދަނީ ޓައުން އިން ބޭރަށް.. އެ ނޫނީ ހޫގޯގެ ޖާސޫސުންނަށް އެނގެން ގިނައިރެއް ނުނަގާނެ..  ދެ މަސް ފަހުން އަނެއްކާ އެގުޅަނީ ވެސް.. މިފަހަރު އަހަރެންގެ ހިތް އެބަ ބުނޭ އާ ހަބަރެއް ލިބެން އުޅެއޭ..“ލައިލާ ދެއަތުގެ ތެރޭގައި ފޯނު ގެންގުޅެލި އިރު ނިތުން ހިއްލިފައިވާ މުތީތައް ފެނި ޒާހިރް ކައިރިއަށް ޖެހިލިއެވެ.

”މިހާރު ހުރިހާ ކަމެއް ވެސް އެދަނީ ރަނގަޅަށް.. މަޑުމަޑުން ހުރިހާ ކަމެއް  އެނގި ސާފްވެ އަހަރެމެންނާއި ހަމައަށް ހަގީގަތް އަންނާނެ ވަރަށް އަވަހަށް.. ބަލާ އެމީ ވެސް ފެނުނީނު… އެހެންވީމަ މިބުނީ ހާސްނުވާށޭ..އަހަރެން މިހުރީ ދެގޮތެއް ނުވެ ކައިރީގަ.. އިންޝާﷲ ހުރިހާ ކަމެއްވެސް ރަނގަޅުވާނެ“  ޒާހިރްގެ ވާހަކަ ތަކުން ލައިލާގެ ނުތަނަވަސް ސިކުނޑިއަށް ދިރުން ލިބުނެވެ. ޒާހިރްގެ ކޮނޑުގައި ބޯ އަޅުވާލަމުން މަޑުމަޑުން ދެލޯ މަޜާލިއެވެ.

”މާކްގެ އެއްވެސް ހަބަރެއް ލިބިފަ ނެތިމަ އަދިވެސް ވިސްނެނީ.. އެމީއާއި ޒަން  ވެސް އެކަމާ ވިސްނާނެ ދޯ ނުބުންޏަސް.“

“އެމީ އާއި ވާހަކަ ދައްކަނީ ކޮން އިރަކުން؟.. ބުނީމެންނު ވާހަކަ ދައްކާލާ ވާހަކަ“ ޒާހިރް އަހާލިއެވެ.

“ލިއޯ ގުޅަންދެން މިހުންނަނީ..އެހެންޏާ ހަފްތާއަކު އެއްފަހަރު އަހަންނަށް މައުލޫމާތު ދޭން ގުޅާ ކުއްޖާ ދެމަސް ވެގެން ވެގެން ދިޔައިރު ވެސް އަހަންނަށް ނުގުޅި.. އެކަމާއި ވިސްނުނު ވަރުން އެހެންވެ މިހުރެވެނީ.. އިއްޔެ މެސެޖް ކޮށްލީމަ އެ  ހާސްކަން ވެސް އެފިލީ“ ލައިލާ އެއޮތްގޮތައް އޮވެ ވާހަކަ ދައްކަން ފެށިއެވެ. ޒާހިރް މަޑުމަޑުން ބޯޖަހައިލިއެވެ.

”އެގުޅަނީ“ ލިއޯގެ ނަން ފޯނުގެ ޑިސްޕްލޭއަށް އެރުމާއި އެކު ފުންމައިގެން ލައިލާ ތެދުވަތެވެ. ހަލޯ ބުނެލި ހިނދު ޒާހިރް އެދުނީ ފޯނު ސްޕީކަރަށް ލުމަށެވެ.

”ދައްތާ ހީވަނީ ބޮޑު ކަމެއް ހިނގާހެން“ ފުރަތަމަ ވެސް އިވިލީ ލިއޯގެ ނުތަނަވަސް އަޑެވެ. ވަގުތުން ލައިލާ ކިހިނެތްވީހޭ އަހާލިއެވެ. އޭނާއަށް ބަލައިލެވުނީ ޒާހިރްގެ މޫނަށެވެ.

”ދައްތައަށް ފެނުނުތަ މޫނު ބުރުގާ އަޅައިގެން ހުރި އެއްވެސް މީހަކު މިގެއިން ކުރީން؟ ނޫނީ މާކްގެ ފަރާތުން ވެސް އިވުނުތަ އެ ޒާތުގެ މީހަކު މިގެއަށް އައި ކަހަލަ އެއްވެސް ވާހަކައެއް؟“ ލިއޯ އަހާލިއެވެ. އެ ސުޥާލާއި އެކު ލައިލާގެ ނިތައް ރޫ އަރައިގަތެވެ. އެކަހަލަ އެއްވެސް ހަބަރެއް އޭނައަށް ލިބިފައެއް ނެތެވެ. މުސްލިމުންނަށް ހޫގޯ ކުރާ ނަފްރަތާއި އެކު، މޫނު ބުރުގާ އަޅާއިގެން ހުރި މީހަކާއި އަމުދުން އެއްވެސް ގުޅުމެއް އޭނާ ބާއްވާނެ ހެއްޔެވެ.

”މޫނު ބުރުގާ އޭ؟ނޫން ނެތް އެކަހަލަ ވާހަކައެއް އިވިފައެއް.. ކިހިނެތް ވީ؟ ހޫގޯ މުސްލިމަކާއި ގުޅުމެއް ބާއްވާނެ ތަ!“ ލައިލާއަށް އެހުނެވެ. ޒާހިރްގެ މޫނުމަތިން ވެސް ފެނިގެން ދަނީ ހައިރާންކަމެވެ.

”މިވާހަކަ ނުކިޔާ މި މަޑުކުރީ އިތުރަށް ބަލާފަ ނޫނީ ނުކިޔަންވެގެން.. އެކަމަކު އަނެއްކާ ވެސް އޭނާ އަންނަން އުޅޭ ކަހަލަ ވާހަކައެއް އިވިގެން އެންމެފަހުން މިގުޅީ..  މީގެ މަހެއްހާ ދުވަސް ކުރިން މިގެއަށް އައި މޫނު ބުރުގާ އަޅައިގެން ހުރި މީހެއް.. އަހަރެން އައި ފަހުން އަލަށް އޭނާ މި ދެކުނީ..  މިގޭގަ އުޅޭ އިތުރު މީހަކު ބުނި އެއީ ހޫގޯގެ ރައްޓެއްސެކޭ.. މޫނު ފޮރުވާފަ އޭ އަބަދުވެސް ހުންނަނީ.. އޭނާ ކުރިން ވެސް އަންނަކަމަށް ވަނީ.. ހައިރާން ވާންޖެހޭ ކަމަކީ އަމީރާ އުޅެނިކޮން މި އަންހެން މީހާ އަންނާނީ އަހަރަކު އެއްފަހަރު ކަހަލަ ގޮތަކަށް ދެން އެއިން ކޮންމެ ފަހަރަކު ބައްދަލް ކުރާނީ ގޭގެ ގޯތިތެރޭން.. ގޭގެ އެތެރެއަކަށް ނުވެސް ވަދެއޯ… ހޫގޯއާއި ވަކިން ބައްދަލްކޮށްލާފަ ދަނީ .. އަމީރާއަށް އޮންނަނީ ގެއިން ނުކުތުން ވެސް މަނާ ކޮށްފަ އެއްނު، އެހެންވީމަ އޭނައަކަށް ނޭނގޭނެ ތާ އެމީހަކު އައިސް ބޭރުން ބައްދަލުކޮށްފަ ދިޔަޔަސް…  މިހާރު ދެން އަމީރާ ދިޔައީމަ މަހަކު އެއް ފަހަރު އާދޭ.. އަނެއްކާ އަންނަ ކޮންމެ ފަހަރަކު މިގޭގަ މަޑުކުރޭ ދެތިން ދުވަހަށް..“ ލިއޯ ކިޔައިދިނެވެ. ލައިލާގެ މޫނުމަތިން ހައިރާންކަން ހިނދުކޮޅަށް ވެސް ފިލައި ނުދެއެވެ. އޭނައަށް ހުރެވުނީ މުޅިން އޮޅިފައެވެ.  ސުވާލެއް ކުރުމަށް އުޅެފައިވެސް ލިއޯ އަނެއްކާ ވެސް ވާހަކަ ދައްކަން ފެށުމުން ކަނުލާ އަޑުއަހަން ފެށިއެވެ.

”ދެން މިބުނާ ދުވަހު އޭނަ އައީމަ ހޫގޯ ވެއްދީ، ހޫގޯގެ މެހެމާނުންނަށް ހާއްސަ ކޮޓަރިއަށް.. އަހަރެން ދިޔައިން އެމީހުންނަށް ފިނި އެއްޗެއް ހިފައިގެން.. އެކަމަކު ސިހުނީ މޭޒުމަތީގައި ރާ ތަށިތައް ހުރީމަ.. ދެން އަހަރެންގެ ގެނައި ސާމާނު ބަހައްޓާފަ ހޫގޯ ނުކުންނަށް އިޝާރާތް ކުރީމަ ނުކުތިން.. ދެން ހުރީ ދޮރުގަ ކަންފަތް ޖަހައިގެން .. ފުރަތަމަ ވެސް އިވުނީ، ފްލައިޓް ނައްޓާލަނީ ކޮން އިރަކުހޭ ހޫގޯ ބުނާއަޑު…ދެން އަންހެން މިހާ ބުނި ގަޑީއާއި އެއްޗިހި… ދެން ބުނަނީ، ލާހިކެއްނޫނޯ މަގޭ ދަރިންނަށް ނުލިބުނު އުފަލެއް، އޭނާގެ ދަރިންނަށް ލިބޭކަށް ..މިރޭ މި ފުރަނީ އެ އާއިލާއަށް ރަނގަޅު ބަދަލެއް ހިފާށޯ.. ކާކުގެ ކައިރިން ކޮން ބަދަލެއް ކަމެއް ނޭނގޭ.. މީހެއްގެ ނަމެއް ވެސް ބުނަ އަޑު ނީވޭ“ އެމީހުންނަށް ބުއިންތައް ގެންދަން އުޅުނު މަސައްކަތު މީހާ ހުއްޓުވާފައި އެ ސާމާނު ހިފައިގެން އޭނާ ދިޔަ ހިނދު ފެނުނު މަންޒަރު ވަރަށް ތަފްސީލާއި އެކު ފިލިން ފިއްޔަށް ކިޔައިދިނެވެ. އެތަނުން ނުކުމެ ބޭރުގައި ހުއްޓާ އިވުނު ވާހަކަތައް ވެސް ކިޔައިދިނެވެ. ދެލޯ ބޮޑުވެފައި ހުރެ ލައިލާއަށް ބަލައިލެވުނީ ޒާހިރްގެ މޫނަށެވެ. ޒާހިރް ވެސް ހުރީ ސިހިސިހިއެވެ. ލިބުނު ޝޮކުން  ބަސްހުއްޓުނެވެ.

****

(ނުނިމޭ)