މި ޖިސްމުގާ ވަނީ 20

”އޯކޭ“ މާއިން ބޯޖަހާލާފައި، ފޯނު ހުޅުވާލި ހިނދު ލިބިގެންދިޔައީ ސިހުމެވެ.  ފޯނުގެ ވޯލްޕޭޕާރ ގައި އިނީ އަންހެންކުއްޖާގެ ފޮޓޯ ފެނި ޒާތަކަށް ހިތް ތެޅިގަތެވެ. ދެލޯ ބޮޑުވެފައިވީ އިރު ނުބައި ގޮތެއް ވެގެންދިޔައެވެ. އިތުރަށް ޔަގީން ކުރަން ގެލެރީއަށް ވަނެވެ. ފެނުނީ އިރަމްގެ ފޮޓޯ ތަކެވެ.

”ދޮންބެ ދައްތަގެ ކޮއްކޮ…އިޔާންގެ ކޮއްކޮ.. އިރަމް“މާއިންއަށް ދެލޯ މަރާލެވުނީ ހާސްވި ވަރުންނެވެ. ނާޔާއާއި އިޔާންގެ ކޮއްކޮއަށް ވެސް މިދުވަސްކޮޅު ކަމެއް ވެގެން އުޅޭ ހަބަރު ލިބިފައި އޮތަސް އެއީ މިކަންތައް ކަމެއް އޭނާއަކަށް ނޭނގެއެވެ.

***

”މޭން؟ވަޓްސް ރޯންގް؟ ހާދަ ފާޑަކަށޭ ތިހުންނަނީ… ބިރުވެރި އެއްޗެއް ފެނުނީތަ؟..“ މާއިންގެ މިޒާޖު ކުއްލިގޮތަކަށް ބަދަލްވެގެން ވަރު ފެނި ހާނިމްއަށް އެހުނެވެ. ފޯނާއި ދިމާ ބަލަހައްޓައިގެން އޭނާ ސިހިފައި އިން ގޮތުން ހާނިމް ވެސް ގާތް ވެލީ އެ ފެންނަ އެއްޗެއް ބަލައިލުމަށެވެ.

”ކައެ މި ބަލާނެ ކަމެއް ނެތް!“ ހާނިމް ފޯނާއި ގާތައް އައުމުން ތެޅިގަނެފައި މާއިން ދުރަށް ޖެހުނެވެ. އެއިން އެންމެ ފޮޓޯއެއް ވެސް ހާނިމްއަށް ދައްކާކަށް އޭނާ ބޭނުމެއް ނޫނެވެ. ހާނިމް ގޮވަ ގޮވާ ހުއްޓާ މާއިން އެތަނުން ނުކުމެގެން ދިޔައެވެ. ނޭނގިހުއްޓާ މިވަދެވުނު ކަންތަކާއި ހުރެ މުޅި މީހާއަށް ވެފައި ވަނީ ނުބައި ގޮތެކެވެ.

އޭނާ ނުކުމަތް އިރު އިންތިޒާރުގައި ޑްރައިވަރު ކާރުގެ ކައިރީގައި މަޑުކޮށްލައިގެން ހުއްޓެވެ. ރަލުގެ މަސްތުކަން އަދިވެސް ހިސާބަކަށް ހުރުމާއި އެކު ބިމުގައި އެއް ހަމައަކަށް ފިޔަވަޅު ނޭޅެއެވެ.

”ކޯއްޗެއް ތިބަލަނީ!..ގެއަށް ހިނގާ!…“އޭނާ ފެނުމުން ޑްރައިވަރު ބަލައިލުމުން މާއިން ރުޅިވެރި އަޑަކުން އަމުރުކޮށްލިއެވެ. ކިރެމުން ކިރެމުން ކަހަލަ ގޮތަކަށް ގޮސް ކާރަށް އެރިއެވެ.

ދެފަރާތައް ބޯހޫރުވާލަމުން، ޑްރައިވަރު ވެސް ވަކި އެއްޗެއް ނުބުނެ ބެލީ މާއިން ގޮވައިގެން އަވަހަށް ގެއަށް ދެވޭތޯ އެވެ. ހައިކަލްގެ އާއިލާއަށް ނޭނގި މާއިންގެ މި އަންދިރި ފަރާތް ދެމި އޮންނާނީ ކިހާ ދުވަހަކަށް ބާއޭ އޭނާ އަބަދުވެސް ހިތައް އަރައެވެ. ދަރިފުޅާއި ގުޅުވައިގެން ބިރު ނުދެއްކިނަމަ އޭނާ މިހާރު ހައިކަލްއަށް އެހަބަރު ދިން ތާ ކިތަންމެ ދުވަހެކެވެ.

***

”އެމީ.. އާރ ޔޫ ސީރިއަސް؟ ހައު ކުޑް ޔޫ!“ އިޔާންއަށް ދެލޯ ބޮޑުކޮށްލައިގެން ހުރެވުނީއެވެ. މަގުމަތީގައި އުޅެން ބިރުގަންނަ ކުއްޖަކު އެފަދަ ހިތްވަރެއް ކުރަން ކެރުމުން ހައިރާންވިއެވެ. ނަމަވެސް އަމީރާއަށް ގޮތެއް ވެދާނެ ކަމުގެ ބިރު ހިތުގައި އޮތުމުން އެ ކާރުގެ ފަހަތުން އިޔާން ވެސް މިސްރާބު ޖެހިއެވެ.

ނަސީބަކުން ކާރު ގޮސް މަޑުކޮށްލީ އެގޭގެ ކުރިމައްޗަށެވެ. އަމީރާ ކާރުން ފައިބައިގެން ގޮސް ގެޔަށް ވަންނަންދެން އިޔާން ބަލަހައްޓައިގެން ހުއްޓެވެ.

”ޑޭމްއިޓް“އަމިއްލަ ކާރުގެ ބޮނެޓް މައްޗަށް ދޫކޮށްލެވުނު ގޮށްމުށުގެ ހަމަލާއާއި އެކު އިޔާންގެ ދެލޮލަށް ޖަމާވެގެން ދިޔަ ކަރުނައިގެ ސައިލާބު އޮހިގަތެވެ. ފަހަރަކަށް ވުރެން ފަހަރަށް ކެރި ބޯކުރަމުން ދިޔައިރު ތެމި ފޯވަމުން ދިޔައެވެ. ވާރޭގެ ތިކިތަކާއި ކަރުނައިގެ ތިކިތައް އެކުވެގެން ފައިބަމުން ދިޔައިރު އެދެލޮލުގައިވީ ރަތްކަން ދެގުނަ ވެފައިވާކަހަލައެވެ. އަމީރާގެ ކަރުނުން ބަރާ ވެފައިވީ ދެލޯ ސިފަވެގެން ދާ ކޮންމެ ސިކުންތަކު، އިޔާންގެ ހިތައް ކެތްކުރަން އުނދަގޫ މިންވަރަކަށް ދިޔައީ ވޭން އަޅަމުންނެވެ.

”އައި މޭޑް ހާރ ކްރައި އެގެއިން.. އައި މޭޑް“ އިޔާންއަށް ދެލޯ މަރާލެވުނެވެ. އެތައް އިރަކު އެހެން ހުރެހުރެފައި އޭނާ އެތެރެއަށް ވަނެވެ.

ފަތިސްވެގެން އައި އިރު ސައިޑް ޓޭބަލް މަތީގައި ހުރި ގަޑީ ސޯނާވި އަޑަށް އަމީރާއަށް ހޭލެވުނެވެ. ނުނިދިގެން ދެފަރާތައް އެނބުރި އެނބުރި އޮވެފައި އޭނާއަށް ރޭ ނިދުނު އިރެއް ވެސް ނޭނގެއެވެ. ހޭލެވުނު އިރު ވެސް ބޮލުގައި ހިސާބެއްގެ ރިހުމެއް ހުއްޓެވެ. އެއްއަތުން ނިތްކުރީގައި އަތް ހާކާލަމުން، ހެޑްބޯޑުގައި ލައްވެލިއެވެ. އޭރު އިރަމް ފާހާނާގައި އުޅޭ އަޑު އިވެއެވެ. ބާލީސްދޮށަށް އަތްކޮއްޕާލަމުން ފޯނު ހޯދާލާފައި ނެގިއެވެ.

ލުއިސްއާއި މާރިއާގެ މެސެޖް އެއް އައިސް އިންތަން ފެނުމުން އަމީރާގެ ތުންފަތައް ވެރިވީ ރީތި ހިނިތުންވުމެކެވެ. ދެމީހުންގެ ފޮޓޯއަކާއި އެކު އަމީރާ އުޅުނު ކޮޓަރީގެ ފޮޓޯއެއް ފޮނުވާފައި ހަނދާންވާ ވާހަކަ ބުނެފައި އިނުމުން އަމީރާގެ ހިނިތުންވުމުގައި އިންދާ ވެސް ފެންކަޅިވިއެވެ.

”ވަރަށް އަވަހަށް އަދި ދިމާވާނެ އިރާދުކުރެއްވިއްޔާ“ އެ މެސެޖަށް ޖަވާބު ފޮނުވާލަމުން އިރުކޮޅަކު އޭނާ ދިރިއުޅުނު ކޮޓަރީގެ ފޮޓޯއަށް އަމީރާއަށް ބަލަހައްޓައިގެން އިނދެވުނެވވެ. އެ ހަތަރު ފާރުގެ އެތެރޭގައި ހާދަ ގިނަ ހަނދާންތަކެއް ފޮރުވިފައިވެއެވެ. އިޔާންއާއި އެކުމެއެވެ. އެ ހަނދާންތަކުން ހިތައް ކުރި އަސަރުން ރޮވޭގޮތްވިއެވެ. ފޯނު ބާއްވަމުން ދެލޯ ފުހެލީ އިރަމް ނުކުތުމުގެ ކުރިން ހަމަޖެހިލުމަށެވެ. އެހެންނޫނީ އޭނާގެ ސުވާލްތައް ނުހުއްޓޭނެއެވެ.

”އެމީ ހޭލެވުނީތަ.. ވުޟޫކޮށްލައިގެން ނުކުމެ ގޮވަންވެގެން މި މަޑުކޮށްލަނީ“ އިރަމް ތުވާއްޔަކުން މޫނުފުހެލަމުން އައިސް ކުރިން ސުރެން ފަތުރާލާފައި އޮތް މުސައްލަ މަތީގައި ހުއްޓިލިއެވެ.

”އެ އޯކޭ ވާނެ.. ކޮބާ މިރޭ ބޭރަށް ދާ ރެއެއްނު.. ކިހިނެތް ވަނީ އިހްސާސްތައް ؟“ އަމިއްލަ ހާލަތު ފޮރުވާލަމުން އަމީރާ ބެލީ އިރަމްއާއި ދިމާކޮށްލެވޭތޯއެވެ. އިރަމްގެ ހޭންފެށިއިރު ހިސާބަކަށް ރަތްކަން އެމޫނުގައި ވެއެވެ.

”ދެން އެމީ ވެސް ދޯ… އަހަރެމެން އަދި އަލަށް މި ވާހަކަ ދެއްކީ ވެސް.. މީ ހަމަ އޭނާ ކޮށްދިން ކަންތަކަށް ޝުކުރުއަދާ ކޮށްލުމަށް ދާ ދިއުމެއް..ބަޓް އައި ވޮންޑާރ ދޮންބެއަށް އެނގިއްޖެޔާ ކިހިނެތްބާއޭ ރިއެކްޓްކުރާނީ.. “

”އެއީ ކީއްވެ އޭނާ ހިތްހަމަ ނުޖެހެންވީ؟ ސަދަފް ކޮށްދިނީ ކިހާ ބޮޑު ހެޔޮކަމެއް ..އޭނާ ނުދިޔަ ނަމަ އިރޫ އަހަރެމެންނަށް ގެއްލުނީސް“ އިރަމްގެ ކަންބޮޑުވުމުން ފެނި އަމީރާއަށް ބުނެވުނެވެ.

“ ދަރިފުޅުމެންނޭ ހޭލައިފިންތަ؟“ އިވުނީ މަޖުދާގެ އަޑެވެ. އިރަމް ގޮސް ދޮރު ހުޅުވާލަ ދިނެވެ. ދެމީހުން ހޭލާ ތިބިތަން ފެނުމުން މަޖުދާ ހީލިއެވެ. މަޖުދާގެ ފަހަތުން ކޮޓަރީގެ ތެރެއަށް ދެމިގަތީ ރީއާއެވެ. އަމީރާ ފެނުމުން އައި ގޮތައް ލޯބި ހިނިގަނޑެއް ޖަހާލަމުން ބައްދާލިއެވެ.

”ގުޑް މޯރނިންގ ބޭބީ“ރީއާ ފެނުމުން ބޮލުގައި ރިއްސަމުންދިޔަކަން ވެސް ހަނދާންނެތުނު ފަދައެވެ. މުޅި ކުއްޖާއަށް ލިބުނީ އާދަޔާއި ހިލާފް ޖޯޝެކެވެ. ”އައި މިސް ޔޫ  ބޭބީ.. އިއްޔެ ނުވެސް ފެނުނޭ ދޯ“ ރީއާ ބޮނޑިކޮށްލައިގެން އިނދެ އަމީޜާ ނުހަނު ލޯބިން ވާހަކަ ދެއްކިއެވެ. ރީއާ ތުން ނެރެލަމުން ކުރިއަށް ވުރެން ބާރަށް އަމީރާގެ ގައިގާ ބައްދާލިއެވެ.

އެ މަންޒަރު ފެނި އިރަމްއާއި މަޖުދާގެ މޫނުމަތިން ފެނިގެންދަނީ ބަޔާންކުރަން ދަތި ހިތްހަމަޖެހުމެކެވެ. އަމީރާ އާއި ރީއާ ، އެކަކު އަނެއްކަކާއި ހެދި އުޅޭގޮތުން ދުރުން އަންނަ މީހަކަށް އެއީ މަންމައާއި ދަރިފުޅު ނޫންކަމެއް ނޭނގޭނެއެވެ. އެހާ ވެސް އެދެމެދުގައިވީ ގުޅުން ވަރުގަދައެވެ.

”މަންމަ ވެސް ނަމާދުކޮށްލައިގެން މިވަނީ.. ދޮންބެ ރޭގަ ހުންގަދަވެގެން ކައިރީގަ ރީއްކޮ ބާއްވަން ވެސް ނުކެރިގެން މަންމަ ކައިރިއަށް ފަހުން ގެނައީ…“ މަޖުދާގެ އަޑަށް އަމީރާ ސިހުނެވެ.

”ދޮންބެ ހުން އައީއޭ؟ އިއްޔެ ހަވީރް ވެސް ރަނގަޅު އެކަމަކު“ އިރަމްވެސް ހައިރާންވެފައި ހުރެ އަހާލިއެވެ.

”ރޭގަ ވާރެއާއި ތެމިގެން ގެއަށް އައީ.. ފިންޏަށް ބަލިވާނެ ވަރަށް.. މަންމައަށް ފެނުނު އިރު  މުޅި ކުއްޖާ ހުރީ ބުރާންތި ވެފަ.. ބޭސް ދީފަ އޮތްތާލީމަ މަންމަ ވެސް ނުކުމެގެން އައީ.. އެމީ އާއި އެކު ކަމަށް ހީކުރީ އައީ “

”މްމްމް އަ..އަހަރެން ގެޔަށް ލާފަ ދިޔައީ ކަންނޭގެ“ މަޖުދާ ބަލަހައްޓައިގެން ހުރުމުން ޖަވާބު ދިނުން ވެސް އަމީރާއަށް ވީ ނުހަނު އުނދަގޫ ކަމަކަށެވެ. އިޔާންގެ ހަބަރު ލިބުމުން ހިތައް ވަރަށް އުނދަގޫވިއެވެ. އޭނާ ތެމުނީ އަމީރާގެ ސަބަބުންކަން އެނގުނެވެ. އެވަގުތު އިޔާންއާއި ވަކިން އާދެވުމުން އަމިއްލަ ނަފްސަށް އަޑުލައިގަނެވުނެވެ.

”އެހެންތަ ..ފަހުން ދާން ޖެހުނީ ކަންނޭގެ .. ދެކުދިން ނަމާދު ކޮށްލައިގެން ކޮފީއެއް ބޯލަން އާދޭ އިނގޭ“

މަޖުދާ ނުކުމެގެން ދިޔުމުން އަމީރާ ފާހާނާއަށް ވަދެ ވުޟޫކޮށްލައިގެން ނަމާދަށް އެރިއެވެ. އޭރު އިރަމް ނިމިގެން ނުކުމެއްޖެއެވެ.

”އާދޭ ބޭބީ ނަމާދުކުރަން…“ އެކޮޓަރީގައި ރީއާ ގެންގުޅޭ ބުރުގާއެއް އޮތްތަން ފެނިގެން އަޅުވާފައި އަމީރާގެ މުސައްލައިން ތަންކޮޅެއްގައި ބެހެއްޓިއެވެ. އަމީރާއާއި އެއްވަރަށް ނަމާދުގެ ހަރަކާތްތައް ކުރަން އެނގުނު ގޮތަކަށް ރީއާ ވެސް ކުރަމުން ދިޔައެވެ. ބައެއް ފަހަރު ރީއާ ކޮށްލާ ހަރަކާތަކުން އަމީރާއަށް ހެވެން ވެސް އުޅެއެވެ. އެއްފަހަރަކު ސަޖިދައަށް ގޮސްފައި މުސައްލަމަތީގައި އޮއްތާލި ގޮތުން ނުހީ ހިފަހައްޓާލެވުނީ ވެސް ކިރިޔާއެވެ.

”ނޯޓީގަނޑު..“ ، ”ހަހަހަހާ“ އަމީރާ ނިމިގެން ރީއާގެ ގައިގާ ހިފައިގަތުމުން ހިނިގަނޑެއް ޖަހާލިއެވެ.

”ވަރަށް މޮޅު ކުއްޖެއް .. މާޝާﷲ.. ކޮންމެ ފަހަރަކު ދައްތިއާއި އެއްކޮން ޕްރޭ ކުރަން ވާނެ އިނގޭ.. “

”ދައްތި… ކޮއްކި ލޫމަށް ޗޭންޖް ވާން ހިނގާލަބާ.. އޭލުން އެއްކޮން އަބަދު އުލޭނީ“ ތުއްތު އަޑުން ބުނެލިގޮތުން އަމީރާއަށް ހީލެވުނެވެ. ރީއާ ނަގާ އުރާލަމުން އަމީރާ ކޮޓަރިން ނުކުތެވެ.

”ހޭލާފަ އަންނާނީ އޭ ކޮންމެ ދުހުކުވެސް ދޯ..ޕްރޭ ކޮށްލައިގެން، ކިޔަވާފަ ދެން ކުޅެލާނީ ދޯ.. ކޯއްޗެއްގަ ބޭބީ ކާލާނީ މިއަދު.. ޓޯސްޓް އޯކޭ ވާ-“ ވާހަކަ ދައްކަމުން ބަދިގެއަށް ވަތް އަމީރާ ހުއްޓުނީ ކާމޭޒް ކައިރީގަ އިން އިޔާން ފެނިފައެވެ. ކަކުލުން ތަންކޮޅެއް މައްޗަށް ހުރި ކަޅުކުލައިގެ ސޯޓުގައި އިން އިރު މަތިން އެއްޗެއް ނުލާ އިނުމުން އެރީތި ހަށިގަނޑު އޮތީ ހާމައަށެވެ. ސީދާ އަމީރާގެ މޫނަށް ބަލަހައްޓައިގެން އިންއިރު ހީވީ އަމީރާ ލަދުގަންނުވާލަން އުޅުނު ހެންނެވެ. އެކަމެއް ފަރުވާލެއް ނުދޭން ރީއާގެ މޫނަށް ބަލައިލި ނަމަވެސް މޫނު ރަތްވަމުންދާ ކަހަލަ އިޙްސާސެއް ކުރެވުނެވެ. މަޖުދާއާއި އިރަމް ވެސް ބަދިގޭގައި އުޅޭތީ އަމީރާ ބެލީ ވީހާވެސް އެމީހުންނަށް ކަމެއް ފާހަގަ ނުވެދާނެ ގޮތަކަށެވެ.

”އެހެމް..މޫމް ޓޯސްޓެއްތަ ބޭނުމީ؟“ އަމީޜާ ކަރުކެހިލަމުން ރީއާ ކުރެން އަނެއްކާ ވެސް އަހާލިއެވެ. ރީއާ ބޯ ޖަހައިލުމުން ގޮނޑިއެއްގައި ބައިންދާފައި އެ މަސައްކަތް ފެށިއެވެ. އޭރު އިރަމް ރޮށިފިހަން އުޅުނު އިރު މަޖުދާ އުޅެމުން ދިޔައީ އިނގުރު ފެނެއް ތައްޔާރުކުރުމުގައެވެ.

”ގުޑް މޯރނިން ގާއީޒް…“ އާ ފުރެމުން ނީޝަން އައިސް އިށީންދެލީ އިޔާންއާއި ޖެހިގެން އިން ގޮނޑީގައެވެ.

”ވީހާ ވެސް ހޫނުކޮން ހުއްޓާ ދަރިފުޅާ މި ބޯތި އެނގޭ..“

”ކޯޢްޗެއް ތީ.. ހީވަނީ ޕޫޕްހެން“ މަޖުދާ، އިޔާންގެ އަތައް ދިން ތަށި ފެނިގެން ނީޝާން އަނގަހަދާލިއެވެ.

”އިނގުރު.. ބޯނަންތަ؟“ ނީޝަން ނުބޯނެކަން އެނގިހުރެ ލާނެތް ގޮތަކަށް އިޔާން ހޭންފެށިއެވެ. އޭނާ އެހެން އެހީވެސް އިނގުރުގެ ރަހަ ދޭ އެއްޗެއް ނީޝަން އޮޅިގެން ވެސް ނުބޯނެކަން އެނގޭތީއެވެ.

އިޔާން ބުނެލި ހިނދު އަނގަޔަށް ވައްތަރެއް ޖައްސާލާފައި ނީޝަން ބަލައިލީ އަމީރާގެ މޫނަށެވެ. އަމީރާ އުނދުން ކައިރީގައި ހުރެގެން ވެސް ދޭތެރެއަކުން އިޔާންއަށް ކަޅިއެއް ލަމުން ދާތަން ފެނި ނީޝާންގެ ގާތައް ހިނިއަންނަ ގޮތްވިއެވެ. އިޔާންވެސް ނޫން ކަމަށް ހެދިގެން އިނދެ އެވަރަށް ބަލައެވެ. ދެމީހުންގެ މި ސިފަ ގޭގެ އެހެން މީހަކަށް ފާހަގަ ނުވަނީ ބާއޭ އޭނާގެ ހިތައް އެރިއެވެ.

“ ދަރިފުޅު ހިނގާބަ ދައްތި ޓޯސްޓް ހަދަން ވާއިރަށް ދޮންބެ ހޭލައިފިތޯ.. ގަޑިޖެހެން ވާއިރަށް އެއްޗެއް ކައިގެން ދެވޭހާ މޫސުމުގަ އެނދުން ހިއްލާ ނުލާނެ މީރާން އެއް“ ރީއާ އުރާލައިގެން ހުރެ މަޖުދާ ނުކުމެލީ މީރާންއަށް ގޮވަން ދިއުމަށެވެ.

ފަހަރަކު މީހެއްގެ މޫނަށް ނީޝަން ވަރަށް ރަނގަޅަށް ބަލައިލިއެވެ. އޭނާގެ ޅަ ސިކުނޑީގައި މޮޅު ހިޔާލެއް އެނބުރިގަތީއެވެ. އިރަމް ވެސް ރޮށި ފިހެ ނިމިގެން ސާމާނުތައް ނަގަނީއެވެ. އަމީރާ ވެސް ޓޯސްޓަށް ބޭނުންވާނެ ސާމާނު ތައްޔާރު ކުރަން ކައުންޓަރު ކައިރީގައި ހުއްޓެވެ.

”ދޮންބޭ.. އައި ހޭޑް އަ ޑްރީމް ލާސްޓް ނައިޓް“ ނިކަން ހަމަޖެހިލާފައި ނީޝަން ބުނެލިއެވެ. އިޔާން ތުންޖަހައިގެން ހުރި އިނގުރު ސައިތަށި ދުރުކޮށްލަމުން ނިތް އަރުވާލީ ހުވަފެން ކިޔައިދޭށޭ ބުނާ ފަދައަކުންނެވެ. އަނެއްކާ ވެސް ސައިތަށީގައި ތުންޖަހައިލިއެވެ.

”އޭގަ އުޅެނީ ދޮންބެ ކޮންމެވެސް ގާލްއަކައި މެރީކުރަން.. އެމީ ދައްތިއާއި ހާދަ ވައްތަރޭ އެކުއްޖާ.. އެހާ ލޯބިކޮން ހަގް ކޮށްގެން ވެސް ހުރީ“ ނީޝަންގެ ޖުމްލައާއި އެކު އިޔާން ދިޔައީ ކޮށިއަރައި ގެންނެވެ. އަނގައިގަ ހުރި ފެންތައް ބުރުއްސިގެން ދިޔައިރު ތެޅިގަނެފައި އިރަމް އައިސް އިޔާންގެ ބުރަކަށީގައި ތަޅައިގަތެވެ.

އިޔާން ހަމައަކަށް އެޅުމުން ކެއްސަމުން ކެއްސަމުން އަމީރާގެ މޫނަށް ބަލައިލިއިރު އިރު އަމީރާ ދެލޯ ބޮޑުކޮށްލައިގެން ބަލަން ހުރެފައި އިސްޖަހާލިއެވެ. އެ މޫނު ރަތްވެފައިވާ ގޮތުން އިޔާންގެ ތުންފަތައް ހިނިތުންވުމެއް ވެރިވާން އުޅުނެވެ. ނަމަވެސް އެކަން ފޮރުވާލަމުން ނީޝަންގެ ބޮލުގައި ތަދުނުޥާ ވަރަށް ޖަހާލިއެވެ.

”ސާބަހޭ ނީއްކޮ.. މިހާރަކަށް އައިސް ހާދަ އަނގަ ހިރުވާ ގަނެފަ އޭ ދޯ ތިހުންނަނީ..ދޭބަލަ ކުޑޫގެ ފޯނު ގެނެސްދޭން.. “ މާހައުލުގައިވީ ނުތަވަސްކަން ފިލުވާލުމަށްތަކައި އިރަމް ބުނެލިއެވެ. އިރަމްއަށް ލޯއަޅާލާފައި ވެސް އެއްޗެއް ނުބުނެ ނީޝަން ގޮސްފިއެވެ. އަމީރާ ގާތައް ގޮސް ވާހަކަ ދައްކަން އުޅުނު ހިނދު ބޭރުން ނަދީމް ގޮވާއަޑަށް އޭނާ ނުކުމެގެން ދިޔައެވެ.

މާހައުލުގައި ދެމީޙުން އެކަނިވީއެވެ. ދެހިތުގެ ތެޅުނު އިހްސާސްވާލެއް އަވަހެވެ. ނަމަވެސް  އިސްވެ ޥާހަކަ ދައްކަން އަނގަ ހުޅުވާލަން އެކަކު ވެސް ނޫޅޭފަދައެވެ.

އެންމެ ފަހު ކޯވަރު ބޮއެލާފައި ޒިންކަށް ޖޯޑު ލާން ގާތްވެފައި އެއްލި ކަޅިއަކުން އަމީރާގެ ހެދުމުގައި އޮތް ކުޑަ ހޯނެއް އިޔާންގެ ލޮލުގައި އަޅައިގަތެވެ. އަޅާއިނުލާ ދާކަށް ހިތެއް ނޭދުނެވެ. ދިރޭ އެއްޗިހި ދެކެ އޭނާ ބިރުގަންނަ ވަރު އޮޅިފައެއް ނެތެވެ. ކަބަޑުގައި އަޅުވާފައި އިން ޓިޝޫ ރޯލުން ހައެއްކަ ޓިޝޫ ނަގާ ބޮނޑިކޮށްލަމުން މަޑުމަޑުން އަމީރާއާއި ގާތައް ޖެހެމުން އިޔާން ދިޔައެވެ.

އަމީރާ ސިހުނީ އިޔާން އޭނާގެ ފަހަތުން އައިސް ބަނޑުގައި އަތް އަޅުވާލުމުންނެވެ. ނަމަވެސް ގަދަ ހެދުމުގެ ކުރިން އިޔާން ވާހަކަ ދެއްކިއެވެ.

”ޑޯންޓް މޫވް..މަޑުމަޑުން ހުރޭ“ އިޔާން ހުސްގަޔާ އެހާ ކައިރީގައި ހުރުމުން އަމިއްލަ ހިތައް ކުރަމުން ދިޔަ އިޙްސާސް  އޭނާއަށް އިޙްސާސް ވާނެކަން ޔަގީނެވެ. އެހާ ދުވަސް ފަހުން އެފަދަ ގާތްކަމެއް ލިބުނު އިރު އަމީރާ ބޭނުންވީ އެ ހަށިގަނޑުގައި ބާރަށް ބައްދާލާށެވެ. ނަމަވެސް އެހިތްވަރު ކުރަން ހާލަތު ތަނެއް ނުދެއެވެ.

އިޔާންގެ އަތް މަޑުމަޑުން ހިއްލަމުން ގެންދިޔައިރު ހޯނު ދިމާކޮށްލީ އަމީރާގެ އަތައް އަރާށެވެ. އެހިސާބުން އަމީރާއަށް ގޯހެއް އުޅޭކަން އިހްސާސްވީ ކަންނޭގެއެވެ.

”އެނީތިންގ ރޯން؟ ކޯއްޗެއްތަ ކޮމޑުގަ އެއުޅެނީ؟.. އަނެއްކާ އަހަރެން ބިރު ގަންނުވަނީތަ؟“

”ކާމް ޑައުން.. “ ކުއްލިއެއް ޖަހާލަމުން ޓިޝޫތަކުން ހޯނު އޮތް ހިސާބުގައި ކުޑަކޮން ޖަހާލަމުން އޭތި ހިފިއެވެ. އޭތި ޓިޝޫތަކުގެ ތެރޭގައި ރަނގަޅަށް ހައްޔަރުވިކަން އެނގުމުން އަމީރާގެ ގައިން ދުރުވެލަމުން ނުކުމެލީ ބަދިގެ އިން ނުކުމެވެން އިން ކުޑަ ބެލްކޮނީ ކޮޅަށެވެ.

“ ކޯއްޗެއްތަ؟“ އަމީރާ އޭރުވެސް ހުރީ ބިރުގަނެފައެވެ.

”ހޯނެއް.. އެ ނަގައިފިން“ އިޔާން ބުނެލީ ނިކަން ހަމަޖެހިލާފައެވެ. އަމީރާގެ ބިރު ދެގުނަވިއެވެ. ތޫލި އަޑަކުން ހަޅޭއްލަވައި ގަނެވުނެވެ. ދުވެފައި އައި ގޮތައް އިޔާންގެ ގައިގާ ބައްދާލި އިރު އޭނާގެ ދެފައި ބިމުގައި ހަރުލާ ގޮތެއްނުވެއެވެ. ދެމީހުންގެ ދެމެދުގައި ހަމަނުޖެހުން އެގޮތުގައިވީ ނަމަވެސް އަމީރާގެ އެ އާދައިން އިޔާންގެ ގާތައް ހިނިއަންނަ ގޮތްވިއެވެ.

”އިޓްސް އޯކޭ.. އިޓްސް އޯކޭ“ ހިނިތުންވުން ފޮރުވާލަމުން އަމީޜާގެ ދެކޮނޑުގައި ހިފާ ދުރުކޮށްލިއެވެ.

”އަމް ސޮރީ ފޯރ ދެޓް“ އިޔާން ދުރުކޮށްލި ގޮތުން އަމީރާ ހީކުރީ އަމީރާގެ ފުށުން ފެނުނު އެފަދަ ގައިގޯޅިކަމަކުން ހިތްހަމަ ނުޖެހުނީ ކަމަށެވެ.  ލަދާއި ދެރަ އެކުލެވޭ ޖަޒުބާތެއްގައި ޖެހި ލޯ ފެންކަޅި ވެގެން ދިޔުމުން ރީއާއަށް ކާން އެޅި ސާމާނު ހިފައިގެން ނުކުންނަން ދިޔައެވެ. ނަމަވެސް އިޔާން އަތުގައި ހިފާ ގަޔާއި ގާތައް ގެނައުމުން އަމީރާ ދިޔައީ ސިހިގެންނެވެ.

”އަމް ސޮރީ.. ތަންކޮޅެއް ބާރަށް އަތުގައި ޖެހުނީމަ ކަމެއް ވެފަ ތޯ ބަލާލަން އަސްލު މިއުޅުނީ“ އަމީރާ ދިޔަގޮތުން ވިސްނިގެން އިޔާން ބުނެލިއެވެ. ދެމީހުން ކުރެން އެކަކަށް ވެސް އެއްޗެއް ބުނެވުމުގެ ކުރިން ދޮރާއި ދިމާލުން އަޑެއް އިވިގެން ދުރުވެލިއެވެ.

އަމީރާ ވަކި އެއްޗެއް ނުބުނެ، އިތުރަށް މަޑުކުރަން ނުހަދާ ރީއާގެ ގާތައް ދިޔުމަށް ނުކުމަތެވެ.

”މި ކުޑަބެ ކެއާރލެސް ކަމުން ގޮވައިގެން އެއްކަމެއް ވެސް ނުވާނެ“ ބަދިގެއިން އަމީރާ ނުކުމެގެން އަންނަތަން ފެނުމުން ނީޝަންއާއި މީރާން ވަނީ ޖެހިގެން ހުރި ނީޝަންގެ ކޮޓަރިއަށެވެ. އިޔާންއާއި އަމީރާ އުޅެމުން ދިޔަ ގޮތް ފެންނާނެ ހެން ދެމީހުން ތިބީ ބަދިގޭގެ ދޮރު ކައިރީގައެވެ. ނީޝަން ހައިރާން ނުވި ނަމަވެސް މީރާން ހުރީ ހައިރާންވެ ޝޮކެއްލިބިފައެވެ.

”އެހެންނުވާނީ.. އަހަރެން ނުދެކެން ދުވަހަކުވެސް ދޮންބެ އެހާ އަންހެންކުއްޖަކާއި ގާތްވި ތަނެއް.. ހަމަ އަންތަރީސް ވެފަ ހުރި ވަރު ދޮރުގަ ފައިން ވެސް ޖެހުނީ“ މީރާން ފައި ގާ އަތް ހާކާލީ އަދިވެސް އެހިސާބަށް ތަދު އިޙްސާސް ވާތީއެވެ.

”އޯކޭ އޮކޭ..އެކަމަކު މިކަންތައް އެހެންމީހަކަށް ނާންގާތި!.. ކުރީ ދުވަހު އެމީ ދައްތި ލަސްވެގެން ދޮންބެގެ ބަޔަށް އަހަރެން ދިޔައީ މަންމަ ބުނެގެން…އެތަނުން އިވުނީ ދެމީހުން ވަރަށް ފައިޓް ކުރާ އަޑު.. އެމީހުން ދެއްކި ޥާހަކަ އަޑުއަހާކަށް ނޫން އަސްލު ހުރީ..އެކަމަކު ވެސް އިވުނީ..“ ނިޔަނެތި ކަމާއި އެކު ނީޝަން ކިޔައިދޭ ގޮތުން މީރާންއަށް ހެވުނެވެ.

”ނީޝަން ނަދީމް ހުންނާނެތަ ދެމީހަކު ވާހަކައެއް ދައްކަންޏާ އަޑު ނާހަން.. ޔަގީނުންވިއްޔާ އެތާގަ އެމީހުން ދެއްކި ހުރިހާ ވާހަކަ އެއް ހުންނާނީ އަހާފަ.. މީ ދޮގެއްތަ؟“

”ހޫމް އިވުނޭ.. ދެން ނާހަބަ.. ކުޑޫ ކައިރީގަ ބުނަން އުޅުނީމަ ގަބޫލެއް ނުކުރި.. ހަނދާންކުރާތި! މި ވާހަކަ ކިޔައިފިއްޔާ އެނގޭނެ ހަނދާނެ ގޮތް.!“ ނީޝަން އިނގިލި ދިއްކޮށްލީ އިންޒާރަކާއި އެކު އެކީގައެވެ. މީރާން ދެއަތް ހިއްލާފައި އާއެކޭ ބުނެލިއެވެ.

***

އާމިލާ  އެނދުގައި އޮށޯވެލައިގެން އޮތް އިރު މުޅި ކޮޓަރީގައި ވަނީ ހަމަހިމޭން ކަމެވެ. މެންދުރުގެ ހަމަހިމޭން ކަމުގައި ތަނުގައި ވާ ހަމައެކަނި އަލިކަމަކީ ބެލްކޮނީގެ ދޮރު ހިއްމިއަކަށް ހުޅުވާލާފައި ހުރުމުން އެތަނުން ފާއްދާލާފައި ހުރި އަލިކަމެވެ.  އާމިލާގެ މޮޅިވެރިކަމުން ސާލުލެވިފައިވާ މޫނުމަތިން އޭނާ ކުރަމުން އެދާ ފިކުރުތަކުގެ ބޮޑުކަން ހާމަވެއެވެ.

”ދަރިފުޅާ ކޮބާތަ އަޅެ.. މާދަމާ މިއީ ދަރިފުޅުގެ އަށާރަ ވަނަ އުފަންދުވަސް.. މަންމަ ހާދަ ހަނދާންވެއޭ އެބަ ..“ އަތުގައި އޮތް ފޮޓޯ އަލްބަމް މެޔާއި ލާ ބޮނޑި ކޮށްލެވުނެވެ. އެއީ އަމާޔާގެ ހަނދާންތަކެވެ. އަމާޔާގެ ފޮޓޯތަކުން ފުރާލެވިފައިވީ އިރު އެއް އަހަރުން ފެށިގެން ފަސް އަހަރާއި ހަމައަށް އައި ހުރިހާ އުފަންދުވަހެއްގައި ނަގާފައިވާ ފޮޓޯތައް ފެނުމުން ވަކިން ދެރަވިއެވެ.

”މަންމީ..އަމީ ބޭނުން ވަނީ ސިކްސްވަނަ ސެލެބްރޭޝަންގަ މި ބުޅިބުޅި ހެއާރ އެއްކޮން ފަންކުރަން“ އެއީ އަމާޔާ، އޭނާއަށް ގެއްލުނު ދުވަހުގެ، ކުޑަ ވަގުތުކޮޅެއް ކުރިން ބުނެފައިވާ ޖުމްލައެކެވެ. ޕާޓީއަށް މެހެމާނުން އައުމުގެ ކުރިން އޭނާ ތައްޔާރު ކުރުމައިގެން އާމިލާ އުޅުނު ހިނދު ތުން ދަމާލައިގެން ބުނެލީ ހާދަ މައުސޫމުކޮންނެވެ. ފަހަރަކު ފޮޓޯއެއްގައި ބޮސްދެމުން ދިޔައިރު އާމިލާގެ ލަގޮނޑީއަށް ބާރުވެގަތެވެ.

އެދުވަހު އެންމެ ފަހުން ނަގާފައިވާ ފޮޓޯގަނޑުގައި ފޮތުގެ ތެރެއިން އާމިލާ ނެގިއެވެ. އެ  ބުޅި އިސްތަށިކޮޅު ވަޔަށް ވިހުރިލާފައިވީ އިރު ލޯބި ހިނިތުންވުމެއްގައި ހުއްޓެވެ. އާމިލާއަށް އެ އިސްތަށިކޮޅާއި ދިމާލުގައި އަތް ބީއްސާލެވުނު ހިނދު ސިފަވެގެން  އަމީރާގެ ސޫރައެވެ. ހާދަ ވައްތަރެވެ. އަމީރާގެ އިސްތަށިގަނޑަށް އަރަނީ އަމާޔާގެ އިސްތަށިގަނޑުގައި ހުންނަ ފަދަ ދިހުން ކުލައެވެ. އެ ބުޅިބުޅި އިސްތަށިކޮޅެވެ.

”އަމާޔާ .. އަމީރާ..ވެދާނެބަ؟.. ނޫނޭ.. ނޫނޭ.. އެމީ އެއީ ސްޕެއިން އިން ގެނެސްފަ ވާ ކުއްޖެއް.. އެހެންވާނީ ކިހިނެތް؟..ނޫނޭ .. މާ ބޮޑަށް އަމީއާއި ދޭތެރޭގައި ވިސްނޭތީ މިކަހަލަ ބޭކާރު ވިސްނުންތަ މިއަންނަނީ“ ދުލުން އެބަސްތައް ބޭރުވި ނަމަވެސް ހިތުގައި ވަނީ އޭނާގެ ދަރިފުޅަށް އަމީރާވެދާނެ ބާއެވެ. އެ ސުވާލެވެ. އަމީރާ ފެނުމުން އިޙްތިޔާރަކާއި ނުލާ ދެލޯ ފެންކަޅިވެއެވެ. އެކުއްޖާ ކުރިމަތިން ގެއްލިއްޖެނަމަ ހޯދެއެވެ. މީގެ ކުރިން ރެސްޓޯރެންޓަށް ދެވެނީ ހަފްތާއަކު އެއްފަހަރު ނުވަތަ ދެފަހަރެވެ. ނަމަވެސް އަމީރާ ފެނުނު ފަހުން ކޮންމެދުވަހަކު އޭނާއަށް އުޅެވެނީ ގިނަވަގުތު އެތަނުގައެވެ. އެއްވެސް ފޫހިކަމެއް ނެތިއެވެ.އެ އަންހެން ކުއްޖާއާއި އެކު ޙޭދަކޮށްލެވޭ ޥަގުތުތައް ޢުފާވެރިއެވެ. ދުވަސް ނިމިގެން ދާލެއް އަވަސްހެން ހީވެ ހިތާއި ހިތާ ޝަކުވާކުރެވެއެވެ.

”ހައިކަލް؟“ އާމިލާ ދިޔައީ ސިހިގެންނެވެ. ފިޔަވަޅު އަޑު ވެސް ނީއްވާ ހައިކަލް އައިސް ހުއްޓާ ފެނުނީ ކުރިމަތީގައެވެ.

”އަހަރެން ހީކުރީ އާމީއަށް ނިދިފައޭ..އެހެންވެ އެހާ މަޑުން މިއައީ..ކޮބާ ވާނެ އެންނު ދާން ހަވީރުން.. ޒާހިރް ދެންމެ ވެސް ވަރަށް ގުޅި …އަންނާށޭ ބުނެފަ…“ ހައިކަލް ހަނދާން ކޮށްލަ ދިނީ އޭނާގެ ދުވަސްވީ އެކުވެރިޔާ ޒާހިރްގެ ދަރިފުޅުގެ އުފަންދުވަހުގެ ހަފްލާއަށް ދިޔުމަށެވެ. އާމިލާ ވަކިން ދެރަވީ ނަމަވެސް ބޯ ޖަހައިލިއެވެ.

”ކިހިނެތްވީ ކަމެއް ގޯސްވީޔތަ؟“

”މާދަމާ އަމީގެ ބާރތްޑޭ ވީމަ ވިސްނެނީ“އާމިލާ ތެދަށް ހާމަކުރިއެވެ. ހައިކަލްއަށް ދޫކޮށްލެވުނީ ފިނި ނޭވާއެކެވެ. އާމިލާގެ އަތުގައި ހިފާލަމުން ގެނެސް ގަޔާއި ކައިރި ކޮށްލިއެވެ. އެދެމެދުގައި އޮތް ސާފްސީދާ ލޯބި އެކަމުން ވެސް ހާމަވެގެން ދިޔައެވެ. މިއަދު އެގެޔަށް ނުގޮސް ގޭގައި މަޑުކޮށްލަން ވީތޯ އެހުމުން އާމިލާ ވަގުތުން ދެކޮޅު ހެދިއެވެ.

”އެހެން ހަދާނެކަމެއް ނެތް.. ލައިލާއާއި ވެސް ވަރަށް ދުވަސް ވެއްޖެ ދިމާ ނުވާތާ..މިއަދު އެގެޔަށް ދިޔައީމަ ފެންނާނެ ތާ ދޯ“ ދެލޯ ފުހެލަމުން އާމިލާ ބުރުގާ އަޅާލިއެވެ. ހުރިހާ ކުދިން ވެސް ގެޔަށް އައި ވާހަކަ ހައިކަލް ބުނުމުން އާމިލާ ބޭނުންވީ ނުކުމެލާށެވެ. ހައިކަލް ވެސް ޓައީ ބާލަމުން އާމިލާގެ ފަސްފަހަތުން ބޭރަށް ނުކުތެވެ.

”އެނގޭތަ..ޔޫވީ މިއަދު ސުކޫލުން އެއައީ ވަރުގަދަ އަނިޔާއެއް ހޯދައިގެން.. ވެއްޓިފަ އަތް ހަލާކު ކޮށްލައިގެން… ހޮސްޕިޓަލަށް ގެންގޮސް ފަހައިގެން ގެނެސްގެން އެބައުޅޭ“

”އަޅޭ.. އެކުއްޖާ..ޓީޗަރުންވެސް ނުބަލަނީތަ؟“ ޔޫވިންއަށް އަނިޔާވި ވާހަކަ ބުނުމުން އާމިލާ ނިކަން ހަލުވިކޮން ތިރިއަށް ފައިބަން ދިޔައެވެ.

”ނޫނޭ…އަހަހަހަ.. ޓީޗަރުންވެސް ވަރަށް ބަލާ..އެހާ ލާނެތް.. އެހާމެ ހަލަނި ކުދިން ކޮޅު.. އަހަރެމެން ދުވަސް ވަރު ހެނެއް ނޫނޭ މިޙާރު“ ހައިކަލް ހިނިގަނޑެއް ޖަހާލަމުން ބުންޏެވެ. އާމިލާ ވެސް އެއްބަސް ވުމުގެ ގޮތުން ބޯޖަހައިލިއެވެ.

ތިރިއަށް ފޭބިއިރު އިނީ ވިޝާމް އެކަންޏެވެ. ބަދިގެއާއި ދިމާލުން ސަދަފްއާއި ޔުމާން ވާހަކަ ދައްކާ އަޑުއިވެއެވެ.

”ކޮބާ ޔޫވީ؟“

”ރޮއި ރޮއި އިންދަ ނިދިގެން ދޮންބެ ދައްތަ އެ ގެންދިޔައީ .. ވަރަށް ބޮޑަށް ފަހައިގެން އެއައީ“ ވިޝާމް ޖަވާބު ދިނުމުން މަޑުނުކޮށް އާމިލާ މައްޗަށް އެރިއިރު ހައިކަލް އިށީނީ ސޯފާގައެވެ.

”ދޮންބެ އާއި ޝެޑީ ކީއް މިކުރަނީ؟“

“ ކޮންމެވެސް އަންހެން ކުއްޖަކާއި އެއްކޮން މިރޭ ޑިނާރ އަކަށް ދަނީ.. އެހެންވެ ދޮންބެ ކައިރީގަ އެކިޔަނީ ލާނެ އެއްޗެއް ޗޫޒް ކުރަން ހެލްޕެއް ވެދޭށޯ.. ފުރަތަމަ އަހަރެން ކައިރިއަށް އައީ“ ވިޝާމްގެ ވާހަކަ އިވިގެން ހައިކަލް ހޭންފެށިއެވެ. ހައިކަލްއަކީ ހުރިހާ ދަރިންނާއިވެސް ގާތް ގުޅުމެއް އޮންނަ މީހެއްކަމުން ދަރިންނާއި އެކު، އެކުދިންގެ އަމިއްލަ އެކަހަލަ ވާހަކަ ދައްކާ އުޅުން އެއީ އެއްވެސް ކަމެއް ނޫނެވެ. ހައިކަލް ގޮވާލުމާއި އެކު ސަދަފް އާއި ޔުމާން އައެވެ.

”ކޮބާތަ އެ ލަކީ އަންހެންކުއްޖަކީ.. ފޯރ ދި ފަސްޓް ޓައިމް އިން ލައިފް އަންހެން ކުއްޖަކާއި އެއްކޮން ދާއިރު ބައްޕައަށް ވަރަށް ޔަގީން އެއީ އާދައިގެ ކުއްޖެއް ނޫންކަން..“ ފުރަތަމަ ފަހަރަށް ކަމުގައި ހައިކަލް ބުނެލި ޖުމްލައިގެ މާނަ ވިޝާމްއަށް އޮޅުނެވެ. އިޔާންއާއި ސަދަފްގެ ހަމަނުޖެހުމުގެ އަސްލު އެނގޭއިރު ބައްޕަ އެހެން އެބުނީ ކީއްވެބާއެވެ. ވިޝާމް ދެން ބަލައިލީ ޔުމާންގެ މޫނަށެވެ. ޔުމާންވެސް ލާނެތް ހިންޏެއް ހީލައިގެން އިނދެ ސަދަފްއާއި ދިމާކުރަމުން ދިޔަ ގޮތުން ވިޝާމްއަށް އޮޅުނެވެ.

”ބައްޕާ ޑޭޓަކަށް ނޫނޭ..ޑިނާރ އަކަށް.. ދެން ކާކުކަން ބުނާނަން ފަހުން އެނގޭ.. މި ތިއްތިބެ ކައިރީގަ ހެލްޕްއަކަށް އެދުނީމަ އިންނަނީ އަންހެން ކުއްޖަކުހެން ހުއްޓުން އަރާފަ“

”އެހެންނު ވާނީ.. އެއީ ދުވަހަކު އެކަހަލަ ކަމެއް ކުރަން ހިތައް އަރުވާލި ވެސް ކުއްޖެއް ނޫން.. ދެން ކޮސްވާނެ އެންނު“ ސަދަފްއާއި ހައިކަލް އެއްބައިވެލިއެވެ.

”ހެވޭ ދެން .. އިންނާނެ މީހަކު ނުވެގެންނޭ މިއުޅެނީ“

”ދަރިފުޅާ އިންނާނެ މީހަކު ނުވާނެތަ؟ ހުރިހާ އަންހެން ކުދިން މަށައް މަށައް ކިޔާލަ އެތިބެނީ އޮފީހަށް ވަނަސް.. “

”އެކަހަލަ މީހަކު ބޭނުމެއް ނޫން.. އަހަންނަށް ކަމުދާ ހަމަ އެއްވެސް ކުއްޖެއް ނެތް“ ވިޝާމް  ހިތިގޮތަކަށް ހީލިއެވެ. އޭނާގެ ހިތުގައި ވަނީ ހަޔާތައް ގެންނަން ބޭނުން ނުވާ އަންހެންކުއްޖެއް ނަމެވެ. ހޯދަން އުޅެފިނަމަ، ނަސިބު ހުރިކަމުގައިވާނަމަ ކޮންމެވެސް ދުވަހަކުން ލިބޭނެކަން އޭނައަށް އެނގެއެވެ. ނަމަވެސް ހަމަހޭވެރިކަން ހަށީގައި ހުރިހާ ހިނދަކު އެއީ ވިޝާމް ކުރާނެކަމެއް ނޫނެވެ. އަހަރުތަކެއް ފާއިތުވެ ދިޔަ ނަމަވެސް އެހިތުގައި ރަސްކަން ކުރަމުން ދަނީ އޭނާއެވެ. އެ ލޯތްބެވެ. ސަދަފް ބުރަކަށީގައި ޖަހައިލީ ހަމްދަރްދީ ވެފައި އިނދެއެވެ.

އެކީގައި ކިޔެވި ހުރިހާ ކުދިންހެން އަމިއްލަ ދިރިއުޅުމެއް ފަށައިގެން އުޅޭނެ ކަން އޭނާ ދަނެއެވެ. އޭނާ މީހަކާއި އިންނަން ނޫޅޭތީ ހައިކަލްއާއި އާމިލާ ކިޔާވަރު ވެސް އޭނާއަށް އެނގެއެވެ. ސަދަފް އެ ފެށި ކަމަކާއި ހުރެ ދެން އެ ކިޔުންގަނޑު ދެގުނަވާނެކަން މިޙާރުވެސް ޔަގީނެވެ.

”ބައްޕާ ..އަހަރެން ވިސްނައިފީމޭ ގޮތެއް.. ބައްޕައާއި މަންމައަށް ފެންނަ މީހަކާއި މެރީ ކުރަން ތައްޔާރު… ހަމަ ދެއްކި ކޮންމެ ކުއްޖަކާއި އިންނަން ތައްޔާރު“ ހުރިހާ އެންމެން ސިހުންގެނައީ ވިޝާމްގެ ޖުމްލައިންނެވެ. އޭނާގެ އަޑަކު ސަމާސާގެ އަސަރެއް ނެތެވެ.

”ވަޓް؟“ ސަދަފް އަށް އެހުނެވެ. ވިޝާމް ބޯޖަހައިލިއެވެ.

”އެކަމަކު މިހާރު އެއީ މީހުން މީހުނާއި އިންނަ ގޮތެއް ނޫނޭ.. ކާކުތަ އެރޭންޖް މެރިއޭޖް ކުރަނީ މިޒަމާނުގަ“ ޔުމާންއަށް ވީ ބޮޑު ޖޯކަކަށެވެ. ހައިކަލް ވެސް އެއްބައިވީ ޔުމާންއާއެވެ.

“ އަހަރެން…  މީ ހަމަ އަސްލު ވާހަކަ އެކޭ ބައްޕާ… މި އަންނަ ހަފްތާއަށް ކައިވެނި ހަމަޖެއްސިޔަސް ކުރާ ގޮތައް މިހުރީ“ އިތުރަށް އަމިއްލަ ހިތައް އަނިޔާ ދޭން ވިޝާމް ބޭނުން ނުވީއެވެ. ހަޔާތުން ޖާގަ ދެވެން ނެތް މީހަކަށް އިންތިޒާރުކުރުގެ އެއްވެސް މާނައެއް ނެތްތާއެވެ. އިތުރު މީހަކާއި ގުޅިގެން އުޅެން ފަށައިފިނަމަ ކޮންމެވެސް ދުވަހަކުން އެމީހެއް ދެކެ ވެސް ލޯބިވެވިދާނެއެވެ. އަނެއްކޮޅުން ބައްޕައާއި މަންމަ، މީހަކާއި އިނުމަށް ކިޔާ ކިޔުމަށް ބީރު ކަންފަތެއް ނުދީވެސް ވާނެތާއެވެ.

”އާރ ޔޫ ޝުއާރ؟“ ހައިކަލް އިނީ ހައިރންވެފައެވެ. ވިޝާމް ބޯޖަހާލުމުން ، އެކަމާއި ވިސްނާނެ ކަމަށް ބުނެފައި ހައިކަލް ތެދުވަތީ މަތިން އާމިލާ ގޮވާލި އަޑުއަހާފައެވެ. އޭނާގެ ފަހަތުން ޔުމާން ވެސް ދިޔައެވެ.

”ތިއްތިބޭ..އެކަމަކު މަންހާ-“

”އޭނަގެ ވާހަކަ ނުދައްކާ..ޝެޑީއަށް ފެނުނެއްނު އޭނާގެ ގޮތް.. ކިތަންމެ ލޯބި ވިޔަސް އެކަހަލަ މީހަކަށް ޖާގަ ދިނުމަށް ވުރެން ދިރިއުޅުމުގެ ހުންގާނު މައިންބަފައިންނާއި ހަވާލް ކުރުން މާ ބޮޑަށް ވެސް ބުއްދިވެރި..އެމީހުން ނުނިންމާނެ ދަރިއަކަށް ދެރަ ނިންމުމެއް..ދޮގެއްތަ؟“ވިޝާމްގެ ވިސްނުން އެކަމުގައި ކިތަންމެހާ ވެސް ރަނގަޅެވެ. އެކަމަކު ސަދަފްގެ ހިތުގައި އުފެދުނު ސުވާލަކީ ލޯބި ނުވާ މީހަކާއި ގުޅިގެން ވިޝާމްއަށް ކެތްކޮށްލެވޭނެ ބާއެވެ. ސަދަފް ވަކި އެއްޗެއް ނުބުނި ނަމަވެސް ވިސާމްގެ ކޮނޑަށް ފިތާލީ އެ ޥާހަކަ ތަކާއި އެއްބަސްވިކަން އަނގާލުމަށެވެ.

****

ލޯގަނޑު ކުރިމަތީގައި ހުރެ ތައްޔާރު ވަމުން ދިޔައިރު އިރަމްގެ މޫނުން ފެނިގެންދަނީ ތާޒާކަމެވެ. ކަޅުކުލައިގެ ގަމީސްކޮޅާއި ޑެނިމް ޖީންސްގައި ހުރިއިރު އިރަމްގެ ދޮން ހަންގަނޑާއި ގުޅޭނެ ފަދަ ލުއިލުއި މޭކަޕެއް ކޮޢްލިއެވެ. ފަންފަން އިސްތަށިގަނޑު މިނިވަން ކަމާއި އެކު ވިހުރެން ދޫކޮށްލާ ފައި އޮތެވެ. ސެންޓް ޖަހާލުމާށްފަހު ފޯނާއި އަތް ދަބަސް ހިފައިގެން ނުކުތް އިރު މަޖުދާ ލިވިންގ ރޫމް ސޯފާގައި އިނެވެ.

”އާއްޗާ.. މާޝާﷲ.. ޙާދަ ރީއްޗޭ..ޔަގީން އެ ސޮރު ހިތްކިޔާނެ މަގޭ ދަރިއަށް“ މަޖުދާ ދިމާކޮށްލި ވަރުން އިރަމްގެ މުޅި މޫނު ރަތް ވެގެން ދިޔައެވެ. އިރަމް ފަރާތް ފަރާތް ބަލައިލީ އެއަޑު އިވޭ ހިސާބުގައި އިތުރު މީހަކު ހުރިތޯއެވެ.

”ސާބަސް މަންމައަށް.. މިދަނީ ޑިނާރ އަކަށްށޭ.. ތިހާ ބާރަށް ނުކިޔަބާ.. ސަދަފްއާއި އެކު ދާކަން އެނގިއްޖެޔާ ބައްޕައާއި ދޮންބެ މިގެޔަށް ސުނާމީއެއް ވެސް ގެނެސްފާނެ“ އިރަމްގެ ފަހު ދެ ޖުމްލަ މަޑުމަޑުން ބުނެލިއެވެ. ނުނިކުމެވެނީސް އެދެމީހުން ކުރެ މީހަކު އައިސްފާނެތީވެ ހިސާބެއްގެ ޖެހިލުންވުމެއް މޫނުމަތިން އޭރުވެސް ދިޔައީ ފެންނަމުންނެވެ.

”ހޫމް ދެން ބިރު ނުގަނެބަލަ.. މަންމަ މިޙާރުވެސް ސިކުނޑީގަ މޮޅު އެއްޗެއް ރާވާލާފަ އިންނާނީ.. ދަރިފުޅު އެކަމާއި ހާސް ނުވޭ.. ކޮބާ އޭނަ އައިސްފިތަ؟.. ބުނިން ދޯ ގެއަށް ގެނެސް ދޭން؟“

”ހޫމްމް..އެކަނި ނާންނާނަމޭ.. މިހާރު އޭނަ ހުންނާނީ އައިސް ކަންނޭގެ..އޯކޭ މަންމާ ދަނީ އިނގޭ“ އިރަމްގެ ހަރަކާތްތައް އަވަސްކޮށްލަމުން ބެލީ އިޔާން އައުމުގެ ކުރިން ނުކުމެގެން ދެވޭތޯއެވެ. މިގަޑިއަކީ އާންމުކޮން އޭނާ ގެއަށް އަންނަ ގަޑިއަކަށް ނުވި ނަމަވެސް އައިސްފާނެކަމުގެ ބިރު ހީވީއެވެ.

ލިފްޓުން ފައިބައިގެން ނުކުމެވުނު އިރު ސަދަފް ހުރީ އެގޭގެ ކުރިމައްޗަށް ވާހެން ، މަގުގެ އަނެއްފަރާތުގައި ހުރި އިމާރާތުގެ ފާރަށް ލެނގިލައިގެންނެވެ.  ފޯނަށް ނަޒަރު ދީގެން ހުރިގޮތުން އިރަމް އައި އިރުވެސް ނޭނގުނެވެ.

ސަދަފްއާއި ކައިރިއަށް އައި ހިނދު ނޭފަތުގައި ހަރުލައިގެން ދިޔައީ އޭނާ ބޭނުންކޮށްފައި ވާ ޗެނަލް ބްރޭންޑް ’ކޮކޯ’ގެ މީރުވަހުންނެވެ. ކަޅުކުލައިގެ އަތް ދިގު ޓީޝާޓާއި ކަޅު ޖީންސްގައި ހުރިއިރު އިއްތިފާގުން ވެސް ދެމީހުންނަށް މިތިބެވުނީ އެއް ކުލައެއްގެ ހެދުން އެޅިފައެވެ. އިރަމްގެ ތުންފަތުގައި ރީތި ހިނިތުންވުމެއް ދައުރުވެލި އިރު، ސަދަފްއަށް ހިތުގެ އަޑީން ތައުރީފް ކުރެވުނެވެ.

ސަދަފް ސިހުނީ އިރަމް ގޮވާލި އަޑުއަހާފައެވެ. ފޯނުން ނަޒަރު ދުރުކޮށްލާފައި އިރަމްއާއި ދިމާ ބަލައިލި ހިނދު ސަދަފްއަށް ހުރެވުނީއެވެ. ހީވީ ހިނދުކޮޅަކަށް ނަމަވެސް ގަޑީގެ ކަށި ހުއްޓުނުހެންނެވެ. އިރަމްއަށް އުނދަގޫ ވާ ވަރަށް ބެލުނުހެން ހީވެގެން އިރަމްގެ މޫނުން ނަޒަރު ދުރުކޮށްލަމުން ސަދަފް ހީލިއެވެ.

****

(ނުނިމޭ)