މި ޖިސްމުގާ ވަނީ 30

”ޝާއިރާ.. ކިހިނެތްތަ ކޮއްކޮ؟“ އުފާވެރި ހިނިތުން ވުމެއްގައި އާމިލާހުރެ، ހުރި ހަމައެކަނި ކޮއްކޮގެ ގައިގާ ބައްދާލިއެވެ. ނަމަވެސް އާމިލާގެ ތަބީއަތުގައި ވީ އުފާވެރިކަމުގެ ޒައްރެއްގެ މިންވަރު ވެސް ޝާއިރާގެ މޫނަކު ނުވެއެވެ.ބޮޑާކަމާއި ކިބުރުވެރިކަމުގެ ލާމަސީލް މިސާލެކެވެ.  މަސްނޫއީ ހިނިތުންވެމެއްގައި ހުރެ ހޫމް އަޅުވާލަމުން އާމިލާގެ އުނަގަނޑުގައި އަތް ވަށާލިއެވެ. އެއަދާއިން ވެސް ބޮޑަށް ސިފަވީ ދެއްކުންތެރިކަމެވެ. ހީވީ ކޮންމެހެން ކުރަން ޖެހިގެން ކުރި ކަމެއް ހެންނެވެ. އޭނާގެ ކަޅި ހުއްޓިފައި ހުރީ ދުރުގައި ހުރި ސަދަފްގެ މޫނަށެވެ. އެ ބެލުމުގައި ވީ ނަފްރަތާއި ފޫހިކަމުގެ އެންމެ ފުން މާނައެވެ. ހީވީ އެ ނަޒަރުން އެކަނިވެސް ސަދަފް ފިއްސާލަން އުޅުނު ހެންނެވެ.

****

”އަދި ވެސް ގެ މިހުރީ ހުރި ގޮތަކަށް ދޯ.. ބަދަލެއް ވެސް ނައިސް..“ އާމިލާގެ ގައިން   ދުރުވެލަމުން ޝާއިރާ ނިކަން ޒާތަކަށް މުޅިގޭގެ އެކި ކަންކޮޅުތަކަށް ކަޅި ހިންގާލިއެވެ. ހީވީ މުޅިގޭގެ ކޮންމެ ކަނެއް ވަކިވަކިން ސްކޭޏް ކޮށްލިހެންނެވެ.

”ދެން މިތާގަ ތަ ތިބެނީ.. ވާރޭގެ ކަނިތައް މިހިސާބަށް ވެސް ފޯރާ އެބަ“ މިފަހަރު ވާހަކަ ދެއްކީ ހައިކަލްއެވެ. ހައިކަލްގެ އަޑު އާދަޔާއި ހިލާފަށް މަޑުވެފައިވާ ކަން ނަގައިގަނެވުނު ހިނދު އާމިލާއަށް ތުންފަތުގައި ދައިގަނެވުނެވެ. އެކަމުގެ ސަބަބު ވެސް އޭނާއަށް އެނގެއެވެ. ހައިކަލްގެ ގައިގާ މަޑުމަޑުން ކޮއްޓާލަމުން އާމިލާ ކޮއްލި އިޝާރާތް ނަގައިގަނެވުނު ނަމަވެސް، މޫނުމަތިން ހިތްހަމަ ނުޖެހުން ފާޅުވޭވޭ ހުއްޓެވެ.
”ޝާއިރާ އެއައީ ހާދަ ޒަމާނަކަށް ފަހު އޭ.. ދެން ވެސް ހިނިތުންވުމެއް ވެރިކޮށްލަބަ“ އާމިލާ އެންމެފަހުން ހައިކަލްގެ ކަންފަތް ކައިރީގައި ބުނެލިއެވެ. އޭނަ ވަކި އެއްޗެއް ނުބުނެ، އެމީހުންގެ ގާތައް އައިސް ހުއްޓުނު ނޯކަރަށް އަންގާލީ ގެސްޓްރޫމްއަކަށް އެ ސާމާނު ގެންގޮސް ލުމަށެވެ. އެންމެންގެ މިސްރަބް ހުރީ ކާކޮޓަރިއަށެވެ.

އެހެން މީހުންގެ ފަހަތުން ހިނގަމުން ދިޔަނަމަވެސް މަންހާގެ ފުރިހަމަ ސަމާލުކަން ވަނީ އެހެން ކަމަކާއި ގުޅިފައެވެ. ފަރާތް ފަރާތައް ބަލަމުން ދިޔައީ އެންމެ ސޫރައެއް ދެކިލުމުގެ ނިޔަތުގައެވެ. ކޮނޑުގައި އަޅުވާފައި އޮތް ދަބަސް، ލިވިންގރޫމު ސޯފާއެއްގެ މައްޗަށް އެއްލުމަށްފަހު ސިޑީން އަރައިގެން ދިޔައެވެ.

އާމިލާގެ ކުރިމަތީގައި ހުރި އިރު އެމޫނުމަތީގައިވި ހިތްހަމަޖެހުމުގެ ބަދަލުގައި މިހާރު ފެންނަން ހުރީ ޝާއިރާ ފަދައިން ބޮޑާ ވައްތަރެކެވެ. ދާންވީ މިސްރާބު މާކުރިންވެސް ހީވީ އެނގޭހެންނެވެ. އޭނާ މަޑުކޮށްލީ ވިޝާމްގެ ކޮޓަރީގެ ދޮރުމަތީގައެވެ. މަންހާ ލައިގެން ހުރި ކުރު ޓޮޕްކޮޅުގެ ކަރުވަލަށް ދަމާލަމުން ، ދެފަރާތު ކޮނޑުން ތަންކޮޅެއް ތިރިކޮށްލިއެވެ. އިސްތަށިގަނޑުވެސް ވީހާ ވެސް ބޮޑަކަށް ފަހަތައް ގެންގޮސް ކަރާއި ކަނދުރާ ހާމަކޮށްލަމުން، އެކޮޓަރީގެ ދޮރު ހުޅުވާލިއެވެ. ޓަކި ޖަހަންވެސް ނޫޅުނެވެ.

އެންމެ ކުރިންސުރެންވެސް ބަންދު ދުވަހަކު ނޫނީ ވިޝާމްއަކީ ނިދަން އޮންނަ ޒުވާނެއް ނޫންކަން އޭނާ ދަނެއެވެ. ޓަކި ޖެހުމެއް ވެސް ނެތި މަންހާ އެކޮޓަރިއަށް ވަތް އިރު އެއްވެސް މީހެއްގެ ހިލަމެއް އެތާކު ނުވެއެވެ. އެންމެ ކުޑަމިނުން އަލިކަމެއް ވެސް ނުވެއެވެ. ކަނު އަނދިރިކަމުގެ މައްޗަށް އަލިކަމެއް ފޯރަނީ ބެލްކޮނީގެ ދޮރުން ހުޅުވިފައިވާ ހަނި ދާއިރާގެ ތެރެއިން ފުރޭނިގެން އައި އަލިކަމެވެ.

މަންހާއަށް އެކޮޓަރިގެ ކޮންމެ ބިތަކަށް ބަލައިލެވުނެވެ. އޭނާގެ މެއިން ނުބައި ޒާތެއްގެ ދިލައެއް ނަގައިގަތެވެ. މީގެ އަހަރުތަކެއް ކުރިން އޭނާ ދިޔައިރު އެތަނުގައި ހުރި އެއްވެސް އެއްޗެއް ނެތެވެ. ފާރުގެ އެއްބިތް ފުރެންދެން ލަކުޑި ރެކްތައް ހަދާފައި ހުންނައިރު، އެހުރިޙާ ރެކެއްގައި ފުރިފައި އޮންނާނީ އޭނާ، ވިޝާމްއަށް ދިން ސާމާނުންނެވެ. ނުވިތާކަށް އިހު، މުޅި ކޮޓަރީގެ ހުރިހާ ތަނަކުން ފެންނަން ހުންނަ މަޑު ނޫކުލައިގެ ބަދަލުގައި މިހަރު ވަނީ ހުދުކުލައެވެ. ފަރުނީޗަރުން ފެށިގެން ހިފާ ގެންގުޅޭ ހުރިހާ ސާމާނެއް މަޑުނޫކުލައަށް ވިޝާމް ބަދަލްކުރީ އޭނާއަށް ރީތިވެގެން ކަން މަންހާއަށް އެނގެއެވެ. ނަމަވެސް އަހަރުތަކެއް ފަހުން މިއަދު އެކޮޓަރިއަށް އެޅި ފުރަތަމަ ފިޔަވަޅާއި އެކު މަންހާ ކޮސްވިއެވެ. ހިތުގައިވީ ރިހުންގަނޑު ދެގުނަވެއްޖެއެވެ. ދެލޯ ތެމެމުންދާކަން އިހްސާސްވެ ހުރެ ދެފަރާތައް ބޯހޫރުވާލެވުނެވެ. ވިޝާމް ހަމަ ރަނގަޅަށް ވެސް އޭނާގެ މަތިން ހަނދާން ނައްތާލީ ހެއްޔެވެ. ނޫނީ މިއީ އޭނާ އަންނަ ކަން އެނގިގެން ދެރަކޮށްލުމުގެ ގަސްތުގައި ކޮށްފައި ހުރިކަމެއް ބާއެވެ. މަންހާއަށް ވަކި އެއްޗެއް ވިސްނޭވަރަށް ވުރެން ބޮޑަށް ހުރެވުނީ ހިތުގައި ޖެހިފައެވެ.

”ޙީ ޔޫސްޑް ޓްބީ އޮބްސެސްޑް ވިތް މީ.. ވައި.. ވައި؟ ކީއްވެ މިހާ ބޮޑު ޗޭންޖް އެ.. ކޮބާ ތަ އެހުރިޙާ ގިފްޓެއް؟ އަހަރެންގެ އެންމެ ހަނދާނެއް ވެސް މިތާކު ނެތް“ މަންހާއަށް ބުނެވުނެވެ. ކޯތާފަތްމަތިން ކަރުނުތައް ފިރުގަތުމުން ފުހެލިއެވެ.

”އެއީ މަންހާ ދެކެ އޭނަ މިހާރު ލޯބި ނުވާތީ“ ރޯންހުރި މަންހާއަށް ސިހިފައި ފަސް އެނބުރިލެވުނީ ބެލްކޮނީގެ ތެރެއިން މީހަކު ވާހަކަ ދެއްކި އަޑުއަހާފައެވެ. ދޮރުކަނީގައި ލެނގިލައިން ހުރި ސަދަފް ބަލަހައްޓާއިގެން ހުރީ މަލާމާތުގެ ނަޒަރެއްގައެވެ. މަންހާގެ ހިތުގައިވާ އަސަރްތަކުގެ މައްޗަށް ނުރުހުންތެރިކަން ވެރިވެގަންނާކަށް މާގިނަ ވަގުތެއް ނުނެގިއެވެ.  ސަދަފްގެ ސޫރައަކީ އޭނާ މިދުނިޔެމަތިން ވެސް އެންމެ ފޫހިވާ ސޫރައޭ ބުންޏަސް ދޮގަކަށް ނުޥާނެއެވެ. ހިތުގައި ރޯވި އަލިފާންގަނޑުން މުޅި ނަފްސްކެކިގަތެވެ.

”ހަހް.. ކަލެއަށް ދޯ އެނގެނީ؟“ މަންހާގެ މުޅި މޫނަށް ވަނީ އައިސްފައި ހުރި ގަދަ ރުޅީގެ ސަބަބުން މަޑު ރަތްކަމެއް ފާއްދާލާފައެވެ.

”އާން މަށައް ނޭނގި އޭނާގެ ކަންކަން ދެން ކާކަށް އެނގޭނީ.. ކޮބާތަ ކަލޭގެ އެކުވެރިޔާ ޔަނާލް؟ މަންމައާއި ދޮންބައްޕަ ގޮވައިގެން ތިއައީ ލާރިކޮޅެއްގެ ބޭނުމުގަ ދޯ؟ ”ސަދަފް ހުރީ ދޫދޭ ގޮތަކަށް ނޫނެވެ.

”ހަހަހްހަހާ.. ވަރަށް މަޖާ! ހުއް ކަލޭ ވަކި ރީތި ތަ ތިހެން ބުނަން! ކަލޭވެސް ތިއުޅެނީ މިގޭ މީހުން ތައްޕާހަކު ނޫން ތަ.. ކަލެއަށް ލިބޭ ކޮންމެ އެއްޗަކީ މަށައް ވެސް މިގެއިން ލިބެން ހައްގު އެއްޗެކޭ“ މަންހާ ހީގަތެވެ.  ބޭނުމަކަށް ވީ ސަދަފްއާއި ޒުވާބް ކޮށްލުމަށެވެ. ސަދަފް ފެނުން ފަހުން އޭނާ ބޭނުންވީ އެ މޫނު ނޮޅާލާށެވެ. އޭނާގެ ސަބަބުން ނޫންނަމަ މިއަދު ވެސް އޭނާ ހުރީ ވިޝާމްގެ މީހެއްގެ ގޮތުގައެވެ. އޭރުން އޭނާގެ މަގްސަދްވެސް ހާސިލް ވެސް ވީހެވެ.

”މަ އެއްބަހޭ.. އެމީހުންގެ ތައްޕާހުގަ އުޅުނަސް އަހަރެން މިއުޅޭނީ މަސައްކަތް ވެސް ކޮށްދީގެންނޭ.. ތިހެން ލާޗާރު ބިޗާރަކަށް ނޫން.. ސޯ! ލަދެއް ވެސް ނުގަނޭ ދޯ ތިހެން ބުނާކަށް! އާން މަންމަގެ ނުހުންނަ ރިވެތި އުޅުމެއް ދަރިއަކަށް ވަކި ލިބޭނެތަ!“

”ސަދަފް! ޖަސްޓް ޝަޓް ޔޯ ފަ** މައުތް! އަހަރެންގެ މަންމައާއި ބެހުމުގެ ހައްގެއް ކަލެއަކަށް ނޯންނާނެ!“ ޝާއިރާއަށް ނިސްބަތް ކޮށް ސަދަފް ޥާހަކަ ދެއްކިގޮތުން މަންހާ ގެ ލޭ ކެކިގަތެވެ.  ދިޔަ ބާރުމިނުގައި ސަދަފް ލައިގެ ހުރި ގަމީހުގެ ކަރުވަޅުގައި ހިފާ ދަމައިގަތެވެ.

ސަދަފްގެ މޫނުމަތިން ފެނުނީ ކާމިޔާބީގެ ކުލަވަރެވެ. މަންހާގެ ގަދަ ރުޅި އެއީ ސަދަފްގެ ނަފްސަށް ލިބޭ އާދަޔާއި ހިލާފް ހިތްހަމަ ޖެހުމެވެ. އިތުރަށް ރުޅި އަރުވާލުމުގެ ނިޔަތުގައި ސަދަފް ނުހުއްޓި ހެމުން ދިޔައެވެ.

”އޯހް ގޯޑް! ކަލޭ އުޅެން ވީނު ވިޝާމްއާއި ވެސް ދުރުން.. އޭރުން ކަންނޭގެ އޭނާއަށް ވެސް އެއްޗެއް ވިސްނޭނީ.. ކަލޭ ދާހާ ތާކު އުފެދެނީ ފަސާދަ..އެއިން ވެސް އަމިއްލަ މީހާގެ ލެވެލް އެނގޭނު! މިގޭ މީހުންގެ ފައިސާއަށް ބޫތު ކައިގެންނު ކަލޭ ތިއުޅެނީ “

”މަންހާ!“ ދެމީހުންގެ ވާހަކަ އަހަން ހުރެފައި ހައިކަލްއަށް މަންހާގެ ނަމުން ފުދޭވަރަކަށް ބާރަށް ގޮވާލެވުނެވެ. އޭނާ އެތަނަށް އައީ ސަދަފް އާއި ވިޝާމް ތިރިއަށް ސައިބޯން ނުފައިބައިގެން ކޮބާތޯ ބަލާލުމުގެ ބޭނުމުގައެވެ. ނަމަވެސް އެކޮޓަރި ބޭރުގައި މަޑުކޮށްލި ވަގުތު އިވުނު މަންހާގެ އަޑަށް އޭނަ ހުއްޓުން އެރިއެވެ. ހައިކަލް މަޑުކޮށްލީ މަންހާގެ ވާހަކަ ނިމެންދެންނެވެ.

”މަންހާ!ހަމަ މިހާރު ޝެޑީގެ ކިބައިން މާފަށް އެދޭ!.. ތިކަހަލަ އެއްޗެހި ކިޔުމުގެ ހައްގެއް މަންހާއަކަށް ނޯންނާނެ.. މަންހާ ތިއީ އާމިލާގެ ކޮއްކޮގެ ދަރިއެއް .. ޝެޑީ އެއީ އަހަރެންގެ ކޮއްކޮގެ ދެމަފިރިން މިދުނިޔެއަށް ދޫކުރި ހަމައެކަނި ނިޝާން … އަހަރެން ފަހެއް ނުޖެހޭ މިހުރިހާ މުދަލެއް ވެސް ޝެޑީގެ މައްޗަށް ބަދަލްކުރާކަށް.. އެއް އިންސާނަކު އަނެއް އިންސާނަކު ދެކެ ރުޅި އައި ނަމަވެސް ކިޔަންވާ އެއްޗިއްސާއި ނުވާ އެއްޗިހި ހުންނާނެ.. މަންހާ ތިއީ އެއްޗެއް ނުވިސްނޭ ވަރު ކުޑަކުއްޖެއް ވެސް ނޫނެއްނު.. ދެކުދިން ރުޅިއައިސްގެން ޒުވާބަކަށް ދިޔައީ ކީއްވެކަމެއް ނޭނގެ.. އެކަމަކު މިއީ ދުވާލް ފަދައިން އެނގޭ ގޯސް ކަމެއް ޝެޑީ ނުކުރާނެ ކަން… އެހެންވީމަ މަންހާގެ މަންމައާއި ހިސާބަށް މިކަން ނުގެންދަނީސް މާފަށް އެދެންވީ!“ ހައިކަލް ނުރުހުމާއި ބުނަމުން ދިޔަ ކޮންމެ ޖުމްލައަކުން މަންހާ ލަދުގަންނާވާލިއެވެ. ތުން ފިއްތާލައިގެން ހުރިއިރު ސަދަފްއާއި މެދު ހިތުގައި ނަފްރަތު އިތުރަށް ވަރުގަދަ ވެ ހުޅުފަޅާއިގަތެވެ. ހައިކަލްގެ ކުރިމަތީގައި ބަސްބުނަން ނުކެރޭނެތީ، އިސްޖަހައިގެން ހުރެ ކެތްތެރިކަން އިހްތިޔާރް ކުރިއެވެ. މަޑުމަޑުން ބޯޖަހައިލިއެވެ.

”އަމް..އަމް ސޮރީ“ ހިތާއި ދެކޮޅަށް ބުނުމަށްފަހު މަންހާ ނުކުމެގެން ދިޔައެވެ. މަންހާ ނުކުންނަމުން  ބަލައިލި އިރު ސަދަފް ހީލައިގެން ހުރި ގޮތުން އިތުރަށް އަނދައިގަތެވެ.

”ދަރިފުޅާ..އެހާ ބޮޑު އެއްޗެއް ހިތައް ނާރައްޗޭ.. މަންހާ އެހުންނަނީ އޭނަގެ މަންމަގެ އުޅުން.. އެހެންވެ އަހަރެން ޝާއިރާދެކެ ބައްޕަ ހިތްހަމަ ނުޖެހެނީ.. އަމިއްލަ މީހާ އުޅެނީ އުޅޭނެ ގޮތަކަށް.. ދަރި މަންޖެ އުޅޭނެ ގޮތަކަށް.. އަނެއްކާ އެކުދިންނަށް ހޯދައިދިނީ ވެސް އެހާ ހޭޖެހޭ ދޮން ބައްޕައެއް ނޫން.. ކިރިޔާ ވެސް ސަހަލު ގޮތެއް އެހުންނަނީ މަހާއްކޮ.. މީހާ ކިތަންމެ ޅަކޮން އުޅުނަކަސް، މަހާގެ ހުންނާނެ އެމީހުންގެ އަސްލު ބައްޕަ ޒައީމްގެ އަހްލާގު..“ ހައިކަލް ވާޙަކަ ދެއްކިއެވެ. ސަދަފްގެ މޫނުމަތިން ހަމަޖެހިފައި ހުރިވަރު ދައްކައިގެން ހުއްޓަސް، މަންހާ ކިޔާލި އެއްޗިހުނުން  ދެރަވާނެކަން ހައިކަލްއަށް އެނގެއެވެ. އޭނާއަށް ހުރެވުނީ ނުހަނު ބޮޑަށް މަންހާދެކެ ރުޅި އާދެވިފައެވެ.

“ބައްޕާ އިޓްސް އޯކޭ.. އައި ޑޯންޓް މައިންޑް.. ޝީ އިޒް އަ ކޮމްޕްލީޓް ސައިކޯ“ ސަދަފް ހީލިއެވެ. އެޖުމްލައިން ހިތްހަމަނުޖެހިފައި ހުރެވެސް ހައިކަލްއަށް ހެވުނެވެ.

”ކޮބާތަ ތިއްތިބެ؟..ދެކުދިން ސައިބޯން ނައިސްގެން ބައްޕަ މިއައީ“

”އަހަރެމެން ދެމީހުން ދާނަން އެމީހުން ސައިބޮއެގެން ދިޔައީމަ.. ތިއްތިބެ ކުޑަ ކަމެއްގަ އުޅެނީ“ ސަދަފް ބުނެލިއެވެ. ހައިކަލް ބޯޖަހައިލިއެވެ. ސީދާ ނުބުންޏަސް މަންހާއާއި އެކު އެއްތަށި މައްޗަކަށް މިވަގުތު ސަދަފް އަރަން ބޭނުން ނުވެފައި ހުރިކަން ހައިކަލް ދެނެގަތެވެ. އިތުރަށް އައުމަށް ނުބުނެ ދިޔައީވެސް އެހެންވެއެވެ.

ހައިކަލް ނުކުތުމުން ސަދަފް އެ ދޮރު ލައްޕާލިއެވެ. އެނބުރި ގޮސް ނުކުތީ ބެލްކޮންޏަށެވެ. އޭރު ބީޗްޗެއާރ ފާޑު ގޮނޑިއެއްގައި ވިޝާމް އޮތެވެ. ވާރޭ ވެހެމުން ދިޔަ މަންޒަރަށް ގެއްލިފައި އިންނަމަވެސް އެ މޫނުމަތީގައިވީ ކުލަވަރު ސަދަފް ދެނެގަތެވެ. ތާޒާކަމެއް ނުވާއިރު، ތަބީއަތު ހަރާބުވެފައިވާ މިންވަރު ދޭހަވެއެވެ.

”ޔޫ އޯކޭ؟“ އޭނާ އިންގޮނޑީގެ ބާކީއޮތް ތަންކޮޅުގައި ސަދަފް އިށީނުމުން ބުނެލިއެވެ.

”ތި ސުވާލް މަ ކަންނޭގެ ތިއްތިބެއާއި ކުރަންވީ…. ޔޫ އޯކޭ؟ ހެނދު ހެނދުނާ މި ބައްދަލްކުރީ ކޮންފަދަ ކަމެއް.. އެނީވޭޒް ޒަލްޒަލާ އެނބުރި އައުން ސީޒަން ޓޫ އަށް މަރްހަމާ“ ސަދަފް އަތް ދިއްކޮށްލަމުން ބުނެލިގޮތުން، އެހެން އިނދެވެސް ވިޝާމްއަށް ހެވުނެވެ.

”ޝެޑީއަށް ކުރިން ވެސް އެނގޭދޯ؟“

”އަންނަ ވާހަކަ އިވިފަ އޮތީ.. އެކަމަކު މިއަދު އަންނަ ކަމެއް ނޭނގޭ… ކުރިން ވެސް އެހެން އަންނަން އަންނަން ކިޔައެއްނު.. އެކަމަކު ނުއެއް އާދޭ.. ސޯ މިފަހަރުވެސް ހީކޮށްގެން މިހުރީ ނާންނާނެ ކަމަށް“ ސަދަފް ޖަވާބު ދިނެވެ. ވިޝާމް ވަކި އެއްޗެއް ނުބުނެއެވެ. ނަމަވެސް އިސްތަށިގަނޑަށް އަތް މަހާލަމުން ވާން ކޮށްލެވުނެވެ. އެއާދަ އިން ސިކުނޑި ގަޑުބަޑުވެފައިވާ މިންވަރު ހާމަވެއެވެ.

”އެހެން ކަމަކާއި ބޯ ގޮއްވަނިކޮން އަނެއްކާ މިކަމެއް މިޖެހުނީ“ ވިޝާމް ދުރަށް ބަލަހައްޓައިގެން އިނދެ ބުނެލިއެވެ. ސަދަފް ކޮންކަމެއް ތޯ ސުވާލްކުރުމުން ވިސްނާލެވުނެވެ. ހަޔާތުގެ ހުރިހާ ކަމެއް ހެން ސަދަފްއާއި ހިއްސާ ކުރާއިރު އަމީރާއާއި މެދު އުފެދިފައިވާ ޝައްކުގެ ވާހަކަ ބުނަން ޖެހިލުންވިއެވެ. އެކަމުގައި އޭނާ ދެކޭ ގޮތަށް، ސަދަފް ވެސް ދެކޭނެ ކަމެއް ނޭނގެއެވެ.

”އަދި ރަނގަޅު ވަގުތަކުން ބުނާނަން .. މިއަދު އެބައޮތް ޒަންޔާއާއި ބައްދަލް ވެސް ކުރަން ވެފަ.. ޝެޑީ ކޮންކަމެއް އޮތީ؟“

”އޯކޭ…ގޭގެ މަސައްކަތް ކުރިއަށް ދާގޮތް ބަލާލަން ދާން މިއުޅެނީ.. ރޭގަ އެމީހުން ގުޅާފަ ބުނި މިއަދު އައިސްލަ ދޭން.. ފިނިޝިންގ ވީމަ މަ ނުގޮސް ފަރު ނުޖެހޭނެތާ ދޯ“ ސަދަފް ބުނެލިއެވެ. އޭނާގެ އެ ޖަޥާބާއި އެކު ވިޝާމްގެ މޫނުގެ ކުލަވަރު އިހުނަށް ވުރެން ގޯސްވިއެވެ. އަތުގެ ހަމަލާއެއް ސަދަފްގެ ކޮނޑަށް ވެސް އަރައިގެން ދިޔައެވެ.

”އައުޗް.. ތަދުވެއްޖޭ“ ވިޝާމް ޖެހީ ކީއްވެކަން އެނގުމުން ހިނިއައިސް އިނދެ ކޮނޑުގައި ފިރުމާލެވުނެވެ.

”ހެވޭ.. ޑޫ ޔޫ ރިއަލީ ހޭވް ޓް ގޯ ދެއާރ ޓް ލިވް؟ އެވެސް އެކަނިން.. މިގޭގަ އަހަރެމެންނާއި އެއްކޮން އުޅެވިދާނެ އެންނު“

”ދެން ކޮންމެ ވެސް ދުވަހަކުން އަމިއްލަ ދިރިއުޅުމެއް ފަށަން ޖެހޭނެ އެންނު.. މިހާރު ގޭ ނިމުނަކަސް ވަގުތުން ޗޭންޖް ވާކަށް ނޫޅެމޭ.. ހަމަޖެހިބަލަ.. ނުދާނަމޭ ދޫކޮށްފަ އެއް.. ވެޑިންގ ނައިޓްގަ ރޫމްގަ ވެސް ބައިންދާތި މަ.. ތި ވަނީ އާދައިގެ ލޯތްބެއް ނޫން“ ސަދަފްގެ ލާނެތް ޖުމްލައިން މިފަހަރުވެސް ވިޝާމްއަށް ހީނުލާ ނީދެވުނެވެ. ދެމީހުން ތަފާތު ވާހަކަތަކައް ގެއްލުނު އިރު ސައިބޯން ގަސްތުކޮށްގެން ތިބީ މަންހާ ސައިބޮއެގެން ތެދުވާހާއިރު ކޮށްފައި ދިޔުމަށެވެ.

***

ވިޝާމްގެ ގާތައް ދާން އުޅެފައިވެސް އިޔާން މަޑުކޮށްލީ ނަދީމް އޮފީހުން އެނބުރި އަންނަންދެނެވެ. ދޭއްޖަހާކަށް ދެން މާގިނައިރެއް ނެތެވެ. ކެތްތެރި ކަމާއި އެކު އިންތިޒާރު ކުރަމުންދިޔައެވެ. އުނގުގައި ރީއާ ބައިންދައިގެން އިން އިރު އޭނާގެ ފުރިހަމަ ސަމާލުކަން ހުއްޓިފައި ހުރީ ޓީވީއިން ދައްކަމުން ދިޔަ ކާޓުނަށެވެ. ދޭތެރެއަކުން އިޔާންކުރެން ތަފާތު ސުވާލްތައް ކޮށްލައެވެ. އިޔާން ހެވިފައި އިނދެ ނުހަނު ލޯބިން ޖަވާބު ދެމުން ދިޔައެވެ. ރޭ ހުމުގައި އުޅެފައި ހެނދުނު ވެގެން އައި އިރު ރީއާގެ  ހާލަތު ރަނގަޅެވެ.

”ބައްޕީ..ކޮބާ ދައްތި“ އެއީ އަމީރާ ކޮބާތޯ ރީއާ ސުވާލްކޮށްލި ދިހަވަނަ ފަހަރެވެ. މަޖުދާއާއި އެކު ކޭކުއެޅުމުގައި އަމީރާ އުޅެމުން ދާކަން އެނގޭތީ، އެކަމަށް ހުރަސް އެޅޭފަދަ ކަމެއް ރީއާ ކޮށްފާނެތީ އިޔާން އިނީ ނުދާށެވެ. ޔަގީނުންވެސް އަމީރާ ފެނުމުން ރީއާ މަޑުންނުހުންނާނެއެވެ. އުރަން ބޭނުންވާނެއެވެ.

”ދައްތި ބިޒީ އޭ.. އިރުކޮޅަކުން ދާނީ ދޯ“ ރީއާގެ ކޮލުގައި ލޯބިކޮށްލަމުން އިޔާން ބުނެލިއެވެ. ނަމަވެސް މިފަހަރު ރީއާ ބޭނުންވީ އަމީރާގެ ގާތައް ދާށެވެ.

”ނޫން..ނޫން.. ކޮއްކޮ ބޭނުމީ ދާން“ ތުއްތު އަޑުން ޝަކުވާ ކޮށްލިއެވެ.

”ދެން ބައްޕި ދެރަވާނެ އެންނު ބައްޕިއާއި އެއްކޮން ނުކުޅެންޏާ.. ހިނގާބަ ބޯލް އެއް ހިފައިގެން ކުޅެން.. ޓެރެސްއަށް ދޯ ދަނީ“

”ދެން ނޫންން.. ބައްޕި އައްޗި.. ބައްޕި ފޫހި.. ދައްތި ކާރިއަށް ދާނީ“ ދެފަރާތައް ބޯހޫރުވާލަމުން ރިއާ ދެފައިތަޅާލިއެވެ. ތުންފިއްތާލައިގެން ރޯންފެށިގޮތުން އިޔާންއަށް ރީއާ ގަޔާލާ ފިއްތާލެވުނެވެ.

”އޯކޭ..އޯކޭ..ހުއްޓާލަ.. ރޮންޏާ ބައްޕި ދެރަވާނެ އެންނު.. ހިނގާބަ ދާން ކޮބާތޯ“ އިޔާން ބުނި ހިނދު ވަގުތުން ފެނުނީ ރުއިން ހުއްޓާލަމުން ރީއާ ހޭންފެށިތަނެވެ. ރޯންފެށުމާއި އެކު އިޔާން ކަންތައް ކޮށްދޭލެއް އަވަސްކަން ތުއްތު ރީއާވެސް ދަނެއެވެ. ”ބަލާބަލަ ހޭ ވަރު. ނޯޓީކޮޅު.. ލެޓްސް ގޯ ބޭބީ“ އިޔާން ގާތައް ހިނިއައިސްގެން ރީއާގެ ކޮލުގައި މަޑުމަޑުން ދަތް އަޅާލިއެވެ.

ރީއާ އުރާލައިގެން ހުރެ އިޔާން ވަތް އިރު އަމީރާއާއި މަޖުދާ، ބަދިގެ ތެރެއިން ވާހަކަ ދައްކާ އަޑުއިވެއެވެ. އިޔާންގެ އުރުން ފައިބައިގެން ރީއާ ދުވެލާފައި ބަދިގެއަށް ވަނެވެ.

”ދޫނީ..“ އަމީރާއަށް ރީއާ ފެނުމުން ސާމާނުތައް ބަހައްޓާފައި އައިސް އުރާލިއެވެ. ރީއާވެސް އޮޅިގަތެވެ. ކަރުގައި އަތްޖައްސާލާ ބަލައިލި އިރު ހުމުގެ އަސަރު ނެތުމުން އަމީރާއަށް ހަމަޖެހުމުގެ ނޭވާއެއް ދޫކޮށްލެވުނެވެ.

”ފަހުން ފުރުޓު ކޮޅެއް ކާލިންތަ ދަރިފުޅޫ.. ކޮބާ ބައްޕި“ މަޖުދާވެސް އަހައިލިއެވެ. ބޯޖަހައިލަމުން ރީއާ ދައްކައިލީ ދޮރާއި ދިމާލެވެ.

ދޮރުގެ ދާރައިގާ ލަތްވެގެން ހުރެފައި އިޔާން ވަނެވެ. އަމީރާ ބަލައިލުމުން ރައްދުކޮށްލީ ރީތި ހިނިތުންވުމެކެވެ. މަޖުދާ ހުރުމުން ހީލާފައިވެސް އަމީރާ އަވަހަކަށް އިސްޖެހިއެވެ. ނަމަވެސް ދެ ޒުވާނުންނަށް ނޭގުނު ކަމަކީ މަޖުދާއަށް އެ މަންޒަރު ފެނުނުކަމެވެ. މަޖުދާގެ މޫނުމަތި އަލިވެގެން ދިޔައިރު ތުންފަތައް ވެރިވި ރީތި ހިނިތުންވުން ފޮރުވާލިއެވެ.

”ދޫނީ އާދެބަ… ލޯބި އެއްޗެއް ދައްކާލަން ވެގެން“ ބަދިގެ ތެރެއަށް ނީޝަން ވަދެގެން އައީ ނިކަން ހެވިފައި ހުރެއެވެ. އަމީރާ ތިރީގައި ބަހައްޓާލުމުން ނީޝާންއާއެކު ދުވެލާފައި ރީއާ ވެސް ދިޔައެވެ.

”އެމީ.. ދަރިފުޅު ވެސް އެއްޗެއް ކާލައިގެން ދެން މަސައްކަތް ފަށާ.. އިށީންދެލާ ކޮފީ އެއް ހަދާލަން އެބަ“ އަމިއްލައަށް ގިރާލާނެ ކަމުގައި ބުނުމުން ވެސް މަޖުދާ އޭނާގެ އަތުގައި ހިފައި ގެންގޮސް ބޭންދީ މީރާންގެ ގާތުގައި އިންގޮނޑީގައެވެ. އަމީރާ ނުބުނި ކަމުގައި ވީ ނަމަވެސް އެ މޫނުމަތީން ކޮންމެވެސް ވަރެއްގެ ވަރުބަލިކަމެއް މަޖުދާއަށް ފާހަގަވީއެވެ.

”މިއޮތީ ކީއްވެފަ އޮތް މީހެއް؟“ މޭޒުމަތީގައި ބޯ އަޅައިގެން އޮތް މީރާންގެ އިސްތަށިގަނޑަށް ދަމާލަމުން އިޔާން އިށިންދެލީ އަމީރާގެ ގާތުގައެވެ. މީރާން ބޯ ހިތްލާލާފައި ގޮނޑީގެ ލެގޭބަޔަށް ހަށިގަނޑު ދޫކޮށްލިއެވެ. އޭރު އޭނާގެ ބަނަވެފައިވާ މޫނު ފެނި އިޔާން ނިތް އަރުވާލިއެވެ. އެހެން އިނދެ އިތުރު މީހަކަށް ފަހުމް ނުވާނެހާ ސިއްރުން އަމީރާގެ އަތުގައި ހިފާލިއެވެ. އަމީރާ ބަލައިލުމުން އިސްޖަހައިލައިގެން އިނދެ ވެސް އިޔާން ރައްދުކޮށްލީ ފިރިހެންވަންތަ ހިނިތުންވުމެކެވެ. ލަދުރަކި ހީލުމެއްގެ އަސަރް އަމީރާގެ ތުންފަތް މަތިން ފެނިލިއެވެ. ނަމަވެސް ކުރިމަތީގައި މަޖުދާއާއި މީރާން ތިބުމުން ޖެހިލުންވެފައި އިނދެ އިޔާންގެ އަތުން އަތް ދަމައިގަތެވެ.

”އޯ ލެވެލް ނަތީޖާ ލިބިއްޖެ .. އެންމެ މާއްދާއަކުން ފިޔަވައި ހުރިހާ މާއްދާއަކުން އޭ ސްޓާރ.. އެހެންވެ  އެއިނީ މަތިމަރުވެފަ“ އިޔާންއަށް ކޮފީ ތައްޓެއް ކައިރިކޮށްލަދެމުން، މީރާންއަށް ވެފައި އިންގޮތް މަޖުދާ ކިޔައިދިނެވެ.  މީރާން ތުންފިއްތާލިއެވެ.

”ކޮން މާއްދާއަކުން ނުލިބެނީ؟“ އިޔާންގާތައް ހިނި އަންނަ ގޮތްވެފައި އިނދެ އަހާލިއެވެ.

”ފަރަންޖީންނަކަށް ދިވެއްސެއް ނޭނގޭނެއެންނު.. ދިވެހިން ސީ އެއް ހޯދައިގެން އައިސް އެއިނީ“ މަޖުދާ ބުނެލިއެވެ. ހިފަހައްޓަން އުޅުނު ނަމަވެސް އިޔާންއަކަށް ހިނިގަނޑު މަތައެއް ނުކޮށްލެވުނެވެ. ލޮލުން ފެން އަންނަންދެން ހުނެވެ. މަޖުދާ ވެސް އިޔާންއާއި ބައިވެރިވެގެން ހެމުންދާތީ މީރާންގެ މޫނު ވަކިން ބަނަވިއެވެ. ފައިން އިޔާންގެ ފަޔަށް ހަމަލާއެއް ދިނެވެ.

”ހޫންން ވަރަށް މަޖާ..އިޓް ހާޓްސް މޯރ ދޭން އަ ބްރޭކްއަޕް“ އިޔާންގެ އަތުގައި އިން ކޮފީ ޖޯޑު ޖަހައިގަނެގެން ބޯންފެށިއެވެ.

”ބްރޭކް އަޕޭ؟ މަޑުކޮށްބަލަ… މަށާއި ސިއްރުން ކިތަން މީހުންނާ މީރާން މައްލަވަ ކޮށްފިން؟ މީ ދޯ މީނަ ކިރިޔަ ކިރިޔާ ފާސްވި ސަބަބުން“ ވައި ރޯޅިއެއްހާ ހަލުވިމިނުގައި މަޖުދާ އައިސް ހުއްޓިލީ މީރާންގެ ގާތުގައެވެ. “ ބުނޭ! ކާކާއި ރައްޓެހި ވެގެން ތިއުޅެނީ؟“ ބަލާކަށް ނުހުރެ އިސްތަށިގަނޑުގެ ބުޑުގައި ހިފައި ދަމާލިއެވެ.

”އާތްތް މަންމާ.. ތަދުވެއޭ.. ނުދައްކަމޭ މީހަކާ ވާހަކައެއް.. މަންމަ ވެސް ދޯ.. އަނގައޮޅިގެން އެހެން ބުނެވޭ ކުށްބަހުގަ ހިފާ ނުދަމަބަލަ.. ފުރަތަމަ ބޮލުން ދޫކޮށްލާ.. ލޭ ވެސް ނާންނަކަމެއް ނޭނގެ “ މަޖުދާ ދޫކޮށްލީ އެތައް ފަހަރަކު މީރާން ވާހަކަ ނުދައްކަމޭ ބުނުމުންނެވެ. އޭރު މުޅި ބޮލުގައި ތަދެއް ހިފާލާފައި ހުއްޓެވެ. ދޫކޮށްލި ނަމަވެސް މީރާންގެ ޥާހަކަ ގަބޫލް ކުރި ހެންނެއް ހިއެއް ނުވެއެވެ. މަޖުދާ އަދިވެސް ހުރީ ދެލޯ އަޅާލައިގެން މީރާންގެ މޫނަށް ބަލަހައްޓައިގެންނެވެ.  މީރާން ވެސް އެ މަންޒަރު ފެންނަ ކަމަށް ހަދާ ނުލާ އިނެވެ.

”ދެން ބުނެބަލަ ކިހިނެތް ތަ ވީ .. އެހާ ބޮޑަށް އޭގެން ދަށް ވީ“ މަޖުދާ އާ ކޮފީ ތައްޓެއް ގެނެސްދިނުމުން އޭގައި ތުންޖަހާލަމުން އިޔާން އެއްސެވެ. މަޖުދާއާއި މީރާން އުލެމުން ދިޔަގޮތުން ހެވިފައި އަމީރާ ވެސް އިނެވެ.

”ހަމަ އުނދަގުލީ.. ނޭނގޭ ދިވެހި ގަޑި ޖެހުނަސް ފާޑެއްގެ ފޫއްސެއް ވެފަ އިންނަނީ.. ދޮންބެމެން ކިޔެވިއިރުގަ ހެންނެއް ނޫނޭ މިހާރު..ހާދައޭ އުނދަގުލީ “

”ދޮންބެއޭ؟ ދޮންބެ އޭ ބުނަން މީރާން ލަދު ގަންނަން ޖެހޭނެ.. ދޮންބެ އެއީ ހުރިހާ އެއްޗަކުން އޭ ސްޓާރ ގެނައި ކުއްޖެއް.. ކޮންމެ ޒަމާނެއްގަ ވެސް އެމީހަކު ކިޔެވި ވަރަކުން ދޯ ނަތީޖާއަށް ބަދަލް ގެނެވޭނީ.. މަންމަ ހަނދާން އެބަހުއްޓޭ ދޮންބެ ގެ ޕޭރެންޓް މީޓިންތަކުގަ ޓީޗަރުން ދެއްކި ވާހަކަ އަދިވެސް.. ދުވަހަކު ވެސް ނީވޭ މީރާންއާއި އެކު ދާއިރު ޓީޗަރުން އެބުނާ ކަހަލަ ވާހަކަ އެއް.. ޕޭރެންޓް މީޓިންގ އޮންނަ ދުވަސްތަކުގަ ހިތައް އަރާ ބިންފަޅާ އަޑިއަށް ދާނެނަމައޭ.. ލަދުން ހަލާކު…  މާ ބޮޑަ ކްލާސްތެރޭގަ އެކްޓިވް ވެގެން، ސަކާރަތް ޖެހުން ވަރަށް ބޮޑަށް މަދުކޮށްލަން ޖެހޭ ކަމަށް މީރާން ގާތު ނުބުނާ ފަހަރެއް ނުދޭ… ނޫނީ ކޮންމެވެސް ޓީޗަރަކު ކަމު ނުގޮސްގެން މީރާން ޝަކުވާކޮށްގެން، އެ ޝަކުޥާ ޓީޗަރުން އައިސް ކުރަނީ މަންމަ ގާތު .. ނޫނީ ސްޕާރީ ކައިގެން އެ ޝަކުޥާ… ސަހާދަތް މިބުނީ ..ހުސް ޝަކުވާ“ މަޖުދާ ހިތްހަމަ ނުޖެހިފައި އިނދެ ވާހަކަ ދެއްކިއެވެ.

”ޗިލް މަންމާ… ދެން ނީވޭނެއޭ“ މީރާން ހެވިފައި އިނދެ ބުނެލިއެވެ. އޭރު އިޔާންއަށް އާއި މަޖުދާ އެކުއެކީގައި ’އޭލެވެލް‘ ނުކިޔަވާނަން ތޯ ސުވާލް ކުރަންފެށިއެވެ.

”އައްޗި މަށެއް ނޫޅެން އޭލެވެލް ކިޔަވާކަށް ރާއްޖެއަކުން.. މާހިރު ދޮންބެމެން ކައިރިއަށް އޮސްޓްރޭލިއާ އަށް ދާނީ..“ ފޮނިވެލާފައި މީރާން ޖަވާބު ދިން ގޮތުން މަޖުދާގެ މޫނުމައްޗަށް ވެރިވެފައިހުރި ހުރިހާ ރުޅިއެއް ފިލައިގެން ދިޔައެވެ. އުފާވެރިކަމާއި އެއްވަރަށް ދެލޯ ވެސް ފެންކަޅިވެގެން ދިޔައެވެ.

”ހިތްމޮޅު ވެސް މީހެއް މި.. ނަސީބެއް އެކޮޅަށް ދާން ހިޔާލްކުރިކަން ވެސް… އާހްހް އައި މިސް ދެމް“ އިޔާން ހީލީ މައުނަވީ ގޮތަކަށެވެ. ބޯޖަހާލަމުން މީރާން ވެސް ހީލިއެވެ.

”ދެން ދަރިފުޅު ވެސް ގޮސް އެކޮޅުގަ ހަރުޖަހާނީ އެއް ނޫން.. އޮސްޓްރޭލިއާއަށް ދާ އެންމެން އެތާގަ ހަރުޖަހަނީ.. މަ“ އެހިސާބަށް ބުނެވުނު ތަނާހެން މަޖުދާގެ އަޑު ކުރެހިގެން ދިޔައެވެ. ދެލޮލުން ފެން އައިތަން ފެނި މީރާންއަށް އިންތާކު ނީނދެވުނެވެ. މަންމަގެ ގާތައް ދިޔައެވެ.

”މަންމާ ދެރަވީތަ.. އަންނާނަމޭ ކިޔަވައިގެން.. އަދި މިއުޅެނީ ނުވެސް ދެވިގެން.. އެހާ އަވަހަށް ދެރަވީމަ ކިހިނެތް ވާނީ“ މޫނުމަތިން ނުދެއްކި ނަމަވެސް މީރާންގެ އަޑުން މޮޅިވެރިކަން ހާމަވެއެވެ.

”އެބުނާހެން މަންމާ ހާސް ނުވެބަލަ.. ކިޔަވާ ނިމިގެން އެތާގަ އޭނާ މަޑުކުރިޔަކަ ނުދޭނަމޭ.. ހަމަ އަންނަން ޖެހޭނީ..“މަޖުދާގެ ތަބީއަތު ބަދަލްވެގެން ދިޔައީ ކީއްވެކަން އިޔާންއަށް އެނގެއެވެ. އެވާހަކަ އެހާ ބޮޑަށް ދެއްކުނު މޮޔަވެސް ހީވިއެވެ. މަޖުދާގެ ދެލޯ ފުހެލި ނަމަވެސް އަދިވެސް ފެންކަޅިވެފައި ހުރިތަން ފެނި އިޔާން ވެސް ތެދުވެގެން ގޮސް އޭނާގެ ގައިގާ ބައްދާލިއެވެ.

”މަންމަ އޯކޭ އޭ.. “ މީރާންގެ މޫނުމަތިން މާޔޫސްކަން ފެނުމުން ހަމަޖެހިލަމުން މަޖުދާ ހީލިއެވެ. އެނބުރި ނީޝަންއާއި ރީއާ އައުމުން މަޖުދާ ދެން އުޅުނީ ރީއާ އުރައިގެންނެވެ. ބޭރުން ނަދީމްގެ އަޑު އިވުމުން މަޖުދާ ނުކުތެވެ.

”އެ އޯކޭ ވާނެ.. މަންމަ ހަމަޖެހޭނެ..ކުއްލިއަކަށް އެވާހަކަ ދެކެވުނީމަ އެހެން އެވީ“ މީރާންގެ މޫނުމަތިން ފެނުނު މާޔޫސް ކަމުން އިޔާން ވާހަކަ ދެއްކިއެވެ. އިރުކޮޅަކުން އޭނާ ފަނޑުގޮތަކަށް ހީލިއެވެ.

”ކުރިން ވެސް ހީވި މިވާހަކަ ބުނީމަ ވެގެން ދާނީ މިކަހަލަ ގޮތެއްކަން.. މަންމަ ދެރަވަންޏާ މަޑުކޮށްލާނީ“

”އެހާ ބޮޑަށް ނުވިސްނަބަލަ.. ރަނގަޅު ވަގުތަކުން ދޮންބެ ވާހަކަ ދައްކާލާނަމޭ.. ހަމަޖެހިގެން އެކަހަލަ ވާހަކައެއް ފެށީމަ އޯކޭ ވާނީ.. މީރާންއަށް އެނގެއެއްނު އޮސްޓްރޭލިއާއަށް ވުރެން މަންމަ މާ އުފަލުން އާންބަސް ބުނާނެކަން އެމެރިކާ ކަހަލަ ތަނެއް ވެސް.. އައިލް ޓޯކް އޭ“ މީރާންގެ ކޮނޑުގައި ޖަހާލަމުން އިޔާން ތެދުވެލީ ނަދީމްގެ ގާތައް ދިޔުމަށެވެ. ދަމުން މީރާންއަށް ނުފެންނަ ހެން އަމީރާއަށް ބަލާލަމުން ’ފްލައިންކިސް’އެއް ފޮނުވާލިއެވެ.

”ޔޫ ކެން ކިސް ހާރ … ދުރުން ވައްތަރު ނުޖެއްސިޔަސް“ މީރާން ފަސް އެނބުރި ބަލައިލީ އޭނާއަށް އެ މަންޒަރު ފެނުނުކަން އަންގާލުމުގެ ގޮތުންނެވެ. އަމީރާގެ މުޅި މޫނު ރަތްވި އިރު އިޔާންގެ ގާތައް އައީ ލާނެތް ހިންޏެވެ.

”އޯކޭ“ ދޮރު ކައިރީގައި ހުރެފައި އެނބުރި އައިސް އަމީރާގެ ކޯތާފަތުގައި ނުހަނު ލޯބިން ބޮސްދީފައި ދިޔައެވެ. އިޔާން ލޯމަތިން ގެއްލުނު އިރު ވެސް އަމީރާއަށް އިނދެވުނީ ބަލަހައްޓައިގެންނެވެ. ކުރިޔަށް ވުރެން ބޮޑަށް ލަދުގަތެވެ.

”އައި ސްވެއާރ އިޔާން.. މިގަޑީގަ އަޅެ ފެއިންޓް ވާނެނަމަ ކިހާ ރަނގަޅު“ އިސް އުފުލާލިއިރު މީރާން ހެވިފައި އިންގޮތް ފެނި އަމިއްލަ ނަފްސަށް އިވޭ ވަރަށް އަމީރާއަށް ބުނެވުނެވެ. އިޔާންގެ ތުންފަތް އިހްސާސް ކުރެވުނު ހިސާބުގައި އަތުގެ ނުފުށުން އަތް ބީއްސާލެވުނެވެ.

”ހައު ޑިޑް ޔޫ ނޯ .. މްމްމް.. އެބައުޓް އަސް“ ނުތަވަސް ހިނިތުންވުމެއްގައި އަމީރާ ސުވާލްކޮށްލިއެވެ. މީރާން ޖަހައިލީ ހިނިގަނޑެކެވެ.

”ސޫން ޔޫ ވިލް ނޯ“ އަމީރާގެ މޫނަށް ވާގޮތުން ހެވިދާނެތީ ސަހާދަތް އިނގިލިން ދެތުންފަތް ހުރަސްކޮށްލަމުން މީރާން ޖަވާބުދިނެވެ. ބުނާށޭ ބުނާފަދައަކުން އަމީރާ ދެލޯ ހަނިކޮށްލައިގެން އިނދެ ނިތް އަރުވާލުމުން، މީރާން ދެފަރާތައް ބޯހޫރުވާލީ ނުބުނެވޭނެއޭ ބުނާ ފަދައަކުންނެވެ.

”އޯކޭ.. އިޔާންގެ ފޮނިކަން ހަމަ.. އެނީވޭސް ދައްތަ ކީއްވެތަ އޮސްޓްރޭލިއާއަށް ދާ ވާހަކަ ބުނީމަ އެހާ ދެރަވީ“ ހިތުގައި އުފެދު ސުޥާލް އަމީރާ ކޮށްލިއެވެ.

”ދޮންބެ ނުބުނުނޭތަ؟“ ހައިރާންވެފައި ހުރެ މީރާން އެހިއެވެ. އަމީރާ ބޯޖަހައިލިއެވެ.

”މަންމަގެ ފެމެލީ ވަރަށް ބޮޑުވާނެ..  އެންމެ ބޭބެ އެއް ހުންނާނީ.. ދެން ހުސް ސިސްޓާރސް.. އެ އެންމެން އުޅެނީ އެކޮޅުގަ.. އަހަރެމެންގެ ކަޒިންސްތައް ވެސް މިކޮޅުގަ ތިބި އެންމެން ދަމުން ގޮސް ވަރަށް މަދު މީހަކު މިހާރު ތިބީ.. ދުރުގަ  ތިއްބަސް ވަރަށް ކްލޯޒްވާނެ އެންމެން ވެސް.. އަނެއްކާ ދޮންތަ ކިޔަވަން ގޮސް އެކޮޅުގެ ކުއްޖަކާ ރައްޓެހިވީ.. އެކަމާއި ވިސްނަމުންގޮސް މަންމަ ވަރަށް ސަކަރާތްވި.. ފަހުން ދޮންތަ އެކުއްޖާއާއި ރުޅިވި އެކަމަކު ކިޔަވާ ނިމުނުތަނުން މަންމަ ރޯވަރުން ބައްޕަ އެހެންވެ ގެނައީ.. މަ ދާ ވަހަކަ ބުނީމަ އެހެންވެ މަންމަ އެޙާ ދެރަވީ ..“

”އޯހްހް.. އެހެންވެ ދޯ ދައްތަ ކުރި ދުވަހަކު އެބުނީ ފެމެލީ ގެޓްގެދާރ އެއް ނުބޭއްވޭނެ އޭ ދުވަހަކުވެސް.. “

”ޔާހް.. ބައްޕަގެ ފެމެލީއެއް ނީންނާނެ.. ބައްޕަ އެއީ އޮންލީ ޗައިލްޑް.. ދެން މަންމަގެ ސައިޑް އިންނާނީ.. ވަން ބްރަދާރ އެންޑް ސެވެން ސިސްޓާރސް“ މީރާން ކިޔައިދިނެވެ. އަމީރާއަށް ބޯޖަހައިލެވުނެވެ. މުޅިން އައު މައުލޫމާތެއް ލިބުނު އިރު އަމީރާ އިނީ އެމީހުންނާއި ބެހޭގޮތުން އެނގެން ބޭނުންވެފައެވެ. މީރާންގެ ގާތު  ސުޥާލްކުރަންފެށިއެވެ.

***

”ކޮބާތަ ދަރިފުޅު ދައްކަން އައި ވާހަކަ؟ ހެނދުން ސުރެން މިނެޓަކު ދެފަހަރު ގުޅާފަ އަންނަ އިރެއް ބެލި.. މިހާރު ކީއްވެ އަނގައިން ނުބުނެ ތި އިންނަނީ..“ ނަދީމް އަހައިލިއެވެ. އިޔާން އިނީ މަޖުދާ ވެސް އެވަގުތު އިނުމުން އެވާހަކަ ފަށަން ޖެހިލުން ވެފައެވެ. ނަމަވެސް މީރާން  ދެންމެ ދެއްކި ވާހަކައިން މަޖުދާ ދެރަވެގެން އައުމުން އަނެއްކާ ވެސް ފޮނުވާލައިފިނަމަ އިތުރަށް ދެރަވެދާނެތީ އެހެން ހަދާކަށް ނުކެރުނެވެ.

ސޯފާގައި އިނދެ ރަނގަޅަށް ހަމަޖެހިލިއެވެ. އިރުކޮޅަކު ވިސްނުމަށްފަހު ބަސްތަކެއް އެއްކޮށްލުމަށްފަހު ވާޙަކަ ފެށިއެވެ.

”މީ..ހައިކަލްބެ ގެ އަންހެން ދަރިފުޅުގެ ކޭސް ފަށައިގެން މިއުޅެނީ..ވަރަށް ގިނަ ކަންކަން ބަލަމުން މިދަނީ.. ބައްޕައަށް އެނގިފަ އެބަ އޮތްތަ ހައިކަލްބެ އެއްވެސް ދުޝްމަނެއް ހުރިކަމެއް؟“  އިޔާން އަހައިލިއެވެ.

”ނޫނޭ.. ހައިކަލް ނުގުޅޭ މީހަކު ނުހުންނާނެ.. އެންމެންނާ ވެސް ވަރަށް ގާތްކޮން ވާހަކަ ދައްކާނީ.. ކިހިނެތް ވީ ؟ މީހަކު ބުނީތަ އެއްޗެކޭ؟“ ޒާތަކައް ބަލަހައްޓައިގެން އިނދެ ނަދީމް އަހައިލިއެވެ. ނަދީމްގެ ނިތައް އަރާފައި ރޫތަކާއި އެކު ދިޔައީ އިޔާންގެ ޖަވާބަކަށް އިންތިޒާރު ކުރަމުންނެވެ.

”ހީވޭ ކަމެއް އުޅޭހެން.. ރަނގަޅު ވާނެ ދޯ ޑީޓޭއިލް އަށް ނުދިޔަސް؟ ހުރިހާ ވާހަކައަކީ އާއިލާއަށް ހިއްސާ ކުރެވޭނެ ވާހަކަ ތަކެއް ނޫން.. މިހެން މިބުނީ ޕޮލިސް ކޭސްއެއް ވީމަ.. ބައްޕާ. ނުފޮރުވާ  ކިޔައިދީފާނަންތަ އެއްވެސް އިރެއްގަ ހައިކަލްބެ އާއި އެއްވެސް މީހަކު ދުޝްމަނުކަމެއް ހިނގާފަ އޮތިއްޔާ އެވާހަކަ؟“ އިޔާން އަހާލިއެވެ.

”ހީވާ ގޮތުން ދަރިފުޅަށް ކޮންމެވެސް ކަމެއް ފެނިގެން ދޯ ތިއުޅެނީ؟“ ނަދީމް ބަލަމުން ދިޔައީ ޖާސޫސްކުރާ ފަދައަކުންނެވެ. ފުންނޭވާއަކަށް ފަހު އިޔާން ބޯ ޖަހައިލިއެވެ.

”އިޔާން އަހަން ތި އުޅެނީ، ސާދިގްގެ ވާހަކަ ތަ؟“ އެހާ ސީދަލަށް ނަދީމް އެހެން އެހުމުން އިޔާން ހިސާބަކަށް ސިހުނެވެ. އަވަސްއަވަހަށް ބޯޖަހައިލެވުނެވެ. އެހިނދު ނަދީމްއަށް ބަލައިލެވުނީ މަޖުދާގެ މޫނަށެވެ. ދެމީހުންގެ ބައްދަލްވި ނުތަނަވަސް ނަޒަރުން މާނަކުރަންވީ އެއްޗެއް އިޔާންއަކަށް ނޭނގުނެވެ.

”ދެދުވަހެއް ކުރިން ސާދިގް ގުޅި ބައްޕައަށް.. ބައްދަލްކުރަން އެދުނީމަ ދިޔައިން.. ފުރަތަމަ ވެސް ބައްދަލްކުރީ ވަރަށް ހިތްހަމަ ނުޖެހިފައި ހުރެ … ވީ ކީއްކަމެއް ނޭނގޭތީ ސުވާލް ކޮށްލީމަ ބުނި ހައިކަލްގެ އަންހެންދަރީގެ ކޭސް އިޔާން އަލުން ނެގި ވާޙަކަ … އިޔާން މަގާމު މަތިވި ފަހުން ފުރަތަމަ ފަހަރޯ  އޭނާއަށް ނާންގާ ކަމެއް ކުރަން އެ ފެށީ.. އެވެސް އެ ކޭސް.. ކީއްވެހޭ އެހީ އިޔާން އަނެއްކާ ކޭސް ރި އޯޕެން ކުރަނީ.. ދެން ބައްޕައަކަށް ދޭނެ ޖަވާބެއް ނޭނގުނު.. އޭގެ ފަހުން އެކަހަލަ ވާހަކައެއް އިޔާ ނުދައްކާތީ އަދި ހީކޮށްގެން މިހުންނަނީ އެކަމާއި ނޫޅެވެނީއޭ“ ނަދީމް ކިޔައިދިނެވެ. އެވާހަކަ ތަކުން އިޔާން ހައިރާންވިއެވެ. ދެދުވަސް ކުރިން ނަދީމްއާއި ސާދިގް ބައްދަލްކުރި ވާޙަކަ ބުނި ހިނދު ހަނދާން ވީ، އިއްޔެ އޭނާއާ އިޔާން ބައްދަލްވި ހަނދާނެއެވެ. އޭރުވެސް އެއްވެސް ކަހަލަ ތަފާތު އަސަރެއް ސާދިގްގެ މޫނަކު ނުވެއެވެ. ޙީކޮށްގެން ހުރީވެސް އެއިންކަމެއްގެ ހިލަމެއް ސޯދިގްއަށް އަދި ނުވެ އޮތީ ކަމުގައެވެ. ނަމަވެސް އޭނާގެ ހީ ގޯސްވީތާއެވެ. އިޔާންގެ ނިތައް ބާރުވެލިއެވެ. ނަދީމް ގާތު ހިތްހަމަ ނުޖެހިގެން ވާހަކަ ދައްކާފައި އޭނާގެ ގާތުގައި އެކަމާއި ގުޅޭ ސުވާލެއް ނުކުރީ ކީއްވެބާއެވެ. ސާދިގްގެ އަމިއްލަ ދިރިއުޅުމުގެ ވާޙަކަ ތައްވެސް އޭނާއާއި ހިއްސާ ކުރެއެވެ. ސާދިގްއާއި މެދު އިޔާންގެ ހިތުގައި އުފެދިފައިވާ ޝައްކަށް އިތުރު ބޮޅެއް އިތުރު ވިއެވެ.  ކަމެއް ނުފޮރުވާނަމަ އިޔާންއާއި ކުރެން ނާހާ ނުހުންނާނެތާއެވެ. އެހެން ނޫނަސް އެ މައްސަލަ އަލުން ބަލަން ހުޅުވާލީ ނަދީމްއެއް ނޫނެވެ. އަދި ޕޮލިހުގައި މަސައްކަތް ކުރަނީ ވެސް ނަދީމެއް ނޫނެވެ. އެކަމާއި ގުޅޭގޮތުން ނަދީމްގާތައް ދާކަށް ނުވެސް ޖެހޭނެ ނޫންހެއްޔެވެ.

”ބައްޕާ ސުވާލެއް ކޮށްލަންތަ؟މީ..“

”ފަށާބަލަ ޖަވާބުދޭނަމޭ“ ފަށާފައި ވެސް އިޔާން ވާހަކަ މެދު ކަނޑާލުމުން މަޖުދާއަކަށް ވެސް ނީނދެވުނެވެ.

“ ސާދިގްއާއި ބައްޕަ އެހާ ގާތް އިރު، މަށައް ޔަގީން ހައިކަލްބެއަށް ބައްޕަ އެހީވާން ނޫޅެ ނުހުންނާނެކަން.. ދޯ؟“ އިޔާން އަހައިލިއެވެ. އެ ޖުމްލައިން ނަދީމްގެ މޫނުގެ ކުލަ އޮއްސިގެން ދިޔައެވެ. އިސްޖަހައިލި ގޮތައް މީހާ ހަމަހިމޭން ވިއެވެ.އިޔާން ހައިރާންވީ މަޖުދާ ވެސް އިންތަނުން ތެދުވެގެން ދިޔުމުންނެވެ.

”ބައްޕައާއި ދެމީހުން ވާހަކަ ދައްކާލަ“ މަޖުދާ ނުކުމެގެން ދާން ފެށުމުން އިޔާން ނިތްއަރުވާލުމުން މަޖުދާ ބުނެލީ ހަމައެކަނި އިޔާންއަށް އިވޭހާ މަޑުންނެވެ. އެންމެ ރަނގަޅުކަމަށް ބުނެ ބޯޖަހައިލަމުން އަނެއްކާ ވެސް ބަލައިލެވުނީ ނަދީމްއާއި ދިމާލެވެ.

”ހިސާބަކަށް ލަދުވެސް ގަނޭ ދަރިފުޅު ކައިރީގަ މިވާހަކަ ދައްކަން.. މްމްމް.. ސާދިގްއާއި ހައިކަލް ދެމެދުގައި ހިނގި ކަންތައް ގަނޑެއް.. އެތާގަ ގޯހީ ސާދިގް … ހައިކަލްގެ ކުށަކުން ވީ ކަމެއް ނޫން، އެކަމަކު ވެސް ހައިކަލް އިސްވެ މާފަށް އެދި އަލުން އެކުވެރިކަމަށް އަތް ދިއްކޮށްލި… ދެން ބޮޑާ ހާކާލާފަ ސާދިގް އެއަތަކު ނުހިފި.. އަދި އަދަށް ދާންދެން ވެސް ދުޝްމަނުކަން ބަނދެގެން އެހުންނަނީ ސާދިގް.. ހައިކަލް ނުހުންނާނެ ކަމެއް ހިނގިޔަސް އެކަމެއް ހިތުގަ ބާއްވައިގެންނެއް ، މިއީ ވީ ގޮތަކީ.. އެހެންވެ ބައްޕަ އެތައް ފަހަރު ކުރި މަސައްކަތުން ވެސް ކާމިޔާބެއް ނުވި…ވަރަށް އާދޭސް ކުރިން ބައްޕައަށް ޓަކައިވެސް އެ ކޭސް އަލުން ހުޅުވާ އެ ކުއްޖާ ހޯދަން އެހީވުމަށް.. އެކަމަކު ކޮންމެ ފަހަރަކު ސާދިގް ބުނަނީ ތިމަންނައަކަށް ނުވާނެއޭ އެކަމެއް..އެއީ  ތި މަންނަ ކޮށް އުޅޭ މަސައްކަތެއް ނޫނޭ.. ދެން ކިހިނެތް ހަދާނީ.. އެތައް އަހަރަކު އެ ގަނައިގެ ތެޅެފަ ބައްޕައަށް ހިންދަމާލެވުނީ އިޔާގެ މަގާމު މަތިވެ،އެކަމަށް އާންބަސް ބުނި ހިސާބުން“

”ވެއިޓް ބައްޕާ.. ސާދިގް ބުނީ އޭނާގެ މަސައްކަތެއް ނޫނޭ ތަ؟އަހަންނަށް ވެސް އެނގޭ އެއީ އޭނާ އެބުނި ހެން އޭނާގެ މަސައްކަތެއް ނޫންކަން .. އެކަމަކު ރިޖެކްޓެޑް ތައްގަނޑާއިއެކު ދިހަ ފަހަރު މައްސަލަ ބަލަން އަލުން ހުށައެޅި ހުރިހާ ޑޮކްސް އެއްގެ ހުރީ އޭނާގެ ސޮއި އާއި ނަން! ކީއްވެބަ؟“ އިޔާންއަށް އެހުނެވެ. އޭނާއަށް އިނދެވުނީ ވިސްނަންވީ ކޯއްޗެއްކަން ވެސް އޮޅިފައެވެ.

އިޔާންގެ ވާހަކައިން ނަދީމްއަށް ލިބުނު ޝޮކުން ކީކޭހޭ އަހާލެވުނެވެ. އަނގަހުޅުވިފައި އިނދެ ބަލަހައްޓާއިގެން އިނދެވުނެވެ.

”ޔާހް.. އެހެން ނުބުނަން ވެގެން މިހުރީ.. އެކަމަކު ތިބުނި ވާހަކަ ތަކުން ހަމަ ނުހުރެވިގެން މި ބުނެވުނީ.. އެކަމަކު މިއިން އެއްވެސް ވާހަކައެއް ހައިކަލްބެ ކައިރީގަ އަދި ނުބުނައްޗޭ.. އެއީ އެތަނުގެ އތެރޭގެ ލިއުނތަކެއް ވީމަ އެއިން އެއްޗެއް އާންމުންގެ މީހަކަށް ނުފެންނާނެ..ހައިކަލްބެއަށް ވެސް ފެނިފަ ހުންނާނީ ރިޖެކްޓް ކުރިކަމަށް ފޮނުވި އީމެއިލްއެއް“ އިޔާން އާދޭހުގެ ރާގެއްގައި ބުނެލިގޮތުން ނަދީމް ބޯޖަހައިލިއެވެ. އެކަމަކު ނަދީމްގެ ހިތުގެ ހަމަ ޖެހުމުން ގެއްލިއްޖެއެވެ. މާޒީގައި ހިނގި ހާދިސާގެ ބަދަލް ހިފަން ސާދިގް އުޅެނީބާއޭ ހީވެ ހިތް ނުތަވަސްވަމުން ދިޔައެވެ.

”ބުނެދެވިދާނެތަ ކިހާ ވަރެއްގެ ކަމެއް ކަން އެދެމީހުންގެ މެދުގަ ހިނގީ؟“

އިޔާން އެދުނެވެ. ނަދީމް ބޯޖަހައިލީ އެކަމުން އިޔާންގެ މަސައްކަތައް ކުރިއެރުމެއް ލިބިދާނެކަމަށް ވިސްނުމުންނެވެ.

”ކުރުގޮތަކަށް ބުނާނަމަ.. ހައިކަލްއާއި ސާދިގް އެއީ ދެބެންގެ ދެދަރިން… ހީވެސް ނުވޭ ދޯ؟“

ނަދީމް ބަލައިލި އިރު އިޔާންއިނީ ހުއްޓުން އަރާފައެވެ. އެއީ އިޔާންއަށް މުޅިން އާ ހަބަރެކެވެ.

”އެކަމަކު އެހާ ގާތެއް ނުވާނެ އުޅޭ އުޅުމަކުން.. ސާދިގް ހުންނާނީ ހިސާބަކަށް ހަސަދަ ލާފަ، ހުރިހާ ގޮތަކުން ވެސް ހައިކަލް ކުރީގަ އުޅޭނީ.. ސިފަޔަށް ބެލިޔަސް ކިޔެވުމަށް ބެލިޔަސް .. އަނެއްކާ ދެން ދެމީހުންނަށް ކަމުދިޔައީ ވެސް އެއް އަންހެން ކުއްޖެއް.. އެދުވަސްވަރު ބައްޕަޔާ ސާދިގް އެކުވެރިންނަށް ވީ.. އޭގެ ކުރިން ވެސް ސުކޫލު ދައުރުން ސުރެން ބައްޕައާ ހައިކަލް މީ ގާތް އެކުވެރިން، ވިޝާމްއާއި އިޔާ ހެން…. ބައްޕަޔާއި ސާދިގް ރަހްމަތްތެރިވި ހިސާބުން ހަސަދަ އެއްފަރާތް ކޮށްލާފަ ސާދިގްވެސް ހައިކަލްއާއި އެކުވެރިކަން އާލާކުރި.. އޭގެ އަހަރުތަކެއް ފަހުން ކިޔަވާ ނިމިގެން ރާއްޖެއައިސް ގިނަ ދުވަހެއް ނުވެ ސާދިގް ކިޔަން ފެށީ އަންހެންކުއްޖަކު ކަމުދިޔަ ވާހަކަ .. އެކަމަކު ނަމެއް ނުބުނޭ ސިފައެއް ކިޔައެއް ނުދޭ.. ވަގުތު ޖެހުމުން ބުނާނެކަމަށް ބުނީ… ހަމަ އެދުވަސްކޮޅު ހައިކަލް ބުނި، އޭނާގެ ބައްޕަ ހަމަޖައްސައިފިއޭ އޭނާގެ ކައިވެނި .. ދަރިފުޅުމެން ކިޔާ ގޮތުންނަމަ އެރޭންޖް މެރިއޭޖް އެއް.. އެ އަންހެން ކުއްޖާއާއި ބައްދަލް ކޮށްފީމޭ.. ވަރަށް ކަމުގޮސްގެން އުޅުން…އެގޮތުގައި މަހެއް ފާއިތުވީ ފަހުން ހައިކަލް ބުނި ތިމަންނަ ލޯބިވެއޭ އެ އަންހެން ކުއްޖާ ދެކެ.. އޭރުވެސް ސާދިގް ހަމަ ކިޔާ އޭނައަށް ފެނިގެން އުޅޭ އަންހެންކުއްޖާގެ ވާހަކަ..އެކަމަކު ސާދިގް ނޫޅުނު ދައްކާކަށް.. އެގޮތުގައި ހައިކަލްގެ ކައިވެނި ކުރެވެން ހަފްތާއަކަށް ވެއްޖެ ..އެދުވަހު އެގެޔަށް ބައްޕައާއި ސާދިގް ދިޔައިން އޭނާ ބުނެގެން ހެކިވެރިންނަށް ވުމަށް ފުރަން ޖެހޭ ފޯމެއް ފުރަން.. ބައްޕައަށް އާމިލާ އޭރު ފެނިފަ ވަނީ.. އެކަމަކު ސާދިގަށް އެރޭ އާމިލާ ފެނުނީ.. އެތަނުން އޭނާއަށް އާމިލާ ފެނިގެން ހުއްޓުން އަރާފަ ހުރީ .. އެންމެ ފަހުން ބަހަނާއެއް ދައްކާފަ އެރޭ އެތަނުން ދިޔަގޮތައް ކައިވެންޏަށް ވެސް ނުދިޔަ .. އެހެން އެކުވެރިއެއް ހައިކަލް ފަހުން ހޯދި ހެކިވެރިއަކަށް ވެސް..  އެ ކައިވެނި ކުރެވި ހަފްތާއެއް ވީ ފަހުން ހައިކަލްއަށް ދެން ފެނުނީ ކުރީގެ ސާދިގް .. އޭނާއާއި ނުގުޅި، އަނގަޔަކުން ނުބުނޭ.. ހައިކަލް ދެރަވެގެން ދިޔައީ އޭނާގެ ގާތައްއެގެޔަށް އެކަމަކު ފެނުނު ތަނުން ދޮރު ޖަހާފަ ދިޔައީ.. އެ ފަހުން ދިމާ ވެސް ނުވެ .. ދެން ބައްޕަ ދިޔައީ.. އެދުވަހު ދިޔައީމަ ބައްޕަ ކައިރީގަ އޭނާގެ ހިތުގަ އޮތްހާ ޝަކުވާއެއް ކިޔާލި.. އެންމެ ފަހުން އޭނަ އެންމެ ލޯބިވި އަންހެން ކުއްޖާ ވެސް ހައިކަލް ޖަހައިގަތީ ކަމުގާ ބުނީ.. އެކަމަކު ދަރިފުޅު ބުނެބަލަ މީގަ ހައިކަލްބެ ކުށެއް އެބައޮތްތަ؟ ބައްޕައަށް ޔަގީން ކައިވެނީގެ އެއްދުވަސް ކުރިން ވެސް ހައިކަލްބެއަށް އެކަން އެނގުނު ނަމަ ކިތަންމެ ލޯބިވިނަމަވެސް އާމިލާ ދޫކޮށްލީސް ކަން ..“ ނަދީމް ކިޔައިދީ ނިންމާފައި ބަލައިލި އިރު އިޔާންއަށް އިނދެވުނީއެވެ. ބުނާނެ ބަހެއް ކުރާނެ ސުވާލެއް ސިކުނޑިއަކަށް ނައެވެ. ސާދިގްއާއި މެދު ހިތުގައި އޮތްހާ އިހްތިރާމެއް ސިކުންތެއްގެ ތެރޭގައި ވަޔަށް އަރައިގެން ގޮސްފިއެވެ. ނަދީމް ބުނިހެން އޭގައި ހައިކަލްގެ ކުށެއް ނެތެވެ. އެނގިގެން ހިނގާފައިވާ ކަމަކަށް ނުވިނަމަވެސް ހައިކަލް މާފަށް އެދެން ވެސް ދިޔަތާއެވެ. ނަމަވެސް މޫނު އަނބުރާލީ ސާދިގެވެ.

އަނެއްކޮޅުން ހައިކަލް އެ މައްސަލަ ބެލުމަށް އެދިއަލުން ހުށައަޅާފައިވާ ހުރިޙާ މައުލޫމާތަކީ އެ މައްސަލަ ހުޅުވާލަން ހުރިހާ ސަރުތެއް ހަމަވާ ލިޔެކިއުންތަކެކެވެ. ނަމަވެސް ސާދިގު އެހުރިޙާ ލިޔުންތަކެއް ބާތިލްކޮށްލާފައިވަނީ ނުވެސް ގުޅޭ މަގާމެއްގައި ހުރެމެއެވެ. އެހާ ވަރުން ސާދިގް އެކަމާއި އުޅެފައިވަނީ ހައިކަލްއާއި މެދު އޮތް ނަފްރަތުގެ ސަބަބުން ހެއްޔެވެ. ކުރިއަށް ދާންވީ މަގު ކޮށުނު އިރު ސިކުނޑިގައިވި ހައިޖާނުގަނޑު ބޮޑުވެ ނުބައްދަލް މިންވަރަކަށް ސިކުނޑިއަށް ދިޔައީ ތުރާވަމުންނެވެ.

”ދެން ކިހިނެތްބާ ހަދާނީ؟“ ހިތާ ހިތާ ކިޔާލެވުނެވެ.

”ދޮންބޭ.. ދޮންބޭ.. ވިޝާމްބޭ އެ ގުޅަނީ ފޯނު ނުނަގައިގެން“ އެހެން އިންދާ ނީޝަން އައިސް ދިއްކޮށްލީ މަޖުދާގެ ފޯނެވެ. އެ ފޯނު ކަނޑާލާފައި އޭނާގެ އަމިއްލަ ފޯނުން ވިޝާމްއަށް ގުޅަމުން އިޔާން ގެއިން ބޭރަށް ނުކުންނަން ދިޔައެވެ.

”ދަރިފުޅާ ކޯޓު ގެންދާތި ވަރަށް ވިއްސާރަ..“ ގެއިން ނުކުމެ ނުކުމެ ހުއްޓާ މަޖުދާ ގޮވާލުމުން އިޔާން ބޯ ޖަހާލިއެވެ. ކޯޓު ނެގުމަށް ހޭދަވި ވަގުތުކޮޅު ވިޝާމްގެ މެސެޖެއް އައިސްފިއެވެ.

”ޑަބަލް ޑޭޓް އެއް އިނގޭ… އެމީ ގެންނާތި“ ތަބީއަތު ގޯސްވެފައި ހުއްޓާ އެ މެސެޖް ފެނުމުން އިޔާންގެ މޫނަށް ހިސާބަކަށް ހަމަޖެހުން އައިސްފިއެވެ.

***

ސަދަފް ބޭރަށް ދިޔުމުން ކޮޓަރިއަށް ވަތްގޮތައް މެންދުރު ވަންދެން ވިޝާމް ހޭދަކޮށްލީ ކޮޓަރީގައެވެ. އެއްގޮތަކަށް ވެސް މަންހާއަށް ފެންނާކަށް ބޭނުމެއް ނުވެއެވެ. ނަމަވެސް ކައިވެންޏާއި އެހާ ވަގުތު ގާތްވެފައި ވާއިރު އެގޮތުގައިވެސް އޮވެވޭކަށް ވެސް ނެތެވެ. ބާކީ އޮތީ ދެދުވަހެވެ. އަނެއްކޮޅުން ޒަންޔާއާއި ބައްދަލްކުރުމަށް އޭނާ ބުނެފައިވާ ގަޑިވެސް ޖެހެނީއެވެ.

ކަންނެތްކަމާއި އެކު އެނދުން ތެދުވެ ގޮސް  އަލަމާރި ހުޅުވާލުމަށްފަހު އަތްދިގު ޓީޝާޓަކާއި ސޯޓެއް ނަގާ ލިއެވެ. ރީތިވާ މޭޒުގެ ލޯގަނޑު ކައިރީގައި ހުރެ އިސްތަށިގަނޑު ރީތިކުރަން ފެށިއެވެ. ނުކޮށާ ގިނަ ދުވަސް ވެފައިވުމުން އާދައިގެ ވަރަކަށް ހުންނަ އޭނާގެ އިސްތަށިގަނޑު އޮތީ ފުދޭވަރަކަށް ދިގުވެފައެވެ. ކަނދުރާއާއި ހަމައަށް ފޯރައެވެ. ސަދަފްއާއި ވައްތަރުގޮތެއް ހުންނަ ކަމަށް އެންމެންހެން ކިޔާ އިރު އެ ސިފައިން ވަކިން ވައްތަރެވެ. ހިތްހަމަ ޖެހޭ ވަރުވުމުން ތިރިއަށް ފޭބިއެވެ.

”މަންމާ ހާދަ ބުރަކޮށްލައިގެން“ އާމިލާ، ޔޫވިން އުރާލައިގެން ހުރެ ކޮޅުކޮޅަށް ހަރަކާތްތެރިވަމުން ދިޔަގޮތް ފެނި ވިޝާމް ގޮވާލިއެވެ.

”މިއަދު ފެމެލީ ކުދިންނަށް ކުޑަ ކެއުމެއް ދޭން މިއުޅުނީ.. އެކަމަކު ވިއްސާރަ ކަމުން އެންމެންނަށް ވެސް އަންނަން އުނދަގޫވާނެތީ މާދަމާއަށް ލަސްކޮށްލީ… އެހެންވެ މިމީހުންނަށް މިކިޔާދެނީ މާދަމާ ވާންވާއިރަށް ގިނަ ތައްޔާރީތައް ވެފަ ބަހައްޓަން“ އާމިލާ ބުންޏެވެ.

”އެހެންތަ. އަހަރެން ހީކުރީ އެމީ އަންނަ ކަމަށް މަންމަމެންނަށް ހެލްޕްވާން.. ދޮންބެ ދައްތަ ބުނި“

”އާން.. އެކަމަކު ކޭކްއާއި ހެދި އުޅޭތީ މަންމަ ރޭގަ ބުނިން އެމީ ގާތު މަޑުކޮށްލަން .. ކިހާ އުނދަގޫވާނެ ހުރިޙާ ތާކަށް ދުވަން ވީމަ އެކުއްޖާއަށް ވެސް .. އެކަމަކު މިހާރު މާދަމާ ވިއްޔާ އެމީއަށް އާދެވޭނެ ކަންނޭގެ.. އެކުއްޖާ ގެނެސް މިގޭގަ ބަހައްޓަން ބޭނުންވަނީ“މައުނަވީ ގޮތަކަށް އާމިލާ ހިނިތުންވެލިއެވެ. އާމިލާގެ މޫނަށް ބަލަހައްޓައިގެން އިނދެފައި ވިޝާމްއަށް ވެސް ތަފާތު ހިނިތުންވުމެއް ރައްދުކޮށްލެވުނެވެ.

”.މަންމަ ދެކުނިންތަ؟“ ސިޑީން ފައިބައިގެން އައި މަންހާ ގޮވައިލީ އާމިލާއަށެވެ. އެއަޑަށް ވިޝާމްއަށް ދެލޯ މަރާލާ ފިއްތާލެވުނެވެ. ގޭތެރޭގެ ހަމަހިމޭން ކަމުން އޭނާ ހީކޮށްގެން ހުރީ އެމީހުން ވީ ކޮޓަރިތަކުގައި ނިދާފައި ކަމުގައެވެ. އެހާ ހަމަޖެހިލައިގެން އާމިލާ ގާތު އިށީންދެލީވެސް އެހެންވެއެވެ.

”މަންމަ ނެތްތަ؟ މިއޮތް ވިއްސާރައިގަ އެކަމަކު ކޮންތާކަށް އެދިޔައީ .. މިހާރު ވެސް ވާރޭ އެބަ ވެހޭ“ އާމިލާވެސް ހައިރާން ވެފައި އަހާލިއެވެ.

”ނޭނގެ.. ނިދާ ހޭލައިގެން އެ ރޫމަށް ވަތް އިރު ބޭބެ އިނީ.. މަންމައަށް ފޯނެއް އައިސްގެން ނުކުތް ވާހަކަ ބުނީ..އެކަމަކު އެ ފޯނު ނިމިގެން ވެސް އަންނަހާ އިރުވެއްޖެ“  މަންހާ ބުނެލިއެވެ. އޭނާ އައިސް އިށީންނަން ދިމާކޮށްލީ ސޯފާގައެވެ. ނަމަވެސް އެއްލި ކަޅިއަކުން އިސްޖަހައިގެން އިން ވިޝާމް ފެނި ސިހިއްޖެއެވެ. ފެންނަ ކަމަށް ވެސް ހަދާނުލާ އޭނާ އިސްޖަހައިގެން އިން އިރު މަންހާއަށް ޓަކައި އެއްވެސް ޝައުގުވެރިކަމެއް ނެތްފަދައެވެ. އޭނާ އިށީންދެލީ ވިޝާމްއާއި ޖެހިގެން އިން ސޯފާގައެވެ. ނަމަވެސް އިސް އުފުލާލާ އެންމެ ފަހަރަކުވެސް ބަލައި ނުލިއެވެ. ދެރަވީ ވީވަރުން ހިތައް ވީ ތޫނު ތަދެކެވެ. ލޮލަށް ޖަމާވި ފެންތިކިތައް ހިންދާލަމުން ވިޝާމްގެ މޫނަށް ބަލަހައްޓައިގެން މަންހާއަށް އިނދެވުނެވެ. ކައިރީގައި އާމިލާއިންކަން ވެސް ހަނދާން ނައްތާލައިގެން ފަދައެވެ.

”އިޔާ އަންނަނީ ތަ؟“ އާމިލާ އަހާލުމުން ގަދަކަމުން ވެރިކޮށްލި ހިނިތުންވުމަކާއި އެކު ވިޝާމް ބޯޖަހައިލިއެވެ.

”މަންމަ އެއްޗެއް އަހާލަންތަ؟“ އާމިލާ އަނެއްކާވެސް ސުވާލުކޮށްލުމުން ވިޝާމްއާއެކޭ ބުނުމުގެ ގޮތުން ބޯޖަހައިލިއެވެ. މަންހާ އިނުމުން އޭނާ އިނީ އަނގަހުޅުވާލަން ވެސް ބޭނުން ނުވެފައެވެ.  އެކަމަކު އާމިލާ ދެން ކުރި ސުވާލުން ވާހަކަ ދައްކަން ވިޝާމްއަށް މަޖުބޫރުވިއެވެ.

”އިޔާ އާއި އެމީ ދޯ؟“

”މްމް؟ މަންމައަށް ކިހިނެތް އެނގުނީ؟“

”އިޔާ އުޅޭ ގޮތުން ހީވީ.. އެމީއަށް ހުސްވެފަ ހުންނަނީ.. އެމީ ހުރެއްޖެޔާ އެހެން މީހަކު ކައިރީގަ އެނބުރުނަސް ނޭނގޭ ވިއްޔަ…ހަހަހަ…ދަރިފުޅު ވެސް ނިކަން އެހެން އުޅެބަލަ .. މަންމަމެން ކިހާ އުފާވާނެ“ އާމިލާ ހީލައިގެން އިނދެ އެ ވަގުތު ފެށި ވާހަކަ އިން ވިޝާމްއަށް ހެވުނެވެ. ޒަންޔާގެ ނަން މަންހާގެ ކަންފަތައް ވިޝާމް ކޮންމެހެން ވެސް އިއްވާލަން ބޭނުންވިއެވެ. އޭރުން އެމޫނަށް އަރާ ކުލަވަރެއް ވެސް އެނގިދާނެތާއެވެ.

”އެހެންނޭ މިއުޅެނީ.. މިހާރުވެސް މިދަނީ ޒަން އާއި އެއްކޮން ޑޭޓްއަކަށް.. އައި މީން ޑަބަލް ޑޭޓް…އިޔާ ވެސް ދާނެ އެމީ ގޮވައިގެން“ ވިޝާމް ޖަވާބު ދެމުން ލޮލުގެ ހިމަކޮޅުން ބަލައިލި އިރު މަންހާގެ މޫނު ފެނި އިތުރަށް ހިނި އަންނަ ގޮތްވިއެވެ. މޫނު ރަތްކޮށްލައިގެން އިނދެ އެތަނުން ގޮސްފިއެވެ. ކާމިޔާބީގެ ހިނިތުންވުމަކުން އިތުރަށް ތުންފަތް ފުޅާކޮށްލި އިރު ހިތައް  އުނދަގޫވެސް ވިއެވެ. ނުބަލަން މަސައްކަތް ކުރި ނަމަވެސް ހިތް މަގުން ކަސިޔާރުވެ އެދިމާލަށް ނަޒަރު ހިންގާލެވުނެވެ.

”އެމީހުން މިގޭގަތަ އުޅެނީ؟ ޝެޑީ ބުނި އެމީހުން އެއްކޮން މިކޮޅަށް ޗޭންޖްވި ކަހަލަ ވާހަކަ އެއް.. ތެދެއްތަ އެއީ؟“ ވިޝާމް އަހައިލިއެވެ.

“އާންން އެއްކޮން އެ ބަދަލްވީ.. ދައްތަ ފިރިމީހާ އުޅޭ ޕާޓީގެ ކޮންމެވެސް މަގާމެއް ހަމަޖެހިފަ އިނީމަ  ސިޔާސީ ދާއިރާއަށް ނުކުންނަން އޭނާގެ ވިސްނުން އިނީ..ވެރިކަން ކުރާ ޕާޓީއެއްނު.. ދެން ދައްތަ ވެސް މަންހާ ވެސް މިކޮޅުގަ މަޑުކުރަނީ.. މަހާއްކޮ އެކަމަކު ނާދޭ އަދި.. ދަރިފުޅުގެ ކައިވެންޏަށްފަހު އެމީހުންގެ އަމިއްލަ ގެޔަށް ދާނެ.. އުޅޭ ދުވަސްކޮޅު ދައްތަ އާއި ރީތިކޮން ވާހަކަ ދައްކާތި“ އާމިލާ ބުންޏެވެ. ވިޝާމް އެމީހުންނާއި ދުރުން އުޅޭކަން އޭނާއަށް އެނގެއެވެ. އާމިލާ ހީކޮށްގެން ހުންނަނީ ޝާއިރާ އުޅޭގޮތުން، އެކަމާއި ނުރުހުން ވާތީ ވިޝާމް ވެސް ދުރުން އުޅެނީ ކަމަށެވެ.

ބޯޖަހާލަމުން ވިޝާމް ތެދުވީ އިޔާން އައިސް ގުޅަން ފެށުމުންނެވެ. ނުކުމަތް އިރު އިޔާން ކާރުގައި އޮތެވެ. ކާރުގެ ދޮރުފަތް ހުޅުވާލި އިރު އަމީރާއާއި އިޔާން ކޮންމެވެސް ކަމަކާއި ވާހަކަ ދައްކަމުން ދިޔައެވެ. ފަހަތު ސީޓުގައި ޒަންޔާ އިނުމުމުން ރީތި ހިނިތުންވުމެއް ރައްދުކޮށްލާފައި ވިޝާމްވެސް އެރިއެވެ. ވިޝާމް ފެނުމުން އަމީރާވެސް ދައްކަމުން ދިޔަ ވާހަކަ މެދު ކަނޑާލާފައި އިޔާންއަށް ލޯ އަޅާލަމުން ސީޓުގައި ހަމަޖެހިލިއެވެ.

”ކީކޭ ދެކުދިން ތިކިޔަނީ؟“ ލޯގަނޑުން އަމީރާއަށް ބަލާލަމުން ވިޝާމް އަހާލިއެވެ. އަމީރާ ފެނުމުން ހަރާބުވެފައިވާ ތަބީއަތައް ވެސް ބަދަލެއް އައެވެ. ވިޝާމްގެ ތުންފަތުގައި ރީތި ހިނިތުންވުމެއް ކުރެހުނު އިރު އަމީރާ އުޅުނުލެއް މައުސޫމް ކަމުން ހިތް ފުރުނެވެ. އޭނާއަށް އަމީރާގެ ކަންފަތާއި ދިމާ ބެލުނު އަދަދެއް ނޭނގެއެވެ. ޖަވާބު ހޯދަން ބޭނުން ވެފައިވާ އެތައް ސުވާލެއް ހުރި ނަމަވެސް ވިޝާމް މަޑުކޮށްލައިގެން ހުރީ އޭނާގެ ކައިވެނީގެ ކަންތައް ނިމެންދެންނެވެ.

”ދެކުދިން ތޮޅެނީ“ ވިޝާމްގެ ސުވާލާއި އެކު އިޔާން ހޭންފެށި އިރު އޭނާ ހައިރާން ކޮށްލާފައި ޖަވާބު ދިނީ ޒަންޔާއެވެ.

”އެހެންތަ.. މީނައަށް ނުހުރެވެއޭ މަޑަކުންނެއް .. ދެން ތިހެން އެކުއްޖާ ނުހާނުވާ އިނދެބަލަ“ އިޔާން ދެކެ ހިތްހަމަ ނުޖެހިފައި އިނދެވެސް ވިޝާމްގެ ޖުމްލައިން އަމީރާގެ މުޅި މޫނު ރަތްވެގެން ދިޔައެވެ.

”އެމީ ކުރިން ދުވަހަކު ބުނި އަހަރެން މެރީ ކުރަން އުޅޭތީ ނިކަން މެރީ ބޭނުންވާ ވާހަކަ.. ޖަސްޓް ޕްރޮޕޯޒް ހާރ“ ޒަންޔާ ވެސް ވިޝާމްއާއި ބައިވެރިވެލިއެވެ. ލޯގަނޑުން ޒަންޔާގެ މޫނަށް އަމީރާ ބަލައިލަމުން ދަތްކުނޑި ވިކާލިގޮތުން ހިނިއައެވެ. އަމީރާ ލަދުގަތީކަން އޭނާއަށް އެނގުނެވެ.

”ތިކަމާ ކަންނޭގެ ދެން އުޅެންވީ.. ކުދިން ބްލަޝްވާވަރުން ވެސް ކަމެއް ވޭތަ.. އަނެއްކާ ސިނގުރުޅި އަންނަލެއް އެހާ އަވަސް“ ހެވިފައި އިނދެ އިޔާން އަމީރާގެ ކޮލުގައި ހިފާލިއެވެ. ވިޝާމް އިންދަ އެހެން ބުނުމުން އަމީރާއަށް ލޯ އަޅާލެވުނެވެ.

”ރުޅި ނާންނާނެ ތަ.. ގެނައިރު މީނީ ވިއްޔަ އިންގޮތް“ އަމީރާ އިނީ އަދިވެސް އިޔާން ދެކެ ހިތްހަމަ ނުޖެހިފައެވެ. ބަދިގޭގައި އުޅެނިކޮން އިޔާން ގެނައީ ޒަންޔާގެ ގާތައް ދިއުމަށްބުނެފައެވެ. ނަމަވެސް މިހާރު ވިޝާމްވެސް އައުމުން އަމީރާ އިނީ ލައިގެން އާދެވުނު އެއްޗިއްސާއި މެދު ލަދު ހީވެފައެވެ. ގޭގައި ލައި އުޅޭ ފަދަ އަތްދިގު ސްވެޓާއަކާއި ޖީންސެއްގައި ހުރެވުނު އިރު އިޔާންގެ  ގައިގާ ދެތިންފަހަރު ވިކައިވެސް ލެވުނެވެ.

”ތި އޯކޭ އޭ ދޫނީ.. ބަލާ މަށެއް ވެސް.. މީ ދެން މީހުން ޑަބަލް ޑޭޓަށް އަންނަ ގަޑިތަ؟“ ޒަންޔާއަށް ވެސް ތުންފިއްތާލެވުނެވެ. އޭނާގާތު ވެސް ވިޝާމް ތައްޔާރުވާން ބުނީ ވާހަކައެއް ދައްކާލަން ބޭނުންވާ ވާހަކަ ބުނެފައެވެ. ރޭގައި ގަޑި ބުނެފައިވީ ނަމަވެސް ހަނދާނުން ކައްސާލައިގެން އޭނާއަށް ހުރެވުނީއެވެ. ހަނދާންވީ އިޔާން ބަލާ ދާ ވާހަކަ ބުނަން ވިޝާމް ގުޅުމުންނެވެ. އަވަސްކުރަން ވެގެން ލައިގެން އާދެވުނީވެސް ނުހަނު އާދައިގެ ހެދުމެއްގައެވެ.

”އިޓްސް އޯކޭ އޭ ގާލްސް.. ހަޑިއެއް ނޫނޭ..“ ވިޝާމް ވަރަށް ހަމަޖެހިލާފައި ބުނެލިއެވެ. އެހެން އިނދެ ލޮލުގެ ހިމަކޮޅުން ޒަންޔާއަށް ނަޒަރެއް ދިނެވެ. ކީއްވެކަމެއް ކަމެއް ނޭނގުނެވެ. ޒަންޔާ ފެނުނު ފުރަތަމަ ދުވަހެކޭ އެއްފަދައިން އަނެއްކާ ވެސް އޭނާއަށް ޒަންޔާއާއި މަންހާ އަޅާކިޔާލެވުނެވެ. ވިޝާމްއަށް އެންމެ ކަމުދަނީ ޒަންޔާގެ ހިތްހެޔޮ ހިނިތުންވުމެވެ. ލައިލާގެ ބަނޑުން އުފަން ނުވި ނަމަވެސް އެއީ ލައިލާގެ މިޒާޖެކެވެ.  މަންހާގެ ހުންނަ ކިބުރުވެރިކަމާއި ބޮޑާކަމުގެ ޒައްރެއްގެ މިންވަރުވެސް ޒަންޔާގެ ކިބަޔަކު ނުވެއެވެ. އުމުރުގެ ގޮތުން ބެލި ނަމަވެސް ޒަންޔާއަކީ މަންހާއަށް ހަ އަހަރު ހަގު ކުއްޖެކެވެ. ނަމަވެސް އުޅުމުގައި ހުންނަނީ ހަރުގޮތެވެ. މަންޒިލަށް ދެވެންދެން އިޔާންއާއި ޒަންޔާ އަދި އަމީރާ ވާހަކަ ދައްކަމުން ދިޔައިރު، ގިނަވަގުތު ވިޝާމްއަށް ބެލެމުން ދިޔައީ ޒަންޔާއަށެވެ.

”އޭ އާޝިގް، އާދޭ ދެން.. އެމީހުން މިހާރު އެ އެރީ ލިފްޓަށް“ ވިޝާމް ސިހުނީ އިޔާންގެ އަޑަށެވެ. ދޮރު ހުޅުވާލައިގެން އިޔާން ހުރި އިރު ވާރޭ ވެހެމުން ދާތީ އޭނާ ހުރީ ކޮންމެވެސް ވަރަކަށް ތެމިފައެވެ.

”މަ މިއޮތް ތެމުނީ ވިއްޔަ… މިހާރު ލައިކްވާން ފަށައިފި ދޯ ޒަން ދެކެ؟ ކިހާ ރަނގަޅު ކުއްޖެއް“ އިޔާން ވާހަކަ ދެއްކީ ރެސްޓޯރެންޓްގެ އެންޓްރެސްއަށް ވަދެވުމުންނެވެ. އިޔާންގެ އަޑުގައި ހުރީ ސީރިއަސްކަމެވެ. ވަކި ޖަވާބެއް ނުދީ ވިޝާމް ހީލިއެވެ.

****

ކޮލެޖުން ނުކުމަތް އިރު ތުނިކޮން ވާރޭވެހެމުން ދިޔަ މަންޒަރު ފެނި އިރަމްއަށް ހީލެވުނެވެ. ކޮލެޖުގެ މައި ގޭޓުން ފެށިގެން މިނެޓަކުން ހިނގާލާފައި ދެވޭ ހިސާބުގައިވާ ބަސް ހުއްޓިއަށް އެވަގުތު މަޑުކޮށްލި ބަސް ފެނި އިރަމް ދުވެލާފައި ގޮސް އެރިއެވެ. ދެފަރާތުގައިވާ ދަގަނޑުތަކުގައި ހިފަހައްޓާލަމުން ގޮސް އިށީންދެލީ އެންމެ ފަހަތު ސީޓުގައެވެ. ކުޑަދޮރާއި މަގަތުގައި އިށީންދެ ’އިއާރޕޮޑު‘ އަޅުވާލިއެވެ. މަޑުމައިތިރި މިއުޒިކެއްގެ އަޑު އިވެން ފެށުމުން ހަމަޖެހުމުގެ ނޭވާއެއް ދޫކޮށްލިއެވެ.

ސީޓުގައި ބޯއަޅާލައިގެން އޮވެ ބޭރު ބަލަމުން ދިޔައެވެ. ކުޑަދޮރުގެ ބިއްލޫރި ލޯގަނޑަށް ފައިބައިމުން ދިޔަ އެތައް ހާސް ފެންތިކި ތަކެއް ތިރިއަށް ފިރުކި ގަންނަމުން ދިޔަ މަންޒަރު އެއީ އިރަމް ބަލާ ފޫހިނުވާ މަންޒަރެކެވެ. ހިމަ އިނގިލިތަކުން ދޮރުފަތުގައި އަތްބިއްސާލަމުން ދިޔައެވެ. ދެތިން ބަސް ހުއްޓިއަށް މަޑުކޮށްފައި މީހުން އެރުމުން ހަގީގީ މިސްރާބަށް ބަސް ދަތުރުފެށިއެވެ. ބްރިޖްއަށް އެރުނު އިރު ކެރި ބޯކޮށްލައިފިއެވެ.

ނަދީމް ގާތު ބަލާ އަންނަން ނުބުނީ ވެސް ވިއްސާރަ ކޮން އޮތުމުން އެކަނި ވަގުތުކޮޅެއް ހޭދަކޮށްލުމަށްފަހު ގެއަށް ދިޔުމަށް ބޭނުންވާތީއެވެ. ގެ ހުންނަ ހިސާބަށް ބަސް ހުއްޓާލުމުން އިރަމް ފޭބިއެވެ. ހުދުކުލައިގެ ވިއްސާރަ ކޯޓު ގަޔަށް މަހާލަމުން ފޮތް ދަބަސް ވެސް ރަބަރު ކޮތަޅެއްގެ ތެރެއަށް ލައިގެން ވާރޭގެ ތެރެއަށް ނުކުތެވެ. މަގު ހުރަސްކޮށްލަމުން އިރަމް ދިޔައީ ގެޔާއި މާދުރުނޫން ހިސާބެއްގައިވާ މޫދަށް އެރޭ ސަރަހައްދަށެވެ. ކެރި ބޯކަމުން އެހިސާބަށް ދާންވެސް ފުދޭވަރަކަށް ގިނަ ވަގުތު ހޭދަވިއެވެ. އިރަމްގެ ފައިގާ ހުރީ ރިއްސައިގަނެފައެވެ.  އެހިސާބުގައި ހުންނަ ކާތަކެތި ވިއްކާ ގޮޅިތަކުން ހޫނު އެއްޗެއް ބޯލަން އޭނާ ހުރީ އިންތިހާއަށް ބޭނުންވެފައެވެ. ކޯޓުލައިގެން ހުއްޓާވެސް ، ފުދޭވަރަކަށް އިރު ވަންދެން ވާރޭގެ ތެރޭގައި އުޅެވުމުން ހުރީ ކޮންމެވެސް ވަރަކަށް ރޯގާ ވައްތަރުވެފައެވެ.  ކުޑަކޮން ދުވެލާފައި އިރަމް ވަނީ އެންމެ ބޮޑަށް ހިޔާކޮށްފައި އޮތް ތަނަށެވެ. ވާރެއިން ސަލާމަތްވުމަށް އެތައް ބަޔަކު އެތަނުގައި އެވަގުތު ވެސް ތިބިތަން ފެނުމުން އިރަމްއަށް އަޑެއް ލައްވާލެވުނެވެ. ގަޔާއި ކޯޓު ވަކި ކޮށްލަމުން އެއިން ފެން ފޮޅާލަމުން އިރަމް މަޑުކޮށްލީ ކައުންޓަރު ކައިރިގައެވެ.

”ވަން ހޮޓް ޗޮކްލެޓް“ އިރަމް އޯޑާރ ދިނުމުން އިރުކޮޅެއްވާނެ ކަމަށް ބުނުމުން ބޯޖަހާލާފައި އެއްފަރާތެއްގައި އިރަމް މަޑުކޮށްލިއެވެ. ތަނުގެ ތިބި ޒުވާން ފިރިހެންނުންގެ ނަޒަރު ހުއްޓޭ ވަރުން އުނދަގޫވެގެން އިރަމްއަށް ހުރެވުނީ ވެސް އިސްޖަހާލައިގެންނެވެ. އޯޑާރ ނިމިގެން އަންގާލުމުން ލާރި ދައްކާފައި އިރަމް މަޑުކޮށްލީ ތަންކޮޅެއް އެކަހެރިކޮން ހުރިމޭޒެއްގެ ކައިރިގައެވެ. މޭޒު ހުސްކޮން ހުރި ނަމަވެސް އޭގެ ކައިރީގައި ގޮނޑިއެއް ނެތުމުން އިއްތޭކަށް ނެތެވެ. އެ މޭޒުގެ ކައިރީގައި ހުރި ގޮނޑިތައް ޖެހިގެން ހުރި މޭޒަށް ގެންގޮސް ޒުވާން ފުރައިގެން ފިރިހެން ކުދިންތަކެއް ތިބިތަން ފެނުމުން އަނގަ ހަދާލެވުނެވެ.

ދަބަހާއި ކޯޓު ބަހައްޓާލަމުން ހޮޓް ޗޮކްލެޓް ތަށިން ރަހަބަލާލިއެވެ. ފިނިވެފައި ހުއްޓާ ހަށިގަނޑަށް ހޫނުކަމެއް އިޙްސާސްކުރެވުމުން އިރަމްއަށް ހީލެވުނެވެ. އަމިއްލަ ދުނިޔެއަށް ގެއްލިފައި ހުއްޓާއި ފޯނު ރިންގްވި އަޑަށް ބަލައިލި އިރު ސަދަފްގެ ނަން ސްކްރީނުން ފެންނަން އޮތުމުން އިރަމްގެ މެޔަށް ފިނިވެލިއެވެ. ތަށި މޭޒުމަތީގައި ބަހައްޓަމުން ދެއަތުން ފޯނުގައި ހިފާލެވުނެވެ. ކެނޑެންދެން އޭނައަށް ބަލަހައްޓާއިގެން ހުރެވުނީއެވެ. އެކަނިން މިއަދު ބޭރަށް ނުކުމެލީވެސް، ސަދަފްގެ ސަބަބުން ހިތުގައި އުފެދިފައިވާ ނުތަނަވަސްކަމާއި ހިތްދަތިކަމަށް ޝިފާއެއް ހޯދާއިދިނުމަށް އަޒުމް ކަނޑައަޅާލައިގެންނެވެ. ހިނދުކޮޅަކަށް ވެސް އަމިއްލަ ދުނިޔޭގައި އުޅެލުމުގެ ނަސީބު ލިބުނު ނަމަވެސް، ސަދަފްގެ ކޯލާއި އެކު ލިބުނު އުފާވެރިކަން ފަނޑުވެއްޖެއެވެ. ދެފަހަރު ގުޅުމުން ވެސް ފޯނު ނެގުމުގެ ވިސްނުމެއް އިރަމްގެ ނެތެވެ. ކެނޑުމާއި އެކު ފޯނު ބޭއްވި ހިނދު ވައިބްރޭޓް ވެގެން ބަލައިލިއިރު މެސެޖެކެވެ.

”އިގްނޯރ ނުކުރަން ބުނީމަ ވެސް ކީއްވެތަ ތިހެން ތިހަދަނީ..“ ސަދަފް ލިޔެފައި އޮތެވެ. އިރަމް މެސެޖް ބަލާފައިވެސް އެއްޗެއް ނުބުނެއެވެ. އިތުރު މެސެޖްއެއް އައުމުން ކިޔާލިއެވެ.

”މިތާގަ ކީއްކުރަނީ؟“

އިރަމް ފޯނު ބާއްވާފައި ވަށައިގެން ކަޅި ހިނގާލެވުނެވެ. އިރުކޮޅެއްގެ މަސައްކަތުން އޭނާއަށް ސަދަފް ފެނުނެވެ. އިރަމް ހުރި ތަނާއި ދިހަވަރަކަށް ފޫޓު ދުރުގައި ހުރި މޭޒެއްގައި ސަދަފް އިނީ އިތުރު ތިން މީހަކާއި އެކުގައެވެ. ކޮފީ ޖޯޑުގައި ތުންޖަހައިގެން އިން އިރު ވެސް ސަދަފްގެ ކަޅި ހުރީ ސީދަ އިރަމްގެ މޫނަށެވެ. މުޅި ހަށިގަނޑަށް ވެރިވެގަތީ މުޅި ކުއްޖާ ގަނޑުވެގެންދާ ފަދަ ފިންޏެކެވެ.

”އައި ސްވެއާރ މަ މޮޔަވެދާނެ ވާހަކަ ދައްކަބަލަ… މަށައް ކީއްތަ ކުރެވުނީ؟ ވަރަށް ބޮޑަށް ސޮރީ  ނޭނގި ނަމަވެސް ކަމެއް ކުރެވުނިއްޔާ.. ޖަސްޓް ލުކް އެޓް މީ..  އައި މިސް ޔޫ ސޯ މަޗް“ ސަދަފްގެ މެސެޖްތައް ފުލުފުލުގައި އަންނަން ފެށިއެވެ. ތެޅެމުންދިޔަ ހިތާއި ދިމާލު މޭގައި އަތް ޖައްސާލައިގެން ހުރެ ސަދަފްއަށް ނުފެންނަ ހެން ފަސް އެނބުރިލިއެވެ. އެއިން އެއްވެސް މެސެޖަކަށް އިރަމް އަޅައެއް ނުލިއެވެ. ފާޅުގައި ސަދަފްގެ މެސެޖަށް ރައްދު ނުދީ ދޫކޮށްލީއެވެ. ނަމަވެސް އެންމެ ފަހުން ސަދަފް ކުރި މެސެޖްއަށް ބަލަހައްޓައިގެން ހުރެވުނެވެ. ހިތްތެޅެމުން ދިޔައީ އަތުނުވާހާ ބާރަށެވެ. ދެލޮލަށް ޖަމާވީ ކަރުނުތައް ލަސްލަހުން ކޯތާފަތައް ފޭބުމުން އިތުރު މީހަކަށް ފެނުމުގެ ކުރިން ފުހެލިއެވެ.

އަވަސް އަވަހަށް ޗޮކްލެޓް ތަށި ބޯލައިގެން އިރަމް ގަސްތުކުރީ އެތަނުން ދިޔުމަށެވެ. ހޫނުކަމުން އެއްކޮން ހުސްކޮށްލަން ވެސް އުނދަގޫ ކަމަކަށެވެ. ނުބޮވުނު ބަޔާއި އެކު ތަށި ޑަސްޓްބިނަށް ލަމުން ސާމާނުތައް ހިފައިގެން ނުކުންނަން ދިޔައެވެ. ނަމަވެސް ދޮރު އިނީ ސަދަފްމެން ތިބި މޭޒާއި ގާތުގައި ކަމުން ދާންޖެހުނީ އެތަނުގެ ކައިރިންނެވެ. އެ މޭޒާއި ގާތުން ދިޔައިރު ސަދަފްގެ ބެލުން އިހްސާސްވަމުން ދިޔައެވެ. ހިތްތެޅެމުން ދިޔަ ބާރު މިން ދެގުނަ ވިއެވެ.

”މަ ދިޔައީ އިނގޭ “ ސަދަފް ބުނާ އަޑު އިވުމުން އިރަމްއަށް ދެތުންފަތް ފިއްތާލެވުނެވެ. އޭނާގެ ފިޔަވަޅު އަވަސްކޮށްލިއެވެ.

ކޯޓު ލަމުން ވާރޭގެ ތެރެއަށް ނުކުމެވުނު ހިނދު ހުއްޓުމެއް އައީ ސަދަފް ފަހަތުން އައިސް އޭނާގެ އަތުގައި ހިފުމުންނެވެ. އިރަމްގެ ނޭވާވެސް ހީވީ އަރުގައި ތާށިވެގެން ދިޔަހެންނެވެ.

”ކުރިންވެސް ބުނީމެންނު މަށާ ފިލަން ހިތައް ވެސް ނާރުވާށޭ.. ވައި އާރ ޔޫ ޓްރައިން ސޯ ހާޑް ؟“ ސަދަފް ވާހަކަ ދެއްކިއެވެ. އިރަމްއަށް އިސްއުފުލާލެވުނެވެ. ސަދަފްއާއި ހަތަރުކަޅި ބައްދަލްވެގެން ދިޔަ ހިނދު ހީވީ ވަށައިގެން ހިނގަމުން ދިޔަ މަންޒަރު ވެސް ފުސްވެގެން ދިޔަހެންނެވެ. ކަޅި ޖަހައި ނުލާ ސަދަފް ބަލަމުން ދިޔައިރު އެ ދެލޮލުގައިވީ އަސަރްތައް ތަރުޖަމާ ކުރަން އިރަމްއަކަށް ނޭނގުނެވެ.

***

(ނުނިމޭ)