މި ޖިސްމުގާ ވަނީ 34

”މިސް މަހާ؟“ އެނދާއި ދުރުނޫން ހިސާބެއްގައި، ކުޑަދޮރުގެ ދާރާގައި ލެނގިލައިގެން ހުރި ޒުވާން އަންހެންކުއްޖާ ފަސް އެނބުރިލީ ކޮޓަރި ތެރެއަށް ވަތް ނަރުހުގެ އަޑުންނެވެ. ދިގު އިސްކޮޅެއް ހުރި ރޫފަ ރީތި އަންހެން ކުއްޖެކެވެ. ހުދު ދޮންކަމެއް ހުރި ހަންގަނޑު އޮމާން ކަމުން ވިދުމެއް ހުއްޓެވެ. ކަޅުކުލައިގެ ރާޅުބާނީ އިސްތަށިކޮޅު އޮތީ ވިހުރެން ދޫކޮށްލާފައެވެ.  ނަރުސް އަންހެންމީހާގެ އަޑަށް ބަލާލި ނަމަވެސް މަހާގެ ފުރިހަމަ ސަމާލުކަން ހުއްޓިފައި ހުރީ އެނދުގައި އޮތް  ދިރުންނެއް މަސްގަނޑަށެވެ.

”އެއްވެސް ކުރިއެރުމެއް ނާދޭ… ހަމަ ކުރިންވެސް އޮތް ހާލަތުގަ“ މެދު އުމުރުގެ އެ ނަރުސް މީހާ ވަރަށް ރުންކުރު ރާގަކަށް ބުންޏެވެ. އޭނާގެ އަޑުގައި އެއްވެސް ކަހަލަ އޯގާތެރިކަމެއް ނެތެވެ. އެ މަރުތަޅު އެޅިފައިވާ ބަސްތަކަށްފަހު، އެއްވެސް އިތުރު ތަފްސީލެއް ދިނުމެއް ނެތި ކޮޓަރިން ނުކުމެގެން ހިނގައްޖެއެވެ. މަހާގެ ހިތުގައި އުފެދުނު ޝަކުވާތައް ދުލާ ހަމައަށް ނައީ އޭނާގެ ކެތްތެރިކަމުގެ ސަބަބުންނެވެ. ނަމަވެސް އޭނާގެ މޫނުމަތިން ނުރުހުންތެރިކަން ފާޅުވިއެވެ.

”އެޓްލީސްޓް ވީ އަރ ޕޭއިން އެވްރީ ސާވިސް، ދޭ އޮފަރ“ މޭޒު މަތީގައި ހުރި ޖޫސްޕެކެޓުން ތުމުގައި ޖަހައިގެން އަނެއްކާވެސް މަހާ ގޮސް ހުއްޓިލީ ކުޑަ ދޮރު ކައިރީގައެވެ. ބޭރަށް އޮހެމުންދިޔަ ހުދު ސްނޯގެ ތިކިތަކުން، އޭނާގެ ހަލަބޮލިވެފައިވާ ހިތަށް ކޮންމެވެސް ވަރެއްގެ ހަމަޖެހުމެއް ލިބޭތޯއެވެ. އެ ހުދުކަމުގެ ތެރެއަށް ގެއްލިފައި ހުރެ، އޭނާގެ ތުންފަތްމައްޗަށް ވެރިވީ ފަނޑު ހިނިތުންވުމެކެވެ. އެއީ ލިބުނު ހިތްހަމަ ޖެހުމުގެ ސަބަބުން ކަމެއް ނުވަތަ ހިތުގެ ރިހުމުން ސަލާމަތްވާން ކުރި މަސައްކަތެއް ކަމެއް ބުނާކަށް ނޭނގެއެވެ.

***

ކޮޓަރީގެ ދޮރު ހުޅުވާލުމާއެކު އާޝިއުގެ ފިޔަވަޅުތައް ހުއްޓުނީ، ކުރިމަތިން ފެނުނު މަންޒަރަކުންނެވެ. ރިސޯޓުން އައިގޮތައް ފޮށީގައި ވާހާ ސާމާނެއް ނަގާ އުކަމުން ޝާއިރާ ދިޔައެވެ. ތަނަށް ހީވަނީ ކުޑަވަރެއްގެ ރޯޅިއެއް އަރާފައިވާ ވާ ހެންނެވެ. ޝާއިރާގެ މޫނުމަތިން ސިފަވެގެންދަނީ ހުޅުފަޅައިގެން ގޮސްފައިވާ އަލިފާން ފަރުބަދައެއްގެ ކުލަވަރެވެ. އެ ރުޅީގެ ހޫނުން މުޅި މީހާ ރަތްވެ އަނދަމުން ދިޔައިރު، ހަމަޖެހިލެވުނީ ކޮޓަރިތެރެ ރަނގަޅަށް ވެސް ހަޑިވީމައެވެ. އޭނާގެ ރުޅި އަންދާޒާ ކޮށްލެވިގެން އާޝިއު ވެސް އެއްޗެއް ބުނަން ނުހަދާ އެނދުގެ ފަޑީގައި އިށީންދެލިއެވެ.

”ކޮބާތަ އެ މަންހާ އެކޭ ކިއުނު މޮޔަގަނޑު؟“ ދަތްކުނޑި ވިކާލައިގެން ހުރެ ޝާއިރާ އެއްސެވެ.

”ޝާއިރާ އެހާ ބާރަށް އެއްޗިހި ކީމަ އެ މަންޖެ އެބަ ރޮވޭ.. ވަންނާކަށް ނުހަދަން، ބޯ ދިއްކޮށްލާފަ މަ ވެސް މިއައީ…“ އާޝިއުގެ ޖަވާބުވީ ޝާއިރާގެ ހަރާބުވެފައިވާ މޫނު އިހުނައްވުރެން ހަރާބުވެގެން ދިޔަ ޖަވާބަކަށެވެ. ރުޅިގަދަވެގެން އިންތާގައި ނުވެސް އިނދެވުނެވެ. ދޮރާއި ދިމާލަށް ދުންޖަހާފައި ދިޔައެވެ. ނަމަވެސް ދޮރުން ބޭރުވެވުމުގެ ކުރިން އާޝިއު އޭނާގެ އަތުގައި ހިފެހެއްޓިއެވެ.

”ކޮންތާކަށް؟ މަޑުކޮށްބަލަ ޝާއިރާ! ތިހެން ރުޅިއައިސްގެން ދިޔައީމާ ވަކި ރަނގަޅުވާނެތަ؟“ އާޝިއު މަޑުމައިތިރި ރާގަކަށް ބުންޏެވެ. ”ތިގަދަ ރުޅީގައި ހުރެ އަޑު ވީއްލާ ބުނެވޭ އެންމެ ބަހެއް، މިގޭގަ މިތިބި ނޯކަރުން ކުރެ މީހެއްގެ ކަންފަތައް އިވުނަސް ވަރަށް ގޯސްވާނެ.. މީ ހައިކަލްއާއި އާމިލާ ދިރިއުޅޭ ގެ.. މީ އަހަރެމެންގެ އަމިއްލަ ގެއެއް ނޫން ރުޅި އައިސް ހުރެ އަޑުގެ ކޮޅަށް ހަޅޭއް ފަޅޭއް ޖަހާކަށް!… އަހަރެމެންގެ އަމިއްލަ ގެއަށް ދާން ޝާއިރާގެ ގާތުގަ މަ ބުނީ މިހެންވެ.. ކަމަކާއި އުޅޭއިރު، ދެމީހުން ކުރެ އެކަކަށް ވެސް ރުޅި މައިތިރިއެއް ނުކުރެވޭ.. އަނެއްކޮޅުން ޝާއިރާ ވިސްނަން ވާނެ ވިޝާމް ކައިވެނި ކުރީމަ މަންހާ އައިސް ހުންނާނެ ޕްރެޝަރާއި މެދު ވެސް.. ޝާއިރާ ރުޅި އާދޭ އޭނާ ރުޔަސް.. ސަލާމަތެއް އެބައޮތްތަ؟ މި ވަރުން ކަމެއް ކާމިޔާބު ވާނެތަ!..“ އާޝިއު ހިތްހަމަ ނުޖެހިފައި ހުރެ ވާހަކަ ދެއްކިއެވެ. ނަމަވެސް އޭނާގެ އަޑުބެހެއްޓީ ދޮރުން ބޭރަށް ނުދާހާ މަޑުންނެވެ. އާޝިއު ވާޙަކަތަކުން ޝާއިރާ މަޑުވިއެވެ. ނަމަވެސް ހުރީ  ނުރުހުމާއި އެކު ފުސް ހަދައިގެންނެވެ.

”އެހެންވިޔަސް، ހާދަ ބޮޑު ރޭވުމަކަށް ތައްޔާރުވެގެންނޭ އަހަރެން އެ ރިސޯޓަށް ދިޔައީ. އެކަމަކު އެ މަންހާގެ ސަބަބުން މުޅި ޕްލޭން ފުނޑުފުނޑުވެއްޖެ. އެނބުރި ހުސްއަތާ އަންނަން މިޖެހުނީ!“

”ހަމަޖެހިބަލަ، އަދި ކަންތައްތައް ނިމުނީކީ ނޫން. ޕްލޭންތައް އޮތީ ކުރިއަށް.. މިރޭ ޕާޓީގެ ބޮޑު ބައްދަލުވުމެއް އެބައޮތް. ނަސީބެއް އަވަހަށް މާލެ އާދެވުނުކަން ވެސް. ކޮބާ، މަހާގެ އެއްވެސް ޚަބަރެއް ވިތަ؟“ އާޝިއު ޒާތަކަށް ހީލިއެވެ.

އާޝިއުގެ ސުވާލާއެކު ޝާއިރާގެ މޫނަށް އަނެއްކާވެސް ފޫހިކަމުގެ ހިޔަނި އެޅުނެވެ. ’ހޫމް‘ އަޅުވާލިއެވެ.

”ދެން އޭނަގެ ޥާހަކަ ނުދައްކަބަލަ… ހަބަރެއް އިވޭ ދުވަހުކުން އޭނަ ގުޅާނެ އެންނު“ މަހާގެ ނަމަކީ  ދުލުން އިއްވާލެވޭ ވަރަށް އޭނާ ނަފްރަތުކުރާ ނަމެއް ފަދައެވެ.  އެންމެ ފަހަރަކުވެސް އެ ނަން އޭނާގެ އަނގައިން ބޭރުކޮށްނުލައެވެ.

”ދެން ޝާއިރާ، ކިތަންމެ ފޫހިވިއަސް އެވެސް ދަރިއެއްނު.. މިހާރުވެސް އެކޮށްދެނީ ޝާއިރާގެ މަސައްކަތެއްނު.. ގުޅުން ރަނގަޅު ކޮށްލާ.. އޭރުން މަސައްކަތައް ފަސޭހަވާނެ..ހަހަހަ“ އާޝިއުގެ އެ މަކަރުވެރި ހުނުމުގެ އަޑުން ހީވީ ޝާއިރާގެ ހަނދާނަށް މުހިންމު ކަމެއް ގެނެސްދިން ހެންނެވެ.

”އާޝިއު މޮޔަ ނުގަވާ ، ތި ދާން އުޅޭ ބައްދަލުވުމަކަށް ދެވޭތޯ ބަލާ“ އަނގަޔަށް ވައްތަރެއް ޖައްސާލައިގެން ހުރެ ޝާއިރާ ތެދުވީ އަލުން މަންހާގެ ގާތައް ދިޔުމަށެވެ. ކުރިން ހުރި ރުޅިވެރިކަން ކޮންމެވެސް ވަރަކަށް ފަނޑުވެފައި ހުރުމުން، އާޝިއު އިތުރު އުނދަގުލެއް ނުކޮށް ހިމޭނުން އިނެވެ.

***

ފަޅުތެރޭގެ އަމާންކަން ކަނޑުވައިލަމުން ބީއްސާލި ރާޅުތަކުގެ ފޮނުގަނޑު ޖެޓީގެ ތަނބުތަކުގައި ބޮސްދެމުން ދިޔައެވެ.

”މިއަދު ރީތިކޮން އޮވެ އޮވެފަ އަނެއްކާ ކަނޑު ގަދަ ކޮށްލީ ދޯ.. ނަސީބެއް ދެން ވާރޭ ނުވެހޭ ކަން ވެސް“ ފުރަންވެގެން ޖެޓީއަށް އައި ހިނދު، ކެކި އަރަމުންދިޔަ ކަނޑަށް ފުން ނަޒަރެއް ދެމުން މަޖުދާއަށް ބުނެވުނެވެ. އޭނާގެ ދެލޯ ހޯދަމުން ދިޔައީ އަމީރާއެވެ. އިރަމްއާއި އެއް ހަމައެއްގައި ހުރެ އޭރު އަމީރާ ލޯންޗަށް އަރައިފިއެވެ. އޭނާ އަވަސް އަވަހަށް އެރީ އަމީރާގެ ގާތުގައި އިށީންދެލުމަށެވެ. އައި އިރުވެސް އަމީރާއަށް ހޮޑު ލެވުމުން އެކަނި ދޫކޮށްލާކަށް މަޖުދާ ބޭނުމެއް ނުވިއެވެ. އިރަމްއާއި ނާޔާ ތިއްބަސް އެކުދިންނަކީ ވެސް ކަނޑަށް ބަލިކަށި ބައެއް ކަމުން އަމީރާއަކާއި އަޅައެއް ނުލެވޭނެއެވެ.

”ކޮބާ ރީއްކޮ؟“ މަޖުދާ އިށީނުމާއެކު އަމީރާގެ ދުލުން ފުރަތަމަވެސް ބޭރުވީ އެ ސުވާލެވެ. ހިތުގެ ކަނެއްގައި އިޔާން ކޮބައިތޯ ބަލައިލުމުގެ ޝައުގުވެރިކަން އުފެދިފައިވީ ނަމަވެސް، އެކަން ފޮރުވަން އޭނާ މަސައްކަތް ކުރިއެވެ. އަމީރާ އިނީ ކެތްތެރިކަމާއެކު މަޖުދާގެ ޖަވާބަކަށް އިންތިޒާރުގައެވެ.

”ހުރިހާ ބޯއީސް އެދިޔައީ ކުރިން.. ޔޫވީއާއި ރީއްކޮ އެގެންދިޔައީ އެމީހުންނާއި އެއްކޮން .. މަންމަމެން މިއަށް މި އެރީ މިފަހަރު،  ތިކުދިންނަށް ހޮޑުލެވިދާނެތީ“ މަޖުދާގެ އެ ޖަވާބުން އަމީރާގެ ހިތަށް ބަޔާންކުރަންދަތި އުނދަގޫތަކެއް ވީ ނަމަވެސް، ގަދަކަމުން ތުންފަތަށް ހިނިތުންވުމެއް ވެރިކޮށްލަމުން ބޯޖަހާލިއެވެ.

”އާހްހް، ޔަގީން އަދިވެސް ހިތްހަމަ ނުޖެހިފަ.. ހީ ހޭޒް ޓް ނޯ ދެޓް އައި މައިޓް ނީޑް ހިމް، ރީއްކޮ ގޮވައިގެން އެރި ނަމަ.. ކީއްވެތަ އިޔާ އެހާ ހިތްހަރުވީ.. މާފަށް އެދެވޭނީ ވެސް  ކައިރިއަށް އައިސްގެންނު“ އަމީރާގެ ހިތުގެ ރިހުން ޝަކުވާތަކުގެ ސިފައިގައި މޭގެ ތެރޭގައި ތޮޅެމުން ދިޔަ ނަމަވެސް، އެ އަޑުތައް ދުލާ ހަމައަށް ގެންނާކަށް ބޭނުމެއް ނުވިއެވެ. ކަރުނުން ދެލޯ ފެންކަޅިވި ނަމަވެސް ހިތްވަރުކޮށްލާފައި، ލޯންޗު ނަގިލި ނެގުމުގެ ކުރިން ސީޓުގައި ހަމަޖެހިލައި އޮށޯވެލިއެވެ.

ގަދަ ވަޔާއި އުފުލެމުންދިޔަ ރާޅުތަކުގެ ތެރޭގައި ކުރި ދަތުރަށްފަހު މާލެއަށް ލެފުނުއިރު، ހޮޑު ނުލެވޭ އެއްވެސް މީހަކު ލޯންޗުގައި ނެތެވެ. އެންމެ ބޮޑުވަރުވީ އަމީރާއަށެވެ. އޮށޯވެގެން އޮތް ނަމަވެސް، އެހެން އޮވެލެވުނީ އިރުކޮޅަކުއެވެ. ލެފެންދެން ހޮޑުލެވުނެވެ. މަޖުދާ އިނީ އޭނާގެ ހިދުމަތުގައެވެ. އެންމެ ސިކުންތަކަށް ވެސް އެކަނި ދޫކޮށް ނުލިއެވެ. އަނެއްކޮޅުން އާމިލާ ވެސް އެވަރަށް އެހީވަމުން ދިޔައެވެ. ފާލަމުން ފޭބިގޮތައް ކާރުތަކުގައި ގެއަށް އާދެވުނު އިރު ބާރަ ޖަހަން އުޅެއެވެ.

ރޭގެ ވަރުބަލިކަމާއި އެކު ނިދުނު ގޮތައް އަމީރާއަށް ހޭލެވުނީ ހަތެއް ޖެހުމާއި ގާތްވެފައި ވަނިކޮންނެވެ. އެހާ ލަސްވަންދެން އަދި ދުވަހަކުވެސް ނުނިދެއެވެ. ހުވަފެނެއް ފެނިގެން ނޫން ނަމަ އޭނާއަށް އަދިވެސް އޮވެވޭނީ ނިދިފައެވެ. އެނދުގައި އިށީންދެލީ ނިދި ފިލުވާލުމުގެ ބޭނުމުގައެވެ. ބާލީސް ދޮށުގައި އޮތް ފޯނު ނަގާ ބަލާލިއިރު ލައިބާގެ މިސްކޯލެއް އިނެވެ.

”ކީކޭ ލައި.. މި ހޭލެވުނީ.. ތަންކޮޅެއް ލަސްވީ މިއަދު،“ ނިދީގެ އަސަރު އެކުލެވިފައިވާ އަޑަކުން އަމީރާ ވާހަކަ ދެއްކިއެވެ.

”އަދި އެބަ އޮތޭ ވަގުތު .. އޭތް ލައި ވަރަށް އެކްސައިޓިންގް ނިއުސްއެއް ދޭންވެގެންނޭ ގުޅީ.. އިއްޔެ ލައިމެން ޗޭންޖްވީ ތިގޭގެ އެޕާޓްމަންޓަކަށް.. ނައު ވީ ކޭން ހޭންގައުޓް މޯރ.. ދޯ!“ ފޯނުގެ އަނެއްކޮޅުން ލައިބާގެ އުފާވެރި އަޑު އިވުމުން، އަމީރާގެ ލޮލުން ނިދި ފިލައިގެން ދިޔައެވެ.

”އަސްލުތަ؟ އަޅޭ.. އައިމް ސޯ ހެޕީ.. ކޮންތާކުތަ ތިހުރީ ލައި؟ ހިނގާބަ އެއްކޮށް  ޑިއުޓީއަށް ދާން“ އަރާފައިވާ ޖޯޝާއި އެކު އަމީރާއަށް ވާހަކަ ދެއްކުނީވެސް އާދަޔާއި ހިލާފަށް ބާރަށެވެ.  އޭނާ އެއްގޮތަކަށް ވެސް އިޔާން އާއި އެކު ދާން ބޭނުން ނުވާތީ ލައިބާ ކައިރީގަ ގެންގޮސްދިނުމަށް އެދުނެވެ. ލައިބާ ވެސް އުފަލާއި އެކު އާއެކޭ ބުނެ އިރުކޮޅަކު ވާހަކަ ދައްކަން މަޑުކޮށްފައި ފޯނު ބޭއްވިއެވެ.

އަމީރާ ފާހާނައަށް ވަދެފައި ނުކުތީ، ދިއުމުގެ ކުރިން ހެނދުނުގެ ނާސްތާ ތައްޔާރު ކުރެވޭތޯއެވެ. އިރަމް ނިދިފައި އޮތުމުން ނުގޮވާ އަމީރާ ބޭއްވިއެވެ. ބަންދު ދުވަހަކަށް ވެފައި އިރަމް ހޭލައްވާކަށް ބޭނުމެއް ނުވިއެވެ. ރޭގެ އަސަރު އަދިވެސް ހިސާބަކަށް ހުއްޓެވެ. ކޮންމެވެސް ވަރަކަށް ބޮލުގައި ރިއްސައިގަނެފައި ހުރިއިރު ، އެހާ ވަރަށް ހޮޑު ލެވުމުން ހުރީ ނުހަނު ބޮޑަށް ބަނޑުހައިވެފައެވެ.  އެއްވެސް މީހަކު ފެންނަން ނެތުމުން އެހެން މީހުން ނުހޭލަނީ ބާއޭ ހީވިއެވެ. މުޅި ލިވިންގް ރޫމް އޮތީ ހަމޭންކޮށެވެ.

ނަމަވެސް ބަދިގެއަށް ވަތް ހިނދު އަމީރާ ދިޔައީ ސިހިގެންނެވެ. މޭޒު ކައިރީގައި އިން އިޔާން ފެނުމުން އިރުކޮޅަކު ބަލަން ހުރެފައި، މޭގައި އަތް އަޅުވާލައިގެން ހުރެ ނޭވާ ހަމައަކަށް އަޅުވާލިއެވެ. އިޔާން ކަޅިޖަހާނުލައި ބަލަން އިން ގޮތުން ހީވަނީ އަމީރާ އަންނާނެ ވަގުތަކަށް އިންތިޒާރު ކުރަމުން ދިޔަ ހެންނެވެ. އޭނާގެ މޫނުމަތިން ކުރިން ފެނުނު ރުޅިވެރިކަން ފިލާފައިވުމުން އަމީރާއަށް ކޮންމެވެސް ވަރެއްގެ ހަމަޖެހުމެއް ލިބުނެވެ. އެހެނަސް އެތަނުން އަވަހަށް ނުކުންނަން އޭނާ އުޅުނެވެ.

”އެމީ..  ވެއިޓް!“

ދޮރުން ބޭރުވޭވޭ ހުއްޓާ އިޔާން ގޮވާލިއެވެ. އެއަޑަށް އަމީރާގެ ފިޔަވަޅުތައް އެކީ ހުއްޓުނެވެ. ނަމަވެސް ފަސް އެނބުރި ބަލާލާކަށް ނޫޅުނެވެ. އިޔާންގެ ފިޔަވަޅުތައް އޭނާއާއި ގާތައް ހުރިތަން ފެނި ލަސްލަހުން ދެލޮލަށް ބޮނޑިވަމުން ދިޔަ ކަރުނުތައް އޮއްބާލަމުން ހަމަޖެހިލަން އުޅުނެވެ. އިޔާންއަށް އެއްޗެއް ބުނެވުމުގެ ކުރީން ބޭރުން ބިއްލޫރި އެއްޗެއް ވެއްޓި ޖެހުމާއި ރީއާގެ ރުއިމުގެ އަޑު އެކުއެކީގައި އައެވެ. ކުއްލިއަކަށް އެހާ ބާރަށް ދެއަޑު އެއްފަހަރާ އިވުމުން ދެ ޒުވާނުންވެސް ދިޔައީ ސިހިގެންނެވެ. ތެޅިގަނެފައި ބޭރަށް ނުކުތެވެ.

”ދަރިފުޅާ!“ ނުކުތް އިރު ރީއާ އިނީ ޓައިލްސްމަތީގައެވެ. އޭނާ އިން ހިސާބުގައި ލޭގެ ކޯވަރެއް އޮތެވެ. އަތްތިލައި ލޭތިކިތައް ތަޅަމުން ދިޔަ އިރު ތިރިއަށް ވެއްޓި ތެޅިފައި އޮތް ބިއްލޫރި މަގުގެ ބައިތަކުން ވީގޮތް ދެގަނެވިއްޖެއެވެ. އަމީރާ ބިރުގަތީ އެއީ އޭނާގެ އެއްޗަކަށް ވުމުންނެވެ. ނަމަވެސް އެ މަގު އެތަނަށް އައި ގޮތެއް އޭނާއަކަށް ނޭގުނެވެ.  އެކަމުގެ ހިތްހަމަ ނުޖެހުން އަނެއްކާ ވެސް އިޔާން ބާލަފާނެއެވެ.  އަމީރާއަށް ދުރަކު ނުހުރެވުނެވެ. ރީއާގެ ގާތައް ދެވުނެވެ. ރޮމުން ރޮމުން ވެސް އިޔާންގެ އުނގުން ނުކުމެ އަމީރާގެ ގައިގާ ބައްދާލިއެވެ. އިޔާން ބަލާލާފައިވެސް ދުރުކޮށްލަން ނޫޅެ ޓިޝޫތަކެއް ބޮނޑިކޮށްލާފައި ގެނެސް ލޭ އަންނަމުން ދިޔަ ހިސާބުގައި އަޅާލިއެވެ. ކޮންމެވެސް ވަރަކަށް ލޭގެ އަސަރު ކެނޑުނު ނަމަވެސް ޓިޝޫތައް ފޯކޮށްލަން މާ ގިނަ އިރެއް ނުނެގިއެވެ.

”ދޫނީ އިޓްސް އޯކޭ..އިޓްސް އޯކޭ“ ރީއާ ރޮމުން ދިޔަ އިރު، އަމީރާއަށް އެއީ ބަލަން މާ ފަސޭހަ މަންޒަރަކަށް ނުވިއެވެ. ފެންކަޅިވާ ގޮތްވިއެވެ. ރީއާގެ ނިތުގައި ނުހަނު ލޯބިން ބޮސްދެވުނެވެ.  އިޔާން ފަސްޓް އެއިޑް ފޮއްޓެއް ހިފައިގެން އައިސް ބޭސް އަޅާން ފެށުމުން ރީއާގެ ރުއިމުގެ އަޑު ވަކިން އަޑުގަދަވިއެވެ. ޒަހަމް ސާފް ކުރުމަށް ހުރި ލިކުއިޑް އަޅަން ފެށުމުން، އޭގެ ނަގަން ފެށި ދިލައިން އެކުއްޖާއަށް ކެތް ނުވީއެވެ.

”މަންމީ.. އައްދޯ..“

ރީއާގެ އަޑައް ބޭސް ހާކަން އިނދެފައި ވެސް އިޔާންއަށް އަމީރާގެ މޫނަށް ބަލައިލެވުނެވެ. އަމީރާ ބަލަހައްޓައިގެން އިން އިރު ދެލޮލުގައި ވީ ކަރުނުތައް ފެނުނެވެ. ކުރިއަށް ވުރެން ބޮޑަށް ރީއާ ބޮނޑިކޮށްލި ގޮތުން އިޔާންގެ ހިތައް ލިބިގެން ދިޔައީ ބުނެދޭން ނޭނގޭފަދަ ހިތްހަމަޖެހުމެކެވެ.

”ދަރިފުޅު މިހާރު ނިމެނީ.. ކިހިނެތް ތަ ތިހެދީ ދޫނި މިއޮތް ހެނދުނާ“ އިޔާން ލޯތްބާއި އެކު ރީއާ ކުރެން އަހާލިއެވެ. ރޯން އިނދެފައި ވެސް، ތެޅި ކުދިކުދި ވެފައި އޮތް މަގަށް ރީއާ އިޝާރާތް ކޮށްލިއެވެ. އިޔާން ބަލައިލީ އަމީރާގެ މޫނަށެވެ. އެއީ އަމީރާގެ އެއްޗެއްކަން އިޔާންއަށް އެނގެއެވެ. އަމީރާ ބިރުން އިނދެފައި ވެސް ތުންފަތުގައި ދައިގަތްތަން ފެނި ހިތައް އުނދަގޫވިއެވެ.

”އިޓްސް އޯކޭއޭ ހަނީ.. ކޮއްކޮ ހަލަނިކަމުން އެކަހަލަ ކަންކަން އެ ވަނީ..އެހެންވެ ބައްޕި ބުނަނީ މާ ބާރަށް ދުވެ ނުހަދަން“

”މަންމީ..ތަދުވަނީ..އައްދޯއް“ އިޔާން ބޭސް އަޅާ ނިމެން ވާއިރަށް ރޮއި ރޮއި ގޮސް މުޅި ކުއްޖާ އިނީ ހިނދެން ކައިރިވެފައެވެ. ތަދުވާ ކޮންމެ ފަހަރަކު ’މަންމީ’އޭ ބުނެ ފޯންފަށާފައި އަމީޜާގެ ގައިގާ ބައްދާލާ ގޮތުން އަމީރާގެ ހިތް ބަނޑުންވެދެއެވެ. ރީއާ ތަދުވެގެން އުޅެމުން ދިޔަ ގޮތުން އަމީރާއަށް ކެތްވަނީ ކިރިއާއެވެ.  ވަރުބަލިކަމެއް ނެތި ފުމެދެމުން ދިޔައެވެ. އަމީރާގެ ދެލޮލުން އެކަނިވެސް ރީއާ ދެކެ ލޯބިވާ ވަރު ހާމަވެއެވެ.

”ކިހިނެތް ހަދައިގެން މިއުޅެނީ؟“ ނަދީމްއާއި މަޖުދާ އައިސް ވަނީ ބޭރުންނެވެ. ދެމީހުންގެ ފަޔަށް އެމަންޒަރު ފެނި ލިބުނީ އާދަޔާއި ހިލާފް ބާރެކެވެ. އެމީހުންގެ ކުރިމަތީގައި އައިސް ހުއްޓުނީ ދާދި މަދު ސިކުންތު ކޮޅެއްގެ ތެރޭގައެވެ. އަމީރާ އިޝާރާތް ކޮށްލީ ތިރީގައި ބިއްލޫރިތަކަށެވެ.

”އެއީ ނާޔޫ ކުރީ ދުވަހު އެމީއަށް ގެނެސްދިން މަގު ދޯ.. ނީއްކޮ އެ މަގު ރީތިވެގެން އަތް ހާކަ ހާކާފަ ގެނެސް މިތާގަ ބޭންދި ގޮތައް އެއިނީ.. އެމީއަށް ބޭނުން ކޮށްލަން ވެސް ނުލިބުނެއްނު.. ނީޝަން ކުރާނީ އެކަހަލަ ކަންތައް.. ރީއްކޮ އެހާ ހަނިއިރު އެނގެންވާނެ ދޯ  އަތު ޖެހޭ ހިސާބު ބަހައްޓަން ނުވާނެކަން“ އިޔާން ރުޅި އިސްކޮށްފާނެތީ ނަދީމް އަވަހަށް ބުނެފިއެވެ. އަމީރާ ހިތްހަމަޖެހުމުގެ ނޭވާއެއް ދޫކޮށްލިތަން ފެނި ނަދީމްއަށް ހީލެވުނެވެ.

ލައިބާ ގުޅަންފެށީ ވެސް އެވަގުތުއެވެ. އަމީރާ ވިސްނާލިއެވެ. ރީއާއަށް އެހާ ބޮޑަށް އަނިޔާވެފައި ވަނިކޮން ދާން ހިތެއް ނޭދުނެވެ. ފޯނު ކަނޑާލުމަށްފަހު ލައިބާއަށް މެސެޖެއް ކޮށްލަމުން ކުޑަގޮތަކަށް ވީ ގޮތް ކިޔާލަ ދިނެވެ.

”ކާކަށް މެސެޖް ތިކުރަނީ“ އަމީރާ ސިހުނީ އިޔާންގެ އަޑަށެވެ. އަމީރާއާއި ޖެހި ފިތިގެން ކަހަލަ ގޮތަކަށް އިޔާން އިށީނެވެ. އަމީރާއަށް ކަޅި ހިންގާލެވުނީ މަޖުދާއާއި ނަދީމް ކޮބާތޯއެވެ. ބިއްލޫރިތައް ސާފްކޮށްފައި އޭރު އޭނާ ބަދިގެއަށް ވަދެއްޖެއެވެ. ނަދީމްވެސް އެތެރެއިން ވާހަކަ ދައްކާ އަޑު އިވުނެވެ.

”ކިހިނެތް ވީ؟“ އަމީރާ އަހާލިއެވެ. އިޔާން ވަކި އެއްޗެއް ނުބުނެ އަމީރާގެ މޫނާއި މޫނު ގާތްކޮށްލިއެވެ. އެއްޗެއް ނުބުނި ނަމަވެސް އެ މޫނު އެހާ ގާތުން ފެނުމުން ކަޅި ދުރުކޮށްލަން އުނދަގޫވިއެވެ. ކަޅި ޖަހައިނުލާ ބަލަހައްޓާއިގެން ހުރެވުނީއެވެ. އުނގުގައި ރީއާ އޮވެ ދެމީހުންގެ މޫނަށް ވަކިވަކީން ނަޒަރު ހިންގަމުން ދިޔަކަން ނުދެނެ ހުރި ފަދައެވެ.

”ނަތިން.. އަމް ޖަސްޓް އާސްކިންގް“

”މައި ނިއު މޭލް ފްރެންޑް.. އެނީ ޕްރޮބްލެމް؟“ އިޔާން ޥާހަކަ ދެއްކުމުން އަމީރާ އިސްޖަހާއިލިއެވެ.

”އޯހް..ގައިމު ލައި ޖަހާފަ ސޭވް ކޮށްފަ އިނީ“ ޒާތަކަށް ހީލައިގެން އިނދެ އިޔާން ބުނެލިއެވެ.

”ހަމަ އިނދެ ދާނެ އެންނު..“ އަމީރާ ވާހަކަ ދެއްކީ ހިތްހަމަ ނުޖެހިފައި ހުރެއެވެ. ރީއާ ކަޅި ޖަހައި ނުލައި ބަލަން އޮތްކަން ރެއަކާއި ލުމުން އޭނާ އިނީ ލަދުވެސް ގަންނަ ގޮތްވެފައެވެ.

”ބޭބް، ކެން ވީ ގޯ އައުޓް ޓްނައިޓް؟ ޕްލީޒް، އިޓްސް އަ ޑޭޓް“

”މީ؟ އޯހް، އަމް ސޮރީ އައިލް ބީ ބިޒީ.. އެންޑް ޕްލީޒް ރީއްކޮ އެބައޮތޭ.. ޑޯންޓް ޓޯކް ލައިކް ދެޓް، އިންފްރޮންޓް އޮފް ހާރ“ ހިތާއި ދެކޮޅަށް އަމީރާ ދެކޮޅު ހެދިއެވެ.

އިޔާންއަށް ތުންފަތް ހަފާލެވުނެވެ. ހިތައް އުނދަގޫ ވީ ނަމަވެސް އޭނާގެ މައްޗަށް އަމީރާގެ ހިތްހަމަ ނުޖެހުން ހައްގެވެ. ރީއާއަށް ވެފައި އޮތް ގޮތުން އެވަގުތު ރުޅި އިސްކުރެވުނު ނަމަވެސް ފަހުން އިޔާން އެކަމާއި ދެރަ ނުވާ އެންމެ ހިނދުކޮޅެއް ވެސް ނުދެއެވެ. އެއްޗެއް ނުބުނެ އިންދާ މީރާން އައިތަން ފެނިގެން ރީއާ ގޮވައިގެން ދިޔުމަށް ބުނެލިއެވެ. އެބަ އަންނަން ކަމުގައި ބުނެފައި މީރާން ބަދިގެއަށް ވަނެވެ. އެނބުރި އައީ ކޮފީ މަގެއް ހިފައިގެންނެވެ. ދަމުން ދިޔައީ ރީއާ ގޮވައިގެންނެވެ.

”އާދެ ބަލަ“ އިޔާން ސޯފާއިން ތެދުވެ އަމީރާގެ އަތުގައި ހިފާލިއެވެ. ބޯޖަހާލާފައި ދެކޮޅު ހަދަން މަސައްކަތެއް ނުކުރެއެވެ. ދެޒުވާނުން އެރީ ޓެރެހަށެވެ. އިރުގެ އަލިކަން ފަނޑުގޮތަކަށް ފާއްދާލާފައި އޮތެވެ. ވައިރޯޅީތައް ހުރި ނަމަވެސް އުޑުމަތިވެސް އޮތީ ސާފްކޮންނެވެ.

”ކޮންކަމަކު މިތަނަށް ގެނައީ؟“ އަމީރާ ހުއްޓިލީ ރެއިލިންގްގައި އަތް އަޅުވާލަމުންނެވެ. އިޔާންގެ ފަރާތުން ޖަވާބެއް ނައުމުން ބަލާލި އިރު އޭނާ ދިއްކޮށްލީ ފޯނެވެ. އަމީރާ ނިތް އަރުވާލުމުން ފިރިހެންވަންތަ ހިނިތުންވުމެއް ރައްދުކޮށްލަމުން އެދުނީ އެ ބެލުމަށެވެ. އަމީރާ ފޯނު އަތުލުމަށްފަހު އިޔާން ހުޅުވާލާފައި އިން ފޮޓޯއަށް ނަޒަރެއް ދިއްކޮށްލިއެވެ. ފެނުނު މަންޒަރުން މުޅި ކުއްޖާ ސިހުނެވެ. ތުރުތުރު އަޅާއިގެން ހިނދު ދެލޯ ބޮޑު ކޮށްލެވުނެވެ.

”އިޔާ..މި..މި މި“ އަމީރާއަކަށް ވާހަކައެއް ނުދެއްކުނެވެ. ލޮލުގައި ބޮނޑިވެގަތީ ކަރުނެވެ. ހަމަހެއްހާ ތުއްތު ކުއްޖާގެ ހަށިގަނޑުގެ އެތަން މިތަން ޒަހަމް ވެފައި ހުރިއިރު ގައިގާ ވާ  ލަކުނުތައް ވެސް ސާފްކޮން ފެނެއެވެ. ފޮޓޯ ނެގި ވަގުތު ވެސް ރޮވޭކަން ހެކިދެނީ މައުސޫމް މޫނުމަތިން ފެނިގެންދާ އަސަރުތަކުންނެވެ. އެންމެ ނަޒަރަކުން ވެސް އެއީ ރީއާކަން ދެނެގަންނާކަށް އަމީރާއަކަށް އުނދަގުލެއް ނުވިއެވެ. އިޔާންގެ ފުށުން، އެމީހުންގެ އަތްމައްޗަށް ރީއާ އައިގޮތް އަހާފައި ވީ ނަމަވެސް އޭރު އެކުއްޖާ އޮތް ހާލަތު ފެނުނު ހިނދު އަމީރާގެ މެއިން ނުބައި ގޮތަކަށް ދިލަ ނަގައިގަތެވެ. ސްކްރީނަށް ބަލަން ހުރިއިރު އޭރު ލަސްލަހުން ކަރުނުތައް ފައިބައިގަތެވެ.

”ތިއީ ރީއްކޮ.. ޔަނާލްއާއި ދެމެދުގައި ހިނގި ކަންތައް ހުރިގޮތައް އެންމެ ފުރިހަމަ ތަފްސީލާއި އެކު ކިޔައި ނުދިނަސް، ރީއްކޮ ގެނެވުނު ގޮތް އެމީއަށް އެނގޭނެ.. އެދުވަހު ރީއްކޮ ލިބުނު އިރު އޮތް ގޮތް މިއީ.. ސްޕެއިންގަ ހުއްޓަ ދޮންތަ ފޮނުވި ފޮޓޯ ތި.. އޭގެ ފަހުން ރީއްކޮއަށް އެވަރުގެ ބޮޑުކަމަކާއި ކުރި މައްޗަށް ނުވޭ.. އެންމެ ބޮޑު ކަމަކަށް ވެސް ހުމެއް އައިސް ނޫނީ ހަލަނިވެގެން އުޅެނިކޮން ވެއްޓި ޖެހުން ކަހަލަ ކަމެއް ވެފަ ހުރީ.. ޔަނާލްގެ ގެއިން އެކުއްޖާ އަހަރުމެންގެ އަތް މައްޗަށް ގެނައި ފަހުން އެފަދަ ކަމެއް ނުވާތީ ވެސް ކަންނޭގެ މި ފީލިންގް ނައީ.. އެމީ، އިއްޔެ ސަދަފް ރީއްކޮ ނަގައިގަތް އައި ހިނދު އަހަންނަށް ސިފަ ވީ، މި ފޮޓޯއިން މި ފެންނަ މަންޒަރު.. އެނބުރި ސްޕެއިން އިން ރާއްޖެ އައިގޮތައް ރީއްކޮގެ ގައިގާ އަތްލެވުނު ދުވަސް އެއީ އަހަރެން ހަތާވީސް އަހަރުވީ ހަޔާތުގަ އައިއެންމެ ދެރަވި ދުވަސް.. އެންމެ ރުއި ދުވަސް… ބައްޕައަށް ވެ އަހަންނަށް އެހީ ނުވެވުނު އެހާ ތުއްތު އިރު އެވަރުގެ ބޮޑެތި އަނިޔާ ކޮށްފަ ހުއްޓަ ވެސް.. އަނެއްކޮޅުން އަހަންނަކަށް ނުހޯދާދެވުނު ރީއްކޮއަށް އިންސާފެއް ވެސް.. އެގެޔަށް ފުލުހުން ފޮނުވިން އެވަގުތު އެކަމަކު ޔަނާލްއާއި އޭނާގެ އާއިލާގެ އިތުރު މީހެއްގެ ވެސް އެގެޔަކު ނުޥޭ.. ޔަނާލް ހުރީ އޭނާގެ ފިޔަވަޅުވެސް ފޮރުވައިގެން.. މިއިން އެއްވެސް ކަމަކާއި އެމީ ގުޅުމެއް ހުރީއެއް ނޫން އެކަމަކު އަހަންނަށް ތި މަންޒަރު ސިފަވެގެން ދިޔައީމަ ނުބައި ގޮތެއްވީ.. ހިތް ހުއްޓިގެން ދިޔަ ކަހަލަ އިޙްސާސްއެއް ކުރެވުނީ.. ފޯރް އަ ސެކަންޑް އައި ތޯޓް އައި ލޮސްޓް ހާރ އޭ.. އެއްވެސް ހަރަކާތެއް ވެސް އެވަގުތު ނެތެއްނު، އަހަރެންގެ މުޅި ހަށިގަނޑަށް ފްރެޝާރ ވެ ސިކުނޑީން ރަނގަޅު ގޮތެއް ގޯސް ގޮތެއް ނުވިސްނޭ ކަހަލަ ހާލަތަކަށް މީހާ ގޮސްފަ ހުރީ…ދެން، ހޭ އެރީމަ ވެސް ރީއްކޮ ގަޔަކުން ދުލެއް ވެސް ނުކޮށްލެވުން.. ބައްދާލައިގެން އިނދެވުނީ.. ދޮންތަ ހަޅޭއްލައިވައި ގަތީމަ ރީއްކޮ ބެޑްގަ ބާއްވަން ވެސް ހަނދާންވީ“ އިޔާންގެ ލޯ ތެމިފައި ހުރިއިރު އޭނާގެ އަޑުގައި ހުރި ރިހުން އަމީރާއަށް އިޙްސާސްވިއެވެ. އެފޮޓޯއަށް ބަލަން ކެތް ނުވެގެން ފޯނު ނިއްވާލަމުން އިޔާންގެ ގާތައް ދެވުނެވެ. އަމީރާއަށް އިޔާންގެ އަތުގައި ހިފާލެވުނު އިރު، އިސްޖަހާލައިގެން ހުރެފައިވެސް އެއަތައް އިޔާން ބާރުކޮށްލިއެވެ.

”އައި ނޯރ ހަނީ، އެވަރުގެ އެއްޗެއް ބުނެގެން ނުވާނެކަން ..ބަޓް އައި ޑިޑިންޓް މީން އިޓް.. އެމީ އާއި ދިމާލަށް އެހެން ބުނެވުނު ސިކުންތުން ފެށިގެން އެކަމާއި ދެރަ ނުވާ އަދި ރިގްރެޓް ނުވާ އެންމެ ސިކުންތެއް ވެސް ނުދޭ…. އެންޑް އައި ނޯރ އެމީ އައި ފަހުން އެމީކަން ރީއްކޮ ގެންގުޅެނީ.. އެކަމުގެ ހެއްކަކަށް ފުދޭނެ އެމީއާއި ރީއްކޮއާއި ދެމެދުގައި އޮތް ބޮންޑް.. ހިތައް ހަމަޖެހުން ލިބޭ ދެމީހުން އެކުގައި ފެނިލިއަސް.. އެއީ އަބަދުވެސް އެންމެ ދެކެން ބޭނުންވާ މަންޒަރު… އެންޑް އައި ރިއަލީ އެޕްރިޝިއޭޓް އެވްރީތިންގް ޔޫ ހޭވް ޑަން ފޯރ މީ އެންޑް ފޯރ ހަރ.. މައި ލަވް، ޔޫ އަރ ދި ބެސްޓް.. އާހްހް، އެދުވަހު ވެފަ ހުރި ގޮތެއް ވެސް ނޭނގޭ… ކެން ޔޫ ފޮގިވް ވީ؟“ އިޔާންގެ ލޮލުން ފޭބި ކަރުނަތަކާއި އެކު އެދެލޮލުން ބަލައިލީ އަމީރާގެ ހިތް ވިރިގެންދިޔަ ފަދައަކުންނެވެ. އަމީރާގެ ހިތުގައި ވީހާ ޝަކުވާއެއް ސިކުންތެއްގެ ތެރޭގައި ފިލައިގެން ދިޔައެވެ. ދެފަރާތައް ބޯ ހޫރުވާލަމުން އިޔާންގެ ގައިގާ އަމީރާއަށް ބައްދާލެވުނެވެ.

”މަންހާ އެއީ ކާކުތަ؟ އެންމެ ދެރަވީ އޭނަ އައިސް ވާހަކަ ދެއްކީމަ އިޔާ ގަބޫލް ކުރީމަ.. ބަޓް މިހާރު އިޙްސާސް ވޭ އިޔާގެ މަގާމުގަ އަހަރެން ހުއްޓަސް ވާނީ އެފަދަ ގޮތެއްކަން..“

”ނޯ ވޭ އެމީ.. މަ ނުކުރާނަން އޭނަ ދައްކާހާ ވާހަކައެއް.. އެފަދަ ވަގުތެއްގަ ވީ ގޮތެއް ނޭނގުނީ ހަމަ.. ބަލަން ބޭނުންވީ ރީއްކޮ ގާތުގަ ހުރީ އެންމެފަހުން ކާކުތޯ.. ދެން އެގަޑީގަ އެމީގެ ނޭމް ބުނީ.. ކޮންމެ މީހެއްގެ ނޭމް ބުންޏަސް އެހާ ވަރު ވާނެ.. ދެން އިތުރަށް މަންހާ ދެއްކި އެއްވެސް ވާހަކައެއް ނާހަން.. “ އިޔާން ބުނެލިއެވެ.  ”ދެން ދުވަހަކުވެސް އެކަހަލަ އެއްޗެއް ނުބުނާނަން.. އައި ޕްރޮމިސް.. މާފްކުރާނަންތަ ؟“ އަމީރާގެ ކޮނޑުގައި ބޯ އަޅުވާލި ހިނދު އިޔާންގެ ހޫނު ކަރުނުތަކުގެ އިޙްސާސް އަމީރާގެ ކޮނޑަށް ކުރުވަމުން ދިޔައެވެ.

”ތިހެން ނުރޮއެބާ އިޔާ.. މާފްކޮށްފީމޭ“ އަމީރާގެ އަޑު އިވުނު ހިނދު އެ އަތުގެ ތެރޭގައި ނުހަނު ބާރަށް އަމީރާގެ ހަށިގަނޑު ބޮނޑިކޮށްލިއެވެ. އެއަދާ އިންވެސް އިޔާން ދެރަވެފައި ހުރި މިންވަރު އަންދާޒާ ކޮށްލެވުނެވެ. އެ ހިމޭން ގިސްލުމުގެ އަޑުން އަމީރާގެ ހިތް ހީވީ ތޮރުފެމުން ދިޔަހެންނެވެ. ”ޕްލީޒް ހުއްޓާލަބާ.. މި ފޮޓޯއަށް އެކަނި ބަލާލީމަ ވެސް އިހްސާސްވެއްޖެ އިޔާއަށް ވެގެން ދިޔަ ގޮތް.. އެންޑް އައި ޕްރޮމިސް ، މިއަށް ވުރެން ބޮޑަށް މީގެ ފަހުން ރީއްކޮއާއި މެދު ކެއަރފުލް ވާނަން“

”އެމީ.. މިހާރު ވެސް އަހަރެމެން އެންމެންނަށް ވުރެން އެމީ ކެއަރފުލް އޭ ރީއްކޮއާއި މެދު.. މިހާރު ބޮލުގަ ރިއްސާތަ؟“ އިޔާން އަހާލިއެވެ. އަމީރާ ސިހިފައި ދުރަށް ޖެހިލިއެވެ. އިޔާންގެ މޫނަށް ނަޒަރެއް ދިން އިރު، ދެލޯ ފުހެލަމުން އިޔާން ބުމަ އަރުވާލިއެވެ.

”ކިހިނެތް އެނގުނީ؟“

”ސަދަފް… ހީ ޓޯލްޑް“

”ޝެޑީ؟ ހައު؟ ދެމީހުން ވާހަކަ އެއް ނުދައްކަމެންނު.. ދެން-“

”މެސެޖް ކުރީ..،އެގަޑީގަ ވެސް އޭނަ އުޅުނޭ ވާހަކަ ދައްކަން .. އެކަމަކު މިބުނާހެން އެ ޕްރެޝާރގަ ހުރީމަ އެކަމަށް ހުރަސް އެޅުނީ.. ރޭގަ އިން މެސެޖް ކޮށްފަ އެމީއަށް ވީ ގޮތާއި އޭނާއަށް ފެނުނު މަންޒަރު… އަދި ޥާހަކަ އެއް ބުނަންތަ.. މަންހާ ފެނުނެއްނު ދޯ… އޭނަ ކަމެއް ކޮށްފިއްޔާ ބުނައްޗޭ.. އިނގިލި ކުރިން ޖައްސާލިއަސް އައި ވޯންޓް ސްޕެއަރ ހަރ“ އިޔާން ބުންޏެވެ. މަންހާގެ ނަން ބުނެލާ ގޮތުން އެކަނި ވެސް މަންހާދެކެ އޭނާ ނަފްރަތުކުރާ ވަރު ހާމަވެއެވެ. އެ ނަމާއި އެކު ދަތްކުނޑި ވިކާލަގޮތުން އަމީރާ ވެސް ޖެހިލުންވިއެވެ. އަމީރާ ބޯޖަހައިލުމުން ގާތްވެލާފައި އަމީރާގެ ނިތުގައި ނުހަނު ލޯބިން އިޔާން ބޮސްދިނެވެ.

”އައި ލަވް ޔޫ ސޯ މަޗް .. އާރ ވީ ގުޑް ނައު؟“ ހިނިތުންވެލަމުން އަމީރާގެ ކޮލުގައި ލުއިގޮތަކަށް އިޔާން ހިފާލިއެވެ. އަމީރާ ހީލަމުން އަވަސް އަވަހަށް ބޯޖަހައިލިއެވެ.

”ވަން ތިންގް، ރޭގަ ރީއްކޮ ގޮވައިގެން އައި ގަޑީގަ ވާހަކަ ދައްކަން އަސްލު ސިޑި ކައިރީގަ ހުރީ.. އެކަމަކު ވީގޮތަކީ އޮފީހުން މަހުދީ ގުޅައިގެން.. އަހަރެމެން ބަލަމުންދާ މައްސަލައެއްގައި ޑޮކިއުމަންޓްތައް ބޭނުން ވެގެން.. އަހަންނަށް އާދެވުނީ އެ ސާމާނު އަޅާފަ ހުރި ޑްރޯވަރ ތަޅުލާފަ ކީ ވެސް ހިފައިގެން.. އެ ވާހަކަ ދައްކަނިކޮން އައީ އެމީމެން.. ދެން އޭނައަށް ކިޔައިދިނީ އެ ޑޮކްސްތަކުގެ އާ ޕްރިންޓެއް ނަގަން ހަދަންވީ ގޮތް“ އަމީރާ ގަބޫލް ނުކޮށްފާނެ ކަމަށް އިޔާން ފޯނު ނަގާ ދައްކާލިއެވެ. އަމީރާ ބޯޖަހައިލަމުން ހިނިތުންވުން ފުޅާ ކޮށްލިއެވެ.

****

ވިޝާމްއާއި ޒަންޔާގެ ކައިވެންޏަށް ދެ ހަފްތާއެއް ވެގެން ދިޔައިރު ފެންނަނީ ދުވަހަކަށް ވުރެން ދުވަހެއް ގުޅުން ރަނގަޅުވަމުން ދާ މަންޒަރެވެ. އެކަކު އަނެއްކަކަށް ހުސްކޮށްލެވޭ ވަގުތު ގިނައެވެ. ދެޒުވާނުން ކުރެ އެކަކުވެސް ކައިވެންޏަށް ފަހު ”ހަނީމޫން“އަށް ދިއުމާއި ދޭތެރޭގައި ގޮތެއް ނުނިންމައެވެ. އިތުރު ދެދުވަސް މަޑުކޮށްލުމަށްފަހު ބޭނުންވީ މަސައްކަތުގެ މާހައުލަށް ނުކުތުމަށެވެ. ހައިކަލް އާއި ޒާހިރު ވަކިވަކިން އެދިގެން ވެސް އެކަކުވެސް އެ ނިންމުން ބަދަލެއް ނުކުރިއެވެ. ދެމީހުންގެ ޖަވާބަކަށް ވީ އެއްޖަވާބެކެވެ. އަދި ފަހުންވެސް ދެވިތާނެތާއޭ ބުނެ ހަމަޖައްސާލަނީއެވެ.

ދެ ޒުވާނުން އުޅޭލެއް ގާތްކަމުން އެ މަންޒަރު ފެނި މަންހާއަށް އެގޭތެރޭގައި ކެތްކޮލަން ވެސް އުނދަގޫވަމުން ދިޔައެވެ. ޒަންޔާ ފެނުނަސް މަންހާގެ ދެލޮލުން ހީވަނީ އަލިފާން ކަނި ބުރަމުންދާ ހެންނެވެ. ޒަންޔާ ވާހަކަ ދެއްކިނަމަވެސް މަންހާ އަޅާނުލައެވެ. ނަމަވެސް މަންހާ ދިޔައީ އާމިލާއާއި މެދު ހީނަރުވެފައިވާ ގުޅުން ރަނގަޅުކުރަން މަސައްކަތް ކުރަމުންނެވެ. އެ މަސައްކަތުގައި ކުލަވެސް ޖެހެން ފަށައިފިއެވެ. އާމިލާ ވެސް އިހުނަށް ވުރެން ބޮޑަށް މަންހާއާއި ވާހަކަ ދެއްކުން ގިނަ ކުރިއެވެ. އެ ނޫނީ މަންހާގެ މަސައްކަތައް ފަސޭހާވާނެ ގޮތެއް ނެތުމުން ފޫހިވެފައި ހުރެވެސް އޭނާއަށް މޫނުމައްޗަށް ހިތްހެޔޮ ޝުއޫރުތައް ވެރިކޮށްގެން ހުރެ ވާހަކަ ދައްކަން ފާޑަކަށް މަޖުބޫރެވެ. އަނެއްކޮޅުން ޝާއިރާ ދިޔައީ އެކަމަށް ބާރު އަޅަމުންނެވެ.

އާދައިގެ މަތިން މަންހާ ކޮޓަރިން ނުކުމަތީ މެންދުރު ބާރަވެސް ޖެހި ފަހުންނެވެ. ގަޔަށް ބާރު ޓީޝާޓާއި ކަޅު ޖީންސެއްގައި ހުރިއިރު، ބާރުކަމުން ޖީންސްވެސް ހީވަނީ ދިމަދިމާލުން ވީދިގެން ގޮސްފާނެ ހެންނެވެ. އޭނާގެ މަސައްކަތަކަށް ވީ އާމިލާ ހޯދުމެވެ. ކޮންމެހެން ވެސް ދައްކަންޖެހޭ ވާހަކައެއް އޮތުމުން އެކަމާއި އައީ ނުހަނު ވަރުގަދައަށް ތައްޔާރުވެގެންނެވެ. ބަދިގެއަށް ވަތްއިރު ބަދިގޭގައި ކައްކަން އުޅޭ މީހުން ގާތު ޒަންޔާ ވެސް ހުއްޓެވެ. މަގަތުގައި އާމިލާ ހުރެގެން ނުހަނު ލޯބިން ޒަންޔާއާއި ވާހަކަ ދައްކަމުން ދާތަން ފެނި މަންހާގެ އަތް މުށްކަވާލެވުނެވެ. ދާދި މަދު ސިކުންތުކޮޅެއްގެ ތެރޭގައި އެތެރެ ހަށީގައި ރޯވެއްޖެއެވެ. އެހެނަސް  އެއަސަރުތައް ނުހަނު އަވަހަށް ފޮރުވާލިއެވެ. ފުޅާ ހިނިތުންވުމަކުން ތުންފަތް ފަވާލިއިރު އެއީ ގަދަކަމުން ވެރިކޮށްގެން ހުރި ހިނިތުންވުމެއްކަން ބުނަން ވެސް ދައްޗެވެ. މަންހާ އެހާ ވެސް ހުނަރުވެރިއެވެ.

”ދޮންތާ“ތުއި ވައްތަރެއް އަނގަޔަށް ޖައްސާލަމުން ގޮވާލިއެވެ. މަންހާގެ އަޑަށް ޒަންޔާއާއި ވާހަކަ ދައްކަން ހުރެ އާމިލާ ފަސް އެނބުރިލި ހިނިތުންވެލިއެވެ.

”މަންހާ އެއްޗެއް ކައިފިންތަ؟ ”އާމިލާ އަހައިލިއެވެ. ދެފަރާތައް ބޯހޫރުވާލަމުން މަންހާ އިހުނަށް ވުރެން ބޮޑަށް ހީލިއެވެ. ޒަންޔާ އެތަނުގައި ހުރިކަމަށް ވެސް ހަދާނުލާ އާމިލާއާއި ވާހަކަ ދައްކަންފެށިއެވެ.

”ދޮންތާ އެބައޮތޭ ވާހަކައެއް ދައްކަން ވެފަ“

”ކޮން ޥާހަކައެއްބަ އަނެއްކާ؟“

”ހިނގާބަލަ ބޭރަށް..“ ޒަންޔާ ބަލަން ހުރުމުން ޒާތަކަށް ލޯއަޅާލާފައި މަންހާ ނުކުމުގެމެން ދިޔައީ އާމިލާ ގޮވައިގެންނެވެ.

މަންހާގެ އެ އަމަލު ޒަންޔާ ދެރައެއް ނުވިއެވެ. ވޭތުވެ ދިޔަ ދެ ހަފްތާގައި ވެސް އޭނާއާއި ވާހަކަ ދެއްކުމަށް ޒަންޔާ އެތައް ފަހަރަކު މަސައްކަތް ކުރިއެވެ. އެހެނަސް ފާޅުގައި ރައްދުނުދީ ދަނީއެވެ. ވާޙަކަ ދައްކަން އުޅޭކަން އެނގުނަސް މަންހާ ދުރަށް ދެއެވެ. އެހެން މަންހާ ހަދަމުން ދަނީ ކީއްވެކަން ވެސް އެނގެއެވެ. ވިޝާމްއާއި މަންހާގެ ގުޅުން ވިޝާމް ކިޔައިދީފައި ވާތީ އެނގުނު ނަމަވެސް އެނގޭގައި އުޅޭ އެންމެންނާއި ވެސް ގުޅުން ބަދަހި ކުރަން އޭނާ ބޭނުމެވެ. މަންހާ އެކޭ އެއްފަދައިން އޭނާ އެކަނި ފެނިއްޖެނަމަ ޝާއިރާ ވެސް ހަދަނީ އެހެންނެވެ. އެކަމަކު އާމިލާއާއި ހައިކަލް އަދި ގޭގެ އެހެން މީހަކުވެސް ކައިރީގައި ހުރެއްޖެނަމަ ހިނިއައިސް ވާހަކަ ދައްކާނެއެވެ. އެ ތިން މީހުންގެ ތެރެއިން، އޭނާފެނުމުން ކޮންމެވެސް ވަރަކަށް އާޝިއު ހީލާ ހަދައެވެ.   އެގޭގައި ވެގެން ދިޔައީ އެންމެ ދެހަފްތާ ނަމަވެސް، މަންހާއާއި ޝާއިރާގެ އެ މިޒާޖުގެ ސަބަބުން، ދުވަސްވާ ވަރަކަށް އެގޭގައި އުޅެން ފަސޭހަކަމަކަށް ވެދާނެ ބާއޭ މިހާރުވެސް ބައެއްފަހަރު ހިތައް އަރައެވެ. ކޮންމެ ގޮތެއް ވިއަސް އެހާ އަވަހަށް އެއާއިލާއާއި މައްސަލަ ޖެހޭކަން ޒަންޔާގެ ހިތެއް ނޭދެއެވެ. ކެތްކުރާނީއެވެ. މިހާރު އެހެން އުޅުނު ނަމަވެސް، ފަހުން ހަމަ ރަނގަޅުވުމަކީވެސް އެކަށީގެން ވާ ކަމެކެވެ. އަމިއްލަ ހިތް ހަމަޖައްސާލަމުން ޒަންޔާ ދިޔައީ ކޮޓަރިއަށެވެ. ވިޝާމް އަދިވެސް އޮތީ ނިދާފައި ކަން އޭނާއަށް އެނގޭތީ ބަންގީގެ ކުރިން ބޭނުންވީ ގޮވާށެވެ.

ކޮޓަރީގެ ތެރެއަށް ވަތް އިރު މުޅި ބޮލާއި އެކު ރަޖާ އަޅާއިގެން އޮތް ގޮތުން ޒަންޔާއަށް ދެފަރާތައް ބޯހޫރުވާލެވުނެވެ. ކައިރިއަށް ގޮސް ހުއްޓިފައި ޒަންޔާ ގޮވަން ފެށިއެވެ.

”ހޭއި..ހޭއި.. ބަންގި ގޮވަނީ.. ވިޝާމް“ޒަންޔާ ގޮވާލީ މަޑުން ކަމުން ވިޝާމްއަށް އެއަޑު ފޯރިހެންނެއް ހިއެއް ނުވެއެވެ. ކުޑަކޮން ރަޖާ ހިއްލާލަމުން އޭނާ ތަންކޮޅެއް ބާރުލާފައި ގޮވަން ފެށިއެވެ.

”އޭތް..އޭތް…“

”މްމް؟“ ޒަންޔާ އެގޮތުގައި ހުރެ ގޮވާތާ އިރުކޮޅެއް ފަހުން ވިޝާމް އެނބުރިލިއެވެ. އޭރުވެސް ދެލޮލުގެ އެތެރެ ފެންނަ ގޮތެއް ނުވިއެވެ. އެހާމެ ބޮޑަށް ހުރީ ނިދިފައެވެ. އިސްތަށި ގަނޑު ހޭވިފައި ހުރިއިރު ތުނބުޅީގެ ތެރެއިން ރަތް ތުންފަތް ފެނިގެންދަނީ ސިހުރަތް ފަދައިންނެވެ. ޒަންޔާއަށް ބަލަން ހުރެވުނީއެވެ.

”ދެންމެ އެއްޗެކޭ ބުނިންތަ؟“

”އައި ސެއިޑް ބަންގި ގޮވަނީއޭ“ ޒަންޔާ އަނެއްކާ ވެސް ބުނެލައިފިއެވެ. އެއަޑަށް ބޯޖަހާލާފައި ލަސްލަހުން ރަޖާ ދުރުކޮށްލިއެވެ. އެހިނދު ވިޝާމް ހުސްގަޔާ އިންތަން ފެނުމުން ޒަންޔާ އަވަސް އަވަހަށް މޫނު ދުރުކޮށްލިއެވެ. ލަދުން މޫނުން ރަތްވާ ކަހަލަ އިޙްސާސްއެއް ކުރެވުމުން ތުންފަތުގައި ދައިގަނެވުނެވެ. ދެމެދުގައި އޮތް ގުޅުން ތަފާތަސް ވިޝާމްގެ ސަބަބުން އޭނާގެ މިޒާޖަށް މިހާރަކަށް އައިސް ލަދުވެތިކަން ވެރިވެ ގަންނަނީ މުޅިން ތަފާތު ގޮތަކަށެވެ.

”އެހެމް .. ގެޓް ޑްރެސްޑް.“ ލަދުގަތްކަން ފޮރުވާލަމުން ގޮސް އަލަމާރި ހުޅުވާލާފައި ވިޝާމް ލުމަށް އިރުކޮޅެއް ކުރިން އޭނާ އިސްތިރިކުރި ސާމާނު ނެގިއެވެ. ”މަންމާ!“ އެ ދައްކާލަން  ވެގެން ފަސް އެނބުރުނު ހިނދު ވިޝާމް އައިސް ހުރީ ކައިރީގައި ޖައްސާފައެވެ. ސިހުނު ވަރުން ހަޅޭއްކެއްގެ އަޑު ބޭރުވިއެވެ.

”ޝުޝްޝް މަށޭ މީ“ ޒަންޔާއަށް ވެގެން ދިޔަ ގޮތުން ވިޝާމްއަށް ހެވުނެވެ. ޒަންޔާ ވެސް ހީލަމުން، ގަމީސް ދައްކާލިއެވެ. ތައްޔާރު ވެލުމަށް ބުނެ ނުކުމަންނަން ދިޔަ ހިނދު އެ މޫނުމަތިން ބަދަލެއް ވިޝާމްއަށް ފާހަގަ ވެގެން، އަތުގައި ހިފާ ހުއްޓުވިއެވެ.

”ވަޓްސް ރޯންގް؟ ސަމްތިންގް ހެޕެންޑް؟“ ވިޝާމް ދެލޯ ހަނިކޮށްލައިގެން ހުރެ އެއްސެވެ. ޒަންޔާ ނިތް އަރުވާލީ ކިހިނެތް ވީހޭ އަހާފަދައަކުންނެވެ.

”މްމް ކަމެއް ވެފަހެން ހީވެގެން، ހުރިހާ ކަމެއް ރަނގަޅުތަ؟“

ޒަންޔާ ހީލިއެވެ. ބޯޖަހައިލަމުން އާއެކޭ ބުނެ، ހުރިހާ ކަމެއް ވެސް ރަނގަޅޭ ބުނެލިއެވެ. ވިޝާމްއަށް އޭނާގެ މޫނުމަތި ކުލަވަރު ނަގައިގަނެވުމުން ޒަންޔާ ހައިރާންވެސް ވިއެވެ. އެހާ ހަމަޖެހިލައިގެން ވަނުމުންވެސް އިނގުނީތާއެވެ. އިތުރު އެއްޗެއް ނުބުނެ ވިޝާމް ހުންނަން ފެށުމުން ޒަންޔާ އެދުނީ އަވަސް ކުރުމަށެވެ. ކައިވެންޏަށްފަހު ލައިލާއާއި ޒާހިރްގެ ގާތައް ނުދެވޭތީ، ދެމީޙުން މިއަދު ނިންމައިގެން ތިބީ ގެއަށް ގޮސްލުމަށެވެ. އެގެޔަށް ދާ ވާހަކަ ފުރަތަމަ ބުނީވެސް ވިޝާމްއެވެ. ލިބުނު ހިތްހަމަ ޖެހުމާއި އެކު ޒަންޔާ ވެސް ވަގުތުން އެއްބަސްވިއެވެ.

ވިޝާމް އައުމުގެ ކުރިން، ޒަންޔާ އެނބުރި ތިރިއަށް ފޭބީ ތައްޔާރުވެސް ވެގެންނެވެ. އޭރު ސޯފާގައި އާމިލާއާއި މަންހާ ތިއްބެވެ.

”ދަރިފުޅާ، ކޮބާ ހިނގާ އެއްޗެއް ކާން.. ވިޝާމް ހޭލައިފިތަ؟ ޒަން އަންނަން ދެން މަންމަ މި އިންނަނީ“ ޒަންޔާ ފެނުމުން އާމިލާ ސޯފާއިން ތެދުވިއެވެ.

”ލައްބަ ހޭލައިފި.. ކޮބާ ދޮންބެ ދައްތަ؟ މިއަދު ޔޫވީ ވެސް ނުފެނޭ؟“ ޔޫވިންގެ ހިލަމެއް ހެނދުނު ސުރެން ނުވާތީ ޒަންޔާ އަހާލިއެވެ. ޔޫވީން އުޅޭ ނަމަ އަބަދުވެސް ހުންނާނީ މުޅި ގޭތެރޭގައި ދުވެލަ ދުވެލާ ވިއްޔާއެވެ.  ހާއްސަކޮން ޒަންޔާގެ ގާތުން ދުރަށް ނުދާނެއެވެ.

”ނާޔޫ ތަންކޮޅެއް ލަހުންނޯ އާދެވޭނީ.. ސުކޫލު ހުޅުވެން ކައިރިވީމަ ބައެއް ސާމާނު ގަންނަން ދާންވެގެންނާ އެއްކޮން އެދިޔައީ.. ރީއްކޮ ކައިރިއަށް ހިނގާބަލާށޭ ކިޔަން ހެދީމަ އެދިޔައީ ޔޫވީ ވެސް ގޮވައިގެން.. މަންމައާއި އެއްކޮން ރީއްކޮ ކައިރިއަށް ދަން ހިނގާށޭ ބުނީވެސް ގަބޫލެއް ނުވި“  އާމިލާ ކިޔައިދިނެވެ. ޒަންޔާ އެހެންހޭ  ބުނެ ހީލިއެވެ. އަލުން ކާކޮޓަރިއަށް ވަންނަން ހިނގައިގަތެވެ. އޭރު  ހައިކަލް އާއި ސަދަފް ވެސް އޮފީހުން އައިސް ގެއަށް ވަންނަނީއެވެ.

ސަދަފްއަށް ލޯ އަޅާލައިގެން އިން މަންހާ ފެނި މޫނަށް ވައްތަރެއް ޖައްސާލާފައި ކާކޮޓަރިއަށް ވަނެވެ.

”މަންހާ، ދޭބަލަ މަންމައާއި ބޭބެއަށް ގޮވަން“ އެތެރެއިން އާމިލާ ގޮވާލުމުން އިނދެ އިނދެފައިވެސް މަންހާ ގޮސްފިއެވެ.

”ތިއްތިބޭ.. މިމީހުން ކޮން އިރަކުން ތަ ދަނީ.. އައި ސްވެއާރ މި ވީކް ގަ ނުގޮސްފިއްޔާ ގެއަށް ޗޭންޖް ވާނަން ..“ ވިޝާމް އައިސް ކޮނޑަށް އަތް ވައްޓާލުމުން ސަދަފް ވާހަކަ ދެއްކިއެވެ. ވިޝާމް ވެސް ފޫހިވެފައި ހުރެ ތުން ފިއްތާލިއެވެ.

”މަށައް ހީވަނީ އޭނަ ޒަންއާއި ދިމާލަށް އެއްޗެއް ކިޔަނީ ހެން ނޫނީ އަޕްސެޓް ވާ ކަހަލަ ކަމެއް ކުރީހެން.. ކުޑަކޮން އޮފް ހެން ހީވި ..އެހީމަ ވެސް ބުނި ކަމެއް ނުވެއޭ.. މަ އިންޒާރު ދިނީމަ ވެސް މަންހާ ނޫޅުނު ދޯ މިގެއިން ހަމަ ދާކަށް.. އަދި ހަނދާން ނެތިފައޭ މިހުންނަނީ، މަހާއްކޮ އިން ހޭ ޖަހާފަ.. އަދި ރެސްޕޯންސްއެއް ނުދެވިގެން މިއުޅެނީ“ ވިޝާމް  ބުނެލި ވާހަކަ އަކުން އިހުނަށް ވުރެން ބޮޑަށް ސަދަފް އަނގަ ހަނދާލިއެވެ.

”ހޫންން އެއްކަލަ ޝެޑީ… އަނގަޔަށް ޖައްސާ ވައްތަރު ..ހަހަހަ.. މިހާރު މަހާއްކޮ ވެސް ބޮޑުވެފަ އެހުރީ.. އެހެންނެއް ނޫން ކަންނޭގެ އުޅޭނީ ދެން ފެންނަ އިރު.. ޝީ އިޒް ދި ބެސްޓް ހަމަ އެގެ އިން.. މިތިބަ ދެ މާކަނައަށް ވެސް އޭނަގެ ފަރާތުން ހެޔޮ ސިފައެއް ވާރުތަވި ނަމަ“ ޝާއިރާއާއި މަހާ އަންނަ ތަން ފެނި ދެމީހުން އެތެރެއަށް ވަނެވެ. ވިޝާމް ވާހަކަ ދެއްކި ގޮތުން ސަދަފްގެ ގާތައް ހިނިއަންނަ ގޮތްވިއެވެ. ދެމީހުން ވަތްއިރު އާމިލާއާއި ހައިކަލް ދިޔައީ ވާޙަކައެއް ދައްކަމުންނެވެ.

”މަންހާގެ މަންމަ ކީކޭ ބުނީ ތިކަމާ؟“ ހައިކަލް އިނދެ ޒާތަކަށް އަހާލިއެވެ. އާމިލާ ދައްކަމުން ދިޔައީ ހައިކަލް މާ ރުހޭ ވާހަކަ ތަކެއް ނޫނެވެ.

“މިއޮތް އައީނު.. ޝާއިރާ، މަންހާ އެދެފި ކަމަކަށް.. އޭނާ ބޭނުންވަނީއޯ ރެސްޓޯރެންޓް ގަ ވޯކް ކުރަން.. އޮފީސް ދާއިރާއިން ރަނގަޅަށް ތައުލީމް ހާސިލް ކޮށްފަ ހުރެމެ، އޭނަ ބަދިގޭގެ ޖޮބް އެއް ބޭނުން ވަނީ.. އެހެން މިކިޔަނީ ހައިކަލް ގާތު“ ހައިކަލްގެ މޫނުމަތިން ފެނުނު އަސަރުތަކުން އެކަމާއި އޭނާ ހިތްހަމަ ނުޖެހޭކަން އިތުރަށް ބުނެދޭކަށް ނުޖެހުނެވެ. ނަމަވެސް ވަޒީފާއަށް ގޮސްގެން ވެސް، ހަރުދަނާ ވެ މަންހާގެ އުޅުމުގައި ހުންނަ ޅަ ގޮތްގަނޑު ބަދަލްވާނެ ކަމުގެ އުއްމީދުގައި އާމިލާ ވާހަކަ ދެއްކިއެވެ. މަންހާގެ ގާތުގައި އެދުނީމަ ވެސް އޮފީސް މަސައްކަތެއް ކުރުމުގެ ހިޔާލެއް އޭނާގެ ނެތެވެ.

ޝާއިރާ ބަލައިލީ މަންހާގެ މޫނަށެވެ. އިސްޖަހައިގެން ޖޫސްތަށި ތުމުގައި ޖަހައިގެން އިން އިރުވެސް ތުންފަތުގައި ދުވެ ދުވެލަ ހުރި މަކަރުވެރި ހިނިތުންވުމެކެވެ. ދެން އާމިލާގެ މޫނަށް އޭނާ ބަލައިލިއެވެ.

”މަންހާއަކީ ކިޔަވައިގެން ހުރި ކުއްޖެއް.. ގޭގައި ނުހުރެ ކިޔެވި އެއްޗެއް ގެ ބޭނުން ހިފަން ވަޒީފާގެ މާހައުލަށް ނުކުމަންނަން ވީ ވަގުތު މިއީ.. އެއްވެސް މަސައްކަތަކީ ދެރަ މަސައްކަތެއް ނޫން.. ތި މަސައްކަތަކީ ވެސް މަންހާ ބޭނުންވާ ކަމެއް ނަމަ އިއުތިރާޒެއް ނެތް“ ހައިކަލް ވާޙަކަ ދެއްކިއެވެ. އޭނާ ވާހަކަ ދެއްކީ ހިތާ ދެކޮޅަށެވެ. އެއްޗެއް ނުބުނެ އިންނަން ފެށުމުން އާމިލާ ކޮއްޓާލާފައި އެކަން އޭނާގެ ސަމާލުކަމަށް ގެނައީއެވެ.

ޝާއިރާގެ ތުންފަތައް ވެރިވާން އުޅުނު ވިހަ ހިނިތުންވުމުގެ އަސަރުތައް ފޮރުވާލިއެވެ. އެހުރިހާ އިރު އޭނާގެ މޫނަށް ކަޅި ޖަހާނުލާ ބަލަން އިން ސަދަފް ފެނި ލޯ އަޅާލާފައި ވެސް އޭނާ ވާހަކަ ދައްކަން ފެށިއެވެ.

”އާން ވަރަށް ރަނގަޅު ކަމެއް ތިއީ.. މަންހާ ވާނެ ތި ވަޒީފާއަށް ކަމޭހިތަން .. ބޭބެގެ ތަނަކަށް ވިޔަސް އެތަނަކީ އާއިލީ ތަނެއްގެ ގޮތުގަ ނުދެކި ރެސްޕޯންސިބިލީޓީ ފުރިހަމައަށް ނަގައިގެން ވޯކް ކުރާތި… އާޝިއު ވެސް މަސައްކަތައް ނުކުންނަން ފެށީއެ، އަހަރެން ވެސް ގޭގައި ފޫހިވެފައި އިނުމުގެ ބަދަލުގައި ކޮންމެވެސް މަސައްކަތެއްގައި އުޅެލަން ދާންވީ ކަންނޭނގެ“ ޝާއިރާ ވާހަކަ ދައްކަމުން ދިޔައިރު އެވާހަކަތަކާއި މެދު ހިތްހަމަ ޖެހިގެން އާމިލާ ހިނިތުންވެފައި އިންގޮތުން ޝާއިރާ ހިތުގެ އަޑިން ދިޔައީ މަލާމާތް ކުރަމުންނެވެ.

”މޮޔަ އަންހެނާ.. މީ އަދި ފެށުން! މިވަގުތައް ހިތްހަމަ ޖެހިލާ!.. އަހަރެންގެ މުޅި ލައިފް ރުއިން ކޮށްލާފަ ތިހެން ހޭކަށް ނީނދެވޭނެ.. ހަހައްހާ، އަމިއްލަ މީހާގެ ކަރަށް މަޅިފަތި ހެޔޮވަރު ކޮށްލެނު އިރުވެސް ނޭނގުނު، ދެން ވާ ގޮތް ބަލަން އިނދޭ!“ ޝާއިރާގެ ސިކުނޑީގައި ގުގުމަމުން ދިޔައީ ބަދަލުހިފުމުގެ ޝުޢޫރުތަކުން ފުރިގެންވީ މަކަރުވެރި ހިނިގަނޑެކެވެ.  ނަމަވެސް އެ ހިމޭންކަމުގެ ބޭރުފުށުން މަޑުމައިތިރިކަން އިޙްތިޔާރު ކޮށްގެން އިނެއް ކަމަކު އެތެރެހަށީގައި ގައިވީ ނުރައްކާތެރި ތޫފާނެކެވެ. އެވަގުތުވެސް ސިކުނޑީގައި ރޭވެމުން  ދިޔަ މޮޅު ހިޔާލުތަކުން ހިތާއި ނަފްސުގާއި ވެސް ވަނީ އާދަޔާއި ހިލާފަށް ޖޯޝާއި ފޯރި ހިފާލާފައެވެ. ދޭތެރެއަކުން މަންހާއާއި ބައްދަލްކޮށްލާ ސިއްރުވެރި ނަޒަރުތައް އިތުރު ފަރާތެއްގެ ލޮލުގައި އަޅައިގެތް ކަމެއް ނޭނގުނެވެ.

”އެހެންވީމަ ދެދުވަސް ފަހުން ނުކުމޭ.. ޒަން ވެސް ވިޝާމް ވެސް ނުކުންނާނެ އޭރުން.. އެޗް އާރަށް އަންގާލާފަ ބާއްވާނީ.. ކޮން އޭރިއާއަށް ބޭނުންވަނީ؟“ ހައިކަލް ސުވާލުކުރިއެވެ. އޭނާގެ ފަރުވާތެރި ނަޒަރު ހުރީ ސީދާ މަންހާގެ މޫނަށް ހުއްޓިފައެވެ.

”ކިޗަން އިން އޯކޭ ކޮންމެ ވަޒީފާއެއް ވެސް“

”މަންހާއަށް ކައްކަން އެނގޭތަ؟ އެކަމާ ގުޅޭ އެއްވެސް ސެޓްފިކެޓެއް ނޫނީ ތަޖުރިބާއެއް އެބައޮތްތަ؟“ ހިތުގައި އުފެދުނު ޝައްކުތައް ކޮންޓްރޯލް ނުކުރެވިގެން ސަދަފްއަށް އެހުނެވެ. އެއާއެކު ޝާއިރާގެ ނަޒަރު ސަދަފްއަށް ހުއްޓިގެން ދިޔައީ ފިއްސާލާ ފަދަ ތޫނު ގޮތަކަށެވެ. ނަމަވެސް ސަދަފްގެ މޫނުމަތިން ޖެހިލުންވުމުގެ އެއްވެސް ކުލަވަރެއް ފާޅެއް ނުވިއެވެ.

“މިހާރު އެހުރި ސްޕެއިން ކެއުންތަކައް އެހުރި ޒުވާން ޝެފް ވެސް އެއީ މާގިނަ ސެޓްފިކެޓެއް އޮތް ކުއްޖެއް ނޫން ކަމަށް ވަނީ.. ވީ އިރު މަންހާ-؟“

”އަމީރާގެ ވާހަކަ ތަ ތިކިޔަނީ؟ ޝާއިރާއަށް ކިހިނެތް އެނގުނީ އެމީ؟ އެހެންނޫނަސް އެމީއަށް އެ ފުރުޞަތު ދިނީ އަހަރެމެންގެ އިރުޝާދުގެ ދަށުން ހެދުނު ވަރުގަދަ އިމްތިހާނަކުން އޭނާގެ ކުޅަދާނަކަން ސާބިތުކޮށްދިނީމަ“ އަމީރާއާ ބެހޭގޮތުން ޝާއިރާ ދެއްކި ވާހަކައިން އާމިލާގެ މޫނުމަތިން ނުރުހުމުގެ ކުލަވަރު އިންތިހާއަށް ފާޅުވިއެވެ.

”ސޮރީ ދޮންތާ.. އެގޮތަކަށް ނޫން މިބުނަނީ.. މަންހާ ވެސް ނުލާހިކު ކައްކާ ހަދަން މޮޅުވާނެ.. އޭނައަށް ވެސް އިންތިހާނެއް ޖައްސުވާ އަޅެ ހުނަރު ބަލާލަން ވީނު..“ޝާއިރާ މަސައްކަތް ކުރީ އާމިލާގެ ހިތް މަޑުކުރެވޭތޯއެވެ.

”ނޫނޭ! ހުރިހާ ސެކްޝަނަކަށް ޝެފުން ތިބީ ހަމަވެފަ… އެނގޭތަ މުޅި ރެސްޓޯރެންޓުން ވެސް އެންމެ ޑިމާންޑް ބޮޑީ ކަހަލަ ޑިޝްތަކެއްގަ ކަން؟ ސްޕެނިޝް ! އެމީ އައި ފަހުން، އެމަގާމުގައި ކުރިން ހުރި ޝެފްއަށް ނުލިބޭ ފަދަ ތަރުހީބުތަކެއް ވަނީ ހޯދާފަ… ޝާއިރާ ތިބުނިހެން މަންހާގެ ހުނަރު ބެލިދާނެ. އެކަމަކު ވަކި ފަރާތެއްގެ އަގުވައްޓާލައި، ފާޑުކިޔުމުގެ ތެރެއިން މަންހާގެ ކުރިމަގު ބައްޓަމެއް ނުކުރެވޭނެ… އެއީ މަންހާގެ ހުނަރު ތަރައްގީވާނެ ކަމެއްވެސް ނޫން!“ ހައިކަލްގެ ވަރުގަދަ ޖަވާބުން ޝާއިރާ ލަދުން ގޮސް ރަތްވިއެވެ.

”ނޫނޭ ނޫނޭ.. މިބުނަން އުޅޭ ވާހަކަ އަކީ މަންހާގެ ވެސް ނެތޭ މި ދާއިރާއަކަށް ހުނަރެއް.. އެކަމަކު އަމަލީ ގޮތުން މަސައްކަތުގެ މައިދާނަށް ނުކުމެ، އެކި ޓާސްކުތަކާ ކުރިމަތިލުމުން ކުރިއެރުން ލިބޭނެތާ ދޯ… އެވާހަކަ .. އެކުއްޖާ މިސާލަކަށް މި ނެގީ އެހެންވެ.. ސީދާ ކެއްކުމަކަށް ނޫން.. މަންހާ ބޮޑަށް ބޭނުންވަނީ ވެސް ކަންކަން ދަސްކުރަން ދޯ އަދި.. އެހެންވީމަ އެމީހުން ކައިރީގަ އުޅެގެން ދަސްވާ ކަހަލަ ކަމެއްވެސް ޖެއްސިދާނެ“ ހައިކަލްގެ މޫނުން ފެނުނު ހިތްހަމަނުޖެހުމުން، ޝާއިރާގެ ވާހަކައިގެ މިސްރާބު ވަގުތުން ބަދަލުކޮށްލިއެވެ. އަލުން ބަލައިލި ހިނދު ހައިކަލްގެ މޫނުމަތީގައި ހުރި ހިތްހަމަނުޖެހުން ފިލާ އެވާހަކަތަކާއި މެދު އެއްބަސް ވުމުގެ ގޮތުން ބޯޖަހައިލިއެވެ. އެކަމުން ޝާއިރާގެ ނަފްސަށް ހަމަޖެހުމުން ލިބި، ފިނި ނޭވާއެއް ދޫކޮށްލެވުނެވެ.

”އެތެދެއް ބޭބޭ.. އޮފީސް ދާއިރާއިން ކިޔެވިޔަސް، މިޙާރު މުޅިން އާ ކަމެއް ތަޖުރިބާ ކޮށްލަން ބޭނުންވަނީ… އޮފީސް ދާއިރާއިން ކިޔެވިޔަސް އެއްވެސް ވަރަކަށް އޮފީހަށް ދާކަށް ބޭނުމެއް ނޫން.. އެކަމަށް މާ ބޮޑު ޝައުގެއް މިހާރު ހަމަ ނެތީ.. ބޭބެ ތިބުނިހެން އެއްވެސް މަސައްކަތަކީ ދެރަ މަސައްކަތެއް ނޫން.. ކުރަން ކެރުން އޮންނާނީ… ބަދިގެ މަސައްކަތަކީ އަހަރެން ވަރަށް ކުރާ ހިތްވާ މަސައްކަތްތަކެއް“ ނިޔަނެތިކަމާއި އެކު މަންހާ ވާޙަކަ ދެއްކިއެވެ. ވިޝާމްއާއި ސަދަފްގެ ރުޅިވެރި ނަޒަރު ސީދާވެފައިވީ ކަން އެނގިހުރެ އޭނާ އިނީ ނުހަނު ހަމަޖެހިލައިގެންނެވެ.

”ތިހެން ވީ އިރު، މަންހާ ދެން ކީއްވެ ޔޯ މިގޭ ބަދިގެއަށް ނުވަންނަނީ؟“ އަނެއްކާ ވެސް ސަދަފް ބުނެލައިފިއެވެ. އެ ޖުމްލައިން ހައިކަލްއަށް ހެވިގެން އަނގަމަތީގައި ނުފުށުން އަތް ބާއްވާލެވުނެވެ. އޭނާ ބަލައިލި އިރު އާމިލާއާއި ވިޝާމް ވެސް ތިބީ ހޭން ބޭނުންވެ ނުކެރިފައެވެ. މަންހާ ދެލޯ އަޅާލާފައިވެސް އެއްޗެއް ބުނާކަށް ނޫޅުނެވެ.

”އެހެންވީމަ ރަނގަޅު..މައްސަލަ އެއް ނެތް! އެތަނުން ރަނގަޅު ވަޒީފާއެއް ހަމަޖައްސާނަން.. ތިބުނިހެން ކަންކަން ދަސްކުރަން ބޭނުންނަމަ އެކަން ވެސް ކޮށްދޭނަން.. މަންހާ ވާނެ އެހެން ކުދިންނާއި ވެސް ގުޅިގެން އުޅެން.. އެތަނަކީ އެންމެން އެކަކު އަނެއްކަކާއި ނުހަނު ގުޅިގެން އުޅޭ ތަނެއް.. ބޭރު މީހެއް ރާއްޖެ މީހެއް، ކުޑައެއް ބޮޑެއް ނޯންނާނެ.. މުއްސަންޖެއް އަދި ފަގީރެއްގެ މެދުގައި އެއްވެސް ފަރަގެއް ނޯންނާނެ. އެންމެންނަކީ ވެސް ހަމަހަމަ ބައެއް…މުއައްޒަފުންނާއި ޒާތީ ކަމެއް ބާއްވާ ޖައްސާލާ ނުވަތަ ފޮށުމުގެ ޖާގައެއް ނޯންނާނެ.. ބޭބެ މިކަން ހަނދާން މިކޮށްދިނީ ކޮންމެހެން މަންހާ ކުރާނެއޭ ހިތައް އަރުވާފައެއް ނޫން.. އެކަމަކު މިއީ ބޭބެ ހަދާފަ ހުރި ގަވާއިދުތަކުން ވެސް އެންމެ މުހިއްމު ކަންކަން.. އެހެންވެ މަންހާއަށް ހަނދާން ކޮށްލަ ދިނީ މި“ ކައިގެން ތެދުވަމުން ހައިކަލް ބުނެލިއެވެ. އަދި މަންހާއަށް ބަލައިލުމަށްފަހު ހީލިއެވެ.

”އެހެން ވީމަ ތައްޔާރުވޭ މާދަމާ ނޫން އަނެއް ދުވަހު ނުކުންނަން“ އާމިލާ ވެސް ހިތްހަމަޖެހިފައި ހުރެ އެވާހަކައިގާ ބައިވެރި ވެލިއެވެ. ހައިކަލް ބޯޖަހައިލިތަން ފެނި ކާމިޔާބީގެ ހިނިތުން ވުމަކުން މަންހާގެ ތުންފަތް ފަވާލިއެވެ.

އެހެން އެކަކަށް ފާހަގަ ނުވިނަމަވެސް މަންހާއާއި ޝާއިރާ ބައްދަލް ކުރަމުންދާ ނަޒަރުތަކާއި ވިހަ ހިނިތުންވުންތައް ސަދަފްއަށް ފެންނަމުން ދިޔައެވެ. އެ މާހައުލުގައި އެއްޗެއް ނުބުނެ ތެދުވެގެން ނުކުތް އިރު އޭނާގެ ބޮލުގައި ހުރީ ޒާތަކައް ރިއްސައިގަނެފައެވެ. ހިތުގައި ނުބައި ޒާތެއްގެ ބިރުވެރިކަމެއް ވެސް އުފެދުނެވެ. އައުމަށް އެދި ވިޝާމްއަށް އިޝާރާތެއް ކޮށްލާފައި ސަދަފް ޓެރެހަށް އެރިއެވެ. އޭނާގެ ވިސްނުމުގައި ހަރުލާފައި ހުރީ އިއްޔެގެ ހާދިސާއެވެ.  މަންހާ އައިސް އަމީރާއައި ދެކޮޅަށް ވާހަކަ ދެއްކިގޮތެވެ. އަނެއްކޮޅުން މިއަދު ޝާއިރާ އެވެ. އެމީހުންގެ ދަށުން މަސައްކަތް ކުރާ އެތައް ބަޔަކު ތިއްބާ އެންމެންގެ ތެރެއިން އަމީރާގެ ވާހަކަ ނެގީ ކީއްވެބާއެވެ. އަމީރާއަށް ވުރެން ފަހުން ވެސް އެފަދަ މަގާމަކަށް ހައިކަލް ވަނީ އެއުމުރުގެ އެހެން ކުއްޖަކު ގެނެސްފައެވެ.

”ބޯ ފަޅައިގެން ދާވަރުވޭ.. މީދެން ކިހާ ބޮޑު މުސީބާތެއް.. ސަލާމަތެއް ވެސް ނެތްތަ މިކަމަކުން؟ މަންހާއޭ ކިއުނު މުސީބާތް، މިހާރު އެ ފާވެގަތީ އެތަނަށް.. އެތަނުން އެކަކަށްވެސް ސަލާމަތެއް އޮތްހެންނެއް ހިއެއް ނުވޭ“ ސަދަފް ފެނުމާއި އެކު، އެހުރިޙާ އިރު ހިފަހައްޓައިގެން ހުރި ރުޅިގަނޑު ވިޝާމް ދޫކޮށްލިއެވެ. އާމިލާއާއި ހައިކަލްގެ އެދުމަކަށް ދެކޮޅު ހަދާފައި ނުވާތީ އެއްޗެއް ނުބުނަން އިނަސް މަންހާ ދިޔުމަށްފަހު މުޅިތަނަށް އަންނާނެ ބަދަލް މިހާރުވެސް ވިޝާމްއަށް ސިފަވާ ކަހަލައެވެ.

”ތިއްތިބެ، އިޔާންގެ ބެސްޓްފްރެންޑެއްނު.. ސޯ އޭނަގެ ކައިރިންވެސް އެނގިފަ އެބަ އޮތްތަ އަމީއާއި މަންހާއާ ދެމެދު ކުރިންވެސް އެއްވެސް ކަހަލަ ގުޅުމެއް ނުވަތަ ކަނެކްޝަނެއް އޮތްކަން؟“ ސަދަފްގެ ސުވާލު ހުރީ މުޅިން ތަފާތު މިސްރާބަކަށެވެ. ވިޝާމް ބަހެއް ބުނުމުގެ ބަދަލުގައި، ދެފަރާތަށް ބޯހޫރުވާލަމުން ނިތްކުރި އަރުވައިލީ ކިހިނެއްވީތޯ ސުވާލުކުރާ ފަދަ ނަޒަރަކުންނެވެ.

”އައި ފީލް ވިއަރޑް.. ރީއްކޮ ގެބިގެން ގެނައި ވަގުތު އެތާގަ ނެތަސް، އެނގެއެންނު މަންހާ ކަންތައް ކުރިގޮތް… ސީދާ އެމީއާއި ދެކޮޅަށް ފެށީ.. މަ ހުރީ އޭނައަށް ވުރެން ދުރުގަ..އެކަމަކު މަށައްވެސް އެމީ ބޮލުގަ އަތް އަޅައިގެން ތިރިވިތަން ފެނުނު.. މަންހާއަށް ވެސް ގައިމު ފެންނާނެ.. އެކަމަކު ދޮގު ހަދާލީ… ދެން މިއަދު އެ ޝާއިރާ.. އެންމެންގެ ތެރެއިން ވެސް އެމީ ނެގީ.. އަނެއްކަ މަންހާ ކިޔަވާފަ ހުރީ އޮފީސް މެނޭޖްމަންޓު ދާއިރާއިން… އޭގެން މާސްޓާރސް ހަދާފަ ހުރި މީހަކު ކިހިނެތް ވެގެންބަ ބަދިގެއިން ވަޒީފާ ހޯދަން މިއުޅެނީ؟ މަންހާ އަކީ ނުލާހިކު ރޯޔަލް މޭފުޅެއްނު“ ސަދަފް ވާހަކަ ދެއްކިއެވެ. ވިޝާމްއަށް ބަލައިލި އިރު ސަދަފްގެ ވާހަކަތަކުން ވިޝާމް ފުން ވިސްނުމެއްގެ ކަނޑަކަށް ޣަރަގުވެއްޖެކަން މޫނުމަތިން ފާޅުވާން ހުއްޓެވެ. އެއްޗެއް ނުބުނެ ހުރެ ގޮނޑީގައި އިށިންދެއްޖެއްވެ.

ސަދަފް ބުނެލި ވާހަކަތަކުން ވިޝާމްގެ ސިކުނޑިއަށް ބާރުވެގަތެވެ. އަމީރާއާއި މެދު ހިތުގައި އުފެދިފައިވާ އޮއިވަރު ގަދަވެފައިވާ ދަނޑިވަޅެއްގައި، މި ވާހަކަތަކުން އިތުރު ސިކުނޑީއަށް އިތުރު ބުރަދަނެއް ލިބުނެވެ. އަޖައިބުވަނީ، އަމީރާގެ ނަން ކަންފަތުގައި ޖެހުމާއެކުވެސް، ހިތުގެ ކަނަކުން ކޮންމެވެސް މާޒީއެއްގެ ހަނދާންތަކެއް އާކޮށްދޭން އުޅޭހެން ހީވާތީއެވެ. ފޮރުވިފައިވާ ބޮޑު ހަގީގަތެއްގެ ހިލަމެއް ހިތަށް ވަމުންދާ ކަހަލައެވެ.

”ޝެޑީއަށް ޖަވާބެއް ދިނުމުގެ ކުރިން ފުރަތަމަ އެމީއާއި މިއޮތް ގޮތް ނޭނގޭ ކަނެކްޝަން ބަލަން ވީ.. މިހާރު ދެން ވެޑިންގް ވެސް ނިމުނީތާ.. އެކަމަކު މިކަމުގެ ތެރެއަށް އިޔާން ނުވައްދާ މިކަމެއް ނުވާނެ.. އަނެއްކޮޅުން އެމީގެ މައުލޫމާތު ޒަންގެ ކައިރިން ވެސް ލިބޭނެ ކަންނޭގެ.. މްމްމް.. އިތުރު މީހަކަށް މިވާޙަކަ ހިއްސާ ކުރަން ބޭނުމީ ވެސް ހަންޑްރެޑް ފަސެންޓް ޔަގީންވީމަ.. މިހާރު ވެސް ނައިންޓީ ޕަސެންޓް ޔަގީން.. އައިލް ޑޫ ދިސް“ އަމިއްލަ ޒަމީރަށް ވިޝާމް ވައުދުވެލިއެވެ. މި ސިއްރުގެ ފަރުދާ ކަޝްފު ނުވަނީސް ނޫނީ އޭނާގެ ނަފްސަށް ހަމަޖެހުމެއް ލިބޭނެ ކަމެއް ނޭނގެއެވެ.

”ކިހިނެތް އެހެންވާނީ؟ އެމީ އެކޮޅުން އައިގޮތައް މާގިނަ ދުވަހެއް ނުވޭ ޖޮބްއަށް ނުކުންނަން ފެށީ.. އޭގެ މާފަހުން މަންހާ އައީ.. މަންޙާއަކީ މީހުންނަށް  ނިކަން އަވަހަށް ހަސަދަލާ މީހެއް ….މްމްމް.. އެހެންވީމަ ދެން ވަރަށް ރަނގަޅަށް ބަލަން ޖެހޭނެ ދޯ އެމީއަށް.. އެންމެންގެ ތެރެއިން އެމީ އެ ނެގީ، މަށާއި ޒަން ދެއްކި ޥާހަކަ އަކުން.. އަހަރެމެން ދެމީހުން އެވާހަކަ ދެއްކި އިރު ނޭނގޭ ޝާއިރާ އައިސް ވަތްކަމެއް.. ޒަން ބުނީ އެމީ ވަރަށް މޮޅޭ ކައްކަން.. ދެން މަ ކިޔައިދިނިން އެމީއަށް ޖޮބް ލިބިފަ ހުރި ގޮތް.. އެގަޑީގަ ޝާއިރާ އައިސް ވައްޓާލީ..  އޭނައަށް އިވޭނެ ވަރަށް ރީތިކޮން..އެކަމާއި ހަސަދަވެރިވެގެން މަންހާ ގޮސް އެމީ އާ ޖެހިގަންނަން ވެސް ފަހަކަށް ނުޖެހޭނެ “ ވިޝާމް ކިޔައިދިނެވެ. ސަދަފް ހަމައެކަނި ”އެހެންހޭ“ ބުނެލި ނަމަވެސް، އޭނާގެ ހިތް އޮތީ ސުވާލުގެ އޮއިވަރެއްގައެވެ. ޝާއިރާއާއި މަންހާ އެކަކު އަނެކަކަށް ބަދަލުކުރި ނުރައްކާތެރި ނަޒަރުތައް ފެނުނީ ހަމައެކަނި އޭނާއަށެވެ. އެ ވަގުތު ޒަންޔާގެ ފޯންކޯލެއް އައުމުން ވިޝާމްއަށް ދާން މަޖުބޫރުވިއެވެ.

”ޒަން މެންގެ ގެއަށް ދާން ވެގެން ކިޔާފަ އައިސް މިހުންނަނީ.. މިރޭ ވާނެ ކޮފީއަކަށް ދާން“

ދަމުން ސަދަފްގެ ކޮނޑުގައި އަތް ޖައްސާލަމުން ވިޝާމް ދިޔައެވެ. ބޯޖަހާލާފައި އޭނާ ގޮސް  ހުއްޓިލީ ބިއްލޫރި ރެއިލިންގް ކައިރީގައެވެ. ހާމައަށް އޮތް ބެލްކަންޏަށް ނުކުމެވުމާއެކު، ފިނިފިނި ލުއި ވައިރޯޅިތަކުން އޭނާގެ މޫނުގައި ބޮސްދޭން ފެށިއެވެ. އެ ފިނިކަމުން، ހާސްކަމާއި ނުތަނަވަސްކަމުން ފުރިފައިވާ އޭނާގެ ސިކުނޑިއަށް ކޮންމެވެސް ވަރެއްގެ ތާޒާކަމެއް ލިބުނެވެ.

އެތާގައި ހުންނައިރު ބަގީޗާއާއި ގޭގެ ބިއްދޮށުގައި އޮންނަ ފަތާ ފެންގަނޑު ހިތްގައިމު ގޮތަކަށް ފެނެއެވެ. އެ މަންޒަރަށް ގެއްލިފައި ސަދަފްއަށް ހުރެވުނީއެވެ.

****

ކުލާސްތައް ނިމި ހޮސްޕިޓަލުގައިވެސް ބުރަ ދުވަހެއް ކަމުން އިރަމް ހުރީ ހިސާބަކަށް ވަރުބަލިވެފައެވެ. ދަބަސް ކޮނޑުގައި އަޅުވާލައިގެން ހުރެ ކަންނެއް ގޮތަކަށް ހިނގަމުން އައިސް ވެއިޓިންގް އޭރިއާގައި މަޑުކޮށްލިއެވެ. އިރު އޮއްސުމުގެ ރަން ކުލަތަކުން އުޑުމަތި ފަވާލަމުން ދިޔަ އެ ހިތްގައިމު ވަގުތުގައިވެސް، މަގުމަތީގެ ހަލަބޮލިކަމަކަށް ބަދަލެއް ނާދެއެވެ. ދުއްވާ އެއްޗެހީގެ އަޑާއި މީހުންގެ ހަރަކާތްތަކުން މުޅި މާހައުލު އޮތީ ގުގުމާލާފައެވެ. އިރަމް އިށީންދެލައިގެން އިން ބެންޗް ފުރަގަހުން، އިމާރާތުގެ އެތެރޭގައި ވާ ބިޔަ އަނބުގަހުގެ އޮފިތައް ބޭރަށް ފެތުރި ލާފައިވާ ގޮތުން އޮތީ މަތި ބެދިފައެވެ.

ގަހުގެ އޮފިތަކުގެ ދޭތެރެއިން ދަތުރުކޮށްލާފައި އައި އިރުގެ ރަން ދޯދިތައް އިރަމްގެ ދޮން މޫނަށް ބޮސްދެމުން ދިޔައެވެ. މަޑުމަޑުން ލޯ މަރާލިއެވެ. އެވަގުތަކީ އޭނާގެ ނަފްސަށް އާދަޔާއި ހިލާފް ހިތްހަމަ ޖެހުމެއް ލިބިގެންދާ ވަގުތެކެވެ. ދުވަހުގެ އެންމެ ކަމުދާ ވަގުތުކޮޅެކެވެ. ލުއި ވައިރޯޅި ތަކުން ފަން އިސްތަށިކޮޅު ވަޔަށް ވިހުރިލަމުން ދިޔައިރު، އިރަމް އެހިތްހަމަޖެހުމަށް ހިތް ދޫކޮށްލައިގެން އިނެވެ. އެހެން އިންދާ ސިހުނީ މީހެއްގެ އަޑު ދާދި ގާތުން އިވިފައެވެ. އިރަމް ލަސްލަހުން ލޯ ހުޅުވާލި އިރު ކުރިމަތީގައި ފެންނަން ހުރި ސޫރައަކުން ސިހިއްޖެއެވެ.

*****

(ނުނިމޭ)