ހިރާސް 2 (11)

”ރުއާ އާއި މެދު ހާސް ނުވޭ.. ފަށާބަލަނިކަން“ އަލާނިއަލް އަނެއްކާ ވެސް އެދުނެވެ. ރާބިއުއަށް ބަލައިލެވުނީ ޒައްޔާނުގެ މޫނަށެވެ.

”އެހާ ތަފްސީލްކޮން ކިޔައިދޭކަށް ވަގުތެއް ނެތް އެކަމަކު ކުޑަ ގޮތަކަށް ބުނެލަ ދެވިދާނެ.. ވިހި އަހަރު ކުރިން އެއީ… އަހަންނާއި ހޫރައިން މިއީ އެންމެ ކުރިން ސުރެން ލޯބީގެ ގޮތުން ގުޅިގެން އުޅުނު ދެމީހުން.. ލޯތްބަކީ ކޯއްޗެއްކަން ކިރިޔާ އެނގޭނީ…އަހަންނަކީ ނިކަމެއްޗެއް.. ހޫރައިން އެއީ މުއްސަނދި ދެމަފިރިއެއްގެ ހަމަ އެކަނި ހުރި ފުރާނަ..ވަރަށް ހަމަ ޖެހިގެން އުޅުނީ ވަރަށް އުފަލުގަ..އެކަމަކު އެންމެންނާއި ސިއްރުން…ހުރިހާ ކަމެއް ބަދަލްވީ ހޫރައިންގެ އާއިލާއަށް އެނގުނު ހިސާބުން.. ހޫރައިންގެ ބައްޕައާއި ކަނެކްޝަން އިންނަ ފަރާތެއް އެއީ އެތަނުގެ ވެރިއަކަށް އޭރު ހުރީ.. އޭނާގެ ފިރިހެން ދަރިއާއި ހޫރައިންގެ ކައިވެނި އެއީ އާއިލާގެ ތެރޭގައި މާކުރިން ވެސް ރޭވިފަ އޮތް ކަމަކަށް ވަނީ.. ހޫރައިން އަށް އެކަން އެނގުނީ އަހަންނާއި ކައިވެނި ކުރަން ބޭނުން ވެގެން އޭނާގެ އާއިލާ ގާތުގަ ބުނި ދުވަހު.. ގޯސް ވީ އެހިސާބުން“ ރާބިއުއަށް ލޯ މަރާލެވުނެވެ. އެވާހަކަ ދެއްކުން އެއީ ކިހާ އުނދަގޫ ކަމެއްކަން އެމޫނުން ދޭހަވެއެވެ.

ދެލޮލުގެ މިޔަކަނުން ފޭދިފައި ހުރި ކަރުނުތަކާއި އެކު އެހީއަކަށް އެދި އޭނާ ބަލައިލީ ޒައްޔާނުގެ މޫނަށެވެ. ޒައްޔާނުއަށް ދޫކޮށްލެވުނީ ފުންނޭވާއެކެވެ.

****

”ޒައްޔާން އާއި ރާބިއުގެ ކަނެކްޝަން ކިހިނެތް އުފެދުނީ؟.. އަބަދުވެސް އެނގެނީ ލިއަމްގެ ރައްޓެއްސެއްގެ ގޮތުގަ.. މިގޭ ކުރިމަތިން ބައްދަލްވީމަ އަހަރެން ވަރަށް ހައިރާންވެސް ވެފަ މިހުންނަނީ“

”ރުއާގެ މަންމަ ހޫރައިންއަކީ އަހަރެންގެ މަންމަ ހަނާގެ ދައްތަ.. ރުއާއަކީ އަހަރެންގެ ކޮއްކޮއެއް.. ދެބެންގެ ދެދަރި ކޮއްކޮއެއް.. ރުއާއަށް ވެސް އެނގޭނެ އެކަން.. އެކަމަކު އާލިއާ އަކަށް ނޭނގޭނެ ރުއާއަކީ އަހަރެމެންގެ ފެމެލީ ކަމެއް.. ރުއާ އަކަށް ވެސް އާލިއާ އެއް ނޭނގޭނެ.. އެނގޭނެހާ ވެސް އެއްޗަކީ އަހަރެންގެ އިތުރު ކޮއްކޮއެއް ހުންނަކަން.. އެއީ އަހަރެމެންނާއި ރުއާ ވަކިން އުޅުނީމަ އެކަން ސިއްރުވެފަ އޮތީ.. އާލިއާ އެއީ އަހަރެމެންގެ ބައްޕަ ފަދައިން ނޯމަލްކުއްޖެއް.. އަހަންނަކީ މަންމަގެ ސައިޑް.. ދުރުގަ އުޅުނު ނަމަވެސް އަހަންނާއި ބޭބެއާއި ކަނެކްޝަން އަބަދުވެސް އިންނާނެ“ ޒައްޔާނު ، އިއްވާދިނީ އަލާނިއަލް އުއްމީދު ކުރި ފަދަ ވާހަކަތަކެއް ނޫނެވެ. ބަސް ހުއްޓުނެވެ. ދުނިޔެއަކީ ހާދަ ކުޑަ ތަނެކޭ ހިތައް އެރިއެވެ. ބޯޖަހަލާމުން އަލާނިއަލް އިތުރަށް ވާހަކަ ކުރިއަށް ގެންދިޔުމަށް ބުނެލިއެވެ.

”ތެދެއް އެބުނީ.. މްމްމް..އަހަންނާއި ހޫރައިންގެ ގުޅުން އެނގުނު ހިސާބުން ފެށީ ދެމީހުން ދުރުކުރުމުގެ މަސައްކަތް .. އެކަން ކާމިޔާބުވި އެމީހުންނަށް.. ހޫރައިންގެ ކައިވެނި އޭނައާއި  ކުރެވުނީ..އެހިސާބުން މަށައް ހޫރައިން ހަމަ ގެއްލިގެން  ދިޔައީ.. ހޫރައިންގެ ކައިވެނީގެ ހަބަރު ލިބުނު ހިސާބުން ނޭނގުނު ވީ ގޮތެއް ވެސް… މުޅި ދުނިޔެ ހުއްޓުނު ހެން ހީވީ… މީހާ އެއްކޮން ބަލިކަށިވެ ހޮސްޕިޓަލަށް ގޮސް މަސައްކަތް ކުރާނެ ހިތްވަރު ވެސް ގެއްލި މުޅިން ނަފްސާނީވީ.. އެގޮތުގައި ހަތް އަހަރު ވީ ފަހުން އަލުން ހޫރައިން އަހަންނަށް ފެނުނީ .. ފެނުނީއެއް ނޫން .. ހޫރައިން އަހަރެންގެ ކައިރިން އައީ، އެވެސް އެމީހުންނާއި ފިލައިގެން.. އެރޭ އަހަރެންގެ ގާތައް އައި އިރު އަތްމަތީގަ އޮތް މަހެއް ނުވާ ތުއްތު ކުއްޖެއް.. އެއީ ރުއާ“ ރާބިއުގެ އަޑުގައި ވަނީ ތުރުތުރެކެވެ. އެދުވަސް މާޒީވެ ރުއާނާއަށް ފަންސަވީސް އަހަރު ވީއިރު ވެސް ރާބިއުގެ ހިތުން ދުވަހަކު ވެސް ފިލައިގެން ނުދާނެއެވެ.

”އެދުވަހު ހޫރައިންގެ އާއިލާއަށް އިޙްސާސް ވި ގަދަކަމުން އޭނަ ލައްވާ ކުރުވި ކައިވެނީގެ ހިތިކަން.. އެރޭ މަށައް އެމީހުން ފެނުނު އިރު، ދެމައިންގެ ގައިގަ ހުސް ލޭ.. ހޫރައިން އާދޭސް ކޮށްފަ ބުނި ސަލާމަތް ކޮށްދޭން.. އެއްވެސް އެއްޗެއް އޮޅުމެއް ވެސް ނުފިލި… ވަރަށް ބޮޑު ޝޮކެއް ލިބިފަ ހުރީ…ހޫރައިންއަށް ވެފައި ހުރިގޮތުން މިކޮޅުގައި ނުތިބެން، ދެމައިން ގޮވައިގެން ޖެހިގެން އައި ދުވަހު ރާއްޖެ ދިޔައީ .. އެތަނަށް ދިޔުމަށްފަހު ކިޔައިދިން ކޮންމެ ވެސް ވަރަކަށް .. ކައިވެނިކޮށްފަ މާދުވަހެއް ނުވެ ޕްރެގް ވީ.. ފިރިހެން ދަރިއެއް ލިބުނު.. އިން ދުވަހުން ފެށިގެން އޭނާގެ އަނިޔާ ވެރިކަން ދައްކާލައިފި.. އަނިޔާ ކޮށްކޮށް ކޮޅުން ނުލައިގެން ފިރިހެން ދަރިފުޅު ގޮވައިގެން ފިލަން އުޅުނު ކަމަށް ބުނި.. އެކަމަކު“ ރާބިއުއަށް ވާހަކަ ދައްކަން އުނދަގޫ ވިއެވެ.

”ހާދަ ނުބައި މީހެކޭ .. އޭރު ފިލަން އުޅުނީމަ ކިހިނެތް ވީ؟“

”ހޫރައިންއަށް ލިބުނު މިބުނާ ފިރިހެން ދަރި ވީ އެ ފިރިހެނާގެ ނުބައި ނުލަފާކަން ލިބިފަ ހުރި އަނިޔާ ވެރިއަކަށް.. އުމުރުން ހަތް އަހަރުގައި ވެސް އެކުއްޖާގެ ބޮލަށް ރަނގަޅަށް އެމީހުން އެރެފަ ތިބީ .. ހޫރައިން ފިލައިގެން ދާން އުޅޭ ހަބަރު ވެސް އެމީހުންނަށް ދިނީ މިބުނާ ދަރި ބިލާލް.. އަނިޔާކޮށްކޮށް ކިރިޔާ މަރު ނުވިކަން.. އެމީހުން ހޫރައިން ހައްޔަރު ކޮށްފަ ހުއްޓަ އަނެއްކާ ވެސް ޕްރެގްކަން އެނގިގެން ދޫކޮށްލީ.. އެގޮތުގައި ކެތްކުރަމުން ގޮސް އެންމެ ފަހުން އޭނާ ވިހައިގެން މަހެއް ވީތަނުން ފިލައިގެން އައީ ބިލާލް ބަހައްޓާފަ.. ސަބަބަކީ އެމީހުންގެ އަނިޔާ ވެރިކަމުން ރުއާ ސަލާމަތް ކުރަން.. އޯލްރެޑީ ބިލާލްގެ ބްރެއިން ވޮޝްކޮށްލާފަ ތިބީ.. އެދުވަހަށް ފަހު ރާއްޖެއަށް ދިރިއުޅުން ބަދަލް ކޮށްގެން ވީ ރުއާއަށް އެންމެ އަތްއަހަރު، އަނެއްކާ މިކޮޅަށް އަންނަން ޖެހުނީ ޒައްޔާނުގެ މަންމަ ހަނާ މަރާލި ހަބަރު ލިބިގެން.. އެއައި ގޮތަކަށް ނުދެވުނު“ ރާބިއު އެހިސާބުން ނިންމާލީ ދެން އިތުރަށް ކުރިއަށް ދާން އުނދަގޫވެގެންނެވެ. އެއީ އެހާ ތަފްސީލާއި އެކު ކިޔައިދޭން އޭނާއަށް ކުޅަދާނަ ވާހަކަ ތަކެއް ނޫނެވެ. އެހާ ހިސާބަށް ވެސް ވާހަކަ ގެންދިޔައީ ކުރި ނުހަނު ގަދަ ހިތްވަރުންނެވެ. އަލާނިއަލްއަށް އިޙްސާސްވީ ކަންނޭގެއެވެ. ރާބިއުގެ ބުރަކަށީގައި ޖަހާލީ ހިތްވަރު ދިނުމުގެ ގޮތުންނެވެ.

”އިޓްސް އޯކޭ އުނދަގުލިއްޔާ..އެކަމަކު އަހަންނަށް ސަމާލުވާން ވީ މިންވަރު އެނގޭނީ ކޮންމެވެސް ވަރެއް ކޮށްލަ ދިނީމަ“ އަލާނިއަލް ބަލައިލީ ޒައްޔާނުއާއި ދިމާލެވެ.

”މަންމަގެ ޖަނާޒާގެ ކަންކަން ނިންމާފަ އެނބުރި ދާން އުޅެނިކޮން ޔާރޑުން ނުނިކުމެވޭ ރުއާ ނެތްކަން އެނގުނު އިރު.. އެހިސާބުން ދެން ގޯހެއް އުޅޭކަން އެނގުނު.. މުޅި އާއިލާ ރުއާ ހޯދަން އުޅުނު .. ނަމަވެސް ނުފެނުނު .. ފެނުނީ ބިލާލް..އެވެސް  ވަރަށް ދުރުން.. އޭނާގެ މޫނުމަތީން ފެނުނީ ކާމިޔާބީ ކުލަވަރު.. ދެން އެހިސާބުން އެނގުނު އެމީހުން ރުއާ ގެންދިޔައީ ކަން.. އޭނާ ލޯމަތިން ދިޔައީ.. އަހަރެމެން އެންމެން ހޯދަން ދިޔައިން.. މަހެއް ފާއިތު ވިއިރު ވެސް ނުފެނުނު.. ދައްތަ ވަރަށް ސަކަރާތްވެފަ ހުރީ.. އެހެން ހުއްޓާ އެއްދުވަހު ބިލާލް އައިސް ދައްތަ އާއި ބައްދަލް ކޮށްފަ ބުނީ ބުނާ ތާކަށް އަންނަން.. ރުއާ ސަލާމަތުން އެބަހުރި ކަމަށް.. އެކަމަކު ލިބޭނީ އެކަނި ގޮސްފިއްޔާ ކަމަށް ބުނީ… ބޭބެ އާއި އެއްކޮން ދާން އަހަރެމެން ވެސް ބޭބެވެސް އާދޭސް ކުރި އެކަމަކު ރުއާއަށް ގެއްލުމެއް ދީފާނެތީ ދައްތަ އަމިއްލައަށް އެންމެނާއި ސިއްރުން ދިޔައީ ބިލާލްއަށް އިތުބާރުކޮށްފަ.. ދަރިފުޅު ކިތަންމެ ގޯހަކަސް އަމިއްލަ ދަރިއެއް ވިއްޔާ ކޮންމެވެސް ވަރެއްގެ އިތުބާރެއް މައިމީހާގެ ހިތުގަ އޮންނާނެތާ ދޯ.. އަނެއްކޮޅުން ސަލާމަތް ކުރަން މިދަނީ ވެސް އަމިއްލަ ދަރިއެއް..  ދިޔަތަނުން ދައްތަ ހައްޔަރު ވީ.. ރުއާ ގޮވައިގެން އެ ބުނާ ފިރިހެން މީހާއާއި ބިލާލް ހުރި އެތަނުގަ.. ހުރިހާ ކަމެއް ވެ ނިމިއްޖެ ބޭބެއާއި އަހަރެމެންގެ އާއިލާއަށް އެނގިގެން ދިޔައިރު.. ރުއާ ފެނުނީ ވަލު ތެރޭގައި ވެއްޓިފަ އޮތްވަ..ހޭވެރިކަން ވެގެން އެހުމުން ބުނީ އެއްވެސް ކަމެއް ހަނދާނުގަ ނެތް ކަމަށް.. އެތަނުގައި ހިނގާ ދިޔައީ ކިހާ ވަރެއްގެ ހާދިސާއެއް ކަމެއް ވެސް ނޭނގޭ.. އެނގެނީ ބޮޑުކަމެއް ވީ ކަން.. ރުއާގެ ގައިގަ އެތަން މިތަނުގައިވީ ޒަހަމްތައް ވެސް އެކަމަށް ހެކިދޭ“ ޒައްޔާނު ކިޔައިދިނެވެ.އަލާނިޔަލް އިނީ ހައިރާންވެގެން ގޮސް އަނގައިން ބަހެއް ބުނުމަށް ވެސް ނުކުޅެދިފައެވެ.

“ ރުއާ ބުނި ހީވެއޭ ފުސްކޮން އަންހެނަކާއި ފިރިހެނަކު ފެނުނު ހެން …އެކަމަކު މާ ރަނގަޅަކަށް އޭނާ ހަނދާނެއް ނެތް.. އެވަގުތު އަހަންނެއް ވެސް ނުދަން ހޯދާކަށް.. ފަހަރުގަ ދެވުނު ނަމަ އެ އެންމެން ސަލާމަތް ވެދާނެ..އެކަމަކު ރުއާ އޮތް ހާލުން އަހަންނަށް މަޖުބޫރުވީ ގޮވައިގެން ފަރުވާއަށް ދާން.. ލެއިން ފޯވެފަ ވިއްޔަ މުޅި ކުއްޖާ އޮތީ.. ހޫރައިންއާއި އެކު ދެމީހަކު ގެންދިޔަ ހެން ހީވިއޭ ރުއާ ބުނި ބުނުން އަހަންނަށް ވެސް ތެދުހެން ހީވި .. އެއީ ރުއާ ފަރުވާ ކުރަން ހޮސްޕިޓަލަށް ގެންގޮސްފަ ރަނގަޅުކަމަށް ޑޮކްޓަރުން ބުނުމުން އާއިލާގެ މީހަކާއި ހަވާލުކޮށްފަ އަހަންނާއި ޒައްޔާންގެ ބައްޕައާއި ދިޔައިން އެތަން ބަލަން.. ފެނުނީ އަންހެނެއްގެ ފައިވާނެއް.. އެއްކޮން އެކަށް ކަށަވަރުވެ އަހަންނަށް ޔަގީން މިވީ ތިން ދުވަސްކުރިން ބިލާލް އައިސް އަމިއްލަ އަށް އެހެން ބުނީމަ..“ ބިލާލް ބުނިގޮތައް ރާބިއު ކިޔާލަ ދިނެވެ.

”އޯހް މައި ގޯޑް!.. އަދިވެސް ރުއާގެ ފަހަތުން ހޫރައިންގެ ކުރީގެ ފިރިމީހާގެ މީހުންތަ؟“ އަލާނިއަލް އެންމެ ބޮޑަށް އަޅައިގަތީ ހޫރައިން އާއި އެކު އަތުލައިގަތް ދެމީހުންނޭ ބުނި ތަންކޮޅެވެ. ނޭނގެއެވެ. ނޭނގޭ ސަބަބަކާއި ހުރެ އޭނާގެ ހިތް ތެޅިގަތެވެ. އެބުނާ ދުވަސްވަރަކީ އޭނާގެ ލޯބިވާ ބޭބޭ ވެސް ގެއްލުނު ދުވަސްވަރެވެ. އިއްތިފާގަކަށް ވެދާނެ ބާއެވެ؟. ނޭނގެއެވެ. އަލާނިއަލްއަށް ދެފަރާތައް ބޯހޫރުޥާލެވުނެވެ.

”އާންން ޑިފީ.. އަހަންނަކަށް ނޭނގޭ ކީއްވެކަމެއް..އޭގެ ފަހުންވެސް ވަރަށް ގިނަ ކަންކަން އެގޮތައް ވެގެން ދިޔަ.. އެކި ތަންތަނުން ފެނިގެން ބިރު ދައްކާ.. ރުއާއަށް ހަމަޖެހި ނުލެވޭ އެކަމާއި ހުރެ.. ރުއާއަށް އޭނާގެ ޕަވާރސް ތައް ދަސްކޮށްދީފާނެތީ އެމީހުން އުޅެނީ.. އެތައް އިންޒާރެއް މަށައް ވެސް ބިލާލް ދީފި..ހޫރައިންގެ އާއިލާއަށް ގެއްލުމެއް ދީފާނެތީ މިއުޅެނީ އެމީހުންނަށް ވެސް ނުފެނި.. ހަނާ ވެސް މަރާލީ ހޫރައިން އައީމަ ބަދަލެއްގެ ގޮތުގަ .. ރުއާ ހުރިއްޔާމުގަ އިތުރު މީހެއްގެ ފުރާނަ ވެސް ދުއްވާލާކަށް ފަހަކަށް ނުޖެހޭނެ.. އެވަރުގެ ނުބައި ބައެއް އެއީ.. ސޯ ޑިފީ އެހީވާނަންތަ؟“

”ޔަގީނެއްނު.. އެކަމަކު ރުއާއަށް އެނގޭނެ ތަ ތިބުނާ ދެމީހުންގެ ސޫރައެއް؟ ކީއްވެ ރުއާއަށް ޕަވާރސްތައް ދަސްކޮށްދިނުން މަނާ ވީ ؟“ އަލާނިއަލްގެ ހިތުގައި އުފެދިގެން ދިޔަ ސުޥާލްތައް ކުރަމުންދިޔައެވެ.

”އެއީ ތާ މި ނޭނގިގެން އުޅޭ އެއްޗަކީ.. އަހަރެމެންގެ ނަސްލުގެ ކޮންމެ މީހެއްގެ އުމުރުން ފަނަރަ އަހަރު ވުމުގެ ކުރިން އެހުރިހާ ޕަވާރސް އެއް އުނގެނެން ޖެހޭ.. އެއީ ކުރުން މަޖުބޫރު ކަމެއްގެ ގޮތުގައި އޮންނަނީ ދޯ.. އެކަމަކު ރުއާއަށް އަމުރު މިކުރީ އެކަން ދަސްނުކުރަން ބުނެފަ.. އެވެސް ވެރިޔާ މި އަމުރު ކުރީ! ހިއެއް ނުވޭ ރުއާއަށް އެނގޭނެ ހެންނެއް.. ވަރަށް ތޫނު އެއްޗެއް ގަޔަށް ހެރިކަން އެކަނި އެނގެނީ..އެގަނޑީގަ އެކުއްޖާ ވެއްޓެން ދިޔައީ..ބިންމަތީގަ ޖެހެނިކޮން ފުސް ފުސްކޮން އެމީހުން ފެނުނީ..އެއީ ރުއާއަށް ވެސް އެނގޭ ވަރަކީ.. އޭނާގެ ކޮނޑުގައި އިން ކައްޓެއް ޒާތު އެއްޗެއް ޖަހާފަ އިން ކަހަލަ ނިޝާނެއް“

”ހީވާ ގޮތުން ރުއާގެ މެމޮރީތަކާއި ކުޅެލަން އިންޖެކްޝަނެއް ޖެހީ އެ.. އެކަމުގެ ސަބަބުން އެ ހަނދާންތައް އެއިނީ ގޮސްގަ.. އެކަމާއި އަނެއްކާ ޕަވާރސް ތަކާއި ވެސް ގުޅުމެއް ވާނެބަ؟“ އަލާނިޔަލް ނިތް ކުރީގައި ހާކައިލީ ވިސްނާލާ ފަދައަކުންނެވެ. ރުއާނާއަށް އެއްވެސް ތާކުން ރައްކާތެރިކަމެއް ނެތެވެ. ރާބިއު ނެތްތާކު ރުއާނާ އެކަނި ހުންނާކަށް އޭނާ ދުލެއް ނުކުރާނެއެވެ.

ރާބިއު އަތުކުރީގައިވާ ގަޑިއަށް ނަޒަރެއް ދިން އިރު އެގާރަ ޖެހީއެވެ. ގޭގެ ދޮރު ހުޅުވާލުމަށްފަހު ރުއާނާ އެތެރެއަށް ވަނީވެސް އެވަގުތުއެވެ.

”ބައްޕާ..“ ރުއާނާއަށް ގޮވާލެވުނެވެ. އެފަދަ ގަޑީއެއްގައި އުއްމީދު ނުކުރާ ދެ ފަރާތް ފެނުމުން ރުއާނާ ހިސާބަކަށް ހައިރާންވިއެވެ. ހާއްސަކޮން ޒައްޔާން ފެނުމުން ދެލޯ ބޮޑުވިއެވެ.

”ހޭއި“ ޒައްޔާން ރީތި ހިނިތުންވުމެއްގައި ހުރެ ރުއާނާގެ ގައިގާ ބައްދާލި އިރު ރުއާނާގެ ތުންފަތުގައިވެސް ދެމިލީ އުފާވެރި ހިނިތުންވުމެކެވެ.

”ދެމީހުން ވާހަކަ ދައްކާލާ.. އަހަރެން މިރޭ ރުއާ ގޮވައިގެން ދާނީ“ ރާބިއުގެ ކަންފަތް ކައިރީގައި އަލާނިޔަލް ބުނެލިއެވެ. އެކަމާއި އެއްބަސް ވުމުގެ ގޮތުން ރާބިއު ވެސް ބޯޖަހައިލިއެވެ.

އަދި ދިމާވާނެ ކަމަށް ބުނެ، ޒައްޔާނު ދުރުވެލަމުން އަލާނިޔަލްގެ ފަސްފަހަތުން ނުކުމެގެން ދިޔައެވެ. ދެމީހުން އެކަނި ވުމުން ރާބިއުއަށް ރުއާނާއާއި ދިމާ ބަލައިލެވުނީ ތަފާތު ގޮތަކަށެވެ.

”ބައްޕާ އެނީތިނގް ރޯންގް؟ ޒައްޔާނު ބޭބެ އާއި ޑޮކްޓާރ އަލާނިޔަލް މިގޭގަ؟ އެންޑް ބައްޕަގެ ފޭސް؟ ހާދަ ކަންބޮޑުވެފައި ހުރިހެން ހީވެއޭ..ކަމެއް ގޯހީތަ؟“ ރާބިއުގެ އަތުގައި ހިފާލެވުނު ހިނދު އިތުރު ސިހުމެއް ލިބުނީ ކުއްލިއަކަށް އޭނާގެ ގައިގާ ރާބިއު ބައްދާލި ގޮތުންނެވެ. އެހާމެ ބާރަށް ބާރަށެވެ.

”ބްބް..ބައްޕާ.. ”ރުއާނާގެ އަޑު ލަސްލަހުން ނުކުތެވެ. އޭނާގެ ކޮނޑު ތެމެން ފެށުމުން ތެޅި ގަނެވުނެވެ.

”ބައްޕާ ކިހިނެތްތަ ވީ؟“ ރުއާނާ ދުރުވެލަން އުޅުމުން ރާބިއު ހައްތަހާ ގާތްކޮށްލިއެވެ.  ދެލޮލުގައިވާ ފެންތަކާއި އެކު ގަޑިއަށް ބަލައިލެވުނެވެ. ބިލާލް ބުނި ވަގުތު ވަނީ ނުހަނު ގާތްވެފައެވެ. ހިންދިރުވާލަމުން ރާބިއު ދެލޯ ފުހެލިއެވެ.

”ދަރިފުޅާ ބައްޕައަށް ކުޑަ ދުވަސްކޮޅަކަށް ދާންޖެހިއްޖެ… ޑިފީ ބޭބެގެ ބަސްއަހާތި އިނގޭ.. ޒައްޔާންބޭބެ ވެސް އެހުރީ ހަމަ.. ބައްޕަ ނެތަސް ދަރިފުޅަށް އެހީވާނެ އެމީހުން އެބަތިބި “ ބިލާލްގެ ނަން ކުޑަގޮތަކަށް ބުނަން އުޅެފައިވެސް ވަގުތު ނެތުމުން މަޑުކުރެވޭކަށް ނެތެވެ. އެހެންނޫނަސް ރުއާނާ އިތުރަށް ބިރުގަންނުވާލާ ހާސްކުރާކަށް ރާބިއު ބޭނުމެއް ނޫނެވެ.

”ބައްޕާ އެކަމަކު؟ ރުއާ ވެސް ގެންދަން ވީނު“

”ނޫނޭ ދަރިފުޅާ..އޭރުން ކިޔެވުމާއި ވަޒީފާއަށް ވެސް ބުރޫއަރާނެ..ބަސްއަހައިގެން އުޅޭތި.. ވަރަށް ހަނދާންވާނެ އެނގޭ“

”މުޅި އުމުރަށް ބައްޕަ ދާން އުޅޭހެން ހީވަނީ.. އަހަންނަށް ކަމެއް ސިއްރުކުރަން ދޯ އެބަ؟“ ރުއާނާއަށް ޝައްކުވަނީއެވެ. ކުދަ ދުވަސްކޮޅަކަށް ދާނަމަ އެގޮތައް ރާބިއު ހަމަ ރޯނެބާއެވެ. މަންމަ ގެއްލުނު ފަހުން ރާބިއުގެ ދެލޮލުން ހިތާމަވެރިކަން ތާއަބަދުމެ ފެންނަން ހުއްޓަސް،ރުއާނާގެ ކުރިމަތީގައި އަދި އެހެންމީހެއްގެ ކުރިމަތީގައި ވެސް ރޮއެ ނުހަދައެވެ. ރުއާނާގެ ހިތުގެ ހަމަޖެހުން ގެއްލިއްޖެއެވެ.

“ ބައްޕަ ހަމަ ރަނގަޅޭ.. ޓްވެލްގެ ކުރިން ދާން ޖެހޭ.. ހުރިހާ ތަނެއް ލޮކް ކޮށްފަ ކީ ހިފައިގެން މިގަޑީގަ ޑިފީ ބޭބެ އާއި އެއްކޮން ދޭ އިނގޭ.. ބޭގް އެއް ރެޑީ ކޮށްލައިގެން ނުކުމޭ .. ބައްޕައަދި މަޑުކޮށްލާނަން ދަރިފުޅު ނުކުންނަން ދެން“ ރާބިއު ބުނިގޮތައް ކަންތައް ކުރުމަށް ރުއާނާ ކޮޓަރިއަށް ވަނީ ހިތާއި ދެކޮޅަށެވެ.

”ކަމެއް އަނެއްކާ ގޯހީބަ؟ އެމީހުންގެ ކަމެއް ބަ؟ ކަމެއް ބޮޑުވިޔަސް ބައްޕަ އަނގައިން ހޯދުމަކީ ކަނޑު އަޑީގައި ނޭވާލުން ކަހަލަ ކަމެއް.. އަހަރެން އަމިއްލައަށް ހޯދުން ނޫން ގޮތެއް ނެތް“ އެ ފިކުރުގައި ހުރެ ކޮޓަރިއަށް ވަދެ އެންމެ އަލިގަދަ ބޮކި ޖައްސާލިއެވެ. އަލަމާރިން އޭނާ ގެންގުޅޭ ކުޑަ ފޮށި ހޯދާލަމުން ، ހިފައިގެން އައިސް އެނދުމަތީގައި ބައިންދާލަމުން ދެތިން ހެދުމާއި ކިޔަވާ ސާމާނުތަކާއި ލެޕްޓޮޕް ލިއެވެ. ދެތިން ދުވަހޭ ބުނުމުން މާ ގިނަ ސާމާނެއް ގެންދާކަށް ރުއާނާ ނޫޅުނެވެ. ހުރިހާ އެއްޗެއް އަޅާ ނިމުމުން އަތްދަބަހާއި އެކު އެއަށް ކޮންމެހެން އަޅަން ޖެހޭ ސާމާނުތައް އަޅާލަމުން ނުކުންނަން ދިޔައެވެ. ނަމަވެސް ދެފަޔަށް ހުއްޓުމެއް އެރީ ކަންފަތް ދޮށުން ހިލިލައިގެން ދިޔަ ވައިރޯޅިންނެވެ. ގައިމުވެސް ހީއެއް ނޫނެވެ. އޭނާގެ އިސްތަށިގަނޑު ވެސް ތެޅިލައިގެން ގޮސްފިއެވެ.

”ކަ..ކާކު؟“ ހިންދިރުވާލަމުން މޭގައި އަތް ޖައްސާވުނީ ބިރުގަނެފައި ހުރި ވަރުންނެވެ. ފަސް އެނބުރިލާކަށް ވެސް ނުކެރުނެވެ. ކުޑަދޮރު ހުރީ ހުޅުވިފައި ކަން ހަނދާންވެ ނުލެއްޕުނު މޮޔަ ވެސް މިޙާރު ހީވާން ފަށައިފިއެވެ. ބިރުން ސިހިސިހި ހުއްޓާ އިވުނީ ކުއްލިއަކަށް ކުޑަދޮރު ޖެހުނު އަޑެވެ. ނުހަނު ބާރަށެވެ. ”ބައްޕާ….އާހްހްހް“ ގަނެފައިވާ ބިރު ދެގުނަ ވެގެން ދިޔައިރު ހަޅޭކެއްގެ އަޑުން މުޅި ކޮޓަރި ގުގުމާލިއެވެ. ކުއްލިއަކަށް ފަސް އެނބުރުނު އިރު ފެނުނީ އެމީހަކު ކުޑަދޮރުން ބޭރަށް ދިޔަ ތަނެވެ. ކަޅު ހެދުމުގައި ހުރި މީހެކެވެ. ރުއާނާގެ މެޔަށް  ހީވީ ފިނިފެން އެއްޗެއް އޮއްސާލެވުނުހެންނެވެ. އެހާ ކައިރިން ރަތާއި ކަޅުކުލައިގެ ފިޔަގަނޑު އެފެނުނީ މުޅިން އަލަށެވެ.

”ދަރިފުޅާ..ދަރިފުޅާ“ ރާބިއުއަށް އަޑު އިވިގެން އައިއިރު ރުއާނާގެ ފައި ބިމުގައި ހަރުނުލައެވެ. ބައްޕަ ފެނުމާއި އެކު ގޮސް ބައްދާލި އިރު ވެސް އޭނާގެ ހިތް ތެޅެމުން ދިޔައީ ނުހަނު ބާރަށެވެ.

”އެ..އެ..އެމީ..އެމީހުން..“އެންމެ ބަހެއް ވެސް ބުނެވުނީ އެތައް ވަރަކުންނެވެ.

ރުއާނާ ދޫކޮށްލާފައި ކުޑަ ދޮރު ކައިރިއަށް ރާބިއު ދިޔައެވެ. ބޭރުން ތިރި ބަލައިލި އިރު ކޮޓަރިއާއި ދިމާލަށް ވާހެން ތިރީގައި ހުރި ބިލާލް ފެނި އަތްމުށްކެވުނެވެ. އޭނާގެ ފަހަތުން އެފަދައިން ކަޅުހެދުމުގައި މޫނު ފޮރުވައިގެން ތިބި އެތައް ބަޔަކު ތިއްބެވެ. ފަހަތައް ޖެހިލަމުން ދޮރު ލައްޕާ ތަޅުލަމުން ރާބިއު ކުރިމަތީލީ ރުއާނާއެވެ. އޭރު ރުއާނާ ބިރާއި ސިހުން އެކުލެވިފައި ހުރެ ބަލަމުން ދިޔައި ކުޑަ ދޮރުކައިރީގައި ހުރި ދޫނިފަތްތަކަށެވެ. ރުއާނާގެ އަޑަށް ކަންނޭގެއެވެ. ބޭރުގައި ތިބި އަލާނިޔަލްއާއި ޒައްޔާންވެސް ދުވެފައި އައިސްފިއެވެ. ތިރީގައި ހުރި ދޫނިފަތްތައް ފެނުމުން ވީގޮތް އެމީހުންނަށް އެނގުނެވެ. ދެމީހުން ދާންވެގެން ދިމާކޮށްލި ހިނދު ރާބިއު ދެފަރާތައް ބޯހޫރުވާލި އެވެ.

”އިޓްސް އޯކޭ ދަރިފުޅާ .. އިޓްސް އޯކޭ … ބައްޕަ ބޭނުމެއް ނުވޭ މިވަގުތު ދަރިފުޅު ދޫކޯށްލާފައި ދާކަށް …އެކަމަކު ވެސް ދާން ޖެހިއްޖެ“ އަނެއްކާ ވެސް ލޮލުގައި ގިނަވަމުން ދިޔަ ކަރުނު ތައް އެގޮތުގައި ވާން ދޫކޮށްލާފައި ޒައްޔާންއާއި އަލާނިއަލްގެ މޫނަށް ނަޒަރެއް ދިނެވެ. ދެމީހުން ވެސް އުނދަގޫ ވެފައި ތިބެ ބޯޖަހައިލިއެވެ.

ރާބިއު ނުކުމެގެން ދަންދެން ދޮރުގެ ކައިރީގައި ރޮވިފައި ރުއާނާ ހުއްޓެވެ. ރާބިއު ނުބުނަން އުޅުނު ނަމަވެސް އެދަނީ  ބޮޑުކަމަކާއިކަން ހިތް ބުނަނީއެވެ. ހޫރައިން ފަދައިން ރާބިއު ގެއްލޭކަށް އޭނާ ނޭނދެއެވެ. އެކަމަކު ރާބިއުގެ ބަހަށް އިތުބާރުކޮށްފައި ރުއާނާ ހަމަޖެހެން މަސައްކަތް ކުރިއެވެ.

”ރުއާ .. މާދަމާ އާލިއާ ބައްދަލުކުރުވާ ދޭނަން އިނގޭ.. މިގެއާއި ވަރަށް ކައިރީގަ އުޅެނީ.. އެކަމަކު މިހާރު މާ ލަސް ވެއްޖެ .. ”ރުއާނާގެ ސާމާނުތައް ހިފައިގެން ޒައްޔާން އައި އަޑަށް ދެލޯ ފުހެލިއެވެ. އޭރު ކޮންމެވެސް މީހަކަށް ގުޅައިގެން ހުރެ  އަލާނިއަލް ވެސް ފަހަތުން އާދެއެވެ.

”ރުއާ.. ކަމެއް ބޭނުން ވެއްޖެނަމަ ނުބުނެ ނުހުންނައްޗޭ.. އަސްލު ބޭބެގެ ގާތައް ގެންދަން ބޭނުންވަނީ..އެކަމަކު ރުއާގެ ސިޓުއޭޝާނަށް ބަލާފަ އައި ތިންކް ލިއަމްއިޒް މަޗް ބެޓާރ ދޭން އަސް.. “ އަލާނިއަލް ގާތައް ހުއްޓިފައި ފެށި ޥާހަކައަކުން ރުއާނާ ދެލޯ ބޮޑުވާ ގޮތްވިއެވެ. އަލާނިއަލް އެބުނަނީ އޭނާ ގެންދަން އެއުޅެނީ ލިއަމްގެ ގެއަށްށޭ ބާއޭވެ.

”ލިއަމް؟ ޑޮކްޓާރ ލިއަމް؟“ އަނގަމަތިގައި އަތް އެޅުނު އިރު ރުއާނާއަކަށް ވާހަކަ ވެސް ދެއްކޭ ގޮތެއް ނުވިއެވެ. އެހާ ސީރިއަސްވެފައި ހުއްޓާވެސް ރުއާނާއަށް ވެގެން ދިޔަ ގޮތުން އަލާނިއަލްއާއި ޒައްޔާނު ތިބީ ހިނިއައިސްފައެވެ. އަލާނިއަލް ބޯޖަހައިލިއެވެ.

”ވަޓް.. ނޫން ނޫން އައި ސްޓޭ ކުއްޔަށް ދޫކުރާ ރޫމްއެއްގަ ވެސް.. “

”ނޯވޭ!“ އަލާނިއަލްއާއި ޒައްޔާން އެކުއެކީގައި ރުއާނާއަށް މަނާކުރިއެވެ.

”ޔޫ ކާންޓް  ރުއާ.. ލުކް ބޭބެގެ ގާތް އެކުވެރިއެއް އެއީ.. ޑިފީބޭބެ ބުނާހެން އެންމެ ރަނގަޅުވާނީ ލިއަމްގެ ގާތުގަ މަޑުކޮށްލަން“

”ބަޓް ވައި ލިއަމް؟“ ރުއާނާއެހުނެވެ. އަލާނިއަލް ތުންފަތުގައި ދައިގަނެފައި ވެސް ބެލީ އަދި ރުއާނާއަށް ލިއަމްގެ ވާހަކަ ސިއްރުކުރުމަށެވެ.

”ބިކޯޒް.. ލިއަމް އަކީ ރަނގަޅު ޒުވާނެއް .. ބޭބެ މެން ވާގޮތަކީ ގިނަ ވަގުތު އުޅެން ޖެހެނީ ހޮސްޕިޓަލާއި އެތަން މިތަނުގަ… އެކަމަކު ކްލާހުގަ ވެސް ޑީއުޓީގަ ވެސް ރުއާ ބޮޑަށް އުޅެނީ ލިއަމްއާއި އެކު .. އެގޭގަ ބައިވަރު ސްޕޭސް ވެސް އޮންނާނެ“ ޒައްޔާނު އެންމެ ފަހުން ވާހަކަ އެއް ހަދާލިއެވެ. ލިއަމް ނުބުނަނީސް ހަގީގަތް ހާމަކުރާކަށް އަދި ބޭނުމެއް ނޫނެވެ. ނަމަވެސް ރުއާނާ ވިސްނާލައިފިއްޔާ ކޮންމެ ވެސް ވަރަކަށް ހަގީގަތް އޮތީ ދިމާލަށް ފެންނާށެވެ.

”އިޒް ހީ ވަންއޮފް އަސް؟“ ކުއްލިއަކަށް ރުއާނާގެ ހިތައް އެރިއެވެ. ނަމަވެސް ދެފަރާތައް ބޯހޫރުވާލެވުނެވެ. އަލާނިއަލް އެ ނަސްލުކަމުގައި ވީ ނަމަވެސް ލިއަމް ފަހަރުގައި އަދި  ނުވެދާނެތާއެވެ. އެގޮތައް ވިސްނާކަށް ރުއާނާ ބޭނުމެއް ވެސް ނޫނެވެ.

އެހެން ތިބޭކަށް މާގިނަ އިރަކު ނުޖެހުނެވެ. ކާރުގައި އައިސް މަޑުކޮށްލީ ލިއަމްއެވެ.

”އެގެއިން ދެމް؟“ ކާރާއި ދިމާލަށް ދާން އުޅެނިކޮން އަނެއްކާ ވެސް ރުއާނާއަށް ސިހުމެއް ލިބުނީ ގެއާއި މާދުރުނޫން ހިސާބެއްގައި ހުރި މީހާއަށެވެ. މާސްކް ތިރިކޮށްލާފައި ހުރި އިރު ވިލުނޫކުލައިގެ އެދެލޯ މިފަހަރު ތަންކޮޅެއް ސާފްކޮން ފެނެއެވެ. ނުރައްކާތެރި ނަޒަރެއް ދީގެން ހުރި އިރު ނުދާށޭ ބުނާކަހަލައެވެ.  ޒައްޔާނުގެ އަތައް ބާރުކޮށްލެވުނު އިރު މުޅިކުއްޖާ ހުރީ ފިނިވެފައެވެ.

”ވަޓް ހެޕެންޑް؟“ ރުއާނާއަށް ވެގެން ދިޔަ ގޮތުން ޒައްޔާން. އަހައިލިއެވެ ރުއާނާ ދައްކައިލިއެވެ. އެހިނދު ޒައްޔާނުގެ ދެލޮލުން ހީވީ އަނގުރު އަލިފާން ކޮޅެއް ހެންނެވެ. އަލާނިއަލްއާއި ރުއާނާ ހަވާލް ކޮށްފައި ވައިރޯޅިއެއްހާ ހަލުވިކޮން އެދިމާލަށް ދިޔައެވެ.

”އިޓްސް އޯކޭ.. ޔޫ ވިލް ބީ ފައިން.. އަވަހަށް އަރާ ކާރަށް “ ރުއާނާ ހުރި ހާލުން އަލާނިއަލް އިޝާރާތް ކޮށްލީ ލިއަމްއަށެވެ. އޭރު ލިއަމް ހުރީ ކާރުގެ ދޮރު ހުޅުވާލައިގެންނެވެ. މާ ބޮޑު އެއްޗެއް ނޭނގުނު ނަމަވެސް ރުއާނާއާއި ހަވާލް ވާން އަލާނިއަލް ބުނުމުން ލިއަމް ހުރީ އެކަމަށް ހުސްވެގެންނެވެ. އެތަނުން ޒައްޔާން ފެނުމުން ލިއަމް ހުރީ ވެސް ޝޮކެއް ލިބިފައެވެ. އެކަމަކު ރުއާނާ ހުރިގޮތުން ސުވާލެއް އުފެދުނުނަމަވެސް ކުރެވޭކަށް ނެތެވެ.

”ޒައްޔާން ފަހަތުން އެނގޭ މިދަނީ.. ރަނގަޅަށް ރުއާއަށް ބަލާތި! ދިޒް އިން އޭން އޯޑާރ!“ އަލާނިއަލް ދޮރު ޖަހާފައި ނުކުތީ ލިއަމްއަށް އެއްޗެއް ނުވެސް ބުނެވެނީހެވެ.

***

“މާ ލަސްވީ.. ފިލައިގެން ގޮސްފި.. އެއީ ޔަގީނުން ވެސް ބިލާލް އެއް ނޫން.. އެކަމަކު  އޭނާގެ ވާގިވެރިވާ މީހެއް.. “ އަލާނިއަލްއަށް ދެވުނު އިރު ޒައްޔާން ހުރީ ވަލުތެރެއިން ނުކުމެފައެވެ.

”ވަރަށް އެހެންކަހަލަ އިޙްސާސްއެއް ކުރެވެނީ މިހާރު.. ދައްތަ ވެސް ރުއާ ސަލާމަތް ކުރަން ދިޔައީ ބިލާލް އައިސް އެގޮތައް އަންނަން ބުނެގެން.. އެކަމަކު ހައްޔަރު ވީ.. ބޭބެގެ ގާތައް ވެސް ބިލާލް އައިސް ބުނީ ދައްތަމެންގެ ވާހަކަ..އެހެންވެ ބޭބޭ އެދިޔައީ.. މިފަހަރު ބޭބޭ ހައްޔަރު ނުވެއްޖެޔާ ކިތަންމެ ހާ ވެސް ރަނގަޅު“ ޒައްޔާންގެ މޫނުގައި ވަނީ މާޔޫސްކަމެވެ. އަލާނިޔަލްގެ މޫނުމަތިންވެސް ފެނުނީ އެފަދަ އަސަރެކެވެ.

”އާންން..ހައްޔަރު ވެދާނެތީ އެބިރު އިނީ.. ވީކްއެއް ވުމުގެ ކުރިން ނައިސްފިއްޔާ އަހަރެން ދެން ކުރިމަތި ލާނީ އެމީހުންނާ.. އޭގެ ކުރިން ރުއާއަށް ޕަވާރސް ތައް ދަސްކޮށްދޭންވީ.. ހިތައް އަރަނީ އެ ދުވަހު ޖެހި އިންޖެކްޝަންގެ ސަބަބުން ބައޭ އެދުވަހުގެ ހަނދާން ރުއާގެ ސިކުނޑީން ފިލާ ދިޔައީ؟ އެކަމާއި ބާރުތައް ކޮންޓްރޯލްކުރަން ބުނުމާއި ގުޅުމެއް ވޭބާއޭ؟ “ އަލާނިއަލް ބުންޏެވެ.

“ ތިހެން އަހަރެން ވެސް ބުނިން ބޭބެގެ ކައިރީގަ.. އެކަމަކު އެމީހުންނާއި ދެކޮޅަށް ކަމެއް ކޮށްފިއްޔާ ރުއާ ގެންގޮސްފާނެތީ އެކަމުގެ ބިރު ހިތުގައި އޮތީމަ ބޭބެ އެ ވިސްނުން ނުގެން ގުޅެނީ.. އެތައް ހާސް ބަޔަކު އެމީހުންގެ ލަޝްކަރުގަ ވޭ..އަހަރުމެންގެ ފަޅިން، އަހަންނާއި ބޭބެ އާއި އާއިލާގެ މީހުން ތިބީ އެމީހުންނާއި ކުރިމަތީލާން.. ކުރި ލިބުން އެއީ ވާނެކަމެއް ހެން ހީނުވާތީ“

”ނޫނޭ.. އަހަރެމެން ވެސް މިތިބީ އެންނު.. ރާބިއު މިހާ ގާތް އިރު ވެސް އެ ވާހަކަ ތައް ކުރިން ހިއްސާ ނުކުރީމަ އެހީއެއް ވެސް ނުވެވުނީ.. އެކަމަކު ދެނެއް އެހެނެއް ނުވާނެ…“ މާދާމާ ދިމާވާން ލިއަމްގެ ގެއިން ދިމާވާން ނިންމާފައި ދެމީހުން ވަކިވީ އަލާނިއަލް ހޮސްޕިޓަލަށް ދިޔުމަށް ބޭނުން ވާތީ، އެވާހަކަ ބުނުމުންނެވެ. ޒައްޔާން ދިޔައީ ރާބިއުގެ ހަބަރެއް ބަލާށެވެ. ރާބިއު ނުދާން ބުނި ނަމަވެސް މިފަހަރު އޭނާ ހުރީ ދިޔުމުގެ އަޒުމުގައެވެ.

***

ގެއާއި ހިސާބަށް ފޯރެންދެން އިރުކޮޅަކާއި ހެން ސިހިފައި ރުއާނާ ބިއްލޫރިގަނޑުން ބޭރު ބަލަމުން ދާ ގޮތުން ލިއަމްއަށް ވެސް ބަލައިލެވެއެވެ. ދެމީހުންކުރެން އެކަކުވެސް އަނގަޔަކުން ނުބުނެއެވެ. ރުއާނާއަށް ވެފައި ހުރި ގޮތުން އެއްޗެއް ބުނަން ވެސް ލިއަމްއަށް ނުކެރުނީއެވެ.

”އާދޭ ފައިބަން“ ގަރާޖުގެ ތެރެއަށް ކާރު ލުމަށްފަހު، ލިއަމް ކާރުން ނުކުމެ އައި ދޮރު ހުޅުވާލިއެވެ. ރުއާނާގެ ސާމާނުތައް ވެސް ނަގާލަ ދިނެވެ.

”އިޒް ދެޓް މައިން؟“ އަމިއްލަ ކާރުކަން އެނގުނު ނަމަވެސް، ގަރާޖު ތެރޭގައި ދެން ޖެހިގެން އޮތްކާރު ދައްކާލަމުން ރުއާނާ އަހާލިއެވެ. ލިއަމް ހިނިތުން ވެލަމުން ބޯޖަހައިލިއެވެ. ލިއަމް ދިއްކޮށްލީ އޭގެ ރިމޯޓެވެ. އެދުވަހު އަވަހަށް ދާންވެގެން ރުއާނާ ދިޔައީއެވެސް ބާއްވާފައެވެ. ބޭރުގައި އޮތް ކާރު އެތަނަށް ގެނައީ ކިހިނެތްހޭ އަހަންވެގެން ހުޅުވާލި އަނގަ ލެއްޕުނެވެ.

”ވަޓް؟ އާރންޓް ޔޫ ގޮނާ ސޭ ސަމްތިންގް؟“ އެހާ ކުޑަކަމެއް ލިއަމްއަށް ފާހަގަ ވުމުން ރުއާނާ ފާޑަކަށް ރަކިވިއެވެ. ހިނިތުންވެލަމުން ރުއާނާ ދެފަޜާތައް ބޯހޫރުވާލިއެވެ.

ލިއަމްގެ ފަހަތުން އެތެރެއަށް ވަންނަމުން ދިޔައިރު ރުއާނާ ފޯނު ނަގާފައި ބެލީ ޒައްޔާންއަށް ގުޅާލެވޭތޯއެވެ. ރާބިއުއާއި ބެހޭ ކުޑަ ނަމަވެސް މައުލޫމާތެއް އެނގޭނެ ފަރާތަކީ އެއީއެވެ. ރާބިއުގެ ފޯނާއި ނުގުޅޭނެކަން ޔަގީންވާތީ އެކަމަކަށް ރުއާނާ މަސައްކަތެއް ވެސް ނުކުރެއެވެ. ޒައްޔާން ވެސް ފޯނު ނުނެގުމުން މާޔޫސްވެފައި ހުރެ ދަބަހުގެ ތެރެއަށް ކޮއްޕާލިއެވެ.

ލިއަމް ސިޑީން މައްޗަށް އެރިއެވެ. ގޭގެ ކޮޓަރިތައް ގިނަވެފައި ބޭނުން ނުކުރި ނަމަވެސް ލިއަމް އަބަދުވެސް ބަހައްޓަނީ ސާފްކޮށްފައެވެ. އެކަމުގެ ހެއްކަކަށް ގޭގެ ކޮންމެ ކޮންމެ ކަނެއް ހެކިދެއެވެ. ސާފްތާހިރްކަމުން ދަޅައަޅައެވެ.

ރީތި ހިނިތުންވުމެއް ވެރިކޮށްލަމުން ލިއަމް، އޭނާގެ ކޮޓަރީގެ ކުރިމައްޗަށް އިން ކޮޓަރީގެ ދޮރު ހުޅުވާލުމަށްފަހު އެތެރެއަށް ވަނުމަށް ރުއާނާގާތު އެދުނެވެ. ގޭގެ ލިވިނގ ރޫމުގައި ހުރި އަނދިރި އައްޔަށް ވުރެން އެތާގައިވާ ލައިޓްގެ އަލި ގަދައެވެ. އެޅި ފުރަތަމަ ފިޔަވަޅާއި އެކު ވެސް ރުއާނާ އާޝޯޙްވިއެވެ. އޭނާގެ އަމިއްލަ ކޮޓަރިއަށް ވުރެން ދެގުނަ ބޮޑެވެ. ލަކުނޑިކުލައިގެ ފަރުނީޗަރާއި ސާމާނުން ޒީނަތްތެރި ކޮށްފާވާއިރު ރުއާނާއަށް ނުހަނު ކަމުދިޔައެވެ. އެންމެ ލޮލުގައި އަޅައިގަތީ ބޭރުގައި ބަހައްޓާފައި ހުރި ކަހަލަ ބިޔަ އުއްބައްތި ސްޓޭންޑެއް އެތަނުގައިވެސް ހުއްޓާފެނުމުން ނެވެ. އޭގެ ކޮންމެ ޖާގައަކަށް އެކި ވަރުގެ އުއްބައްތި ލާފައި ހުރި، ދިއްލުމުން ރީތިވާނެ ވަރު އެނގުނެވެ. އެހެން ވިޔަސް އެރީތި ކޮޓަރީގައިވެސް އޭނާއަކަށް އެކަނި މިރޭ ނިދާކަށް ނުކެރޭނެއެވެ.

”ތޭންކިއު ސޯ މަޗް ފޯރ ދިސް.. މްމްމް އިޒީ ނޫޅޭތަ؟ މްމްމް.. އެކަނި ނިދާކަށް މިރޭ ނުކެރޭނެ.. ބަޓް އިޒީ ހުރިއްޔާ އައި ކެން“ ނުކެރި ހުރެފައި ރުއާނާ އެއްސެވެ.  ލިއަމް ބަލަހައްޓައިގެން ހުރެފައި ހީލިއެވެ.

”މިގޭގަ އުޅެނީ އަހަރެން އެކަނި.. އިޒީ އުޅެނީ މާމަ ކައިރީގަ.. މްމްމް ..ވެއިޓް..އެބަ އަންނަން“ ލިއަމް މަޑުނުކޮށް  ނުކުތެވެ.

ރުއާނާ އަށް އެނދުމައްޗަށް ވެއްޓިގަނެވުނެވެ. ރާބިއުގެ މަތިން ހަނދާންވެ އަނެއްކާ ރޮވުނެވެ. ނަމަވެސް ކެތް ކުރުން ނޫންގޮތެއް ވެސް ނެތެވެ. ރާބިއުއަށް ދެރަގޮތެއް ވެދާނެތީ އެކަމާއި ވެސް ވިސްނެނީއެވެ.  ދޮރުގައި ޓަކި ޖަހާލި އަޑަށް ދެލޯ ފުހެލަމުން ތެދުވިއެވެ.

ދޮރު ހުޅުވާލި ހިނދު ލިއަމް ހުރިތަން ފެނި ރުއާނާއަށް ބުމަ ހިއްލާލެވުނެވެ. ކުރިން ލާފައި ހުރި ކަޅުކުލައިގެ ޓީޝާޓުގެ ބަދަލްގައި މިހާރު ހުރީ ޗޮކްލެޓް ކުލައިގެ އަތްދިގު ޓީޝާޓެއް ލައިގެންނެވެ. ލޮލުގެ އިޝާރާތުން ލިއަމް ދައްކައިލީ އެނދާއި މާ ދުރުނޫން ހިސާބެއްގައި ހުރި ސޯފާއެވެ.

“ އައިލް ސްލީޕް ދެއާރ“

ރުއާނާއަށް ޖަވާބެއް ނުދެވިގެން އުޅެނިކޮން ދޮރާއި އޭނާއާއި ދޭތެރެއިން ލިއަމް އެތެރެއަށް ދެމިގަތެވެ. ދެލޯ ބޮޑުވެފައި ބަލަހައްޓައިގެން ހުރެވުނީއެވެ. ރުއާނާ ހުރިގޮތައް ހުރުމުން، ސޯފާގައި އިށީންދެލަމުން ލިއަމް ބުމަ އަރުވާލިއެވެ. ރުއާނާ ވަކި އެއްޗެއް ނުބުމުން ސޯފާގައި އޮށޯވެލިއެވެ.

”ގުޑް  ނައިޓް“ އެ އޮތްގޮތައް ފޯނަށް ނަޒަރު ދީގެން އޮވެފައި ލިއަމް ބުންޏެވެ. ލަދުގަންނަ ގޮތްވެފައި ހުރި ނަމަވެސް އޭނާއަށް ރޭގަނޑުގެ ސަލާމް ކިޔުމަށްފަހު ރުއާނާ އޮށޯވެލީ އެނދުގައެވެ.

***

ވަލުތެރޭގައި ހިނގަމުން ދިޔައިރު ރާބިއު ދުވެލި އަވަހެވެ. އާދައިގެ އިންސާނަކަށް ފާހަގަ ވާނީ ވައިރޯޅިއެއްގެ ފަދައިންނެވެ. ފެހިކަން ގަދަ ޖަންގަލީގެ ތެރޭގައި ކޮޅު ނުފެންނަހާ ބިޔަ ދިގު ގަސްތަކުތެރޭގައެވެ. ތެތްފިނި މާހައުލުން ގަޔަށް ހީގަނޑު ތައް އަރައިގެން ދާހާ ފިންޏެވެ. ނަމަވެސް އެއިން އުނދަގުލެއް ރާބިއުއަށް ނުކުރާ ކަހަކައެވެ. އެތައް ހިސާބަކަށް ދުވުމަށްފަހު ރާބިއު މަޑުކޮށްލީ ޖަންގަލީގެ ކޮޅުން ނުކުމެވެން ހުރި ބިޔަ ފަރުބަދަ އެއް އައްސޭރި ފަށުގައެވެ. ދާދި މަދު ސިކުންތު ކޮޅެއްގެ ތެރޭގައި ރާބިއު ހުރީ އޭގެ ކޮޅަށް އަރައެވެ. އެތަނުގައި ކުރީން ސުރެން އޭނާގެ އިންތިޒާރުގައި ބިލާލް ހުއްޓެވެ.

”އާދެވިއްޖެ ދޯ؟ ކޮންތާކަށް ރުއާނާ ލާފަ ތިފޮރުވީ؟ ހަހަހަ“ ނުބައި ޒާތަކަށް ހިނިގަނޑެއް ޖަހާލި އިރު އޭނާގެ މާސްކް ތިރިކޮށްލިއެވެ. އޭނާގެ މޫނު އެހާ ގާތުން ފެނުނު އިރު ވަނީ ނުރައްކާތެރިކަމެވެ.

”ކޮބާ ހޫރައިން؟ “ ބިލާލްގެ ސުވާލްތަކަށް ޖަވާބެއް ދޭން ރާބިއު ހިތުގައި ވެސް ނެތްފަދައެވެ. އޭނާ ބެލީ ހޫރައިންގެ ހަބަރެއް ވޭތޯއެވެ.

”ކަލެއަށް ޖެހޭތަ އެ އާއިލާއާއި ރުއާނާ ހަވާލުކުރަން؟“  ސާމާސާގެ ކުލަވަރު ކަނޑާލަމުން ބިލާލް އެއްސެވެ.

”މަގޭ ދަރި ހަވާލް ކުރާނެ މީހަކު އެނގޭނީ މަށައް! “ ރާބިއުގެ ޖަވާބު ސާފެވެ. ބިލާލްގެ މޫނުމަތި ބަނަވެގަތެވެ.

“ އެއީ ކަލޭގެ ދަރިއެއް ނޫންކަން ކަލެއަށް ވުރެން ބޮޑަށް އެނގޭނެ އިތުރު  މީހަކު މި ދުނިޔެ މައްޗަކު  ނެތް.. ރުއާނާ އަކީ އަހަރެމެންގެ ލޭ.. އަހަރެމެންގެ ލޭ އެއާއިލާގެ އަތް ދަށައް ގެންދިޔުމަކީ، ކަލެއަށް ކުރެވުނު ވަރަށް ބޮޑު މޮޔަކަމެއް..“

”އިޒާންގެ އާއިލާއަކީ އަހަރެމެން ދުޝްމަނުން.. އަހަރެމެންގެ ދުޝްމަނުންނަށް ވާގިވެރިވާ ކޮންމެ ބަޔަކީ ވެސް ދުޝްމަނެއް“ ބިލާލްގެ ލޮލުގައިވީ ނޫކުލަ ގަދަވެގެން ގޮސް، ވިދައިގަތެވެ.

”އިޒާން؟ ޑޮކްޓާރ އިޒާން؟ އަލާނިޔަލްގެ ބޭބެ ތަ؟“ ރާބިއު ހައިރާން ވިއެވެ. ބިލާލް ވަކި އެއްޗެއް ނުބުނިކަމުގައި ވީ ނަމަވެސް ހަމަހިމޭން ކަމުން ރާބިއުއަށް ޖަވާބު ލިބުނު ފަދައެވެ.

ރާބިއުއަށް ވަރުގަދަ ސިހުމެއް ލިބުނު އިރު، އެއްޗެއް ނުބުނެވެނީސް އޭނާ ވަށައިލީ ބިލާލްގެ ފައުޖެވެ. އެއްވެސް ކޮޅަކުން ސަލާމަތެއް ނެތެވެ.  ޖަނގަލީގެ ހޭރިފަށުގައި ޒައްޔާން ހުއްޓާ ލޮލުގައި އަޅައިގަތެވެ. ރާބިއުގެ ސަލާމަތައް ޒައްޔާން އަންނަން ހިނގައިގަތްތަން ފެނި ދެފަރާތައް ބޫހޫރުވާލެވުނެވެ. އޭނާ އައިސްފިނަމަ ހައްޔަރު ވެދާނެއެވެ. އޭރުން ރުއާނާގެ ސަލާމަތައް ބުރޫއަރާ ފާނެއެވެ.

“ އެކަނި އަންނަން ބުނީމަ އޭނަ ވެސް ގޮވައިގެން ތިއައީ؟ ފުރަތަމަ ވެސް އޮޅުވާލީނު.. “ ބިލާލްގެ ނުރުހުން ދެގުނަވިއެވެ. އޭނާގެ މީހުންނަށް ރާބިއު އެތަނުން، ވީހާ ވެސް އަވަހަކަށް  ގެންދިޔުމަށް އިޝާރާތް ކޮށްލިއެވެ. އެހިނދު ވައިރޯޅިތައް ބާރުވާން ފަށައިފިއެވެ. މުޅިތަން ހިރަފުސްވެގެން ދިޔަގޮތުން މާހައުލުން އެކައްޗެއް ވެސް ވަކި ނުވެއެވެ.

”ބޭބޭ..ބޭބޭ“ ބާރު އަޑަކުން ޒައްޔާންއަށް ހަޅޭއްލަވައި ގަނެވުނެވެ. ވައިރޯޅިތައް މަޑުވެ ފުސްކަން ފިލައި މާހައުލު ސާފްވީ އިރު އެތަނުގައި އެމީހުންގެ ހިލަމެއް ނުވެއެވެ. ޒައްޔާންގެ އަށް ދެފަރާތައް ބޯހޫރުވަލެވުނެވެ. ދެން ހަނދާނެ ގޮތެއް ނޭނގުނެވެ. ދުވަހަކު ވެސް އެހާ ބޮޑަށް މާޔޫސްނުވެއެވެ.

****

(ނުނިމޭ)