ހިރާސް 2 (20)

ކާރުން ފައިބަމުން އިޒްވާ ބަލައިލީ ކުރިމަތީގައި ފެންނަން ހުރި ޔަޒަކްއާއި މިލާންގެ ގެއަށެވެ. އެތައް ދުވަހެއް ފަހުން އެގެއަށް އާދެވުނު ހިނދު އޭނާއަށް ކުރީ ތަފާތު އަސަރެކެވެ.

”ރެޑީ؟“ ފަހަތުގައި ހުއްޓިލި އީތަންއަށެވެ. ފުންނޭވާއެއް ލަމުން އިޒްވާ ބޯޖަހައިލިއެވެ. އިޒްވާގެ އަތުގައި ހިފާލައިގެން އީތަން ހިނގައިގަތް އިރު ގޭޓާއި ހިސާބުން ހުއްޓެން މަޖުބޫރުވީ މާދުރު ނޫން ހިސާބެއްގައި މަޑުކޮށްގެން ހުރި ނޫހް ފެނިފައެވެ. ފޯނު ކަންފަތުގައި ޖަހައިގަތް އިރު އޭނާއަކަށް އެމީހުންނެއް ނުފެނެއެވެ. އިރުކޮޅަކާއި ކަންފަތާއި ފޯނު ދުރުކޮށްލަމުން ސްކްރީނަށް ބަލާލާ ގޮތުން ހީވަނީ ގުޅަން ބޭނުންވާ މީހަކަށް ނުގުޅިގެން އުޅޭހެންނެވެ.

އިޒްޥާއަށް ބަލައިލެވުނީ އީތަންގެ މޫނަށެވެ. އޭރު ލަސްލަހުން އެ މޫނަށް ވެރިވި ރުޅިވެރިކަން ފެވި ރަތްކުލަ ފާއްދާލާފައިއެވެ. އިޒްވާގެ އަތައް އީތަންގެ އަތްތިލަ ބާރުވަމުން ދިޔަ ގޮތުން އީތަންގެ ރުޅި އަންދާޒާ ކޮށްލެވުނެވެ. ދެން ފެނުނީ އެއަތުން ދޫދީފައި އީތަން އެދިމާލަށް ހިނގައި ގަތްތަނެވެ.

****

”އީތަން .. ނޫން… ނޫން“ އީތަންގެ ބަނޑުގައި އިޒްވާ ބާރަށް ހިފެހެއްޓިއެވެ. ނޫހްއަށް ފެނުމުގެ ކުރިން، ގަދަކަމުން ކަހަލަ ގޮތަކަށް ގޮތަކަށް އީތަން އެގޭ ތެރެއަށް ވެއްދިއެވެ. ކައިވެނިކުރެވޭ ދުވަހަށް ވެފައި އެހާ ވަގުތު ކުޑަކުޑަތަން ވެފައިވަނިކޮން ހަމަނުޖެހުމެއް ހިނގާ، ބޭކާރު އަރައިރުމެއްގެ ސަބަބުން އެ އުފާވެރިކަމަށް ހިޔަނި އެޅޭކަށް އިޒްވާ ބޭނުމެއް ނުވިއެވެ.

”ކާމްޑައުން.. ކާމްޑައުން! “ އީތަން ރުޅިވެރި ނަޒަރަކުން ބަލައިލުމުން އިޒްވާ ޖެހިލުންވެފައި ހުރެ އީތަންގެ އަތުގައި ހިފަހައްޓާލިއެވެ.

”ނޯވޭ!  އިޒީ އަދިވެސް އޭނާ ހިމާޔަތް ކުރަން  ބޭނުންވޭތަ؟“ އީތަންގެ އަޑުގައިވަނީ ނުރުހުމާއި ހިތްހަމަނުޖެހުމެވެ. ނޫހުގެ ސޫރަ ފެނުމުންވެސް އޭނާއަށް  ކެތްވަނީއެއް ނޫނެވެ. ރުޅިގަދަވެގެން ގޮސް ކަނދުރާގައިވާހާ ނާރުތައް ފުފިގަތެވެ.

”ނޫންން.. ދެން އީތަން! ކިޔާ އެއްޗިހި ! މިވަގުތު ކެތްތެރިވޭ.. އާފްޓަރ ދި ވެޑިންގް، އަމް ޓޯޓަލީ ފައިން ވިތް އިޓް… އެކަމަކު މިހާރަކު ނޫން“

އިޒްވާގެ ވާހަކަ އަޑުއަހާފައި އީތަންގެ ހިތުގައި އަނދަމުންދިޔަ ރުޅީގެ އަލިފާންގަނޑު މައިތިރިކުރަން ގަދަކަމުން މަސައްކަތް ކުރަމުން ދިޔައެވެ. އެއަށްވުރެން ސިކުންތުކޮޅެއް ލަސް ވަނދެން ވެސް އިޒްވާ މަޑޫކޮށްލި ނަމަ އީތަންއަށް މަޑުނުކުރެވުނީހެވެ.

”އަހަންނަށް ހާދަ އުނދަގުލޭ ކޮންޓްރޯލް ކުރަން.. އަދި ލަދެއް ވެސް ނުގަނެ އެންނު މިތަންނަށް އަންނާކަށް“ ފަސް އެނބުރި ނޫހް ހުރި ދިމާލަށް އީތަން ބަލައިލިއެވެ. އޭރުވެސް ފޯނު ކަންފަތުގައި ޖަހައިގެން ހުރިއިރު އެތަނުން ދިޔުމުގެ ވިސްނުމެއް ނުގެންގުޅޭ ކަހަލައެވެ. އީތަންއަށް ދަތް ކުނޑި ވިކައިގަނެވުނެވެ.

ދެމީހުން އެކުގައި އެތެރެއަށް ފިޔަވަޅު އެޅި އިރު، މުޅި ގޭތެރެއަށް ރަސްކަން ކުރަމުންދަނީ މަރުފަދަ ހިމޭންކަމެކެވެ.  ޔަޒަކް އާއި މިލާންގެ އިތުރުން ލޫކް ވީ ލަވާލްމެންގެ ގޭގައެވެ. ގޭތެރޭގެ ހަމަހިމޭންކަން މުގުރާލީ ޔީލާގެ ކޮޓަރިއާ ދިމާލުން އިވެމުންދިޔަ ފަނޑު އަޑަކުންނެވެ. އެއީ މީހަކު ވާހަކަދައްކާ އަޑުހެން ހީވި ނަމަވެސް، ފަރުވާތެރިކަމާއެކު ކައިރިވެލުމުން އެއީ ކޮޓަރީގައި ހުޅުވާފައި ހުރި ޓީވީގެ އަޑުކަން ޔަގީންވިއެވެ. ހިންދިރުވާލުމަށް ފަހު އިޒްވާ ދޮރުގައި ތަކި ޖަހައިލިއެވެ. އެހާ ދުވަސްފަހުން އެގެއަށް އާދެވުނު އިރު ކުރެވެމުން ދިޔައީ ނުބައި އަސަރެކެވެ. ހީވަމުން ދިޔައީ ޔީލާއާ ބައްދަލުވެ ވާހަކަދައްކަން މި އުޅެވެނީ މުޅި ގަރުނެއްގެ މެދުކެނޑުމަކަށް ފަހު ހެންނެވެ. ހަމައެއާއެކު، އަމިއްލަ ނަފްސަށް ލަދުވެތިކަމެއް ވެސް  ވެރިވެއްޖެއެވެ. ދެތިން ފަހަރަކު ޓަކި ޖެހުމުން އެތެރެއިން ޖަވާބު އައެވެ. ހުޅުވާފަ ހުރިކަމަށް ބުނުމުން، މަޑުކޮށްލުމަށް އީތަންގެ ގާތު އިޒްވާ އެދުނެވެ. އެއީ ގޭތެރޭގައި އުޅޭއިރު އާންމު ގޮތެއްގައި ޔީލާ ލައި އުޅެނީ ކުރު ސޯޓުކޮޅު ފަދަ އެއްޗިހި ކަމަށް ވާތީ އެވެ.

”އިޒީ؟؟“  ލަސްލަހުން ދޮރު ހުޅުވާލާފައި އިޒްވާ ބޯ ކޮށްޕާލިއިރު، ޔީލާ އިނީ ސޯފާގައި އިށީންދެލައިގެންނެވެ. ޔީލާއަށް ލިބިފައި ވަނީ ވަރުގަދަ ޝޮކެކެވެ. އިޒްވާ އެގޭތެރެއިން ފެނިދާނެކަމަކަށް އުއްމީދެއް ނުކުރެއެވެ.  އިންތަނުން ތެދުވެވުނީ ވެސް ނޭނގި ހުއްޓައެވެ.

އިޒްވާގެ ލޮލުގައި އަޅައިގަތީ އޭނާގެ ކައިވެނީގެ ހަފްލާއަށް ޔީލާ ތައްޔާރުކޮށްފައިވާ ހެދުމެވެ. ކޮނޑެއްގައި އަޅުވާފައި އިންތަން ފެނުމުން ޔީލާ ހުރީ ހަފްލާއަށް ދާންކަން އެނގި ހިތައް ކުރުވީ ތަފާތު އުފާވެރި އިހްސާސެކެވެ.

”ހައި“ ޔީލާއަށް އެއްޗެއް ނުބުނެވި ހުއްޓާ އިޒްވާ އައިސް އިށީންދެލީ އޭނާގެ ގާތުގައެވެ. ވާހަކައެއް ފެށުމުގެ ކުރިން އިޒްވާ ވިސްނާލިއެވެ. ޔީލާ އެވަގުތު އިނީ ނުހަނު ރަނގަޅު މޫޑެއްގައެވެ. ވޭތުވެ ދިޔަ ތިންދުވަހު ނުކައި ނުބޮއި އޭނާ ރުއިމުގައި ހޭދަކުރިކަން އިޒްވާއަށް އެނގެއެވެ. އެހާ ހަމަޖެހިފައި އިންދާ ދެރަވާ ފަދަ ވާހަކައެއް ދައްކާކަށް ބޭނުމެއް ނުވިއެވެ. އިޒްވާއަކަށް ނުވެސް ކެރޭނެއެވެ. އެހެން ދުވަހަކުން އެވާހަކަ ދައްކާނީއޭ ހިތާ ހިތްހަމަ ޖައްސާލަ ދިނެވެ. ޔީލާއާއި ޥާހަކަ ދައްކަން އާދެވުން ވެސް އެއީ ނުހަނު ބޮޑު ކުރިއެރުމެއްތާއެވެ.

”ހިނގާބަލަ ބޭރަށް ދާން.. ތި ސޯޓާއި ޓީޝާޓު ބަދަލްކޮށްލައިގެން އާދޭ.. އީތަން ވެސް ބޭރުގަ އެބަހުރި“ ލިބިފައިވާ ޝޮކުން އަރައިގަނެވި ކުއްޖާ ހަމަޖެހުމުން ޔީލާގެ ދެލޮލުން ތެތްކަން އިޒްވާއަށް ފެނުނެވެ. މާ ގިނަ ވަގުތު އެގޮތުގައި އިންނަން ވެއްޖެއްޔާ ޔީލާއަށް ރޮވިދާނެއެވެ. އިޒްވާ ވާހަކަ ދައްކަން ފެށީ އެހެންވެއެވެ.

”އީތަން؟ އިޒީ ތިބުނީ އީތަން އޭތަ؟“ ގަބޫލް ނުކުރެވިފައި ޔީލާއަށް އެހުނެވެ. އިޒްވާ ބޯޖަހައިލަމުން ހީލިއެވެ.

”ދެން އަވަސްކޮށްލަބާ.. މިއުޅެނީ ކާންދާން ވެގެން.. ކައި ނިމިގެން ގެއަށް.. އައި ނީޑް ޔޫ.. މިއޮތް ބޮޑު ދުވަހު ވެސް ތި އިންނަނީ އެންނު ކަމެއް ވާހެން ވެސް ހީނުވެ“

އިޒްވާ ވާހަކަ ދައްކަން ފެށިލެއް ގާތްކަމުން ޔީލާއަށް ނުރޮއި ކެތްތެރިވާން މާބޮޑަށް ވެސް އުނދަގޫވިއެވެ. އޭނާގެ ހަރަކާތްތަކުން، ހިނގި ހާދިސާ ހަނދާން ނައްތާލާފައި އިހު އޮތް ގުޅުން އަލުން އިއާދަ ކުރަން ބޭނުންވެ އެ މަސައްކަތް ކުރާ މަންޒަރު ހާމަވެއެވެ. އިޒްވާ އެ ދިއްކޮށްލީ ސުލްހައިގެ އަތެކެވެ. އެކަމަށް އިޖާބަދިނުމުގެ ގޮތުން ޔީލާ އޭނާގެ ދެތުންފަތް ފިއްތާލަމުން ހިންދިރުވާލީ، ހިތުގައި އުތުރިއަރަމުންދިޔަ ޝުޢޫރުތައް ކޮންޓްރޯލް ކުރަމުންނެވެ. އިޒްވާއާއި ވާހަކަ ނުދައްކާ ހުންނަން ޖެހުނު ދުވަސްތަކުގައި އޭނާ ވީދެރަ ވެސް އެނގޭނީ އޭނާއަށްތާއެވެ. ”މި އަންނަނީ ތައްޔާރު ވެލައިގެން“ ހެދުމަކާއި ޖީންސެއް ހިފައިގެން ގޮސްވަނީ ފާހާނައަށެވެ.

”ކޮންތާކު؟ ކާންވެގެންނޭ؟  އޭ ތިހެން ނުހަދާ.. އިޒީ ވެއްޖެ ޔީލާ ކައިރިއަށް ވަދެފަ.. ކަލޭ ނެތިއްޔާ ހާދަ އޯކްވާރޑް ވާނެއޭ..“ ފޯނު ކަންފަތުގައި ޖަހައިގެން އީތަން ވާހަކަ ދައްކަމުން ދިޔައީ ލޫކްއާއެވެ. އީތަންގެ އަޑުމަޑުކަމުން ކައިރީގައި މީހަކު ހުރިނަމަވެސް އެމީހަކަށް ވެސް އެއިން ބަހެއް އިވޭނެ ކަމާއި މެދު ޝައްކެވެ.

”ދެން އެކަމަކު އަޅެ.. ނީރާ ގޮވައިގެން އުޅެންޏާ ސަޅި އެއްނު.. މިދަނީ ހަމަ ތިތަނަށް..“ ލޫކް އާއެކޭ ބުނުމުން އެންމެފަހުން އީތަން ފޯނު ކަނޑާލިއެވެ. އެހެން ހުއްޓާ އިޒްވާއާއި ޔީލާ ނުކުމެއްޖެއެވެ. އިޒްވާގެ ފަހަތުގައި ހުރެ ޔީލާ ހީލުމުން އީތަންއަށް ވެގެން ދިޔައީ އަޖައިބަކަށެވެ. އަނގަހަދާ ނުލެވުނީ ކިރިއާއެވެ. ނަމަވެސް އެތަނަށް އައިސް ތިބި މަގްސަދް މަތިން ހަނދާން ކޮށްލާފައި ރައްދުގައި ހީލިއެވެ.

ކާރަށް އަރަން އައި އިރު ނޫހް  ފެންނަން ނެތުމުން ހިތްހަމަ ޖެހުނެވެ. އީތަން ބުނެލީ ލޫކް  އިން ރެސްޓޯރެންޓްގެ ނަމެވެ. އެތަން ކަމު ގޮސްގެން އިޒްވާ ވެސް ބޯޖަހައިލިއެވެ. ޔީލާގެ ފަހަތުގައި އިންއިރު އިޒްވާ އެރީ ކުރިއަށެވެ. ކާރު ދުއްވާލުމަށްފަހު ވެރިވެ އޮތް ހަމަހިމޭން ކަމަށް ނިމުމެއް ގެނައީ އިޒްވާއާއި އީތަންއެވެ.  ދެމީހުންގެ މެދުގައި ދެކެވޭ ތަފާތު ވާހަކަތަކުގެ ތެރެއަށް ޔީލާ ވެސް މަޑުމަޑުން ޝާމިލުކުރަމުން ދިޔައެވެ. ފުރަތަމަ ކޮޅު ލަދުން އިނަސް، އިރުކޮޅެއްގެ ތެރޭގައި ޔީލާގެ ހިތްހަމަޖެހި، އަމިއްލައަށް ވާހަކައިގައި ބައިވެރިވާން ފެށިއެވެ. އެ މާހައުލަށް ދެވުނު އިރު އެތަނުގައި މަދީ އެތިން މީހުންނާއި ނޫހުއެވެ. އަދި ރުއާނާއާއި ލިއަމްއެވެ.

“ނީރާ އެކަންޏޯ!“ އީތަން ޖަހައިލީ ލޫކްގެ ބޮލުގައެވެ. އޭނާގެ ފަރާތުން އިވުނީ ހިނިގަނޑެކެވެ.

”ކަމެއް ވާކަށް ވެސް ނޯވެއޭ އިޒީއާއި ހެދި .. ކަންޏާ ކައިގެން ޔީލް ދީފަ ތިމީހުން ދާން އުޅޭ މިތަނުން“ ޔެނާ ގޮވާލިއެވެ. އޭރު އެހެން މީހުން ހޭ މަންޒަރު ފެނެއެވެ.

”ކޮންފަދަ ނުބައި ކަމަކަށް ތި ތައްޔާރު ވަނީ؟ މިމީހުންނާއި ހެދި އިޒީ ނަފްސާނީ ވާނެ އަދި“

”ދެން އިޒީއަށް ހީވަނީ ދޯ އަހަރެމެން ތެރެއިން ދެމީހަކު އެއްވެލިއަސް އެއީ އިޒީއާއި ދެކޮޅަށް މޮޅު ޕްލޭނެއް ކުރާށޭ… ދެން އެހެން ނުހަދާނެ އެންނު ލޯބި ކުއްޖާގަނޑު“ ނީރާ ދުރުގައި އިނދެފައި އިސް އިށީނީ އިޒްވާގެ ގާތުގައެވެ. އިޒްވާ ލޯ ހަނިކޮށްލީ ނީރާ ނުގޮތަކަށް ހޭން ފެށުމުންނެވެ.

”ހޫމްމް ދެން އެންމެ ކުޑަ ކުއްޖާގެ ލަގަބު ދީފަ އެންމެން އަބަދު އަހަންނާއި ތޮޅެނީ ވިއްޔަ.. ކޮބާ ރުއާ މެން؟“ ލިއަމްއާއި ރުއާނާ ނެތުމުން އިޒްވާ އަހައިލިއެވެ.

”އެމީހުންވެސް އަންނާނެ.. އާއް މިއޮތް އައީނު“ ނީރާ ދައްކައިލީ ދޮރާއި ދިމާލެވެ.

ރުއާނާއާއި ލިއަމް ވަދެގެން އައިސް އިށީނީ ގާތްގާތުގައެވެ. ލިއަމް ފުރަތަމަވެސް ބަލައިލީ އިޒްވާއަށެވެ. ލާނެތް ގޮތަކަށް ހީލިއެވެ. އެ ހީލުމުން އެކަނިވެސް މޮޅު އެއްޗެއް ބުނަން އުޅޭކަން ޔަގީނެވެ.

”ހާދަ ބޮލަށް ފަސޭހަ ވާނެއޭ ދެން“ ވެއިޓަރުން އައިސް އެމީހުންގެ އޯދަރ ނަގަން ފެށުމުން ލިއަމް ބުނެފިއެވެ.

”ހޫމްމް އަހަރެން މެރީ ކުރާތީ ދޯ.. ތި ވަލާއި ގާތައް މިދަނީ، ތަންކޮޅެއް ފަސޭހައިން މާ އަވަސް އަވަހަށް ދެން އުނދަގޫ ކުރެވޭނެ އެންނު.. އެގެޔަށް އެވަރަށް ނުދާއިރުވެސް ބުނެލި އެތި“ އިޒްވާ ދެލޯ އަޅާލިއެވެ.

“އެހެންނެއް ނޫން.. ތި ގެންގުޅޭ ސިނގުރުޅިއާއި ’ޑީލް‘ ކުރާކަށް މަށަކަށް ދެން ނުޖެހޭނެތީ މި އުފާވަނީ.. އާހް! އައި ފީލް ސޯ ރިލީވްޑް! ބުނަން އީތަން، ތިޖެހުނީ އަންހެނަކާ އިނގޭ.. ބީ ކެއަރފުލް“ ލިއަމް ހެމުން ހެމުން ބުނެފިއެވެ. މިފަހަރު އިޒްވާ މޭޒުމަތިން ޓިޝޫއެއް ނަގާ ބޮނޑިކޮށްލުމަށްފަހު ލިއަމްއާއި ދިމާލަށް އެއްލިއެވެ.

”މިހާ ދުވަސް ވީއިރުވެސް އިޒީ އެހާ ރުޅި އައިސް ހުއްޓާ އަދި ނުދެކެން“

”ކުރިއަށް އޮތް ސައުވީސް ގަޑިއިރުގެ ތެރޭގައި ފެންނާނެ ’ފިފްޓީ ޝޭޑްސް އޮފް އިޒްވާ‘.. ހާސްނުވޭ“ ކީވާން ވެސް ސަމާސާގައި ބައިވެރިވެލިއެވެ. އެއާއި އެކު އެންމެންގެ ހުނުމުގެ އަޑު އިވެމުންދިޔައެވެ. އީތަންއަށް ވެސް ހެވިގެން އިޒްވާގެ މޫނަށް ނުހަނު ލޯބިން ބަލައިލިއެވެ.

”ދެން ތިހެން ބުނީމަ ހީވަނީ މަ ވަރު ރުޅިގަދަ މީހެއް މި އުޑު ދޮށުގަ ވެސް ނެތް ހެން.. ރުއާ  ވިސްނައްޗޭ މީންދަ މީހާއި ދޭތެރޭގަ.. މަށައް ވުރެން ދިހަ ގުނަ އިތުރު ވާނެ އޭނާގެ ރުޅ.. އެ ރުޅި މަޑު ކުރާގޮތައް ނޫނީ ޔެސް ނުބުނާތި“

ރުއާނާގެ މޫނުން ލަދުގަތްފައި އިނދެ ލިއަމް ބަލައިލުމުން ތުންފިއްތާލިއެވެ. އެ މައުލޫއު ފެށީ ކީއްކުރަންހެން އަހާފަދައަކުން ނިތް އަރުވާލިއެވެ.

”ދެން ތި ދެމީހުން އިތުރަށް ޔެސް ބުނާނެތަ؟ ނިކަން ކުރިއަށް ޖައްސާލައިފި.. ކެބިންތަކުންނާއި، ގަރާޖުތަކުންނާއި، ސިޓިންގރޫމްތަކުން ލޯބި އުތުރިއަރަނީ މިހާރު ދެން،“ ކީވާން ދެން ބުނެލި އެއްޗަކުން ރުއާނާއަށް ވީގޮތް ވެސް ނޭނގުނެވެ. ލަދުން މޯޅިވެ، އިސްއުފުލާލަންވެސް ނުކެރިފައި އޭނާ އިނެވެ.

ދެ އަހަރު ކުރިން ތި ގޭގޭ ބެލްކޮނިން ވެސް.. ދޮގެއްތަ މީ ޔެން؟“ އާލިއާއަށް ނަޒަރެއް ދެމުން ލިއަމް ބުނެލިއެވެ. ފޯރި ހިފައިލީ ޔެނާ ވެސް އެ ވާހަކައިގައި ބައިވެރިވުމުންނެވެ.

”އާނ އެކޭ! އެކޮޅުން ހިތްވަރު ކުރާތީ މަ މި އިންނަނީ މި ކީވާންއާ ދިމާލަށް އެއްޗެއް ނުބުނަން. އެ ކުއްޖާ ލަދުން ވިރިދާނެ މަ ކިޔަން ހުރި އެއްޗެހި ކިޔަން ފަށައިފިއްޔާ.. ސީކްރެޓެއް ބުނަންތަ ގާއިޒް؟ މަ ނުބުނާނަން ކީވާންއެކޭ، އެކަމަކު އިހަކަށް ދުވަހު ’ސަމްވަން‘ ސްޓާޓެޑް ޕިކިންގް ބޭބީ ނޭމްސް“ އެއާއި އެކު އިރުކޮޅަކު ތަނުގައި އޮތީ ހަމަހިމޭންކަމެވެ. އާލިއާއަށް ވީގޮތުން އީތަން އާއި ލޫކް ހޭންފެށުމުން ލިއަމްއަކަށް ވެސް ނީނދެވުނެވެ.

”ކޮބާތަ އެލަކީ ކުއްޖަކީ؟“ ނީރާ ނުހަނު މައުސޫމް ކަމާއި އެކު އަހާލިއެވެ. މީރާވެސް އުޅޭނީ ޔެނާ ދައްކަމުން ދިޔައީ ކާކުގެ ވާހަކައެއްކަން ނޭނގިފައެވެ.

”އަޅެ މިމީހުން ބޮލުގައި ތެތްކަމަށް ނުހުރެއޭ.. އިހަކަށް ދުވަހު ދިޔަ ޓްރިޕްގަ ވެސް ހަމަ ނޭނގޭތަ“ ނޫހް ވެސް ހީހީފައި އަހަމުން ދިޔައެވެ.

”މަޑުކޮށްބަލަ މަ އެދުވަހު ބޭބީ ނޭމްސް ގެ ވާހަކަ އެހީ މަށަކަށް ނޫނޭ.. އެއީ ފްރެންޑެއް ބުނެގެން.. މި ޔެނާ ނުކުރާނެ މަ ދައްކާ ވާހަކަ ގަބޫލެއް“ ކީވާންއަށް ވެސް ހެވެމުން ދިޔަ ނަމަވެސް ބަލލައިލެވުނީ ލަދުން ރަތްވެފައިވާ އާލިއާގެ މޫނަށެވެ. އެހެން އިންދާ އާލިއާ ފޯނު ނަގައިފާ މެސެޖް ކުރަން ފެށިއެވެ. ކީވާން ވެސް ފޯނުނަގާ ބަލައިލިއެވެ.

”ބުނެބަ އަހަރެމެން ދެމީހުންގެ ދޭތެރޭގަ އެކަހަލަ ކަމެއް ނެތޭ“ އާލިއާ ބުނެފައި އޮތެވެ. ކީވާންގެ ގާތައް ހިނިއައެވެ.  އޭނާ ވަގުތުން ޖަވާބު ލިޔަން ފެށިއެވެ.

”ނޫން ނުބުނާނަން.. އާލް ބޭނުމިއްޔާ ބުނަންވީ“

“ދެން ކީވާން.. ލަދުގަނެއޭ“

”ލަދެއް ގަންނާކަށް ނުޖެހޭނެއޭ ޔެސް  ބުނީމަ..ނުވިސްނޭ އިރު އުޅުނު ޕްލޭބޯއީގެ އުޅުމަށް މިހާރު  މަ ނޫޅޭކަން، ކޮން ދުވަހަކުންތަ ގަބޫލް ކުރާނީ.. އެއްގެއެއްގަ އުޅެނީ..އެއްތަނެއްގަ މަސައްކަތް ކުރަނީ..ދުވަހުގެ ބޮޑުބައި ދެމީހުން އެކަކު އަނެއްކަކު ފެންނަހާ ގާތުގަ.. އަދިވެސް އަހަރެން ދަހެއް ނުވޭތަ؟“ ކީވާން ޖަވާބު ފޮނުވާލާފައި ބަލައިލި އިރު އާލިއާ އެމެސަޖަކަށް ރައްދެއް ނުދިނެވެ. އާދައިގެ މަތިން ހަނުހުރީއެވެ. ލިބުނު މާޔޫސް ކަމާއިއެކު ކީވާންއަށް ކަރު އެލުވާލެވުނެވެ. ވިސްނުމަކަށް ގެއްލުނުއިރު އެވަގުތު އެހެން މީހުން ސަކާރަތް ޖަހަމުން ދިޔަ އަޑުވެސް އޭނާއަށް ފަނޑުވިކަހަލައެވެ.

ސާމާނުތައް އައުމުން ކެއި ގޮތައް އެމީހުން މަޑުނުކޮށް ދިޔައީ ލަވާލް މެންގެއަށެވެ. ފަހަރަކު ބައެއް ދަމުން ގޮސް ކީވާންއާއި އާލިއާ އެކަންޏަށްވިއެވެ. ލިއަމް ދަމުން އައުމަށް ބުނުމުން ވެސް އާލިއާ ނުގޮސް އިނީ ކީއްވެކަމެއް ކީވާންއަކަށް ނޭނގެއެވެ. ތަބީއަތު ގޯސްވެފައި ހުރުމުން ކީވާން ގަސްތުކޮށްގެން އިނީ އަދި ކޮފީއެއް ބޯލައިގެން ދިއުމަށެވެ.

”ކީއްވެ މަޑުކުރީ؟“ އަހަން ނާހަން އިނދެފައި ކީވާން އެއްސެވެ.

”ނޭނގޭތީތަ ތި ސުވާލު ތިކުރީ؟.. ބަލަ ކީވާން މިތާގަ އިނީމަ ނޫންތަ އަހަރެން މި މަޑުކުރީ“ އާލިއާގެ ޖަވާބުން ކީވާން ހައިރާންކޮށްލިއެވެ.

”އަހަރެން އިނީމަ ކީއްވެ؟ ލިއަމް ދަމުން ދިޔައީ އާލްއަށް ގޮވާފަ އެންނު؟“ ކީވާން ފަރުވާލެއް ނެތްފަދައަކުން ބުނެލިއެވެ. ނަމަވެސް އާލިއާގެ މޫނުން އޭނާގެ ނަޒަރު ކަސިޔާރުނުވެއެވެ.

ކީވާން ފަހުން އޯޑަރު ކުރި ކޮފީވެސް އައީ އެވަގުތުއެވެ. އޭނާ އޭގައި އަތްލަ އަތްލަ ހުއްޓާ އާލިއާ ކޮފީތަށި ދަމައިގަނެ ތުންޖަހާލިއެވެ. އެއްވެސް އުނދަގުލެއް ނެތި ހޫނުކަން މަތީގައި ކޮފީތަށި ބޮމުން ދިޔަތަން ފެނި ވޭޓަރުވެސް ހުރީ އާގަމަވެފައެވެ. މޭޒުމަތީގައި ތަށި ބެހެއްޓީ އެ ހުސް ވީމައެވެ. އޭރު ރަނގަޅަށް ވެސް އޭގެ ހިތިރަހަ އާލިއާގެ އަރުތެރޭގައި ލައިފިއެވެ. އަނގަހަދާލައިގެން ހުރެ ކީވާންގެ އަތުގައި ހިފާ އިންތަނުން ނަގައިފިއެވެ.

”އަދި ޕޭ ނުކުރަން ”އާލިއާގެ އަތް ދޫކޮށްލަމުން ކައުންޓަރާއި ގާތްވީ އެއަށް ލާރި ދެއްކުމަށެވެ. އެއަށްފަހު އެތަނުން ނުކުމަތެވެ.

”ކިހިނެތް ވީ؟“ކީވާން ވާހަކަ ދެއްކީ ކާރާއި ހިސާބަށް އަރާ ދޮރުފަތުގައި ލެނގިލަމުންނެވެ.

”އާންސްވާރ އެއް ދޭން؟“

”ކޮންކަމަކަށް ؟ މަށައް ސުވާލެއް ކުރެވިއްޖެތަ؟“ ވާނުވާ ނޭނގި ހުރެ އެހުނެވެ.

”ސާބަހޭ، ކީވާންއަށް! ދެންމެ ހަނދު އޮއްސުނީ މަ ކީކޭ ކިޔާފަ މެސެޖް ކުރީމަތަ؟އަހަންނަށް ފެނުނޭ މޫނަށް ވެގެން ދިޔަ ގޮތް“އާލިއާ ދައްކަމުންދިޔަ ވާހަކަ ނަގައިގަނެވިގެން ކީވާންއަށް ބަލައިލެވުނެވެ.

“ އަހަރެން ގަބޫލް ކޮށްފިން ކީވާން ޗޭންޖް ވެއްޖެކަމަށް! ކުރިން އުޅުނު ޕްލޭބޯއީ އުޅުން ކީވާންގެ ކިބައިން ގޮސްފިކަމަށް ގަބޫލް ކޮށްފިން“ އާލިއާ ބުންޏެވެ.

ކީވާންއަށް ގަބޫލް ނުކުރެވިފައި ހުރެވުނީއެވެ. ކުރިމަތީގައި ހުރެ ވާޙަކަ ދައްކަމުން ދިޔައީ އާލިއާ ކަމާއި މެދު ވެސް ހިތުގައި ޝައްކު އުފެދުނެވެ. އެތައް ދުވަހަކު އިންތިޒާރުކުރި ޖަވާބު މިއަދު މި ލިބުނީ އެއްވެސް އުންމީދެއް ނެތި ހުއްޓައެވެ. މުޅިން މާޔޫސްވެފައި ވަނިކޮން މުޅި ނަފްސަށް އާދަޔާ ހިލާފު ދިރުމެއް ލިބިގެންދިޔައެވެ.

”ވަޓް؟“

“އައި ލަވް ޔޫ“ ތިން ލަފްޒު ބޭރުކޮށްލެވުނު އިރު އާލިއާގެ ދެލޯ ވަނީ ފެންކަޅިވެފައެވެ. ކީވާންއަށް އިތުރު ޝޮކެއް ލިބުނު އިރު، އެ ޖަޒުބާތުން އަރައިގަނެވުމާއި އެކު ގައިގާ ހުރި ބާރެއްލާފައި އާލިއާގެ ގައިގާ ބައްދާލެވުނެވެ.

”އަލްހަމްދުލިއްލާހް..އަލްހަމްދުލިއްލާހް.. އާހްހްހް…“ ކީވާންގެ ދެތުންފަތް ފޫއަޅުވާލާފައި ނުކުތީ ހިތްހަމަޖެހުމުގެ އާހެކެވެ. އާލިއާއަށް ދޫކޮށްލެވުނީ ހިތްހަމަ ޖެހުމުގެ ނޭވާއެކެވެ. ކީވާންގެ މޭގެ ތެރޭގައި ރަނގަޅަށް އާލިއާ ބޮނޑިކޮށްލިއެވެ.

”އައި ލަވް ޔޫ ޓޫ.. ކޮން ދުވަހެއް އިންތިޒާރު ކުރާތާ“ ކައިރިން ހިނގާބިނގާވެ އުޅުނު މީހުންގެ ނަޒަރު އެ ދެމީހުންނަށް ހުއްޓެމުން ދިޔައިރުވެސް، އެ ދެ ޒުވާނުން ތިބީ އެމީހުންގެ އަމިއްލަ ދުނިޔެއެއްގައެވެ. މާހައުލުގައި ހިނގަމުންދިޔަ އެހެން ހުރިހާ ކަމެއް ފުސްވެ، މުޅި ކާއިނާތުގައި ތިބީ ހަމައެކަނި އެ ދެމީހުން ކަހަލައެވެ. އެކަކު އަނެއްކަކު ދެކެވާ ލޯބި އެތައް ފަހަރަކު އިއްވާލަމުން ދިޔައިރު، އެ ދެލޮލުން ފައިބަމުންދިޔަ އުފާވެރިކަމުގެ ކަރުނަ އެ ލޯތްބަށް ހެކިދެމުން ދިޔައެވެ.

****

ތިނެއްޖެހުމާއި ގާތްވި އިރު އިޒްވާއާއި އީތަން  ތައްޔާރު ވުމަށް ވާންފެށިއެވެ. ކައިވެނީގެ ރަސްމިއްޔާތު ދެޒުވާނުން ބޭނުންވި ފަދައިން ބޭއްވެނީ އާއިލާއާއި ރަހްމަތްތެރިންގެ އިތުރުން ކުލާހުގައި ކިޔެވި ކުދިންނަށް އެކަނި ދައުވަތު ދީގެންނެވެ. ގިނަ ބަޔަކަށް ދައުވަތުދީ، ކުލަގަދަ ގޮތަކަށް ހަފްލާ  ބޭއްވުމަށް ލިއަމް އާދޭސް ކުރުމުން ވެސް ދެމީހުން ކުރެ އެކަކުވެސް އެ ނިންމުން ބަދަލެއް ނުކުރިއެވެ. ހަފްލާ އޮތީ ލަވާލްއާއި ޔާސިރް ދިރިއުޅޭ ގެއާއި މާ ދުރު ނޫން ހިސާބެއްގައިވާ ހޮޓެއްލެއްގައެވެ.

ރުއާނާ ތައްޔާރު ވެގެން އެންމެ ފަހު ކަމަކަށް ހިތް ފުރެންދެން ސެންޓް ބުރުވަލިއެވެ. އެއަށްފަހު ކުރިމަތީގައި ހުރި ބޮޑު ލޯގަނޑަށް ނަޒަރެއްދިނެވެ. އަމިއްލަ ސޫރަ ފެނުމުން ހިތްހަމަ ޖެހުމުގެ ނޭވާއެއް ލެވުނެވެ. ގަޔަށް ހިފާލާފައިވާ  މަޑުފެހިކުލައިގެ ސެޓީންފޮތީގެ މެކްސީގައި ހުރިއިރު މޫނުމަތިން ފެންނަނީ ނުހަނު ލުއި، އެހެންނަމަވެސް އެހާމެ ފުރިހަމަ މޭކަޕެކެވެ. ފަން އިސްތަށިކޮޅު ފަހަތަށް ދޫކޮށް އައްސާލާފައި ހުރިއިރު ހުޅީގައި ހުދާއި މަޑުފެހިކުލައި މާކޯޅިއެއް ހަރުކޮށްލާފައި އޮތެވެ. އެ މޫނުން ކަޅި ދުރުކޮށްލަން ވެސް އުނދަގުލެވެ. ފެންނަ ކޮންމެ މީހަކުމެ އާޝޯހުވާނެކަން ގައިމެވެ.ހިނިތުންވެލި ހިނދު މޫނު އަލިވެގެން ދިޔަގޮތުން ސިފަވެގެން ދިޔައީ ސާފު ހަނދުވަރުގެ ރިހިދަޅަ ފަދަ އުޖާލާކަމެކެވެ.

ހުދުކުލައިގެ ހީލްއަށް އަރާލާފައި  ފުންނޭވާއެއް ދޫކޮށްލިއެވެ. ނީރާގެ ކައިރިން ހީލްގައި ހިނގަން ދެދުވަހެއް ކުރީންސުރެން ދަސްކުރަމުން އައިނަމަވެސް އަދިވެސް ނުފަރިތަ ގޮތެއް ހުއްޓެވެ. ދުވަހަކުވެސް އެހާ އުސް ފައިވާނަކަށް އަދި ނޭރެއެވެ. އަތްދަބަހާއި ފޯނާއި ހުދުކުލައި ކުޑަ މާބޮނޑި އަތައް ނަގައިގެން ދޮރާއި ހަމައަށް ދެވުނީވެސް އެހާ ހިތްވަރުންނެވެ. ދޮރު ހުޅުވާލި އިރު ލިއަމް ހުރީ އޭނާގެ އިންތިޒާރުގައި އެވެ. ކަޅުކުލައިގެ ކޯޓުފަޓުލޫނު ހުރިއިރު ލިއަމްގެ ފިރިހެންވަންތަކަން ދެގުނައެވެ. އިސްތަށިގަނޑުވެސް ރީތި ގޮތަކަށް ތައްކޮށްލާފައި އޮތްއިރު ރުއާނާއަށް ބަލަން ހުރެވުނީއެވެ.

“ ގޯޖިއަސް އިނަފް ޓް ރުއިން މީ“ ރުއާނާ ސިހުނީ ލިއަމްގެ ލާނެތް އަޑުންނެވެ. ރުއާނާއަށް އަނގަޔަށް ވައްތަރެއް ޖައްސާލެވުނު އިރު ލިއަމް އެހާގާތުގައި ހުރެ ބަލަމުން ދިޔަގޮތުން މުޅި ކުއްޖާ ހީވީ ވިރިގެން ދިޔަހެންނެވެ. ”ގޯޝްޝް، ސޯ ޕްރީޓީ.. އަމް އޮބްސެސްޑް..އަމް އެޑިކްޓެޑް. އާހްހް“ ލިއަމްއަކަށް ދުރަކު ނުހުރެވުނެވެ. ރުއާނާއާއި ގާތައް ޖެހިލަމުން ގަޔާއި ކައިރިކޮށްލެވުނެވެ.

”ޓައިމް އެއް ނެތް.. ލިއަމްމް“ ލިއަމްގެ މޫނު ގާތްވެލި ހިނދު ރުއާނާއަށް ތެޅިގަނެވުނެވެ. ނަމަވެސް ދުރަށް ދެވުމުގެ ބަދަލްގައި އިތުރަށް ވެވުނީ ގާތެވެ. އުނަގަނޑުގައި އަތް އަޅުވާލަމުން ގާތައް ދަމާލަމުން ލިއަމް ހިތުގެ ގޮވުމަށް އިޖާބަ ދިނެވެ. ސިކުންތުކޮޅަކަށް ދެމިގެން ދިޔަ ވަގުތުކޮޅަށް ފަހު ލިއަމް ދުރުވެލާފައި އެއްއަތުން އެމޫނުގައި ހިފާލިއެވެ. ލިއަމްގެ އަތްތިލަ ބޮޑުކަމުން ރުއާނާގެ މޫނު ވެސް އާދަޔާއި ހިލަފަށް ކުޑަކަމަށް ދައްކައެވެ. އިރުކޮޅަކު އެގޮތުގައި ހުރެ ދުރުވެލަމުން ފިރިހެންވަންތަ ހިނިތުންވުމެއް ވެރިކޮށްލިއެވެ.

”ވަޓް ޑޫ އޯލް ދީސް ކިސެސް މީން؟“ ރުއާނާގެ އަތުގައި ހިފާލަމުން ލިއަމް ތިރިއަށް ދާން ވެގެން  ހިނގަތް ހިނދު ހުއްޓިލަން މަޖުބޫރުވީ ރުއާނާ ކޮށްލި ސުޥާލުންނެވެ. އެމޫނުގައިވި ހިނިތުންވުން އިތުރަށް ފުޅާވިއެވެ.

”ދޭ މީން، ޔޫ އަރ މައިން!“ އެހުރިގޮތައް ހުރެ ފަސް އެނބުރި ރުއާނާގެ މޫނަށް ބަލައިލަމުން އިއްވާލިއެވެ. އެއަށްވުރެން އިތުރަކަށް ލިއަމް ނުބުންނެވެ. ރުއާނާގެ މުޅި ހަށިގަނޑު ހީބިހި ހަލުވާލި އިރު ، ހިތައްކުރުވީ ފޮނި ފޮނި އަސަރެކެވެ. މިވަގުތައް އެ ޖަވާބު ވެސް ފުދުނެވެ. ނަމަވެސް އަޒުމް ކަނޑައެޅީ ލިއަމްގެ އަނގައިން އޭނާގެ ހިތުގެ ހާލަތު އިއްވާލުމަށެވެ. ހިތުގައި ރާވާލަމުން ދިޔަ މޮޅު ޕްލޭންއިން ރުއާނާގެ ތުންފަތުގައި ދުވެލަ ދުވެލަ ހުރީ ހިނިތުންވުމެކެވެ.

ކާރުގައި މިސްރާބު ހުރީ ހޮޓެލަށް ދިއުމަށެވެ. ފޯނު ވައިބްރޭޓް ވާތީ ބަލައިލި އިރު ލިއަމްގެ އާއިލާ ހުރިހާ ޒުވާން ކުދިން ތިބޭ މެސެންޖާރ ގުރޫޕް އިން ފުލުފުލުގައި މެސެޖްތައް އަންނަމުން ދިޔައެވެ. އެ ގުރޫޕަށް އޭނާ ވެއްދީ އިޒްވާއެވެ. ނީރާ ލަމުން ދިޔައީ އިޒްވާ ކައިވެނީގެ ހެދުމުގައި ހުރި ފޮޓޯތަކެވެ.

”ވޯހްހް.. މާޝާﷲ، އިޒީ ހާދަ ލޯބިއޭ.. ވެޑިންގް ޑްރެސްގަ“ ރުއާނާގެ އަނގައިން ތައުރީފްގެ ބަސްތައް މެދުނުކެނޑެއެވެ. ލިއަމް ދައްކާށޭ ބުނުމުން ފޯނު ފޮރުވާލަމުން، ދިޔައީމަ ފެންނާނެ ނޫންހޭ ބުނެ ނުދެއްކިއެވެ.

”ތުއި ކުއްޖާ.. މަ ހީކުރީ އެތަނަށް ކަމަށް ދާނީ ރެޑީ ވާން“

”އެތާގަ ހުރެފަ ގެއަށް އައީ.. ހުރިހާ ސާމާނެއް ބަހައްޓާފަ އަނެއްކާ ދެވުނީ ވެސް.. އާހް އަމް ސޯ ހެޕީ،  ފީލްވަނީ އަމިއްލަ ވެޑިންގް ހެން…ހެހެހެ..އައި ވިޝް އައި ކުޑް މެރީ އަރލީ“

”ވިސްނަން ވީ ދޯ އެކަމާ“ ލިއަމް ލާނެތް ގޮތަކަށް އަހާލުމުން ރުއާނާ ކަޅި އަޅާލިއެވެ.

”ސީރިއަސް އެއްޗެކޭ.. މެރީ ކުރާ ހިތް ވޭ އެކަމަކު ބައްޕާ ނެތިސް ނުކުރާނަން“ މޮޅިވެރިކަމާއި އެކު ބުނެވުނެވެ. އިޒްވާ ކައިވެނީގެ ހެދުމުގައި ހުރިތަން ފެނުމުން އޭނާ ހަނދާންވީ ވެސް ރާބިއު މަތިންނެވެ. ރާބިއުއާއި އެންމެ ފަހުން ބައްދަލުވެވުނު ދުވަހު ވެސް ރުއާނާގާތު ކައިވެނި ކުރަން ބާރު އެޅިއެވެ. ”ބައްޕަ ނެތް ދުނިޔެއެއްގައި ދަރިފުޅު ގާތު ހުންނާނެ މިހަކު ވާނީ ވެސް އޭރުން ނޫން“ ހޭ ބުނެލި އަޑު ހީވީ އެވަގުތުވެސް ކަންފަތުގައި ހަރުލިހެންނެވެ. ދެލޯ ތެމުނެވެ. ނަމަވެސް ދިގު އެސްފިޔަތައް ތަޅުވާލާފައި ރުއާނާ ހިންދިރުވާލިއެވެ. ލިއަމް ބަލާލުމުން އެވާހަކަ ހިއްސާކޮށްލިއެވެ.

”އަމް ވިތް ޔޫ، އަހަރެންގެ މީހުން އެ މަސައްކަތް އެ ކުރަނީ ނުހުއްޓި.. އިޒީގެ ކައިވެނި ނިމުނީމަ އަހަރެން ވެސް އޮފިޝަލީ ނުކުންނާނީ އެކަމަށް.. އިޒީގެ ކައިވެނީގެ ކަންތައް ކުރިއަށް އޮތީމަ މަޑު ޖައްސާލައިގެން މިހުރީ.. އިރާދުކުރެއްވިއްޔާ ބައްޕަ ފެންނާނެ.. ހަށިގަނޑުގައި ފުރާނަ ހުރިހާ ހިނދަކު އެ މަސައްކަތް ހުއްޓައެއް ނުލާނަން.. އައި ޕްރޮމިސް ހަނީ“ ރުއާނާގެ އަތައް ލިއަމް ބާރުކޮށްލިއެވެ. އޭނާގެ ކޮންމެ ޖުމްލައެއްގައި ވަނީ ޔަގީން ކަމެވެ. ރުއާނާ ބޯޖަހައިލި އިރު ލިބުނު ހިތްހަމަ ޖެހުމުން ލިއަމްގެ ކޮނޑުގައި ބޯ އަޅާލެވުނެވެ.

”ރުއާ.. މިބުނީނު ދޯ އޮފިޝަލީ އެކާމާއި އަހަރެން ނުކުންނަ ވާހަކަ، އޭގެ ކުރިން ބޭނުން ރުއާގެ ޕަވާރސް ޓްރެއިން ކޮށްދޭން.. ކޮންމެ ފަހަރަކު ނޫނެކޭ ނުބުނެ މިފަހަރު އާންބަސް ބުނެބަ..  އަހަރެންގެ ރޫމްގަ ހުރެ ހުރިހާ ވާހަކައެއް ކިޔާދިން ދުވަހު އެއްބަސްވި، ވީ އެންމެ އަވަހަކަށް އެކަމާ އުޅެން.. އެކަމަކު އެންމެ ފަހު ވަގުތު ރުއާ ބޭނުންވެއްޖެ އަދި މަޑުކުރަން.. ’އަދި މަޑުކުރަން‘ އެ ދެ ލަފްޒަކީ އެއްވެސް ވަގުތެއް ކަނޑައެޅިފާވާ ލަފްޒުތަކެއްނޫން.. ތިހެން ދިގު ދަންމަ ދަންމަ ހުރެދާނެ ކިތަންމެ ދުވަހެއް ވަންދެންވެސް… ރުއާގެ ބައްޕައާއި އަހަރެންގެ ޕޭރެންޓްސް ހޯދަން ތަނަށް ދިޔައީމަ ރުއާ އެކަނިވެސް ހުންނަން ޖެހޭ ވަގުތު އަންނާނެ، އެފަދަ ހާލަތެއްގަ ބިލާލް އައިސް ދިމާކޮށްލައިފިއްޔާ ކިހިނެތް ހަދަނީ؟“ ލިއަމް އެހިއެވެ. ސުޥާލާއި އެކު ކޮނޑުގައި ބޯ އަޅައިގެން އޮތް ރުއާނާއަށް ނަޒަރެއް ދިނެވެ. ރުއާނާގެ މޫނުމަތިން ފެނުނު ޖެހިލުންވުމާއި، އޭނާގެ ތުންފަތުގައި ދަތްއަޅާލި ގޮތުން ލިއަމްގެ ހިތަށް ހަމްދަރުދީ ވަނެވެ. ނަމަވެސް ހަގީގަތާ ކުރިމަތިލާން ޖެހޭނެކަން ވިސްނައިދިނެވެ.

”އަމް ސްކެއަރޑް.. ބައްޕަ ވެސް ހާދަ ވަރަކަށް އުޅުނޭ ދަސްކޮށްދޭން.. އެކަމަކު އެމީހުންގެ އަތްދޮށުގަ މިހާރު މަންމަ ވެސް ހުރިކަން އެނގުނީމަ ބިރުގަންނަނީ.. ބުނެފަ އޮތީ ރުއާ ޕަވާސް ދަސްކޮށްފިއްޔާ ނިމުނީ ކަމަށް..“ ރުއާނާ ތުން ފިއްތާލިއެވެ.

”ކަމޯން.. އަހަރެން މިހުރީނު.. ބޭރަށް ދާން ޖެހުނަސް ކޮންމެވެސް މީހަކު އަބަދުވެސް ބަހައްޓާނަމޭ ރުއާ ގާތުގަ.. މިބުނާ ވާހަކައަކީ ބިލާލްގެ ނުރައްކަލެއް ހީނުކުރާ ވަގުތު ކުރިމަތި ވިޔަސް ރުއާ ޓްރެއިން ވެފަ ހުރީމަ ސޭފް ވާނެ އިންޝާﷲ..އަމިއްލަ ނަފްސު ދިފާއުކުރާނެ ހަކަތަ ކޮންމެވެސް ވަރަކަށް ބޮޑީގަ އުފައްދަން ޖެހޭނެ .. ބިރު ނުގަންނައްޗޭ އިނގޭ، އެމީހުން އެހެން ބިރު ދައްކަ ދައްކަ ތިބީނު އެ.. ނުރެވޭނެ އެނޫން އެއްވެސް ކަމެއް“ ރުއާނާގެ ނިތުގައި ނުހަނު ލޯބިން ލިއަމް ބޮސްދިނެވެ.

”ލިއަމް ދެރަވާނެ ތަ އަހަރެން އެމީހުންގެ އަތްދޮށައް ގޮސްފިއްޔާ؟“

”ދައްކާ ވާހަކަ އޮވެގެން.. ނޫނޭ، ރުއާ ގެއްލުމުގެ އުފަލުގަ އަހަރެން މި ބޮޑު ސްވިޒަރލޭންޑްގެ އެންމެޙާ ރައްޔިތުންނަށް ކެއުމެއް ދޭނަން.. ކަޑަ؟“ މަންޒިލަށް އާދެވުމުން ކާރު ޕާކް ކޮށްފައި ރުއާނާގެ ބޮލުގައި ލިއަމް މަޑުމަޑުން ޖެހިއެވެ. ރުއާނާ ހޭންފެށިއެވެ.

”އާފްޓާރ ވެޑިން ހިނގާ ޓްރެއިން ކަންތަކާ އުޅެން.. އައި ޕްރޮމިސް މިފަހަރު ދޯކާއެއް ނުދޭނަން“ ރުއާނާ ބުނެލިއެވެ. ލިއަމްއަށް ލިބުނު ހިތްހަމަ ޖެހުމުގައި ހީލެވުނެވެ. ރުއާނާގެ އަތުގައި ހިފާލައިގެން ހުރެ އެތެރެއަށް ވަންނަން ދިޔައެވެ.

ލިއަމްއާއި ރުއާނާ އެތެރެއަށް ވަތް ދަނޑިވަޅު ބަލާފައި، ބިލާލްއާއި ދަރަކް އަދި އެމީހުންގެ ފައުޖު ފާޅުވިއެވެ. އިންސާނުންގެ ލޯ މައްޗަށް ވަންހަނާވެގެން ތިބިއިރު، މުޅި ހޮޓެލްގެ ވަށައިގެން އެމީހުންގެ ވަރުގަދަ ސަފުތައް އަތުރާލަން ނެގީ މަދު ސިކުންތުކޮޅެކެވެ. ބިލާލްގެ ކުޑަވެސް އިޝާރާތަކަށް އެންމެން ވެސް ތިބީ މަޑުކޮށްލައި ގެންނެވެ. ކަޅު ތަކެތިގައި ފޮރުވިގެން ތިބިއިރު، ކަޅުކަމުގެ ތެރެއަށް ޣަރަޤުވެފައިވާ އެ ބިޔަ ހަށިގަނޑުތަކުން ފެންނަނީ ހިތްތައް ބިރުން ސިހިގެން ދާ ފަދަ ހައިބަތެކެވެ.

”މިހާރު އެނގިއްޖެ ދޯ ބިލާލްގެ ބައްޕަ، އެމީހުން ދޫކޮށްލަން ބުނީ ކިއްވެކަން؟“  އެކަންތައް ވެސް ތައްޔާރުގަ އިނީ“ ދަރަކްގެ މޫނުމަތިން ވިހަކަން ފެނުނު އިރު ، އޭނާގެ ސުވާލާއި އެކު ބިލާލްގެ ކަރުބުޑުން ނުކުމެގެން އައީ ބިރުވެރިކަމުން ފުރިގެންވީ ޒާތެއްގެ ހިނިގަނޑެކެވެ. އެ ހިނިގަނޑުގެ އަޑު މުޅި ފަޒާގެ ތެރޭގައި ގުގުމާލީ، ކުރިއަށް އޮތް ބިރުވެރި ތޫފާނުގެ އިންޒާރު ދެމުންނެވެ.

***

އީތަން ތައްޔާރުވެގެން ނުކުތް އިރު އިޒްވާ ވެސް ނުކުންނަނީއެވެ. މޭކަޕް ކުރަން އައުމަށް ބުނިގަޑީއަށް އިޒްވާއާއި އީތަންއަށް ނާދެވުމުން އެކަން ނިމޭ ވަރުވި ކައިވެނިކުރަން ހަމަޖެހިފައިވި ގަޑީގެ ފަސްވަރަކަށް މިނެޓަށް ވެފައި ވަނިކޮންނެވެ. އެ ފަސްމިނެޓް ފާއިތުވާން ވާއިރަށް ހޯލަށް ވަންނަން އަތްމަތި އަވަސްކޮށްލައިގެން ނުކުތް އީތަން އަށް ހުއްޓުން އެރީ އިޒްވާ ފެނިފައެވެ.

ހުދުކުލައިގެ ކައިވެނީގެ ބޮޑު ހެދުމުގައި އިޒްވާ ހުރިއިރު ހޫރެއްފަދައެވެ. އެ ރީތި އަންހެންކުއްޖާ މިއަދު އެތައް ގޮތަކުން ފުރިހަމައެވެ. ރީތި މޭކްއަޕްއިން އެ މޫނުމަތީގައި ވި މައުސޫމްކަން ވަނީ އިތުރުވެފައެވެ.  ދިގު އިސްތަށިގަނޑު ރީތިގޮތައް ފަހަތައް ގެންގޮސް އޮތްއިރު ތުނި ވެއިލް ވެސް އޮތީ އިސްތަށިގަނޑުގެ ފަހަތުން ތިރިއަށް ދޫކޮށްލާފައެވެ. ހުދުކުލައިގެ ފިނިފެންމާ ބޮނޑި ހިފާލައިގެން ހުރިއިރު ރީތިކަން ނުކުރެވޭހާ ފުރިހަމައެވެ. އީތަން ފެނި އިޒްވާއަށް ވެސް ބަލަން ހުރެވުނީއެވެ. ހުދު ގަމީސް ވަރުގަދަ ހަށިގަނޑަށް ހިފާލާފައިވީ އިރު ކަޅުކޯޓު ގައި ނުހަނު ރަސްމީއެވެ. ހަފްލާގެ ހާއްސަ ދެކުލައިގެ މާކޮޅެއް، ކޯޓުގެ އަރިމަތީގައި ހަރުކޮށްލާފައި އިނެވެ. އީތަން ކަޅި ޖަހައި ނުލާ ބަލަން ހުރި ގޮތުން އިޒްވާގެ ދެފައިކޮޅުން ހީވީ ވާގި ދޫވާން އުޅުނުހެންނެވެ.

”އިޒީ، މިއޮތީ އިޒީގެ ވޯކް.. ތޭންކް މީ ލޭޓާރ“ އިޒްވާ ސިހުނީ ލޫކްގެ އަޑަށެވެ. އެހެން މީހަކަށް ފަހުމް ނުވާނެހާ މަޑުމަޑުން އިޒްވާގެ އަތައް އޭނާ ލައްވާލަ ދިނީ ކަރުދާސްކޮޅެކެވެ. ލަސްލަހުން އޭތި ހުޅުވާލާފައި ބަލައިލި އިރު އިޒްވާއަށް ހީލެވުނެވެ. އަލުން ފައްޖަހާލާފައި އޮތްގޮތައް ހެދިއެވެ.

އީތަންގެ ދެފައި ހަރަކާތް ކުރިއެވެ. އިޒްވާގެ ގާތައް ހުއްޓިލިއެވެ. އީތަން އަށް ވަށައިގެން ވީ މާހައުލަށް ނަޒަރެއް ދެވުނެވެ. އިޒްވާގެ މައިންބަފައިން ނެތް ނަމަވެސް ، އާއިލާ އެއްކޮން އެތަނުގައި ހަރަކަތްތެރިވަމުން ދިޔައެވެ. އީތަންގެ ހިތް ރޯލީ ހަޔާތުގައި އައި އެންމެ އުފާވެރި ދުވަހުގެ ހިއްސާދާރަކަށް އޭނާގެ ފަރާތުން އެކަކުވެސް ނެތުމުންނެވެ. ފިރިހެނަކަށް ވީނަމަވެސް އޭނާގެ ލޯ ތެމިލިއެވެ. ނަމަވެސް ކުރާނެ ކަމެއް ނެތެވެ. އެއީ އޭނާ އިޙްތިޔާރުކޮށްފައިވާ ދިރިއުޅުމެވެ.

****

ޝިއާ އިށީނދެލައިގެން އިނީ މިރެއިލް ބޭއްވިފައި އޮތް އެނދާއި މަގަތައް ވާހެން ހުރި ގޮނޑީގައެވެ. މިރެއިލްގެ ދެލޯ ހިއްމިއަކަށް ހުޅުވިފައި ހުރިއިރު ، އެ ނަޒަރު ވަނީ އެއް ދިމާލަކަށް ގެއްލި ހުސްވެފައެވެ. ރޫޖެހި އަނަރުފަވެފައިވާ މޫނުމަތި ވަނީ މިލާފައެވެ. ނުރައަށް ވެފައިވާ ތުނބުޅިއާއި އިސްތަށިގަނޑުވެސް އޮތީ ފުދޭވަރަކަށް ދިގުވެފައެވެ. ގަޔަށް ގުޅާފައިވާ މެޝިންތަކުގެ ވާތައް ގިނަ ކަމުން މިރެއިލްގެ ގައިގާ އަތްލެވެނީ ވެސް ނުހަނު މަސައްކަތުންނެވެ. ބައްޕަގެ އަތުގައި ޝިއާ ހިފާލާ ފިއްތާ ލެވުނެވެ.

”ބައްޕާ.. އެނގޭތަ  މިއަދު މިއީ ދުވަހެއްކަން ؟“ ޝިއާ ވާހަކަ ދެއްކިއިއިރު އެއަޑު އައި ކުރެހިގެންނެވެ. ރޮނގަކަށް ކަރުނަތައް ފައިބަމުން ދިޔައެވެ.

”މިއަދު  މިއީ ކޮއްކޮގެ ކައިވެނި ކުރެވޭ ދުވަސް.. އަހަންނަށް ދައުވަތު ލިބުނު ދާން.. އެކަމަކު.. އެކަމަކު ކިހިނެތް، އެ ބޯހަރު ކުއްޖާއާއި ފޭސް ކުރާނީ.. އެވަރުގެ ކަމެއް ނިންމާލި އިރު ވެސް އޭނައަށް ނޭނގުނު ގޮތް ދޫކޮށްފަ އަމިއްލަ އާއިލާގެ ގާތައް އަންނާކަށް.. ބައްޕާ، އަމް ސޯ ސޮރީ.. އަހަންނަކަށް އޭނައެއް ނުގެނެވުނު ބައްޕަގެ ގާތަކައް..  ގެންނަން ހަދާނެ ގޮތެއް ވެސް ނޭނގުނު.. އޭނައާއި ގާތް ބައެއްގެ ކައިރީގަ މިއުޅެނީ… އެކަމަކުވެސް މާޔޫސް ވެއްޖެ“ މިރެއިލްގެ އަތުގައި ހިފާލައިގެން އިންގޮތައް އެނދުގައި ޝިއާއަށް ބޯ އަޅުޥާލެވުނެވެ. އެހެން އޮތް އިރު ޝިއާއަށް ދިޔައީ ރޮވެމުންނެވެ.

މިރެއިލްގެ ކުޑަވެފައިވާ ދެލޮލުން ކަރުނު ތިއްކެއް ޖަހައިލިއެވެ. ދުނިޔޭގައި ވި ހުރިޙާ އެއްޗަކަށް ވުރެން މިރެއިލްއަށް އެކުއްޖާ މުހިއްމުވިއެވެ. ހަގީގަތުގައި ޝިއާއަށް ވުރެން ބޮޑަށް އޭނައަށް ތުއްތު އިރު ވެސް ބެލުނެވެ. ހުރި ހަމައެކަނި ދަރިފުޅަށް ވެފައި، ދަރިފުޅު ދުނިޔެއަށް އުފަންވީންސުރެން ރަސްކަމަށް ގެނައުމަށް ހުވަފެންތައް ދެކެވުނެވެ. ފަނޑުގޮތަކަށް ސިފަވެގެން ދިޔައީ އެދަރިފުޅު އޭނާ ގެންގުޅުނު ގޮތެވެ. ކިރިއާ ވާހަކަ ދައްކަން އެނގޭ ވަރުވީ ހިނދު ތުއްތު އަޑުން ’ބައްޕާ‘ އޭ ކިޔާ ގޮވަމުން އައީ ހިތްތައް ބަނޑުން ވާފަދައަކުންނެވެ. އުމުރުން އަތް އަހަރުގައި އޭނާ ދޫކޮށް ދިޔައިރު އެދުވަހުގެ ހަނދާންތައް ވަކިން ގަދަވިއެވެ. މޭގައި އުފެދުނީ ނުބައި ރިހުމެކެވެ.

”އީތަން“ މިރެއިލްގެ ދެތުންފަތް ފޫ އަޅުޥާލާފައި ނުކުމަތެވެ.

****

(ނުނިމޭ)