މި ޖިސްމުގާ ވަނީ 21

ސަދަފްއާއި ކައިރިއަށް އައި ހިނދު ނޭފަތުގައި ހަރުލައިގެން ދިޔައީ އޭނާ ބޭނުންކޮށްފައި ވާ ޗެނަލް ބްރޭންޑް ’ކޮކޯ’ގެ މީރުވަހުންނެވެ. ކަޅުކުލައިގެ އަތް ދިގު ޓީޝާޓާއި ކަޅު ޖީންސްގައި ހުރިއިރު އިއްތިފާގުން ވެސް ދެމީހުންނަށް މިތިބެވުނީ އެއް ކުލައެއްގެ ހެދުން އެޅިފައެވެ. އިރަމްގެ ތުންފަތުގައި ރީތި ހިނިތުންވުމެއް ދައުރުވެލި އިރު، ސަދަފްއަށް ހިތުގެ އަޑީން ތައުރީފް ކުރެވުނެވެ.

“ހެލޯ“

ސަދަފް ސިހުނީ އިރަމް ގޮވާލި އަޑުއަހާފައެވެ. ފޯނުން ނަޒަރު ދުރުކޮށްލާފައި އިރަމްއާއި ދިމާ ބަލައިލި ހިނދު ސަދަފްއަށް ހުރެވުނީއެވެ. ހީވީ ހިނދުކޮޅަކަށް ނަމަވެސް ގަޑީގެ ކަށި ހުއްޓުނުހެންނެވެ. އިރަމްއަށް އުނދަގޫ ވާ ވަރަށް ބެލުނުހެން ހީވެގެން އިރަމްގެ މޫނުން ނަޒަރު ދުރުކޮށްލަމުން ސަދަފް ހީލިއެވެ.

****

ސަދަފް ދޮރު ހުޅުވާލަ ދިނުމުން އިރަމް އެރީ ކާރުގެ ކުރީ ސީޓަށެވެ. ކާރު ދުއްވާލި އިރުވެސް ދެމެދުގައި އޮތީ ހަމަހިމޭންކަމެވެ. އިސްވެ ވާހަކަ ދައްކަން ނުކެރިފައިވާ ކަހަލައެވެ.

”މްމްމް.. ހައުޒް ޔޫ“ ހަމަހިމޭންކަމުން އުނދަގޫވެގެން އިސްނެގީ ސަދަފްއެވެ. ކިރިޔާ ސަދަފްގެ ކަންފަތާއި ހަމައަށް ފޯރާ ވަރަށް އިރަމް ރަނގަޅު ކަމަށް ބުނެލިއެވެ. އެފަދަ ގޮތަކަށް އަލަށް ބައްދަލު ވުމުން އިރަމްއަށް އިނީ ވާހަކަ ދައްކަން ނުކެރިފައެވެ.

”ގޯލްޑެން ފޯރކް އަށް ދާކަށް ބިރެއް ނުގަނޭތަ؟ މިބުނީ އިޔާންއަށް ފެނިދާނެތީ؟“

”ކުޑަކޮން..ހެހެ.. ބަޓް އައި ތިންކް ފުޑްއަށް ބަލާފަ ޗޫޒް ކުރެވޭނީ އެ ތަން ހެން.. ދޮންބެ ދެން ދާނީ އެމީ ބަލާ ކަންނޭގެ.. އޭގެ ކުރިން މޭބީ ވީ ވިލް ފިނިޝް“

”އެމީ؟ އެއީ ތަ ތިގޭގަ އުޅޭ ކުއްޖަކީ ؟ ”ސަދަފް އަހައިލި ހިނދު އިރަމް ބޯޖަހާލިއެވެ.

އެފަދަ ކުދިކުދި ސުވާލް ތަކާއި އެކު މަންޒިލަށް ފޯރާފިއެވެ. ދެމީހުންގެ ދެމެދުގައި މަދުން ނަމަވެސް ނަޒަރު ބައްދަލުވެ، ލުއި ހިނިތުންވުންތައް ރައްދު ކޮށްލެވެއެވެ. ރެސްޓޯރެންޓް އިމާރާތުގެ ބިއްދޮށައް އޮންނަ އާއިލާ މީހުންނަށް ހާއްސަ ޕްރައިވެޓް ޕާކިން ޒޯނުގައި ކާރު ޕާކް ކުރުމަށްފަހު އެތެރެއަށް ވަނެވެ.

ސަދަފްއާއި ފޫޓެއްހާ ދުރުމިނުގައި ހިނގަމުން ދިޔަ އިރުވެސް ވަށްކަޅިން އިރަމްއަށް ބެލުނު އަދަދެއް ނޭނގުނެވެ. ނާޔާގެ ގާތައް އެގެޔަށް ދާއިރު ސަދަފް ފެނުނު ނަމަވެސް، އެހާ އަޅައި ނުގަނެއެވެ. ސަދަފް ފެންނާނީ ވެސް ހާލަކުން ފަހަރަކު އެވެ. ފެންނަ ފަހަރު ތަކުގައި ވެސް އަބަދުވެސް ފެންނަނީ ތާކަށް ދާން ލަސްވެގެން އުޅޭ މީހަކު ފަދައިން އުޅޭ ތަނެވެ. ރަނގަޅަށް ބަލައި ވެސް ނުލެވެއެވެ.

ވީ އައި ޕީ ލޯންޖަށް ވަދެ ކުރީންސުރެން ރިޒަވޭޝަން ހައްދާފައިވާ މޭޒް ދޮށުގައި ދެމީހުން އިށީންދެލިއެވެ. ސަދަފް ފެނުމުން ހުރިހާ އެންމެން އިސްކަން ދިނީ އޭނާއަށެވެ.

”ހެލޯ ސާރ.. “ މެނޭޖާރ އިކްރާމް އައިސް ސަލާމް ކޮށްލީ ނުހަނު ގާތްގޮތަކަށެވެ. ސަދަފް ވެސް ހީލަމުން ސަލާމް ބަލައިގަތެވެ.

“ ކިހިނެތްތަ ހުރިހާ އެންމެން؟“ ސަދަފް އަހާލުމާއި އެކު އެންމެން ވެސް ރަނގަޅުކަމަށް ބުނެލިއެވެ.  ހުރިހާ އެންމެންގެ ނަޒަރު އިރަމްގެ މޫނަށް ހުއްޓިފައި ވަނިކޮން ސަދަފްއަށް ފެނުނެވެ. އެތަނަށް އައުމުގެ މާ ކުރިން ވެސް ވެގެންދާނީ އެފަދަ ގޮތެއްކަން އެނގެއެވެ. ފުރަތަމަ ފަހަރަށް އަންހެން ކުއްޖަކާއި އެކު ފެނުމުން އެމީހުންގެ މޫނުމަތީން ހައިރާންކަމާއި އެއް ވަރަށް ޝައުގުވެރިކަން ފެންނަން ހުއްޓެވެ. މުއައްޒަފުންނާއި އެކުވެރިކޮން ވާހަކަ ދައްކާ ގާތްގުޅުމެއް ބޭއްވި ނަމަވެސް، އޭނާ އަބަދުވެސް އަންހެން މުއައްޒަފުންނާއި ދުރުމިނެއް ބަހައްޓައެވެ. އަންހެން އެކުވެރިއެއް ވެސް އޭނާގެ ނުހުރެއެވެ.

”ކޮންގްރެޖްލޭޝަންސް ސާރ.. ޔުއާރ ގާލްފްރެންޑް އިޒް ރިއާލީ ޕްރިޓީ“ ވެއިޓަރަކު އުފާވެލާފައި މަރްހަބާކިއެވެ. ހިނި އަންނަގޮތްވެފައި އިނދެ ވެސް ސަދަފް އަށް ބަލައިލެވުނީ އިރަމްގެ ޖަންބުކުލަ ފައްދާލާފައިވާ މޫނަށެވެ.

”ވީ އާރ ފްރެންޑްސް“ ދެމީހުންނަށް އެކުއެކީގައި ބުނެވުނެވެ. ސަދަފް ލޮލުގެ އިޝާރާތެއް އިކްރާމްއަށް ކޮށްލިއެވެ. އިރަމް ލަދުގަނެފައި އިން ވަރުން އޭނާ ބޭނުން ވީ އެމީހުން އަވަހަށް ފޮނުވާލުމަށެވެ.

”މްމްމް..އެހެމް..އެހެމް.. ހިނގާ ދަމާ ދޯ ހުރިހާ ކުދިން.. ސާރ ލެޓް އަސް ނޯ އިފް ޔޫ ނީޑް އެނީތިންގް“ ސަދަފް ލޮލުން ކޮށްލި އިޝާރާތް ދެނެގަނެވިގެން އިކްރާމް އެހެން މީހުންނަށް ބުނެލިއެވެ. އެމީހުންގެ ހިތުމަތުގައި އެކަކު ބެހެއްޓުމަށްފަހު އެހެން އެންމެން ނުކުމެގެން ދިޔައެވެ.

”އަމް ސޮރީ“ ސަދަފް ތުންފަތް ހަފާލިއެވެ. އޭނާގެ ނަޒަރު ސިކުންތަކު ދެފަހަރު އިރަމްގެ މޫނަށް ހުއްޓެމުން ދިޔައެވެ. އިރަމް ހީލާއިރު މޫނުމަތި އަލިވެގެންދާ ގޮތް ސަދަފްއަށް ވަކިން ފާހަގަ ވިއެވެ.

”އިޓްސް އޯކޭ.. “ އިރަމް ވާހަކަ ދެއްކީ ކިރިއާ ބަނޑައް އިވޭހާ މަޑުންނެވެ. އޭރު މެނޫ ހިފައިގެން އެމީހުންގެ އޯޑަރު ނެގުމަށް ވޭޓަރު ތައްޔާރަށް ހުއްޓެވެ.

”ސްޕެނިޝް  އެއްޗެއް ނަގާނީ.. އެމީގެ ނިއު އެއްޗެއް ޓްރައި ކޮށްލަން އެބަޖެހޭ..“

”މްމްމް އެހެންވީމަ އިރަމް ޗޫޒް ކުރޭ މަށައް ވެސް.. އަމް ބޭޑް އެޓް ޗޫޒިންގް.. ފެމެލީއާއި އެއްކޮން އައިސްފިއްޔާ މަންމަ ނޫނީ ތިއްތިބެ ޗޫޒް ކުރާނީ..އެހެންމީހަކާއި އެއްކޮން ގޮސްފިއްޔާ އެދާ މީހަކު.. “

”ސީރިއަސްލީ؟ އައި މީން ލައިކް ވާ ވަކި އެއްޗެއް ވެސް ނުހުރޭތަ؟“

”ވާ ގޮތަކީ ކާ ކިޔައިފިއްޔާ ނުބައި އެއްޗެއް ނުހުރޭ“ ސަދަފް ބޯކަހައިލިއެވެ. އިރަމް އަށް ހެވުނެވެ. ސަދަފް ފަދަ މަޑުން ހުންނަ ޒުވާނެއްގެ އެ ސިފަ ފެނުމުން މަޖާވީއެވެ. ބަލާލާފައި  ސަކަ މިޒާޖެއްގެ ވެރިއެއް ހެން ހީ ވެސް ނުވެއެވެ.

”ހަހަހަ..އޯކޭ އޯކޭ.. އައިލް ޗޫޒް.. ޔޫ ގޮނަ ލަވް ދިޒް ހަމަ..“ އިރުކޮޅަކު ބަލަން އިނދެފައި އިރަމް ނެގީ ތަރުކާރީ ސެލެޑަކާއި މޮމޯސް އެވެ. ސަދަފްއަށް އޭނާ ގެނައީ ސީފުޑް ޕައެއްލާއެވެ. ކާއެއްޗިހި ގެނައުމާއި ހަމައަށް އެކަކު އަނެއްކާއި ލުއި ސުވާލްތައް ކުރަމުން ދިޔައެވެ.

”ނާސިންގ އީޒީ ތަ؟ ކިހާ ދުވަހެއް އެބައޮތް އަދި ނިމެން؟“ އިރަމް ނަރުސްކަން ކިޔަވާ ޥާހަކަ ބުނުމުން ސަދަފް އެހިއެވެ.

”ނޫނޭ ވަރަށް އުނދަގޫ…ދެވަނަ ސެމް މި ނިމުނީ.. އަދި އެބަ އޮތް ތިން އަހަރު.. “ އިރަމް ޖަވާބު ދިނެވެ. ސަދަފް ބޯޖަހައިލަމުން ބަލައިލީ ވޭޓަރު އައުމުންނެވެ. ގެނައި ކާއެއްޗިހި މޭޒުމަތީގައި ބަހައްޓާފައި ދިޔުމުން ސާމާނުތަކަށް ނަޒަރެއް ދެވުނެވެ. ބޭރުން ބަލާލާފައި ވެސް ކާ ހިތްވިއެވެ. ދުވަމުން ދިޔައީ ވެސް ބަނޑުފުރިގެން ދާފަދަ މީރުވަހެކެވެ.

”ވޯހްހް ލުކްސް ގުޑް“ ސަދަފް ކާން ފަށަން ވެގެން ސަމްސާ ހިއްލާލި ހިނދު އިރަމް އޭނާގެ އަތުގައި ހިފާ ހުއްޓުވިއެވެ. ބުމަ ހިއްލާލުމުން އިރަމް ދައްއިލީ ފޯނެވެ. ގޮނޑީން ތެދުވެ ކާ އެއްޗިހި އަރާނެހެން ފޮޓޯ  ނެގުމަށްފަހު ’ސްނެޕް‘ ކުރަން އިރަމް އުޅުނު ގޮތް ފެނި ސަދަފްގެ ތުންފަތައް ވެރިވީ ރީތި ހިނިތުންވުމެކެވެ.

***

ގޭގެ ނޯކަރުންނާއި އެކު ހެނދުނުގެ ނާސްތާ، މޭޒަށް ނެގުމުގައި އާމިލާ އުޅުނެވެ. އަތް ގާތް ކޮށްދޭން ނާޔާ ވެސް އުޅެމުން ދިޔައެވެ. ފަހަރަކާއި ތައްޓެއްގެ މަތި ނަގަމުން ދިޔައިރު ކާތަކެތީގެ މީރުވަސް ހިފާލިއެވެ. ޔޫވިން ގޮނޑިއެއްގައި އިންއިރު ދޭތެރެއަކުން އަތުގައި އަޅާފައި އޮތް ބެންޑޭޖްގަނޑު ނާޔާއަށް ދައްކާލަމުން ރޯންފަށައެވެ.

”އައްދޯ ވީ މަންމީ.. ބަލާ ޔޫވީ އައްދޯ“ އަނެއްކާ ވެސް ޔޫވިން ރޯންފެށިއެވެ. ނާޔާ އެންމެ ފަހުން ކުރަމުން ދިޔަ މަސައްކަތް ހުއްޓާލާފައި އަތް ދޮވެލިއެވެ.

”ދެން މިއަދު ހަމަ ބޮޑާވާނީ ޔޫވީ..މިހާރު ތަދުވެސް ކެނޑިފަ ހުންނާނީ“ ނާޔާ އުރަށް އެރުވުމުން ޔޫވިން ޖަހައިލީ ހިނިގަނޑެކެވެ. ނާޔާއަށް ހެވިގެން، އަތުން މަޑުމަޑުން ޔޫވިންގެ ބޮލުގައި ޖަހާލިއެވެ.

”އެހެންނުވާނީ މަންމި އުރާނުލި ވިއްޔަ ދޫނި އެވަރަށް ހިންޓް ދިނީމަ ވެސް ދޯ“ ޔޫވިން ހެދި ގޮތުން އާމިލާ ވެސް ދިޔައީ ހެމުންނެވެ.

“ ނިކަން އާޓު ވެސް ބޮޑޭ މިހާރު.. މަންމާ.. އަދި ހަނދާން ނެތިފައޭ މިހުރީ.. ރޭގަ ޕާޓީ އިން އައި ގޮތައް ކިޔަނީ އެ ދައްތަ ކައިރިއަށް އަލުން ހިނގާށޯ.. ގެއަށް ގޮސްފިއްޔާ އުޅޭނީ އެމީގެ ފަހަތުން .. މިހާރު އިރޫ އާއި ނީއްކޮ ކަމަކު ނުދޭ.. އެމީ ފަހަތުން ރީއްކޮ އާއި ދެމީހުން ދުވެ ދުވެ އެކުއްޖާ ހުންނާނީ ހާނުވާލާފަ.. ރޭ ގެޔަށް އައި ފަހުން ޒަން ދައްތި ވެގެން އުޅެނީ.. ދޯ ދަރިފުޅޫ“ ނާޔާ ވަރަށް ހިނިއައިސްފައި އިނދެ ކިޔައިދިނެވެ. އާމިލާއާއި ހައިކަލް އާއި އެކު ނާޔާއާއި ޔުމާން ވެސް ޔޫވިން ގޮވައިގެން އެގެޔަށް ދިޔައެވެ. ދިޔަ ގޮތައް ޒަންޔާގެ ކައިރިން އެންމެ ގޮތަކަށް ވެސް ޔޫވިން ދުރަށް ނުދިޔައެވެ.

އަމީރާގެ ނަން އިވުނު ހިނދު އާމިލާގެ މޫނަށް އުޖާލާ ކަމެއް ވެރިވިއެވެ. އެ މޫނުގައި ކުރިން ހުރި ހިނިތުންވުން އިތުރަށް ފުންވިއެވެ.

”ޒަން..ދޯ.. ޒަން ގެންނަން ވީ މިގެޔަށް .. ޔޫވީ ގާތު ބަހައްޓަން .. ކުރިން އަހަރެމެން އެގެޔަށް ދާއިރުވެސް ވަރަށް ހީ ސަކަރާތް ޖަހާ މަޖާކޮން އުޅޭނީ.. އެކަމަކު ފެނުނެއްނު އިއްޔެ ޒަން ހުރި ގޮތް.. ވަރަށް ވީކް ވެފަ އެހުންނަނީ.. ދިމާވި ކަމަކާއި ހުރެ މުޅި ކުއްޖާ އެއްކޮން ބަދަލްވެފަ..“

”ކިހިނެތް ވީ އެކުއްޖާ އަށް؟“

”މަންމައަށް ވެސް އެހާ ބޮޑަކަށް ނޭނގޭ.. މަންމަ ވަރަށް އެހިން ބައްޕަ ކައިރީގަ، ޒަން އެހާ ބޮޑަށް ޗޭންޖް ވެފަ ހުރީމަ.. އެކަމަކު ބައްޕަ ވެސް ކިޔައިދޭކަށް ނޫޅުނު.. ލައިލާ ގާތުގަ ވެސް ނުކެރޭ އަހާކަށް.. އޭނަ ހުންނަނީ ޒަން މަޑުން ހުންނަވަރުން އެހާ މާޔޫސް ވެފަ..“ އާމިލާ ދެރަވެލާފައި ކިޔައިދިނެވެ.

ދެމީހުންގެ ވާހަކަ މެދު ކެނޑުނީ ފަހަރަކު މީހަކު ކާމޭޒު ދޮށައް އަންނަމުން ދިޔުމުންނެވެ. ހައިކަލްއަށް ފަހު ޔުމާން އައެވެ. ޔުމާން އައި ތަނުން ނާޔާގެ އުނގުން ފައިބައިގެން ގޮސް އޭނާގެ ކަރުގައި ޔޫވީން އޮޅުލައިގަތެވެ.

”ދެން ބައްޕި ކެޔަ ދީފަ ހިނގާ އަހަރުމެން ބޭރަށް“

”އިޓްސް އޯކޭ..“ ނާޔާއާއި އެކު ނުދާން ވެގެން ކުރިއަށް ރޯން ފަށާފައި، ކުރިއަށް ވުރެން ބާރަށް ޔުމާންގެ ގައިގާ އޭނާ އޮޅިގަތެވެ. އެންމެފަހުން ޔުމާންއަށް ޖެހުނީ ޔޫވިން ގޮވައިގެން ކާށެވެ. އޭރު ވިޝާމްއާއި ސަދަފް ވެސް އެކުގައި އައިސް ވަދެއްޖެއެވެ.

”ކޮބާ ޝެޑީ.. ކިހިނެތް ދިޔައީ ޑޭޓް“ ފުރަތަމަ ދިމާ ކޮށްލީ ނާޔާއެވެ. ސަދަފްގެ މުޅި މޫނު ރަތްވެގެން ދިޔައެވެ.

”ޑޭޓަކަށް ނޫނޭ.. ޑިނާރ އަކަށް ދިޔައީ“ ސަދަފް މަޑުމަޑުން ބުނެލި ގޮތުން އެންމެންގެ ހުނުމުގެ އަޑު އިވިގެން ދިޔައެވެ. ނާޔާ އެހާ ހިނިއައިސްފައި ހުރުމުން ސަދަފްއަށް ވީ ތަފާތު ގޮތެކެވެ. އޭނާ ބޭރަށް ދިޔައީ އިރަމްއާއި އެކުގައި ކަން އެނގުމުން ވެސް، އެހާ ހިނިއައިސް އޭނާއާއި ދިމާ ކުރަން އެހެން ހުންނާނެ ބާއޭ ހީވިއެވެ.

”މަންމަ އަދި ގަބޫލެއް ވެސް ނުކުރަން މި މީހުން އެހެން ކިޔަކަސް ދަރިފުޅު ހަމަ ދިޔަކަމަކަށް.. އަލަށް އަންހެންކުއްޖަކާއި އެކު ޑިނާރ އަކަށް ދެވުނު އިރު ކޮން ކަހަލަ އިޙްސާސެއް ކުރެވުނީ.. އެކުއްޖާ އާއި ޥާހަކަ ދައްކަން އެނގުނު ތަ؟“ ސަދަފްގެ އިސްތަށިގަނޑު ހާވާލަމުން އާމިލާ އިތުރަށް ދިމާކޮށްލިއެވެ. އެހިނދު ވިޝާމް ނޫން އެންމެން ހީގަތެވެ. ސަދަފް ވެސް މަޑުމަޑުން އިނދެ ހެމުން ދިޔައެވެ.

”މަންމަ އާއި ބައްޕަ ކީއްވެތަ ކޮންމެ ފަހަރަކު މިބުނަނީ ޝެޑީ އަލައް އަންހެން ކުއްޖަކާއި އެއްކޮންނޭ؟ އާރ ދޭ ފޮގޮޓް އެބައުޓް އެވްރީތިންގް؟ އެވެސް ދޮންބެ ދައްތަ ވެސް ހުއްޓަ؟ އެންޑް ވައި ޝީ އިޒް ލާފިންގ ސޯ ހާރޑް؟ “ ހައިރާންވި ނަމަވެސް ވިޝާމްގެ ސުޥާލްތައް އޮތީ ހިތުގައެވެ. އެއިން އެންމެ ސުވާލެއް ވެސް ދުލާ ހަމައަށް ނުގެންނަން ހިތުލައިގެން އިން ފަދައެވެ.  ފަހަރަކާއި މީހެއްގެ މޫނަށް ބަލަމުން ދިޔައިރު ހީވީ ކަމެއް ދެނެގަންނަން އުޅުނު ހެންނެވެ. އަނެއްކާ އޭނާ އަށް ނޭނގޭ ކަމެއް އެމީހުންނަށް އެނގެނީ ބާއެވެ.

”ނާޔޫ އެކިޔަނީ ޔޫވީ އިއްޔެ އުޅުނު ގޮތް.. ޒަންގެ ވާހަކަ އޯ އައިސް ވެސް ދެއްކީ“ ހިނި އައިސްފައި ހުރެ އާމިލާ ބުނެލިއެވެ.

”އާންން.. ރޭގަ ނުވެސް ހުއްޓި.. އެންމެ ފަހުން އެގެޔަށް އަދި ގެންދާނަމޭ ބުނީމަ ހުއްޓުނީ“

”އެހެހެހެ.. ބައްޕަ ހުރީ ހަމަ ޝޮކްއެއްގަ… ޒަން އެހާ ބޮޑަށް ޗޭންޖް ވެފަ ހުއްޓަ، އިއްޔެ ޔޫވީ ފެނުނީމަ ހީވީ ކުރީގެ ކުއްޖާހެން“ ހައިކަލްގެ ވާހަކަ އަޑުއަހަން އެންމެން ސަމާލުކަން ދީގެން ތިބިއިރު ކަމާއި ނުވެ ކެއުމައިގެން އަވަދިނެތި އިނީ ވިޝާމް އެކަންޏެވެ. ތިކިޔަނީ ކާކުގެ ޥާހަކައެއް ހަ ވެސް އަހާލަން ހިތުގައި ނެތްފަދައެވެ.

”އެއީ ކޮން ކުއްޖެއް؟ ކިހިނެތް ވީ؟ “

”ލޯންގް ސްޓޯރީ، ކުރުކޮން ފޮނިކޮން ބުނާނަމަ ޒަންގެ ގާތް ދެ ކުއްޖަކު ގެއްލުނީ.. ހޯދާ ހޯދާ އެއްވެސް ތާކުން ނުފެނުނު..ވަރަށް އެހެން ކަހަލަ ގޮތަކަށް ހިނގި ކަމެއް އެއީ..ވާހަކަ ދިގުކަމުން ފަށައިފިއްޔާ ނިމޭނެ ކަމެއް ވެސް ނޭނގެ.. ޒަން އަކީ ބައްޕަގެ ރަހްމަތްތެރި ޒާހިރްބެގެ އެންމެ ދޮށީ ދަރިފުޅު“ ސަދަފް ކުރި ސުވާލަށް ހައިކަލް ދިން ޖަވާބަކީ އެއީއެވެ. އެވާހަކައިގެ ގޮތުން ކިޔަން ވެސް ހައިކަލް ބޭނުން ނުވީއެވެ.

ހައިކަލްގެ ލޮލުގައި އަޅައިގަތީ އެންމެން އޭނާގެ ވާހަކައަށް ސަމާލްކަން ދީގެން ހުއްޓާ ވެސް، އަމިއްލަ ދުނިޔެއަށް ގެއްލި އިނދެ ކަމުން ދިޔަ ވިޝާމްއެވެ. ހައިކަލްގެ ހިތައް އެ ނުސިޔާނު ވަގުތުކޮޅު ވެރިވެގަތީ ތަފާތު ހިނިތުންވުމެކެވެ. ވިޝާމް އިއްޔެ ބުނި ޖުމްލަތައް ހަނދާންވީއެވެ.

”ދަރިފުޅާ.. ވިޝާމް.. އިއްޔެ ބުނީ ސީރިއަސް ވާހަކައެއްތަ؟“ ހައިކަލް ބޭނުންވީ ޔަގީން ކުރާށެވެ. ވިޝާމް އެކަމާޢި ހިޔާލް ހުރީ އަދިވެސް އެގޮތުގައި ކަން އެނގުމުން ނޫނީ އެކަމާއި އިތުރަށް ދެވޭކަށް ނެތެވެ. އަންހެން ކުދިންނާއި އެބަހައްޓާ ދުރުކަމަކުން ކުއްޖަކު ހޯދި ކަމުގައި ވީ ނަމަވެސް އޭނާ ކަންތައް ކުރާނެ ގޮތެއް ވެސް އެނގެނީ އެއް ނޫނެވެ.

”ކޮން ވާހަކައެއްތަ؟ މީހަކާއި އިންނަން ވާހަކަ ތަ؟އެ ވާހަކަ ވިއްޔާ ޔެސް.. ހަމަ ވަރަށް ސީރިއަސް.. ބައްޕަ އަށް ފެންނަ ކުއްޖަކު ދެއްކީމަ އިންނަ ގޮތައް މިހުރީ “ އިތުރަކަށް އެއްޗެއް ނުބުނެއެވެ. އޭނާގެ ވާހަކައިން ސިހިފައި ތިބީ އާމިލާއާއި ނާޔާއެވެ. އެއީ އަދި އެމީހުންނަށް އާހަބަރެކެވެ. ހައިކަލްއަށް ވެސް އަދި އޮތީ އާމިލާއާއި އެވާހަކަ ނުދެއްކިއެވެ.

”ދަރިފުޅާ .. މެރީ ކުރަން؟ ކިހިނެތް ؟ކޮން އިރަކު ވީ ކަމެއް؟.. ހައިކަލް .. ކިހިނެތް މިވަނީ؟“ ހައިރާންވެފައި ހުރެ ހުރިހާ ސުވާލެއް އެއްފަހަރާ  އާމިލާ ކޮށްލިއެވެ. ހައިކަލް ހިނިއައިސް އިން އިރު ވިޝާމްގެ މޫނުމަތިން ޖަވާބެއް ދޭން އުޅޭހެން ހީނުވާތީ އާމިލާ ޖަހައިލީ އޭނާގެ ކޮނޑުގައެވެ.

”ބައްޕަ ކިޔައިދޭނެ .. މިހާރު މިދަނީ ގަޑި ޖެހެން ވާއިރަށް އޮފީހަށް ދާން ތައްޔާރުވާން“

”ބަލަ މިތިބީ ވެސް ހަމަ އެއްގަޑިއަކަށް އޮފީހަށް ދާ މީހުން“ އާމިލާގެ ވާހަކައަކަށް ވިޝާމް ސަމާލުކަމެއް ނުދިނެވެ. އެއް ނޭވާއިން ފެންތަށި ބޯލައިގެން އިންތަނުން ތެދުވެއްޖެއެވެ. ހީވީ އިތުރަށް އެ މައުލޫއުއާއި ގުޅޭގޮތުން ސުވާލެއް ކޮށްފާނެތީ ފިލަން ތައްޔާރު ވަމުން ދިޔަ ހެންނެވެ. އަނެއްކާ ވެސް ވާހަކަ ދެއްކުމަށް އާމިލާ އަނގަ ހުޅުވާލި ތަން ފެނި ބާރަކަށް ވިޝާމް ނުކުމަތެވެ.

އެތަނުގައި ދެކެވެމުން ދިޔަ ވާހަކައާއި މެދު ސީރިއަސްވެ، ނުހޭން އިން ނަމަވެސް ސަދަފްއަށް ދިޔައީ ހެވެމުންނެވެ. ވިޝާމް އެދިޔައީ ވެސް ނުހެވި ހުރެވޭނެ ފަދަ ގޮތަކަށް ނޫނެވެ. އޭނާ ޔުމާންއާއި ދިމާ ބަލައިލި އިރު އޭނާ ވެސް ތުންފަތުގައި ދައިގަނެގެން އިނީ ނުހީވޭތޯއެވެ.

”ކިހިނެތް މިވަނީ؟“ މިފަހަރު އާމިލާ ގޮސް ހުއްޓުނީ ހައިކަލްގެ ގާތުގައެވެ. ހަށަން ބަދެލައިގެން ބަލަހައްޓާއިގެން ހުރި އިރު، އެ ނަޒަރުގައި ހިސާބެއް ހިތްހަމަ ނުޖެހުމެއް ހުއްޓެވެ. އާމިލާގެ އަތުގައި ހިފައި ގެނެސް ހައިކަލް ގޮނޑީގައި ބެއިންދިއެވެ. އިއްޔެ ވިޝާމް ދެއްކި ވާހަކަ ހައިކަލް ކިޔައިދިނެވެ. އޭނާގެ އަނގަހުޅުވުނެވެ. ވިޝާމް ހަމަ އެހެން ބުނި ހެއްޔޭ ތަކްރާރް ކޮށް އެތައް ފަހަރަކު އެހުނެވެ. ގަބޫލް ކުރަން ހަމަ އުނދަގޫވީއެވެ.

”އެކަމަކު ވިޝާމް؟ އަހަރެމެންގެ ވިޝާމްތަ ހަމަ އެހެން ބުނީ؟ އޭނާ ހަމަ އެކަނި ހިތައް އުނދަގޫވެގެން އުޅޭނީ އިޔާ ކުއްޖަކާއި ރައްޓެހި ނުވެގެން އެކަމާ.. މީނަ ހެޔޮ އެހެން އުމުރު ހުސްވަންދެން ހުސްހަށިބައި ކޮން ހުއްޓަސް.. އަދި އެހެން މީހަކު މީހަކާއި އިނަސް ރުޅި އަންނަ ކުއްޖެއްގެ ވާހަކަ ތި ދައްކަނީ.. ގަބޫލް ކުރަން ހާދަ އުނދަގުލޭ ހައިކަލް“ އާމިލާގެ ވާހަކަ ހުރިގޮތުން ހައިކަލްގެ ގާތައް ހިނި އަންނަ ގޮތް ވިއެވެ.

”އާންން އަހަހަހާ.. އާމީ.. ތިހެންވެ ތާ މި އެހީ އަނެއްކާ ވެސް… އެބުނީނު ބައްޕައަށް ފެންނަ ކުއްޖަކު ހޯދާށޭ.. މިހާރު ދެން އަހަންނަށް ކަމުދާ ކުއްޖަކު ފެނިގެން މި ޔަގީންކުރީ“ ހައިކަލްގެ ތުންފަތުގައި ދުވެލަ ދުވެލަ ހުރީ މައުނަވީ ހިނިތުންވުމެކެވެ. ޔަގީނުންވެސް އެ އަންހެންކުއްޖާއާއި ވިޝާމް ހާދަ ގުޅޭނެއޭ ހިތައް އެރިއެވެ.

”ވަޓް؟.. ކާކު؟ އަނެއްކާ ވިޝާމް ހިތްހަމަ ޖެހޭނެ ވަރުގެ ކުއްޖެއްތަ؟“ ޔުމާން ހައިރާންވިއެވެ. އޭނާ ފަދައިން އެހެންމީހުންގެ މޫނުން ވެސް ފެންނަނީ ހައިރަން ކަމެވެ. ވިޝާމް އެހެން ބުނި ކަމުގައި ވީ ނަމަވެސް އެހާ އަވަހަށް އެކަމާއި ހައިކަލް އުޅެފާނެކަމަކަށް ހިއެއް ނުކުރެއެވެ.

”ބައްޕައަށް ޔަގީން ހަމަ.. ނަވާރަ އަހަރު އެވީ އިއްޔެ.. ރީތި.. ހިތްހެޔޮ.. ގެވެހި.. ވަރަށް ވަރަށް ރަނގަޅު ކުއްޖެއް އެއީ.. ޝެޑީ އާއި ވިޝާމްއާއި މާއިންއަށް އަދި ޒަން އެއް ނުފެންނާނެ “

“ ނަވާރަ އަހަރޭ؟ވިޝާމްއަށް ޓްވެންޓީ ސެވެން“ ޔުމާން އަނގަ ހުޅުވުނެވެ. އެހާ އުމުރުން ހަނގު ކުއްޖަކާއި ވިޝާމް އިނދެފާނެ ބާއެވެ.

“ އުމުރަކީ ދެން ކޯއްޗެއް.. ބައްޕަ އާއި މަންމަގެ އުމުރުގެ ތަފާތު އުޅޭނެ ދިހަ އަހަރު.. އެކަމަކު ހީވޭތަ ބަލާލާފަ.. ކިހާ ލޯބިން މިއުޅެނީ އަހަރެމެން“ ދަރިން ތިއްބާ އެފަދަ ސަމާސާއެއް ހައިކަލް ކުރުމުން އާމިލާ ހިސާބަކަށް ލަދުގަތެވެ. ހައިކަލް ލާނެތް ގޮތަކަށް ހީލައިގެން ހުރުމުން އާމިލާ ލޯއަޅާލިއެވެ. އެހެން ކުދިން މަޖާވެފައި ބަލަން ތިބި ގޮތުން އާމިލާ ނޫން ކަމަށް ހެދިފައި ދުރު ބަލައިލިއެވެ.

”އެހެމް އެހެމް..ބައްޕަ އެބުނީ ރަނގަޅު ވާހަކައެއް.. ހައިކަލް ކޮން ކުއްޖެއްގެ ވާހަކަ ތި ދައްކަނީ؟ އަނެއްކާ ޒަން ތަ؟“

”އާންން ޒަންޔާ.. ކިހާ ލޯބި ކުއްޖެއް..“ ހައިރާން ވީ ނަމަވެސް ހައިކަލްގެ ވާހަކައިން އާމިލާއަށް ލިބުނީ އަޖައިބެއް ފަދަ ހިތްހަމަ ޖެހުމެކެވެ. އާމިލާއަށް ހީލެވުނީ އެކަމާއި އުފާވި ވަރުންނެވެ. އެއީ ޅީދަރިއަކަށް އާމިލާ ބޭނުން ވާފަދަ އަޙްލާގް ރަނގަޅު ކުއްޖެކެވެ.  އެއާއިލާ އާއި ޒަމާނުން ސުރެން އުފެދިފައި އޮތް ގުޅުން ރަނގަޅު ކުރަން މިއީ ފަހި ފުރުސަތެކެވެ.

”އިއްޔެ މަ ދިޔަ ތަނުން ޒާހިރް ކިޔައިދިން ޒަން ގޭގަ ވެސް އުޅޭ ގޮތް.. އެދެކުދިން ގެއްލުނު ފަހުން ހަމަ އެހެން.. ސްޕެއިން އިން އައިތަނުން އެއްދުވަހު ލައިލާ ވާހަކަ ދެއްކި ފަހުން ހަފްތާއެއް ވަންދެން ރަނގަޅަށް ހުރި ކަމަށް ވަނީ .. އެކަމަކު އަނެއްކާ އެކަމާ މާ ބޮޑަށް ވިސްނަނީ..އޭގެ ފަހުން ޒާހިރްވެސް ލައިލާ ވެސް ކިތަންމެ ވާހަކަ އެއް ދެއްކިއަސް ކުރިއެރުމެއް ނުލިބޭ..މިހާރު އެކަނިން ނިދާކަށް ވެސް ނުބާއްވަ.. ކޮލެޖުން ވެސް ކަނޑާލީ އެންމެ ފަހުން .. ކުރީ ދުވަހު އަހަރެން ބުނިން ރަނގަޅު ވޭތޯ އަޅެ ކައިވެނި ކުރުވަން.. އޭރު ވަކި ވިސްނުމެއް ވެސް ނެތި އެހެން ބުނީ.. ޒާހިރްއަށް ވެސް އެހިޔާލް ކަމު ގޮސްފަ އޮތީ.. ދެން ރޭގަ އެވާހަކަ ދައްކަމުން ގޮސް ބުނީ ޒަން ކައިރީގަ ބޭނުން ކުއްޖަކާ މެރީ ކުރަން ބުނެފީމޯ..ބުނި ތަނުން ބުނެފިއޯ ބައްޕަ ބޭނުން ކުއްޖަކާ މެރީ ކުރުވިއަސް މައްސަލަ އެއް ނެތޭ.. އަހަރެން ވަގުތުން ހަނދާން ވީ ވިޝާމް މަތިން … އެހެންވެ މި އެހީ ވިޝާމްގެ ގާތުން“ ހައިކަލް ކިޔައިދިން ހިނދު އެންމެންގެ މޫނުމަތިން ފެނުނީ ހިތްހަމަޖެހުމެވެ.

”ދެމީހުން ގުޅުނީމަ ހީވޭ ޒަންގެ ހާލު ވެސް ރަނގަޅުވާނެ ހެން.. ދެމީހުން އެކަކު އަނެއްކަކު ދަސްކުރަން ވީކް އެއް ދީފަ ހީވަނީ ވީހާ ވެސް އަވަހަކަށް ކައިވެނީގެ ކަންތައް ޒާޙިރްބެ އާއި މަޝްވަރާ ކޮށްގެން ނިންމަން ވީ ހެން..“

”ކިހިނެތް ދަސްކުރަން ވީކް އެއް ދޭނީ ވެސް ..ޒަން ނުނިކުމެއޭ ގެއިންވެސް“ ޔުމާންގެ ވާހަކަ ކަމުދިޔަ ނަމަވެސް އާމިލާ ކަންބޮޑުވުމާއި އެކު އަނެއްކާ ވެސް ޒަންޔާގެ ހާލަތު ހަނދާން ކޮށްލަ ދިނެވެ.

”ވިޝާމް ކިޔާފަ އޮތީ އޭނާގެ ޕީއޭގެ މަގާމުގަ ހުރި މީހާ ކަނޑާލަން އުޅޭ ކަހަލަ ވާހަކަ އެއް.. އެތަނަށް ފޮނުވަން ވީނު.. ބައްޕައަށް ޒާހިރްބެ ކައިރީގަ ބުނަން ކެރޭނެ ތަ؟“

އިރުކޮޅަކު ވިސްނާލާފަ ޔުމާންއަށް ހައިކަލް ބޯޖަހައިލިއެވެ. އެގޮތާއި އާމިލާ ވެސް ރުހުނެވެ. އެންމެންގެ މޫނުމަތިން ފެނިގެންދަނީ ހިތްހަމަ ޖެހުމާއި އުފާވެރިކަމެވެ. ނިމުނު ގޮތާއި

”ބައްޕަ ވެސް އަދި މިވާހަކަ ޒާހިރްބެ ގާތު ނުއެއް ބުނަން.. އޭނާ ވެސް ދެކޮޅު ހަނދާނެއް ހެނެއް ހިއެއް ނުވޭ.. މިއަދު ވާހަކަ ދައްކާލަން ގެންނާނަން“

”އޯކޭ.. ކުޑާއްތަ މެންގެ އާއިލާ ވެސް އަންނާނެ ދޯ މިކަން ފައިނަލް ވީމަ؟“

އިތުރަށް އެކަކަށް ވެސް އެއްޗެއް ނުބުނެވެނީސް، އެތެރެއަށް ވަދެގެން އައި މާއިން ފެނި އެންމެން ހަމަހިމޭން ވިއެވެ. ހައިކަލްގެ މޫނުމަތީގައި ވީ ތާޒާކަން ނުރުހުމަށް ބަދަލްވާން ސިކުންތެއް ވެސް ނުނެގިއެވެ. ކިރިޔާ އަރިވެލިއަސް އުނަގަނޑު މަތިން ފައިބާހާ ވާން ދޫ ސޯޓަކާއި، ގަޔަށް ދޫކަމުން އިތުރު މީހަކަށް ވަދެވޭހާ ފުޅާ ޓީޝާޓެއްގައެވެ. އިރުކޮޅަކާއި ހެން ސޯޓުގެ އަރިމައްޗެއްގައި ހިފާ މައްޗަށް އަރުވާލައެވެ. ކަރާއި އަތުގައި ހުރި ފައްތައް ކުރިއަށް ވުރެން ގިނަހެން ވެސް ހީވެއެވެ. އެ ހުރިހާ ސާމަނެއް ގައިން ވަކިކުރުމަށް މީގެ ދެދުވަހެއް ކުރިން ހައިކަލް އެނގުމުން ހީވަނީ  ޖެއްސުމެއް ކޮށްފައި ހުރި ހެންނެވެ. ކަނދުރާއާއި އާއި ހަމައަށް އޮންނަ ދިގު އިސްތަށިގަނޑު މިހާރު އޮތީ ތުނިކޮން ކޮށާލާފައެވެ.

”މާއިން.. އެބައޮތް ވާހަކަ އެއް ދައްކާލަން ވެފަ؟ ވަގުތެއް އެބަ އޮތްތަ؟“ މާއިން ފެނުމުން ރުޅިގަދަވި ނަމަވެސް ޔުމާން ވާހަކަ ދެއްކީ މަޑުންނެވެ. އޮފީހުގައި ހިނގާފައި އޮތް ހާދިސާ އަޑު އިވިފައި ވުމުން، ޔުމާން ރުޅިގަދާވެދާނެ ކަމުގެ ބިރަށް ނާޔާއަށް، އޭނާގެ ކޮނޑުގައި ހިފާލެވުނެވެ.

”ވަރަށް ބިޒީ.. އެކަމަކު ކޮންމެހެން މަށައް އެނގެން ޖެހޭ އެއްޗެއް ވިއްޔާ އަޑު އެހިދާނެ.. “ މާއިން ދިން ޖަވާބުން ޔުމާންގެ ލޭ ކެކިގަތެވެ. ނާޔާ އެތާގައި ނެތް ނަމަ އަތުން ފައިން ގޯހެއް ހެދުނީހެވެ. ހައިކަލްއަށް އެކަންތައް އަދި ސިއްރުވެފައި އޮތުމުން އޭނާގެ ކުރިމަތީގައި އަދި ވާހަކަ ދެއްކޭކަށް ނެތެވެ. ރުޅިގަދަވެގެން ގޮސް އަލިފާން ކަނި ބުރާވަރުވެގެން އިރުވެސް ޔުމާން ކެތްތެރިކަމާއި އެކު މަޑުން އިނެވެ.

”މްމްމް.. ބައްޕާ .. ރޭގަ ރެސްޓޯރެންޓަށް ދިޔައިން .. ސްޕެނިޝް ކެއުންތަކަށް މިހާރު ގެނެސްފަ ހުރި ޝެފް ވަރަށް ބަރާބަރު.. އަޑުއެހިން އެއީ އެންމެ އަށާރަ އަހަރުގެ ޒުވާން ކުއްޖެއް ކަމަށް .. އަމް އިމްޕްރެސްޑް.. ހާދަ މީރޭ.. މިއިން ޒަމާނަކު ނުކާ ވަރަށް ރޭގަ ކެވުނު“ މާހައުލުގައި ވީ ފިނި ނުތަވަސްކަން ފިލުވާލުމަށްޓަކައި ސަދަފް އުޅުނުވެ. އެހުރިޙާ އިރު އެއްޗެއް ނުބުނެ އިނދެފައި، ޔުމާންއަށް ވެފައި އިންގޮތުން މަސްރަހް ގޮސްވެދާނެ ކަމުގެ ބިރަށް ވާހަކައެއް ފެށީއެވެ. ބުނެވުނީ ވެސް މުޅިއަކުން ދޮގުވާހަކައެއް ނޫނެވެ. ކެއުން ކަމުދިޔަ ވަރުން ޝެފާއި ވެސް ބައްދަލްކޮށްލަން އޭނަ ރޭގައި މަޑުކުރިއެވެ. އިރަމް ލަސްވެގެން ގެއަށްދާން ނުބުނި ނަމަ އޭނާ ގެއަށް އަންނާނީ ބައްދަލް ކޮށްފައެވެ.

”އާން ތި ވާހަކަ އަޑު އެހިން… އަދި އެކަމަކު އެއްޗެއް ކާން ނުދެވިގެން މިއުޅެނީ..ޒާހިރްބެ ގާތު ބައްޕަ އަށް ޒަން އާއި ވިޝާމްގެ ކައިވެނީގެ ވާހަކަ ދެއްކުނީމަ، ހިނގާބަލަ އެ ފެމެލީ ވެސް ގޮވައިގެން ކާން ދާން“ ސަދަފް އެ ވާހަކަ ފެށުމުން ޔުމާންގެ ރުޅި ފިނިވާ އަތައް އެޅިއެވެ. އޭނަ ހުށައެޅި ހިޔާލް އެންމެންނަށް ވެސް ކަމުދިޔައެވެ.

***

އިޔާން އޮފީސް މޭޒު ދޮށުގައި އިން އިރު އަތުގައި އޮތް ފައިލަށް ވަނީ ނަޒަރު ހުއްޓިފައެވެ. އެއީ ދާދި ދެންމެއަކު އޭނާއަށް ލިބުނު ހާއްސަ ރިޕޯޓެކެވެ. އިރުކޮޅަކު އެއަށް ބަލަން އިނދެފައި ކޯޑްލެސް ފޯނުން ނަމްބަރަކަށް ގުޅިއެވެ. އެކޮޅުން ފޯނުނެގި ހިނދު  އިޔާން ޥާހަކަ ދައްކަން ފެށިއެވެ.

”ހެލޯ ސާރ.. އިރަމްގެ ކޭސްގަ މިކޮޅުން ހޯދަން ވެގެން ފޮޓޯއާއި ވަނަވަރު އާންމުކުރި މީހުން އެއީ.. ހެނދުނުގެ ވަގުތެއްގަ، އެމީހުން ތިބި ރިޒޯޓުން ބޭރުކޮށްލީ މަސްތުވާ ތަކެތި ބޭނުން ކުރަން ތިއްބާ ފެނިގެން .. ރިޒޯޓުގެ މެނޭޖާރ، އަޅުގަނޑަށް ކޮންޓެކްޓް ކުރުމުން މިހާރު މިކޮޅުން އެމީހުން ނަގަން ފޮނުވާފަ ވީ“ އިޔާންގެ ނިތްކުރިން ވަނީ ދާ ހިލިގެން ގޮހެވެ. އިރުކޮޅެއް ވަންދެން ވާހަކަ ދެއްކުމަށް ހުރެފައި ފޯނު ބޭއްވިއެވެ.

އަތައް އަރާފައިވާ ލިއެ ކިޔުންތައް ފެނި އިޔާން އިނީ ބޮލުގައި ރިއްސައިގަނެފައެވެ. އެތައް އިރެއް ވަންދެން ވިސްނަން އިނދެފައި އިޔާން ގަސްތުކުރީ ، ވިޝާމްއަށް ގުޅައިގެން ގެނައުމަށެވެ. އެހެން ނޫނީ ދެން ވިސްނަން ވީ ގޮތެއްވެސް ނޭނގޭނެއެވެ.  ރަވީހްއާއި އެކު ދެން އުޅުނު ގުރޫޕްގެ ތެރެއިން ދެނެގަނެފައިވާ ހަތަރު މީހުން ކުރެން އެކަކު ފިޔަވައި، އެންމެން ހައިކަލްގެ ރިޒޯޓަކުން ފެނުން އެއީ އިއްތިފާގަކަށް ވެދާނެބާއެވެ.  ހެނދުނު އައި ގޮތައް އެކަމާއި އުޅުނު ވަރުން މެންދުރު އަނބުރާ ދޭއް ޖެހި އިރު ވެސް އިޔާންއަށް ރެއާކާއި ލާ ގޮތެއް ނުވިއެވެ. އެ ފައިލް ހިފައިގެން އޭނާ ކެބިން އިން ނުކުތެވެ.

”ސާރ.. ސާރ ހޯދާށޭ މިއައީ.. އެމީހުން މިހާރު މިކޮޅަށް ގެނެސްފަ ތިބީ“ ކެބިންގެ ދޮރުން ނުކުމެވުނު ހިނދު ފުރަތަމަ ބައްދަލްވީ ޒޯޔާއާއިއެވެ. އިޔާން ބޯ ޖަހައިލުމަށްފަހު ޒޯޔާގެ ފަހަތުން ނުކުތެވެ. އަލުން ފައިލް ހުޅުވާލިއެވެ.

”އެއީ ސަފްރާޒް..މާޒިން ދެން ޖޫދު.. ރައިޓް؟“ އިޔާން އަހާލުމުން ޒޯޔާ ބޯޖަހައިލިއެވެ.

”ހަތަރު މީޙުން ކުރެން މިހާރު ނުފެންނަނީ ހާނިމް ކިޔާ ފަރާތެއް“

ދެމީހުން އެކުގައި އައިސް މަޑުކޮށްލީ، ވަގުތީ ގޮތުން ކުށްވެރިން ބައި ތިއްބާފައި ހުންނަ ގޮޅިތަކަށެވެ. ފުރަތަމަ ވެސް އަޑުއަހަން ޖެހުނީ ތިން މީހުންގެ ރުޅިވެރި ހަޅޭކުގެ އަޑުތަކެވެ. ބޮލުގެ އިސްތަށިގަނޑު އުނަގަނޑާއި ހަމައަށް ދިގުކޮށްފައިވާއިރު، ރިހި ފައްތަކުން ކަރާއި އަތާއި ފައި ވަނީ ފުރާލެވިއެވެ. ހައްޔަރު ކުރުމުން ރުޅި ގަދަ ވެގެން ތޭރިތަކުގެ ދަގަނޑު ތަކުގައި އަތުން ތަޅަމުން ދިޔަ ގޮތުން އިޔާންގެ ބޮލަށް އުނދަގޫ ވިއެވެ. ކޮންމެ މީހަކު ވަކިން ވަކި ގޮޅިއަކަށް ލާފައިވީ އިރު އެއިން ކޮންމެ ގޮޅިއެއްގެ ބޭރުގަ ދެ ފުލުހުން ފާރަވެރިވެގެން ތިއްބެވެ. ތޭރިތަކުގައި ތަޅައިގަންނަ ގޮތުން އެމީހުން ވެސް ސިހިގެން ދެއެވެ.

”ދޫކުރޭ.. ހަމަ މިޙާރު ދޫކުރޭ.. ދޫކުރާށޭ.. ބަލ* އެއް ކަހަކަ ބައެކޭ މިއީ.. “ އެންމެ މަގަތައް ހުރި މީހާ އިޔާން ފެނުމުން ވަކިން ބާރަށް ހަޅޭއްލެވިއެވެ. އިޔާން އަޅާއިވެސް ނުލިއެވެ.

“ހެކި ލިބިފަ ހުރީ ސޯ.. ސްޓްރެއިޓް ޓް ދި ޕްރޮސަސް.. އެންޑް ވަން މޯރ ތިންގް، މަހުދީ އައުމުން ބުނާތި މި މީހުންގެ ބަޔާން ނަގާފަ އިންސްޕެކްޓާރ ސާދިގް އަށް ފޮނުވަން..“ އިޔާން މެސެޖް ކޮށްފައި އޮތްތަން ފެނުމުން ވިޝާމް ގުޅާތަން ފެނިގެން ، ޒޯޔާއަށް އަންގާލަމުން ޖެހިގެން ހުރި އިމާރާތައް ދިއުމަށް ނުކުތެވެ.

މަގު ހުރަސް ކޮށްލުމަށްފަހު، ރެސްޓޯރެންޓްގެ ބަޔަށް ވަތްއިރު އާދައިގެ މަތިން ތަން ނުހަނު ހަލަބޮއްޔެވެ. ޓެރެސްއާއި ގުޅިފައިވާ ވީ އައި ޕީ މޭޒުތަކާއި ހިސާބަށް އިޔާންއަށް ދެވުނު އިރު ވިޝާމް ވެސް ކުރިން ބައިން ކޮފީއަށް އޯޑާރ ދީގެން ގެނެސް ހުއްޓެވެ.

“ ކިހިނެތް ވެފަ ތި އިންނަނީ؟ ހީވަނީ މޫނު މައްޗަށް ދޮންކޮށްފަ ހުރި ތަވައެއް ޖަޙާފަ ހުރިހެން“ ދައްކަން އައީ ސީރިއަސް ވާހަކައަށް ވީ ނަމަވެސް، ވިޝާމް އިން ގޮތުން އިޔާން ގާތައް ހިނިއައެވެ.

”ބެސްޓް ފްރެންޑޫ.. އަމް ގެޓީން މެރީޑް “ އިޔާންއަށް ގޮނޑީގައި ރަނގަޅަށް ފޫ ހަރު ނުލެއްވެނީސް ވީޝާމް އިނދެފައި ބުނި އެއްޗަކުން ހުއްޓުން އެރިއެވެ. އެހާ ސީރިއަސްކަން އެކުލެވޭ ފަދަ އަސަރުތަކެއް މޫނަށް ވެރިކުރުވައިގެން އިނުމުން އިޔާންއަށް މުޅިން އޮޅުނެވެ. އަނެއްކާ މަޖަލަކަށް ހަދައިގެން ވެސް އޭނާ އެފަދަ ވާހަކައެއް ކުރިއަކުން ނުދައްކައެވެ.

”އިށީންދޭ..އިށީންދޭ.. މީ ހަމަ އަހަންނޭ.. ކައިވެނި ކުރަން މިއުޅެނީ.. އެކަމަކު އަދި ކާކު ކަމެއް ނޭނގޭ“ މޫނަށް ވައްތަރެއް ޖައްސާލައިގެން އިނދެ ވިޝާމް އަނެއްކާ ވެސް ބުންޏެވެ. އަތުގައި އޮތް ފައިލުން އޭނާގެ ބޮލުގައި އިޔާން ޖަހާލިއެވެ.

”އަމް ޑެޑް ސީރިއަސް މޭން… އަމް ގެޓިން މެރީޑް“

”ސޯ .. ކޮން އިރަކުން ގްރޫމް ޓް ބީ ބާއްވަން ވީ؟ ފްލާވާރ ބޯއީ އަކަށް މަ ޖެހޭނެ ދޯ ހުންނަން.. ކާކުގެ ބަދުނަސީބު އަންހެން ދަރިއެއް ކަލެއާއި އިންނަން އެއްބަސް ވީ؟“ ލޯ އަޅާލައިގެން އިނދެ ގެނެސްފަ ހުރި ކޮފީތަށީގެ ރަހަ އިޔާން ބަލައިލިއެވެ. އަމިއްލަ ހަޔާތާއި މެދު މާޔޫސް ވެ އިން ނަމަވެސް އިޔާންގެ ޥާހަކަ ހުރި ގޮތުން ވިޝާމްއަށް ހޭންފެށުނެވެ.

”ހަހަހަ.. މުހައްމަދު އިޔާން ކިހާ ދެރަކަމެއް.. ހަމަ ރަނގަޅަށް ވެސް މީހަކާ އިންނަން ށޭ މަ މިއުޅެނީ..“ އިޔާންގެ މޫނުމަތި ހުރިގޮތުން ގަބޫލް ކުރާނެ ހެން ހިއެއް ނުވެއެވެ. އެންމެ ފަހުން އިއްޔެއާއި މިއަދު ކަންތައް ވެގެން ދިޔަ ގޮތުގެ ވާހަކަ ކިޔައިދިނެވެ. ސަދަފްގެ ވާހަކަ ފެށިގޮތައް ހައިކަލްގެ ގާތުގަ އިންނާނެ އަންހެން ކުއްޖަކު ހޯދައި ދިނުމަށް އެދި ވިޝާމް ބުނި ވާހަކަ އިވުމުން އިޔާން ފެށީ ހޭށެވެ.

”މަ ހީކުރީ މަންހާ އަންނަން ދެން އިންތިޒާރުގަ ހުންނާނެ ކަމަށް..“

”ލޯބިވޭ ކަންނޭގެ ފާޑަކަށް.. އެކަމަކު އެ ކަހަލަ މީހަކާއި އިނދެގެން އުޅުން އެއީ ލައިފްއެއް ނޫން.. އެހެން ނޫނަސް ޔޫ ގާއިޒް ވޯންޓް ލެޓް މީ ހޭވް ހާރ؟ ރައިޓް؟ އައި މީން ޔޫ އެންޑް ސަދަފް“

”މަ ދުނިޔޭގަ ހުއްޓާ އެދިމާލަށް ދާން ހިތައް އެރުވިއަސް ގުޅުން ކަނޑާލާނެ ކަމަށް އޮންނާނީ ބުނެފަ.. ސަދަފް ކީކޭ ބުނީ؟“ އަހަން ނާހަން އިނދެފައި އިޔާން، ސަދަފްގެ ވާހަކަ އެއްސެވެ.

”އޭނާ ވަކި އެއްޗެއް ނުބުނެ.. އޭގަ ފަހުން ދެމީހުން އަދި ވާހަކަ ދައްކާލެވޭ ގޮތެއް ވެސް ނުވޭ.. ދެން އެނގޭ ހާ ވެސް އެއްޗަކީ މަންހާގެ ކައިރިއަށް މަ  ގޮސްފިއްޔާ ގެއަށް ޒަލްޒަލާއެއް އޭނަ ގެންނާނެކަން.. އޭނާ އެހީ މަންޙާ ދެކެ ލޯބިވާއިރު އެހެން ކުއްޖަކާއި ގުޅެން ހަމަ އޯކޭ ހޭ.. ސަދަފްވެސް މެރީ ކުރުމުގެ ވިސްނުން އިނީމަ ކަންނޭގެ އެވާހަކަ އެދެއްކީ.. އޭނާ އެކަމެއް ކޮށްފިއްޔާ އަހަންނަށް ގޭގަ އެންމެ ދުވަހެއް ވެސް ހަމަޖެހިލައިގެން ނުހުރެވޭނެ.. މެރީ ކުރަން  މަންމަމެން ދެން ކިޔާނެ މާ ގިނައިން.. ބްރޯ ކީކޭ ބުނަނީ މިކަމަށް..“

”ޔަނާލް އަކާއި ނޫން ތަ ސަދަފް ވާހަކަ ދައްކަނީ؟“ ކޮފީ ތަށި ތުމުގައި ޖަހާލައިގެން އިނދެ އިޔާން އަހައިލިއެވެ. އޭނާ އިނި އެ ސުވާލަށް ޖަވާބު ހޯދަން ބޭނުން ވެފައެވެ. ޔަނާލްއާއި މެދުގައި ހިތުގައި އެއްޗެއް އޮތީއެއް ނޫނެވެ. ނަމަވެސް ސަދަފް އާއި ކުރިން އޮތީ ނުހަނު ގާތް އެކުވެރިކަމެކެވެ. އެ ހާދިސާއަށް ފަހު ގުޅުނު ކެނޑުނު ނަމަވެސް، އިރަމްގެ ކަންތަކުގައި ސަދަފް ކޮށްދިނީ ދުވަހަކު ހަނދާން ނައްތާލެވޭނެ ފަދަ ކަމެއް ނޫނެވެ. އެކަމަކު އޭނާގެ ފުށުން ޝުކުރުގެ އެންމެ ބަހެއް ވެސް ސަދަފްއަކަށް އަދި ނީއްވައެވެ. ވާހަކަ ދައްކަން ބޭނުން ނުވަނީއެއް ނޫނެވެ. ގާތް އެކުވެރިއަކަށް ވެ ހުރެ އޭނާގެ ހަޔާތައް ނުބައި ގޮތައް ވިހަ ލާފައި ވީތީ، އެކަން ހަނދާނުން ފުހެލަން އުނދަގޫ ވިއެވެ.

“ އިޔާ.. ރުޅި ނާންނައްޗޭ.. ބައެއް ފަހަރު އަހަންނަށް ހީވެ ޝެޑީ އިނޮސެންޓް ހެން.. އައި ޑޯންޓް ނޯ ވައި.. މަށައް ހީވަނީ ކަމެއް އެބަ އުޅޭ ހެން އަހަރެމެންނަށް ނޭނގޭ.. ޖަސްޓް ހިޔާރ މީ އައުޓް“ ވިޝާމް ދެއްކީ އިރަމްގެ ހާދިސާ ހިނގި ދުވަހުގެ ރޭ ގެއަށް ދިޔަ ތަނުން ހައިކަލް  ވާހަކަ ދެއްކި ގޮތުގެ ވާހަކައެވެ. ސަދްފެގެ ކުށެއް ނެތޭ ހައިކަލް ބުނިގޮތާއި އެވާހަކަ ދައްކަން ފެށުމުން ސަދަފް ވާހަކަ ބަދަލްކޮށްލި ގޮތެވެ. ހައިކަލް އަށް ސަދަފް ކޮށްލި އިޝާރާތް އޭނާއަށް ފެނުނެވެ.  އެންމެ ފަހުން އިއްޔެ ސަދަފް ބޭރަށް ދާން އުޅުނު ހިނދު ހައިކަލް ދެއްކި ވާހަކަ އެވެ.

”އިރޫ ފެނުނު ރޭ ބައްޕަ ވާހަކަ އިން އެބަ ބުނޭ ޝެޑީ އިނޮސެންޓް އޭ ވެސް.. ދެން އިއްޔެ މިބުނީ އަލަށް އަންހެންކުއްޖަކާއި އެކު ދާ ވާހަކަ.. ބައްޕަ އެކަންޏެއް ނޫން.. މިއަދު  މަންމަ… ޝެޑީއާއި ދިމާ ކުރަން އެކަހަލަ ވާހަކަ އެއް ދައްކާ ކޮންމެ ފަހަރަކު ދޮންބެ ވެސް އެގޮތައް ވާހަކަ ހުންނަނީ.. މިއަދު ހެނދުނު ޝެޑީއާއި ދިމާ ކުރި އިރު ހުންނާނެ ދޮންބެ ދައްތަ ވެސް.. ދޮންބެ ދައްތަ ވެސް ހުރީ މަޖާވެފަ.. ތިދެމީހުން ދެމެދުގައި ހިނގީ ކިހާ ވަރެއްގެ ހާދިސާއެއް ކަން ގޭގެ އެކަކަށް ވެސް އޮޅިފައެއް ނޯންނާނެ.. މަށައް ފެންނަނީ ދޮންބެ ދައްތަ ކުރެން އިޔާ އަހާލުން.. ނޫނީ މަ އަހަންތަ ދޮންބެ ކައިރީގަ؟“ ވިޝާމްގެ ވާހަކަ ނިންމާލުމަށްފަހު ، އެކަމުގައި އޭނާގެ ހިޔާލް ހުރިގޮތް އަންގާލިއެވެ.

އިޔާންއަށް އެކަމާއި ޖެހުނީ ވިސްނާލާށެވެ. އިރުގަނޑަކު ވިޝާމްގެ ވާހަކަތަކާއި މެދު ވިސްނަން އިނުމަށްފަހު ޔުމާން ގާތު އެހުމަށް އެދުނެވެ. ނާޔާ ކުރެން އޭނާ އަހާކަށް ބޭނުމެއް ނޫނެވެ. ބޭނުންވީ ނަމަވެސް އަހާކަށް އޭނާއަކަށް ނުކެރޭނެއެވެ. ސަދަފް މާފަށް އެދެން އައުމުން، ވެދިޔަ ކަންތައް ހަނދާން ނައްތާލުމަށްފަހު އާ ފެށުމަކުން ފެށުމަށް ނާޔާ ކުރި އާދޭހުގައި ކޮޅު ފައިންޖަހާ އެ ވާހަކަ ނުދައްކަން ބުނީ އޭނަ އެވެ. ޔުމާންގެ އާއިލާއަށް ސަދަފް ވުމުން، ނާޔާ ހާދާ އާދޭހެއް ކުރިއެވެ. އަލުން އެނބުރި ނާޔާ ކުރެން އަޙާކަށް ނުކެރޭނެއެވެ. ރީއާގެ ހަބަރު ނާޔާ ދިން ރޭ ވެސް އެ ޥާހަކަ ނުދައްކައެވެ.  ރަނގަޅު ވަގުތަކުން ވިޝާމް އަހާލާނެކަމަށް ބުނުމުން އިޔާން ހިތްހަމަޖެހުނެވެ.

”ކޮން ވާހަކަ އެއް ދައްކަންތަ އަސްލު ބުނީ އަންނަން؟“

”މި ބަލާބަލަ “ އިޔާން ދެއްކީ ގެނައި ފައިލެވެ. ވަކި ވިސްނުމެއް ނެތި ވިޝާމް އެ ހުޅުވާލިއެވެ. ގަނޑަކަށް ފަހު ގަނޑެއް ބަލަމުން ގޮސް އެންމެ ފަހު ދެ ގަނޑު ބަލައިލެވުނު އިރު ވިޝާމްގެ ނިތައް ރޫ ތައް އަރައިގެން ދިޔައެވެ. އެއްފަހަރު ފައިލައް އަނެއް ފަހަރު އިޔާންގެ  މޫނަށް ބަލައިލަމުން ނިތް އަރުވާލެވުނެވެ. މި ކޮން ކަމެއްހޭ އަހަފަދަ ނަޒަރެކެވެ. އޭނާ ވިސްނަމުން ދިޔައީ އެމީހުން ތާކުން ފެނުނު ހަނދާނެއް ވެފައެވެ. ސިކުނޑިއަށް ބާރު ލަމުން ދިޔަ ނަމަވެސް  ހަނދާންވާ ގޮތެއް ނުވިއެވެ.

”އިރޫގެ ކޭސްގަ ފަސް މީހަކު ޖުމްލަ ގޮތެއްގައި ހިމެނޭ.. އޭގެ ތެރެއިން ހަތަރު މީހަކު ދެނެގަނެވިފަ ވަނީ.. ތި ފައިލްގަ ތިހުރީ އިރޫގެ ކޭސް ގަ ވަނަވަރު އާންމު ކުރި އެންމެންގެ ތެރެއިން ތިން މީހުން .. އަދި އެކަކު ނުފެނޭ .. ތި އެންމެންގެ ރިޕޯޓް އަހަރެމެންނާއި ހަމައަށް އައީ ހެނދުނު ހަތެއް ޖަހާކަށް ހާއިރު.. މަސްތުވާ ތަކެތި ބޭނުން ކުރަން ތިއްބަ ރެޑް ހޭންޑުކޮށް އެމީހުން އަތުލައިގަތީ..ހިތައް އަރަނީ ހައިކަލްބޭބެ ގެ ’އަރޯރާ ބްލޫ މޫން‘ ރިޒޯޓުން މި އެންމެން ފެންނަން މިޖެހުނީ ކީއްވެބާ އޭ.. ބެލި ބެލުމުން އެނގުނު މެނޭޖާރ ލެވެލްގެ ވަޒީފާ ތަކުގަ މި މީހުން މިތިބީ.. ބޭބެގެ ރިޒޯޓްތަކުގެ ސްޓާފުންނަށް ކަނޑައެޅި އުސޫލު ކުރެވެމުންދަނީ ވަރަށް ސްޓްރިކްޓް ރޫލް ތަކެއް..  އަހަރެމެން ޕޮލިހުންނަށް ނުހުންނަ ގަވާއިދު އެބަ ހުރޭ ހުރިހާ ބޭބެގެ ސްޓާފުންނަށް.. އެކަމަކު މި ފާޑަށް ތިބި ބަޔަކު ކީއްވެބާ ތި ރިޒޯޓުން ފެންނަން މިޖެހުނީ؟“ ފައިލްގެ ފެންނަން އިން ކޮންމެ މީހެއްގެ ފޮޓޯއާއި ދިމާލުގައި އިނގިލި ޖައްސަމުން އިޔާން ދިޔައީ ބުނަމުންނެވެ.

ވިޝާމް އިނީ ބުނާނެ އެއްޗެއް ނޭނގިފައެވެ. ވަރަށް ވިސްނިފަހުން ކަމެއް ހަނދާންވިއެވެ. ދެދުވަހެއް ކުރިން، ނުހައްގުން ބަޔަކަށް ވަޒީފާތަކެއް ދިން ކަމުގެ މައްސަލައެއް ފެންމަތި ވެގެން އައުމާއި ގުޅިގެން އޭނާއައި ޔުމާން އެ ރިޒޯޓަށް ދިޔައެވެ. ނަމަވެސް ދިޔަ ފަހުން ރިޒޯޓްގެ މެނޭޖާރ ޝަހީމް ހުރިހާ ކަމެއް ރަނގަޅު ކަމަށް ބުނެ، އެ ރިޒޯޓުން އެފަދަ ކަމެއް ނެތް ވާހަކަ ބުނުމުން އައީއެވެ. ހަމައެކަނި ޝަހީމްގެ ވާހަކައަށް ބަރޯސާ ނުވާން ވެގެން އަދި އެ މައްސަލަ ޖެއްސި ސްޓާފް އަދި އިތުރު ދެތިން ސްޓާފަކަށް އެރަށުން ފެނުނު ކަމަށް ބުނާ މީހުން، އެންމެ ފަހުން ފެނުނު ސަރަހައްދައް ގޮސް ބެލިއެވެ. ނަމަވެސް އެކަހަލަ އެއްވެސް ހިލަމެއް ފެންނާކަށް ނެތެވެ. އެދުވަހު ދިޔުމުގެ ކުރިން ނާސިފް ފޮނުވާފަ ހުރީ ހަމަ މިމީހުންގެ ފޮޓޯތަކެވެ.

”އެ ސްޓާފް ނާޝިފް ދެއްކީ އެހެންވީމަ ރަނގަޅު ވާހަކައެއްތަ؟ އެދުވަހު މުޅި ރިޒޯޓް ބެލުނު އިރު ވެސް އެފަދަ އެއްވެސް ބަޔަކު ފެންނާކަށް ނެތް.. ކީއްވެބާ ޝަހީމްއާއި އެޗް އާރް މީ މީހުން މުޅި ތަން ކްލީން ކޮށްފަ އެހާ ބޮޑު ސްކޭމެއް މި ޖެއްސީ؟ މާއިން އަނެއްކާ ނުބައި ގަނޑެއް ގަންނަނީބަ.. ކޮންމެވެސް ކަމެއް އެބަ ހިނގާ.. އިޔާ ކައިރީގަ ބުނަން ވީބަ؟ ނޫނޭ.. ނޫނޭ.. ދޮންބެ ކައިރިއަށް ގޮސްފަ އަދި ޔަގީން ކޮށްފަ ބުނަންވާނީ“ ވިޝާމްގެ ހިތުގައި ވިއެވެ. އޭނާގެ ދެއަތް މުށްކެވިފައިވީ އިރު މާއިންދެކެ އައިސް ހުރި ރުޅި ދެގުނަ ވިއެވެ. ކޮންމެވެސް ގޯހެއް އުޅޭކަމަށް ހިތާއި ސިކުނޑި އިއްތިފާގުވަމުން ދިޔައެވެ. ވިޝާމްއާއި ޔުމާން ރިޟޯޓުން އައީ، ނާސިފްއާއި އެ ހަބަރު ދިން އިތުރު ތިން ސްޓާފަކު ހަފްތާއެއްގެ މުއްދަތަކަށް ސަސްޕެންޑް ކޮށްފައެވެ.

”ބްރޯ މަ ބަލާނަން މިކަންތައް އިނގޭ .. ކަމެއް ގޯސްހެން ވަރަށް ހީވޭ އެބަ..“

ވިޝާމްއަށް ބޯ ޖަހާލަމުން އެއްޗެއް ބުނަން އުޅެފައި ވެސް އިޔާންގެ ކަޅި ހުއްޓުނީ އެތެރެއަށް ވަދެގެން އައި އަމީރާ ފެނިފައެވެ. ކޮފީ ތަށީގަ ތުންޖެހި ގޮތައް އަމީރާއަށް ނަޒަރު ހުއްޓާލައިގެން އިޔާން އިނެވެ.

”ހާއީ..ޔުޒީ ސިސް“ އެތަނުގެ ރިސެޕްޝަންގައި އިން އަންހެންކުއްޖާ ފެނި ރީތި ހިނިތުންވުމަކާއި އެކު އަމީރާ ވާހަކަ ދެއްކިއެވެ. ޔުޒީނާ ވެސް ހިނިތުންވެލާފައި ކައުންޓަރު ދޮށައް ތިރިވެލިއެވެ.

”ހެޕީ ބާރތް ޑޭ އެމީ“ ޔުޒީނާ ނެގީ ކަޅުކުލައިގެ ކޮތަޅެއްގައި އޮތް އަޅިކުލަ ކަރުދާހަކުން ބަންދުކޮށްފައި އޮތް ޕާރުސަލަށެވެ. ޔުޒީނާގެ ހުރިހާ ދަތެއް ފެންނަވަރަށް ހީލައިގެން ހުރި އިރު އަމީރާގެ އަނގަހުޅުވުނެވެ. އޭނާގެ އުފަންދުވަސް ކަމެއް އެއްގޮތަކަށް ވެސް ހަނދާނެއް ނެތެވެ. އުފަންދުވަހާއި ގުޅިގެން އުފާވެރި ހަނދާނެއް ނުވާއިރު ހަނދާންވާނީ ވެސް ކިހިނަކުން ހެއްޔެވެ.

ހިތައް އުނދަގޫ ވީ މާކިންގެ މަތިން ހަނދާން ވެގެންނެވެ. އަމީރާ ރުޅި އައިސް ހުރިނަމަވެސް ކޮންމެ އުފަންދުވަހެއްގައި ކުޑަ ކަޕްކޭކެއް ގެނެސްފައި ދޭގޮތް ހަނދާންވިއެވެ. ނަމަވެސް އެދުވަސް މާޒީވެ ގޮސްފިއެވެ. ފެންކަޅިވި ނަމަވެސް ކަރުނުތައް ހިންދާލަމުން އުފާވެރި ގޮތަކަށް ހީލިއެވެ.

”އަޅޭ.. އެމީ ހަނދާނެއް ވެސް ނެތް މިއަދު ބާތްޑޭ ކަމެއް.. ތެންކިއު ވަރަށް ބޮޑަށް އިނގޭ ސިސް“ ޔުޒީނާގެ ގައިގާ އަމީރާ ކުޑަގޮތަކަށް ބައްދާލިއެވެ.

”އެމީ މިތާގަ ފޯނު ބާއްވާފަ ވިއްޔަ ތިއުޅުނީ ހެނދުނުން ސުރެން.. ވަރަށް މެސެޖް އައި އަޑު އިވުނު.. އެހެންވެ ލައިގެ ފޯނަށް ގުޅައިގެން މިގެނައީ ވެސް.. އެނީވޭ ޔުޒީ ހުއްޓަ ކަނޑައްޗޭ.. ޑިއުޓީ ނިމޭ ގަޑީގަ ދޯ ކަނޑާނީ“ ޔުޒީނާ ބުނެލިއެވެ. ޔުޒީނާއަކީ ތަނުގައި ރިސެޕްޝަނިސްޓަކަށް މަސައްކަތް ކުރާތާ ހަތަރު އަހަރު ވެފައިވާ ފަރާތެކެވެ. އަމީރާ އެކުވެރި މިޒާޖުން އެންމެނާއި ވެސް ވަނީ ނުހަނު ގާތް ގުޅުމެއް ދާދި މަދު ދުވަސްކޮޅެއްގެ ތެރޭގައި އުފެދިފައެވެ.

”އޯކޭ.. އެކަމަކު އަދިވެސް ތެންކިއު “ ތުންކޮޅު ނެރެލައިގެން ހުރެފައި ޕާރުސަލް މެޔާލާ ބޮނޑިކޮށްލިއެވެ. ދެމީހުން ވާހަކައިގައި ތިއްބާ އައީ އެވަގުތު އެތަނުގައި އިންނަ ފިރިހެން ރިސެޕްޝަންޓެވެ.

”އެމީ.. ހެޕީ އެއިޓީން“ ފާރިހް ވެސް ކުޑަ ޕާރްސަލެއް ދިއްކޮށްލިއެވެ.

”އަޅޭ ދެން ޔޫ ގާއީޒް އާރ ސޯ ކިއުޓް.. މިހާރު ރޮވެން އެބައުޅޭ.. “

’“އުހޫން އަދި ނުވޭ ރޯކަށް.. ރޯނީ މާދަމާ ރޭ“ ޔުޒީނާއަށް އެއްލޯ މަރާލަމުން ފާރިހް މަޖާ ގޮތަކަށް ހީލިއެވެ. އަމީރާއަށް ނުފެންނާނެ ހެން ފާރިހުގެ ގައިގާ ޔުޒީނާ ޖަހައިލިއެވެ. ފާރިހްގެ އަނގަ ގަދަ ކަމުން އެމީހުން މާދަމާ ރެއަށް ރާވާފައިވާ ކުޑަ ސަޕްރާއިޒް ވެސް އަމީރާއަށް ފަޅާ އަރާފާނެ ކަމުގެ ބިރު އެވަގުތު ހީވިއެވެ.

”ހެހެހެ ނުތޮޅި ދެކުދިން.. ތެންކިއު ފާރިހް“ އުފާވެރި ހިނިތުންވުމެއްގައި ހުރެ އަމީރާ ފާރިހްގެ ޕާރްސަލްގައިވެސް ހިފިއެވެ.

ފޯނު ދިނުމުން އަމީރާ ފޯނަށް ނަޒަރެއް ދިން އިރު ރެސްޓޯރެންޓްގެ މުއައްޒަފުންގެ މެދުގައި އިންނަ ވައިބާ ގުރޫޕުން، އެންމެން އޭނާއަށް އުފަންދުވަހުގެ ތަހުނިޔާ ކިޔާފައި އޮތެވެ.

އަމީރާގެ ހިތައް އެންމެ އުނދަގޫ ވީ އިޔާންގެ ފަރާތުން މެސެޖެއް ނެތީމައެވެ. އޭނާގެ ނަމްބަރު ވެސް ގައިމު އެނގޭނެއެވެ. އޭނާ ދެކެ ރުޅިއައި ކަމުގައި ވީ ނަމަވެސް މެސެޖެއް ކޮށްލުން ކީއްވާނީ ހެއްޔެވެ.

އިރަމްއާއި ގޭގެ އެކަކުގެ މެސެޖެއް ވެސް އައިސްފައި ނެތެވެ. އިތުރަށް ދެރަވާގޮތްވިއެވެ. މޮޅި ސާލު ލެވިފައިވާ މޫނަށް ދިރުމެއް ލިބުނީ ނާޔާއާއި ޔުމާންގެ މެސެޖެއް އައިސް އިންދާ ފެނުމުންނެވެ. ޔޫވިންގެ ތުއްތު އަޑުން އަމީރާއަށް ’ހެޕީ ބާރތް ޑޭ‘ ކިޔާލާފައިން އިން ވީޑިއޯ ކޮޅެއް ނާޔާ ފޮނުވާފައި އިނެވެ. އެ ވީޑިއޯ ކޮޅު ބެލުނު އަދަދެއް ވެސް ނޭނގުނެވެ. ތުންފަތައް ރީތި ހިނިތުންވުމެއް ވެރިވެގެން ދިޔައެވެ. އެ ދެމީހުންގެ މެސެޖަށް ޖަވާބެއް ދީފައި އިތުރު އެއްޗެއް ހުޅުވާކަށް އަމީރާ ނޫޅުނެވެ.

”އެމީ މާދަމާ އަވަހަށް ނިމޭނެ ދޯ.. މާދަން ވެސް މޯރނިން ދުވަހެއް ވީމަ.. ނައިޓް ފްރީ ތަ؟“ ފާރިހް އެހިއެވެ. ޖަވާބެއް ނުދެވި އުޅެނިކޮން ފޯނު ވައިބްރޭޓް ވުމުން އެމީހުން ގާތު މަޑުކޮށްލުމަށް އެދި އަމީރާ ބަލައިލިއެވެ.

”ޓެލް ހިމް ދެޓް ޔޫ އާރ ބިޒީ! ސްޓޭ އަވޭ ފްރޮމް އެނީ މެން! ނޯ އެކްސްކިއުޒެސް!“ އައިސް އިން އިޔާންގެ މެސެޖް ކިޔާލި ހިނދު އަމީރާ ސިހުނެވެ. ވަށައިގެން ކަޅިއެއް ދެވުނު އިރު އެމީހުންގެ ވާހަކަ އިވޭހާ ކައިރީގައި އިން މޭޒެއްގައި އިން އިޔާން ފެނި ހުއްޓުން އެރިއެވެ. މުޅި ހަށިގަނޑަށް ފިނިވެގެން ދިޔައީ އިޔާން ބަލަހައްޓައިގެން އިން ގޮތުންނެވެ. އެހާ ތޫނެވެ. ހީވީ އެ ނަޒަރުން އަމީރާގެ ހިތް ފިއްސާލަން އުޅުނު ހެންނެވެ.

އިޔާންގެ މޫނަށް ގެއްލިފައި ހުއްޓާ، އޭނާ ފޯނާއި ކުޅޭތަން ފެނިގެން، އަމިއްލަ ފޯނަށް ބަލައިލެވުނެވެ. އަނެއްކާ ވެސް މެސެޖެއް އައިސްފިއެވެ. ”އައި ގެޓް ވައިލެންޓް ވެން އިޓް ކަމްސް ޓް ޔޫ!“ ކިޔާލެވުނު އިރު އަމީރާއަށް ތުންފަތުގައި ދައިގަނެވުނެވެ. ފޯނުނިއްވާލަމުން އިސްއުފުލާލި އިރު، ތުބުގައި ކޮފީ ޖޯޑު ޖެހިގޮތައް އޭނާގެ މޫނު ކަޅި ދުރުނުކޮށްލާ އިޔާން އިނެވެ. ހީވާގޮތުން އަމީރާގެ އަނގައިން އިވިގެންދާނެ ޖުމްލައަކަށް އިންތިޒާރު ކުރަނީއެވެ. އެކަމަކު އެކުގައި މަސައްކަތް ކުރާ ކުދިން ވެސް ތިއްބާ އެފަދަ ފާޅުކަން ބޮޑު ގޮތެއްގައި އިޔާން އެހެން  އިނުމުން އަމީރާއަށް ކުރެވެމުން ދިޔައީ ލަދުން ވިރިގެންދާ ފަދަ އިޙްސާސެކެވެ. އެހެން މީހުންނަށް ފާހަގަ ނުވިއްޔާ ރަނގަޅެވެ. އިންތަނުން ތެދުވެ އައިސް އިޔާންގެ އަނގައިން އެހެން ބުނާނެ ނަމައެވެ. ހިތުގައި ފުންވެގެން އަސަރުތައް އޭނާގެ ބާރުގެ ދޮށައް ގެނައެވެ.

”މްމްމް.. އަމް ފްރީ“ އަމީރާ އިއްވާލިއެވެ. ކޮންމެ ހެން އިޔާން ބޭނުންވާ ގޮތަށް ހަދަން ޖެހޭ ހެއްޔެވެ.  އޭނާގެ މައްޗަށް އިޔާންއަކަށް އެހެން އެއްވެސް ބާރެއް ނުފޯރުވޭނެއެވެ. މިއަދު އޭނާގެ އުފަންދުވަހުގެ ތަހްނިޔާ ނުފޮނުވުން އެކަމާއި ވީ ދެރަ ނުގޮތަކަށް އަމީރާ ބޭލިއެވެ.

އަމީރާ ފެނުމުން ވިޝާމްގެ ތުންފަތުގައި ދެމިލީ ހިނިތުންވުމެކެވެ. އެ ކުއްޖާ ފެނުމުން ނޭނގޭ ސަބަބަކާއި ހުރެ އޭނާގެ ހިތައް ހަމަޖެހުން ލިބެނީ އަޖައިބެއްފަދަ ގޮތަކަށެވެ. އަމާޔާގެ މަތިން ހަނދާންވާ ކަހަލަ ގޮތެއް ވަނީއެވެ.  އަޑެއް ނީވިގެން ބަލައިލިއިރު، އިޔާންއަށް ވެފައި އިން ގޮތުން ވިޝާމްއަށް ހެވުނެވެ. އެއްޗެއް ބުނަން  އުޅެފައި ވިޝާމް މަޑުޖެހުނީ އަމީރާގެ އުފަންދުވަސް ކަން އެނގުމުން ހިސާބަކަށް ހައިރާން ވެ ހުރެއެވެ.  މިއަދު މިއީ ގެއްލިފައިވާ އޭނަގެ ކޮއްކޮގެ ވެސް އުފަންދުވަހެވެ.

އިޔާންގެ ކޮނޑުގައި ޖަހާލަމުން ވިޝާމް އިންތަނުން ތެދުވިއެވެ.

”ހޭއި.. އިޓްސް ޔޯ ބާތް ޑޭ؟“ އަމީރާގެ ގާތައް ހުއްޓިލަމުން އަހައިލިއެވެ. ހިނިތުންވެލައިގެން ހުރެ އަމީރާ ބޯޖަހައިލި ގޮތުން ވިޝާމްއަށް ބަލަހައްޓައިގެން ހުރެވުނެވެ. ގޮތް ނޭނގޭ، އެހެނަސް ގާތް އިޙްސާސެއް ކުރެވެނީއެވެ.

”ހެޕީ ބާރތް ޑޭ“

”ތޭންކިއު ސޯ މަޗް“ ތަނުގެ މަސައްކަތް ކުރާ ވެރިޔާގެ ފަރާތުން އިވުނު ހިނދު އަމީރާއަށް އުފާވިއެވެ. ވިޝާމްގެ ފަހަތުގައި ހުރެ، އިޔާން ރުޅިވެރިކަމާއި އެކު ބަލަމުން ދިޔަ ގޮތުން  ހުރެވުނީ ވެސް ކުޑަކޮން ބިރުގަންނަ ގޮތްވެފައެވެ.  އެ މޫނަށް ނުބަލާ ހުރި ނަމަވެސް އެކަން އިޙްސާސްވަމުން ދިޔައެވެ.

އަމީރާ ލިފްޓަށް އަރަން ދިޔައީ އެދެމީހުންގެ ފަހަތުންނެވެ. ލިފްޓާއި ހިސާބުން ވިޝާމްއަށް ފޯނެއް އައިސްގެން އަލުން އެތެރެއަށް ވަންނަން ދިޔައެވެ. އިޔާންއާއި އެކު ދާކަށް އެއްގޮތަކަށް ވެސް އަމީރާ މިއަދު ބޭނުމެއް ނޫނެވެ. ލިފްޓްގެ ދޮރު ހުޅުވުމައި އެކު އިޔާން އެތެރެއަށް ވަތް ދަނޑި ވަޅު ބަލާފައި އަމީރާ އަވަހަކަށް ދާން ހިނގައިގަތެވެ.

ދެމީހުން އެކަނި ވުމުން އަމީރާ ގަސްތުކުރީ ސިޑިއާއި ދިމާލަށް ދިޔުމަށެވެ. އިޔާންއާއި އެކު މިވަގުތު ދިޔުމަކީ އެހާ ބުއްދިވެރި ކަމެއް ނޫނެވެ. ދިން އިންޒާރަށް ނުބަލާ އިޔާން ރުޅި އަރުވާލުމުން ބަދަލެއް ވެސް ހިފަން އުޅެފާނެއެވެ.

“ އޯހް ގޯޑް މިހާ މަތިން ކިހިނެތް ސިޑިން ފައިބާނީ.. ޑޭމްއިޓް އަމީރާ.. އަދި ގޮތް ދޫ ނުކޮށް އަންނަން ވެއްޖެ!“ ސިޑި ފެށޭ ހިސާބު ފާރުގައި އިން ނަމްބަރު ބޯޑު ގައި ދިހަ އެއް އިން އިންތަން ފެނުނީ އެހިސާބަށް އެރުނު ފަހުންނެވެ. ވިސްނާނުލާ ކުރެވުނު ކަންތަކުން ތުން ފިއްތާލެވުނެވެ. ”މީ ހަމަ އިޔާންގެ ކަންތައް ހައްތަހާ ވެސް.. ވެއްޖެ ވިއްޔަ މާ ހެޔޮ އެދޭ މީހަކަށް ވެގަންނަން.. ވިޝް އެއް ވެސް ނުކޮށްލާ އައިސް ބޮޑެތި އަމުރު ކުރަން އެކަނި އެނގެނީ“ ވާހަކަ ދެއްކީ ބަނޑަށް  އިވޭހާ މަޑުންނެވެ. އެހާ ހިސާބަށް އައިސް އަލުން އެނބުރި ލިފްޓަށް އަރާކަށް އޭނާ ހިތެއް ނުބުންޏެވެ.

”ހެލް ނޯ!“ ނުރުހުމާއި އެކު އިޔާން ބުނެލި އަޑުއަހާފައި އަޅަ އަޅާފައި ހުރި ފިޔަވަޅު ހުއްޓުނެވެ. އެއްޗެއް ނުބުނެ ހުއްޓާ ސިހުނީ އެ ބާރުގަދަ އަތުން އަމީރާގެ ނާޒުކު އަތުގައި ހިފާ ދަމާލުމުންނެވެ.

”ވަޓް އިޒް ރޯންގް ވިތް ޔޫ؟ އަމް ޖަސްޓް ޓްރައިން ޓް ސްޓޭ އަވޭ ފްރޮމް ޔޫ“ ލިފްޓްގެ ދޮރު ލެއްޕުމާއި އެކު އަމީރާ ހަޅޭއްލަވައިގަތެވެ. އޭނާގެ ރުޅިގަނޑު ހަމައަކަށް އެޅުނީ އެއަށް ފަހުއެވެ.

”މިހާރު އެހާ ވެސް މަ ދެކެ ރުޅި އާދޭތާ؟“ އިޔާން ކޮށްލީ ސުވާލެކެވެ. އެ އަޑުގައި ވާ މޮޅިވެރިކަމުގެ ޖަޒުބާތުގައި ޖެހެން ސިކުންތެއް ވެސް ނުނެގިއެވެ. ރުޅިގަނޑު އެކީގައި ފިނިވެ ވަތްތަނެއް ވެސް ނޭނގެއެވެ.

”ޖަސްޓް ޓެލް މީ؟ އެހާ ވެސް ރުޅި އާދޭތަ؟ ހަމަ ކޮންމެ ފަހަރަކު ކައިރިއަށް މަ އައީމަ އަމީރާ އަށް ޖެހޭތަ މިހެން ހަދަން ؟“

”އައި ޑޯންޓް ހޭޓް ޔޫ“ އިޔާން ބަލަން ހުރިގޮތުން، އަމީރާގެ އަޑު އަނގައިން ނުކުތީވެސް ކިރިޔާއެވެ. ހީވީ އަރުތެރޭގައި އަޑުވެސް ތާށިވާން އުޅުނުހެންނެވެ.

”ދެން ކީއްވެ މެސެޖް ކޮށްފައި ބުނީމަ ވެސް މަށާ ދެކޮޅަށް ތި ކަންތައް ކުރީ؟ ބަލަ މަ އެހެން ބުނީ  އަމީރާއަށް ރަނގަޅާކަށޭ..“ އެހެން ހެދުނީތީވެ މާފަށް އެދެން ހުޅުވާލި އަނގަ ލައްޕާލަން ޖެހުނީ، އިޔާންގެ ފޯނަށް އައި ފޯނު ކޯލެއް ފެނިފައެވެ. ޑިސްޕްލޭއިން ފެންނަން އިނީ ޒޯޔާގެ ނަމުގައި ސޭވްކޮށްފައިވާ އިން ފަރާތެކެވެ. ހިތުގައި އުފެދުނު ހަސަދަ ވެރިކަމެއްގެ ސަބަބުން، ކާކުތޯ ބަލާކަށް ވެސް އަމީރާގެ ހިތަކަށް ނޭރިއެވެ. އަމީރާއަށް ދީގެން ހުރި ސަމާލުކަން އެއްފަރާތް ކޮށްލަމުން، އިޔާން ފޯނު ނެގިތަން ފެނި ރުޅިގަނޑު ދެގުނަވެ ހިލިގަތެވެ.

”ޔެސް ޒޯ.. މިރޭ ގޮސްފަ ޖަހާލާނީ.. ހޮމްވޯކެއް އިނީމަ ފައިލް ހިފައިގެން މިދަނީ..“ އަމީރާއާއި ދުރުވެލަމުން އިޔާން ވާހަކަ ދެއްކިލެއް މަޑުކަމުން އެ ޖުމްލަ ނޫން އިތުރު އެއްޗެއް މާ ރަނގަޅަށް ސާފެއް ވެސް ނުވިއެވެ. ކެތްތެރިވީ އެ ކޯލް ނިމެން ދެންނެވެ. އިންތިޒާރު ކުރި ވަގުތު ޖެހުމާއި އެކު އިޔާންއާއި ކުރިމަތި ލިއެވެ.

”ބިކޯޒް ޔޫ ކޭންޓް ކޮންޓްރޯލް މީ! އަހަންނަށް ރަނގަޅު ގޮތާއި ގޯސް ގޮތް ބުނެދެން ތީ ކާކު؟ ބޭނުން ގޮތަކަށް ހަމަ އުޅޭނީ“

”ވަޓް ދަ ފ* އިޒް ރޯންގް ވިތް ޔޫ؟ ބުނަންތަ ވާހަކައެއް؟މިތަނުގަ އަމީރާއާއި ދިމާ ބަލަން ހުރީ މަށޭ… ހަނދާން ކުރާތި މީގެ ފަހުން އެކަކާއި ވެސް ވާހަކަ އެއް ނުދެއްކޭނެ.. “ އިޔާން ދެބުމަ ގޮށްޖެހިފައި ހުރެ އިންޒާރު ކޮށްލިއެވެ. އަމީރާގެ މޫނަށް ސީދާ ވެފައި ހުރި ޝަހާދަތް އިނގިލި ތިރިކޮށްލިމުން ދުރު ބަލައިލީ ރުޅި ފިނިކުރެވޭތޯއެވެ. އަމީރާގެ އެޅަކަމާއި ގޮތްދޫނުކުރުމުގެ ސިފަ ފިލައިގެން ދާނީ ކޮން ދުވަހަކުން ބާއޭ އިޔާންގެ ހިތައް އަރަމުން ދިޔައެވެ.

އަމީރާއަކަށް އެއްޗެއް ނުބުނެވުނެވެ. ލިފްޓް ހުއްޓުމާއި އެކު އޭނާގެ އަތުގައި އިޔާން ހިފާލަމުން ފޭބިއެވެ. ބޭރަށް ނުކުތްއިރު އަޅިފުސްކުލައިގެ ވިލާތަކުން އުޑުމަތި ބައްދާލާފައި އޮތް ގޮތުން ހީވީ ދެންމެ ދެންމެ ވާރޭގެ ތިކިތައް އޮހިގެން ފާނެހެންނެވެ. ޖެހެމުން ދިޔަ ތެތްފިނި ވައިރޯޅިތަކުގެ ހިލަންތައް ފަހަރަކަށް ވުރެން ފަހަރެއް ދިޔައީ ބޮޑަށް ވަމުންނެވެ.

މޫސުން ވެސް ހީވީ އަމީރާއާއި ބައިވެރި ވެފައިވީ ހެންނެވެ. ވިއްސާރާއިގެ ތިކިތައް ފަދައިން އެ ދެލޮލުގައި ބޮނޑިވެފައިވާ ކަރުނުތައް ހީނީ ދެންމެ ދެންމެ އޮހިގެންފާނެ ހެންނެވެ. ހިތައް ކުރުވާފައި ވަނީ ނަފްސު ބަލިކަށިވެގެން ދާފަދަ އަސަރެކެވެ. ހުރިހާ ކަމެއް އޭނާގެ ބޮލުގައި އަބަދު އަޅުވާ އިރު އިޔާން އެ ކަންތައް ކުރަނީ ކިހިނަކުން ހެއްޔެވެ. ކުރާ ހުރިހާ ކަމަކަށް ފަހުގައި ވެސް، އެއިން ކަމެއް އޮޅުން ފިލުވައިދޭކަށް ނޫޅެއެވެ. ކަމެއް ކުރިއްޔާ ކުރަނީ އިތުރަށް އޭނާއަށް ކަންކަން އޮޅޭހެންނެވެ. އެ ހަމަ ނުޖެހުންގަނޑު އިތުރަށް ކުރިލައިގެން ދާފަދައިންނެވެ. ކައިރީގައި ހުރެމެ އެ ލޯބި ނުލިބި ހުރުން އެއީ ކިހާ ވަރެއްގެ ވޭނެއްކަން އޭނާއަށް ވުރެން ބޮޑަށް އިޙްސާސްވާނެ މީހަކު ވާނެބާއެވެ.

ކާރާއި ހިސާބުން އިޔާންގެ އަތް އަމީރާ ފޮޅުވާލީ ދެލޮލުން ކަރުނަތައް އޮހިގަތުމުންނެވެ. ކުރަމުން ދިޔަ ހިތްވަރު ނެތިގެން ދިޔައީއެވެ. ފަސް އެނބުރުނީ އެއިން އެންމެ ތިއްކެއް ވެސް އޭނާއަށް ދައްކާ ހިތް ނެތީމައެވެ.

”ކާރަށް އަރާ “ އިޔާންގެ ހަރުކަށި އަޑު އިވުމުން އިތުރަށް ކެތްކުރަން އުނދަގޫ ވިއެވެ. އިތުރު އެއްޗެއް ބުނުމުގެ ކުރިން އަމީރާ ފަހަތު ސީޓުގެ ދޮރު ހުޅުވާލާފައި އެރިއެވެ. ސިހުމެއް ލިބުނީ އޭނާގެ ފަސް ފަހަތުން އިޔާން ވެސް ފަހަތު ސީޓަށް އެރީމައެވެ. އިޔާންއަށް ފެނުމުގެ ކުރިން މޫނު ފުހެލަން އުޅުނު ނަމަވެސް ހުއްޓެން ޖެހުނީ އެއަތުގައި ހިފާ ގާތައް ދަމާލުމުންނެވެ. މިފަހަރު އަމީރާ ގަދަ ހަދާކަށް އެއްވެސް މަސައްކަތެއް ނުކުރެއެވެ. އެއަށްވުރެން ބޮޑަށް ހިތައް ވަނީ އަސަރުކޮށްފައެވެ.

****

(ނުނިމޭ)