މި ޖިސްމުގާ ވަނީ 32

ޝާއިރާ އާއި އާޝިއު އައިސް ވަންއިރު މަންހާ ފެންނަން ނެތުމުން ހައިކަލް ސުވާލުކުރިއެވެ. މަންހާ ފާހާނައިގާ އުޅޭތީ ލަސްވެދާނެ ކަމަށް އާޝިއު ބުނުމުން ބޯޖަހާލާފައި ކެއުމަށް އިންސާފް ކުރުމަށް ބުންޏެވެ. ޝާއިރާ ވެސް ހިނިތުންވުމެއް ތުންފަތައް ވެރިކުރުވައިގެން ހުރެ ގޮނޑިއެއްގައި އިށީނދެ ތައްޓައް ކާއެއްޗިސް އެޅުމަށް އުޅުނެވެ. އެއްލިކަޅިއަކުން އޭނާއާއި ދިމާ ކަޅިޖަހައިނުލާ ބަލަހައްޓައިގެން އިން ލައިލާ ފެނި މުޅި މީހާއަށް ހުއްޓުން އެރިއެވެ.

”ލައިލާ؟“ ލައިލާގެ މޫނަށް ޝާއިރާ ބަލަހައްޓައިގެން އިންއިރު ހީވީ ބިރެއް ފެނިގެން ބަލަމުން ދިޔަހެންނެވެ.

ލައިލާގެ މޫނުމަތީގައި އިހު ހުރި ތާޒާކަމެއް ނެތެވެ. އެތެރެ ހަށީގައި ހުޅުހިފަމުން ދިޔައިރު ހިތާއި ސިކުނޑި އިއްތިފާގުން އަންގަމުން  ދިޔައީ ތަން ދޫކޮށްފައި ދިޔުމަށެވެ. އެތެރެހަށީގައި އުފެދުނު އަސަރްތައް ބޭރުފުށައް ވެސް ފޯރާފިއެވެ. އެންމެ ހިނދުކޮޅަކު ވެސް އެތަނުގައި މަޑުކޮށްލާކަށް އޭނާގެ ހިތެއް ނުބުންޏެވެ. އެ ސޫރަ އެއީ ދުވަހަކު ވެސް ލައިލާއަށް އޮޅޭނެ ސޫރައެއް ނޫނެވެ. އެއީ އޭނާގެ ހަޔާތުގެ ބަރުބާދީގެ މޭސްތިރިޔާއެވެ. އޭނާގެ ދިރިއުޅުން ނަރަކައަކަށް ހަދާލީ ޝާއިރާއެވެ. އެ ވިހަ ދެއަތުންނެވެ. ހީވީ މާޒީގެ ހިތި ޞޮފްހާތައް ހިޔާލީ ލޯގަނޑުގައި ރޯލްވެގެން ދިޔަހެންނެވެ.

***

”ކިހިނެތް ވީ ލައިލާ؟“ ލައިލާގެ މޫނުމަތީގެ އަސަރުތައް ދެނެގަނެވި ޒާހިރް މަޑުމަޑުން އޭނާގެ ކަންފަތް ދޮށުގައި ބުނެލިއެވެ. އޭރުވެސް ލައިލާ އިނީ ގަނޑުވެފައިވާ ބުދެއް ފަދައިން ހުއްޓުން އަރާފައެވެ. އޭނާގެ ދެލޯ ހުއްޓިފައި ހުރީ ކުރިމަތީގައި އިން ޝާއިރާގެ މޫނަށެވެ. ޝާއިރާގެ މޫނަށް އަލިފާނުގެ ނަޒަރެއް ދިއްކޮށްގެން އިންއިރު، ހީވަނީ އެ ގަދަފަދަ ނަޒަރުގެ ހޫނުން އެކަނިވެސް ފިއްސާލައި އަޅިއަށް ހަދާލަން އުޅުނު ހެންނެވެ.

”ލައިލާ؟ އޭތް ކިހިނެތް ވީހޭ؟.. ތިހެން އިންދަ އެއިން މީހެއްގެ ސުވާލެއް އަމާޒުވެދާނެ“ ކަންބޮޑުވެފައި ހުރެ ޒާހިރް ކޮއްޓާލިއެވެ. އެންމެފަހުން އިސްޖެހި އިރު ލައިލާ ދިޔައީ ފުންކޮން ނޭވާ ލަމުންނެވެ. ހިތުގައި ހުޅުފަޅައިގެން ގޮސްފައިވި އަލިފާންގަނޑަށް ފިނިކަމެއް ގެނެސްދޭން މަސައްކަތް ކުރިއެވެ.

އެވަގުތުން ފެށިގެން، އެކައިވެނި ކުރެވޭކަށް އެއްގޮތަކަށް ވެސް އޭނާ ބޭނުމެއް ނުވެއެވެ. އެ ހިތުގެ ކޮންމެ ވިންދެއް ގޮވަމުންދިޔައީ ހުއްޓުވުމަށެވެ. ވިޝާމްއަކީ ކިޔަވައިގެން ހުރި، ހަރުދަނާ ރަނގަޅު ޒުވާނެކެވެ. އޭނާ ކަމުނުދަނީއެއް ނޫނެވެ. ހައިކަލްއާއި އާމިލާ އަދި އެމީހުންގެ އެހެން ދަރިން ގޯހިއްޔެއް ނޫނެވެ. ނަމަވެސް މައްސަލައަކީ ޝާއިރާއެވެ. އެ ނުބައި، މަކަރުވެރި އަންހެނާގެ ކަޅު އަނދިރި މާޒީއާއި އޭނާގެ ހަގީގީ ސޫރަ، އިތުރު މީހަކު ލައިލާއަށް ކިޔައިދޭކަށް ނުޖެހޭނެއެވެ. ޝާއިރާގެ ފަތިފުށް އެންމެ ރަނގަޅަށް އެނގޭ އެކަކަށް ގައިމު ވެސް ލައިލާ ވާނެއެވެ. އެފަދަ ރަހުމެއް ނެތް އަންހެނެއްގެ ހިޔަނި އެޅޭ ފަދަ މާހައުލަކަށް ވެސް  އޭނާގެ ލޯބިވާ ދަރިފުޅު ފޮނުވާލާކަށް ލައިލާގެ ލަގޮނޑިއަކަށް ކެތެއް ނުކުރެވޭނެއެވެ. ބަނޑުއަޅާ ނުވިހޭ ނަމަވެސް  އެކުދިންނަކީ އޭނާގެ ފުރާނައެވެ. ހިތެވެ. ޒަންޔާއާއި ލައިލާ އޮންނަ ގުޅުން އެނގުމުން ދެން އެ ނުލަފާ އަންހެނާ ދިމާކޮށްލާނީ ޒަންޔާއާއި ކަންނޭގެއެވެ.

ކިތަންމެ ބޮޑަށް ރުޅިގަދަވި ނަމަވެސް  ބުއްދީގެ ބޭނުންކޮށް އަމިއްލަ ހިތައް ވިސްނައިދޭން ނިންމިއެވެ. ހައިކަލްގެ ނަމަކީ މުޅި ރާއްޖެއަށް ފަނޑު ނަމެއްނޫނެވެ. ގަދަރުވެރި، އެންމެންގެ އިހުތިރާމް ލިބިފައިވާ ޝަހުސިއްޔަތެކެވެ. އެންމެ ފަހު ވަގުތު މި ކައިވެނި ހުއްޓުވައިފި ނަމަ، އެއީ ހައިކަލްގެ އާއިލާއަށާއި، އަދި ޒާހިރަށްވެސް ލިބޭނެ ބޮޑު ބަދުނާމަކަށެވެ. މުޅި ރާއްޖެއަށް އެ ކައިވެނީގެ ހަބަރު އޮތީ ފެތުރިފައެވެ. މެއަށް އުނދަގޫ ވެފައި އިނދެމެ ލައިލާ ގަދަކަމުން ހީލިއެވެ. ދޫކުރަމުން ދިޔަ ކޮންމެ ނޭވާއަކާއި އެކު އަމިއްލަ ނަފްސު ހަމައަކަށް އަޅުވަން އޭނާ ދިޔައީ ވަރުގަދަ ހަނގުރާމައެއް ކުރަމުންދިޔައެވެ.

”ހުރިޙާ ކަމެއް ރަނގަޅުތަ؟“ ލައިލާގެ ކޮނޑުގައި އަތް ޖައްސާލަމުން ޒާހިރް އަނެއްކާ ވެސް އެހިއެވެ. އެހިނިތުންވުމުގައި އިނދެފައި ބޯޖަހައިލުމުން، ޒާހިރްގެ ނުތަވަސްވެފައިވާ މޫނުމަތި އަލިވެގެން ދިޔައެވެ.

”ލައިލާ، މިއީ ޝާއިރާއަކީ.. އަދި ހުންނާނެ އެއް ކުއްޖަކު.. އެކަމަކު ލަންޑަންގަ މިވަގުތު ހުރީ.. މަހާ ވެސް ވަރަށް އުޅުނު ވެޑިންގއަށް އަންނަން ދޯ ޝާއިރާ.. އެކަމަކު ޔުނިވާރސިޓީ އިމްތިހާނުތައް ފެށިގެން އުޅޭތީ އާދެވޭ ގޮތެއް ނުވި..“ ޝާއިރާ ދައްކާލަމުން އާމިލާ އުފާވެފައި އިނދެ ވާހަކަ ދެއްކިއެވެ. ހިތްހަމަ ނުޖެހުމުގެ ކުލައެއް މޫނުމަތިން އިތުރަށް ނުދައްކާ ލައިލާ ވެސް އެހެންހޭ ބުނެ ހީލިއެވެ. ނަމަވެސް އެންމެ ފަހަރަކުވެސް ޝާއިރާގެ މޫނަށް ބަލައެއް ނުލައެވެ.

”މަހާ ތަ ކިއަނީ…އެއީތަ ޒަންގެ އޭޖް އޭ ބުނި ކުއްޖަކީ“ ޒާހިރްވެސް ޥާހަކައިގާ ބައިވެރިވިއެވެ. ހައިކަލް ހިނިއައިސް އިނދެ ބޯޖަހައިލިއެވެ. އެފަދަ ވާހަކަ އެއްގައި ތިބެ ކެއުމައިގެން ކުރިއަށް ދިޔައެވެ.

****

އެކެއް ޖެހުމުގެ ކުރިން ލާންޗްތަކުގެ ބުރުތައް ފެށުނެވެ. ހުޅަނގު މޫސުމަށް ވެފައި ވިއްސާރަ ދުވަހެއް ކަމުން ބުނި ގަޑިއަށް ވުރެން އަވަހަށް ދަތުރުތައް ފެށިއެވެ. މިހާރުވެސް އުޑުމަތި ބޯވެފައިވަނީ ކަޅުވިލާތަކުންނެވެ. ތުނިތުނިކޮން ވާރޭ ވެހެމުން ދިޔައިރު ފުދޭވަރަކަށް ވައި ޖެހެމުން ދިޔައެވެ. ކަނޑަށް  ބަލައިލުމުން ވެސް ގަދަވާނެ ވަރު އަންދާޒާކޮށްލެވުނެވެ. އާއިލާއަށް ހާއްސަ ކުރެވިފައިވަނީ ވަކި ލޯންޗް ތަކެއްގައެވެ. ނަދީމްއާއި މަޖުދާ އަށް އާދެވުނު އިރު ހައިކަލް އާއި އާމިލާގެ އިތުރުން ޝާއިރާއާއި މަންހާ ވެސް އައިސް މަޑުކޮށްލިއެވެ. އިންތިޒާރުގައި މާގިނައިރު މަޑުކުރާކަށް ނުޖެހުނެވެ. ޒާހިރްއާއި ލައިލާވެސް އާއިލާގެ ބޮޑެތި މީހުންނާއި އެކު އައެވެ.

”ޒަން މެން އެރީތަ؟“ ހައިކަލް އެހުމުން ޒާހިރް ބޯޖަހައިލިއެވެ. ޒުވާން ގުރޫޕް ދަތުރު ކުރީ ވަކިންނެވެ. ޒާހިރް އަތުގެ އިޝާރާތުން ދައްކާލީ ފަޅުން ނެރެމުން ދިޔަ ލާންޗަށެވެ.

”އަމް ސްކެއާރޑް… އަދި އަލަށް ކަނޑުމައްޗަށް މި އެރީ.. އެވެސް އެހާ ގަދަ ދުވަހެއްގަ..“ އަމީރާ ބަލައިލީ ފޮނު  ހައްދާލާފައިވާ ބިޔަ ރާޅުތަކަށެވެ. ދުއްވާލިތާ ގިނަ އިރެއް ނުވެ ބާނިގަނޑުގައި ޖެހުނެވެ. ބިޔަ އުޅަނދު ފަހަރުވެސް މޫސުން ގޯސް ކަމުން ދިޔައީ ތަޅުވަމުންނެވެ. އަމީރާ އިނީ ޒަންޔާ އާއި  އިރަމްގެ މެދަށް ވަދެފައެވެ. ރީއާ އާއި ޔޫވީން އުރާލައިގެން ނާޔާ އާއި ޔުމާން އިނީ އެމީހުންގެ ކުރިމައްޗަށް ވާހެން ކަމުން އިޔާން ވެސް މަޑުކޮށްލައިގެން ހުރީ ދުރުގައެވެ. އެތާގަ ހުރިއިރުވެސް އަމީރާ އުޅެމުން ދިޔަގޮތުން އޭނާ ދިޔައީ ހެމުންނެވެ. ރާޅުތަކުގެ ތެރޭގައި ލާންޗް ތިރިވެ އުފުލޭ ކޮންމެ ވަގުތަކު ކުޑަކޮން ހަޅޭއްލަވައި ގަނެފައި ޒަންޔާ ނުވަތަ އިރަމްގެ ގައިގާ ހިފައި ގަނެއެވެ. އިރަމް ހޭތީ ދޭތެރެއަކުން އިރަމްގެ ގައިގާ ވިކައިގަނެއެވެ.

”ކޮބާ ދެވޭކަށް ނޫޅޭތަ“ އަމީރާ އަހައިލިއެވެ. ބޯ ހެލޭވަރުން ހުރީވެސް އެނބުރުން އަރާފައެވެ.

”ދަރިފުޅޫ.. މިހާރު އެއޮތް ލެފެނީދެން.. ޓެން މިނެޓްސް ކަންނޭގެ ވާނީ“

”ޓެން މިނެޓޭ.. ހާދަ އިރެއް؟“ މާޔޫސްވެފައި އިނދެ އިރަމްގެ ކޮނޑުގައި ބޯ އަޅާލީއެވެ.  އޭނާއަށް ހީވަމުން ދިޔައީ އެ ދިހަ މިނެޓަކީ ވެސް ދިހަ ގަޑިއިރުހެންނެވެ.

”އަސްލު ވަރަށް ކައިރިއޭ.. ގަދަ ވީމަ ނުދުއްވިގެން އެމީހުން އެއުޅެނީ..“

ރިސޯޓާއި ކައިރިވީ އިރު ފުދޭވަރަކަށް ކަނޑު މަޑުވިއެވެ. ނަމަވެސް ބޯކޮން ވާރޭ ވެހެމުން ދިޔައެވެ. ކުރިމަތި ފެންނަލެއް ފުސް ކަމުން ރިސޯޓުގެ ރީތި މަލަމަތި ވެސް ފެންނަގޮތެއް ނުވިއެވެ. ފަޅަށް ވަދެވުނުއިރު އަމީރާ އިނީ ނުތެދުވެވޭ ވަރުވެފައެވެ. ބޮލުގައި ހުރި ރިހުމަކުން އަވަހަށް އެއްގަމަށް ފައިބާ ތަނެއްގައި ހަމަޖެހިލަން ބޭނުންވިއެވެ.

އޭނާގެ އަތުގައި އިރަމް ހިފައި ނެގި ހިނދު ހޮޑު ނުލުމަށް ކުރަމުން ދިޔަ ހުރިހާ މަސައްކަތެއް ބޭކާރުވިއެވެ. އޯކަށް ދަމައިގަތް ގޮތައް ކުޑަދޮރުން ބޭރަށް ބޯދިއްކޮށްލެވުނީ ކިރިޔާއެވެ. އިރަމްއަށް އަމީރާގެ ބޮލުގައި ފަހަތުން އަތް އަޅުވާލެވުނު ހިނދު ހޮޑުލެވެން ފެށިގޮތައް ހަމަޖެހުނީ މުޅި ކުއްޖާގެ ހަށިގަނޑަށް ލޮޑުކަން ވަދެ ދެމުނު ފަހުންނެވެ.

”އޯހް ނޯ.. ހަމައަކަށް އެޅިއްޖެތަ؟ އަދިވެސް ލަވާތަ؟“ އޭރު އެހެން މީހުން ފައިބަމުން ދާތީ އެކަން އެނގޭގޮތެއް ނުވިއެވެ. ނާޔާއަށް ފެނިގެން އައިސް އެހީވިއެވެ. ފެންފުޅިއަކުން މޫނު ދޮވެލަ ދިނުމަށްފަހު ރަނގަޅުތޯ އަނެއްކާ ވެސް އަހައިލިއެވެ. އަމީރާ ހަމައެކަނި ބޯޖަހައިލަމުން ޓިޝޫއަކުން މޫނުމަތި ސާފްކޮށްލިއެވެ. ކޮޅަށް ވެސް ހުރެވުނީ ކިރިޔާއެވެ. އިޔާން ނައުމުން އަމިއްލަ ނަފްސަށް އިވޭވަރަށް ކުދި ކިޔަމުން ނުކުންނަނިކޮން ރީއާ އުރާލައިގެން ހުއްޓާ ފެނުމުން އަނގަމަތީގައި އަތް އަޅުވާލެވުނެވެ. އެހާ އަވަހަށް އިޔާން ފޭބީ ރީއާ ގޮވައިގެންތާއެވެ.

”ދޮންބެ ރަނގަޅު އެނގޭ.. އެމީ ހޮޑު ލާލާ ވަރުބަލި ވެގެން އެ ފޭބީ.. އަދި ގޮސް ދުރުގައޭ ހުރީ“

އިޔާންގެ ގާތައް ގޮސް އޭނާއަށް އިވޭ ވަރަށް އިރަމް ބުނެލިއެވެ. ހައިރާން ވެފައިން އެނބުރި އިރަމްގެ މޫނަށް ބަލައިލިއެވެ. އިޔާން ފޭބި އިރު އެކަހަލަ ކަމެއް ނެތް ކަމަށް ބުނެލިއެވެ. އޭނާ ބަލައިލި އިރު ނާޔާމެން އެރި ބަގީއަށް އަމީރާ ވެސް އަރައިގެން ދެއެވެ. އިޔާންވެސް އަވަސް ވެގަތީ ބަގީއެއްގައި ކޮޓަރިތަކައް ދިޔުމަށެވެ.

ދަތުރުގެ ވަރުބަލިކަމާއެކު، އެމީހުންނަށް ޚާއްސަކުރެވުނު ލަގްޒަރީ ވޯޓާ ވިލާއަށް އާދެވުނު އިރު، ކޮންމެ މީހަކުވެސް ބެލީ ކުޑައިރުކޮޅަކަށް ނަމަވެސް އަރާމުކޮށްލެވޭތޯއެވެ. އަނެއްކޮޅުން ސިކުންތުކޮޅަކަށް ވެސް ކެރީގެ އަސަރު ނުހުއްޓައެވެ. ތަނެއް ފެންނަވަރުވީ ވެސް އެހިސާބަށް އާދެވުނު ފަހުންނެވެ. ބަގީއިން ފައިބައިގެން އެތެރެއަށް ވަދެ އަމީރާ ތަންތަން ބަލަންފެށިއެވެ. ހަމައެކަނި އެތަނުގެ ތެރެއަށް ހިންގާލި ކަޅިން ވެސް އޭނާ އާޝޯހު ކޮށްލިއެވެ. ދިގު ފާލަމުގެ ދެފަޜާތުގައި ދުރުދުރުގައި ފެންނަން ހުރި ހުދާއި ލަކުޑި ކުލައިގެ ވިލާތައް ބޭރުން ބަލާލާއިރުވެސް ފުރިހަމަ ކަމުން ކަޅި ދުރުކޮށްލާ ހިތް ނުވެއެވެ. ތަފާތު މާމެލާމެލީގެ ޕޮޓުތައް ދޮރުކައިރީގައި ޖަހާލާފައިވީ އިރު އެތަނުގައި ގިނައީ މާލެއިން ނުފެންނަ ޒާތް ޒާތުގެ މަލެވެ. ރަތްކުލައިގެ ފިނިފެންމާ ގަސްތަކެއް ހުއްޓާ ފެނުމުން ރީތިކަމުން އަމީރާއަށް އެތަނުން ގަހަކުން މަލެއް ބިނދެލެވުނެވެ.

”ވޯހްހް…ސޯ ބިއުޓިފުލް“ފިޔަތަކުގައި މަޑުމަޑުން ފިރުމާލި އިރު އޭނާގެ ވަރުބަލިކަން އެކުލެވޭ މޫނަށް ހީވީ ދިރުން ލިބުނު ހެންނެވެ.

”އާދޭ އެމީ ކުޑަކޮން އިށީންދެލަން …އަދި ފަހުން ދާންވާނެ ތަންތަން ބަލާލަން“ ނާޔާ ދެފަހަރަކު ގޮވާލުމުން އެންމެފަހުން އެތެރެއަށް ވަނެވެ.

”އެމީ އެއްޗެއް ކާލަން ހިނގާ.. މިހާރު ހުންނާނީ ވަރުބަލަވެފަ.. ނީއްކޮ ހޮޑުލާ އުޅޭތީވެ ބޭސްވެސް ގެންދިޔައީމޭ.. މާ ފަހުން ވިއްޔަ އެނގުނީ އެމީއަށް ވެސް ހޮޑު ލެވޭކަން..“ ނާޔާ ބުނެލިއެވެ.

”ހަވީރު ދެން ކާނީ…މިހާރު ކުރިއަށް ވުރެން ރަނގަޅު“ ނާޔާއަށް ޖަވާބުދީފައި އޭނާ ބަލައިލީ އިރަމް ކޮބާތޯއެވެ. އޭރު އޭނާ އުޅެނީ ތަންތަން ފޮޓޯ ނެގުމުގައި އަވަދިނެތިއެވެ.

އަމީރާވެސް ފަހަރަކު ކޮޓަރިއެއް ބެލުމުގައި އުޅެންފެށިއެވެ. ތަނަވަސް ސިޓިންރޫމުގައި ތިރީގައި ބޭނުންކޮށްފައިވާ ބޯ ބިއްލޫރިން މޫދު ފެނެއެވެ . ހުދުކުލައިގެ އަރާމް ފަރުނީޗަރާއި އެކު ދިރުން ގެނެސްދެނީ ސީލިންގްގައި ހަރުކޮށްފައިވާ ރަންކުލައިގެ ޗާންދަލިޔާއިންނެވެ. އޭރު ބަދިގެއިން ރިސޯޓުގެ ދެ ސްޓާފުން ނުކުމެ ކެއުން ތައްޔާރުވެފައި ހުރިވާހަކަ ބުނެލިއެވެ. މާބޮޑަށް ހޮޑުލެވުމުން ކާހިތް ނުވެފައި ހުއްޓާ ވެސް މަޖުދާއާއި ނަދީމް އައުމުން އެންމެފަހު ވަގުތު ޖެހުނީ ކާމޭޒު ދޮށައް ދާށެވެ. ބަދިގެއަށް ވަތްއިރު މީރު  ކާތަކެތިން ކާމޭޒު ބަރާކޮށްފައި އޮތެވެ. ދުވަމުން ދިޔަ މީރުވަހުން ކާކޮޓަރި އޮތީ އެއްވަސް ވެފައެވެ.

މަޖުދާއަށް އަމީރާ ހޮޑުލިކަން އެނގުމުން ދާއިރު އޭނާގެ ގާތުގައި އިނުމަށް ބުންޏެވެ. މޭޒު ދޮށުގައި އިއްތިތަނުން ތައްޓެއް ފުރާ ކާއެއްޗިހި އަޅާއިގެން ގެނެސްފިއެވެ. ނުކެވޭނެއޭ ވެސް ބުނަން ނުކެރިގެން އެންމެ ފަހުން ކެވުނު ވަރަކަށް ކާން ފެށިއެވެ.

”ހާދަ ރީއްޗޭ މި ވިލާތައް..ބީޗާއި ބޭރުގަ އަދި ހުރި ފުރިހަކަމެއް އެމީއާއި އިރޫއަށް ދައްކާލަން ދެވޭނީ ވެސް ވިއްސާރަ ހުއްޓާލީމައެންނު.. މިދެކުދިން އެކަނިން މިރަށައް މިހާރު ނާންނަނީ.“ނަދީމް ބުންޏެވެ. އޭނާއާއި ބައިވެރި ވެލަމުން މަޖުދާ ވެސް ބޯޖަހައިލިއެވެ.

“ މި ވިލާއާއި ޖެހިގެން ހުރި ވިލާވެސް އެއީ އަހަރެމެން ބޭނުން ކުރަން ހަމަ.. މީރާންއާއި ނީއްކޮއާއި މަންމަމެން ދާނަން އެތަނަށް .. އެމީއާއި އިރޫ މަޑުކުރޭ ދޮންތަ މެންނާއި އިޔާ އާއި އެއްކޮން މިތާގަ“ މަޖުދާ ބުނެލިއެވެ. އެގޮތާއި އެއްބަސްވެގެން އެހެންމީހުންވެސް ބޯޖަހައިލިއެވެ.

”ކޮބާތަ ރީއްކޮއާއި އިޔާ“ އިޔާން އެތެރެއަށް ނުވަންނާތީ ނާޔާ އެހިއެވެ. އޭނާ އިނީ ޔޫވީން ގޮވައިގެން ޔުމާން ވެސް ނައިސްގެންނެވެ.

”ޔޫވީ އާއި ރީއްކޮއަށް ސްވިމިންގ ޕޫލް ފެނިގެން އެބަތިބި އެރިގެން…“ އެތެރެއަށް ވަތް އިޔާންއަށް ނާޔާގެ ސުވާލް އިވިގެން ޖަވާބުދިނެވެ.

”އަޅޭ އެކަމަކު ވިއްސާރަ ހުއްޓީމަ ތަންތަން ބަލައިލަން ބޭރަށް ނުކުންނަން ކަމަށް މިއުޅެނީ“

”ވިއްސާރަ ހުއްޓިއްޔާ އެންނު.. އަހަހަ.. މިހާރު އަނެއްކާ އަނެއް ވިލާގަނޑު އައިސް ބޯމަތިކޮށްލައިފި“ މޭޒު ދޮށުގައި އިޔާން އިށީންދެ ނަޒަރެއް ދިއްކޮށްލީ އަމީރާއަށެވެ. ނަމަވެސް، މަޖުދާއާއެކު ދެކެވެމުންދިޔަ ފޯރިގަދަ ވާހަކައަށް ގެއްލިފައި އަމީރާ އިނެވެ.

މަޖުދާ ކިޔައިދެމުން ދިޔައީ ރިސޯޓުގެ ހިތްގައިމު މާހައުލާއި، އޭނާގެ ތަޖުރިބާތަކުގެ ވާހަކައެވެ. އަމީރާ އިނީ އެ ވާހަކަތަކުގައި މުޅިން ބެހިފައެވެ. ޔުމާން އައިސް އިޔާންގެ ކޮނޑުގައި ޖަހައިލި އިރުވެސް، އިޔާންއަށް ދުނިޔެއަށް ރޭކާލާހެންނެއް ހީއެއް ނުވެއެވެ. އޭނާގެ ހިތާއި ސިކުނޑި ވަނީ އަމީރާގެ އެ މައުސޫމް ހިނިތުންވުމުގެ ތެރޭގައި ރަނގަޅަށް ވެސް ހައްޔަރުވެފައެވެ.

”މިއައީ ކިޔާފަ، އިރުކޮޅަކުން ދިޔަސް އަދި ރަނގަޅުވާނެ އެންނޫހޭ.. މިހާރު ކޭކްވެސް ގެންގޮސްފަ މިއައީ.. ވިޝާމްއާއި އޭނާގެ ފްރެންޑްސް އާއި ޝެޑީ ވެއްޖެ ހޯލަށް ގޮސްފަ.. ހުރިހާ ކަމެއް ވެސް ނިމިފަ“ ޔުމާން ވާހަކަ ދެއްކިއިރުވެސް އިޔާންއަށް ނޭނގުނެވެ. އޭނާ ބަލައިލި އިރު އަމީރާގެ މޫނަށް ބަލަހައްޓާއިގެން އިންގޮތް ފެނި ހިނިއައެވެ. ދެންމެއަކު އިޔާންއާއި، ވިޝާމް ދިމާކުރި އިރު އެތަނުގައި ހުރެވުމުން ދެޒުވާނުންގެ ދެމެދުގައި އޮތް ގުޅުން އޭނާއަށް ވެސް އޮތީ އެނގިފައެވެ.

”ބައެއް މީހުންނަށް ހާދަ ވަރެއް ވެފައޭ ދޯ މިތިބީ“ އެންމެ ފަހުން އިޔާންގެ ގައިގާ އޭނާ ވިކައިލިއެވެ. ތަދުވެގެން އަޑެއް ލައްވާލަމުން، އެހެން މީހުންވެސް ބަލައިލިއެވެ. ވީ ގޮތް އެނގިގެން އިރަމްއާއި މީރާން ހިނިއައިސް ބަލަން ތިއްބެވެ.

”އަޅެ މިއޮތް ވަރަށް ވާހަކަ ދައްކާއިރުވެސް އެ އިންނަނީ ހަމަ ގެއްލިފައޭ“ ޔުމާންގެ އަޑުއިވި އިޔާންއަށް ހެވުނެވެ. ނުގޮތަކަށް ބޯކަހާލަމުން އެހެން އިނދެ ބަލައިލި އިރު، އަމީރާގެމޫނުން ވެރިވީ މަޑު ފިޔާތޮށިކުލައެވެ. އެތަނުގައި ދެކެވެމުން ދިޔަ ވާހަކަ އޭނައަށް ނަގައިގަނެވުނީއެވެ. އިސްޖަހައިލެވުނު އިރު ލަދުރަކި ގޮތަކަށް ހީލިއެވެ.

”ކީއްކުރާނީ ދޮންތަބޭ.. މިތާގަ މިއޮތް އެންމެން ތިއްބަވެސް ، ބައެއް މީހުންނަށް ފެންނަނީ ހަމަ އެންމެ ސޫރައެއްވިއްޔާ“ މީރާން ވެސް ޔުމާންއާއި ބައިވެރިވެލިއެވެ. އޭރު ލާނެތް ކަމުން އޭނާގެ މޫނު ފެވިއްޖެއެވެ.

މަޖުދާ އިނީ ވަރަށް ފަރުވާތެރިކަމާއެކު އިޔާންއާއި އަމީރާއަށް ބަލާށެވެ. ދެމީހުންގެ މޫނުމަތިން އަރާފައިބަމުން ދިޔަ ކުލަވަރުތަކާއި، ބަދަލު ކޮށްލެވޭ ނަޒަރުތަކުން، އިޔާންގެ ހިތުގެ ހާލަތު މަޖުދާއަށް ކޮންމެވެސް މިންވަރަށް ނަގައިގަނެވުނެވެ. މަޖުދާ ހިނިއައިސްފައި އިނދެ ނަދީމްގެ މޫނަށް ބަލައިލީ، އިޔާންއާ ދިމާކޮށްލަން އޭނާ އެއްޗެއް ބުނެފާނެ ކަމުގެ އުއްމީދުގައެވެ. ނަމަވެސް ނަދީމްގެ ސިކުނޑީގައި އެނބުރެމުން ދިޔައީ މުޅިން ތަފާތު ޚިޔާލެކެވެ.

”ކިހިނެތްވީ ދަރިފުޅާ ޔުމާން؟  އިޔާން ކީއްކޮށްގެން އެއައީ؟ ވިޝާމް ރުޅިއައިސްގެން އުޅޭ އިއްޔެ ވެސް، މީނަ ކޮށްގެން އުޅުނު ކަމަކުން.. އައިޑީ ކާޑު މުއްދަތު ހަމަވެފަ އޮތްކަން ވެސް އިއްޔެ އެނގުނީ..ދެން އެކުވެރިން ފަސޭހަ މަގާމުތަކުގަ އުޅޭކަން ވެސް ރަނގަޅު.. އެހެންނަމަ އިއްޔެ ކާޑުނުލިބުނީސް ވިއްޔަ“ މައުސޫމްކަމާއި އެކު ނަދީމް ފެށީ މުޅިން ތަފާތު ވާހަކައެކެވެ. ނާޔާއަށް ވެސް ކަމެއް ފަހުމް ވީހެންނެއް ހިއެއްނުވެއެވެ. އޭނާ ވެސް ފެށީ ނަދީމްއާއި ބައިވެރިވެގެން އެވާހަކައެވެ. ހިނިއައި ވަރުން ނީނދެވިގެން އަވަސްއަވަހަށް ފެންތަށި ބޯލަމުން  މީރާން ތެދުވެގެން ދިޔައެވެ. މަޖުދާވެސް ދެފަރާތައް ބޯހޫރުވާލިއެވެ. ޔުމާންއާއި އިރަމް ކާތައްޓައް ބަލަހައްޓާއިގެން ތިބެ ދިޔައީ ހެމުންނެވެ.

”ކޮބާ އެމީ ނިމުނީތަ؟ ހާދަކުޑަކޮން ތިކެއީ“ އަމީރާ ތަށި ހިފައިގެން ތެދުވިތަން ފެނި މަޖުދާ އެހިއެވެ. އޭނާ ބޯޖަހައިލަމުން އަތް ދޮވުމަށް ހާއްސަ ބަޔަށް ދިޔައެވެ. އެތަނުން ސްޓާފަކާއި ދިމާވުމުން އެދުނީ ތަށި ބެހެއްޓުމަށެވެ. އަތް ދޮވެލައިގެން ނުކުމެ ލިވިންގް ރުމުގައި ހުރި އޭނާގެ ދަބަސް ނަގައިގެން ކޮޓަރިއަށް ވަނެވެ.

ތަނަވަސް ކޮޓަރިއެކެވެ. އަލި ލަކުޑިކުލައިގެ ފަރުނީޗަރުތަކާއި ގުޅޭނެހެން ތަނަށް ދިރުން ގެނެސްދިނީ މަތީގައި ބޭނުންކޮށްފައި ވާ ޗާންދަލިއާއިންނެވެ. ބޭރުގައި ހުރިގޮތައް ތިރީގައި ބޭނުންކޮށްފައިވާ ބިއްލޫރިގަނޑުން މޫދު  އަޑިފެންނަ ހެންނެވެ. ފާހާނާއާއި ޖެހިގެން ހުރި ބޮޑު ބިއްލޫރި ދޮރުން ނުކުމެވޭއިރު ފެންނަން އިންނަނީ ޖާގަ ތަނަވަސް ޕްރައިވެޓް ސްވިންގް ޕޫލެކެވެ. އެއާއި ޖެހިގެން މޫދަށް ފޭބޭނެހެން އިންނަ ހަނި މަގުގެ ދެފަރާތުގައިވަނީ މާގަސްތަކެވެ. ވާރޭގެ ތެރެއިން އެގަސްތައް ފެންނަލެއް ވަކިން ފުރިހަމައެވެ.  ވާރޭ ނުވެހޭނަމަ އެވަގުތު މޫދައް އެރެން އަމީރާ ހުރީ ބޭނުންވެއެވެ. ހަޔާތުގައި އަދި އަލަށް ވެސް އެއީ އޭނާ ތަޖުރިބާ ކުރެވިފައި ނުވާ ކަމެކެވެ..

ދޮރު ކަނީގައި ލެނގިލައިގެން ހުރެފައި ބޭރަށް އަތްދިއްކޮށްލިއެވެ. އެހިނދު ފެން ތިކިތައް އެ ދޮން އަތްތިލާގައި ބޮސްދޭން ފެށިއެވެ.  ދޮން މޫނުމަތީގައި ވާރޭގެ ކުދިކުދި ތިކިތައް ބަބުޅަމުން ދިޔައިރު، ސިފަވެގެން ދަނީ ފަރިވެ ފޮޅިފައިވާ މަލެއްގައި ހަރުލާފައިވާ ޝަބްނަމް ތިކިތަކެއް ފަދައިންނެވެ. ފިނިވެގެން ދިއުމުން އަމީރާގެ ތުންފަތަށް ލުއި ހިނިތުންވުމެއް ވެރިވިއެވެ. އޭނާ ލޯ މަރާލައިގެން އެ މާހައުލުގެ ހަމަހިމޭންކަމުގެ ތެރެއަށް ހިތް ދޫކޮށްލައިގެން ހުއްޓާ، މީހަކު ކޮޓަރިއަށް ވަދެގެން އައި އަޑު އިވުނެވެ.

ފަސް އެނބުރިލަން އުޅެފައިވެސް ފިޔަވަޅުތަކުގެ އަޑުން ކާކުކަން ދެނެގަންނާކަށް އުނދަގުލެއް ނުވިއެވެ. ތުންފަތުގައިވީ ހިނިތުންވުން ފުޅާވިއިރު އެހުރިގޮތައް އަމީރާ ހުއްޓެވެ. އިޔާން ފަހަތައް ހުއްޓި އަމީރާގެ ބަނޑާއި ދިމާލުން އަތް އަޅުވާލިއެވެ.

”ވާރެއާއި ތެމޭ ހިތްވީތަ؟“ އަޑު މަޑުކަމުން އަމީރާ ހީބިހި ހަލުވާލިއެވެ. ފިނިވެފައި ހުއްޓާ އިޔާން ބީހިލުމުން ހީފިލައިގެން ދިޔައެވެ.  މަޑުމަޑުން ހޫން އަޅުވާލި އިރު ހޫނު ނޭވާތައް އޭނާގެ ކަނދުރާއަށް އެޅެމުން ދިޔައެވެ. ކުރިއަށްވުރެން ބޮޑަށް އަމީރާ ގަޔާލާ ފިއްތާލިއެވެ. އެއަމަލުން އަމީރާގެ ނޭވާތައް އަވަސްވެގެން ދިޔައެވެ.

”ކޮން އިރަކުން އަހަރެމެން މެރީ ކުރާނީ؟..“ އިޔާން އަހާލިއެވެ. ފަސްދީގެން ހުރިއިރު ވެސް ލަދުންގޮސް އަމީރާގެ މޫނު ރަތްވިއެވެ. ދޭނެ ޖަވާބެއް ނޭނގުނެވެ. އިޔާން ކުޑަކޮން ދުރުވެލަމުން އަމީރާގެ ކޮނޑުގައި ހިފާ އޭނާއާއި ކުރިމަތި ކުރުވިއެވެ. އިޔާންގެ ވަރުގަދަ ދެއަތުން އަމީރާގެ އުނަގަނޑުގައި ހިފަހައްޓާލަމުން، ސީދާ އެ ދެލޮލަށް ބަލައިލިއެވެ. އެ ބެލުމުގައިވަނީ ކެތްތެރިކަމެއް ނެތް އިންތިޒާރެކެވެ. ހީވީ އަމީރާގެ ދެލޮލުން ޖަވާބު ހޯދަން މަސައްކަތް ކުރަމުން ދިޔަ ހެންނެވެ.

”މްމް؟“  އިޔާންގެ ތޫނު ނަޒަރުން ކެތް ނުވެގެން އަމީރާ އިސްޖަހާލުމުން، ޝަހާދަތް އިނގިލިން ދަތްދޮޅީގައި ހިފާ އުފުލާލިއެވެ.

”ނޭނގެ“ ކިރިޔާ އިޔާންގެ ކަންފަތައް ފޯރާވަރަށް އޭނާ ޖަވާބު ދިނެވެ. އިޔާންގެ ފަރާތުން ލުއި ހީލުމެއްގެ އަޑު އިވިގެން ދިޔައެވެ.

”ހާދަ ލަދުން.. އަދި އެވެސް ދެމީހުން ގުޅިގެން އުޅޭ އިރު.. އެހާ ލަދުން ނޫޅެބަ“ އަމީރާގެ މޫނާއި މޫނު އިޔާން ގާތްކޮށްލިއެވެ. އިޔާން ބުނި ކަމުގައި ވީނަމަވެސް އެ ނަޒަރުން އެކަނި ވެސް އަމީރާގެ ހިތުގެ ހަމަނުޖެހުން ނަގާލައެވެ. ބަލާލާ ކޮންމެވެ ފަހަރަކު ހީވަނީ މުޅި ހަށިގަނޑު އެކީގައި އެކްސްރޭ ކޮށްލާ ހެންނެވެ. ތުންފަތް ހަފާލެވުނު އިރު ވަށްކަޅިން ނަޒަރެއް ދެވުނީ ދޮރަށެވެ. ދޮރު ހުރީ ހިސާބަކަށް ހުޅުވާފައި ކަމުން ކޮންމެ ވަގުތެއްގައި ވެސް މީހަކު އައިސްފާނެ ކަމުގެ ބިރު އޮތެވެ. އެކަމަކު އިޔާން ދުރުކޮށްލާކަށް ވެސް ހިތެއް ނޭނދުނެވެ. އެއަތުގެ ތެރޭގެގައި ބޮނޑިވެގަނެގެން މުޅި އުމުރު ދުވަހުވެސް އޭނާއަށް ހުރެވިދާނެއެވެ.

”މިހާރު ކިހިނެތް ބޮޑީ؟ ޓަޔާރޑް ތަ؟ ވަރަށް ބޮޑަށް ސޮރީ، އެގަޑީގަ ރީއްކޮ މޫދު ބަލަން ކިޔާފަ ރޯންފެށީމަ ދޮންތަބެމެންނާ އެއްކޮން ފޭބުނީ.. ފަހުން އިރޫ ބުނީމަ އެނގުނީ“

”މިޙާރު އޯކޭ އޭ.. އަދި އަލަށް ކަނޑުމައްޗަށް މި އެރީ.. އެވެސް މިހާ ގަދަ ދުވަހެއްގަ..“ އިޔާންގެ ކަންބޮޑުވުން ނަގައިގަނެވުމުން ދެފަރާތައް ބޯހޫރުވާލަމުން އަމީރާ ޖަވާބުދިނެވެ. ބޯޖަހައިލަމުން އަމީރާގެ ކޯތާފަތުގައި ނުހަނު ލޯބިން ބޮސްދިނެވެ. ދުރުވެލަމުން ކަންފަތާއި އަނގަ ކައިރިކޮށްލަމުން ދެން ބުނެލި ޖުމްލަ އަހާފައި އަމީރާ ގަތީ އަމަށަކު ލަދެއް ނޫނެވެ.

”މެރީ ކުރީމަ، އަންނާނެ އަދި މިއައް ވުރެން ހޮޑު ލެވޭނެ ދުވަސްތަކެއް ވެސް.. ބީ ރެޑީ، ބޭބީ“

”އިޔާ! ދެންން!“ އަމީރާ އުޅުނީ ދުއްވައިގަންނާށެވެ. ހިނިގަނޑެއް ޖަހާލަމުން އިޔާން، އޭނާ ގެނެސް އެއަތުގެ ތެރޭގައި ރަނގަޅައް ހައްޔަރުކޮށްލިއެވެ.

”އެހެމް އެހެމް..“ ދެމީހުން ސިހުނީ ފަހަތުން އަޑެއް އިވިފައެވެ. ބަލައިލި އިރު  ބަލަހައްޓައިގެން ހުރީ އިރަމްއެވެ. ދެމީހުން ދުރުވިގޮތް ފެނި އިރަމްއަށް ހެވެމުން ދިޔައެވެ.

”ދޮންތަބޭ ބުނީ ވިޝާމްބެ ބުންޏޯ ހޯލަށް ދާށޭ.. އެމީ މިހާރު އެޖަހަނީ ތިނެއް.. އަދިވެސް ތައްޔާރު ވާން ނޫޅެ ތިހުންނަނީ.. ޝަވާރގެ ހުރިހާ ތައްޔާރެއް ވެފަ ރެސްޓޯރެންޓް އިން ގުޅައިފި މިހާރު“ އިރަމް ވާހަކަ ދެއްކިއިރު އެންމެ ސިކުންތަކަށް ވެސް އެމޫނުން ލާނެތްކަން ނުފިލައެވެ.

”ފޯރ ގަ އެއްނު އެކަން އިނީ… ރެޑީވެ ނިމޭނެ އޭގެ ކުރިން“ ގަނެފައި ހުރި ލަދު ފޮރުވާލަމުން އަމީރާ ދިޔައީ ދަބަހާއި ދިމާލަށެވެ. އިރަމް ޖައްސާލީ އެނދުގައެވެ.

”ބާއީ ބޭބީ.. ދެން ވަރަށް ބިޒީ ވާނެ މިރެއާއި ޖެހެންދެން ވެސް“ ދަމުން އަމީރާގެ ގައިގާ ކުޑަގޮތަކައް ބައްދާލަމުން އިރަމްއަށް ފެންނާނެހެން، އެ ކޯތާފަތުގައި ބޮސްދިނެވެ.

”ދޮންބޭ.. އާހްހްހް.. ޑިޑް ޔޫ ފޮގޮޓް؟ އަމް ޔޯ ސިސްޓާ! އޯހް ގޯޑް، އައި ސްވެއަރ އައި ފީލް ޕެއިންފުލީ ސިންގަލް“ އަނގަމަތީގައި އަތް އަޅާލައިގެން ހުރެ އިރަމް ގޮވާލިއެވެ. އޭރު އޭނާއަށް ދިޔައީ ހެވެމުންނެވެ. އެއްޗެއް ނުބުނެ އިޔާންވެސް ހިނިގަނޑެއް ޖަހާލަމުން ނުކުމެގެން ދިޔަތަން ފެނި އިރަމް ބަލައިލީ އަމީރާގެ މޫނަށެވެ.

”އައްޗާ .. އަދި ލަދު ވެސް ގަނެއޭ ދޯ!“ އަމީރާ ހުރިގޮތުން ވަކިންބޮޑަށް އިރަމް ހިނިއައެވެ.

****

”ހޭއި.. ކެން ޔޫ ކަމް .. ފައިނަލް ލޫކް ބަލައިލަން ދާން، ހޯލަށް؟ “ ވިޝާމް ފޯނުން ވާހަކަ ދައްކަމުން އޭނާއަށް ހާއްސަ ކުރެވިފައި ހުންނަ ވިލާގެ ތެރެއިން ނުކުމަތެވެ. އެކޮޅުން ޒަންޔާ އާއެކޭ ބުނެ ފޯނު ކަނޑާލުމުން، އިންތިޒާރުގައި ވިޝާމް މަޑުކޮށްލައިގެން ހުރީ ބަގީގެ ކައިރީގައެވެ. އޭރު ސަދަފްއަށް ނުގުޅިގެން އޭނާ ދިޔައީ އެމަސައްކަތް ވެސް ކުރަމުންނެވެ. ކެރީގެ އަސަރު މަޑުކޮށްލާފައިވީ އިރު ކޮންމެވެސް ވަރަކަށް އުޑުމަތީގައިވީ ވިލާތައް ވެސް އޭރުވަނީ މަދުވެފައެވެ.  ފޯނަށް ގެއްލިގެން ހުރުމުން އިތުރު ފަރާތެއްގެ  ނަޒަރު ހުއްޓިފައި ވާކަމެއް ވިޝާމްއަށް ރެއަކާއި ނުލައެވެ.

ޝިކާރައަކަށް ބަލަބަލައި އޮތް މިނިކާވަގެއް ފަދައިން، މަންހާގެ ކަޅި ހުއްޓިފައިވަނީ ވިޝާމްގެ ކޮންމެ ހަރަކާތަކަށެވެ. އިރުކޮޅަކު ހުރެފައި މަންހާއައިސް ހުއްޓިލީ ކުރިމަތީގައެވެ. ގަޔަށް ބާރު ޖިންސާއި ކުރު ގަމީސްކޮޅެއްގައި ހުރިއިރު ހަށިގަނޑުގެ ވަނާތައް ފާޅުކަން ބޮޑު ގޮތެއްގައި ހާމަވަމުން ދިޔައެވެ. ވިޝާމްއާއި ވާހަކަ ދައްކަން އޭނާ ކުރަމުން ދިޔަ މަސައްކަތް ބޭކާރު ކުރުވަމުން ދިޔައީ ވިޝާމްއެވެ. މަންހާ ވާހަކަ ދައްކަން އުޅޭކަން އެނގުމުން ފާޅުގައި ’އިގްނޯރ‘ ކުރަމުންދިޔައެވެ.އެހެންކަމުން މަންހާ ގަސްތުކޮށްގެން ހުރީ އެފަދަ ގޮތަކަށް ނަމަވެސް ވިޝާމްއާއި ވާހަކަދެއްކުމެވެ.

”ޒަން؟ ހާދަ އަވަހޭ“ މީހަކު ކުރިމައްޗަށް ހުއްޓުނު ހިނދު ދުވަންފެށި އަންހެން ސެންޓުވަހުން ވިޝާމް ހީކުރީ ޒަންޔާ ކަމަށެވެ. އިސްއުފުލާ ނުލާ އޭނާ އޭރުވެސް އިނީ ފޯނުން މެސެޖެއް ޓައިޕްކުރުމުގައި އަވަދި ނެތިއެވެ. ނަމަވެސް  ޖަވާބެއް ނައުމުން ފޯނުން ނަޒަރު ދުރުކޮށްލަމުން އިސްއުފުލާލިއެވެ. އެހާ ހަމަޖެހިގެން އިންދާ މަންހާ ފެނުމުން ވިޝާމްއަށް ކޮޅަށް ތެދުވެވުނު ގޮތް ވެސް ނޭނގެއެވެ. ސިކުންތުކޮޅެއްގެ ތެރޭގައި މޫނަށް ވެރިވެގަތީ ނުރުހުމުގެ ކުލަވަރެވެ. އެންމެ ހިނދު ކޮޅަކު ވެސް އެތާގައި ހުންނަން ބޭނުމެއް ނުވިއެވެ.

”ވިޝާމް، މަޑުކޮށްބަލަ“ ވިޝާމް އެތަނުން ދާން ހިއްލާލި ފިޔަވަޅާއި އެކު  އެއަތުގައި މަންހާ ހިފެހެއްޓިއެވެ.

”ގައިގަ އަތް ނުލާތި!“  މަންހާގެ އަތް އިޙްސާސްވެގެން ދިޔަ ހިނދު ގައިގާ ހުރި ބާރެއްލާފައި އެއަތް ވިޝާމް ފޮޅާލާފައި މަޑުނުކޮށް ހިނގައިގަތެވެ. ނަމަވެސް ދެވުނީ ތަންކޮޅަކަށެވެ. އަނެއްކާ ވެސް މަންހާ ހިފެހެއްޓިއެވެ. މިފަހަރު މަންހާއާއި ކުރިމަތިލާ އެދެކޮނޑުގައި ހިފާ ދުރަށް ވިޟާމް ކޮއްޕާލިއެވެ. އެ ބާރުމިނުގައި އޭނާ މަތަވީ ބަގީގައި ޖެހިފައެވެ. ތަދުވާނެ ކަން ވެސް ވިޝާމްއަށް އެނގުނެވެ. ނަމަވެސް އެއްވެސް ފަރުވާލެއް އެކަމަށް ނުބަހައްޓާ ވިޝާމް ދުރަށް ހިނގައިގަތެވެ.

”ވިޝާމް ، އައި ލަވް ޔޫ ސޯ މަޗް.. ޑޯންޓް މެރީ ޙާރ! އައިލަވް ޔޫ ސޯ މަޗް“ އިވުނީ މަންހާގެ ރުއިމުގެ އަޑެވެ. ކިތަންމެ ކެތްތެރިވެފައި ގަދަ ހިތްވަރު ދެއްކި ނަމަވެސް އެއަޑުން އަދިވެސް ވިޝާމްގެ ހިތް މަޑުވެގެންދަނީ އަޖައިބެއް ފަދަ ގޮތަކަށެވެ. ދެފައިގާ ހީވީ ކަސްތޮޅު އެޅުވިގެން ދިޔަހެންނެވެ. މެއިން ނަގައިގަތް ދިލަ އަރުތެރެއާއި ހިސާބަށް ފޯރިއެވެ. އެހެނަސް އެ އަސަރުތަކުގެ މައްޗަށް އޭނާގެ ހަމަ ބުއްދި އިސްކުރިއެވެ. މަންހާގެ ހަގީގަތް ހަނދާން އާކޮށްލި ހިނދު ނަފްސަށް އެރުޅިވެރިކަން އިއާދަ ވެގެންދިޔައެވެ. ހިތުން އެ ނަން ފިލުވާލަން އުނދަގޫ ނަމަވެސް މަންހާގެ ގާތައް އެނބުރި ދިޔުމަކީ އޭނާ ހަމަ ހޭވެރިކަމުގައި ހުރެ ނަގާނެ ފިޔަވަޅެއް ނޫނެވެ. އެހުރިގޮތައް އޭނާ މަންހާއަށް ކުރިމަތިލިއެވެ.

“ ލޯގަނޑެއްގެ ކުރިމަތީގަ ހުރެ ތި މޫނަށް ބަލައިލަބަލަ! އަމިއްލަ ނަފްސާއި އަމިއްލަ ތިހިތާއި ސުވާލް ކޮށްލާ، މިއަދު މި ވިޝާމްގެ ކުރިމައްޗަށް ތި މަންހާ އައިސް ތިހުރީ ކޮން ހައިސިއްޔަތަކުންތޯ! މީގެ ތިން އަހަރު ކުރިން އަހަރެމެން ދެމެދުގައި އޮތްހާ ގުޅުމެއް ވިއްޔާ ކަނޑާލިން! ހަނދާން ނެތުނީތަ! އެހެން ވިއްޔާ މިވަރުން ހަނދާން ހުންނާނެ ކަމަށް ހީކުރަން… މީގެ ފަހުން މަ ކުރި މައްޗަށް އަރައިގެން ވެސް ނުވާނެ! މަ އަންހެނުން ގެއަށް ގެންދިޔުމުގެ ކުރިން ކަލެއާއި ޝާއިރާ އެގެއިން ނުކުންނާތި! އަޑު އިވިއްޖެ؟ “ އަމުރަކަށް ފަހު އަމުރެއް ކުރަމުން ދިޔައިރު ވިޝާމްގެ އަޑުވެސް ހިނދެއް ހިނދަކަށް ދިޔައީ ބާރުވަމުންނެވެ. މަންހާއަށް އޭނާގެ ދިރިއުޅުމުން އެއްވެސް ޖާގައެއް ދެވެން ނެތްކަން ވަރަށް ސާފްކޮށް އަންގާލަ ދިނެވެ. އެހިތުގައިވާ ނަފްރަތުވެސް ދައްކާލަދީފިއެވެ.  މަންހާގެ ހިތުގައި އަޅަމުން ދިޔަ ވޭން ދެގުނަވިއެވެ. ހިތުގައިވާ ރޯ ފާރުގަނޑުގައި މިރުސް އެޅުނުފަދައެވެ. ރޮމުން ދިޔައިރު އެ ކަރުނުތަކުން ވިޝާމްއަށް އެއްވެސް އަސަރެއް ކުރިހެންނެއް ހިއެއް ނުވެއެވެ. އެމޫނުން މަންހާއަށް ފެންނަމުން ދިޔައީ ރުޅިވެރިކަމުގެ އެންމެ ފުންމާނައެވެ. ނަމަވެސް އަނެއްކާވެސް މަންހާ ވާހަކަ ދައްކަން ފެށިއެވެ.

”ވިޝާމް ޕްލީޒް އެންމެ ޗާންސެއް ދީބަލަ.. ތި ކައިވެންޏާކީ މަށައް ދައްކަން ކުރާ ކައިވެންޏެއް ނޫންތަ؟ ކީއްވެތަ ތިހެން ތިހަދަނީ.. އަހަރެން ހާދަ ލޯބިވެއޭ“

މަންހާގެ ވާހަކަ ތަކުން ބޮލަށް އުނދަގޫވެފައި ހުރެމެ ވިޝާމް އެތަނުން ދުރަށް ދާން ހިނަގައިގަތެވެ. އެ އަނގައިން ލޯބިވެއޭ ބުނާ އަޑުއެހުމަށް ވުރެން ހާސް މަރުން މަރުވުން ވެސް މާ ހިތައް ފަސޭހަވާނެއެވެ. އެ ލޯބީގެ ބަސްތަކަކީ ވިޝާމްގެ ކަންފަތަށް އިވޭ ވިހައެކެވެ.

”ވިޝާމް..“ވިޝާމް ސިހުނީ ޒަންޔާގެ އަޑު އިވިފައެވެ. ޒަންޔާ އައިތަން ފެނި މޫނުމަތީގައިވި ރުޅިވެރިކަން ފޮރުވާލަމުން ހީލިއެވެ.  ޒަންޔާ ހުރިގޮތުން އެތަނުގައި ދެކެވުނު ވާހަކަތައް އިވުނުކަން ހާމަވެއެވެ.

”ޔެސް.. ތި އައީ ދޯ.. ހިނގާ ދަމާ“މަންހާގެ ކުރިމަތިން ލާފައި ވިޝާމް އައިސް ޒަންޔާގެ އަތުގައި ހިފާލަމުން ބަގީއަށް އެރުވިއެވެ. އެއަށްފަހު ބަލާ ވެސް ނުލައެވެ. ބާރު ސްޕީޑުގައި އެތަނުން ދިޔައެވެ.

ފަސް އެނބުރިފައި އެ މަންޒަރު ބަލަން ހުރި އިރު މަންހާގެ ދެލޮލުގައިވީ ސާފް ނަފްރަތެވެ. އިންތިހާ ރުޅިއެވެ. ފުރަތަމަ ފަހަރަށް ޒަންޔާގެ ސޫރަ ފެނުނު އިރު ހިތުގެ އެންމެ ފުނުގައި ހަސަދައިގެ ބާނިތައް ހިލިގަތެވެ. ތުންތުންމަތިން ޒަންޔާގެ ރީތި ވާހަކަ ގޭގެ އެކިމީހުންގެ ފުށުން އަހާފައިވީ އިރުވެސް އެއީ ތެދަކަށް ވާނެކަމަކަށް އޭނާ ގަބޫލެއް ނުކުރެއެވެ. ހަގީގަތުގައިވެސް ޒަންޔާގެ ކިބައިގާ ފިރިހެނަކު ހިތްކިޔާނެ ފަދަ ހުރިހާ ސިފައެއް އެބަހުއްޓެވެ. މަންހާގެ ހިތައް އެންމެ އުނދަގޫވީވެސް އެކަމާއިއެވެ. ހާސްފަހަރު އެ މޫނު ނޮޅާލަން ހިތައް އެރިއެވެ. ވިޝާމް ދޫކޮށްލާފައި ދެވުނު މޮޔަކަން ހިތައް އެރިއެވެ. ނަމަވެސް ވީކަމެއް ނުޥާކަމަކަށް ވެސް ހެދޭކަށް ނެތެވެ. އަނެއްކޮޅުން ވިޝާމް ދައްކަމުން ދިޔައީ ނަފްރަތެވެ.

”އަހަންނާއި ހެދި އޮބްސެސް ވެފަ ހުރި މީހަކު މިހާ އަވަހަށް އެހެން މީހަކާއި މެރީ ކުރާނެތަ؟ މަށައް ދައްކަން ވެގެން އޭނާ ކުރާ ކަންކަން މިއީ.. ދެމީހުން އެހާ އަވަހަށް ހަމަ ލޯބި ވެދާނެބަ.. ނޫނޭ..ނޫނޭ..އެރޭންޖް މެރިއޭޖެއްނު.. ހަހަހައްހާ…އަހަރެންގެ ސިކުނޑި އެހާ ގަމާރް ވެދާނެ ކަމަށްތަ އޭނަ ހީކުރީ.. ލާހިކަ ކުޅަދާނަ އެއްނޫން ދެމީހުން މާގިނަ ދުވަހު އެކީގައި އުޅޭކަށް.. އެންޑް އާހްހް، ހައު ކުޑް ހީ ޓަޗް ހާރ!“  ދެލޮލުން އައިސް ހުރި ކަރުނުތައް ފުހެލަމުން މަންހާ ވާހަކަ ދެއްކީ އަމިއްލާ ނަފްސައެވެ. ނަފްރަތުން ފުރިފައިވި ދެލޮލުގައިވީ ނުރައްކާތެރިކަމެވެ. ސިފަވަމުން ދިޔައީ އެންމެ ފަހު ވަގުތު ޒަންޔާގެ އަތުގައި ހިފާލައިގެން ވިޝާމް ދިޔަގޮތެވެ.

***

ބަގީ ދުއްވަމުން ދިޔައިރު ވިޝާމް އެންމެ ފަހަރަކުވެސް އަނގަޔަކުން ނުބުންނެވެ. ޒަންޔާއަށް ވެސް ވާހަކަ ދައްކާކަށް ނުކެރެއެވެ. ނަމަވެސް އިރުކޮޅާކާއި ހެން ބަލައިލެވެއެވެ. އެ މޫނުމަތީން ތަބީއަތު ގޯސްވެފައި ވާވަރު ސާފެވެ. ބަލައިލެވުނީ އަމިއްލައަތަށެވެ. ވިޝާމް ހިފަހައްޓައިގެން ގޮސް ބަގީއަށް އެރުވި އިރު އެއަތުގައި ހިފީ ނުހަނު ބާރަށެވެ. ތަދު ނުވިނަމަވެސް އެރަތް ކަން ނުފިލާ ހުރިއިރު އަދި ވެސް އެހިސާބުން ވިންދު ޖަހަމުން ދިޔައެވެ.

”އަމް ސޮރީ“

”މްމްމް؟“ އަތުގައި މަޑުމަޑުން ފިރުމާލަ ފިރުމާލަ އިންދާ ވިޝާމް ވާހަކަ ދެއްކި އަޑަށް ޒަންޔާ އިސްއުފުލާލިއެވެ. އޭރު ވަނީ މަންޒިލަށް އާދެވިފައެވެ. ވިޝާމް އިނީ ސީދާ ޒަންޔާގެ އަތައް ކަޅި ހުއްޓާލައިގެންނެވެ. އެކަން އިޙްސާސްވެގެން ލައިގެން ހުރި ހެދުމުގެ އަތުކުރިއަށް ދަމާލެވުނެވެ. ނަމަވެސް އޭނާގެ އަތުގައި ވިޝާމް ހިފާލިއެވެ. ރަތްވެފައިވާ ހިސާބުގައި މަޑުމަޑުން ފިރުމާލިއެވެ. ވިޝާމްގެ ފަޜާތުން ފެނިގެންދާ ގާތްކަމުން ހައިރާންވީ އިރު،  އޭނާ އިނީ އަތް ދުރުކޮށްލަން ވެސް ނުކެރިފައެވެ.

”އިޓްސް އޯކޭ އޭ.. ޔޫ އޯލްރައިޓް؟“ޒަންޔާ އަހައިލިއެވެ. ވިޝާމް ބަލައިލަމުން ޒަންޔާއަށް ހީލިއެވެ. އަދި ބޯޖަހައިލިއެވެ. އޭނާގެ މޫނު އެހާ ގާތުން ފެނުމުން ޒަންޔާއަށް ހިންދިރުވާލަން އުނދަގޫވިއެވެ. ވާރޭގެ ސަބަބުން ހިސާބަކަށް ތެމިފައިވާތީ، ދިގުވެފައިވާ އިސްތަށިގަނޑުގެ ބައެއް ނިތްމައްޗަށް ފައިބާފައި އޮތެވެ. ދިގުވެފައިވާ ތުނބުޅި ހުރިވަރު އޭނާއަށް ކަމުދިޔައެވެ.  ފުރަތަމަ ފަހަރަށް ވިޝާމްގެ ރީތި ސިފަތައް ފާހަގަވިއެވެ.

ހިތައް ވެގެން ދިޔަގޮތުން ކުޑަކޮން ތެޅިގަނެވުނެވެ. ދެފަރާތައް ބޯހޫރުވާލެވުނީ ހިނދުކޮޅަކަށް ނަމަވެސް އޭނަގެ ހިތް މަގާމުން ދޫވީމައެވެ.

”ޔޫ ޝުއާރ އޯކޭ؟“ ވިޝާމް އަހައިލިއެވެ. ޒަންޔާ ބޯޖަހައިލަމުން ހިނިތުންވުން ފުޅާކޮށްލިއެވެ.

”މްމްމް..އެމީ ވަރަށް ގުޅާ އެބަ.. ހިނގާ އަވަހަށް“ ޒަންޔާ ބަގީ އިން ފައިބަމުން ވިޝާމްއަށް ދައްކައިލީ ރިންގުވަމުން ދިޔަ ފޯނެވެ.

”ކީކޭ ދޫނި. މިދަނީ އޭ ހަމަ ..ދެން މާ ލަހެއް ނުވާނެ..“ ފޯނު ނަގާފައި އަމީރާއަށް ޖަވާބު ދީފައި ޒަންޔާ ފޯނު ބޭއްވިއެވެ.

”ކޮބާ އެމީ؟ ކިހިނެތް ވީ؟“

”ފެމެލީ ރެސްޓޯރެންޓް ގަ ޔޯ.. ރެޑީވާން ވާއިރަށް އަންނާށޯ ދެމީހުން ސައިބޯން.. އިޔާންބެ ވެސް އެއުޅެނީ އެތާގަ.. މިތަނުން ނިމިގެން އެކޮޅަށްށޯ އެދިޔައީ..އަސްލު އަންނަން ބުނި ގަޑިއަކީ ފޯރ.. އެކަމަކު މިހާރު ފޯރ ތާރޓީ ވަނީ، އެހެންވެ ހުއްޓާ ނުލާ އެގުޅަނީ“ ޒަންޔާ ކިޔައިދިނެވެ. ’އޯހް‘ އޭ ބުނެ ވިޝާމް ވެސް ހަރަކާތްތައް އަވަސް ކޮށްލިއެވެ.

****

ހުރިހާ ބޮއްކެއް ނިއްވާލާފައި އޮތް އިރު ތަނުގެ ތެރެ ފެންނަނީ ނުހަނު އަނދިރިކޮންނެވެ. އެތެރޭގައި އެކަކު އަނެއްކަކަށް ހީ ވާހަކަ ދައްކާ އަޑު އިވެއެވެ. ދޭތެރެއަކުން ދޮރު ކައިރިއަށް ސަދަފް ދެއެވެ. އޭނާ ބަލަމުން ދިޔައީ ވިޝާމްއާއި ޒަންޔާ އާދޭތޯއެވެ. އެގޮތުގައި ވިއްސަކަށް މިނެޓް ހޭދަވި އިރު ދެމީހުން އަންނަތަން ފެނުނެވެ.

ދެމީޙުން ދޮރުކައިރިއަށް ހުއްޓިގެން ތިބެ މީހެއްގެ ހިލަމެއް ނުވެގެން ކަންނޭގެއެވެ. ބިއްލޫރި ގަނޑުން އެތެރެ ބަލަން ފެށިއެވެ. އެންމެ ފަހުން ވިޝާމް ދޮރު ހުޅުވާލާފިއެވެ.

”ބޮކިތައް ކޮބާ މިތަނުގެ… އެމީހުން ވެސް ނެތެއްނު. ޔަގީންތަ މިތަނުގެ ވާހަކަ ކަން ބުނީ؟“ ވިޝާމް ހައިރާންވެ ހުރެ ވާހަކަ ދެއްކިއެވެ. އެއީ އެއްވެސް އިރެއްގައި ބޮކި ނިއްވާ ތަނެއް ނޫންކަމުން ހައިރާން ވާނެތާއެވެ.

ދެމީހުން ވާނުވާގައި ތިއްބާ، މުޅިތަން ކުއްލިއަކަށް އަލިވެގެން ދިޔައެވެ. އެއާއި އެކު އެންމެން އެކުއެކީގައި ހަޅޭއްލަވައިގަތް އަޑު އިވި ދިޔައީ ސިއްސައިގެންނެވެ.

”ސަޕްރާއީޒް“ ދެލޯބޮޑުވެފައި ތިއްބާ މުޅިތަން އެއް އަޑު ވިއެވެ. އާއިލާގެ އެންމެން ތިބިއިރު އެންމެންގެ މޫނުމަތިން ފެންނަން ހުރީ ނުފިލާ ހިނިތުންވުމެކެވެ. ފާރުގެ ކައިރީގައި ދެމީހުން ތިބުމަށް ކުޑަ ތައްޔާރީއެއް ކޮށްފައި ހުއްޓެވެ. ’ އަ ޑޭ ޓް ރިމެމްބާރ‘ ލިޔެފައި އިން ބެނާއެއް އިން އިރު ޕާޓީގެ ކުލަކަމަށްވާ ރަތްކުލައާއި ހުދު ކުލައިގެ މަލުން ހުރީ ޒީނަތްތެރިކޮށްފައެވެ. ދެމީހުންނަށް ބެހެއްޓިފައިވާ ޝޭސްތައް އެޅުވުމަށްފަހު ފޮޓޯ ނަގަން އުޅުނެވެ. އެކުލައިން ތައްޔާރުކޮށްފައި ކޭކެއްގެ އިތުރު ތަފާތު ވައްތަރު ތަކުގެ ޕޭސްޓްރީއާއި ޕިއްޒާގެ ވައްތަރުތަކުން މޭޒުމަތި ފަޅު ފިލުވާލާފައި އޮތެވެ.

”މިހާރު ތިއްތިބެ ވައްތަރު މެރީކުރަން އުޅޭ މީހަކާ“ އެމީހުން ބުނަމުން ދިޔަ ކޮންމެ ގޮތަކަށް ފޮޓޯ ނެގުމަށް ވިޝާމް އާއި ޒަންޔާ ހުއްޓެމުން ދިޔަގޮތް ފެނި ހެވިފައި ހުރެ ސަދަފް ބުނެލިއެވެ.

”ހަހަހްހާ.. ޝެޑީ ދެން އޮތީ ދަރިފުޅު އިނގޭ“ އާމިލާއަށް ސަދަފްގެ ވާހަކަ އިވި ހޭންފެށިއެވެ. ސަދަފް ވަގުތުން އަދި އަވަހޭ ބުނެ ނުގޮތަކަށް ދުރުގައި ހުރި އިރަމްއަށް ކަޅިއެއް އެއްލިއެވެ.

”މަންމާ މިއީ ވަރަށް ވަގަށް އުޅޭ ކުއްޖެއް.. އިހަކަށް ދުހު މިމީހުން ވަރަށް ކީ ޝެޑީ ހުޅުމާލެއަށް ދާ ވާހަކަ .. ކޮބާތަ އެ ލަކީ ކުއްޖަކީ؟“ ނާޔާ ވެސް އާމިލާއާއި ބައިވެރިވިއެވެ. އެއަޑަށް ވިޝާމްގެ ގާތުގައި ހުރެ އިޔާން ބަލައިލިކަން އެނގުމުން ސަދަފްއަށް ހިތްދިރުވާލެވުނެވެ. އޭނާ ނުބެލި ނަމަވެސް އެ ނަޒަރު އިހްސާސްވިއެވެ. އަމިއްލައަށް ތައްޔާރުކުރި މަޅީގެ ވައުގަނޑު އަމިއްލަ ކަރަށް މެހެމުން ދިޔަ ކަހަލަ އިހްސާސްއެއް ކުރެވުނެވެ. އެމައުޝޫއު ނުފެށުނު ނަމައޭ ހިތައް އެރިއެވެ.

”ޝެޑީގެ އެކަހަލަ ކަމެއް ނެތް އަދި.. އެހެންނަމަ ބުނާނެ ..ހިނގާ ސައިބޯން އެންމެން“

ޔުމާންއަށް ސަދަފްއަށް ވެފަ ހުރިގޮތް ފެނި އަވަސްއަވަހަށް ބުނެވުނެވެ. ޔުމާންގެ ބަހަށް ހުރިހާ ބޮޑެތި މީހުން ދިގުދިގަށް ހުރި މޭޒުގެ ވަށައިގެން އިށީންދެ ކެއުމަށް އިންސާފް ކުރަންފެށިއެވެ. ހުރިހާ ޒުވާނުން އުޅުނީ އަދި ވެސް ފޮޓޯ ނެގުމުގައެވެ.  އެންމެން އެކުއެކީގައި އުފާވެރި ވަގުތުތަކެއް ހޭދަ ކުރަމުން ދިޔައިރު މާހައުލުގައި މަދީ މާއިންއާއި ޝާއިރާގެ އާއިލާއެވެ. އެ ސުވާލް އެކަކުވެސް ކުރާކަށް ނޫޅޭއެވެ. އެމީހުން ތިބުމަށް ވުރެން ނެތުމުން އެންމެންގެ ހިތްތަކަށް ވެސް ލިބޭ ތަސައްލީ ބޮޑެވެ. ޝާއިރާ އިނދެފިނަމަ ކޮންމެވެސް ފާޑެއް ކިޔާނެއެވެ. ނޫނީ ވޭޓަރާއި މެދު ހިތްހަމަ ނުޖެހިގެން އެންމެންގެ ކުރިމަތީގައި ވެސް އެމީހަކާއި ބެހިލަފާނެއެވެ. ޔަގީނުންވެސް ތަނުގެ ހަމަހިމޭންކަން އެގޮތުގައި ދެމި އޮތަކަ ނުދޭނެއެވެ.

ހައެއް ޖެހުމުގެ ކުރިން އެނބުރި ވިލާތަކައް އައިސްފިއެވެ. ކައިވެނި ކުޜާ ހޯލަށް ޒަންޔާއާއި ވިޝާމް ދާން ޖެހެނީ ހަތްގަޑި ފަންސާހުގައި ކަމުން އޭގެ ކުރިން އެހެން މީހުންވެސް ދިޔައީ ތައްޔާރު ވަމުންނެވެ. ރިސޯޓުގެ ފަރާތުން ކޮންމެ ބައެއްގެ ގާތައް ވެސް ބިއުޓީޝަނުން ފޮނުވާފައި ތިއްބެވެ.

ނަމާދުކުރުމަށްފަހު ޕާޓީއަށް ޓަކައި ފެއްސި ހެދުން ލައިގެން އަމީރާ ވެސް ނުކުމެ މަޑުކޮށްލީ އިރަމްގެ ކޮޓަރީގައެވެ. އޭރު އެމީހުން ދިޔައީ އިރަމް ތައްޔާރު ކޮށްދެމުންނެވެ. ނޭޕާލް ދެ އަންހެންކުދިން އެމީހުންގެ މަސައްކަތައް ނުހަނު ފަރިތައެވެ. އެކަކު އިސްތަށިގަނޑު ހަދައިދެމުން ދިޔައިރު އަނެކަކު ދިޔައީ މޭކަޕް ކޮށްދެމުންނެވެ. ނިމިގެން އިރަމް ތެދުވެ ލޯގަނޑު ކުރިމަތީގައި ހުރެ އެނބުރިލިއެވެ.

”ވޯހްހްހް.. ޝެޑީ ފެއިންޓް ވާނެ މިރޭ.. ހާދަ ލޯބިއޭ.. މާޝާﷲ“ އިރަމްގެ ފުރިހަމަކަން ފެނިފައި އަމީރާގެ ދުލުން ތައުރީފުގެ ބަސްތައް އޮހިގަތެވެ. ކަޅުރަތް ކުލައިގެ މެކްސީގައި އިރަމް ފެންނަލެއް ނުހަނު ލޯތްބެވެ. ފަންފަން އިސްތަށިކޮޅު ފަހަތައް ދޫކޮށްލާފައި ވީއިރު ކޮށްފައިވަނީ އޭނާއާއި ނުހަނު ގުޅޭފަދަ މޭކަޕެކެވެ.

”ދެންން.. އޭނަ ނޫޅެއޭ ބަލާކަށް.. އެބުނީއެއްނު ދޮންތަ ވެސް އޭނަ ހުޅުމާލެއަށް ދާ ވާހަކަ.. ޔަގީން އެހެން ބިޓެއް ސެޓުކޮށްލީކަން“ އަމީރާ ރީތިވާ މޭޒު ދޮށުގައި އިށީނުމުން، އޭނާ ތައްޔާރުވެ ނިމެންދެން އިރަމް އިށީނީ އެނދުމަތީގައެވެ.

”އެކަމަކުވާ ސާބަސް އިރޫއަށް ..އަހަންނަށް ވެސް އެނގުނު އެމީހުން ދެއްކީ އިރޫގެ ވާހަކަކަން.. ނުދެކެންތަ އިޔާގެ ފޭސްއެއް، ނާޔޫ ދައްތަ އެހެން ބުނި ގަޑީގަ ޑިޓެކްޓިވް މޯޑް އޮން ކޮށްގެން އޭނަ ހުރީ..އަހަރެން ދުށީމޭ.. އެހެންނޫނަސް ޝެޑީ ހުޅުމާލެ ގޮސް އުޅުނީ އިރޫއާއި އެކު އެއްނޫންތަ.. އޭނަ އަހަންނަށް ވެސް ގުޅައޭ އިރޫ ހާލުބަލަން“ ނުބުނަން އިނދެފާ އަމީރަ އެންމެފަހުން ބުނެލިއެވެ. އެއާއި އެކު އެނދުގައިވެސް ނީނދެވިގެން އިރަމް އައިސްފިއެވެ.

”އެމީއަށް؟ ޝަދަފް؟ އެވެސް އަހަރެންގެ ހާލު ބަލަން؟“ އިރަމް އުލެނީ ގަބޫލް ނުކުރެވިގެންނެވެ. އަމީރާ ބޯޖަހައިލިއެވެ.

”ޑޯންޓް ޔޫ ފީލް ބޭޑް އެބައުޓް ހިމް؟ އިރޫ އެންމެފަހުން އޭނައާއި ދިމާލަށް ބަވާލި ވާހަކަ ބުނީމެންނު.. އޭގެ ފަހުން އައި ސޯ ޕެއިން އިން ހިޒް އައީޒް.. މިއަދުވެސް އަހަރެމެން އެއްކޮން އުޅެފައައި ގަޑީގަ އޭނާގެ ނަޒަރު އިރޫގެ މޫނުން ވަކި ނުވޭ.. އަހަންނަށް އެ ދެލޮލުން ފެންނަނީ އިރޫދެކެ ވާ ލޯބި..ނިކަން ވިސްނާލަބަ ފިނި ހިތަކުން“ އަމީރާ އުއްމީދެއް ނެތިވެސް ވާހަކަ ދެއްކިއެވެ. އިރަމްގެ ގާތުގައި ވާހަކަ ދެއްކުމަށް ވުރެން ގަހެއް ދޮށުގައި ހުރެ، އެގަހާ ވާހަކަ ދެއްކުން ވެސް މާ ރަނގަޅުކަން އޭނާ ދަނެއެވެ. އެހާވެސް ބޯހަރެވެ. އިރަމް ޖަވާބެއް ދިނުމުގެ ކުރިން އެ މޫނަށް ޖައްސާލި ވައްތަރުން، ހިތުގެ އަޑިން އިރަމްއާއި ދިމާލަށް އެއްޗިހި ކިއުނެވެ. މޭޒުމަތީގައި އޮތް މޭކަޕް ބްރަޝް އިރަމްއާއި ދިމާލަށް އަމީރާ އެއްލިއެވެ.

”ޔޫސްލެސް… ހަމަ ސީދާ ޔޫސްލެސް.. ރޮއެރޮއެފަ ވާހަކަ ދެއްކިއަސް ރުޅިއައިސް އަމުރު ކުރިޔަސް އިރޫ ތީ ހަމަ އިރޫ.. އެންމެ ބޯހަރު“ އަމީރާ ތުންދަމައިގަތް އިންގޮތުން އިރަމްއަށް ވެސް ހެވުނެވެ.

”މޭމް ޕްލީޒް ޑޯންޓް މޫވް ޔޯ ލިޕްސް.. ވީ އަރ ގޮއިންގ ޓު އެޕްލައި ދި ލިޕް ލައިނާރ..“ މޭކަޕް ކުރަން އިން ކުއްޖާ ބުނެލުމުން އިރަމް ބާރަކަށް ހޭން ފެށިއެވެ. އަމީރާ ހިނިއައިސް އިނދެ އެމީހުން ބުނެލި ގޮތައް ހަދައިގެން އިނެވެ.

ތައްޔާރުވެ ނިމިގެން ތެދުވަތް ހިނދު ދޮރު ހުޅުވާލާފައި ވަތް އިޔާން، ލޯގަނޑުން ފެނި އަމީރާގެ މޫނަށްވެރިވީ ޖަންބުކުލައެވެ. ރާއްޖެއައި ފަހުން މޭކަޕްކޮން އުޅުނު ނަމަވެސް، ކުރިން ދުވަހަކުވެސް އަދި އެހާ ވަރަށް މޭކަޕް ކުރެވިފައި އެއް ނުވެއެވެ. އެގޮތައް ހުއްޓާ އެހާ އަވަހަށް ފެނުމުން ލަދުން ގޮސް ދިގު އެސްފިޔަތައް ތިރިވެއްޖެއެވެ. ކަޅުކުލައިގެ ކޯޓުފަޓުލޫނުގައި އިޔާން ހުރިއިރު ޖީބާއި ދިމާލުގައި ރަތްކުލައާއި ހުދުކުލައިގެ ކުޑަ މާކޯންޏެއް ހަރުކޮށްފައި އިނެވެ.

ދެޒުޥާނުން އެތަނަށް ދޫކޮށްލާފައި އިރަމްއާއި ދެން ތިބި ދެއަންހެން ކުދިންވެސް ނުކުމެގެން ދިޔައެވެ.

ފައިން ފެށިގެން ބޮލަށް ނަޒަރެއް އިޔާން ހިންގާލިއެވެ. ކަޅު ރަތްކުލައިގެ މެކްސީގައި އަމީރާ ފެންނަލެއް ނުހަނު ފުރިހަމައެވެ. އަތް އިން ބަޔަށް ވިދާ ލޭސްފޮއްޗެއް ބޭނުންކޮށްފައި ހުރިއިރު ވަކި ހިސާބަކުން ދޮން އަތުގެ ބައެއް ފެނެއެވެ. ބުޅި އިސްތަށިކޮޅުން ދޫ ހުޅިއެއް ޖަހާލާފައިވީ އިރު ރަތްކުލައިގެ ފިނިފެންމަލެއް ބުޑުދަށުގައި އިނެވެ.

”މާޝާﷲ“ އިތުރު ބަހެއް ދުލަށް ނައީއެވެ. އެރީތިކަން އޭނަގެ ހިތުގެ ހަމަޖެހުން ނަގާލިއެވެ. ޕާޓީ ތެރެއިން ފެންނަ ޒުވާން ފިރިހެން ކުދިންގެ ނަޒަރުގައި އަމީރާ އަޅާއިގަނެދާނެތީ ކުޑަ ބިރު އެވަގުތު ހިތުގައި ދުވެލިއެވެ.

”ވަރަށް ބިރުގަނޭ އެބަ.. ހިތައް އަރަނީ އެތަނުން ފެންނަ ފިރިހެން ކުއްޖަކު އައިސް އެމީ ޖަހައިގަންނަން އުޅެފާނެބާއޭ މަ އަތުން.. ހާދަ ރީއްޗޭ“އަމީރާގެ ކޮލުގައި އަތުގެ ނުފުށުން ބިއްސާލަމުން އިޔާން ކަޅި ޖަހައިނުލާ އެދެލޮލަށް ބަލަހައްޓައިގެން ހުއްޓެވެ.

”ސާބަސް އިޔާއަށް.. ދާން މިއުޅެނީ އިންނާނެ މީހަކު ހޯދަންތަ؟“ އިޔާން ވާހަކައިން ހިތްހަމަ ނުޖެހިގެން އެއަތުގައި އަމީރާ ޖެހިއެވެ. އޭނާގެ ފުށުން ލުއި ހީލުމެއްގެ އަޑު އިވުނެވެ.

”އަމް ސްކެއާރޑްއޭ.. އެންމެ މީހަކު ނުގޮތަކަށް ބަލާލިއަސް އަހަންނަކަށް ކެތެއް ނުކުރެވޭނެ އެނގޭ.. އެމީ ބުނީމަ މަންމަމެންނަށް ވެސް ސިއްރުން މިއުޅެނީ.. އެކަމަކު އިފް ދެޓް ހެޕެންސް، މުޅި ދުނިޔެއަށް އިއުލާން ކުޜާނަން މިއީ ހަމައެކަނި އަހަރެންގެ މީހެއްކަން.. އުޅޭނެ ދޯ ފާޑުފާޑު މީހުން..އެހެންވެ ކުރިންބައިން މިބުނެލީ“

”އަހަރެން ދެކެ އިޔާ ތިވަނީ އާދައިގެ ލޯތްބެއް ނުނެއްނު .. “ އިޔާންގެ ވާހަކައިން ސީރިއަސް ވާން އުޅުނަސް އަމީރާއަށް ހެވެމުން ދިޔައެވެ.

”ޝައްކުވަނީތަ؟ ހިތް ނަގާފަ ދެއްކޭނެ ނަމަ އެއްނު.. ހާދަ ލޯތްބެއް ވެއޭ .. ހިނގާބަލަ މެރީކުރަން“ އަމީރާއާއި ގާތްވެލިއިރު އިޔާންގެ ދެލޮލުގައި ވަނީ ދިވާނާ ކަމެވެ. އަމީރާއަކަށް ޖަވާބެއް ނުދެވުނެވެ. އެލޮލަށް ގެއްލިފައި ހުރެވުނީއެވެ.

”އޭ ލަވް ބާޑްސް .. ބައިވެއްޖެ.. ދެން އާދޭ ދާން.. ކުޑޫ ބުނެގެން މިއައީ“ އެތެރެއަށް ވަދެގެން އައި މީރާންއެވެ. މީރާން ނުކުތުމުން އަމީރާ ވެސް އޭނާގެ ފަހަތުން ނުކުންނަށް ދިޔައެވެ.

”ބަލާ މިއަދު ދެފަހަރަށް ދެމީހުންނަށް އެފެނުނީ.. ތަންކޮޅެއް ބަލާލައިގެން އުޅެބަ….އިފް ޔޫ ވޯންޓް ދިސް ޓް ހެޕެން، ދެން ޕްރޮޕޯސް “

އަނގަޔަށް ވައްތަރެއް ޖައްސާލަމުން ދޮރު ކައިރީގައި ހުރެ އަމީރާ ގޮވާލިއެވެ. އެއަށްފަހު ދުވެލާފައި ނުކުމެގެން ދިޔައެވެ. އިޔާންއަށް ހެވުނެވެ. އެކަމަށްޓަކައި އޭނާ ތައްޔާރު ވަމުންދާ ކަމެއް އަމީރާއަކަށް ނޭނގޭނެއެވެ. އެހެން ހިތައް އެރުމާއިއެކު ވަކިން ހިނިއައެވެ.

ކައިވެނި ކުރާ ގަޑީގެ ކުރިން އާއިލާގެ ހުރިހާ މެމްބަރުން ހޯލަށް ޖަމާވަމުން ދިޔައެވެ. ހޯލަށް ވަދެވެން އިން ދިގު މަގު ދެފަރާތް ތާޒާ ރަތާއި ހުދު ފިނިފެންމަލުން ޒީނަތްތެރިކޮށްފައި ވާއިރު ރަތް ދޫލައެއް އަޅާފައިއޮތެވެ. ރީތި ހިތްގައިމު ލައިޓްތައް ޖަހާފައި ހުރިއިރު އިތުރު ދިރުމެއް ގެނެސްދެއެވެ. ތައްޔާރީ ތައް ފެނުމުން ކޮންމެ  މީހެއްގެ އަނގަ ހުޅުވިގެން ދެއެވެ. އެއަދި ބޭރެވެ. ނަސީބު ކަންދިމާކުރިގޮތުން އެގަޑި ޖެހުނު އިރު ވިއްސާރަ ވެސް އޮތީ ހުއްޓާލާފައެވެ. ވާރޭގައި ނުޖެހި މެހެމާނުންނަށް ވެސް އާދެވޭ ގޮތް ވިއެވެ. ދޮރު ކައިރީގައި ރިސޯޓުގެ ސްޓާފުން ދިޔައީ ހަރަކާތްތެރި ވަމުންނެވެ. ކޯޓު ފަޓުލޫނުގައި ތިބިއިރު އެރެއަށްޓަކައި އެމީހުން ވެސް ތައްޔާރު ވެފައިވީ ވަރު ހާމަވެއެވެ.

ޒަންޔާއާއި ވިޝާމް ތައްޔާރުވާން ވެއްދީ ހޯލާއި ކައިރީގައިވާ ކޮޓަރިތަކަށެވެ. ވިޝާމް ނުކުމެވުނު އިރު އޭނާގެ އެކުވެރިންނާއި އިޔާން ދޮރުމަތީގައި ތިއްބެވެ. އޭނާ ފެނުމުން ލާނެތް ހިނިތުންވުންތަކުން އެންމެން ގެ ތުންފަތް ފެވިގެން ދިޔައެވެ. ކަޅު ކުލައިގެ ޓަކްސިޑޯއާއި ސޫޓުގައި ހުރިއިރު އެތެރެއިން ލާފައިވަނީ ހުދު ގަމީހެކެވެ. ރޭގެ ހާއްސަ ދެކުލައި މާކޮންޏެއް ހަރުކޮށްލާފައި ހުއްޓެވެ. ފެންނަނީ ނުހަނު ފިރިހެންވަންތަ، ހައިބަބޮޑު ގޮތަކަށެވެ. ވިޝާމްއާއި ދިމާ ކުރަމުން އެކުވެރިން ދިޔައެވެ. ހިނިއައިސް ހުރިއިރު އޭނާ ބަލައިލީ ޒަންޔާ ނުކުމަތް ތޯއެވެ. ފެންނަން ނެތުމުން ނުނުކުންނަނީ ކަން އެނގުނެވެ. އޭނާ މަޑުކުރީ ހެކިވެރިއަކަށް ދެން ހުރި އެކުވެރިޔާ ޔާފިއު އަންނަން ދެންނެވެ.

”ޔާފިއު އާއި ޒޯ އެބައުޅޭ އެތެރޭގަ“ އިޔާން ފޯނުން ގުޅާލައިގެން ހުރެ އެމީހުން ތިބި ތަނެއް ބަލާލާފައި ހަބަރު ދިނެވެ. ބޯޖަހައިލަމުން އެކުވެރިންނާއި އެކު އޭނާ ހޯލަށް ވަނެވެ. އެތަނުން އާމިލާއާއި ހައިކަލް ވެސް ފެނުނެވެ. ހައިކަލްއާއި އާމިލާ އަދި ޒާހިރްއާއި ލައިލާވެސް ނުހަނު ފުރިހަމައަށް ނަލަ ހެދިލައިގެން ތިއްބެވެ. ހައިކަލްއާއި ޒާހިރް ކަޅުކުލައިގެ ކޯޓު ފަޓުލޫނުގައި ތިބިއިރު އާމިލާއާއި ލައިލާ ތިބީ ރަތްކުލައިގެ އެއްކަހަލަ ގޮތަކަށް ހުރި ހެދުމެއްގައެވެ.

”ކައިވެނި ކޮށްދޭ އެންމެން ހާޒިރް ވެއްޖެ .. މިހާރު ޒަން ނިމެން އުޅޭނެ ..ދެންމެ އައި އިރުވެސް ވެއިލް އެކަނި ނޭޅުވި އިނީ“ ލައިލާ، ޒާހިރް ގާތު ބުނެލިއެވެ. އޭނާ ވެސް ބޯޖަހައިލުމުން ލައިލާ ނުކުމެގެން ދިޔައެވެ.

“ކޮބާ ދަރިފުޅާ .. ނިމުނީ ދޯ“ ލައިލާ ވަތް އިރު ޒަންޔާ ތެދުވަންނަނީއެވެ.  ހުދުކުލައިގެ ބޮޑު ހެދުމުގައި  ޒީނަތްތެރިވެގެން ޒަންޔާ ހުރިއިރު އެރީތިކަން ސިފަކުރަން ޝާއިރަކަށް ވެސް ފަސޭހަކަމަށް ނުވާނޭ ކަން ގައިމެވެ. ވިދުމެއް ހުންނަ ފޮއްޗަކުން ފަހާފައިވާ ހެދުމުން ހއަތާއި އުނަގަނޑަށް ހިފާލާފައި ވާގޮތުން ހުރީ އެއަތުގެ ހިމަކަމާއި އުނަގަނޑުގެ ލޫޅާފަތިކަން ފާޅުވޭވޭއެވެ. ހިސާބަކަށް ފުފިފައިވާ ހެދުމުގެ ފަސްބައި މާދުރަށް ފެތުރިފައި އޮތެވެ. ފަން އިސްތަށިގަނޑު ހުޅިއަޅުން ހައްޔަރުކޮށްފައި ވާއިރު ގުޅުވާލެވިފައިވާ  ތުނި ވެއިލް، ހެދުމުގެ ފަސްބަޔާއި ހަމައަށް ދެމިފައެވެ. ރިހިކުލައިގެ ހިމަ  ޖަވާހިރު ފަށަކުން އެ ދޮން ކަނދުރާ ފަޅުފިލުޥާލާފައި އޮތް އިރު ވައަތު ކަށި އިނގިލީގައި އިނީ ރަންކިއުނު ރޭ އެ އެޅުނުވުނު ހުދު ރަނުގެ ޖަވާހިރު އަނގޮއްޓިއެވެ. ލުއި މޭކަޕެއްގައި ހުރިއިރު ތަފާތުކަމުން އެއީ އޭނާކަން ހުދު ޒަންޔާއަށް ވެސް އޮޅުނެވެ.  އަމީރާއާއި އިރަމް ވެސް ޒަންޔާގެ އަތުގައި އޮންނަ މާބޮނޑި ހިފައިގެން އައީ އެވަގުތުއެވެ. ދެ އަންހެންކުދިންނަށް އޭނާ ފެނުމުން ތިބެވުނީ ބަސް ހުއްޓިފައެވެ.

ޒަންޔާ ފެނި ލައިލާ މިހުރިޙާ އިރެއް ވަންދެން ހިފަހައްޓަމުން ދިޔަ ކަރުނުތައް ފައިބަން ފެށިއެވެ. އިރުކޮޅެއް ކުރިން ވެސް އެތަނުގައި ހުރެ އޭނާ ނުކުމެގެން ދިޔައީ އެހެންވެއެވެ. ކައިވެނީގެ ހެދުމުގައި ހުއްޓާ ފެނުމުން މާ ބޮޑަށް ޖަޒުބާތީވީއެވެ. ސިފަވީ އެގެއަށް ދިޔަ އެންމެ ފުރަތަމަ ދުވަހު އޭނާއަށް ފެނުނު ތުއްތު ޒަންޔާއެވެ. އެ ލޯބި އަންހެންކުއްޖާއެވެ. އެދުވަހު ވެސް އޭނާގެ ހިތް ލޯބިން ބަންޑުންވިއެވެ. މިއަދު އެދެލޮލުން ފައިބަމުން ދަނީ އުފާވެރިކަމުގެ ކަރުނެވެ.  ޒަންޔާއަށް ލައިލާ ރޮމުން ދިޔަ މަންޒަރު ފެނި ރޮވޭ ގޮތް ވިއެވެ. އެއީ އޭނާއަށް ބަލަން ފަސޭހަ މަންޒަރެއް ނޫނެވެ.

”ނޯ ނޯ ޑޯންޓް.. “ މޭކަޕް ކުރަން އުޅުނު އަންހެން ކުއްޖާ ހުރީ ނުހަނު ސަމާލުވެގެންނެވެ. ޒަންޔާގެ ލޮލުން ވެއްޓެން ދިޔަ ކަރުނު ތިކި ކޯތާފަތުގައި ޖެހުމުގެ ކުރިން އޭނާ ފުހެލިއެވެ. އެހާ ވެސް ހަރަކާތް އަވަހެވެ. އެހެންނޫންނަމަ އެހުރިހާ އިރު ކުރި މަސައްކަތް ބޭކާރު ވީހެވެ.

”ތޭންކް ގޯޑު“ އެކުއްޖާ ވެސް ހީލިއެވެ.

”އަހަރެން މެރީ ކުރާތީ އުފާ ނުވެ މަންމަ ރޮނީތަ.. “  ޒަންޔާ ތުންފިއްތާ ލައިގެން ހުރެ އަހާލިއެވެ. އެހިނދު ލައިލާ އަވަސްއަވަހަށް ދެފަޜާތައް ބޯހޫރުވާލިއެވެ.

”މަންމަ އުފަލުން މިރޮނީ.. ހާދަ އުއްމީދު ކުރި ދުވަހޭ.. ހަޔާތުގަ ވެސް މިހާ  އުފާވި ދުވަހެއް ނާދޭ.. ދަރިފުޅަށް ރަނގަޅު ބައިވެރިއެއް ލިބުން އެއީ މަންމަގެ ދުއާއަކީ އަބަދުވެސް… ވިޝާމް ކަހަލަ ކުއްޖަކު ޒަންގެ ހަޔާތައް އައީމަ މަންމަ އަދި ކިހާ ހިތްހަމަ ޖެހޭނެ“ ދެލޯ ފުހެލަމުން ޒަންޔާ ގެ ކޯތާފަތުގައި މަޑުމަޑުން ލައިލާ ހިފާލިއެވެ.

”ހިނގާ ދަމާ ދޯ.. މިޙާރު އެންމެން އައިސް ހަމަ ވެއްޖެ“ ޒަންޔާގެ އަތުގައި ހިފާލައިގެން ދޮރުން ނުކުތް އިރު އިންތިޒާރުގައި ޒާހިރް ހުއްޓެވެ. ޒާހިރްގެ ލޮލުން ވެސް ނިއުޅިގެން ދިޔަ ކަރުނުތިކި އަތުގެ ނުފުށުން ފުހެލިއެވެ. އޭނާއަށް ވާހަކަ ވެސް ނުދެއްކުނެވެ. ތުންފަތުގައި ދަތްއަޅާލައިގެން ހުރެ އަތް ދިއްކޮށްލީ ހިފާށޭ ބުނާފަދައަކުންނެވެ. އެއަތުގެ ތެރެއަށް އަމިއްލަ އަތް ލައްވާލެވުނު ހިނދު އޭނާގެ ދެލޯ ވެސް ފެންކަޅިވެގެން ދިޔައެވެ. ހިތް ދިރުވާލަމުން ޒާހިރް އެއަތައް ބާރުކޮށްލިއެވެ. ރަތާއި ހުދުކުލައިންވާ މާ ބޮނޑި އަމީރާ ދިއްކޮށްލުމުން އޭގައި ހިފިއެވެ.

ދޮރުކައިރީގައި ތިބި ކެމެރާމަނުން ކެމެރާ ދިއްކޮށްލައިގެން ތިބީ ޒަންޔާއާއި ޒާހިރްއަށް ސަމަލުކަން ދީގެންނެވެ. އެއަތުގައި ހިފާލައިގެން ދޮރުން ވަދެގެން ދިޔައިރު ކެމެރާ ތަކުގެ ފްލޭޝްކެނޑޭ އަޑު މެދު ނުކެނޑި އިވެމުން ދިޔައެވެ. އެތެރެއަށް ވަދެވުނު އިރު އެންމެންގެ ސަމާލުކަން ހުއްޓެމުން ދިޔަ ގޮތުން ހާސްވި ވަރުން ހީވީ އަރިއަޅާލަން އުޅުނު ހެންނެވެ. ނަމަވެސް ޒާހިރް ހުރީއެއަށް ވުރެން ބާރަށް ހިފަހައްޓާއިގެންނެވެ. މާކުރިން އެފަދަ ކަމެއް ވެދާނެކަމަށް ވިސްނައިގެން ހުރި ކަހަލައެވެ. އެއަތުން ޒާހިރް ދޫކޮށްލީ ކައިވެނި ކުރުމަށް ތައްޔާރު ކޮށްފައިވާ މޭޒު ކައިރިއަށް އާދެވުމުންނެވެ. ހުދުކުލައިގެ މޭޒު ދޮށުގައި ވަށައިގެން ތިބި މީހުންނަށް ނަޒަރެއް ދެވުނެވެ. އޭރު ވިޝާމް ރީތި ހިނިތުންވުމެއްގައި ހުއްޓެވެ. ފެންކަޅިވެފައި ހުރެމެ ޒަންޔާގެ އަތް ޒާހިރް ލައްވާލަ ދިނީ ވިޝާމްގެ އަތުގެ ތެރެއަށެވެ. ނުރުއިމަށް ކެތްކުރަމުން ދިޔަ ނަމަވެސް ޒާހިރްގެ ލޮލުން ކަރުނަ ތިއްކެއް ކަނިޖަހައިލިއެވެ.

”އެއީ.. ބައްޕަގެ ފުރާނަ.. ރަނގަޅަށް ބަލައް..ޗޭ“  ޒާހިރްގެ އަޑު ކުރެހުނެވެ. އޭނާއަށް ރަނގަޅަށް ވެސް ރޮވުނެވެ. އަޑު ބޭރު ނުކުރުމަށް ކުރެވެމުން ދިޔަ ހުރިޙާ މަސައްކަތެއް ދިޔައީ ކުރަމުންނެވެ. ލޯބިވާ ދަރިފުޅު މިއަދު އެހެން މީހެއްގެ ޙަޔާތުގެ ބައިވެރިޔަކަށް ވެގެންދާއިރު، ބައްޕައެއްގެ ހިތަށް ކުރާނެ ފުން އަސަރު އެ މޫނުމަތިން ފާޅުވަމުންދިޔައެވެ. ޒާހިރުގެ ތުރުތުރު އެކުލެވިފައިވާ އަތުގައި ވިޝާމް ހިފާލީ ނުހަނު އޯގާތެރިކަމާއެކުގައެވެ. އޭނާގެ ތުންފަތް މަތީގައިވި ޔަޤީންކަމުގެ ހިނިތުންވުމާއި، ބޯޖަހާލި ގޮތުން ޒާހިރުގެ ހިތަށް ކޮންމެވެސް ވަރެއްގެ ފިނިކަމެއް ލިބުނެވެ.

ޒާހިރް ރޯ މަންޒަރު ފެނި ޒަންޔާއަށް ވަމުން ދިޔަގޮތުން ވިޝާމް ބޭނުންވީ އަވަހަށް ކައިވެނީގެ ކަންކަން ކުރިއަށް ގެންދިޔުމަށެވެ. ގޮޑީގައި ޒަންޔާ ބައިންދާލަމުން ވިޝާމްވެސް އިށީނެވެ. ނާޔާ ކައިރިވެލާފައި ޒަންޔާގެ އިސްތަށިގަނޑު ހަޑި ނުވާނެ ހެން ވެއިލްގެ ބައިން ބޮލުގައި އޮޅާލަދިނެވެ. ދެލޯ ފުހެލުމަށްފަހު ޒަންޔާ އާއި ވިޝާމްއަށް ކުރިމަތިވާނެހެން ހުރި ގޮނޑިތަކުގައި ޒާހިރް އާއި ލައިލާވެސް އިށީންނެވެ. ހެކި ވެރިންގެ ގޮނޑުތަކުގައި އިޔާންއާއި ޔާފިއު ތިބި އިރު ގާތް އެކުވެރިޔާއަށްޓަކައި އުފާވެފައިވާ މިންވަރު ހާމަވެއެވެ. އެމީހުންގެ ގާތުގައި ހައިކަލް އާއި އާމިލާ ވެސް ތިއްބެވެ.

ކައިވެނީގެ މަޖިލިސް ފެނުނު އިރު ތަން ހަމަހިމޭން ވެއްޖެއެވެ. ކުރެވެމުންދިޔަ ކައިވެންޏަށް އެންމެންގެ ސަމާލުކަން ހުއްޓި ޝައުގުވެރިކަމާއި އެކު ބަލަން ތިއްބެވެ. ހުތުބާ ލައިދެމުން ދިޔައިރު  އެ ރީތި މަންޒަރު ވީޑިއޯ ކޮށް ފޮޓާ ނަގަމުން ދިޔަ ކެމެރާނުންނަށް ވެސް ސާބަސް ދޭ ވަރުވެއެވެ.  ވަގުތު ޖެހުމާއި އެކު ކައިވެންޏަށް އިއުތިރާފް ވުމަށް ގާޒީ އިޝާރާތް ކޮށްލިއެވެ.

ވިޝާމް ބަލައިލި ޒަންޔާ މޫނަށެވެ. ޒަންޔާގެ ދެއަތް ތުރުތުރު ލަމުން ދިޔަ މަންޒަރު ފެނި ވިޝާމްގެ އަތް ހަރާކަތް ކުރިއެވެ. އެއަތުގެ ތެރެއަށް ވިޝާމް އަތް ލީ ހިނދު ޒަންޔާ އިސްއުފުލާލިއެވެ. ލޮލުގެ އިޝާރާތުން ހާސް ނުވުމަށް އަންގާލަމުން ވިޝާމް އަނގަ ހުޅުވާލިއެވެ.

”އަނބި ގަބޫލްކޮށްފިން“

އެއާއި އެކު އެންމެންގެ އުފާވެރި ހަޅޭކާއި އަތްތިލަ ބަޑީން މެހެފިލް ގުގުމާލިއެވެ. ކައިވެނި ކުރެވުނު ޖޯޑަށް ފަހަރަކު މީހަކު މަރްހަބާ ކިޔަމުން ދިޔައިރު ވިޝާމްގެ އަތް އަދިވެސް އޮތީ ޒަންޔާގެ އަތުގެ ތެރޭގައެވެ. އޭނާ ހިފަހައްޓާލައިގެން އިން ގޮތުން ހާސްވެފައިވާ ވަރު ބޮޑު ދެލޮލުން ފެންނަމުން ދިޔައެވެ.

”އައި ޕްރޮމިސް، ޔޫ ވޯންޓް ރިގްރެޓް އިޓް“ވިޝާމް ވާހަކަ ދެއްކީ ހަމައެކަނި ޒަންޔާއަށް އިވޭހާ މަޑުންނެވެ. އެތަނުގައި އިންވަގުތު ވިޝާމްގެ ހުރިހާ ސަމާލުކަމެއް ހުރީ ޒަންޔާއަށެވެ. އެ ރީތިކަމަށް ހިތާހިތާއި އެއްބަސްވެވުނެވެ. ކަޅި ދުރުކޮށްލަން ވެސް އުނދަގޫ ވާ ފަހަރު މަދެއް ނޫނެވެ. ގެއްލިފައި ބަލަން އިނދެވެނީއެވެ.  ދެ މީހުން ތެދުވުމުން ހުއްޓެން އެންގީ އެރޭ ތިބެން ހަމަ ޖެހުނު ސްޓޭޖް ކޮޅުގައެވެ.

ބަލާލި ކޮންމެ ދިމާލަކުން ފެންނަނީ މުއްސަނދިކަމެވެ. މުޅި ހޯލުގެ ތެރޭގައި ހިފާލާފައިވަނީ މީރުވަސްދުވާ މާތަކުގެ ވަހެވެ. މައިގަނޑު ކުލަތަކެއްގެ ގޮތުގައި ބޭނުންކޮށްފައިވާ ކަޅު ރަތްކުލައާއި ހުދުކުލައިގެ ފަރުމާތަކުން ގެނެސްދެނީ ޝާހީ ފުރިހަމަކަމެކެވެ. މަތިން އެލުވާފައިވާ ކްރިސްޓަލް ޗާންދަލިޔާތަކާއި އެތައް ބައިވަރު ފެއަރީތަކުން އެޅިފައިވާ ރީތި އަލީގެ ސަބަބުން، މުޅި މާހައުލު ވަނީ ހުވަފެނީ ދުނިޔެއަކަށް ބަދަލުވެފައެވެ. ރަތް ދޫލަ މައްޗަށް ހުދުކުލައިގެ އެތައް ހާސް ފިނިފެންމާ ފިޔަތަކެއް އަޅާލެވިފައި ހުއްޓެވެ. ފިނިފެންމަލާއި ރީތި ލައިޓްއާއި ހުދު ލޭސްފޮތިން، ކައިވެނި ކުރެވުނު ޖޯޑަށް ހެދިފައިވާ ބެކްޑްރޮޕް އަދި މުޅި ހޯލުވެސް ނުހަނު ނަލައެވެ.

ހުންނަން ހަމަ ޖެހިފައި ވި ސްޓޭޖާއި ދާދި ގާތުގައި ބިއްލޫރި މޭޒެއް ޙުއްޓެވެ. ރީތި ވިދުމެއް ހުރި ލޭސް ފޮއްޗަކުން ޑިޒައިނެއް ޖައްސާލާފައި ހުރި އިރު އޭގެ މަތީގައި ހުރި އުއްބައްތި އާއި ފިނިފެންމާ ފިޔައިން އިތުރު ފުރިހަމަ ކަމެއް ގެނެސްދެއެވެ. ފިނިފެންމަލުގެ ގުލްދަސްތާއަކުން ތައްޔާރުކޮށްފައިވާ ކައިވެނީގެ ރަން އިންއިރު ދެން ޢިނީ މަޖުދާގެ ފަންނުވެރި މަސައްކަތެވެ. ރީތި ކޭކާއި އޭގެ މަގަތުގައި ހުރި ކުދިކުދި ހަރުތަކުގައި ވަނީ ރަތާއި ހުދުން ތައްޔާރު ކުރެވިފައިވާ ޕޭސްޓްރީ ސާމާނުތަކެވެ.  މެހެމާނުންނަށް ޓަކައި ބެހެއްޓިފައިވާ މޭޒުތަކުގައިވާ ހުދު ލޭސްފޮތީގެ ރީތި ފިނިފެންމާ ބޮނޑިއެއް އޮތް އިރު ރީތި އުއްބައްދި ސްޓޭންޑެއް ބަހައްޓާލާފައި އިނެވެ. ލައިވް މިއުޒިކާއި ނަންހުސްކޮން ކާތަކެތިން ބަރާކޮށްފައިވާ ޖާފަތެއް އޮތެވެ. މެހެމާނުންގެ އިޝާރާތަކައް ބަލަބަލާ، ޔުނީފޯމް އަޅާފައި ތިބި އެތައް ބައިވަރު ވެއިޓަރުންނެއް ހިދުމަތުގައި ތިއްބެވެ. ޕާޓީއަށް ހާޒިރް ވަމުން ދިޔަ މެހެމާނުންގެ ތައުރީފް އެ ތައްޔާރީތަކައް މެދު ނުކެނޑި އިވެމުންދިޔައެވެ.

އާމިލާއާއި ހައިކަލް އެކުވެރިންނާއި އެމީހުންގެ އާއިލާތަކައް މަރްހަބާ ކިޔަމުން ދިޔައިރު ، އެންމެންގެ ދުލުކުރީގައި ވަނީ ކައިވެނިކުރެވުނު ޖޯޑުގެ ފުރިހަމަކަމުގެ ވާހަކައެވެ. ދެޒުވާނުން ގާތްގާތުގައި ތިބި އިރު އެކަކާއި ނުހަނު ގުޅެއެވެ. ޒަންޔާ ކުރުކަމުން ވިޝާމްގެ ކޮނޑާއި ހިސާބަށް އަރަނީ ކިރިޔާއެވެ. ގިނައިރު ކޮޅަށް ހުންނަން ޖެހޭތީ ކުރީން އަރައިގެން ހުރި ހީލްސްގެ ބަދަލްގައި މިހާރު އަރައިގެން ހުރީވެސް ތިރިކޮން ހުރި ފައިވާނެކެވެ.

”ހޫނުވޭ ދޯ“ ޒަންޔާއަށް އިވޭވަރަށް ވިޝާމް ބުނެލިއެވެ. ޒަންޔާ އަނގަހަދާލާފައި ބޯޖަހައިލިއެވެ.

”މިތާ ހުރި ޑެކޮރޭޝަންތައް މެސީ ވެދާނެތީ މިކޮޅުގަ ފޭން ނުބެހެއްޓީ .. ފޮތިތައް އަޅާފައި ހުރީމަ އޭސީވެސް ކަވާރވެފަ“

”ސްޓިލް ވިތް ދިސް އޯލް މޭކަޕްސް، އަމް ޑައިންގ“ ޒަންޔާ ތުންފިއްތާލިއެވެ. ވިޝާމްއަށް ހެވުނެވެ.

”ކެން ޔޫ ކޯލް އެމީއަށް، ޕްލީޒް“ ޒަންޔާ އެދުނެވެ. އިރުކޮޅެއްގެ މަސައްކަތުން އަމީރާއަށް ވިޝާމްގެ އިޝާރާތް ފަހްމްވެގެން އައިސްފިއެވެ. އަމީޜާ ހުރީ ރީއާ އުފާލައިގެންނެވެ. އޭނާގެ ފަހަތުން އިޔާންވެސް އައެވެ.

”ހެޔޮ ނުވާނެ ދެމީހުން ފަހަތުން ނަމަވެސް ބައްދާލަބަ މިކަން ނިމެންދެން.. ތި ފޮޓޯތައް ވެސް ރީތި ވާނީ އޭރުންނު“ އިޔާން ދެފަރާތައް ބޯހުރުވާލަމުން ބުނެލި ހިނދު ދެމީހުންގެ މޫނުމަތިން ހިސާބެއްގެ ލަދުވެތިކަމެއް ފެނުނެވެ. އެކަމަކު ވެސް އިޔާން ބުނިގޮތައް ވިޝާމް ކަންތައް ކުރިއެވެ. އެހިމަ އުނަގަނޑުގައި ފަހަތުން އަތް އަޅުވާލިއެވެ. ޒަންޔާ ކުޑަކޮން ތެޅިގަތްކަން އެނގުނެވެ. ނަމަވެސް ވިޝާމް ހުރިގޮތައް ހުރީއެވެ.

”އެނީތިންގް ރޯންގް؟“ އަމީރާއަށް އަހާލިއެވެ.

”ކޮބާތަ އެއްކަލަ  ފޭން .. އަމް ޑައިންއޭ“

”އެކަމާއި ވެއްޖެ ޒަންގެ ކަޒިންއަކާއި އިރޫ ގޮސްފަ.. މިކޮޅަށް ގެނެވުނީ ނުބައި ފޭން އެއް“ އަމީރާ ބުނެލުމުން ޒަންޔާ ބޯޖަހައިލިއެވެ.

”މަށަކަށް ނެތްތަ ފޭންއެއް“ މޭކަޕް ކުރުމަށް އުޅުނު ކުއްޖެއް އޭނާގެ މޫނު ޓިޝޫއަކުން ފުހޭދޭން ފެށުމުން އަމީރާއަށް ބަލާލާފައި ބުނެލިއެވެ. އަމީރާއާއި ޒަންޔާއަށް ހެވުނެވެ.

”ކަލެއަށް ކެރޭނެތާ ފަންކާ ހިފަހައްޓާއިގެން ހުންނަން“ ހޭންފަށާފައި އިޔާން ވެސް ޖަވާބުދިނެވެ. މާގިނައިރެއް ނުވެ އިރަމްމެން އައިސްފިއެވެ. އޭނާގެ ފަންކާ ލައްވާލަ ދިނީ ޒަންޔާ ހިފަހައްޓާއިގެން ހުރި މާބޮނޑީގެ ފަހަތަށެވެ. އެކަން ކޮއްދީފައި އެމީހުން ދުރަށް ދިޔައެވެ.

ޒަންޔާ ފަންކަލުގެ ކުޑަ ސްވިޗަށް އޮބާލި ހިނދު އަންނަންފެށި ފިނި ވައިން މުޅި ކުއްޖާ ވެގެންދިޔަ ފިނިކަމުން ދެލޯ މަރާލެވުނެވެ. ގިނަ އިރު ހޫނުގައި އުޅުމުގެ ސަބަބުން އޭނާ ހުރީވެސް ދާހިތްލާފައެވެ. އިރުކޮޅަކު އެހެން ހުރެފައި ދެލޯ ހުޅުވާލަމުން ބަލައިލި އިރު ވިޝާމް ބަލަހައްޓާއިގެން ހުރިގޮތުން އޭނާގެ މެޔަށް ޒާތަކަށް ފިނިވެގެންދިޔައެވެ.

”ބޭނުން؟“ ޒަންޔާ އިޝާރާތް ކޮށްލީ ފަންކަލާއި ދިމާލަށެވެ. ވިޝާމް ދެފަރާތައް ބޯހޫރުވާލިއެވެ.

”ޔޫ ލުކް .. ގޯޖަސް“ ވަކި ވަކި އަކުރު ތަކައް ދަމާލަމުން ވިޝާމް އިއްވާލިއެވެ. ޒަންޔާގެ މޫނަށް ފަނޑު ރަތްކަމަށެއް ފާއްދާލިއެވެ. ކިރިޔާ އަނގައިން އަޑު ނުކުންނަ ވަރަށް ޝުކުރު އަދާކުރިއެވެ. ނުބުނި ނަމަވެސް ވިޝާމްއަށް ވެސް ހޫނުވެފައި ހުރިކަން އެނގުމުން  ކުޑަކޮން އޭނާއާއި ވީކޮޅަށް އަނބުރާލިއެވެ.

”އިޓްސް އޯކޭއޭ.. ޔޫ ކޭން ހޭވް އިޓް“

”އަމް ގުޑް ނައު..“ ވިޝާމް މަނާ ކޮށްލުމުން ވެސް ޒަންޔާ އެހެން ހުއްޓެވެ. އިތުރަށް އެއްޗެއް ނުބުނެ މެހެމާނުންނާއި ސަލާމް ކުރަމުން ދިޔައިރު ވިޝާމްގެ ތުންފަތުގައި ރީތި ހިނިތުންވުމެއް ވިއެވެ.

އެކުވެރިންނާއި އެކު ހުރެހުރެ ވަރުބަލިވެގެން ސަދަފް އައިސް މަޑުކޮށްލީ އާމިލާއާއި ހައިކަލްގާތުގައި ހުރި ގޮނޑިއެއްގައެވެ.

”މިއޮތް އައީނު މަންމާގެ ހޭންޑްސަމް ދޫނި.. ކޮންތާކުތަ ތިއުޅެނީ.. ހާދަ ވަރަކަށް ހޯދާފީމޭ“ ސަދަފް ފެނުމުން އަތުގައި ހިފާލަމުން އާމިލާ ސުވާލު ކުރިއެވެ. ސަދަފް އިޝާރާތް ކޮށްލީ ދުރުގައި ތިބި އެކުވެރިންނަށޭވެ. މުޅި ދުވަހު އަވަދިނެތި އުޅުމުން ވަރުބަލިކަމުގައި ހުރެ އާމިލާގެ ކޮނޑުގައި ބޯ އަޅާލައިގެން އޭނާ އޮތެވެ.

”ދަރިފުޅަށް އެނގޭތަ އެތަނުން އަންހެން ކުދިންކޮޅަކަށް ދަރިފުޅު ރީތިވެގެން ..އެމީހުންނަކަށް ނޭނގޭ މަންމަ މިއީ ކާކު ކަމެއް..ދެން ބައްޕަ އައިސް ހުއްޓިލީމަ އެނގުނީ ..މިކުދިންތައް ލަދުންގޮސްފި“ އާމިލާ ފެށި ވާހަކައަކުން އެހެން އޮތްއިރު ސަދަފްއަށް ދިޔައީ ހެވެމުންނެވެ.

”އޮފީހަށް އަލަށް ޖޮއިން ކުރި ކުދިންތަކެއް ކަންނޭގެ އެއީ.. ދެންމެ އޮފީސް ކުއްޖަކު ތިކަހަލަ އެއްޗެއްކީ“

”އަހަހަ.. ބައްޕަ ފެނުނު ތަނުން ހީވީ ބިރެއް ފެނިގެން ބަލަން ތިބިހެން.. ވަރަށް ލަދުގަތްފަ ތިބީ އެކުދިން.. އަހަހަ… އެއްޗެއް ކައިފިންތަ“ ހައިކަލް ހިނިއައިސް އިނދެ އަހާލިއެވެ. ސަދަފް ދެފަޜާތައް ބޯހޫރުވާލިއެވެ.

”ތިއްތިބެ މެންނާއި އެއްކޮން ކާންވެގެން މިމަޑުކުރަނީ… ކޮބާތަ ޔޫވީ .. ހޯދާފިން ވަރަށް“ ސަދަފް އެހިއެވެ. އާމިލާ ދެއްކީ އިޔާންގެ ގާތުގައި ޔޫވީންއެވެ. އެމީހުންތިބީ އެދިމާލަށް ފުރަގަސް ދީގެންނެވެ.

”މިއޮތް އައީނު ރީއްކޮ“ މަޖުދާ އައިސް މަޑުކޮށްލުމުން ރީއާ އުރުން ފޭބިއެވެ.

”އާއްޔޯ.. ޝޯޝޯ ބިއުޓިފުލް“ ސަދަފްއަށް ރީއާ ފެނުމުން އަތް ދިއްކޮށްލެވުނެވެ. އެހިނދު ވަރަށް ފަސޭހައިން ރީއާ އައިސް ސަދަފްގެ އަތުގެ ތެރެއަށް ވަނެވެ. ލޯބި ހިނިތުންވުމެއް ވެރިކޮށްލި ހިނދު ކޮލަށް އެޅިގެން ދިޔަ އަޑިކޮޅުން ސަދަފްއަށް ވެސް ހީލެވުނެވެ. ކަޅުރަތްކުލައިގެ ލޭސްފޮތިން ފަހާފައި ހުރި ހެދުން ރީއާގެ ގަޔަށް ހިފާލާފައި ވާއިރު ބަނޑުގެ ތިރިން ހެދުމުގެ ބައި އޮތީ ފުއްޕާލާފައެވެ. ފަންފަން އިސްތަށިކޮޅު ފަހަތައް ދޫކޮށްލާފައި އޮތް އިރު ރަތްކުލައިގެ ނުފޮޅޭ މާތަކެއް އެކި ހިސާބުތަކުގައި ހަރުކޮށްފައިވެއެވެ. ހިތްތައް ބަނޑުން ކޮށްލާފަ ފަދަ މައުސޫމް ކަމެއް އެ ތުއްތު އަންހެން ކުއްޖާގެ ކިބައިގާ ވެއެވެ.

”ޗާ .. ހިނގާބަ ސެލްފީއެއް ނަގަން “ ސަދަފް ފޯނު ދިއްކޮށްލަމުން އިހުނަށް ވުރެން ރީއާއާއި ގާތްވެލިއެވެ. ހިތްހަމަ ޖެހޭ ވަރަށް ފޮޓޯ ނެގުމުން ސަދަފް ފޯނު ދުރުކޮށްލިއެވެ.

”އެމީ ކައިރިއަށް ދާންވެގެން ބޮޑާ ހާކަނިކޮންނޭ މިއައީ ގޮވައިގެން.. ޒަން ގޮވައިގެން އެމީ އެދިޔައީ.. މިހާރު ޝެޑީ ފެނުނީ އެހުއްޓާލީ“  މަޖުދާ ހިނިއައިސް ބުނެދިނެވެ.އާމިލާއާއި ހައިކަލް ވެސް ރީއާ ވާހަކަ ދައްކަމުން ދިޔައެވެ.

”އެމީއަށް ވަރަށް ދޯޅައޭ ދޯ ރީއްކޮ“

”އާން އިތުރު މީހެއްގެ ގާތައް ނުވެސް ދަނީ އެމީ ހުރެއްޖެއްޔާ“ ހައިކަލްއަށް މަޖުދާ ޖަވާބުދިނެވެ.

”ކާކު ފޯލް ނުވާނީ އެމީ އެއީ އެހާ ލޯބި ކުއްޖެއް .. ހިތައް އަރާ އަހަރެމެން ގެޔަށް ގެނެސްފާނަމޭ ވެސް.. އަނެއްކޮޅުން ރަނގަޅެއްނު މެރީ ކުރަން ވާއިރަށް ރީއްކޮ ރައްޓެހިވި ކަން ވެސް.. އެހެން ކުދިންނާއި ރުޅި ހަދާލާފަ އުޅޭ ކުއްޖެއް ވިއްޔަ“ ޒަންޔާގެ ގާތައް ގޮސް ހުރި އަމީރާއަށް ބަލައިލަމުން ހުވަފެނީ ގޮތަކަށް އާމިލާ އަށް ބުނެވުނެވެ. އަމީރާ ކުރިމަތިގައި ފެންނަން ހުރުމުން ނޭނގޭ ހިތްހަމަ ޖެހުމެއް އާމިލާގެ ހިތައް އިޙްސާސްކުރެވެމުން ދިޔައެވެ.

’މެރީ ކުރާށޭ؟ ކާކު މެރީ ކުރަނީ .. އިޔާތަ؟“  ހައިކަލްއާއި މަޖުދާއަށް އެހުނީ އެކުއެކީގައެވެ. ދެމީހުން އާމިލާގެ މޫނަށް ހައިރާން ކަމާއި އެކު ބަލައިލި އިރު ސަދަފް އިނީ ހިނިގަނޑު ހިފަހައްޓައިގެންނެވެ. އޭނާ ގާތު އަމީރާ ބުނި ގޮތުން ވިއްޔާ އަދި އެކަކަށް ވެސް ނޭނގޭނެއެވެ. ނަމަވެސް އާމިލާގެ މޫނަށް ވެރިވި މާނަފުން ހިނިތުންވުމުން އެކަންތައް އޭނާއަށް އެނގޭކަން މިހާރު ޔަގީނެވެ.

”ނޭނގޭތަ މަޖޫ؟  އެދެކުދިން ގުޅިގެންނޭ އުޅެނީ.. ވިޝާމް އިހަކަށް ދުވަހު ބުނީ“ އާމިލާ ދިން ޖަވާބުން މަޖުދާގެ ދެލޯ ބޮޑުވެގެން ދިޔައެވެ. އަނގަމަތިގައި އަތް އެޅުނު އިރު ދުރުގައި ވަކިވަކިން ތިބި އަމީރާއާއި އިޔާންއަށް އޭނާގެ ނަޒަރު ހިންގާލެވުނެވެ. މަޖުދާގެ މޫނުން ހައިރާންކަން ނުފިލައެވެ. ސިފަވީ ފަހަކަށް އައިސް ގޭތެރޭގައި ވެސް އަމީރާއާއި މެދު އިޔާން ބަހައްޓަމުން ދިޔަ ގާތްކަމެވެ. ދެމީހުންގެ ދެމެދުގައި ބައްދަލްކުރެވޭ ސިއްރު ނަޒަރުތަކެވެ. ބަސްމޮށުންތެރި ކަމަކާއި ނުލާ ވެސް ކޮށްލާ އިޝާރާތްތަކެވެ. އެކަމަށް މަޖުދާ ހިތް އެދެމުންދާތާ ވެސް ދުވަސްތަކެއް ވެއްޖެއެވެ. ނަމަވެސް އެކަކުގެ ގާތުގައި ވެސް ނުބުނެ މަޑުކޮށްލައިގެން ހުރީއެވެ.

”ހަމަ އަސްލުވެސް މަޖޫ އަކަށް ނޭނގޭތަ؟ އިޔާ އުޅޭ ގޮތުން ޝައްކުވެގެން އަހަރެން ވެސް ވިޝާމް ކުރެން އެހީމަ ބުނީ“

”ނޭނގޭ.. އިޔާ އެކަހަލަ ވާހަކައެއް ދައްކާފައެއް ވެސް ނެތް… ވިޝާމް ބުނެފިއްޔާ ތިވާނީ ތެދަކަށް.. އެކަމަކު ހާދަ އުފާވެއްޖެއޭ… ތިކަމަށް އެދިގެން ވެސް ހުންނަތާ ދުވަސްތަކެއް ވެއްޖެ“ ހައިރާންކަން ފިލާ ދިޔައިރު މަޖުދާ އިނީ އުފަލުން ފޮޅިފައެވެ. އާމިލާވެސް، މަޖުދާގެ ގައިގާ ބައްދާލަމުން މަރްހާބާ ކިއެވެ. އެހެން ތިއްބާ އޭނާ ނުފެނިގެން އިރަމް ގުޅަން ފެށިއެވެ.

”މިތިބީ ދަރިފުޅުމެން ފަހަތުގަ.. ”ފޯނުގައި ހުރެ މަޖުދާ އަތް ހިއްލާލުމުން އިރަމްއަށް ފެނިގެން އައިސްފިއެވެ. އޭނާގެ އަތުގައި ޖޫސްތައްޓެއް އިން އިރު ލޯ ހޯދާލީ ރީއާއެވެ.

”މި އެމީ ދޭ އެއްޗެއް ރީއްކޮއަށް ދޭށޭ ކިޔާފަ.. އެމީ އެދިޔައީ ނީޝް ޓޮއިލެޓްއަށް ދާން ވެގެން ބުނީމަ.. ކޮބާ ރީއްކޮ؟“ އިރަމްއަށް ސަދަފް ފެނުނީ މަޖުދާ އިޝާރާތުން ދެއްކުމުންނެވެ. ސަދަފްގެ އުނގުގައި ރީއާ އިނެވެ. ސަދަފްގެ ކަޅި ހުއްޓުނުކަން އިޙްސާސްވެ އިރަމް އިސްޖެހިއެވެ. އިތުރަށް އެންމެ ފަހަރަކުވެސް އެދިމާ ބަލާ ނުލިއެވެ. އެ އެންމެންގެ ތެރޭގައި ސަދަފްގެ މޫނަށް ބަލަން ވެއްޖެއްޔާ އިސާހިތަކު ބޭޒާރުވެދާނެއެވެ. އެހެން ވާކަށް ބޭނުމެއް ނޫނެވެ.

”މަންމަ ރީއްކޮއަށް ދީ އިނގޭ..އެބަ އަންނަން އެމީހުން ކައިރިއަށް ގޮސްފަ“

”އެކަނިން ތަ ދަނީ“ އިރަމް އެކަނި ބޭރަށް ނުކުމެގެން ދާކަށް މަޖުދާ ބޭނުމެއް ނުވިއެވެ.

”ނޫން ދޮންބެ ކައިރީގަ ބުނާނަން“ އިރަމް ޖަވާބު ދިނެވެ.

”އިޔާ އެކޮޅުގަ ދޯ ހުރީ.. ޝެޑީ ދާންވީ އެންނު އިރޫ ގެންގޮސްލަ ދޭން ..އަންހެންކުއްޖަކު އެކަނި ފޮނުވާކަށް ނުވާނެ…“ އާމިލާ އެދުމުން ސަދަފް ތެދުވަތެވެ. ހީވީ އެފަދަ ފުރުސަތަކަށް ބަލަބަލާ އިންހެންނެވެ. އިރަމްއަށް ތުންފިއްތާ ލެވުނީ އެކަމަށް އޭނާއަށް މަނާ ކުރަން ނުކެރޭނެތީއެވެ. މަޖުދާވެސް ލާނެތް ގޮތަކަށް ހީލައިގެން އިން އިރު އެހީވާކަށް ނޫޅުނެވެ. އެންމެ ފަހުން ސަދަފްގެ ފަހަތުން ނުކުމެގެން ދިޔައެވެ.

ހޯލުން ނުކުމެވުނު އިރު އިރަމްއަށް ދިޔައީ ސަދަފްއާއި ދިމާ ބެލެމުންނެވެ. ސަދަފް ހުރީ އޭނައަށް ވުރެން ފޫޓެއްހާ ތަން ކުރީގައެވެ. ކަޅުކުލައިގެ ކޯޓުފަޓުލޫނުގައި ހުރިއިރު އިސްތަށިގަނޑު އޮތީ އާދައިގެ މަތިން އައްސާފައެވެ. ފަހަތުން އޭނާ ބައިމަތިފުޅާ ވަރުގަދަ ހަށިގަނޑު ފެންނަމުން ދިޔައިރު އިރަމްގެ ނޭވާ ހިސާބަކަށް އަވަސްވިއެވެ.

އެކަކު އަނެއްކަކާއި ވާހަކަ ދެއްކުމެއް ނެތި ދެމީހުން ހިނގާފައި ދިޔައިރު ދެމެދަށް ވެރިވެފައި އޮތީ ސާފް ހަމަހިމޭންކަމެވެ. ހީވީ އަނގައިން ނުބުނަން ހުވާކޮށްގެން ތިބި ހެންނެވެ.  ސަދަފް ފަސް އެނބުރެން އުޅޭހެން ހީވެގެން އިރަމް އަވަހަކަށް އިސްޖަހައިލިއެވެ. އޭނާ ބެލިކަން ސަދަފްއަށް އަންގާކަށް ބޭނުމެއް ނޫނެވެ. ދެއަތް ދެއަތާއި މޮޑެމުން އިރަމް ވިސްނަމުން ދިޔައީ އެންމެ ފަހުން ދުވަހު ބައްދަލު ކުރެވުނު ހިނދު ސަދަފްއާއި ދިމާލަށް ބަވާލެވުނު ގޮތެވެ. އޭނާ ފެންނަ ކޮންމެ ފަހަރަކު ސަދަފް ވާހަކަ ދައްކަން އުޅެފައި މިހާރު އެބަހައްޓާ ދުރުމިން ބަހައްޓަން ފެށީ އެދުވަހުގެ ފަހުންނެވެ. ތެދުތެދަށް ބުނާނަމަ އެދުވަހު އެހެން ހެދުނީތީ އެކަމާއި އިރަމް ދެރަވެއެވެ. މާފަށް އެދެން ވެސް ބޭނުންވިއެވެ. ނަމަވެސް އެ ހިތްވަރު ކުރާކަށް ނުކެރުނެވެ. ސަދަފް ވާހަކަ ނުދެއްކީމަ ވެސް ހިތުގައި އަޅަމުން ދިޔައީ ނުބައި ވޭނެކެވެ. ހިޔާލްތަކުގައި ފީނަމުން ދިޔަ އިރަމް މުޑިއެރީ ސަދަފްގެ އުނަގަނޑުގައި ޖެހިފައެވެ. އިސްޖަހައިގެން އައުމުން ޖެހުނު އިރުވެސް ނޭނގުނީއެވެ. ނިތް ކުރިއަށް ވެގެން ދިޔަ ތަދުން އިރަމްއަށް ފިރުމާލެވުނެވެ.

”އާދެވުނީ“ ސަދަފްގެ އަޑު މަޑުމަޑުން އިވުނެވެ. އިރަމް ބަލައިލި އިރު ތިބީ މަންޒިލަށް އާދެވިފައެވެ.

”ޔޫ ކެން ގޯ“ އިރަމް އިއްވާލިއެވެ. އެއަށްފަހު މަޑުނުކޮށް އަމީރާ ދިޔަކަމަށް ބުނި ކޮޓަރިއާއި ދިމާލަށް މިސްރާބުޖެހިއެވެ. ފަސް އެނބުރި ބަލައިލަން ހިތް އެދުނު ނަމަވެސް ނުކެރުނެވެ. އިރަމް ދިޔައިރު އެކޮޓަރި ތެރެ އޮތީ ފަޅަށެވެ. ފާހާނާގައި ވެސް މީހަކު ނެތްކަން އެނގުމުން އަމީރާގެ ނަމްބަރަށް އިރަމް ގުޅާލިއެވެ.

”ދިޔައީއޭ؟ ނުބުނެ އާދެވުނީމަ ދޯ.. އޯކޭ އެބަ ދަން… ނޫން ދޮންބެ ކައިރީގަ ބުނާނެ ކަމެއް ނެތް ، ވަރަށް އަލިކޮން އޮތީ“ އަމީރާ ދިޔަ ވާހަކަ ބުނުމުން އިރަމްއަށް އަނގައިން އަޑެއް ލައްވާލެވުނެވެ. ފޯނު ބޭއްވުމަށްފަހު ނުކުތް އިރު ސަދަފްގެ ހިލަމެއް ނެތެވެ. މާޔޫސްކަމާއި އެކު ކަރު އެލުވާލެވުނެވެ. އެންމެ ފަހުން ހިނގައިގަތެވެ. ދުރުދުރުން ރިސޯޓުގެ ސްޓާފުންނާއި ކޮންމެވެސް ވަރަކަށް ގެސްޓުން ފެންނަމުން ދިޔައެވެ. ދިއްލާ އަޅާފައިވާ މަގުތަކުގެ ބިރެއް ނެތި ހިނގާލެވޭ ކަން ވެސް ނަސީބެކެވެ. އެކަމަކު އޭނާ ދާށޭ ބުނުމާއި އެކު ސަދަފް ހަމަ ދިޔުމުން ހިތާހިތުން އޭނާއާއި ދިމާލަށް އަޑުލަމުން ދިޔައެވެ. ހިނގާފައި ދާންވެސް އޮތީ ކުޑަ ތަންކޮޅެއް ނޫން ކަމުން ތުން ދަމާލެވުނެވެ.

”އިރަމް؟“ އިރަމް ފަސް އެނބުރުނީ އޭނާގެ ނަމުން މީހަކު ގޮވާލުމުންނެވެ. އެއަޑުން ސަދަފް ނޫންކަން އެނގުމުން ތުން ފިއްތާލަމުން ބަލައިލި އިރު ގޮނޑުދޮށަށް ނުކުމެވޭހެން އިންނަ މަގަކުން އަރައިގެން އައީ މާއިންއެވެ. އިރަމް ހައިރާން ވެސް ވިއެވެ. ނާޔާގާތައް ދާ އިރު އާންމުކޮން ފެނުނު ނަމަވެސް، މާއިން އަކީ އޭނާއާއި މާ ވާހަކަ ދައްކާ އުޅޭ މީހެއް ނޫނެވެ.  އިޔާންއާއި ވިޝާމްއާއިއެކު ކުރިން ގެއަށް މާއިން ވެސް އާދެއެވެ. އެކަމަކު އެހާ ބޮޑު ގުޅުމެއް އޭނާއަކާއި އެއް ނުބާއްވައެވެ. އަނެއްކޮޅުން މާއިންގެ ގޯސް ވާހަކަ އޭނާ ވަނީ މަޖުދާމެންގެ ފުށުން އަހާފައެވެ. ކުރިން އުޅުނުހެން މިހާރު އިޔާން މެންނާއި އެއްކޮން ވެސް އުޅޭތަނެއް ނުފެނެއެވެ. ހިސާބަކަށް ހިތް ނުތަނަވަސްވެފައި ހުރެވެސް މާއިން އަށް ހިނިތުން ވުމެއް ހަދިޔާ ކޮށްލިއެވެ.

”މިތާގަ ކީއް ތިކުރަނީ؟ އެވެސް އެކަނިން..“ މާއިން އޭނާގެ ކުރިމައްޗަށް ހުއްޓިލަމުން އަހާލިއެވެ. އެހިނދު ދުވަންފެށި ގަދަ ސިނގިރޭޓް ވަސްގަނޑުން އިރަމްގެ ބޮލަށް އެނބުރުން އަރައިގެން ދިޔައެވެ.

”ޔާހް ކުއްޖަކު ހޯދާލީ މި “ އިރަމް އުނދަގޫވެފައި ހުރެ ޖަވާބު ދިނެވެ. މާއިން ބަލަހައްޓައިގެން ވެސް ހުރީ، އޭނާ މާ ރުހޭ ޒާތަކަށް ނޫނެވެ.

”އިރޫ..“ ދެމީހުންނާއި ދާދި ގާތުން މިފަހަރު އިވުނީ ސަދަފްގެ އަޑެވެ. ސަދަފް ފެނުމުން މާއިންގެ މޫނުމަތީގެ ކުލަވަރު ބަދަލް ވެގެން ދިޔަގޮތް އިރަމްއަށް ފެނުނެވެ.

”ބޭބީ.. ވައި އަރ ޔޫ ހިޔާރ؟އައި ހޭވް ބީން ސާޗިންގ ފޯރ ޔޫ“ ސަދަފް ވާހަކަ ދައްކަން ފެށިގޮތުން އިރަމްއަށް ހުރެވުނީ އަނގަނަގައިގެންނެވެ. ދެވަނަ ސިކުންތު އިރަމްގެ ހިމަ އުނަގަނޑުގައި އަތް އަޅުވާލަމުން ގަޔާލާ ފިއްތާލިއެވެ. ހިތުގެ ތެޅުން އަވަސްވެގެން ދިޔައިރު ސަދަފްގެ އެގާތްކަމުން ނަގަންވީ ކޮން މާނައެއް  ބާއޭ ހިތާހިތާއި ސުވާލްކުރެވުނެވެ.

މާއިންއަށް އަލިފާނުގެ ބެލުމެއް ރައްދުކޮށްލާފައި ސަދަފް ދިޔައިރު ، މާއިންގެ ދެލޮލުން ވެސް ފެނިގެންދަނީ އެފަދަ ވިދުވަރެކެވެ. ރުޅިވެރިކަމެވެ. ނަމަވެސް ސަދަފް އަޅާވެސް ނުލިއެވެ. އިރަމްގެ ގައިގާ ހިފަހައްޓާލައިގެން ދިޔައިރު ފަސްއެނބުރި ނުލީ ނަމަވެސް މާއިން ބަލަން ހުންނާނެކަން ސަދަފް ދެނެގަތެވެ. އެހެންކަމުން އިރަމް ދުރަށް ޖެހިލަން މަސައްކަތް ކުރުމުން، އަތްދަނޑި އިރަމް މައްޗަށްލިއެވެ. ހީވީ ލުއި ފަތްކޮޅެއް އުފުއްލާލި ހެންނެވެ.

”ސަދަފް“ ދެލޯ ބޮޑުކޮށްލައިގެން އޮވެ އިރަމްއަށް ގޮވާލެވުނެވެ. ހިތުގެ ތެޅުމުގެ އަޑު އޭނާއަށް އިޙްސާސް ނުވެ ހުންނާނެބާއޭ ވެސް ހީވިއެވެ.

”އައިލް އެކްސްޕްލެއިން… ޖަސްޓް ޕްރިޓެންޑް.. އޯކޭ؟“ ސަދަފްގެ އަޑު އެހާ މަޑުން އިވެމުން ދިޔައިރު ދެމެދުގައި މާ ބޮޑު ދުރުމިނެއް ނެތެވެ. ކަޅި ޖަހާނުލާ އިރަމްއަށް ބެލެމުން ދިޔައެވެ. އެފަދަ ގޮތަކަށް، މީގެ ދުވަސްތަކެއް ކުރިންވެސް ސަދަފްގެ އަތުގެ ތެރޭގައި އޭނާއަށް އޮވެވުނެވެ. ނަމަވެސް އެދުވަހު ނިއާ ކުރި ހާލަތުގެ ސަބަބުން މިރޭ އެކުރެވެމުންދާ އިޙްސާސް ކުރެވޭނެ ޖާގައެއް ނުލިބުނެވެ. އެ ފިރިހެންވަންތަ ސޫރަ އެހާ ގާތުން ފެނިލި އިރު އެވަގުތު ކޮޅު ނިމޭކަށް ބޭނުމެއް ނޫނެވެ.

ދެ ޒުޥާނުންނަށް މާ ދުރަށް ނުދެވެނީސް ވާރޭ ވެހެން ފެށީ އިންޒާރަކާއި ނުލައެވެ. އަދި އާއިލީ ފޮޓޯ ނުނެގޭތީ ދެމީހުން ކުރެން އެކަކުވެސް ތެމޭކަށް ބޭނުމެއް ނުވިއެވެ. ސަދަފް ވަނީ އެންމެ ފުރަތަމައަށް ޖެހުނު ގެސްޓް ރޫމްތަކުގެ ރިސެޕްޝަން ތެރެއަށެވެ. އެހިސާބު ފަޅުވެފައިވީ އިރު ރިސެޕްޝަންގައި މަޑުކޮށްލައިގެން އިން ޒުވާނާއަށް ސަދަފް ލޮލުން ކޮށްލި އިޝާރާތް ނަގައިގަނެވި އެތަނުން ދިޔައެވެ. އިރަމް ބިންމަތީގައި ބަހައްޓާފައި ފަސް  އެނބުރި ބަލައިލި އިރު ދުރުން މާއިން ފެނުމުން ސަދަފްގެ ބޮލުގައި ރިއްސައިގަތެވެ. މާއިން އެމީހުންގެ ފަސްފަހަތް ބަލަމުން އެތަނަށް ވެސް އައީ ހެއްޔެވެ. ”އޭނަ ކީއްކުރަން އަހަރެމެންގެ ފަހަތުން އެ މުގޯލި އަޅަނީ“ ސަދަފްއަށް އެ ސުވާލް އެހުނީ އަމިއްލަ ނަފްސާއި އެވެ. ހައިރާންވިއެވެ. ސަދަފް އެދިމާ ނުބަލަން ހުރިއިރު ހިސާބަކަށް ހިތުގައި ނުތަވަސްކަން އުފެދެން ފެށިއެވެ. މާއިންއަށް އެމީހުން ފެނުނު ނަމަވެސް ދައްކާ ވާހަކަ އެހިސަބަށް ނުފޯރާނެކަން ޔަގީން ވުމުން ސަދަފް ގަސްތުކުރީ ވާހަކަ ދެއްކުމަށެވެ.

”އޭނައާއި ފްރެންޑްސް ތަ؟“ ސަދަފް އަހާލިއެވެ.

”ކީއްކުރަން ސަދަފް ބަލަނީ؟ ޑޫ ޔޫ ކެއާރ؟“ ހިތުގައި ކޮންމެ ގޮތަކަށް އޮތް ނަމަވެސް އިރަމް ބޭރު ފުށުން ދެއްކީ އޭނާގެ ޅަ މިޒާޖެވެ. ގޮތްދޫނުކުރުމާއި ބޯހަރު ކަމެވެ.

“ ކީއްވެ ތިހެން ތި ވާހަކަ ދައްކަނީ“އެހާ ސީރިއަސް ވަގުތަކު އިރަމް އެގޮތައް ވާހަކަ ދެއްކުމުން ސަދަފްއަށް ކަމަކު ނުދިޔައެވެ. ހިތްހަމަ ނުޖެހިފައި ހުރެ ސުވާލް ތަކުރާރް ކޮށްލިއެވެ.

”ވައި އާރ ޔޫ ސްޓޭރިންގ؟ ޑޫ އައި ހޭވް ޓް އާންސާރ ޔޫ؟ ވާހަކަ ދައްކާ އެންމެނާ އަހަރެން ބާއްވާ ގުޅުން ސަދަފްއަށް އަންގާދޭން ޖެހޭ ހިސާބަށް ދިޔައީ ކޮންއިރަކު؟“

އިރަމް އަދިވެސް ހުރީ ގޮތުގައެވެ. ސަދަފް ރުޅިގަދަ ވަމުން ދިޔައިރު ވަށް ކަޅިން ބަލައިލީ މާއިން ހުރިތޯއެވެ. އަދިވެސް އެގޮތުގައި މާއިން ވާރޭގެ ތެރޭގައި ހުރިތަން ފެނުމުން ސަދަފްގެ ރުޅިގަނޑު ހިލިގަތެވެ. އެ ރުޅިއާއި އިރަމް އުޅެމުން ދިޔަ ގޮތުން ބޯ ހާސްވެގެން ސަދަފްގެ ގާތައް އައިސް ހުރީ ނުހަނު ގަދަފަދަ ރުޅިއެކެވެ.  އިރަމްގެ އަތުގައި ހިފައިގެން ވަނީ އެންމެ ފުރަތަމައަށް ހުރި ކޮޓަރީގެ ތެރެއަށެވެ. އެތަން އޮންނާނީ ހުސްކޮން ކަން މާކުރިން ވެސް އެނގޭ ކަހަލައެވެ.

އެތެރެއަށް ވަދެވުމުން މޫނުމައްޗަށް ރުޅިވެރިކަން ވެރިކޮށްގެން ހުރެފައި އޭނާގެ އަތުގެ ތެރެއިން އިރަމް އަތް މިންޖުކުރިއެވެ.

“އާރ ޔޫ ފަކ*ގ ކްރޭޒީ! ފުރަތަމަ ކަމަކަށް މަށައް ބުނެދީބަ ތިގޮތައް ވާހަކަ ދައްކަން ޖެހުނު ސަބަބެއް؟ މަށައް ކީއްހޭ ކުރެވުނީ! ބުނެބަލަ ހެޔޮނުވާނެ! އެކަހަލަ މީހަކާއި ވާހަކަ ދެއްކުމަށް ވުރެން މަގުމަތިން ފެންނަ ބަންގާޅު މީހަކާއި ވާހަކަ ދެއްކުން ވެސް މާ ރައްކާތެރި ވާނެ.. މީ އިރަމްއަށް ހެޔޮ އެދޭތީ މަ ދައްކާ ވާހަކައޭ! އެނގޭތަ އެއީ ކާކުކަން! އަހަންނަށް ޔަގީން އިރަމް ދޮންބެގެ ފުރާނަ ހުރިހާ ހިނދަކު އޭނައާއި އިރަމް ވައި އެޅިލާތަން ވެސް ދެކެން މަޑުން ހުންނާނެ ކަން..ތި ހަށިގަނޑާއި ފުރާނަ ވަކި ކުރާނެ މާއިންއާއި ގުޅުމެއް ބާއްވާފައިފިއްޔާ!“ އިރަމްގެ ދެކޮނޑުގައި ހިފަހައްޓާލައިގެން ހުރެ ސަދަފް ވާހަކަދެއްކިއެވެ. އެއަޑު ބާރުވެފައި ހުރި ހިތްހަމަނުޖެހުމުގެ އަސަރުން އިރަމް ހިތުގައި ޖެހޭ ގޮތްވިއެވެ.

”ދެން އޭގަ ވެސް ނެތެއްނު ސަދަފް އާއި ބެހޭ ކަމެއް! ދޫކުރޭ ސަދަފްއަށް އެއްވެސް އިޙްތިޔާރެއް ނޯންނާނެ އަހަރެންގެ ގައިގާ އިނގިލި ކުރިވެސް ޖައްސާލާކަށް… ހާދަ އަންހެންކުދިން ގައިގަ ޓަޗް ކުރާ ހިތްވެއޭ ދޯ .. އެހެންވެތާ މަ ފެންނަ އިރަށް ތި ގަޔަށް ބޮލަށް އަރައި ގަންނަނީ!“ އިރަމްގެ އަޑުވެސް ނުކުތީ ފުދޭވަރަކަށް ބާރަށެވެ. ޔޫ ހޭވް ނޯ ރައިޓް މަ ކުރާ ހުރިޙާ ކަމެއް ތިހެން ބެލުމުގެ“

”ގަޔަށް ބޮލަށް؟ ގަޔަށް ބޮލަށް އަރާ ގޮތް ދައްކާލަންތަ!“ އެތެރެހަށީގައި އުފެދިފައިވާ ގަދަ ރުޅިވެރިކަމާއެކު، ސަދަފްއަށް ދަތްކުނޑި ވިކާލެވުނެވެ. މޫނުމަތިން ފެންނަން ހުރީ ހަރުކަށިކަމެވެ. ކަތުރު ކަށިގަނޑަށް ބާރުވެގެން ދިޔައިރު އެހިސާބުގައިވާ ނާރުތައް ފުއްޕާލިއެވެ.

އެއްވެސް އަސަރެއް ނެތް ފަދަ ގޮތަކަށް، އިރަމްގެ ނާޒުކު އަތުގައި ހިފައި ދަމާފައި ކަހަލަ ގޮތަކަށް ގެންގޮސް އެނދުމައްޗަށް ސަދަފް ވައްޓާލިއެވެ. އެ ވަގުތު އިރަމްގެ ބޮޑު ދެލޮލުން ފެނުނު ބިރުވެރިކަމާއި، ތުރުތުރުލަމުން ދިޔަ ތުންފަތް ފެނި ސަދަފްގެ ހިތް މަޑު ފުށްކޮޅަކަށް ވެގެން ދިޔައެވެ. އެހެނަސް، އަމިއްލަ ނަފްސުގެ މައްޗަށް ބާރުފޯރުވަމުން، އެ އަސަރުތައް މޫނުމަތިން ފޮރުވާލިއެވެ. ދައްކަމުން ދިޔައީ ރުޅިވެރިކަމެވެ. ސަދަފް ލައިގެން ހުރި ކޯޓު ބާލާފައި ތިރީގައި އޮތް ރަގް މައްޗަށް ވައްޓާލަމުން ކަޅުކުލައިގެ ގަމީހުގެ އަތްކުރި، މުލައްދަނޑިއާ ހަމައަށް ފަތްޖަހައި އޮޅާލިއެވެ. އެ ވަރުގަދަ އަތުގެ މަސްތަކާއި ފުއްޕާފައިވާ ނާރުތަކުން، އޭނާގެ ހަށިގަނޑުގެ ބާރު ހާމަވަމުން ދިޔައެވެ. އެ މަންޒަރު ފެނިފައި، އިރަމްއަށް ބޭއިޚްތިޔާރުގައި ހިން ދިރުވާލެވުނީ އެ ހައިބަތުން ޖެހިލުންވި ވަރުންނެވެ.

ދިޔަ ބާރުމިނުގައި އިރަމްގެ ގައި މައްޗަށް ވާހެން ސަދަފް އޮށޯވެލިއެވެ. ދެފަރާތުން އެނދުގައި އަތް ވިދެލައިގެން އިނުމުން  އެ ހަށިގަނޑުގައި ނުޖެހެއެވެ. އެ ދެމެދުގައި ހުރި ކުޑަ ހުސްތަންކޮޅުގެ ތެރެއިން އެކަކު އަނެއްކަކުގެ ހޫނު ނޭވާގެ އަޑު އިވެމުންދިޔައެވެ. ދެލޮލުގެ ތެރެއަށް ފީނައިގަނެވުނު އެ ކުރު ސިކުންތުކޮޅުގެ ތެރޭގައި، މުޅި ދުނިޔެ ހީވީ ހުއްޓިފައި ވީ ހެންނެވެ. ކޮޓަރީގެ ތެރޭގައި އޮތް ހަމަހިމޭންކަން މުގުރާލަމުން ދިޔައީ ހަމައެކަނި އެ ދެ ހިތުގެ ތެޅުމުގެ އަޑެވެ. ސަދަފްގެ މަގްސަދަކީ އިރަމް ބިރުގަންނުވާލުން ކަމުގައި ވިޔަސް، އެ ރީތި މޫނު އެހާ ގާތުން ފެނުމުން  ހިއްސުތައް ކުއްލިއަކަށް ހޭލައިގަތެވެ. އެ އޮމާން މޫނާއި ދިގު އެސްފިޔަތަކުގެ ނިވަލުގައިވާ ބޮޑު ދެލޮލުގައި ވަނީ ކޮންފަދަ ޖާދުލެއްބާއެވެ. ރަތްކުލައިގެ ތުނި ތުންފަތް އެހާ ގާތުން ފެނުމުން ނާރުތަކުގައި ލޭގެ ހިނގުން ހިނދެއް ހިނދަކަށް އަވަސްވެ، ހިތުގެ ހަމަޖެހުން މުޅިންހެން ގެއްލިގެން ދިޔައެވެ. ތުންފަތުގައި ބޮޑުވާ އިނގިލި ހިންގާލެވުނު އިރު، އިޚްތިޔާރުން ބޭރުގައި، މަޑުމަޑުން އިރަމްގެ މޫނާ ދިމާއަށް އޭނާގެ މޫނު ގާތްކޮށްލެވުނެވެ. ބިރުގަނެފައި އޮތް އިރަމްގެ ދެލޯ މެރިގެން ދިޔައީ، ކުރިއަށް އޮތް މަދު ސިކުންތުކޮޅުގައި ވާނެ ގޮތެއް ނޭނގޭ ހާލުގައެވެ.

****

(ނުނިމޭ)