މިރެއިލްގެ ކުޑަވެފައިވާ ދެލޮލުން ކަރުނު ތިއްކެއް ޖަހައިލިއެވެ. ދުނިޔޭގައި ވި ހުރިޙާ އެއްޗަކަށް ވުރެން މިރެއިލްއަށް އެކުއްޖާ މުހިއްމުވިއެވެ. ހަގީގަތުގައި ޝިއާއަށް ވުރެން ބޮޑަށް އޭނައަށް ތުއްތު އިރު ވެސް ބެލުނެވެ. ހުރި ހަމައެކަނި ދަރިފުޅަށް ވެފައި، ދަރިފުޅު ދުނިޔެއަށް އުފަންވީންސުރެން ރަސްކަމަށް ގެނައުމަށް ހުވަފެންތައް ދެކެވުނެވެ. ފަނޑުގޮތަކަށް ސިފަވެގެން ދިޔައީ އެދަރިފުޅު އޭނާ ގެންގުޅުނު ގޮތެވެ. ކިރިއާ ވާހަކަ ދައްކަން އެނގޭ ވަރުވީ ހިނދު ތުއްތު އަޑުން ’ބައްޕާ‘ އޭ ކިޔާ ގޮވަމުން އައީ ހިތްތައް ބަނޑުން ވާފަދައަކުންނެވެ. އުމުރުން އަތް އަހަރުގައި އޭނާ ދޫކޮށް ދިޔައިރު އެދުވަހުގެ ހަނދާންތައް ވަކިން ގަދަވިއެވެ. މޭގައި އުފެދުނީ ނުބައި ރިހުމެކެވެ.
”އީތަން“ މިރެއިލްގެ ދެތުންފަތް ފޫ އަޅުޥާލާފައި ނުކުމަތެވެ.
****
ކަރުނައިގެ ތެރެއަށް ޣަރަޤުވެފައިވާ ޝިއާގެ ކަންފަތުގައި، މިރެއިލްގެ ކަރުބުޑުން ނުކުތް ހިމޭން އާހެއްގެ އަޑު ފުރޭނިގެން އައިސް ޖެހުމާއެކު، ސިހިފައި ތެދުވެވުނެވެ. ލަސްލަހުން މިރެއިލްގެ ދެލޮލުން ފައިބަމުން ދިޔަ ކަރުނުތައް ފެނި، ޝިއާ ކައިރިވެލިއެވެ. މިރެއިލް އެގޮތަށް ހަރަކާތެއް ނެތި އޮންނަ އިރު، ދޭތެރެއަކުން އޭނާގެ ލޮލުން ފެން ފައިބާފައި ހުރުމަކީ ކުރިން ވެސް ފެންނަ މަންޒަރެކެވެ.މާ ބޮޑުކަމަކަށް ޝިއާ ނުހެދިއެވެ. މިރެއިލް އޮތް ގޮތުން އެއަޑަކީ ހީވި ހީވުމަކަށް ބަލާފައި، ގައިމަތީގައި އަޅާފައި ބޯ ރަޖާގަނޑު ރަނގަޅު ކޮށްލަ ދޭން ފެށިއެވެ.
މަޑުމަޑުން ދެލޯ ހުޅުވިފައިވީ ނަމަވެސް، އެއްވެސް އިހުސާސެއް ނެތް، ހުއްޓުން އަރާފައިވާ ބުދެއް ފަދައިން މިރެއިލް އޮންނަތާ މިހާރު އެތައް މައްސަރުތަކެއް ފާއިތުވެ ހިނގައްޖެއެވެ. ވާހަކަދެއްކުމުގެ ބާރު ކެނޑި، އެ ހަށިގަނޑަށް ބޭނުންވާ ދިރުން އަދި އެ ދެވޭ ކާއެއްޗެއް ފޯރުކޮށްދޭން ޖެހެނީ ގުޅާފައިވާ ހޮޅިތަކުގެ ޒަރީއާއިންނެވެ. މިރެއިލް ބެލުމަށް އެތައް ސިއްހީ މާހިރުންނެއް ގެނެވުނު ނަމަވެސް ނަތީޖާ ފެންނަ ފަދަ ބަދަލެއް ނައެވެ.
މިރެއިލްގެ ގާތުން ދުރަށް ޖެހިލަމުން އެ މޫނަށް ބަލައިލި ވަގުތު ޝިއާ ހުއްޓުން އަރައިގެން ދިޔައެވެ. މިރެއިލްގެ ތުންފަތައް އައި ލުއި ހަރަކާތަކާއެކު ޝިއާގެ މުޅި ހަށިގަނޑު ސިހިގެން ދިޔައެވެ. ޔަގީނުން ވެސް މިފަހަރު އެއީ ހީވި ކުށްހީއެއް ނޫނެވެ. މެޝިންތަކަށްވެސް އެނގުން ވެލައިފިއެވެ. އުފަލާއި ހާސްކަން އެކުވެފައިވާ އަޑަކުން ”މަންމާ!“ އޭ ކިޔާ އަޑުހަރުކޮން ގޮވާލައިފިއެވެ.
ޝިއާގެ އަޑަށް ދާދި މަދު ސިކުންތުކޮޅެއްގެ ތެރޭގައި އައިސް ވަނީ މެދު އުމުރުގެ އަންހެނެކެވެ. އަންހެން މީހާގެ ހިސާބަކަށް ރޫ އަރާފައިވީ އިރު ދެލޮލުގައި ވިދާ މޮޅިވެރިކަމުގެ ތެރެއިން ވެސް އެ މޫނުމަތީގައި ވާ ހިތްހެޔޮކަން ސާފެވެ. އޭނާގެ ފަހަތުން މިރެއިލްގެ ހާއްސަ ފާރަވެރިންގެ ދެމީހަކު ވަނެވެ.
”ކިހިނެތް ވީ ދަރިފުޅާ؟ ބައްޕައަށް ކަމެއް ވީތަ؟“ ހާސްވެފައިވާ އަޑަކުން ޝެރީން އަހާލިއެވެ.
”އަޅުގަނޑަށް ހީވި ބައްޕަ ދެންމެ ގޮވާލި ހެން.. އެކަމަކު ފަހުން ބަލާލި އިރު އެކަހަލަ އެއްވެސް ކަމެއް ނުފެނުނީމަ ދާންވެގެން އުޅެނިކޮން ބައްޕަގެ ތުންފަތް ހަރަކާތް ކޮށްލިތަން ރީތިކޮން ފެނުނު“ވާހަކަ ދެއްކުނު އިރު ޝިއާގެ އަޑު ބެދުނެވެ. އެހިނދު ތެޅިގަނެފައި ޝެރީން ގާތައް ޖެހިލިއެވެ. މިރެއިލްގެ އަތުގައި މަޑުމަޑުން ހިފާލި ހިނދު އެއަތައް މިރެއިލް ބާރު ކޮށްލިކަން އިޙްސާސްވެގެން ދިޔައެވެ. ހިތައް ކުރުވި އަސަރުން ފެންކަޅިވިއެވެ. ފަސް އެނބުރި، މަޑުކޮށްލައިގެން ތިބި އޭނާގެ ފާރަވެރިންނަށް އެންގީ ޑޮކްޓަރަކު ގެނައުމަށެވެ. އެތަނުން އެކަކު އަދަބުވެރިކަމާއި އެކު ނުކުމެގެން ދިޔައިރު އަނެއް މީހާ މަޑުކޮށްލީ އެމީހުންގެ ހިދުމަތުގައެވެ.
”އީތަ..ންން“ ދެވަނަ ފަހަރަށް މިރެއިލްގެ ފަނޑު އަޑު އިވިލިއެވެ. ޝިއާއާއި ޝެރީންއަށް ލިބިގެން ދިޔައީ ބަޔާން ކުރަން ދަތި އުފާވެރިކަމެކެވެ.
”އަހަންނަށް ހީވި ހީވުމެއް ނޫން ދޯ.. ބައްޕަ އޭރުވެސް އީތަންއަށް ގޮވާލީ.. ބައްޕަ މިހާ ހާލުގައި އޮވެ ވެސް އީތަން އަށް އެގޮވަނީ.. އެކަމަކު އޭ.. އޭނަ“ ޝިއާގެ ލޮލަށް އަނެއްކާ ވެސް ކަރުނު ޖަމާވެއްޖެއެވެ. ވާހަކަ ދައްކަން ވެސް އުނދަގޫ ވިއެވެ. އެހިނދު ޝެރީންއަށް ވެސް ވެގެން ދިޔައީ އެފަދަ ގޮތެކެވެ. ދަރިފުޅަށް ހިތްވަރު ދެވޭވަރަށް ވުރެން އޭނާގެ ހާލަތު ވެސް ގޯހެވެ. އީތަންގެ ކައިވެނީގެ ހަބަރާއި އެކު ޝެރީންގެ ހުރިހާ ވިސްނުމެއް ގުޅިފައި ވަނީ އެކަމާއިއެވެ. ޝިޔާ ގޮވީވެސް އެކަމާއި ފިކުރު ކުރަން އިންދައެވެ. ހުރި ހަމައެކަނީ ފިރިހެން ދަރިފުޅު ގަތުގައި ނެތަސް އެކަމާއި ނުވިސްނޭ އެންމެ ސިކުންތެއް ވެސް ނުދެއެވެ. އަނެއްކޮޅުން ބަލި އެނދުގައި އުމުރު ދުވަހު ލޯބިވި ހަޔާތުގެ ބައިވެރިޔާއެވެ. ވިސްނަމުން ގޮސް ޝެރީން ބަލިކަށި ވެއްޖެއެވެ. ނަމަވެސް ޝިއާއަށްޓަކައި އަދިވެސް އޭނާ ދަނީ ނެތް ހިތްވަރު ދައްކަމުންނެވެ.
ޝެރީންއަށް އެއްޗެއް ބުނެވުމުގެ ކުރިން، ކުރީން ނުކުމެގެން ދިޔަ ފާރަވެރިޔާގެ ފަހަތުން ވަތް މީހަކު ފެނި ޝިޔާ އެއް ފަރާތް ކޮށްލިއެވެ. އެއި މިރެއިލްއަށް ފަރުވާ ދިނުމަށް ގެނައި މީހާކަން އެނގޭތީ އޭނާގެ ޖަވާބަކަށް ދެމައިން ތިބީ ކެތްތެރިކަމާއި އެކު އިންތިޒާރުގައެވެ.
”މިރެއިލް، އަހަރެންގެ އަޑު އިވޭތަ؟“
ޑޮކްޓަރުގެ ސުވާލާއި އެކު އެއްވެސް ހަކަތައެއް އެކުލެވިފައި ނުވާ ހާލު ލަސްލަހުން މިރެއިލް ބޯ ޖަހައިލިއެވެ. ލިބުނު ހިތްހަމަ ޖެހުމާއި އެކު ޑޮކްޓަރު ވެސް ހީލިއެވެ. މިރެއިލްގެ ހާލަތު ދިރާސާ ކުރަމުން ދިޔައެވެ. އިރުގަނޑެއްފަހުން އޭނާ ވާހަކަ ދެއްކިއެވެ.
”ވަރަށް ހައިޜާން ވެއްޖެ، އިއްޔެ ބެލި އިރުވެސް އެއްވެސް ކުރިއެރުމެއް ލިބޭ ކަމަކަށް ނުދައްކާ ..މިއަދި މިފެނުނީ މުޅީން ތަފާތު މަންޒަރެއް.. އަލްހަމްދުލިއްލާހް.. ކިތަންމެ ކުޑަ ވަގުތު ކޮޅެއްގެ ތެރޭގައި ވެސް ހާލަތު ބަދަލުވެގެން ގޮސްފާނެ ކަމުގެ ފުރިހަމަ މިސާލެއް މިއީ.. މިހާރު ހާލަތު އަންނަނީ ރަނގަޅުވަމުން. ދެތިން ދުވަހެއް ފަހުން އިތުރަށް ބެލުމަށްފަހު ނޫނީ ވަކި އެއްޗެއް ބުނާކަށް ނޭނގޭނެ. މިރެއިލްއާ މާ ގިނައިން ވާހަކަދައްކައި ނުހަދާތި، އަދި ސިކުނޑިއަށް ބާރުބޮޑުވާނެ ފަދަ އެއްވެސް ކަމެއް މެދުވެރިވިޔަ ނުދީ. އޭނާއަށް މިވަގުތު ބޭނުންވަނީ ފުރިހަމަ އަރާމު، މިރޭ އަހަރެން އަންނާނަން.. އޭގެ ކުރިން ކާ އެއްޗެއް ނުދީ ބާއްވާލާ“ ޑޮކްޓަރުގެ އިރުޝާދުތައް ކަނުލައި އަޑުއަހަމުން ދިޔަ ޝެރީންގެ ހިތަށް ބޮޑު ލުޔެއް ލިބުނެވެ. ދިއުމުގެ ކުރިން، މިރެއިލްގެ ހަށިގަނޑުގައި ގުޅާފައިވާ ބައެއް ހޮޅިތައް ޑޮކްޓަރު ނައްޓާލިއެވެ. ނަމަވެސް، ނޭވާލުމަށް އެހީތެރިވެދޭ އޮކްސިޖަން މާސްކު އޮތީ އަދިވެސް އެ މޫނުމަތީގައެވެ.
”އަލްހަމްދުލިއްލާހް.. އަލްހަމްދުލިއްލާހް! އިރާދު ކުރެއްވިއްޔާ ބައްޕަ ރަނގަޅުވާނެ.. ގިނަގިނައިން އެފަރާތުގެ އަރިހުގައި ދުއާ ދަންނަވަންވީ.. މާތްﷲ އެއްވެސް އަޅަކަށް ނުއުފުޅޭ ވަރުގެ ބުރައެއް ނުޖައްސަވާނެ… އީތަން ކައިވެނި ކޮށްފިތަ މިހާރު؟“ ދެލޮލުން އަންނަމުން ދިޔަ ކަރުނުތައް ފުހެލަމުން ޝެރީންއެހިއެވެ. ޝިއާ ވަކި ޖަވާބެއް ނުދިނެވެ.
****
ހުދާއި މަޑު ފެހިކުލައިގެ ފުރިހަމަ ޑެކޮރޭޝަނާއި އެކު މުޅި މާހައުލު ފެންނަނީ ލޯ ތަރަތަރަ ޖަހައިގެން ދާފަދައަކުންނެވެ. ކިތަންމެ މަދު ބަޔަކަށް ދައުވަތު ދީގެން ގެނެވުނު ހަފްލާއަކަށް ވީ ނަމަވެސް އެތައްޔާރީތަކުން ހަފްލާގެ ހައިބަތު ހާމަވެއެވެ. ކޮންމެ ދިމާލަކުން ފެންނަނީ މުއްސަނދިކަމެވެ. ހުދު ކުލައިގެ މަލާއި ފެހިކުލައިގެ ވެއޮ ތަކުން އަދި ހުދު ކުލައިގެ ޗާންދަލިއާތަކުން ތަނަށް ވެރިވެފައި އޮތީ ހުވަފެނީ ރީތިކަމެވެ. ވަންނަ ދޮރު ކައިރީގައި އިސްކޮޅުހާ ބިޔަ ލޯގަނޑެއްގައި ދެ ޒުޥާނުންގެ ނަން އިންއިރު، ދާދި ގާތުގައި ކޭކު ބެހެއްޓިފައިވާ މޭޒެއް އިނެވެ. އެއަށްފަހު ދެމީހުންގެ ތިބުމަށް ހަމަޖެހިފައި ސްޓޭޖް ކޮޅެވެ. އާއިލާއާއި އެކުވެރިން ތިބީ ހަފްލާއާއި ގުޅޭނެ ފަދަ ހެދުން ތަކުގައެވެ. އަންހެން ވެރިން ފެހިކުލައިގެ ހެދުމުގައި ތިބިއިރު ފިރިހެންވެރިން ކަޅުކުލައިގެ ކޯޓު ފަޓުލޫނެވެ.
ކައިވެނީގެ މޭޒުދޮށުގައި އިޒްވާއާއި އީތަން ގާތްގާތުގައި ތިބިއިރު މޫނުމަތިން ފެނިގެންދަނީ ހިތްހަމަ ޖެހުމެވެ. ނަމަވެސް ދެޒުވާނުންގެ ހިތުގައީވީ ހިތްދަތި އިޙްސާސެކެވެ. އިޒްވާ ވިސްނަމުން ދިޔައީ އިޒާންއާއި ޒީވާ އަދު ގާތުގައި ނެތުމުން އެކަމާއި އެވެ. އާއިލާގެ ބާކީ މެމްބަރުންނާއި ލޯބިވާ ބޭބެ ހުރިކަމުގައި ވިނަމަވެސް މައިންބަފައިން ނެތުމުގެ އުނިކަން އެއިން މީހަކަށް ފޫނު ބެއްދޭނެތާއެވެ. އީތަންގެ ހިތުގައިވެސް ވަނި އެ ޝުއޫރެވެ. އަމިއްލައަށް ހޯދައިގަތް ދިރުއުޅުމެއް ނަމަވެސް ގާތުގައި އަމިއްލަ ލޭ ހިނގާ އެކަކުވެސް ނެތްކަން އިޙްސާސްވާ ވަނީއެވެ. ކުރިން ދުވަހަކުވެސް އާއިލާގެ މަތިން ހަނދާންވެ ދެރަ ނުވާ ވަރަށް މިއަދު ދެރަވަމުން ދިޔައެވެ.
ގާޒީގެ ހުތުބާއަށް ފަހު އީތަންއަށް އޭނާ ނަޒަރެއް ދިނެވެ. އީތަން ފުންނޭވާއެއް ބޭރުކޮށްލި އިރު ހިފާލެވުނީ ގާތުގައި އިޒްވާގެ އަތުގައެވެ.
”އަނބި ގަބޫލްކޮށްފިން“ އެއަޑާއި އެކު މާހައުލުގައި އުފާވެރި އަޑުތަކުން ބައްދާލައިފިއެވެ. އެންމެންގެ ތަހްނިޔާއާއި އުފާވެރި ހަޅޭކުގެ އަޑުން ގުގުމާލިއެވެ. ގާޒީއާއި ސަލާމް ކުރުމަށްފަހު އީތަން ދުރުވެލި ހިނދު އެންމެން އައިސް ދެޒުވާނުންގެ ވަށާލައިފިއެވެ.
”މަރްހަބާ ދޮންބެގެ ޕްރިންސެސް“ އިޒްވާގެ ގައިގާ ލިއަމް ބައްދާލާފައި އެހަށިގަނޑަށް ފިތާލި އިރު ކޮނޑަށް އިޙްސާސްވީ ލިއަމްގެ ދެލޮލުން ފޭބި ހޫނު ކަރުނެވެ. މަންމައާއި ބައްޕަގެ މަތިން މާ ބޮޑަށް ހަނދާންވެ ޖަޒުބާތީވެފައި ވަނިކޮން ލިއަމްގެ އަޅާލުން އިޙްސާސްވެ ރޮވުނެވެ. ލިއަމްއަށް ދުރުވާން ޖެހުނީ ދެމީހުންގެ ދެމެދަށް ޔީލާއާއި ނީރާ ވަދެ ދުރުކޮށްލުމުންނެވެ. ލިއަމްގެ ދެލޯ އޭރު ހުރީ ހިސާބަކަށް ރަތް ވެފައެވެ. ދެބެއިންގެ އެ ވަގުތުކޮޅަށް ފަހު އާއިލާ އެންމެންގެ މޫނުމަތިން ވެސް މޮޅިވެރިކަން ފެނިލިއެވެ.
”އިޒީ ނޯ ނޯ ނޯ.. ފޮޓޯ ނަގަން ވާއިރަށް މޭކަޕް ހަޑިވެދާނެ“ ރުއާނާ ވަގުތުން ދެފަރާތައް ބޯ ހޫރުޥާލިއެވެ. ލިއަމްގެ އަތައް ޓިޝޫއެއް ދިއްކޮށްލަމުން އިޝާރާތް ކޮށްލީ އިޒްވާގެ ލޯ ފުހެލަ ދިނުމަށެވެ. އަމިއްލަ ކަރުނުތައް ހިންދާލަން އުޅުނު ނަމަވެސް އިޒްވާ ގެ ކޯތަފަތް މައްޗަށް ކަރުނު ފައިބައިފިއެވެ.
”ޕްލީޒް ޑޯންޓް ކްރައި ސްވީޓްހާރޓް.. އިޓް ހާޓްސް މީ“ އިޒްވާގެ ލޮލުން ފޭބި ކަރުނު ތިކިތައް ފުހެލަމުން، އެ ކަރުނުން ތެމިފައިވާ ލިއަމްގެ އަތް އިޒްވާއަށް ދައްކާލަމުން ބުނެލިއެވެ. އެހިނދު ތުންފިއްތާލާފައި ވެސް އިޒްވާ ބޯޖަހައިލިއެވެ. ނުހަނު ލޯބިން އިޒްވާގެ މޫނުމަތި ލިއަމް ސާފްކޮށްލަ ދިނެވެ.
އިޒްވާގެ އަތުގައި ހިފާލައިގެން އީތަން މަޑުކޮށްލީ ފޮޓޯ ނެގުމަށް ހުރި ސްޓޭޖް ކޮޅުގައިއެވެ. އެމީހުންގެ ފަހަތުން އައި ނީރާއާއި ރުއާނާ ވެގެން އިޒްވާ ލައިގެން ހުރި ބޮޑު ހެދުން އެކި ފަރާތް ފަރާތުން ރަނގަޅު ކޮށްލަ ދިނެވެ. ދެ އަންހެން ކުދިންގެ މަސައްކަތް ނިންމާލުމަށްފަހު ދުރަށް ޖެހިލުމުން، އިޒްވާ ހަމަޖެހުމުގެ ނޭވާއެއް ދޫކޮށްލިއެވެ. ނަމަވެސް، އޭނާގެ ހިތުގެ ތެޅުން ހުރީ އާދައިގެ މިންވަރަށް ވުރެން މަތީގައެވެ. އެހުރިހާ އިރު އޭނާގެ މުށުތެރޭގައި ފޮރުވައިގެން ގެންގުޅުނު ކުޑަ ކަރުދާސްކޮޅަށް، ބޭއިޚްތިޔާރުގައި ބާރަށް ފިތާލެވުނެވެ.
”ކުޑަކޮން ކައިރިވެލާ“
އިވުނީ ފޮޓޯ ނެގުމަށް ތިބި މީހުންގެ ތެރެއިން މީހެއްގެ އަޑެވެ. އީތަން ބޯޖަހާލާފައި އިޒްވާގެ މޫނަށް ބަލައިލިއެވެ. އެ ފިރިހެންވަންތަ ހިނިތުންވުން ހަދިޔާ ކޮށްލި ހިނދު މުޅި ހަށިގަނޑުގައި ފިނީގެ އޮއިވަރެއް ދުވެލިއެވެ. އެ ހިމަ އުނަގަނޑުގައި ހިފާ އީތަން ގަޔާއި ކައިރިކޮށްލިއެވެ. އީތަންގެ ނޭވާ އިޙްސާސްވާޙާ ގާތުގައި ހުރެވުނު އިރު އެތޫނު ބެލުމުން އިޒްވާގެ ހިތް ތެޅެމުން ދިޔައީ މަތަނުކޮށް ލެވޭހާ ބާރުމިނެއްގައެވެ. ކަޅި ޖަހައި ނުލާ އީތަން ބަލަހައްޓައިގެން ހުއްޓެވެ.
”ބިއުޓިފުލްލް!“ ކޮންމެ އަކުރަކަށް ވަކިވަކިން ބާރުލާފައި އީތަން ބުނެލިއެވެ. އިޒްވާގެ މޫނުން މަޑު ރަތްކަމެއް ފެނިލިއިރު، ފިނިވެފައިވާ ތުންފަތަށް ވެރިވެފައިވާ ލަދުވެތި ހިނިތުންވުމާއި، ތިރިކޮށްލެވިފައިވާ އެސްފިޔަތަކުގެ ސަބަބުން އޭނާގެ ފުރިހަމަކަން ދެގުނައަށް އިތުރުވެފައިވެއެވެ.
މެހެމާނުންގެ ބައިބަޔަށް އައިސް ސަލާމް ކުރުމަށް ފަހު ހަދިޔާ ދެމުން ދިޔައެވެ. ކޮންމެ މީހަކުވެސް ސްޓޭޖުން ފައިބައިގެން ދަނީ ދެޒުވާނުންނާއި އެކު ރީތި ފޮޓޯއެއް ނެގުމަށްފަހުއެވެ.
”ރުއާ!“ ލިއަމްގެ ފަހަތުގައި ހުއްޓާ ރުއާނާގެ ކަންފަތައް އިވުނީ ދަންނަ އަޑެކެވެ. ފަސް އެނބުރިލި ހިނދު ނީރާއާއި އެކު ހުރި ޖެފްރީން ފެނުމުން ރުއާނާ ދިޔައީ ސިއްސައިގެންނެވެ. ދެޒުވާނުންގެ ގުޅި ލާމެހިފައިޥާ އަތުން ދެމެދުގައި އޮތީ އާދައިގެ ގުޅުމެއް ނޫންކަން ހާމަވާވަރުވެއެވެ.
”ޖެފްފް؟“ ހައިރާންވީ ވަރުން ރުއާނާއަށް ވާހަކަ ދެއްކުނީ ވެސް ފުދޭވަރަކަށް ބާރަށެވެ. އެކަން އިޙްސާސްވީ ގާތުގައި ތިބިމީހުންގެ ނަޒަރު އަމާޒުވިތަން ފެނިއެވެ .
”އިޒް ޝީ ޔުއަރ ބެސްޓީ؟“ ޖެފްރީން އިޝާރާތް ކޮށްލީ ދުރުގައި ހުރި އިޒްވާއަށެވެ. ރުއާނާ އެ ހައިރާން ކަންމަތީގައި ހުރެ ބޯޖަހައިލިއެވެ.
”ނީ؟ ނީ އަކީ ތަ ޖެފް ގެ ޖީއެފް އަކީ؟“
“ޔެސް.. އިއްޔެ ބުނީ މެންނު.. ހިއަރ ޝީ އިޒް.. މައި ގާލްފްރެންޑް“ ނީރާ ދައްކާލަމުން ޖެފްރީން އުފާވެރި ގޮތަކަށް ބުނެލިއެވެ. ނީރާ ވެސް ހުރީ ހައިރާން ކަންމަތީގައިއެވެ. “އަހަރެން ކިޔަމެންނު ގާތް ފްރެންޑެއްގެ ވާހަކަ.. އެންޑް ވަރަށް ދުވަސް ފަހުން އިއްޔެ ދިމާވި ވާހަކަ ބުނީމެންނު.. މީ އެކުއްޖަކީ“ އެ ޖަވާބާއި އެކު ނީރާގެ މޫނުމަތިން ހައިރާން ކަން ފިލާ އުފާވެރި ހިނިތުންވުމެއް ފެނިލަން ގިނައިރެއް ނުނެގިއެވެ. ތިން ޒުޥާނުން އޮލަވާހަކަ އަކަށް ގެއްލުނު އިރު ލިއަމް ހުރީ އެމީހުންގެ ވާހަކަ އަޑުއަހާށެވެ. އެހެން ހުރެހުރެފައި ދޭތެރެއަކުން ރުއާނާ ، އޭނާގެ އުނަގަނޑުގައި ވިކައި ގަނެއެވެ. އެއަމަލުން އިއްޔެގެ ހާދިސާއާއި ގުޅުވައިގެން ދިމާކުރަނީކަން ނަގައިގަނެވިގެން ލިއަމް ވެސް ހުރީ ހިނިއައިހެވެ.
ހަވީރު ފެށުނު ހަފްލާ ނިމުމަކަށް ދިޔައިރު އަށެއް ޖެހުމާއި ގާތްވެއްޖެއެވެ. އެހިސާބުން އޮތީ އާއިލާގެ ފޮޓޯ ނެގުމެވެ. ފަހަރަކު މީހަކު ނަގަމުން ގޮސް ރުއާނާ ވެސް ފޮޓޯ ނެގުމަށް ހުއްޓުނެވެ. ހިތްހަމަ ޖެހޭ ވަރަށް އީތަންއާއި އިޒްވާ އާއި އެކު ފޮޓޯ ނެގުމަށްފަހު ފައިބަނިކޮން ލިއަމް އައިސް އަރާފިއެވެ. އެހިނދު ދިމާކުރުމުގެ ގޮތުން އެހެން ޒުވާނުން ހަޅޭއްލަވަމުން ދިޔައެވެ. ރުއާނާ ދެލޯ ބޮޑުވިއެވެ. އެންމެންނަށް ވުރެން ކީވާން އާއި އަދްރެކް އާއި ޝާއިންގެ ކަންތައް ބޮޑެވެ. ދެތުންފަތް ފިއްތާލެވުނީ ހުރިހާ ބޮޑެތި މީހުންގެ ނަޒަރު ވެސް ހުއްޓެން ފެށުމުންނެވެ.
”ވައި އަރ ޔޫ ޑުއިންގް ދިޒް ޓު މީ؟“ ދެތުންފަތް ފިއްތާލައިގެން ހުރެ ރުއާނާ ދިމާކޮށްލީ ސްޓޭޖުން ފައިބާށެވެ. ނަމަވެސް އޭނާގެ އަތުގައި ހިފައި މަޑުކުރުވިއެވެ. އީތަންއާއި އިޒްވާ ވެސް، ލިއަމްއާއި ރުއާނާ އުޅެމުން ދިޔަ ގޮތުން ހެވިފައި ތިއްބެވެ.
”ޖަސްޓް ވެއިޓް.. ޖަސްޓް ވަން ޕިކް“ ލިއަމް ދެލޯ ހަނިކޮށްލުމުން އިތުރު ގޮތެއް ނެތިފައި ހުރެ ރުއާނާ ގޮސް ހުއްޓުނީ އީތަންގެ ގާތުގައެވެ. އޭރު ލިއަމް، އިޒްވާގެ ގާތުގައި ހުއްޓިއްޖެއެވެ. އެތާގައި ހުރެ ރުއާނާ ނަޒަރު ހިންގާލި އިރު އަލާނިއަލްއާއި ކައިވަން އަދި ޔަޒަކް ފަދަ ބޮޑެތި މީހުން ހެވިފައި ބަލަން ތިބި ގޮތުން ލަދުން ވިރޭ ވަރުވިއެވެ. ޔޫމީން އާއި މިލާން އަދި އީން ގެ މޫނުމަތީގައިވެސް ވީ ނުފިލާ ހިނިތުންވުމެކެވެ.
”މަޖާ ދެމީހުން މި.. ހަހަހަ“ ރުއާނާ އާއި ލިއަމް ފައިބައިގެން ދިޔަތަން ފެނި ހިފަހައްޓައިގެން ހުރި ހިނިގަނޑު އީތަން ބޭރުކޮށްލިއެވެ. އިޒްވާވެސް ރައްދުގައި ހީލިއެވެ. އެހެން ހުރެފައި އަނެއްކާ ވެސް އަތުގައި އޮތް ގަނޑުކޮޅަށް ފިތާލިއެވެ. އީތަންގެ ނަޒަރުގައި އެކަންތައް އަޅައިގަންނަ ގޮތްވިއެވެ.
”އިޒީ ކޯއްޗެއް މުށުގަ؟.. ހާދަ ވަރަކަށް ބަލާހެން ހީވެއޭ އެބަ އަތައް.. އަނިޔާއެއް ވީތަ؟… ދައްކަ އަހަރެން ބަލާލަން..“ އީތަންއަށް ފާހަގަވިކަން އެނގުމުން އިޒްވާ މެޔަށް ފިނިވެގެންދިޔައެވެ. އީތަން އަތްލަން އުޅުމުން، ތެޅިގަނެފައި އަތް ދުރުކޮށްލިއެވެ. ކުރަން ބޭނުން ވި ކަންތައް ކުރުމަށް ތައްޔާރީތައް ވެގެން އައި ނަމަވެސް ފަސްޖެހެވެނީއެވެ. އީތަންގެ އަތައް އެ ގަނޑުކޮޅު ލައިދިނުމަށް ހައެއްކަ ފަހަރު އަތް ހިއްލާލި ނަމަވެސް ޖެހިލުންވުމުގެ ސަބަބުން ކޮންމެ ފަހަރަކުވެސް އަތް ތިރިކޮށްލެވެނީއެވެ.
”ވަޓް ހެޕެންޑް؟“ އީތަން ނިތް ހިއްލާލަމުން އޯގާތެރިކަމާއެކު އަހާލިއެވެ. އިޒްވާ ފުން ނޭވާއެއް ބޭރުކޮށްލަމުން ހިތްވަރު ހޯދަން އުޅޭ ފަދަ ގޮތަކަށް ކަރުކެހިލިއެވެ. އިރުކޮޅަކު ވިސްނާލުމަށްފަހު، އޭނާގެ ހިތުގެ ގޮވުމަށް އިޖާބަދޭން ގޮތެއް ނިންމިއެވެ.
”އައި ހޭވް ޕްރިޕެއަރޑް އަ ގިފްޓް ފޯރ ޔޫ، ނޭނގޭ ކަމުދާނެ ކަމެއް ބަޓް.. ބަޓް އާހް..ބަޓް، އައި ރިއަލީ މީން އިޓް!“ މަޑު ތުރުތުރަކާއެކު އިޒްވާގެ އަތް ހިއްލާލާފައި އީތަންގެ މުށުތެރެއަށް ގަނޑުކޮޅު ލައްވާލަ ދިނެވެ. އެހިނދު ސިކުނޑިއަށް ވެގެން ދިޔަ ލުޔާއި އެކުވެސް ހިތުގެ ތެޅުން އަވަސްވެ އަތްފައި ފިނިވެގަތެވެ.
”މިއީ ކޯއްޗެއް އިޒީ..“ ނުހަނު ފަރުވާތެރިކަމާއި އެކު އިޒްވާގެ މޫނަށް ބަލައިލަމުން އެ ގަނޑުކޮޅު ނިއުޅުވާލަމުން އީތަން އަހާލިއެވެ. އިޒްވާ އެއްޗެއް ނުބުންޏެވެ. އިސް އުފުލާލީ އެ ފެނުމުން އީތަންގެ މޫނަށް އަރާ ފައިބާ ކުލަވަރު ދެކެލުމަށެވެ.
”އައި ލަވް ޔޫ އީތަން“
އޭގައިވާ ހަތަރު ލަފްޒު ހިޔާލެއް ފިކުރެއް ނެތި ފުރަތަމަ ފަހަރަށް ކިޔާލެވުނު އިރު ވާނުވާ ރަނގަޅަށް ނޭނގެއެވެ. ނަމަވެސް ދެވަނަ ފަހަރަށް އެއަށް ދެވުނު ނަޒަރާއި އެކު އީތަން އަށް ހުއްޓުން އަރައިގެން ދިޔައެވެ. އެއްފަހަރު އިޒްވާއަށް އަނެއްފަހަރު އެއަށް ބެލުނެވެ. އެސްފިޔަތައް ތަޅުވާލަމުން ތިންވަނަ ފަހަރަށް ކަރުދާސްކޮޅަށް ނަޒަރެއް ދިނީ އެއީ ވަހްމެއް ކަމުގައި ހީވެފައި ކަންނޭގެއެވެ. ދެލޯ ބޮޑު ކޮށްލެވުނު އިރު އިޒްވާގެ އަތުގައި ހިފާލެވުނެވެ.
”އިޒީ.. ދިސް..ދިސް..އި-“ އީތަންގެ އަރުބެދި ވާހަކަ ކުރިއަށް ނުގެންދެވުނެވެ. ދެލޯ ފެންކަޅިވެގެން ދިޔައިރު، އިޒްވާގެ އަތަށް ބާރުކޮށްލެވުނީ އޭނާގެ ހިތުގައި އުތުރިއަރަމުންދާ ޖަޒުބާތުތަކުގެ ސަބަބުންނެވެ.
”ބުނީމެންނު އައި މީން އިޓް އޭ.. އައި ރިއަލީ ލަވް ޔޫ“ ފެންކަޅިވެފައި ވާ ދެލޮލަކުން ބަލައިލަމުން އިޒްވާއަށް މަޑުމަޑުން ބުނެވުނެވެ. އެހިނދު އީތަންގެ ލޮލުން ވެއްޓުނު ކަރުނު ތިކި ފެނި އިޒްވާއަށް ދުރަކު ނުހުރެވުނެވެ. ”ޕްލީޒް ނޯ.. ދެރަވީތަ އެހެން ބުނީމަ.. އިޒީ ހީކުރީ އުފާ ވާނެ ކަމަ-“
”ދެރަވީހޭ؟ އެނގޭތަ މި މޯމެންޓްއަށް އިންތިޒާރު ކުރާތާ ވީ ކޮން ދުވަހެއް ކަން؟.. ލޯބިވާ ވާހަކަ ފުރަތަމަ ބުނަން ބޭނުންވީ އަހަރެން.. ފަހުން އިޒީ ވެސް ބޭނުންވާ ކަން އެނގި ހުރެވެސް މަޑުކޮށްލައިގެން ހުރީ އަދިވެސް އަހަރެންގެ މައްޗަށް ފުރިހަމަ އިތުބާރު ލިބި އެކުގައި އުޅެން ކޮމްފޯޓަބަލް ވާންދެން… ކަޒް އައި ނޯ ހައު ޓެރިބަލް ނޫހް މޭޑް ޔުއަރ ލައިފް .. ބަޓް ދިސް.. އާހްހް!“ އިޒްވާގެ އަތުގައި ހިފައިގެން ހުރި ގޮތައް އީތަން އަށް ކަކޫ މައްޗަށް ތިރިވެލެވުނެވެ. ދެލޮލުގައި ބޮނޑިވެފައިވީ ކަރުނުތަކާއި އެކު އެ މޫނަށް ބަލަމުން ދިޔައިރު އެކަރުނުތަކުގެ ތެރެއިން ވެސް އޭނާ ވެފައިވާ އުފާ ސިއްރެއް ނުވެއެވެ.
”މޭން ޔޫ އޯކޭ؟“ ދެމީހުންނާއި މާ ދުރު ނޫން ހިސާބެއްގައި ހުއްޓި ހުރެ ލޫކް ގޮވާލިއެވެ. އޭރު އެހެން މީހުން ކެއުމުގައި އަވަދި ނެތި އުޅެމުން ދިޔުމުން އެ މަންޒަރު ލޮލުގައި އަޅައެއް ނުގަނެއެވެ. ލޫކްގެ ގާތުގައި ރުއާނާ ހުރިއިރު އިޒްވާއާއި އީތަންއާއި ދެމެދު ދެކެވުނު ވާހަކަ ތައް ނޭނގުނު ނަމަވެސް، އީތަންއަށް އައި ބަދަލުން ވީ ގޮތް ނަގައިގެނެވުނެވެ.
“އީތަންދެކެ އަހަރެން ލޯބިވާ ވާހަކަ ބުނުމުން، އިޓް ވޯޒް ހިޒް އައިޑިއާރ“ އީތަން ތެދުވުމުން އިޒްވާ އިޝާރާތް ކޮށްލީ ލޫކްއަށެވެ. ލޫކްގެ މޫނަށް އީތަންއަށް ބަލައިލެވުނީ ޝުކުރުން ފުރިފައިވާ ނަޒަރަކުންނެވެ.
”އައި ލަވް ޔޫ ގާއީޒް.. ޔޫ ގާއިޒް އަރ ދި ބެސްޓް“
”އިޓްސް ނަތިންގް… ވީ ލަވް ޔޫ މޯރ.. އުފާވެރި ޒަވާޖީ ހަޔާތަކަށް އެދެން“ ލޫކް އުފާވެރި ހިނިތުން ވުމެއް ރައްދުކޮށްލިއެވެ. އެއަށްފަހު ދެޒުވާނުންނަށް ވަގުތުކޮޅެއް ދީފައި ރުއާނާއާއި އެކު އެތަނުން ދިޔައެވެ.
ޖެހޭ ނުޖެހޭ ހިސާބުގައި ހުރެ އީތަން ބަލަމުން ދިޔަ ގޮތުން އިޒްވާ ލަދުން ހުރެ ވެސް އުޅަބޯށިން އީތަންގެ ބަނޑުގައި ޖަހާލިއެވެ. ”އިޓްސް އޯކްވާރޑް.. ލަދު ވެސް ގަނޭ“ ތުންފަތް ހަފާލަމުން އިޒްވާ ބުނެލިއެވެ.
”ވައި؟ ހަހަހަ ޑޯންޓް ބީ.. މިއީ ލައިފްގަ އައި އެންމެ އުފާވެރި ރޭ… އިޒީ ފެނުނު ފުރަތަމަ ދުވަހު ވެސް އިނގޭ ތި ކުއްޖާއަށް ފޯލްވާނެ ކަން.. އައި ކުޑުންޓް ހެލްޕް މައި ސެލްފް، ނޭނގި ހުއްޓާ ފޯލެވެވުނީ.. އައި ލަވް ޔޫ ސޯ މަޗް.. ހިތައް އަރާ މިއަށް ވުރެން އަވަހަށް ދެމީހުން ދިމަވި ނަމައޭ…ނޫންތަ؟“ އިޒްވާގެ ދެލޮލަށް ބަލަން ހުރެ އީތަން ވާހަކަ ދެއްކިއެވެ. އެދެއަތުގެ ތެރޭގައި ރަނގަޅަށް އިޒްވާ ބޮނޑިކޮށްލި ހިނދު ލޯބިވެތި ހިނިތުންވުމަކުން ތުންފަތް ފެވުނެވެ.
ލިއަމް މަޑުކޮށްލައިގެން ހުރީ އަލާނިއަލް އާއި ޔަޒަކްގެ ގާތުގައެވެ. ދެކެވެމުންދިޔަ އޮލަ ވާހަކައިގެ ތެރެއަށް އޭނާ ގެނބިފައި ވަނިކޮށް، ކުއްލިއަކަށް މުޅި މީހާ ސިހިގެންދިޔައީ ކަންފަތް ދޮށުން އިހްސާސްވި ވައިރޯޅިއެއްގެ ހިލަން ވެފައެވެ. ފަސް އެނބުރި ބަލާލި ހިނދު ދޮރާއި ދިމާލަށްހުރި ޒުވާން ފިރިހެނެއް ލޮލުގައި އަޅައިގަތެވެ. މޫނުފޮރުވައިގެން ހުރި ނަމަވެސް އެއީ ކާކުކަން އޭނާއަށް އެނގުން ފަދައެވެ. އަލާނިއަލްމެން ގާތު އެބަ އަންނަމޭ ބުނެ ލިއަމް ބޭރަށް ނުކުންނަން ދިޔައެވެ. އޭނާ އިޚްތިޔާރުކުރީ އިންތިޒާރުގައި ހުރި ޒުވާނާ ހުރި ދޮރު ނޫން އަނެއް ދޮރެވެ. ނުކުންނަމުން އެ ޒުވާނާއަށް ދިން ތޫނު ނަޒަރުން، އޭނާގެ ފަހަތުން އައުމަށް އިޝާރާތްކޮށްލި ކަހަލައެވެ.
ބޭރަށް އެޅި ފުރަތަމަ ފިޔަވަޅާއެކު، ލިއަމްއަށް ޒާތަކަށް ހުއްޓުން އަރައިގެން ދިޔައެވެ. ހީވީ ވަށައިގެންވާ މަންޒަރު ބަދަލުވެގެން ދިޔަ ހެންނެވެ. މީހަކު ނުބުނެ ދިން ނަމަވެސް އޭނާގެ ހަވަނަ ހިއްސު ކަމެއް ދެނެގަނެފިއެވެ. ސިހިފައި ހުރެ ވަށައިގެން ވި މާހައުލަށް ނަޒަރެއް ދިނެވެ. ސްނޯގެ އަސަރު ކުރަމުން ދިޔަ ވަގުތެއްގައި އުފެދިފައި ހުރި ބާރު ވައިރޯޅިތަކުގައިވީ ހޫނުކަމެވެ. ކަންފަތް ދޮށުގައި ގުގުމަންފެށީ ނުރައްކަލުގެ ރަނގަބީލެކެވެ.
”އެނގިއްޖެ ދޯ މިއައީ ކީއްވެކަން؟“ފަހަތުން އިވުނު ބަރު އަޑާއެކު ލިއަމް ފަސްއެނބުރިލިއެވެ.
”އުވެއިތް، ކިހިނެތް މި ވަނީ؟ އަޒްލާން ކޮބާ؟ ރަޒަލް އާއި އައްމާރް ވެސް ނުފެނުނު“ އުވެއިތް އާއި ވާހަކަ ދެއްކި ނަމަވެސް ލިއަމްގެ ނަޒަރު، ވަށައިގެންވި މާހައުލުން ވަކިނުވެއެވެ. ހިތް އޮބި ނޯންނަ ވަރަށް ތެޅިގަތީ ދުރުން ކަޅު ހިޔަނިތަކެއް ފެނިލި ހެން ހީވެފައެވެ. އެއީ ޔަގީނުންވެސް އޭނާގެ މީހުންގެ އަމަލެއް ނޫނެވެ. އުވެއިތް މޫނުގައި އަޅާފައި އޮތް ފޮތިގަނޑު ހިއްލާލަމުން ލިއަމްއަށް މޫނު ފެންނަ ވަރު ކޮށްލިއެވެ. އެ މޫނުގައިވީ ނުތަވަސްކަން ނަގައިގަނެވި ލިއަމްގެ ހިތުގައިވާ ނުތަވަސްކަން ދެގުނަވެ ނުބައި ޒާތަކަށް ތެޅިގަތެވެ.
”ވަރަށް ގޯސްވެއްޖެ.. ބިލާލްގެ މީހުން މިތަން ވަށާލައިފި..އެކަން ޔަގީން ވަނީ މިތަނުން ބޭރަކަށް އަހަރެމެންގެ މީހުން ކުރެ އެކަކަށް ވެސް ނުނިކުމެވޭ.. މައްސަލަ އަކީ އެމީޙުންގެ މީހުން ކުރެ އެކަކު ވެސް އަހަރެމެންގެ ލޮލަކަށް ނުފެނޭ. ދޭތެރެއަކުން ހިޔަނިތަކެއް ފެންނަނީ“
“ އެއީ ކީއްވެ؟ އެހެން ވޭތަ؟ ގައިމު ކުރިން ދުވަހަކުވެސް ތިފަދަ ކަމެއް ނުވޭ.. އިންސާނުންގެ ލޯތަކަށް އެމީހުން ވަންހަނާ ވެފަ ތިއްބަކަސް އަހަރެމެންގެ ލޯތަކަށް އަހަރެމެންގެ ނަސްލުގެ މީހުން ފެންނާނެ އެންނު.. “ ލިއަމްގެ ދެލޯ ބޮޑުވާ ގޮތްވިއެވެ. އުވެއިތް ބޯޖަހައިލިއެވެ.
”ފެންނާނެ.. އެކަމަކު މިވަގުތު ހާލަތު ބަދަލު ވެއްޖެ.. އައްމާރް އަދި ރަޒަލް ، މީހުންނާއި އެކު އަހަރެންގެ އިޝާރާތަކައް އެބަތިބި ބޭރުގަ.. ވެގެން އުޅޭ ގޮތަކީ، ބިލާލްގެ ސިހުރުވެރިން ވެސް އެބަތިބި.. ރަޒަލްމެންނަކަށް އެތެރެއަކަށް ނުވަދެވޭ އަހަރެމެންނަކަށް ބޭރަކަށް ނުދެވޭ.. ޒާތެއްގެ އަލިފާން ހޫނު ގަނޑެއް އަރާފަ ދޮރާއި ހިސާބުން ހުއްޓެން މަޖުބޫރުވޭ.. އެ ހޫނަށް އަހަރެމެންނަކަށް ކެތެއް ނުކޮށްލެވޭ… ހަމަ ފިހެނީ… ހީވާގޮތުން އެއީ އެމީހުން ހަދާފަ ހުރި ސިހުރުގެ ބަންދެއް… ލިއަމް، އެމީހުންގެ މީހުން މިތަން ފުރާލައިފި.. ދެފަހަރު ބޭރުގައި ތިބި މީހުންނަށް އެމީހުން ފެނިލި، އޭގެ ފަހުން އެކަކަށް ވެސް ބިލާލް އަދި އޭނާގެ މީހުން ކުރެ މީހަކު ވެސް ނުފެނޭ..“ ހާސްވެފައި ހުރެ އުވެއިތް ތަކުރާރްކޮށް ކިޔައިދިނެވެ. ލިއަމްއަށް ދެލޯ މަރާލެވުނެވެ.
”އަޒްލާން ކޮބާ؟“
”އަޒްލާން އާއި ޒަބީގް، އިތުރު މީހުންނާއި އެކު އެބަތިބި ލިއަމް ބުނިހެން އެކޮޅުގަ..“ އުވެއިތް ޖަވާބު ދިނެވެ. ލިއަމްގެ ހިތުގެ ހަމަނުޖެހުން މުޅިން ގެއްލިއްޖެއެވެ. ރުއާނާގެ މަތިން ހަނދާން ވީ ހިނދު މޭގެ ތެރޭގައި ގަދަފަދަ ތޫފާނެއް އުފެއްދިއްޖެއެވެ.
”ހީވަނީ މާކުރިން މިދުވަހަށް އެމީހުން ތައްޔާރު ވެގެން ތިބިހެން… ޒަބީގް ބުނި އެމީހުންގެ ހަމަލާއެއް ރުއާނާއަށް ނައިސް އޮތީމަ ވެސް އެކަމާ ޖެހޭ ކަމަށް ތައްޔާރަށް ތިބެން.. އޭގެ ފަހުން ގޭގެ ވަށައިގެން އޮތް ސީލްވެސް ވަރުގަދަ ކުރިން.. އެހެންވެ އެމީހުންނަކަށް ގެއަކަށް ނުވަދެވޭނެ.. ހޮސްޕިޓަލަކަށް ވެސް އެމީހުންކަށް ނުވަދެވޭނެ.. ގޯތި ތެރޭގަ ހުރެ ބިރު ދައްކާލާފަ ދިޔައީ އެންމެ ފަހު މީގެ މަހެއް ކުރިން.. އެފަހުން އޯވަރނައިޓްއަށް ދިޔަ ރޭ ދިމާ ކޮށްލީ.. އެކަމަކު އެދުވަހު ވާގޮތް ނުވީމަ މިއަދަށް އެ ތައްޔާރު ވީ.. އެހެންވީމަ ބަލާ އެމީހުންނާއި ދެކޮޅަށް ކުރަން ރޭވި ހުރިހާ ކަމެއް ކުރެވޭތޯ.. ރުއާއަށް އެއްވެސް ގެއްލުމެއް އެމީހުންގެ ފަރާތުން ލިބިގެން ނުވާނެ.. އަހަރެމެން ބަލާނަން ހޯލް.. ތިމީހުން މަޑުކުރޭ ބޭރުގަ… ކިހާ ހިސާބަކުން ބޭރަށް ނުދެވެނީ؟“ ލިއަމް ވާހަކަ ދައްކަމުން ގޮސް އުވެއިތް ކުރެން އަހާލިއެވެ. އޭނާ ދައްކާލީ ހޮޓަލަށް ވަދެވެން އިން ފުޅާ ގޭޓު ގުޅޭ ޕާކިން ޒޯނެވެ. ފެންނަ ފެނުމަށް އެތަނުގައި ފަނިފަކުސައެއްގެ ހިލަންވެސް ނެތް ނަމަވެސް، އެ ނުރައްކާތެރި ހިޔަނިތައް އެތަނުގައި ފިލާ ތިބިކަން ލިއަމްގެ ހިތް ބުނެދެމުންދިޔައެވެ. ނުފެނުނު ނަމަވެސް އިޙްސާސްވެއެވެ. ސްނޯގެ ތެރެއިން، ވައިގެ ތެރޭގައި ހިފާލާފައިވާ ހިރަފުސް ވަހުން އެކަމަށް ހެކިދެއެވެ. އުވެއިތް ދިއުމަށް ހިނގައިގަތުމުން ސިކުނޑި ހާސްވެފައި ހުރެމެ ލިއަމްވެސް ހޯލާއި ދިމާލަށް ދުއްވައިގަތެވެ. އެންމެ ސިކުންތެއް ވެސް ރުއާނާ އެކަނި ކޮށްލާކަށް ބޭނުމެއް ނުވެއެވެ.
***
މިރެއިލްއަށް އަރާމް ބޭނުންވާ ކަމަށް ބުނުމުން އެތެރޭގައި ފާރަވެރިންގެ އެކަކު ބެހެއްޓުމަށްފަހު އެހެން މީހުންނާއި އެކު ޝެރީން އާއި ޝިއާ ނުކުތެވެ. މުޅި ގޭތެރެ ފަޅުކޮން އޮތް އިރު ހަމައެކަނި ދިރުމަކީ ގޭގައި ގެންގުޅޭ މީހުންގެ އަޑު އެކަންޏެވެ. ކާން ބޭނުން ނުވެފައި ހުއްޓާ ވެސް ޝެރީން އެދުމުން، ދެކޮޅު ނުހެދުމަށް އެއްޗެއް ކާލުމަށް ޝިއާ ވަނީ ތަނަވަސް ކާބަޔަށެވެ. ދެމައިން ފެނުމާއި އެކު ސުފުރާ މައްޗަށް ނާސްތާ އަރުވަން ބަދިގެ މަސައްކަތުގައި އުޅެމުންދިޔަ މީހުން އަވަސްވެގަތެވެ.
ޝިއާ ފޯނަށް ނަޒަރެއް ދިނީ މެސެޖެއް އައި އަޑު އަޙާފައެވެ. ބަލައިލި ހިނދު ޒައްޔާންގެ މެސެޖެކެވެ. އޭގައި ކުރުގޮތަކަށް ހާލަތު ބުނެލާފައިވީ އިރު އެ މެސެޖުން ޝިއާ ކޮޅަށް ޖެހުނެވެ.
“ މަންމާ ވަރަށް އަވަހަށް ދާން ޖެހިއްޖެ.. ހީވަނީ ބިލާލް އަނެއްކާ ވެސް ރުއާނާ ހޯދަން އައީ ހެން“ ހުރިހާ ވާހަކައެއް ޝެރީންއަށް ޝިއާ ކިޔައިދީފައިވާތީ ސިއްރުކުރާކަށް ނުހަދައެވެ. ޝެރީންވެސް ސިހިފައި ބަލައިލިއެވެ.
”އަނެއްކާ؟ އެކުއްޖާއަށް ހަމަ ނޭވާ ލެވުނަ ނުދޭނެ އެމީހުން..“
”މިފަހަރު ކަންކަން އެހާ ރަނގަޅު ހެންނެއް ހިއެއް ނުޥޭ.. ލިއަމްގެ އާއިލާގެ ހާއްސަ ލަޝްކަރު ވެސް އެބައުޅޭ .. ބަޓް ދަ ތިންގ އިޒް، އެމީޙުންނަކަށް ބިލާލްގެ މީހުންނެއް ނުފެނޭ.. އީތަންގެ ކައިވެނި ހަމަޖެހިފައިވާ ހޯލުގެ އެތެރޭގަ ލިއަމް މެން ފާޑަކަށް ތާށިވެފަ އެ ތިބީ.. އެމީހުންނަކަށް ބޭރަކަށް ނުވަދެވޭ.. ބޭރުގަތިބި ލިއަމްގެ މީހުންނަކަށް އެތެރެއަކަށް ނުވަދެވޭ…“ ޝިއާ ހާސްވެ ހުރެ ޒައްޔާންގެ މެސެޖްގައިވާ ގޮތައް ކިޔައިދިނެވެ. އެއާއި އެކު ޝެރީންއަށް ވެސް އިންތަނުން ތެދުވެވުނެވެ.
”މާލިކް.. މާލިކް“ ޝެރީން އަޑުހަރުކޮން ގޮވާލުމުން އެވަގުތު ގޭތެރޭގައި ހަރަކާތްތެރިވަމުން ދިޔަ ދިހަވަރަކަށް ނޯކަރުން ސިކުންތުކޮޅެއްގެ ތެރޭގައި އައިސްތިބީ އެމީހުންގެ ކުރިމަތީގައެވެ. އެމީހުންގެ ފަހަތުގައި ހުރި ސާޅީހަކަށް އަހަރުގެ ފިރިހެނެއް ކުރިއަށް ޖެހިލިއެވެ. ހިސާބަކަށް ރޫތައް މޫނުގައި ހުރި ނަމަވެސް ވަރުގަދަ ހަށިގަނޑަށް ބަލާލުމަށްފަހު އޭނާގެ ބާރު ވަޒަން ކޮށްލެވެއެވެ.
މާލިކް އިޙްތިރާމް އަދާކުރުމުގެ ގޮތުން އަދަބު ވެރިކަމާއި އެކު ބޯގުދު ކޮށްލިއެވެ.
“ އަނެއްކާ ވެސް ނީލްގެ މީހުން“ ޝެރީން ބުނެލި ހިނދު އެންމެން އެކަކު އަނެއްކަކުގެ މޫނައް ބަލައިލިއެވެ. ހާއްސަކޮން މާލިކްގެ މޫނުމަތިން ފެނިލީ ރުޅިވެރިކަމެވެ.
”ޝިއާ އާއި އެކު ދޭބަލަ.. ސަލާމަތުން އަހަންނާއި ހަމައަށް އެކުއްޖާ ގެނެސްދޭތި!“ ޝެރީން ވާހަކަ ދެއްކި އިރު ވެސް އަޑުގައި ހުރީ ކަންބޮޑުވުމާއި ނުތަނަވަސްކަން ސިއްރެއް ނުވިއެވެ. މާލިކް ބޯ ޖަހައިލަމުން ހާސް ނުވުމަށް ބުނެ ޔަގީންކަންދިނެވެ.
“މަންމަ ހާސް ނުވޭ، ކޮއްކޮއަށް އެހީވެވޭނީ ވެސް އަހަރެން ގޮސްގެން .. ބައްޕައަށް ބަލާތި “ ދަމުން ޝެރީންގެ ގައިގާ ޝިއާ ބައްދާލިއެވެ.
މިރެއިލްގެ ގަނޑުވަރުން ނުކުމަތް ހިނދު ދޮރުވާނުން، ގަނޑުވަރުގެ ދޮރު ލައްޕާލިއެވެ. ޝިއާ ބަލައިލީ ގާތުގައި ހުރި މާލިކްއަށެވެ. އެކަކު އަނެއްކަކަށް ލޮލުން ކޮށްލި އިޝާރާތާއި އެކު، ދެން ފެނުނީ ވައިގެ ތެރެއަށް އަރައިގެން ދިޔަ މަންޒަރެވެ. ނިއުޅިގެން ދިޔަ ވަރަތަކާއި އެކު ހަލުވި މިނުގައި އުދުހެމުން ދިޔައިރު ދެމީހުންގެ މޫނުމަތިން ވެސް ފެނުނީ ނުތަވަސްކަމެވެ.
****
ކޮޅިގަނޑެއްގެ ކުރިން ފެންނަ ބިރުވެރި ހަމަހިމޭންކަން މުޅި މާހައުލަށް ވެރިވެފައި އޮތް ވަގުތެކެވެ. ދޮރުމަތީގައި މަޑުކޮށްލައިގެން ހުރި ލިއަމްގެ ގާތަށް ޒައްޔާން ހާސްވެފައި ހުރެ އައިސް ހުއްޓުނެވެ.
”ކޮބާ ރުއާ؟“ ޒައްޔާންގެ އަޑުގައި ވަނީ ނުތަނަވަސްކަމެވެ. ލިއަމް ދައްކާލީ އެތެރެއެވެ. ”އެނީ އަޕްޑޭޓް؟“ ރުއާނާ ފެނުމުން ހަމަޖެހިލަމުން ޒައްޔާން އަހާލިއެވެ. ލިއަމްއަށް އެއްޗެއް ނުބުނެވެނީސް ވަދެގެން އައީ އުވެއިތްއެވެ. އޭނާ އިޝާރާތް ކޮށްލީ އައުމަށެވެ. ދެޒުވާނުން ބޭރަށް ނުކުތް ހިނދު ސިހިއްޖެއެވެ.
މައި ގޭޓުގެ ކައިރީގައި ކަޅު ހިޔަންޏެއް ފަދައިން އެހުރީ ބިލާލްއެވެ. އެހިސާބާއި ހޯލަށް ވަންނަން ހުރި ދޮރާއި ދެމެދު ފުދޭވަރަކަށް ދުރުމިން ހުއްޓެވެ. ނަމަވެސް، އަނދިރީގެ ތެރެއިން ވެސް ސާފް ކޮށް އެމީހުންނަށް ބިލާލް ފެންނަމުން ދިޔައެވެ. އެމޫނުމަތީގައި ދުވެލަ ދުވެލަ ހުރި ވިހަ ހިނިތުންވުން ސިއްރެއް ނުވެއެވެ. ލޮލުން ފާޅުވާން ހުރި މަކަރުވެރި ކުލަވަރުން ކޮންމެ ފަދަ ނުރައްކަލަކަށް ވެސް އޭނާ ތައްޔާރުކަން ހާމަކޮށްދެއެވެ.
”ކޮބާ ކަލޭގެ ބޭނުމަކީ؟“ ބިލާލްގެ މޫނު ފެނުމާއި ލިއަމްގެ ލޭ ކެކިގަތެވެ. އެ ރުޅިން ދިޔައީ ތުރުތުރު އަޅަމުންނެވެ. ދެމީހުންގެ ދެމެދުގައި ހުރި ދުރުމިނާއި އެކުވެސް ދައްކަމުން ދިޔަ ވާހަކަތައް އެކަކު އަނެއްކަކުގެ ކަންފަތައް ނުހަނު ސާފެވެ.
”ހަމަ ނޭނގެނީތަ؟ ހަހަހަހަ.. ކަލޭ ރީތިކޮން ރުއާނާ ހަވާލު ކުރާނީތަ ނޫނީ އަހަރެމެންގެ ބާރު އިޙްސާސް ކޮށްދޭންވީތަ؟“ ބިލާލްގެ ބޮޑާ ހިނިގަނޑުފަޒާގެ ތެރޭގައި ގުގުމާލި ހިނދު ލިއަމްއަށް ދަތްކުނޑިވިކައިލެވުނެވެ. އަތް މުށްކަވާލެވުނެވެ. އޭނާގެ ހިތުގައި އުފެދުނު ރުޅިވެރިކަން އިންތިހާއަށް ދިޔައިރު، ކޮންމެ ފަދަ ގުރުބާނީ އެއްވެސް ރުއާނާގެ ހިމާޔަތުގައި ވުމަށް އޭނާ ހުރީ އަޒުމް ކަނޑައަޅައިގެންނެވެ.
”އޭގެ ކުރިން އަހަރެމެންގެ އަތް ދަށުވާނީ ކަލޭ.. ރުއާ އާއި ހިސާބަށް ދިއުމުގެ ކުރިން ފުރަތަމަ ކަމަކަށް އަހަރެން މަރާލާފަ ދާން ޖެހޭނީ“ ޒައްޔާންއަކަށް މަޑަކުން ނުހުރެވުނެވެ.
”އެހެންތަ! ހިނގާ ބަލަމާ.. އަދި ނުވޭ ފުއް*ކަށް ..ހަހަ..“
”އިނގިލި ކުރި ޖައްސާލިއަސް އަހަންނަކީ ކާކުކަން އަންގާލާނަން! ކަލޭގެ މައްޗަށް ރުއާގެ އެއްވެސް ހައްގެއް ނެތް!“
”ދެން ކާކު މައްޗަށް ހައްގު އޮތީ! ބަލަ އެއީ އަހަރެންގެ ލެއޭ! އަހަންނާއި ބައްޕަގެ މައްޗަށް ނެތް ހައްގެއް ކަލެއަށް އެބައޮތްތަ! ރީތި ގޮތުގަ މަ ބުނެގެން ނުލިބުނިއްޔާ ހަނގުރާމައަކަށް ވެސް އަހަރެމެން މިތިބީ ތައްޔާރު ވެގެން.. އެނގޭތަ، ކަލޭ ހީކުރީ ކަލެއަށް ރުއާނާއާއި އިނދެވޭނެ ކަމަށްތަ.. ނޫނޭ.. ރުއާނާގެ ކައިވެނި ހަމަޖެހިފަ އޮތީ އޭނާ ދުނިޔެއަށް އައުމުގެ މާކުރިން.. އެހެންވީމަ ބޮނޑިއެއް ނުބޮއެ ދުރުގަ ހުރޭ.. ހަނދާން ނެތުނީތަ އަމިއްލަ މައިންބަފައިންނަށް ވެގެން ދިޔަ ގޮތް..ހަހަހަ“ ލިއަމްއަށް އަލިފާނުގެ ބެލުމަކުން ބަލާލުމަށްފަހު ލޯމަތިން ބިލާލް ގެއްލިއްޖެއެވެ. ލިއަމްއަށް ކެތެއް ނުވިއެވެ. ނަފްސަށް އަރައިގެން ރުޅިގަނޑު އޭނާގެ މުޅި ސިކުނޑި ގަނޑުބަޑު ކޮށްލިއެވެ. ބިލާލް އަދި އޭނާގެ އަތުން މަރުވާނެއެވެ. އެދެއަތުން ބިލާލްގެ ހަށިގަނޑާއި ބޮލާއި ދެތަން ނުކުރެވިއްޖެނަމަ އޭނާގެ ނަމަކަށް ލިއަމްއެއް ނުކިޔާނެއެވެ. ހިތާއި ހިތުން ވައުދުވި އިރު އުޅެވުނީ ބިލާލް ދިޔަ ދިމާލަށް ދުއްވައިގަންނާށެވެ. އެހެނަސް ޒައްޔާންއާއި އުވެއިތް އޭނާ ހިފެހެއްޓިއެވެ. ރުއާނާގެ ކައިވެންޏޭ ބުނެ ބިލާލް ދެއްކި ވާހަކައިން ލިއަމްއަށް މަޑުން ހުންނަން އުނދަގޫވީއެވެ.
”ކާމް ޑާއުން! ކާމް ޑާއުން ! މިފަދަ ވަގުތެއްގަ ބުއްދި އިސްކުރޭ.. ހަމަޖެހިލާ.. ބިލ-“ ޒައްޔާން ވާހަކަ ދައްކަ ދައްކާ ހުއްޓާ އަނެއްކާ ވެސް ބިލާލް ފެނިލިއެވެ. ނަމަވެސް މިފަހަރު އޭނާ އެކަންޏެއް ނޫނެވެ. މަގަތުގައި އިތުރު ބަޔަކު ތިއްބެވެ. ލިއަމް ސިހުނީ އެމީހުންގެ ފައިދަށުގައި ކަޅުކުލައިގެ ބޮޑު ކޮތަޅެއް އޮއްވާ ފެނުމުންނެވެ. ލިއަމްއަށް ބަލައިލެވުނީ ޒައްޔާންގެ މޫނަށެވެ.
”މީ ކަލެއަށް އަހަރެން ގެނައި ހަދިޔާ! އެކަމަކު ލިބޭނީ އަހަންނަށް ރުއާނާ ދީގެން!“
”ކަލޭ ***! ތި އެއްޗެއް ހިފައިގެން ކަލޭ މިތަނުން ރައްކާވޭ!“
“ ސުލްހައިގަ ނުދޭނަން ދޯ! މައްސަލައެއް ނެތް! ދެން އޮތީ ކަލޭގެ ތިނިންމުމާއި މެދު އަމިއްލައަށް ހިތާމަ ކުރާ ވަގުތު!“ ބިލާލް ކޮށްލި އިޝާރާތާއި އޭނާގެ ފައުޖުން އިތުރު ބަޔަކު ލޯމައްޗަށް ފާޅުވިއެވެ.
ލިއަމްގެ އަތް މުށްކެވިގެން ދިޔައިރު، އުވެއިތައް އިޝާރާތެއް ކޮށްލިއެވެ. އެ ނަޒަރު ނަގައިގަނެވުނު ހިނދު އުވައިތުގެ އެންމެ އިޝާރާތަކަށް ބަލަބަލާ ތިބި އެމީހުންގެ ވަފާތެރި ލަޝްކަރުގެ އައިނައި ދިމާލެއް ނޭނގި ބިލާލް މެންގެ ވަށާލައިފިއެވެ.
”ހަހަހަ.. ހާދަ ހަޑިކޮން މިކަން ނިންމާލަން ތިއުޅެނީ“ ބިލާލްގެ މޫނުމަތިން ޖެހިލުންވީ ކަމުގެ ކުޑަވެސް އަސަރެއް ފާޅެއް ނުވެއެވެ.
”އަހަރެމެން މަޑުކުރާނަން.. އެއިން މީހަކު އެތެރެއަށް ވަދެއްޖެނަމަ ރުއާ ސަލާމަތް ކުރެވޭނެ ހަމައެކަނި މީހަކީ ތިއީ.. އެމީހުންގެ ބާރުހުރި ސިހުރުވެރިންގެ ކައިރީގަ މާ ބޮޑު ކަމެއް ނުކުރެވުނު ނަމަވެސް އަހަރެމެންނަށް ވީ ވަރެއް ކުރާނަން“
”މައްސަލައެއްނެތް.. އަޒްލާން ނޫނީ ޒަބީގް ކައިރީގަ ބުނޭ އަންނަން.. އެތެރެއަށް ނުވަދެވުނަސް ރަޒަލް އާއި އައްމާރު ކައިރީ ބޭރުގަ މަޑުކުރަން ބުނޭ! މިފަހަރު ބިލާލް ދުލެއް ނުކުރާނެ! އެތެރެއަށް މިދަނީ.. އެންމެ ތަންކޮޅެއް ވެސް ދޫކޮށްލައިގެން ނުޥާނެ.. މުޅިތަން ގާޑުކުރާތި!“ ޒައްޔާންއަށް ރައްދު ދީފައި އެންމެފަހުގެ އިންޒާރު ލިއަމް އެމީހުންނަށް ދިނެވެ. ދެ ޒުޥާނުން ބޯޖަހާލިއެވެ.
”މަ އަންނާނަން ފޯނު ހޯދައިގެން…ބުރޯ މެން ފަށާ“ ޝާއިންއާއި ކީވާން ކާން ދިއުމުން އަދްރެކް އައީ ހޯލަށެވެ. ފޯނު ބާއްވާފައި އޮތް ހިސާބަށް ދިޔައިރު އެތަނުގައި ޔީލާ ހުރުމުން ބަލައި ލެވިއްޖެއެވެ. އެހެން އެންމެން އެކުގައި އުޅުނު އިރު ޔީލާ، ވަކިން މިހުރީ ކީއްވެބާއޭ އަދްރެކްގެ ހިތައް އެރިއެވެ. ޔީލާ ހުރި ގޮތުން އަދްރެކްއަށް ފޯނާއި ކައިރިއެއް ނުވެވުނެވެ. އަނެއްކޮޅުން އޭނާ ހިޔާލަކަށް ގެއްލިފައި ހުރިގޮތުން އަދްރެކް އެތާގައި ހުރިކަމެއް ވެސް ނޭނގުނެވެ.
”އެހެމް.. އެހެމް“ އަދްރެކް ކަރުކެހިލިއެވެ. ޔީލާ ސިހިފައި އިސްއުފުލާލި އިރު އަދްރެކް ހުއްޓާ ފެނުމުން ބަލައިލެވުނެވެ.
”ފޯނު“ އަދްރެކް އިޝާރާތް ކޮށްލީ އޭނާ ލައްވެ ހުރި މޭޒަށެވެ. ޔީލާއާ ބަލައިލިއިރު މޭޒުމަތީގައި ފޯނެއް އޮތްވާ ފެނުނެވެ.
”ސޮރީ..ސޮރީ“ ޔީލާ މާފަށް އެދިފައި ދުރުވުމުން ހީލާފައި އަދްރެކް ދެފަރާތައް ބޯހުރުވާލިއެވެ. ކަމެއް ނޫނޭ ބުނެ ފޯނު ހިފައިގެން ދަމުން ބަލާލި އިރިވެސް ޔީލާ އެހުރިގޮތައް ހުރުމުން އަދްރެކް މަޑުޖެހިލިއެވެ. އޭނާ ވަށައިގެން ނަޒަރު ހިންގާލީ ނޫހް ފެނޭތޯއެވެ. އެކަމަކު އޭނާގެ އެއްވެސް ހިލަމެއް އެތާކު ނުވެއެވެ.
”ހެލޯ.. ކީއްވެ މިތާގަ އެކަނި ތިހުރީ؟“ އަނެއްކާ ވެސް ޔީލާ ސިހުނީ އަދްރެކްގެ އަޑުންނެވެ. މިފަހަރު ބަލައިލި އިރު ޔީލާގެ މޫނުމަތިން ހިސާބެއްގެ ހައިރާން ކަމެއް ފެނެއެވެ. ކީވާންއާއި ލިއަމްއާއި އެކު އުޅުނު ނަމަވެސް، އަދްރެކް އަކީ އޭނާއާއި ވާހަކަ ދައްކާ ޒުވާނެއް ނޫން ކަމުން ހައިރާން ޥާނެ ތާއެވެ. ޔަގީނުން ނުވެފައި ހުރެ ޔީލާ އަމިއްލަ މޭގައި އަތް ޖައްސާލީ ސުވާލު ކުރީ އޭނާއާއި ހޭ އަހާފަދަ ގޮތަކަށެވެ. އަދްރެކް އެއްމިޔަކަނުން ހީލާފައި އައިސް ހުއްޓިލީ ޔީލާއާއި ދެ ފޫޓެއްހާ ދުރުމިނުގައެވެ.
”މިދެން މިތާގަ މަޑުކޮށްލީ؟“ ލުއި ހިނިތުންވުމަކާއި އެކު އޭނާ ޖަވާބުދިނެވެ. އަދްރެކް ހުރީ ކޮސްވެފައެވެ. ޔީލާއާއި އޭނާ އާއި މެދު ހަމަނުޖެހުމެއް ހިނގާފައި ނެތަސް ، އޭނާ އަޑުއަހާ ފައިވާ ގޮތުން ޔީލާއަކީ ބޮޑާ މިޒާޖެއްގެ ވެރި އަންހެން ކުއްޖެކެވެ. ހޮސްޕިޓަލުގައި ވެސް އޭނާގެ ރުންކުރު މިޒާޖުގެ ސަބަބުން ބައެއް މުއައްޒަފުން އެ ވާހަކަ ދައްކާފައިވާ އަޑުވެސް އަދްރެކް ވަނީ އަހާފައެވެ. ނަމަވެސް މިވަގުތު ކުރިމަތީގައި ފެންނަން މިހުރި ޔީލާގެ މޫނުމައްޗަކުން އެފަދަ ކުލަވަރެއް ފެންނާކަށް ނެތެވެ. ހީލީވެސް ހިތްހެޔޮ ގޮތަކަށެވެ.
”އޯހް.. އެހެން މީހުންނާއި ވަކިން ހުރީމަ“އަދްރެކް ބުނެލިއެވެ.
’ޔާހް، އެކޮޅުގަ ހުރެހުރެފަ މިއައީ އިށީންނަން ވެގެން.. އެކަމަކު މި އޭރިއާގަ ހުރި ގޮނޑިތައް ދެންމެ ގެންގޮސްފި ކީވާން މެން.. އެހެންވެ އިއްތާނުލެވިފަ މިހުންނަނީ“
”އާންން ޔެސް..މްމްމް.. ކައިފިންތަ؟ ނުކަންޏާ އަންނަގަ ޖޮއިން ވެލަން .. އަހަރެމެން ތިން މީހުން މިއުޅެނީ.. ދެން ރުއާ ކަންނޭގެ އިނީ“
”ރުއާނާ؟ މޭބީ އޭނާ ހިތްހަމަ ނުޖެހިދާނެ އަހަރެން ދަނިކޮން“ ޔީލާ ހީލިއެވެ. ނޫހްގެ ދިފާއުގައި އޭނާ ވާހަކަ ދެއްކި ދުވަހުގެ ފަހުން، ރުއާނާ ބަހައްޓާ ދުރުމިން ފާހަގަވެއެވެ. އަދި އިޒްވާގެ ކަންތަކުގައި ލިބިފައިވާ ޝޮކުން އަރައިނުގަނެވި ހުރެ އެތަނުގައި ވެސް ނޫހް ދިފާއުކޮށްގެން ވާހަކަ ދެއްކުނީ ރުއާނާގެ ކުރިމަތީގައެވެ. ނުބުނި ނަމަވެސް ރުއާނާ ހިތްހަމަ ނުޖެހޭނެކަން އޭނާއަށް އެނގެއެވެ. ލިއަމްއާއި ރުއާނާ ގުޅިގެން އުޅޭހެން ހީވެއޭ މިލާންގެ ފުށުން އަހާފައިވާތީ އޭނަ ބޭނުންވަނީ ވެސް ރުއާނާއާއި ވާހަކަ ދައްކާށެވެ. ގުޅުން ރަނގަޅުކޮށް އެދެމދުގައިވާ ނުތަވަސްކަން ފިލުވާލާށެވެ. ނަމަވެސް ވެފައިވާ ގޮތުން ހިސާބަކަށް ލަދުގަންނަނީއެވެ.
”ވައި؟ ނޯވޭ.. ޝީ އިޒް ދި ބެސްޓް ހަމަ… ކަމް.. އޭނަ އެކަނި އަންހެން ކުއްޖަކަށް އިނީމަ، މަ އައި އިރު ކީވާންގެ ކައިރީގަ ކިޔާ އާލިއާ ގެންނާށޭ ވެސް“
އަދްރެކް ދައުވަތު ދިނުމުން ޔީލާއަށް ނުގޮސް ހުންނާކަށް ނުކެރުނެވެ. ލަދުން ހުރެވެސް ބޯޖަހާފައި އޭނާގެ ފަހަތުން ދިޔައެވެ. ދެމީހުން ވަތްއިރު ލިއަމްއާއި ލޫކްވެސް އިށީންނަނީއެވެ.
”ކޮން ކަހަލަ ބަލި މަޑުކަމެއްގެ އަލާމަތެއް“ އަދްރެކްއާއި ޔީލާ އެކުއެކީގައި ފެނުމުން ޝާއިންއަކަށް މަޑަކުން ނީނދެވުނެވެ. އެކުވެރިންނަށް ދައްކާލަމުން ނުހަނު މަޑުމަޑުން ވާހަކަ ދެއްކިއެވެ.
ގޮނޑީގައި އިން އިރު ވެސް އެމީހުން ދައްކަމުން ދިޔަ ވާހަކަތަކަކަށް ލިއަމްއަކަށް ސަމާލުކަމެއް ނުދެވުނެވެ. އޭނާއަށް ބެލެމުން ދިޔައީ އާލިއާ ގާތު މަޑުކޮށްލައިގެން ހުރި ރުއާނާއަށެވެ. ހިތްތެޅެމުން ދިޔައިރު ވެސް ލިއަމް ބެލީ މޫނުމަތިން އެކުލަވަރު ނުދައްކާ ވޭތޯއެވެ.
“އައި ގޮޓް މައި ގާލް“ އަދްރެކްއާއި ޔީލާ ވަނުމުން އެމީހުންގެ ފަހަތުން ރުއާނާއާއި އާލިއާ ވެސް އައެވެ. ޔީލާ ފެނުމުން ދެ އަންހެންކުދިން ވެސް ހައިރާންވެ ބަލައިލެވުނެވެ. ނަމަވެސް މޫނުން އެކަން ނުދައްކާ ހީލިއެވެ. ކީވާންގެ ގާތުގައި އާލިއާ އިށީން އިރު އާލިއާ އާއި ލިއަމްގެ ދެމެދުގައި ހުސްކޮން ހުރި ގޮނޑީގައި ރުއާނާ އިށީންދެލިއެވެ. ”ވަޓްސް ރޯންގް؟“ ލިއަމްގެ މޫނުމަތީގެ ކުލަވަރު ނަގައިގަނެވުނު ހިނދު ރުއާނާ ވާހަކަ ދެއްކިއެވެ.
”ނަތިންގް..“ ލިއަމް ހީލަމުން ރުއާނާގެ މަޑުއަތްތިލާ އޭނާގެ ދެއަތުގެ ތެރޭގައި ރަނގަޅަށް ފިތާލިއެވެ. ރުއާނާ ދެލޯ ހަނިކޮށްލައިގެން އިނދެވެސް އިތުރު ސުވާލެއް ނުކުރެއެވެ. ދެން ލިއަމް ނަޒަރެއް ދިނީ އަދްރެކްއަށެވެ. އަދްރެކް ބަލައިލުމުން ލޮލުގެ އިޝާރާތުން ބުނެލީ ފޯނު ބެލުމަށެވެ. ވަނުމުގެ ކުރިން އޭނާ ކޮށްފައިވާ މެސެޖް އަދްރެކްއަށް ނުފެންނަކަން ޔަގީންވީ މާ ހިނިއައިސް އޭނާ އިނުމުންނެވެ. އަދްރެކް ފޯނު ނެގުމަށްފަހު ލިއަމް ބުނެލި ގޮތައް ބަލައިލިއެވެ. އެހިނދު އެ މޫނަށް ވެރިވެގެން ދިޔަ ސިހުމާއި އެކު ލިއަމްގެ މޫނަށް ބަލައިލިއެވެ.
އެމީހުންގެ ހިދުމަތުގައި ތިބި ވޭޓަރުން ކާއެއްޗިހި ގެންނަން ފެށުމުން ލަސްނުކޮށް ބެލީ ކެވޭތޮއެވެ. ގިނައިރު ނުކައި ހުރުމުން، ކާ ތަކެތީގެ ވަހާއި އެކު ބަނޑުހައި ކަމުގެ އިޙްސާސް ކުރިގެން ދިޔައީ އިންތިހާއަށެވެ. އެންމެންނަށް ތިބެވޭހެން ހުރި މޭޒެއް ކަމުން، ކެއުމުގެ ތެރެއިން ތަފާތު ވާހަކަތައް ދެކެވެމުންދިޔައެވެ. މަޑުމައިތިވެފައި ތިބީ ލިއަމްއާއި އަދްރެކްއެވެ. ކެއުމުގެ ފޯރިއެއް ވެސް ދެމީހުން ކުރެ އެކަކުގެ ކިބަޔަކު ވެސް ނެތެވެ. ދެމީހުން ދެމީހުންނަށް ފޯނުން މެސެޖް ކުރަމުން ދިޔަ މަންޒަރުން އެހެން މީހުންގެ ލޮލުގައި އަޅައެއް ނުގަތެވެ. ނަމަވެސް އަދްރެކްއަކީ އެންމެ ސަކަރާތް ގަންނަ ޒުވާނާއަށް ވެފައި އެހާ މަޑުން އިނުމުން އެކަމާއި ދިމާ ކުރުމުގެ ގޮތުން އެންމެ ފުރަތަމަ އެއްޗެއް ބުނީ ޝާއިންގެ އަންހެނުން މިލެނީއެވެ.
”މީނަ ކިއްވެތައެހާ މަޑުމޮޅި ވެފަ މި އިންނަނީ؟ ކޮބާތަ އެއްކަލަ އަނގަ.. އެޑީ“ މިލެނީ ހީގަތުމުން ފޯނު އަތުން ދޫކޮށްލާފައި އަދްރެކް ހީލިއެވެ. ނުތަވަސް ކަން ފޮވުމުގެ ގޮތުން ވާހަކައެއް ފެށިނަމަވެސް ބައެއްފަހަރު ހީލައިގެން އިންނަން ވެސް ދިޔައީ އޭނާއަށް އުނދަގޫ ވަމުންނެވެ. އަދްރެކްއަށް ވެސް ބެލެމުން ދިޔައީ ރުއާނާއަށެވެ.
”ޔީލް ރަނގަޅަށް ކައްޗޭ.. ހިކިކަމުން އިޒީއަށް ދޫ ނުކުރޭ މިޙާރު“ ލިއަމް ވާޙަކަ ދެއްކީ ޔީލާއާއެވެ. ޔީލާ ވަކި އެއްޗެއް ނުބުނެ ލުއި ހިނިތުން ވުމަކާއި އެކު ބޯޖަހައިލިއެވެ.
”ދެން އޮތީ ތިދެމީހުން.. ކޮބާ ޕާޓީގެ ތީމްއަކީ“ އަދްރެކް ބަލައިލީ ކީވާންއަށެވެ. އާލިއާ ހިމޭންވެ އިންއިރު ކީވާން ބަހެއް ނުބުނެ ހީލަ ހީލަ އިނެވެ.
”މަށައް ފެންނަނީ ކައިވެނީގެ ކުރިން އެ މަންޖެ ލަދުފިލުވަން“ އަދްރެކްގެ ސުޥާލަށް ރައްދެއް ނުދެވި އުޅެނކޮން ދިމާކޮށްލުމުގެ ގޮތުން ލޫކް ބުނެލިއެވެ. އެހިނދު އެންމެންގެ ހުނުމުގެ އަޑު އިވިއްޖެއެވެ.
”އޭ އަދި ހަނދާން ނެތިފަ މިހުންނަނީ.. އެއްކަލަ ބޭސްފިހާރައިގަ އިނދެ އެންނު މަންޖެއެއް.. އެޑީގެ އެކްސް.. އަހަރެންގެ ފްރެންޑް.. އޭނަ ވެސް މެރީ ކުރަން އެބައުޅޭ.. އެބައިން ކާޑު ފޮނުވާފަ.. ބުނަނީ އެޑީ ކައިރީގަ ބުނައްޗޯ އަންނާށޭ“ މިލެނީ ހަނދާން ވެގެން ބުނެލިއެވެ.
”ހޫމްމް މަ އެބައުޅެންތަ ކުރާނެ ކަމެއް ނޭނގިގެން.. މޮޔަ ވެގެން އުޅޭ އަންހެނެއް“ އަދްރެކް އަނގަޔަށް ޖައްސާލީ ފަކުރު އެއްޗެއް ފެނިގެން ޖައްސާލާ ފަދަ ވައްތަރެކެވެ.
”ކޮން ބޭސް ފިހާރައެއް.. އެއްކަލަ ޝޮޕްތަ އެއީ؟ އޯހްހް ހަނދާންވެއްޖެ ލިއަމްގެ ބޭސް ފިހާރަ ދޯ “ ރުއާނާ ހަނދާންވެގެން އެހިއެވެ. ރުއާނާ އެވާހަކަ ނެގުމުން ޝާއިން އާއި ކީވާންގެ ހުނުމުގެ އަޑު ގަދަވިއެވެ. ލިއަމްވެސް ހެވިފައި އިން އިރު ރުއާނާގެ މޫނަށް ބަލާލަމުން ދެފަރާތައް ބޯހުރުވާލީ އެވާހަކަ ނުދައްކާށޭ ބުނާފަދައަކުންނެވެ. ރުއާނާ ލާނެތް ހިންޏެއް ހީލައިގެން އިނދެ ދެފަރާތައް ބޯހޫރުވާލިއެވެ.
“އަހަހަހަ.. އަދިވެސް ހިނިއާދޭ އެރޭ މަތިން ހަނދާންވިއަސް.. ރުއާ ކީކޭ ހިތައް އެރީ ..ހަހަހަ“ ކީވާން އިނީ ހީހީ ގޮސް ލޮލުން ފެން އައިހެވެ.
”އަސްލު ކާކު ކަމެއް ނޭނގިފަ ހުރެވުނީ ފުރަތަމަ.. ވެން އައި ނިއު، އިޓް ވޯޒް ހިމް ކިރިޔާ ހިނިގަނޑު ހޯލްޑް ކޮށްލެވުނީ.. ޖެހިގެން އައި ދުވަހު ތި ތިންމީހުން ލިފްޓުން ފެނުނީމަ ވެސް އިސްދޮށައް ޖެހީ ނުހޭންވެގެން“ ރުއާނާއަށް ވެސް ދިޔައީ ހެވެމުންނެވެ. ލިއަމް އިންގޮތުން ވަކިން ހެވުނެވެ.
”ދޮންބެ ކީއްކުރި.. ކިޔައިދީބަލަ .. މިހާރު އަޑުއަހާ ހިތްވެއްޖެ“ އެމީހުން ދައްކަމުން ދިޔަ ވާހަކައެއް ނޭނގުނު ނަމަވެސް ލޫކް އިނީ އަޑުއަހާ ހިތްވެފައެވެ.
”ގާލްސް ތިއްބަ ނުކިޔޭނެ އެންނު.. ބޯއިސް އެކަނި ވީމަ “
”ހޫމް ގާލް އެއްގެ ކުރިމަތީގަ ތިމީހުން އެ ސަކަރާތް ޖެހި އިރު ލަދެއް ނުގަނޭ ދޯ ހަހަހަ“ ޝާއިންއަށް ރައްދު ދިނީ މިލެނީއެވެ. އެސަކަރާތެއްގައި ތިއްބާ އިޒްވާއާއި އީތަންވެސް އައިސްފިއެވެ.
”ކޮބާ މިރޭ އޮތީ ދޯ؟“ އީތަން އާއި އިޒްވާގެ މޫނަށް ވަކިވަކީން އަދްރެކް ބަލައިލީ ދިމާ ކުރާފަދަ ގޮތަކަށެވެ.
”ވާހަކަ ނުދައްކާ މެރީ ކުރޭ ތި ވެސް.. އެނީވޭސް އީތަން މިމީހުން އެބަ ކޮންމެވެސް އެއްޗެއް ކިޔާ.. ފޮނިކަމުން ނުބުންޏޭ“ ލޫކް ބުނެލީ އަދްރެކްއާއި ޝާއިން އާއި ލިއަމް ދައްކާލުމުންނެވެ. ބޭސް ފިހާރައޭ ބުނެލި ހިނދު އީތަންއަށް ވެސް ނުހުރެވިގެން ހެވިއްޖެއެވެ. އެވާހަކަ އެމީހުންގެ ފުށުން އަހާފައިވާތީ އީތަންއަށް އާ ހަބަރަކަށް ނުވިއެވެ.
”އެވާހަކަ ފަހުން ދޯ.. ސަމްވަން އިޒް ބްލަޝިންގް“ ލިއަމް ދައްކާލަމުން އީތަން އަނެއްކާ ވެސް ފެށީ ހޭށެވެ.
”ރުއާ.. ރިވެންޖް އިންނާނެ..“
”ލައިކް ހައު.. އަހަރެން ލަދުގަންނުވާލީ މެންނު ދެންމެ ސްޓޭޖް މަތިން.. އޭގެ ރިވެންޖް މި ނެގީ.. އެނގޭތަ އައި ހޭވް އަ ޕްރޫފް“ އެދުވަހު ބޭސް ފިހާރަ ތެރެއިން ރުއާނާ ނެގި ފޮޓޯގެ މަތިން ހަނދާންވެ ފޮނިވެލާފައި ބުނެލިއެވެ. ލިއަމްއަށް އެބުނީ ކީކޭކަން ނޭނގުމުން ނިތް އަރުވާލިއެވެ. އެދުވަހު ރުއާނާ ފޮޓޯ ނެގިކަމެއް އަދި އަދަށް ދާންދެން ވެސް ލިއަމް އަކަށް ނޭނގެއެވެ.
”އިޓްސް އަ ސީކްރެޓް.. މިހެން އުޅެފަ ބުނެލާލަނަން އަދި އިނގޭ“ ލާނެތް ކަމާއި އެކު ރުއާނާ ބުނެލިއެވެ.
”ނޯޓީ، ޒައްޔާން އެބަ ގުޅާ. އަންނާނަން އިނގޭ.. އޭގެ ކުރިން ނުނިކުންނައްޗޭ، މިތާގަ އިނދޭ އިނގޭ“ ރުއާނާ ކައި ނިމެންދެން އިންދައި ލިއަމްއަށް ޒައްޔާންގެ ފޯނުކޯލެއް އަންނަން ފެށިއެވެ. ރުއާނާއަށް ފޯނު ދައްކާލުމުން ބޯޖަހައިލިއެވެ. ދިއުމުގެ ކުރިން އަދްރެކްއަށް ރުއާނާ ދައްކާލިއެވެ. އޭނާ ބޯޖަހައިލީ ހާސް ނުވުމަށް ބުނެލި ފަދައަކުންނެވެ.
”އަވަހަށް އަންނައްޗޭ“
ރުއާނާގެ އަޑުއިވުމުން އެ އަތުގައި ލިއަމް ހިފާލިއެވެ. ބޯޖަހައިލަމުން އަތައް ބާރުކޮށްލިއެވެ. ލަސްލަހުން އޭނާގެ އަތުގެ ތެރެއިން ލިއަމްގެ އަތް ދޫވި ހިނދު ރުއާނާގެ ހިތައް ޒާތެއްގެ އުނދަގުލެއްވިއެވެ. އެހާ ނުވަގުތެއްގައި މެއަށް އެފަދަގޮތެއް ވެގެން ދިއުމުން ހައިރާން ވެސް ވިއެވެ. ގޮތް ނޭނގޭ ނުތަނަވަސްކަމެއް ސިކުނޑީގައި ވަށާލި އިރު ނުރައްކަލު ސިގްނަލެއް ދިންފަދައެވެ. އެހެނަސް އެފަދަ އަސަރެއް އެހާ ކުއްލިގޮތަކަށް ކުރަން ޖެހުނު އެއްވެސް ސަބަބެއް ރުއާނާއަކަށް ނުވިސްނުނެވެ. ދެފަރާތައް ބޯހޫރުވާލާފައި ރުއާނާ ހަމަޖެހިލަން މަސައްކަތް ކުރިއެވެ.
****
ބިލާލް އަތުގައި އޮތް ކޮތަޅު ދަމަމުން އައިސް މަޑުކޮށްލީ ޒައްޔާންއާއި ދިހަ ވަރަކަށް ފޫޓު ދުރުގައެވެ. އެހާ ހިސާބަށް ކައިރިވި އިރު ޒައްޔާންގެ ހިތްތެޅިގަތީ ނުބައި ޒާތަކަށެވެ. ކޮތަޅުގެ ބޭރުން ބަލާލިއިރު އެތެރޭގައި މީހަކު އޮތްކަން ޔަގީންވެއްޖެއެވެ. އެތެރޭގައި އޮތީ އިންސާނެއް ނޫންކަން އެނގުނީ އޭނާގެ ބާރުތަކުގެ ބޭނުން ކޮށްގެން ވެސް ކާކުކަން ދެނެގަނެވޭ ގޮތް ނުވީމައެވެ.
”އަނެއްކާ ރާބިއުބޭބެ ބަ؟“ ހިތައް އަރައިގެން ދިޔަ އެއްޗަކުން ހިތްތެޅިގަތެވެ. ބިލާލްގެ ނުބައި ހިނިތުންވުމުން އެކަނި ވެސް އެދިނީ ރަނގަޅު ސިގްނަލެއް ނޫންކަން ޒައްޔާންގެ ހިތް ދެނެގަތެވެ.
”ހޯލްޑް އޮން! ހޯލްޑް އޮން… ގާއީޒް އީޒީ“ އުވެއިތްއާއި ބައިވެރިން ފަހަރަކަށް ވުރެން ފަހަރެއް ބިލާލްއާއި ގާތައް ޖެހެމުން ދިޔުމުން އޭނާ އަތް ހިއްލާލިއެވެ.
”މީ ކޮންކަމެއް؟“ ރުޅިވެރިކަމާއި އެކު ބިލާލް އަހާލިއެވެ.
“މްމްމް ނިކަން ބަލާލަބަލަ… އައި ފީލް ބޭޑް ފޯރ ލިއަމް. އޭނަ އެދިޔައީ ބޭނުން ނުވާ ކަމަށް ބުނެފަ.. އަމިއްލަ މައިމީހާ މުހިއްމެއް ވެސް ނުވި ދޯ…ހަހަހަހަ“
ބިލާލް ބުނެލި ޖުމްލަ އަހާފައި ޒައްޔާންގެ މޫނު ހުދުވެއްޖެއެވެ. ދެލޯ ބޮޑުވެފައި ހުރެވުނެވެ. އަމިއްލަ މީހާގެ ނަފްސް ކޮންޓުރޯލު ކޮށްލަމުން އުވެއިތްއަށް އެ ކޮތަޅު ގެނައުމަށް އެންގިއެވެ. ބިލާލްގެ އަނގައިން ކޮންމެފަދަ އެއްޗެއް ވެސް ބުނެފާނެއެވެ. އޭނާގެ ބަސް ގަބޫޅް ކުރުމުގެ ކުރިން ތެޅެމުން ދިޔަ ހިތް ހަމައަކަށް އަޅުވާލުމުގެ ގޮތުން އަވަސް ނޭވާއެއް ޒައްޔާން ދޫކޮށްލިއެވެ. ބިލާލް ހީގަނެފައި ދުރަށް ޖެހިލުމުން އުވެއިތް އެ ކޮތަޅު، ޒައްޔާންއާއި ހަމައަށް ގެނެސްފިއެވެ. ކޮތަޅު މޮހާލި ހިނދު އެތެރޭގައި އޮތް އަންހެން މީހާ ފެނި ބިރެއް ފެނުނު ފަދައިން ފަހަތައް ޖެހިލެވުނެވެ. އޭނާއަށް ވެގެން ދިޔަ ގޮތުން އުވައިތު ކައިރިއަށް ޖެހިލިއެވެ. އުވައިތުއަށް ވެސް ވެގެންދިޔައީ އެފަދަ ގޮތެކެވެ. ސިހުނު ނަމަވެސް އެ އަސަރުތަކުގެ މައްޗަށް ހަމަހޭވެރިކަން ކުރިއަށް ނެރުނެވެ. ކޮތަޅު ތެރޭގައި އަނިޔާއިން ލެއިން ކަޅިވެފައިވާ އަންހެން މީހާ އޭނާ ދަމައިގަތެވެ. ކަޅުކުލައިގެ ފޮތިގަނޑަކުން މޫނާއި ބޯ ނިވާ ކޮށްލާފައި އޮތް އިރު އޭނާގެ ހޭ ވެރިކަން ހުރިހެނެއް ވެސް ހިއެއް ނުވެއެވެ. އަންހެންމީހާގެ މޫނުމަތީގައި ވީ ފޮތިގަނޑު އުވެއިތް ނަގަން އުޅުނު ހިނދު ބިލާލް އެކަމަށް ހުރަސްއެޅިއެވެ.
”އަދިވެސް މީނާގެ މޫނެއް ނުފެނެއެއްނު.. މީނާގެ މޫނު ބަލަން އެންމެ އައުލާކަން ބޮޑުވާނީ ލިއަމް.. މިޙާރު ކަލޭމެންނަށް ވާ ވަރަށް ވަގުތު ދެވިއްޖެ.. ދެން ހިނގާނީ މަގޭ ބާރު! ހަމަ މިހާރު ލިއަމް ގެނޭ! ބުނޭ އެހެން މީހުން ވެސް ގޮވައިގެން އަންނާށޭ“ ބިލާލްގެ މޫނުމަތީގެ ވިހަ ކުލަވަރު ރުޅިވެރިކަމަށް ބަދަލުކޮށްލިއެވެ. ބިލާލް ކަންކުރަމުން ދިޔައީ އެންމެންނަށް ވަންހަނާ ވެގެން ހުރެ ބިލާލްގެ ކަންފަތް ދޮށަށް ނީލް އިއްވަމުން ދިޔަ އިރުޝާދުގެ ދަށުންނެވެ.
ކުރިމަތީގައި ހުރީ ކޮންމެ މީހަކަށް ވީ ނަމަވެސް އެމީހެއްގެ ފުރާނަ ސަލާމަތް ކުރަން ބޭނުންވެފައި ހުރި ވަރުން ޒައްޔާން ލަސް ނުކޮށް ލިއަމްއަށް ގުޅިއެވެ. ގިނައިރެއް ނުވެ ލިއަމް އައެވެ. މިފަހަރު އޭނާގެ ފަހަތުން އަލާނިއަލްއާއި ޔަޒަކްގެ އިތުރު ކައިވަން ވެސް އައިފިއެވެ. އަދި ޔޫމީންއާއި އީން ވެސް އައިސް ތިއްބެވެ. ވާނުވާ ނޭނގި ތިބެ ޔާސިރްއާއި ވެސް އައްޒާމް ވެސް އައިސްފިއެވެ.
”ޔޯ ގިފްޓް!“ ބިލާލް ފަހަތައް ޖެހިލިއެވެ. އޭނާގެ އިޝާރާތައް ބަލަބަލާ ތިބި ލަޝްކަރުގެ ބާކީ ތިބި މީހުންވެސް އެހިނދު ފާޅުވިއެވެ. އެމީހުންގެ ބައިބޯ ކަމުން ލިއަމްއާއި ޒައްޔާން ވެސް ދިޔައީ ސިހިގެންނެވެ. އެއީ ޔަގީނުންވެސް އެއިން އެކަކު ވެސް އުއްމީދު ކުރި މަންޒަރެއް ނޫނެވެ.
”އަހަރެމެންގެ މީހުން ކުރެ އެންމެ މީހަކަށް އެމީހުންގެ ވިހި މީހުން އެބަ ތިބި.. އާހްހް..ޒަބީގް ވެސް އައިސްފި… އެކަމަކު އޭނައަކަށް ވެސް ނުވަދެވުނު“ އުވެއިތްއަށް ހިންދިރުވާލެވުނެވެ.
”ކީއްވެ ކުރިން ނުބުނީ“ ބިލާލްގެ މީހުންނަށް ދެވުނު އެންމެ ނަޒަރަކުން އަލާނިޔަލް ގޮތް ހުސްވިއެވެ. އެމީހުންގެ ގިނަކަމުން މުޅި މާހައުލު ހީވަނީ ކަޅުގެ ސާލެއް ލެވިފައެވެ ވާހެންނެވެ. ވައިރޯޅިތައް ގަދަވެ މާހައުލުގެ ފިނީގެ މައްޗަށް ގަދަ ހޫނު ކުރި ހޯދައިފިއެވެ. ސްނޯގެ ސަބަބުން ތެތްކަން އެކުލެވިފައވާ ފަތްތައް ފަޒާގެ ތެރޭގައި އެގޮތް މިގޮތައް އެނބުރިގަތްގޮތުން ހިތްތަކަށް ސިހުންގެނުވައިފިއެވެ. އެކަކު އަނެއްކަކަށް އަވަސް ނަޒަރެއް ދެވުނީ ދެން ހަދާނީ ކިހިނެތްހޭ އަހާފަދައަކުންނެވެ. ލިއަމްގެ މޫނުމަތިން ވަކީން ބޮޑަށް މާޔޫސްކަން ފެންނަމުން ދޔައެވެ. އޭނާގެ ވަފާތެރި އެކުވެރީންގެ އެންމެ ބާރުގެ ގޮތުން ގަދަ ފަދަ ލަޝްކަރު އޮތީ ތަނަށް ނުވަދެވިފައެވެ.
ބިލާލް ކޮށްލި އިޝާރާތާއި އެކު ލިއަމް ހުއްޓިލީ އަންހެން މިހާގެ ގާތުގައެވެ. އޭނާގެ މަޑު ކުކުރުމުގެ އަޑު ކަންފަތުގައި ހަރުކައިގެން ދިޔަ ހިނދު ލިއަމްގެ މެޔަށް އުނދަގޫވިއެވެ. ހިތް އަވަސްވެގަތެވެ. ލަސްލަހުން ފޮތިގަނޑު ހިއްލާލި ވަގުތު ލިއަމްގެ މޫނު ހުދުވިއެވެ. ދެފަރާތައް ބޯހޫރުވާލެވުނެވެ.
”ނޫން.. ނޫން.. މަ..ން..މާ“ ލިއަމްގެ ދެލޯ ބޮޑުވެގެން ދިޔައެވެ. ކުރިމަތީގައި ހަރާކާތެއް އެއޮތީ ޒީވާއެވެ. ލިއަމް ތުރުތުރު އަޅައިގަތެވެ. އަހަރުތަކެއް ވެގެން ދިޔަނަމަވެސް އެ ސޫރަ ލިއަމްއަށް އޮޅޭނެހެއްޔެވެ. ބަނޑުއަޅާ ވިހޭ މައިމީހާއެވެ. އޭނާގެ ސިކުނޑީން ކަމެއް ނަގައިގަނެވޭ ވަރަށް ވުރެން ހާލަތު ދަށެވެ. ތެޅިގަންފައި އުނގުމައްޗަށް ޒީވާ ލެވުނު ހިނދު، އެ މަންޒަރު ފެނި އެހެން މީހުން ވެސް ރޮމުން ރޮމުން އެދިމާލަށް އައިސްފިއެވެ.
ލިބިފައިވާ ޝޮކުގެ ތެރޭގައި ހުރިހާ އެންމެން އަރަގުވެފައި ވަނިކޮން އެވަގުތު ކޮޅުގެ ބޭނުން ބިލާލް ނުހަނު ރަނގަޅަށް ހިފައިފިއެވެ. އެކަކުވެސް ނުވިސްނާ ހުއްޓާ އެތެރެއަށް ދެމިގަތީ ބިލާލްއާއި އޭނާގެ މީހުންގެ ތެރެއިން މަދު ބައެކެވެ. ބާކީ ތިބި މީހުން ހޯލާއި ގާތް ވެ ދޮރުތައް ބަންދުކޮށްލީ އިތުރު މީހަކަށް އެއްވެސް ކޮޅަކުން އެތެރެއަށް ނުވަދެވޭނެ ފަދަ ގޮތަކަށެވެ.
”ނޯ.. ނޯ .. ރުއާ!… ލިއަމް، ރުއާ!“ ވަމުން ދިޔަ ގޮތް ފުރަތަމަ ނަގައިގަނެވުނީ އުވެއިތުއަށެވެ. ބިލާލްގެ ސަބަބުން ނުވަދެވިފައި ތިބި އެމީހުންގެ މީހުން ވެސް އެތެރެއަށް ވަދެގަނެފިއެވެ.
”ލިއަމް ރުއާ!ލިއަމްމް!“ ލިއަމްގެ އަތުގެ ތެރޭގައި އޮތް ޒީވާ ދަމައިގަނެ، އަލާނިއަލް ހަށީގައި ހުރި ބާރެއްލާ ހަޅޭއްލަވައިގަތެވެ. އެއަޑު ވައިގެ ތެރޭގައި ގުގުމާލިއެވެ. ހުއްޓިފައި ހުރި ލިއަމްގެ ގައިގާ އަތުން އަޅާ ޔަޒަކު އެތެރެއަށް ކޮއްޕާލިއެވެ. ލިއަމްގެ ފަހަތުން އޭނާ ވެސް ދުއްވައިގަތެވެ. ހޯލުގެ ތެރެއިން އިވެމުން ދިޔައީ ވޭނީ ހަޅޭކާއި ރުއިމުގެ އަޑުތަކެވެ. މުޅިތަން ކަޅާއި އަޅިފުސް ދުމުން ފުރިފައިވީ އިރު އެހުރިހާ އެންމެންގެ އަޑު ތަކުގެ ތެރެއިން ވަކިން ރުއާނާގެ އަޑު ލިއަމްގެ ކަންފަތުގައި ޖެހުނެވެ. ލިއަމްގެ ފަޔަށް ބާރު ލިބުނީ އާދަޔާއި ހިލާފަށެވެ. ވަތް އިރު ބިލާލްގެ އަތް ދަނޑިމަތީގައި އޮތީ ރުއާނާއެވެ. އެއްވެސް ހަރަކާތެއް އެ ހަށިގަނޑަކުއެއް ނުވެއެވެ. “އޭތްތް!“ ކަރުފަޅައިގެން ދާފަދަ ބާރުހުރި ހަޅޭއްކެއްގެ އަޑު ލިއަމްގެ އަނގައިން ބޭރުވިއވެ. އެދިމާލަށް ދުއްވައިގަތެވެ. އެހެނަސް އޭރު މާ ބޮޑަށް ވެސް ލަސްވެއްޖެއެވެ.
އެ ނުބައި ހިނިތުން ވުމުގައި ހުރެ ރުއާނާ ގޮވައިގެން ކުޑަދޮރުން ބޭރަށް ދެމިގަތެވެ. އެމީހުންގެ ފަހަތުން ލިއަމް ނުކުމަންނަށް ކުރި ހުރިޙާ މަސައްކަތެއް ބޭކާރު ވެއްޖެއެވެ. ބަނޑައް އަރައިގެން ތޫނު ހަމަލާއާއި އެކު ހަށިގަނޑަށް ހުއްޓުން އެރިއެވެ. ބަލާލިއިރު ބަނޑަށް ވަދެފައިވާ ތޫނު ދަގަނޑު ފެނުނެވެ. އެހިސާބުން ލޭގަނޑު އޮހޮރިގެން އަންނަމުން ދިޔައެވެ. ބޮޑުވެފައިވާ ދެލޮލުން ކަރުނު ފައިބަމުން ދިޔައިރު، ހަށިގަނޑުން އެކީ ބާރު ހުސްވެ އަރި އަޅާލިއެވެ.
****
(ނުނިމޭ)
Comments (3)
Kudusays:
ފެބްރުއަރީ 15, 2026 at 13:54Whatttt
Justtt whattt😱😱
Kiwisays:
ފެބްރުއަރީ 15, 2026 at 14:41Nooooo🥹. What did you do to ruaanaa. And oh god liam ah dhera gotheh nuhadhahche plsss. Argh.. dhen hama jehumeh nulibeyne aneh part kiyaafa noonee aargh..
Liusays:
ފެބްރުއަރީ 15, 2026 at 19:40V reethi mi part ves
Ma sha allah
Plx dont make them separate 😭☹️🤍