މި ޖިސްމުގާ ވަނީ 14

ވެލާނާ އިންޓަނޭޝަނަލް އެއާރޕޯޓުގެ ރަންވޭގައި، އެމިރޭޓްސް އެއާރލައިންގެ ބޯޓު ޖެއްސިކަން ކުރޫއިން އިއުލާނު ކުރުމާއި އެކު އަމީރާގެ ހިތައް ތަފާތު އިޙްސާސްއެއް ކުރުވިއެވެ. ބޯޓުގެ އިންޖީނުގެ އަޑު ކަންފަތުގައި ލުއި ގޮތަކަށް ހަރުލާފައި ހުއްޓަސް، އޭނާގެ ހިތުގެ ތެޅުމުގެ އަޑު އޭނާއަށް އިވޭހެން ހީވިއެވެ. ނޭނގޭ ސަބަބަކާއި ހުރެ ހިތް ތެޅިގަތެވެ. ނުތަވަސް ވެފައިވާ ސިކުނޑީގައި އަސަރުތައް ދިޔައީ ފުންވަމުންނެވެ.

”ވަޓްސް ހެޕެނިންގް ޓް މީ؟“ މޭގައި އަތް ޖައްސާލެވުނު އިރު އަމީރާގެ ހިތްހަމައަކަށް އަލުވާލުމުގެ ގޮތުން ދެތިން ނޭވާ ބޭރުކޮށްލަން ޖެހުނެވެ.

***

”ގާލް އިޓް ވިލް ބީ އޯލް ރައިޓް“ އަމީރާއަށް ވެފައިވާ ގޮތް ފެނި ކައިރި ސީޓުގައި އޭނާއާއި ޖެހިގެން އިން ޒުވާން އަންހެން ކުއްޖާ ބުނެލިއެވެ. އެއީ އެއާރޕޯޓުގެ ތެރެއިން ދިމާވި ސްޕެއިންއަށް ނިސްބަތްވާ އަންހެން ކުއްޖެކެވެ. އެ ފްލައިޓަކީ ޓްރާންސިޓް ފްލައިޓަކަށް ވާތީ، ރާއްޖެ އަށް އަންނަ މީހަކާއި ބައްދަލް ވޭތޯ ޗެކިންގް ވާ ސަރަހައްދުގައި ތިބި މީހުން ކުރެ ލުއިސް އަހަމުން ދަނިކޮން ދިމާ ވި ޒުވާނެކެވެ. ކަންދިމާކުރި ގޮތުން އޭނާ މަސައްކަތް ކުރަނީ ރާއްޖޭ ރިޒޯޓެއްގައި ކަމުން، އޭނާ ވެސް ދިޔައީ އާއިލާއާއި އެކު ޗުއްޓީ ހޭދަ ކުރުމަށްފަހު އަލުން ރާއްޖެ އަންނަން ދަތުރުފެށުމަށް ތައްޔާޜު ވަމުންނެވެ. ލުއިސްގެ އެދުމުގެ މަތިން އުފަލާއި އެކު އަމީރާއާއި އޭނާ ހަވާލުވިއެވެ. ފްލައިޓްގައި ނުހަނު ވާހަކަ ދެކިފައިވާތީ އޭނާ އާއި އަމީރާ ވަނީ އެކުވެރިންނަށް  ވެވިފައެވެ.

”ސްޓިލް އަމް ނާވަސް..“ ތުންފަތް ދަމާލަމުން ހިނިތުންވުމެއް ވެރިކުރެވޭ ތޯ މަސައްކަތް ކުރީ އޭނާގެ ނުތަވަސްކަން ފޮރުވާލުމަށެވެ.

”ހިނގާ ފައިބަމާ .. “ ކެބިން ކްރޫއަކު ދޮރު ހުޅުވާލަ ދިނުމުން ފަހަރަކު މީހަކު ފައިބަމުން ދިޔައެވެ.  އަލަށް ދިމާވި އެކުވެރިޔާ، ވެލެރީ އާއި އެކު ލަސް ފިޔަވަޅު ތަކެއްގައި އަމީރާ އައެވެ. ސިޑީގެ އަތްގަނޑުގައި ހިފަހައްޓާލައިގެން ހުރެ ބޯޓުން ފައިބަމުން ދިޔަ އިރު ވަށައިގެން ފެންނަމުން ދިޔަ މަންޒަރުތަކުން، އޭނާގެ ހިތައް އިންތިހާއަށް އުނދަގޫ ވަމުންދިޔައެވެ. ފިޔަވަޅުތައް މަޑު ޖެހެމުން ގޮސް ފައި އަޅަން ދަތިވަމުން ދިޔައެވެ. އަމީރާއަށް ފަހަތުން އަންނަމީހުންގެ ނުރުހުމުގެ ބަސްތައް ވެސް ނީވޭ ކަހަލައެވެ.  އެއަށްވުރެން ބޮޑަށް އޭނާއަށް ހުރެވުނީ ގެއްލިފައެވެ.

ނުހަނު ހިތްވަރުން އޭނާއަށް ސިޑިން ފޭބުނީ ވެލެރީގެ އެހީއާއެކުއެވެ. އަމީރާގެ އަތުގައި އޭނާ ނުހިފި ނަމަ އެތަނުން އަދިވެސް ފޭބޭނެ ކަމެއް ނޭނގެއެވެ.

”ވަޓް ހެޕެންޑް ގާލް؟“ އަމިރާގެ ދެލޮލުން ފައިބަމުން ދިޔަ ކަރުނުތައް ފެނި ކަންބޮޑުވެފައި ހުރެ ވެލެރީ އަވަސްވެގަތީ ޓިޝޫއަކުން ފުހެލަ ދެވޭތޯއެވެ.

އިރުކޮޅެއްގެ މަސައްކަތުން ހުއްޓާލެވުނު ނަމަވެސް އަމީރާގެ މެޔަށް ނޭނގޭ ތަދެއް ވަމުން ދިޔައެވެ. ކޮންމެވެސް ބައެއްގެ މަތިން ހަނދާންވަނީއެވެ. ވިސްނާ ވިސްނާ ވެސް އެއީ ކޮންބައެއްކަން އޭނާއަކަށް ނޭނގުނެވެ. ގާތްބަޔަކާއި އެތައް ދުވަހެއް ވަންދެން ދުރުގައި އުޅެފައި ބައްދަލްވެވެން އުޅޭ ކަމުގެ އަސަރްތަކެއް ހިތުގައި ފުންވަމުން ދިޔައެވެ. ނަމަވެސް އެކަހަލަ އިޙްސާސްތަކެއް ހިތުގައި ގިނަވާންވީ ސަބަބެއް އޭނާއަށް ނޭނގުނެވެ.

ފްލައިޓް ފައިބަމުން ދިޔަ މީހުން، އަންނަމީހުންގެ ގިމަތައަށް ގެންދިޔުމަށްޓަކައި ބަހެއް އައިސް މަޑުކޮށްލިތަން ފެނި ، ހިތްވަރުކޮށްލަފާއި ވެލެރީ އާއި އެކު އަމިރާ އެއަށް އަރަން ދިޔައެވެ. ފޮށި ހިފައިގެން އެމީހުންނަށް ނުކުމެވުނު އިރު ވެލެރީގެ އިންތިޒާރުގައި ހުރި ޒުވާނަކު އެމީހުންގެ ގާތައް އައިސް ހުއްޓުނެވެ.

އަމީރާ ފޯނު ނަގައި ހުޅުވާލީ އޭނާ ބަލައި އަންނާނެ ކަމަށް ބުނި މީހުންގެ ހިލަމެއް ވޭތޯއެވެ. އިޔާންއަށް ނުވޭތޯ ހިތާހިތުން ދުޢާ ކުރެވުނު އަދަދެއް ވެސް ނޭނގެއެވެ. އަމީރާ ފޯނު ހުޅުވިތާ މާގިނަ އިރެއް ނުވެ އޭނާގެ ފޯނު ރިންގްވާތަން ފެނި، ތެޅިތެޅި އޮތް ހިތަކާއިއެކު ފޯނު ނެގިއެވެ.

”ހަލޯ.. އަމީރާ ތަ..  މި ނަދީމްބެ އިނގޭ.. ބޭބެ މިހުރީ ގޭޓު ކައިރީގަ…“ އަމިއްލަ ނަފްސަށް ވަމުންދިޔަ ގޮތުން ނުތަވަސްވެފައި ހުއްޓާ އެ ކޮޅުން ވާހަކަ ދެއްކި މީހާގެ އަޑު އިވި އަމީރާގެ ހިތައް ހަމަޖެހުމެއް އިޙްސާސްވިއެވެ. އެހާ އަވަހަކަށް އިޔާންއާއި ދިމާވާކަށް އޭނާ އަދި ތައްޔާރެއް ނޫނެވެ. އެކަމަށް ހިތް ނުސީދާ ގޮތަކަށް އެދެމުން ދިޔަނަމަވެސް، ފުދޭވަރަކަށް ވަގުތުން ބޭނުންވެއެވެ.

ވެލެރީއާއި އޭނާގެ އެކުވެރިއާގެ އެހީގައި  ފޮށި ހިފައިގެން ބޭރަށް ނުކުމެވުނެވެ. ފޯނު ނަގާ އެ ނަމްބަރަށް އަމީރާ އަލުން ގުޅާލީ އެ ބުނާ ފަރާތެއް ވަކި ކުރަން ނޭނގޭތީއެވެ. ފޯނުގައި ހުރި ހިސާބު ކިޔައިދިނުމުގައި ވަގުތު ކޮޅެއް ހޭދަވިއެވެ. ދެމީހުން، އެކަކު އަނެކަކު ހޯދަމުން ދާތާ އިރުކޮޅެއް ފަހުން ދިމާވިއެވެ.

”އަހަހައްހާ.. ފައިނަލީ.. ބޭބެ މިދިޔައީ އެކޮޅަށް ކަމަށް ހަދާފަ…ވަރަށް އުފާ ވެއްޖެ ދިމާ ވީމަ.. ވަރަށް ވަރުބަލި ވެފަ އެންނު ހުންނާނީ.. ގެޔަށް ގޮސް ދޯ ވާހަކަ ދައްކާނީ..ހިނގާ ގެޔަށް ދަމާ“ ލުއިސް ބުނީ ތެދެކެވެ. ނަދީމްގެ ހިތްހެޔޮކަން އެންމެ ފުރަތަމަ މިނެޓްގައި ވެސް އަމީރާއަށް އެނގުނެވެ.އަމީރާގެ އަތުގައި ހުރި ދަބަސްތައް އަތުލުމަށްފަހު އޭނާގެ ފަހަތުން އައުމަށް އެދުނެވެ.

”ނަމްބާރ ދިނީމެންނު ދޯ…ގުޅާނަން އިނގޭ އޮފްޑޭސް ގަ މާލެ އައިސް“ އަމީރާ ދާން ފެށުމުން ވެލެރީ ބައްދާލުމަށްފަހު ދުރުވެ ސަލާމް ކޮށްލިއެވެ. އަމީރާ ހިނިތުން ވެލަމުން ބޯ ޖަހައިލިއެވެ. ދިމާވާނެ ކަމަށް ބުނެ އަމީރާ ވެސް ނަދީމްގެ ފަހަތުން  ހިނގައިގަތެވެ.

“ ކިހިނެތް ވަނީ ދަތުރު…ލުއިސް މެން ކައިރީގަ ވެސް ބުނީމޭ އަންނަން ވީ ނޫން ހޭ ..އެބަ ތިބި ކޮއްކޮ އަންނާތީ  ހުރިހާ އެންމެން އިންތިޒާރުގަ“ ނަދީމްގެ ޖުމްލައާއި އެކު އަމީރާ ހިސާބަކަށް ސިހުނެވެ. އިޔާން ވެސް އެބަ އިންބާ ހިތައް އެރިއެވެ. އަމީރާއަށް ތުން ފިއްތާލެވުނެވެ.

”އެހެންތަ.. ގެ ވަރަށް ދުރުތަ“ އިރުކޮޅެއްގެ ހަމަހިމޭން ކަމަށް ފަހު އަމީރާ އެއްޗެއް ބުނެލިއެވެ. ނޫންނަމަ ނަދީމްގެ ހިތައް އެއްޗެއް އަރާފާނެ ކަމަށް ވިސްނާފައެވެ.

”ދެވޭނެ ޓްރެފިކް ނެތިއްޔާ ފަނަރަ ވަރަކަށް މިނެޓް ތެރޭގަ އިރާދުކުރެއްވިއްޔާ.. ބޭބެގެ ދަރިއެއްގެ ކާރުގައި އައިސް މިއުޅެނީ..އޭނާ ވެއްޖެ ކާރުގަ.. ފައިބައި ފިއްޔާ އަނެއްކާ މާ ދުރަށް ޕާކް ކުރަން ދާން ޖެހޭނީ ..ހެހެހެ“ ނަދީމް ބުނެލިއެވެ.

އެއާރޕޯޓުން ނުކުމެ ކާރުތައް އޮތް ދިގު ކިޔުއާއި ދިމާލަށް ނަދީމްގެ ފަހަތުން އަމީރާ ހިނގައިގަތެވެ. މަގުގެ އެއްފަރާތުން ދިޔައިރު ވަށައިގެން ވާ މާހައުލަށް އަމީރާގެ ކަޅި ހުއްޓެމުން ދިޔައެވެ.

”ވައި އަމް ފީލިންގ ސޯ ރިއަލް؟.. ވައި..ވައި އައި ފީލް ޓިއަރީ އެގެއިން؟“ މި ފަސްގަނޑުގައި އެޅުނު ފުރަތަމަ ފިޔަވަޅާއިއެކު އަމިއްލަވަންތަ ކަމުގެ އިޙްސާސް ކުރުވަމުން ދިޔައީ އިންތިހާއަށެވެ. އޭނާގެ ހަނދާނުން ފުހެވިފައިވަނީ ކޮން ކަންތައް ތަކެއްބާ އޭ ހީވެ ފުރަތަމަ ފަހަރަށް އެކަމާއި ވިސްނުނެވެ. ކިރިޔާވެސް ކަމެއް ހަނދާން ކުރަން ބާރު އަޅާލައިފިނަމަ ބޮލުގައި އަޅަނީ ގަދަ ވޭނެވެ. ހީވަނީ ހޭވެރިކަން ފިލައި ގޮސްފާނެ ހެންނެވެ. އެ ތަދު އިޙްސާސް ކުރުމަށް ވުރެން ހާސް މަރުން މަރުވުން ވެސް މާ ރަނގަޅުކަމަށް އަމީރާގެ ހިތުން ބުނެވުނެވެ. ދެލޮލުގެ މިޔަކަނުން ފޭދިފައިވާ ފެންތިކިތައް އަމީރާ ފުހެލީ، ކާރާއި ހިސާބަށް އާދެވުމުންނެވެ.

”ކޮބާ ބައްޕާ .. ގެނެވުނުތަ ސާމާނު؟“ ކާރުގެ ތެރެއިން ޔުމާން ނުކުމަތީ ނަދީމް ފެނިގެންނެވެ.

”އާން ދަރިފުޅާ.. ޓްރޮލީއެއް ހިފައިގެން ދިޔައީ އެކަމަކު އެންމެ ފޮއްޓެއް އިނީ..އެހެންވެ ޓްރޮލީ ވެސް ބަހައްޓާފަ މިއައީ“ ނަދީމްގެ ޖުމްލައަށް އެއްޗެއް ނުބުނެވިގެން އުޅެނިކޮން އޭނާގެ ފަހަތުން އައިސް ހުއްޓުނު އަންހެން ކުއްޖާ ފެނި ޔުމާންއަށް ޒާތަކަށް ހުއްޓުން އެރިއެވެ. ޒާތަކަށް މެޔަށް އުނދަގޫވިއެވެ. އޭނާގެ ފައިން ފެށިގެން ބޮލަށް ނަޒަރު ހިންގާލެވުނީ މަދު ސިކުންތު ކޮޅެއްގެ ތެރޭގައިއެވެ. އަމިއްލަ އަނބިމީހާ ނޫން އިތުރު އަންހެން ކުއްޖަކަށް އެވަރަށް ވެސް ، މީގެ ކުރިން ބަލައި ނުލެވެއެވެ. ނަމަވެސް މިރޭ ވީ ގޮތެއް ނޭގުނެވެ. ޔަގީނުން ވެސް އެ ނަޒަރަކީ އެކުއްޖާއާއި ހިތް ކިޔައިގެން ނުވަތަ ގަޔާވެގެން ދެވުނު ނަޒަރެއް ނޫނެވެ. ކޮންމެވެސް ގޮތަކުން އޭނާއާއި ގުޅުމެއްވާކަމަށް ހިތް ނުސީދާކޮން ބުނެދެމުން ދިޔައިރު އެހެން ވާން ޖެހޭ އެއްވެސް ސަބަބެއް ޔުމާނަކަށް ނުވިސްނުނެވެ. އެއީ މިރޭ މުޅިން އަލަށް ދިމާވި  ކުއްޖެކެވެ. ދެފަރާތައް ބޯ ހޫރުވާލަމުން ގަދަކަމުން އެ އަންހެން ކުއްޖާއަށް ހިނިތުން ވުމެއް ރައްދުކޮށްލިއެވެ. ހިނިތުން ވެލަން ވެސް ވީ ވޭނަކަށެވެ.

ނަދީމް ދޮރު ހުޅުވާލަ ދިނުމުން އަމީރާ ކާރަށް އެރިއެވެ. ރަނގަޅަށް ކާރުގައި ހަމަ ނުޖެހެވެނީސް ކުރީ ސީޓް ހުޅުވާލާފައި އެތެރެއަށް ވަތް ޔުމާން ފެނުމުން އަމީރާއަށް ވެސް ބަލަހައްޓާއިގެން ހުރެވުނެވެ. ކީއްވެ ކަމެއް ނޭނގެއެވެ. ގާތް މީހެއް ކަމަށް ހިތް ބުނެދެމުން ދަނީއެވެ. އަވަސް އަވަހަށް އިސްޖަހައިލި ނަމަވެސް އޭނާގެ މުޅި ސިކުނޑި ވަނީ ހަލަބޮލިކަމެއްގެ ތެރޭގައެވެ. މަޑުމަޑުން ބޮލުގައި ރިއްސަމުން ދިޔައިރު އަމީރާދެލޯ މަރާލަމުން ސީޓުގައި ލެނގިލިއެވެ. ނަދީމް އާއި ޔުމާން އަމިއްލަ ވާހަކައެއްގައި ތިބި އިރު ލޯ މަރައިގެން އޮތް ނަމަވެސް އެމީހުންގެ ވާހަކަ ތައް އަމީރާ ދިޔައީ އަޑުއަހަމުންނެވެ.

”މިއޮތް އާދެވުނީ“ ޔުމާންގެ އަޑުން އަމީރާ ލޯ ހުޅުވާލިއެވެ. އޭރު ނަދީމް ވެސް ކާރު ފައިބަނީއެވެ.

އަމީރާވެސް ދޮރު ހުޅުވާލަމުން ފޭބިއެވެ. ފުރަތަމަ ވެސް އަމީރާގެ ނަޒަރު ހުއްޓުނީ ކުރިމަތިން ފެންނަމުން ދިޔަ އުސް އިމާރާތަށެވެ. ވިހި ފަންގިފިލާގެ ބިޔަ އިމާރާތެކެވެ. ބޭރުން ބަލައިލި އިރުވެސް ނުހަނު ފެންވަރު ރަނގަޅުކޮން ހަދާފައި ހުރިތަނެއްކަން ހާމަވެއެވެ. އެމީހުން ފެނުމުން ސެކިއުރިޓީ މީހުން ވެސް ހީލިއެވެ. ފުޅާ ދަގަނޑު ގޭޓު ހުޅުވާލެވުނު އިރު ފުރަތަމަވެސް ފެންނަން އޮތީ ޖާގައިގެ ގޮތުން ތަނަވަސް ގަރާޖެކެވެ. އިމާރާތުގެ ތެރެއަށް ވަދެވެގެން އިން ދެތިން ހަރުފަތް ގިރާކޮށްލަމުން ލިފްޓަށް އެރިއެވެ.  ބޮޑު އިމާރާތެއް ނަމަވެސް މީހަކު ފެންނަން ނެތުމުން އަމީރާގެ ހިތުގައި ސުވާލް އުފެދުނެވެ. ހުރިހާ އެޕާރޓްމަންޓްތަކެއް ވެސް ހުރީ  ދިއްލާފައެވެ. އެހެން އަހާލަން ހިތައް އަރާފައި ހުއްޓާ ނަދީމް ވާހަކަ ދެއްކިއެވެ.

”ޕްރައިވެސީ އިންނާނެ އެނގޭ.. މި އިމާރާތުގަ އެންމެ މަތީގަ ބޭބެ މެން އުޅެނީ.. ދެން އެހުރީ ހުސް ކުށްޔަށް އުޅޭ ފްލޯރ ތައް .. ކޮންމެ ބައެއްގަ ވެސް ހުންނާނެ ތިން އެޕާރޓްމަންޓް.. ހުރިހާ ބައެއްގަ ވެސް މީހުން އުޅޭނެ.. އެކަމަކު ކުށްޔަށް އުޅޭމީހުން ބޭނުން ކުރާނީ ބިލްޑިންގް އެކޮޅުގައި އިންނަ ދޮރު.. މީ ފެމެލީ ބޭނުން ކުރާ ގޭޓް“ ނަދީމްގެ ޖުމްލަތައް އަމީރާ ބޯޖަހައިލިއެވެ. އޭރު ޔުމާންވެސް ކާރު ޕާކް ކުރުމަށްފަހު ގެޔަށް ވަނެވެ. ލިފްޓުން އަރައިގެން ތިންމީހުން ވައިން އިރު ދެކޮޅަށް ހިނގާލަ ހިނގާލަ މަޖުދާ ހުއްޓެވެ. ސޯފާތަކުގައި އިރަމް އާއި މީރާން އާއި ނީޝަން ތިއްބެވެ.

”އަހާންން.. މިއޮތް އައީ އެންނު… އަވަހަށް ވަދޭ“ މަޖުދާ އަށް އަމީރާ ފެނުންތަނާހެން ހުރިހާ ދަތެއް ފެންނަވަރަށް ހީލިއެވެ. އައި ބާރު މިނުގައި އަމީރާގެ އަތުގައި ހިފާލައިގެން ގެންގޮސް ސޯފާގައި ބޭންދިއެވެ.

”އެމީ.. އެމީ ރަނގަޅު ތަ .. ކިހިނެތްތަ ދަތުރު..“ މަޖުދާ އެހުމުން ރަނގަޅު ކަމަށް ބުނެ އަމީރާ ހީލިއެވެ. ހުރިހާ އެންމެންގެ އެކުވެރިކަން ފެނި ހިތައް ލިބުނީ ބަޔާން ކުރަން ދަތި ހިތްހަމަ ޖެހުމެކެވެ.  އޭނާ ހިތާ ހިތުން ދުއާ ކޮށްލެވުނީ އިޔާން ނާދޭތޯއެވެ. އޭނާ އަންނަންޏާ އަންނާނީ އަނބިމީހާއާއި ދަރިފުޅު ގޮވައިގެން ކަންނޭގެއެވެ. އެ މަންޒަރު ދެކޭކަށް އަމީރާ ބޭނުމެއް ނުވިއެވެ. ނޫނެކެވެ. އޭނާއަކަށް ކެތެއް ނުވާނެއެވެ. މި އެންމެންގެ ތެރޭގައި ބޭޒާރު ވާކަށް އޭނާ ނޭދެއެވެ.

”ދައްތައާއި ބޭބެގެ ތިބޭނެ ފަސް ކުދިން … މި ޔުމާން ބޭބެ .. ދައްތަގެ އެންމެ ދޮށީ ދަރިފުޅު ނާޔާގެ ފިރިމީހާ.. ދެން ހުންނާނީ އިޔާން.. މީ އިރަމް ..ސޭމް އޭޖް އެމީ އާއި ދޯ… ދެން މީރާން އާއި ނީޝަން މިތިބީ“ ހުރިހާ އެންމެން ތައާރަފް ކޮށްދިނުމުން އަމީރާ ބޯޖަހައިލިއެވެ. އެމީހުންގެ އަނގައިން އިޔާންގެ ނަން ބޭރުވާ ކޮންމެ ފަހަރަކު އޭނާގެ ހިތް ތެޅިގަނެއެވެ.

”ނައިސް ޓް މީޓް ޔޫ..އަދި ހުންނާނެ ދެ ބޭބީ .. އަހަރެމެންގެ ބޭބީ އަކާއި އިޔާގެ ބޭބީ“ޔުމާން ވެސް ހީލަމުން އަމީރާއާއި ސަލާމަތް އަތް ދިއްކޮށްލިއެވެ.

”ނައިސް ޓް މީޓް ޔޫ ޓޫ..“ޔުމާންގެ އަތުގައި ހިފާލި ހިނދު އަމީރާއަށް އެ ގޮތް ނޭނގޭ އިޙްސާސް އަނެއްކާ ކުރުވަން ފެށިއެވެ. މޫނުމަތީގެ ކުލަވަރު ފޮރުވާލުމުގައި އަމީރާ ނުހަނު ކުޅާދާނައެވެ. އަތް ދިރިކޮށްލަމުން ފުންނޭވާއެއް ބޭރު ކޮށްލިއެވެ. އެންމެންގެ ތައާރަފް ދިން އިރު ވެސް އިޔާންގެ އަންހެނުންގެ ވާހަކަ އެކަކުވެސް ނުބުނުމުން އަމީރާ ހިސާބަކަށް ހައިރާންވިއެވެ.

”އޯހް މައި ގޯޑް… ވޯޙް..ވޯހް… މާޝާﷲ…“އިރަމް ހުރީ އަމީރާ ފެނިގެން އަނގަހުޅުވިފައެވެ. އަމީރާގެ ގާތުގައި އިށީންދެ ތައުރީފް ކުރަންފެށިއެވެ. ލުއިސްއާއި މާރިއާ، އަމީރާގެ ފޮޓޯއެއް ކުރިން ފޮނުވާފައިވާތީ މަޖުދާއަށް އޮތީ ފެނިފައެވެ. އަމީރާގެ ރީތިކަމުގެ ވާހަކަ މަޖުދާ ދެއްކި ނަމަވެސް، އެކަމަކަށް ސަމާލް ކަމެއް ދެވިފައި ނެތެވެ. ނަމަވެސް ކުރިމަތީގައި ހުރި އަންހެން ކުއްޖާ ރީތިކަމުން އޭނާ ނޫނަސް، މީރާން ވެސް ދެލޯ ބޮޑުކޮށްލައިގެން ހުރެ ތައުރީފް ކުރަމުން ދިޔައެވެ. ލަދުގަނެފައި ހުރެ އަމީރާ ލުއި ހިނިތުންވުމެއް އެންމެނަށް ރައްދު ކޮށްލިއެވެ.

”އަޅޭ ދައްތި…މިއޮތް ލޯބި ހެއާރ އެއް ވެސް. ނީޝް އަށް ދެއްޗޭ ފުނާ އަޅާލަ ދޭން“ ނީޝާން އަށް އެންމެ ކަމުދިޔައީ އަމީރާގެ ރާޅުބާނީ އިސްތަށިގަނޑެވެ.  “ ދައްތި ކޮންކަހަލަ ޝޭމްޕޫ އެއްތަ ލަނީ ބޮލުގަ.. ކޮންޑިޝަނާރގެ ނޭމް ވެސް ބުނެބަ ޕްލީޒް ޕްލީޒް“ އަމީރާގެ އަތުގައި ހިފައިގެން ނީޝަން ކިޔަމުންދިޔައެވެ.

”ދަރިފުޅާ..ސޭ މާޝާﷲ“ މަޖުދާއަށް ނީޝާން އުޅެމުން ދިޔަ ގޮތުން ދެފަރާތައް ބޯ ހޫރުވާ ލެވުނެވެ.

”ހެހެ.. އައި ޑޯންޓް ޔޫސް ދެޓް“ ނީޝަންގެ ކޮލުގައި ހިފާލަމުން އަމީރާ ހީލީ ހިތްތައް ބަންޑުންފަދަ އަކުންނެވެ. އެކުދިންނާއި ވާހަކަ ދައްކާލަން އިނއިރު ހިތުގައި ވި ނުތަވަސްކަން ވަދެފައި ވަނީ ކޮންތާކަށް ކަމެއްވެސް ނޭނގެއެވެ. އަލަށް ދިމާވިހެން ވެސް އިޙްސާސްނުވެއެވެ. ވާހަކަ ދެއްކުނީ އެހާ ވެސް ގާތްކޮންނެވެ.

”ދެން އިރޫ ހާދަ ފޫހި ފިލާނެއޭ މި ވީގޮތުން.. ނީޝްގެ ހެލްޕެއް ދެން މަށަކަށް ހެޔޮ.. އައި ގޮޓް އަ ނިއު ބެސްޓީ.. އާހްހް އަމް ސޯ ހެޕީ .. ލެޓްސް ގޯ ކޮންމެ ދުވަހަކު ބޭރަށް ދެމީހުން“ އަމީރާގެ އެއް އަތުގައި ހިފައިގެން އިނދެ، އިރަމް ދިޔައީ އަމީރާގެ އަނެއް އަތުން ނީޝާންގެ އަތް ނެއްޓުވޭތޯ ބަލަމުންނެވެ.

”ނޮޓް ފެއާރ އިނގޭ.. ކޮން ކުޑޫ އެއް ތަ.. އަބަދު ފައިޓް ކުރާ މީހެއް ނީޝް އަކަށް ވެސް ހެޔޮ..“

”ސުބުހާނައްﷲ.. އެ ދަރި މެދުގަ ބައިންދައިގެން ކޮންކަހަލަ އުގޫބާތެއް ތަ ދެމީހުން ތިދެނީ.. ހަމަ މިހާރު ރީތިކޮން ތިބޭ..އެހާ ދިގު ދަތުރެއް ކޮށްފަ އައީމަ ވެސް އުނދަގޫ ކުރެއޭ..“ ނަދީމް އަޑުލައިގަތުމުން ދެމީހުން ރީތިކޮން ތިއްބެވެ. ނީޝަން ތުން ދަމާލާފައި ދަމުން ދިޔައީ އިރާމްގެ ގައިގާ ވިކައިގަނެފައެވެ. އެ މަންޒަރު ފެނުމުން ނުހޭން މަސައްކަތް ކުރިނަމަވެސް އަމީރާއަށް ހެވުނެވެ. އެހުރިހާކަމެއް އެއީ އަމީރާއަށް މުޅިން އާ ކަންކަމެވެ.

ލަސްނުކޮން އަމީރާ ގޮވައިގެން އެންމެން ވެސް ވަނީ ޑައިނިންގރޫމަށެވެ. މަޖުދާއާއި އިރަމް ވެގެން ތަށިތަކުގެ މަތި ހިއްލަމުން ދިޔައިރު ، ހިސާހިތަކު ކާތަކުތީގެ މީރުވަސްތައް އުތުރު އަރަންފެށިއެވެ. ހުރިހާ އެންމެން ގޮނޑިތަކުގައި އިށީންދެ ތައްޓަށް ކާ އެއްޗިހި އަޅައިގެން ކާންފެށިއެވެ.  ފިހުނު ކުކުޅާއި ގާލިކް ރައިސްގެ އިތުރުން ސްޕެގެޓީއާއި މީރު ކަސްޓަޑެއް ހުއްޓެވެ. ކާއެއްޗިހުނުގެ މީރުކަމުންނާއި ބަނޑުހައިވެފައި ހުރި ވަރުން، އަމީރާއަށް އެހެންޏާ ކައި އުޅޭވަރަށް ވުރެން ގިނައިން ކާލެވުނެވެ.

”މަންމާ .. ދޮންބެ ކޮބާތަ އަޅެ.. އަދިވެސް ގެޔަކަށް ނާދޭ ދޯ“ އިޔާންގެ ހަބަރެއް ނުޥާތީ ލަސްވެގެން  މީރާން ބުނެލިއެވެ.

”ދެންމެ ބުނި މި އަންނަނީ އޭ.. ކާރުގަ މިހާރު އިންނާނީ.. “ މަޖުދާގެ ޖަވާބު އަހާފައި އަމީރާއަކަށް މަޑަކުން ނީނދެވުނެވެ. ނަސީބަކުން އޭރު އެނާގެ ތަށި ވެސް ހުރީ ހުސްވާން ނުހަނު ކައިރިވެފައެވެ. އިރަމްގެ އަތުގައި ކޮއްޓާލުމަށްފަހު ފްރެޝް ވެލަން ބޭނުން ވާ ވާހަކަ ބުނެލިއެވެ. އިރަމްވެސް ކައި ނިމިފައިވާތީ، ކޮތަރިއަށް ދިޔުމަށްޓަކައި އަތް ދޮވެލައިގެން އަމީރާގެ އަތުގައި ހިފައިގެން ޑައިނިންގ ރޫމުން އިރަމް ނުކުތެވެ.

”މަންމާ…“ކޮޓަރީގެ ދޮރުމައްޗަށް އެރުނު ހިނދު ގޭގެ މައިދޮރު ހުޅުވުނު އަޑުއިވުނެވެ. ފުރަތަމަ ވެސް ކަންފަތުގައި ޖެހުނީ އިޔާންގެ އަޑެވެ. އަމީރާގެ ދެލޮލަށް ކަރުނުތައް ބޮނޑިވެގަތީ އިޙްތިޔާރެއް ނެތިއެވެ. އެހުރިގޮތައް ހުރެ ފަސް އެނބުރި ބަލައި ނުލާ ގޮސް ކޮޓަރި ތެރެއަށް ދެމިގަތެވެ.

އިޔާން ހުރީ ތެމިފޯވެފައެވެ. ވިޝާމްއާއި އެކުވެރި ދެތިން ޒުވާނަކާއި އެކު ވިލިނގިއްޔަށް ދިޔައީ އެއްވެސް ޕްލޭނެއް ނެތިއެވެ. މޫދު ފެނުމުން އެންމެން އިއްތިފާގުން މޫދަށް އެރޭހިތް ވެގެން އެރުނީއެވެ. މަޖުދާއަށް ފެނިލާފައި އިޔާން ވަނީ އަމިއްލަ އެޕާޓްމަންޓަށެވެ. ތެމިފައި ވުމުން ހީކަރުވައި ގަންނަ ގޮތް ވެފައި ހުރުމުން، އަވަސް ވީ ގޮތަކުން ފެންވަރާލުމަށް އޭނާ ހުރީ ބޭނުންވެފައެވެ.

***

ފަތިސް ނަމާދަށްފަހު، އަރާމް ތަންމަތި ދޫކޮށްލުމަށްފަހު، ސަދަފް މިއަދުވެސް ގެއިން ނުކުމަތީ ޖިމްއަށް ދިޔުމުގެ ބޭނުމުގައެވެ. ކަކުލާއި ހިސާބަށް ހުރި ސޯޓަކާއި ގަޔަށްދޫ އަތްދިގު އަޅި ކުލައިގެ ޓީޝާޓުގައި އޭނާ ފެންނަލެއް ނުހަނު ފުރިހަމައެވެ.  ކާރަށް އަރައިގެން، ދުއްވަމުން ގޮސް މަޑުކޮށްލީ ޖިމް ހުންނަ މަގުގައި ވާ ޕާކިންގ ޒޯނަށެވެ. ގޭގައި ކަސްރަތުކުރުމަށް ބޭނުންވާ ހުރިހާ އާލާތެއް ހެން ހުރިކަމުގައި ވީ ނަމަވެސް އޭނަ އަބަދުވެސް ދާ ހިތްވަނީ ޖިމަށެވެ. ސަބަބކީ އެތަނުން އޭނާގެ އެކުވެރިންނާއި ވެސް ބައްދަލްވެ ޥާހަކަ ދައްކާލެވޭނެތީއެވެ. ކަސްރަތު ކުރުމަކީ އެންމެ ދުވަހެއް ވެސް ވައްޓާ ނުލާ އޭނާ ނުހަނު ކުރާހިތުން ކުރާ ކަމެކެވެ.  އެ ކަސްރަތީ ހަށިގަނޑުގެ ފުރިހަމަ ކަމުގެ ސިއްރަކީ ވެސް އެއީއެވެ. ރަނގަޅު ހިސާބެއްގައި ކާރު ޕާކް ކޮށްފައި ނުކުމެ މަގު ހުރަސްކޮށްލި ހިނދު ފުރަތަމަވެސް އޭނާގެ ނަޒަރު ހުއްޓުނީ މަގުގެ އަނެއް ފަރާތުގައި ހުރި އަންހެން ކުއްޖާއަށެވެ.

”އިރަމް؟“ ސަދަފްގެ ނިތައް އަރައިގެން ދިޔައީ ކުދި ރޫތަކެކެވެ. އެހިސާބުގަނޑުގައިވެސް އިރަމް ނޫން އިތުރު އެކަކުވެސް ނެތެވެ. ދެން ފެންނަން ތިބި ދެމީހުން ވެސް ތިބީ އޭނާ ވަންނަން އެދާ ޖިމްގެ ދޮރުމަތީގައެވެ. އަލިވިލެން ގާތް ނުވާއިރު އިރަމް އެހާ ފަތިހާ ފެނުމުން ހައިރާންވާ ގޮތް ވިއެވެ. އިޔާން އާއި ނާޔާގެ ގެ ކޮއްކޮކަން އެނގުނު ނަމަވެސް ނާޔާ ފިޔަވައި އެއާއިލާގެ އެކަކާއި ވެސް އޭނާ އެހާ ގުޅުނު ނޯންނާތީ އިރަމް އަކާއި ވެސް ވާހަކަ ދެއްކިފައެއް ނުވެއެވެ. އަޅާނުލާ ސަދަފް ދާން ހިނގައިގަތް ޖިމް ހުރި މަގަށް ނުކުމަތް ގުރޫޕް ގަނޑެއް ފެނުނެވެ. ހަވަރަކަށް މީހުން ތިބި އިރު، އިސްތަށިގަނޑު ދިގުކޮށްފައި އަތާއި ކަރުގައި އަޅާފައިވާ ފަށްތަކުން އެއީ ކިހާ ފެންވަރެއްގެ ބައެއްކަން ހާމަވެއެވެ. އެމީހުން މަޑުކޮށްލީ ސީދާ އެއިމާރާތުގެ ކުރިމަތީގައެވެ. އެމީހުން ފެނު ފެނުމުން ކުރިން އެތާގައި ތިބި މީހުން ވެސް އަވަހަށް އިމާރާތުގެ ތެރެއަށް ވަނެވެ. ”މިއޮތް ފަދަ ގަޑީގައި ވެސް މި މީހުންގެ ކަމަކީ ގޯޅިގޯޅި ކަންމަތީގަ މުގޯލި އެޅުން ދޯ“ ސަދަފްއަށް ދެފަރާތައް ބޯ ހޫރުވާލެވުނެވެ. ސަދަފް މަގު ހުރަސްކޮށްލީ އިރަމް ހުރި ދިމާ ނޫން އަނެއް ފަރާތަށެވެ. އެ ގުރޫޕް ގަނޑާއި ކައިރި ވީ ވީހެން ދުވާ ސިނގިރޭޓް ވަހުން ފިރިހެނަކަށް ވީ ނަމަވެސް އުނދަގޫވިއެވެ.

”ބަލާލަބަލަ އެހެރަ ބިޓެއް.. ލޯބި ދޯ.. ގެޅ*ނ ދާ ކަހަލަ އެންނު؟“ އެތަނުން އެކަކު ބުނާ އަޑު އިވި އެތެރެއަށް ވަދެވަދެފައި ވެސް ސަދަފްއަށް ހުއްޓެން މަޖުބޫރުވިއެވެ. ފަސްއެނބުރުނު އިރު އޭރުވެސް އެތާގައި އިރަމް ހުއްޓެވެ.

”ފައްކާ ވާނެ ހެން ހީވަނީ.. ކައެމެން މިތާގަ ތިބޭ.. އަތުން ބީވުމުގެ ކުރިން ރަހަ ބަލާލަން ވާނެ އެންނު..ހަހަހައްހާ“ މިފަހަރުވެސް ވާހަކަ ދެއްކީ އޭނާއެވެ. ކައިރީގައި ތިބި މީހުންވެސް އެއްބަސް ވުމުގެ ގޮތުން ޖަހައިލީ ނުބައި ހިނިގަނޑެކެވެ.

އިރަމް އެކަނި ދޫކޮށްލާފައި ސަދަފްއަށް ހުންނާކަށް ނުކެރުނެވެ. ސަދަފް ބަލަބަލާ ހުއްޓާ، އެއްކަލަ ޒުވާނާ އިރަމްއާއި ނުހަނު ގާތައް ދިޔައެވެ. މާޒީގައި ކޮންމެ ކަމެއް ހިނގާފައި އޮތް ނަމަވެސް އަންހެން ކުއްޖަކު ނުރައްކަލަށް ހުށަހެޅިފައި ވަނިކޮން ފަސްދޭކަށް ސަދަފް ބޭނުމެއް ނުވިއެވެ. އެއީ އޭނާގެ އުސޫލެއް ނޫނެވެ.

”ތިހާ ރީތި ކުއްޖަކު މިތާގަ އެކަނި… ކީއްތިކުރަނީ؟“ ނަދީމްގެ އިންތިޒާރުގައި މަޑުކޮށްލައިގެން ހުރި އިރަމް ސިހުނީ އިވުނު ނުދަންނަ އަޑުންނެވެ. ފަހަތުގައި ހުރި މީހާ ފެނުމުން އިރަމްގެ ހިތައް ބިރުވެރިކަން ވަނެވެ. ވަށައިގެން އެއްވެސް މީހަކު ފެންނާކަށް ނެތެވެ. އަނެއްކާ ވެސް އޭނާގެ މޫނަށް ބަލައިލެވުނެވެ.

”ކީއްވެތަ ވާހަކަ ނުދައްކަން ތިހުންނަނީ.. ހާދަ ރީއްޗޭ.. ހިނގާބަލަ އަހަންނާއި އެއްކޮން ރޫމަކަށް.. ބޭނުން ވަރަކަށް ލާރި ދޭނަން“ ނުބައި ހިނިތުންވުމެއްގައި ހުރެ އޭނާ އިރަމްއާއި ގާތައް ފިޔަވަޅެއް އަޅާއިލިއެވެ.

”ތަނަކުން މީހަކު ފެންނައިރަށް އެމީހާކައި ބެހެންޖެހޭތަ! ކަލޭމެން ފިރިހެނުންނަށް އެކަނިތަ މަގުމަތިން  ހިނގެން އޮތީ.. މޭ ފުއްޕާލާފަ އައިސް ތި ފޮށެނީ މަ މީ ކަލޭގެ ލެވެލްއެއް ނޫނޭ..“ އިރަމް ބިރުގަތީ އޭނާ ހިނިގަނޑެއް ޖަހާލަމުން އިރަމްގެ އަތައް ދަމާލުމުންނެވެ. އެއާއިއެކު އިރަމް އައިސް ޖެހުނީ އޭނާގެ ގައިގައެވެ. ދުވަންފެށި ނުބައި ވަހުން އިރަމްއަށް ހޮޑު ނުލެވުނީ ކިރިއާއެވެ.

”ދޫކުރޭ.. ހަމަ މިހާރު ދޫކުރާ…އައްޗީޑި“ އިރަމް ގަދަ ހަދަމުން ދިޔައެވެ. ނަމަވެސް ހައްތަހާ ބޮޑަށް އިރަމްގެ ދެ އަތަށް އޭނާ ފިތާލިއެވެ. އިރަމްއަށް ތަދުވެގެން ރޮވުނެވެ.

”ނޫނޭ.. ދެން މިއޮތް ލޯބި ބިޓު ދޫ ކޮށްލާނީ ކިހިނެތްތަ.. މާ ނޫން ކަމަށް ހެދިގެން ދެކޮޅު ހަދަން ނޫޅޭ..ނުފުއްޕ* މައިތިރިވެގެން ހުރޭ! ދުލެއް ނުކޮށްލެވޭނެ ފަސޭހައަކު-“

”އޭތް !“ ސަދަފް ދުވެފައި އައިސް އޭނާގެ އުނަގަނޑުގައި ކޮޅުފައިން ޖެހިއެވެ. ދުރަށް ވިއްސައިގެން ދިޔަ ގޮތުން އޭނާ މަތަވި މަގު ބައްތީގައި ޖެހިފައެވެ. ސަދަފްގެ ހަށިގަނޑުން ވަރުގަދަ ކަމާއި އެކު އޭނާއާއި ކުރިމަތިލުމަކީ ނުވާނެ ކަމެއްކަން އެނގުނީ ކަންނޭގެއެވެ. އޭނާގެ މޫނުމަތީގައި ވީ ޖެހިލުން ވުމުގެ އަސަރްތަކެވެ. ފަހަތައް ޖެހެމުން ޖެހެމުން ގޮސް، ދުވެފައި ގުރޫޕުގެ ގާތައް ދިޔައެވެ.

”އާރ ޔޫ އޯކޭ! ތަނަކަށް ތަދުވިތަ؟“ ރޯން ހުރި އިރަމްގެ ގާތައް ހުއްޓިފައި ސަދަފްއަށް އެހުނެވެ. އިރަމް އިޝާރާތް ކޮށްލީ ދެއަތަށެވެ. އޭނާ ހިފައިގަތް ތަން ނޫފައިގަނެފައިވީ ތަން ފެނި ސަދަފްއަށް ހިންދިރުވާލެވުނެވެ.

އިރަމްގެ ނޭފަތުގައި އަދިވެސް އޭނާގެ ގައިން އެރި  ނުބައި ވަސްގަނޑު ހަރުލާފައިވީ ފަދައެވެ. ބިރުން ގޮސް މުޅި ހަށިގަނޑުގައި ވީ މަޑު ތުރުތުރެއް އުފެދިފައެވެ. އިރަމްއަށް ވާހަކަ ދައްކަންވެސް ހުރީ އުނދަގޫ ވެފައެވެ.

”މިހާރު އޯކޭ ވާނެ…އޭނަ ވެސް އެދިޔައީ.. އިތުރު އަނިޔާއެއް ވިތަ؟“ ސަދަފް ހިފައިގެން ހުރި ފިނިފެންފުޅިން އިރަމްގެ ދެއަތައް ފެން އަޅާލަދިނެވެ. އިރަމް ބޯ ހޫރުވާލިއެވެ. ނަމަވެސް އޭރުވެސް ދިޔައީ ރޮވެމުންނެވެ.

”ދަރިފުޅާ…ކިހިނެތް ވީ؟“ އެފަދަ ހާލެއްގައި ހުއްޓާ ނަދީމް އައިސްފިއެވެ. އިރަމްގެ ގާތުގައި ސަދަފް ހުރިތަން ފެނި ނަދީމްގެ މޫނުމަތިން ހިސާބެއް ހިތްހަމަ ނުޖެހުމުގެ އަސަރު ފެންނަމުންދިޔައެވެ. ނަމަވެސް އިރަމް ރޯ މަންޒަރު ފެނި ނަދީމްގެ ދެފަޔަށް ލިބުނީ އާދަޔާއި ހިލާފް ބާރެކެވެ.

އިރަމް އަނގައިން ނުބުނުމުން ސަދަފް އެންމެފަހުން ހިނގާދިޔަ ހާދިސާ ކިޔައިދިނެވެ. ނަދީމްގެ މޫނުމަތިން ފެނުނު ނުރުހުންތެރިކަމުން ހުންނަންވެސް ނުކެރުނީއެވެ. ސަދަފް ދިމާ ކޮށްލީ އެތަނުންދާށެވެ.

“ޝުކުރިއްޔާ ސަދަފް.. ވަރަށް ބޮޑަށް ޝުކުރިއްޔާ..“

“އެ ކަމެއް ނޫން… މްމް..މީ.. އިރަމްގެ އަތުގައި އެބަހުރި އިންޖަރީސް“ ދަމުން ސަދަފް ލުއި ހިނިތުންވުމެއް ހަދިޔާ ކޮށްލިއެވެ. ނަދީމް ބޯޖަހާލާފައި އިރަމްގެ އަތުގައި ހިފައިގެން ކާރަށް އަރަން ހިނގައިގަތެވެ.

އިރަމް ގޮވައިގެން ނަދީމް ގެޔަށް އައީ އެއްގޮތަކަށް ވެސް ހޮސްޕިޓަލަށް ދާން އެއްބަސް ނުވެގެންނެވެ. ކާރުގައި އިން އިރުވެސް ކޮނޑުގައި ބޯ ޖަހައިލައިގެން އިނދެ ރުއީއެވެ. ނަދީމް ވިސްނަމުން ދިޔައީ ސަދަފްއާއި މެދުގައިއެވެ. ކޮންމެ ގޮތަކަށް ކަންތައް ވެފައިވީ ނަމަވެސް މިއަދު އިރަމްއަށް އެ ދިން ރައްކާތެރިކަމުން އޭނާގެ ހިތް ޝުކުރުން ފުރުނެވެ. މިއަދު ސަދަފް ނައިނަމަ އެ ދަރިފުޅު އޭނާއަށް ގެއްލުނީހެވެ. އަނެއްކޮޅުން އެތާގައި އިރަމް އެކަނި ބަހައްޓާފައި ދެވުނު މޮޔަ ހީވަމުން ދިޔައެވެ. އިރަމްގެ އެކުވެރިއެއްގެ މަންމަގެ ޖަނާޒާ އެވަގުތު ކުރިއަށް ދާތީ އެމީހުން ދިޔައީ މޫނު ދެކިލުމަށެވެ. މިސްކިތް ހުރި މަގަކީ ހަނި މަގަކަށް ވެފައި އެއްކޮޅަށް ދުއްވާ މަގެކެވެ. އެހެންވުމުން ކާރު ޕާކު ކުރަން ޖެހުނީ ފުދޭވަރަކަށް ދުރުގައެވެ. އިރަމް ބަހައްޓާފައި ދެވުނީވެސް ފުދޭވަރަކަށް ދުރަށް އެދެމެދުގައި ހިނގަން ޖެހޭތީ އެކަމަށް ވިސްނާފައެވެ.

***

އަމީރާއަށް ހޭލެވުނީ އިމާރާތާއި ޖެހިގެން ހުރ މިސްކިތުން ބަންގިދޭ އަޑަށެވެ. ލިބުނީ ތަފާތު ހިތްހަމަޖެހުމެވެ. މުޅިން އަލަށް ބަންގިދޭ އަޑު އެގޮތައް އިވުނު އިރު ގައިން ހީބިހި ހަލުވާލިއެވެ. ބަންގީގެ އަޑު ކެނޑުމުން އެނދުން ތެދުވެ ވުޝޫކޮށްލައިގެން ނުކުމަތެވެ. ޜޭގައި ލަސްވެފައި ހުރުމުން ފޮށިން އޭނާގެ ސާމާނު ވެސް ހުރީ ނުނެގިއެވެ. ފޮށި ހުޅުވާލުމަށްފަހު މުސައްލަ ނަގާފައި އަމީރާއަށް ގިބްލަ ނޭނގޭތީ ފޯނުން ހޯދާލިއެވެ. ނަމާދުކޮށް ނިމުނުއިރު ނަފްސަށް ލިބިފައިވަނީ ބަޔާން ކުރަންދަތި ހިތްހަމަޖެހުމެކެވެ. ސިކުނޑި ތާޒާވެ ، އުޖާލާވެގެންދިޔައެވެ. ނަމާދަށް ފަހު އޭނާއަށް ހިތުން އެނގޭ ޒިކުރުތައް ކުރުމުގައި އިންދަ ކޮޓަރިގެ ދޮރު ހުޅުވުނެވެ.

”ހޭލައިގެން ދޯ… ނަމާދަށް ހޭލެވުނު ތޯ މި ބަލައިލީ“ އަމީރާ މުސައްލަ މަތީގައި އިންދާ ފެނުމުން މަޖުދާގެ ހިތައް ވެސް ހަމަޖެހުން އިހްސާސްވިއެވެ. ކަޅު ބުރުގާގެ ތެރޭގައި އެ ދޮން މޫނު އޭނާއަށް ސިފަވީ ހަނދެއްގެ މިސާލުގައެވެ.

އަމީރާއަށް އުނދަގޫ ވެދާނެތީ އެތަނުގައި ގިނަ އިރު ނުހުރެ ނުކުން އިރު އިޔާން ، ރީއާ ގޮވައިގެން އައިސް ވަންނަނީ އެވެ. މަޖުދާ ފެނުމުން ރީއާ ދުވެލާފައި އައިސް ފައިގާ އޮޅުލައިގަތެވެ.

”މާމަ ދޫނި“ ރީއާ އުރާލަމުން ކޯތާފަތުގައި ނުހަނު ލޯބިން މަޖުދާ ބޮސްދިނެވެ. ތުއްތު އަޑުން ލޯބި ހިނިގަނޑެއް ޖަހާލަމުން މަޖުދާގެ ކަރުގައި އޮޅިގަތެވެ.

”ކޮބާ އިރޫ އައިސްފިތަ ޖަނާޒާއިން“ އިޔާން ސޯފާގެ ތެރެއަށް ވެއްޓިގަންނަމުން އަހާލިއެވެ. ނިދާ ހޭލިގަޑި ކަމަށް ވެފައި އޭނާހުރީ ކަޅުކުލައިގެ ސޯޓެއްގައި ހުސްގަޔާއެވެ. އެ ރީތި އިސްތަށިގަނޑު ހޭވިފައި ހުރިއިރު ނިތްމައްޗަށް ބައެއް އޮތީ ވެއްޓިފައެވެ. އަދިވެސް ދެލޮލާއި މޫނުމަތީގައި ނިދީގެ އަސަރުތައް ހުއްޓެވެ.

”މިހާރު އަންނާނެ ކަންނޭގެ.. ދޭއް ޖަހަން އުޅެނިކޮން ދިޔައީ.. މަންމައާއި ބައްޕަ އާއި ތިންމީހުން ވެސް ދިޔައީ..މޫނު ބަލާލާފައި އެތާގަ ހުރެލާފަ މަންމަ ގެއަށް އައީ ރީއްކޮ ހޭލައިގެން އައިސްފާނެތީވެ“ މަޖުދާ ބަދިގެއަށް ވަދެފައި އައީ އިޔާންއަށް ކޮފީ މަގެއް ހިފައިގެންނެވެ.

“ބައްޕީ..ކޮއްކޮ ޕާކަށް ދާން ބޭނުން ވަނީ“

”ޔެސް ޔެސް…މިއަދު ވާނެ ދާން.. ބައްޕި އޮފީހުން އައިސް ދާނީ ދޯ ބޭބީ“ އިޔާންގެ އުނގުގައި ރީއާ އިށީންދެ ހަމަޖެހިލުމުން، އެދެ އަތުގެ ތެރޭގައި ބޮނޑިކޮށްލިއެވެ.

”އަބަދު އެހެން ކިއާފަ ..ނުދާނެ“ ދެފަރާތައް ބޯހޫރުވާލަމުން ރީއާ ދެފައި ތަޅާލިއެވެ. އިޔާންއަށް އާންމުކޮން ވެސް ގޮވައިގެން ދާނަން ކަމަށް ބުނެފައި،ރީއާ ގޮވައިގެން ދެވޭ ގޮތެއް ނުވެއެވެ. ބޭޏުންވީ ނަމަވެސް ގިނަ ދުވަސްދުވަހު ގެއަށް އާދެވޭ ގަޑީގެ ގޮތުން އެކަން ނުކޮށްދެވެނީއެވެ.

ރީއާ ތުންކޮޅު ނެރެލަމުން އިޔާންއާއި މަޖުދާގެ ގާތައް ހިނިއައިއެވެ.

“ބައްޕި އަބަދު ދޮގު ހަދަނީ ދޯ ގެންދާނަމޭ ކިޔާފަ.. މީ މާމަ ކުއްޖެކޭ ދޯ… މިއަދު މާމައާއި އެއްކޮން ދާން ވާނެ ބައްޕި ނުގެންގޮސްފިއްޔާ“  މަޖުދާ ބުނެލި ހިނދު ހުރިހާ ދަތެއް ފެންނަ ވަރަށް ރީއާ ހީލަމުން ބޯ ޖަހައިލިއެވެ. މަޖުދާގެ އުނގައް ފުންމާލަމުން، އިޔާންއާއި ދިމާލަށް ކުޑަކުޑަ ރީއާ ލޯ އަޅާލި ގޮތުން ދެމީހުންނަށް ހެވުނެވެ.

”ދަރިފުޅާ މަންމަ ވާހަކަ ދައްކާލަން ބޭނުންވެފަ ހުންނަތާ ހަފްތާއެއް މިވީ.. އަދި މި އަނގައިން ބުނެވޭ ވަރުވީ…އެހެންނުވާނީ މަންމަގެ ލޮލަށް ފެންނަނީ ރޭ ގަނޑު އެކަނި ވިއްޔަ..“

”ސޮރީ އޭ މަންމާ.. މަގާމްގެ ގޮތުން ނުހަނު ޒިންމާ ބޮޑޭ މިހާރު.. ވަރަށް ބުރަކޮން މިދުވަސްކޮޅު މިއުޅެނީ.. ކާން އެކަނި އޮފީހުން ނުކުމެވެނީ..އެހެންވެ ކުރިން އަންނަހެން ކުދި ބްރޭކްތަކަށް ރީއްކޮ ގާތައް ވެސް ނާދެވެނީ“

”ކިތަންމެ ބުރަކޮން އުޅުނަސް އަމިއްލަ ހަށިގަނޑަށް ބަލައިގެން އުޅޭތި…ދަރިފުޅާށް އެނގޭތަ މިގެއަށް ކުއްޖަކު ގެނެސްގެން މިއުޅެނީ.. ”މަޖުދާގެ މިފަހަރު ބުނެލި ޖުމްލައިން އިޔާންގެ ނިތައް ރޫ އަރައިގެން ދިޔައެވެ.

”މަންމާ މިގޭގަ ހާދަ މަސައްކަތު މީހުންނެއް މިހާރުވެސް އެބައުޅެއޭ“ މަޖުދާ ބުނިގޮތުން އިޔާން ހީކުރީ އިތުރު މަސައްކަތު މީހަކު ގެއަށް ގެނައީ ކަމަށެވެ.

”ޕިސް..އެހެންނެއް ނޫނޭ.. ލުއިސް ބޭބެ މީގެ ވީކް އެއް ކުރިން ބައްޕައަށް ގުޅި..  ބުނީ ކުއްޖަކު ބަހައްޓާލަ ދެވޭނެ ހޭ.. އެކުއްޖާ ބޭނުންވަނީ ރާއްޖެ ބަދަލް ވާށޯ…ބޭބެމެން ރާއްޖެ އިން އެޑޮޕްޓް ކޮށްގެން ބެލި ވަރަށް ރަނގަޅު ކުއްޖަކައޯ އެއީ..“  މަޖުދާގެ ޖުމްލަތަކުގެ ތެރެއިން ވެސް އިޔާންއަށް ފާހަގަ ވީ އެންމެ ފަހު ޖުމްލައެވެ. އޭނާ ފާޑަކާށް ސިހުނު އިރު ހިތައް އަރައިގެން ދިޔަ އެއްޗަކު ކޮށި އަރައި ގޮތް ވިއެވެ. ކެއްސަމުން ދިޔަ އިރު އިޔާންގެ ބުރަކަށީގައި މަޖުދާ ދެތިންފަހަރު ޖަހާލުމުން ކެއްސުންވަރު މައިތިރިވިއެވެ.

”ދަރިފުޅާ ކީއްތިކުރީ “ ހޫނު ކޮފީ އިން ބައެއް އިޔާންގެ ގަޔަށް ވެރުމުން ސޯފާގެ ކުރިމަތީގައި ވާ މޭޒުން ޓިޝޫއެއް ގެނެސް މަޖުދާ ދިއްކޮށްލިއެވެ. ގައިން ދިލަ ނަގައިގަތުމުން އިޔާން އަވަސްއަވަހަށް އިންތަނުން ތެދުވެވުނެވެ. ޓިޝޫތަކުން ކޮފީ އައިސް ހުރި ތަންތަނުގައި ޖައްސާލަމުން ސާފްކުރަން ފެށިއެވެ.

“ރާއްޖެ ކުއްޖެކޭ؟.. ކޮން ..ކޮން ނަމެއް ކިޔަނީ؟“ އިޔާންގެ ހިތުގައި އޮތީ އަމީރާގެ ނަމެވެ. އެއީ އަމީރާއަށް ވެދާނެބާއެވެ. ނޫނެކެވެ. އަމީރާ ނަމަ ލުއިސް ގުޅާނީ އޭނައަކަށް ނޫން ހެއްޔެވެ. މީގެ ދެދުވަސް ކުރިން ވެސް ލުއިސް އޭނާއާއި ވާހަކަ ދެއްކިއެވެ.

”ދަރިފުޅަށް އެނގޭނެ އޭ ބުނި.. އެގޭގަ އުޅޭނެޔޯ އޭރުވެސް.. އިރޫ އާއި ސޭމް އޭޖް ކުއްޖެއް އެއީ.. އަމީރާ ކިޔަނީ..މްމްމް..އެމީ އެއީ ލޯބިން ކިޔާ ނޭމް“ މަޖުދާ ނިކަން އުފަލުން އިނދެ އަމީރާގެ ވަނަވަރު ކިޔައިދިނެވެ.  އެހިނދު އިޔާންއަށް ތެޅިގަނެވުނެވެ. އިޔާންއަށް އެއްޗެއް ނުބުނެވިގެން އުޅެނިކޮން އިރަމްގެ ކޮޓަރީގެ ދޮރު ހުޅުވާލުމަށްފަހު ނުކުތް އަންހެންކުއްޖާ ފެނި އިޔާންގެ ދެލޯ ބޮޑުވިއެވެ. ކުރިމަތީގައި ހުރީ އަމީރާއެވެ. އިޔާންއަށް ހީވީ ހިތުގެ ހިނގުން ހުއްޓިގެން ދިޔަ ހެންނެވެ. ވަށައިގެން ވީ މަންޒަރު ފުސްވެ ހަމައެކަނި އަމީރާ ފެންނަމުން ދިޔަހެންނެވެ. އެ ސޫރަ ގެއްލިދާނެކަމުގެ ބިރަށް، އެސްފިޔަ ޖަހައިލަން ވެސް ހިތް ނޭދުނެވެ. ދެލޮލަށް ކަރުނަތައް ޖަމާވަމުން ދިޔައި އެއްވެސް އިޙްތިޔާރެއް ނެތިއެވެ. ކުރިމަތިން ފެނިގެންދަނީ އެ ހިތުގެ މަލިކާއެވެ. އޭނާގެ ހިތުގެ ދިރުމެވެ.

***

(ނުނިމޭ)