ހިރާސް 2 (06)

އިޒްވާގެ ފަހަތުން ރުއާނާ ނުކުތީ ރާބިއު ބަލައި އައިސް ގުޅަން ފެށުމުންނެވެ. ލަސް ހިނގުމުގައި ދިޔައިރު ރުއާނާގެ ސިކުނޑީގައިވީ ލިއަމް ބަލަން އިންގޮތެވެ. އެ ތޫނު ނަޒަރެވެ. ރުއާނާގެ މުޅި ހަށިގަނޑު ހީވީ އެކްސްރޭ ކޮށްލިހެންނެވެ. އޭނާ ނަޒަރު ދިމާވުމުން ވެސް ލިއަމްގެ ނަޒަރު ބަދަލް ކޮށްނުލާ އިން ގޮތެވެ. ހިތް ޒާތަކަށް ތެޅެމުން ދިޔައިރު ބަޔާންކުރަން ދަތި އިހްސާސެއް މުޅި ހަށިގަނޑަށް ކުރުވަމުންދިޔައެވެ. ދެމެދުގައި ވާހަކަ ތަކެއް ނުދެއްކޭ އިރު ކްލާހުން ދިމާ ވެފައިވީ އެންމެ ދެދުވަހުއެވެ. ޑިއުޓީ އިން ވެސް ދިމާވި އެއީ ދެވަނަ ދުވަހެވެ. ވިސްނަން ވީ ގޮތެއް ރުއާނާއަކަށް ނޭގުނެވެ.

****

“ ރުއާ.. އޭތް ރުއާ“ އިޒްވާ ވާހަކަ ދައްކާ ދައްކާ ވަރުބަލި ވީއިރު ވެސް ރުއާނާގެ ފުށުން ޖަވާބެއް ނުލިބުނެވެ. އެންމެ ދެތިން ފަހަރަށް، ކޮނޑުގައި ކޮއްޓާލި ފަހުން ރުއާނާއަށް ރެއަކާއި ލާ ގޮތްވިއެވެ.

”ވަޓް ހެޕެންޑް.. އެނީތިންގ ރޯންގް؟“

”ޔާ ޔާ..ޔާހް.. ނޫން.. އަމް ފައިން..ކުޑަ ކަމަކާއި ވިސްނާލެވުނީ.. ކީކޭތަ އިޒީ ބުނީ؟“ އިޒްވާއަށް ރައްދު ދެމުން ރުއާނާ އަހައިލިއެވެ.

އިޒްވާ ބަލައިލީ ޖާސޫސް ކުރާ ބީދައިންނެވެ.“ވަޓް؟“ ރުއާނާ ނިތް އަރުވާލުމުން އަދި އިތުރަށް އޭނާގެ ދެލޯ ހަނިކޮށްލިއެވެ. ރުއާނާއަށް ހެވިގެން އިޒްވާގެ ކޮނޑުގައި ޖަހާލިއެވެ.

”އަހަރެން ބުނީ ދޮންބެގެ ބާރތްޑޭގަ އަހަރެން ދިން ގިފްޓް އޭނާގެ އަތުން ހަލާކު ވިއްޔޯ.. މިއަދު ހަމަ ނުހުއްޓާ.. އަލުން ހަމަ އޭގެ ގިފްޓެއް ދޭން ވިއްޔޯ އަހަރެން.. ކިހާ ހެއްވާ..އޭނާއަތުން ހަލާކުވީ ސްޓިލް އޭގެ ރެސްޕޯންސިބިލިޓީ އަހަންނަށް މިޖެހުނީ ނަގަން.. މާދަމާ ޑިއުޓީ ނިންމާފަ ހިނގާބަލަ އަހަންނާއި އެކު ޝޮޕިންއަށް…ޕްލީޒް “ އިޒްވާ އެހާ އުއްމީދާއި އެކު ބުނެލުމުން އެކަމާއި ދެކޮޅު ހަދާކަށް ރުއާނާއަކަށް ނުކެރުނެވެ. ރުއާނާ ބޯޖަހައިލުމުން އިޒްވާ އުފަލުން އަތްޖަހާލިއެވެ.  ދެމީހުން ތިއްބާ ލޫކް އައުމުން އިޒްވާ ގެއަށް ދިޔުމަށް ނުކުމަތެވެ.

ރުއާނާ ނުކުމަތް އިރު ރާބިއުގެ ކާރު ފެނުމުން، ލަސްނުކޮން ކާރަށް އަރަން ވެގެން ދިޔައެވެ.

ފިނިކަމުން ރޫރޫ އަޅާ ހާލު ވެސް އެރިގޮތައް ކާރުގެ އޭސީ ޖައްސާލިއެވެ. ރާބިއު ދެލޯ ކުޑަކޮށްލުމުން ރުއާނާ ޖަހައިލީ ހިނިގަނޑެކެވެ.

”ދަރިފުޅާ.. ބޭރު ވަރަށް ފިނި … ހިއެއް ނުގަނޭތަ ހަމަ؟ މި އަދި ސްޕްރިންގް …ވިންޓާއެއް ވެސް ނޫން.. އެކަމަކު ވެސް ދަތްދޮޅިކޮޅު މިހާރުވެސް ތިއޮތް ތެޅެނީ “ ރާބިއު އޭސީ އޮފްކޮށްލުމުން ރުއާނާ ތުން އަނބުރާލިއެވެ.

”އައި ލާވްވް ކޯލްޑް ބައްޕާ.. ހަމަ ފިނީގަ އުޅޭ ހިތް ވަނީ… ބައްޕަ ކައިރީގަ ރުއާ ގޮވައިގެން ވިންޓާރ ޗުއްޓީ ތަކުގައި އައިސްބާގް އާއި ފޮރެސްޓް އޭރިއާތައް ބަލައިލަން ބުނީމަ ވެސް ނުދިޔަ ވިއްޔަ… ކުރިއަށް އޮތީ ސަމާރ.. އެންމެ ފޫހި ދުވަސްތައް.. “ އަނގަޔަށް ވައްތަރެއް  ޖައްސާލާފައި ރުއާނާ ބުނެލިއެވެ. ރާބިއު ހީލިއެވެ. ނަމަވެސް ރުއާނާގެ ޖުމްލައިން ހިސާބެއްގެ ނުތަނަވަސްކަމެއް ރާބިއުގެ މޫނުން ފައުޅުވިއެވެ.

”ދަރިފުޅަށް ހަމަ ރަނގަޅަށް އެނގޭނެ ބައްޕަ ނުދާނެ ކަން ދަރިފުޅު ގޮވައިގެން ފޮރެސްޓްއަކަށް.. އަދި އެވެސް ވިންޓާރގަ“

ރާބިއުގެ ބަދަލްވެގެން ދިޔަ މިޒާޖުން ރުއާނާއަށް ވެސް މަޑު ޖެހިލެވުނެވެ. ތުން ފިއްތާލި ގޮތުން ހީވި ބުނަން ނުވާ ވަރުގެ ޖުމްލައެއް ބުނެވުނު ހެންނެވެ. އިތުރަށް އެއްޗެއް ނުބުނެ ކާރުގެ ލޯގަނޑުގައި މޫނު ޖަހައިގެން ހަށަމް ބަދެލައިގެން އިނެވެ. ފަސްދެމުން މަގުމަތީގެ މަންޒަރު ތަކަށް ކަޅި ހުއްޓައިގެން އިން އިރު ތުންފަތް ހަފާލެވުނެވެ.

***

ހޮސްޕިޓަލުން އައިސް ގެއަށް ވަދެފައި ތާޒާވެ ނަމާދުކޮށްލައި ގެން ލިއަމް އަލުން ނުކުތީ ބޭރަށް ދިޔުމަށެވެ. ގަންނަން ބޭނުން ވާ ބައެއް ސާމާނުތައް ހުރުމުން އަވަށު ތެރެއަށް ކޮންމެހެން ވެސް ދާން ޖެހުނީއެވެ. ގެއިން ނުކުމެ ނުކުމެ ހުއްޓާ އަދްރެކް ގުޅަން ފެށިއެވެ.

”ކިހިނެތް ވީ މިހާރު؟“ ކާރަށް އަރަމުން ފޯނު ނަގައި ލިއަމް ކަންފަތުގައި ޖަހާލިއެވެ. އަދްރެކްގެ އަޑާއި އެކު ޝާއިންގެ އަޑު ވެސް އިވުމުން ދެމީހުން ތިބީ އެއްތާކު ކަން ލިއަމްއަށް އެނގުނެވެ.

”ބްރޯ.. ކަމެއް ވެގެންނޭ މިއުޅެނީ.. ކޮންތާކު ތިހުރީ؟“ ފުރަތަމަ ވެސް އަދްރެކް ބުނެލިއެވެ. އޭނާގެ އަޑުން ، ކޮންމެވެސް ސަކަރާތެއް ގަންނަން ވެގެން އުޅޭ ވައްތަރު ޖަހައެވެ. ސިއްރު ސިއްރުން ޝާއިން ހޭހެން ވެސް ހީވެއެވެ.

”ކޮން ސަކަރާތެއް މިއޮތް ފަދަ ގަޑީގަ… އަހަރެން ވަރަށް ބިޒީ“

”ކަލޭ ކޮންކަމެއް ކުރާ މީހެއްތަ ބިޒީ ވާން.. އަންބަކު ދަރިއަކު ހުންނަ މީހެއް ނޫން… ދެން އާދެބަލަ ތިހެން ނުހަދާ“ އަދްރެކްގެ ގެ އަޑު ހުރިގޮތުން ލިއަމްގާތައް ހިނިވެސް އައެވެ.

”ކޮންތާކު ތިތިބީ…“

”ކިވީ މެންގޭ ކުރިމަތީގަ.. އޭނައަށް ނާންގާ އަންނާތި! ވީ އާރ ވެއިޓިންގ“ އަދްރެކް ބުނަން ބޭނުންވާ އެއްޗެއް ބުނުމަށްފަހު ލިއަމްއަށް ފުރުސަތެއް ނުދީ ފޯނު ކަނޑާލައިފިއެވެ. ނަމަވެސް އެމީހުން ކީވަންއަށް ކަމެއް ކުރަން އުޅޭކަން އެނގުމުން ލިއަމްވެސް ދާން ނިންމިއެވެ.

ކާރަށް އެރުމަށްފަހު ލިއަމް މިސްރާބު ޖެހީ އެގެޔަށް ދިޔުމަށެވެ. ފުދޭވަރަކަށް ދުރު ރާސްތާއެއް ކަމުން، ވަކި ހިސާބަކުން އޭނާ ކާރުގެ ދުވެލި ބާރުކޮށްލިއެވެ. އެރު ސްޕީކަރުން، ލިއަމްއަށް އެންމެ ކަމުދާ އިނގިރޭސި ލަވަ ”ބްލެވާރޑް“ އަންނަމުން ދިޔައެވެ.  އޭނާގެ މޫޑްވަކިން ރަނގަޅުވިއެވެ. ’ރިޕީޓެޑް މޯޑް‘ ލަވަ އިވެމުން ދިޔައިރު، ލަވައިގެ ފުރިހަމަ ކަމަށް ގެއްލުނެވެ. ފަނަރަ މިނެޓްގެ ދަތުރު ވެސް ހީވީ ފަސްމިނެޓްގެ ދަތުރަކަށް ވެގެން ދިޔަ ހެންނެވެ.

އެގޭގެ ދޮރުމަތީގައި ކާރު ޕާކް ކޮށްލުމަށްފަހު ލިއަމް ގުޅާލި އިރު އަދްރަކު އާއި ޝާއިން ނުކުތީ ޖެހިގެން ހުރި ހިމަ ގޯޅި ތެރެއިންނެވެ.

”އޭ އާދެބަލަ..“ ދެމީހުން ދެފަރާތުން ލިއަމްގެ އަތުގައި ހިފައިގެން މިސްރާބު ޖެހީ އެ ގޯޅި ގަނޑުގެ ތެރޭގައި ހުރި ބޭސް ފިހާރައަކަށެވެ.

”ވެއިޓް..ވެއިޓް…“ބޭސް ފިހާރައާއި ގާތައް ދެވުމާއި އެކު ލިއަމް ހުއްޓުނެވެ. އޭނާ ލޮލުގެ އިޝާރާތުން ފިހާރަ ދައްކާލަމުން ނިތް އަރުވާލިއެވެ. އޭރު އަދްރެކް ލާނެއް ގޮތަކަށް ހިނިއައިސްފައި ހުއްޓެވެ.

”ލުކް .. އަހަރެމެން މިއުޅެނީ ކިވީގެ އެކްސް އައީމަ އޭނައަށް ވިޒިޓް އެއް ކޮށްލަން.. ހަދިޔާއެއް ނުލާ ދާހިތެއް ނުވޭ.. ރީތިވެސް ގޮތެއް ނޫނެއްނު..“

”ދެން އެހެން ވިޔަސް ބޭސް ފިހާރައަކަށް ކީއްކުރަންތަ މިއައީ؟“ ޗާއިންގެ ޖުމަލްއަށް ލިއަމް މައުސޫމް ކަމާއި އެކު ދިން ޖަވާބުން އިހުނަށް ވުރެން ދެމީހުންގެ މޫނުގައިވި ލާނެތްކަން އިތުރުވިއެވެ.

”އެހެމް…އެހެމް..މްމްމް އެ ޝޮޕްގަ ޕާމަސިސްޓްއަކަށް އިނީ އެޑީގެ އެކްސް އެއް.. އަހަންނަކީ މީހަކާއި އިނދެގެން އުޅޭ މީހެއް.. ނުވިތާކަށް އެޑީގެ އެކްސްއަށް މަ އަންހެނުން އެނގޭނެ.. އަހަރެމެން މިތަނަށް ގަންނަން އަންނާނީ ކޯއްޗެއް ކަން އެނގެއެންނު..“ ޝާއިން ނުހަނު ހަމަޖެހިލާފައި ބުނުމުން ލިއަމްގެ ދެލޯ ބޮޑުވިއެވެ.

”ހޯ ހޯ ހޯ.. މަށެއް ނޫޅެން ތިކަހަލަ އެއްޗެއް ގަންނަން ދާކަށް… ނަސީބަކުން ތީގެ ބޭނުމެއް އަހަންނަކަށް ނުޖެހޭ އަދި… ސޯ މަ ލައްވާ ތިކަހަލަ ކަމެއް ކުރުވާން ހިތުލާނެ ކަމެއް ވެސް ނެތް“ ލިއަމް ދިމާ ކޮށްލީ އެތަނުން ދުރަށް ދިޔުމަށެވެ. ނަމަވެސް އަދްރެކް އާއި ޝާއިންއާއި ދެމީހުން ދެފަރާތުން ލިއަމްގެ އަތުގައި ހިފެހެއްޓިއެވެ.

”ހަމަ ނުދާނަން؟“ އަދްރެކް އަހާލުމުން ލިއަމް އަވަސްއަވަހަށް ބޯޖަހާލާފައި އަނެއްކާވެސް އެތަނުން  ދާން އުޅެގަތެވެ. އެހިނދު އަދްރެކްގެ ފޯނު ނަގާފައި އަޅުވާލީ އެންމެފަހުން ޝާއިންގެ އުފަންދުވަހު ހަތަރު މީހުން ބޭރަށް ގޮސް ސަކަރާތް ޖަހާފައި ވާ ވީޑިއޯއެކެވެ. އޭގައި އޭނާ ލަވަ ކިޔައި ނަށާފައި ވާނެއެވެ. ލިއަމްދެލޯ ބޮޑުކޮށްލިއެވެ.

”ސީދާ އިޒީއަށް ފޮނުވާނީ… ނޫނީ ބަސްއަހާ“  ލިއަމް ފޯނާއި ދިމާލަށް ފުންމައިގަތެވެ. ނަމަވެސް އެއަށްވުރެން ދެމީހުން ހުށިޔާރެވެ. އިޒްވާއަށް ފޮނުވާފިއްޔާ މުޅި އާއިލާއަށް އެ ދައްކާނެއެވެ. އެހެންވާކަށް ލިއަމް ބޭނުމެއް ނުވިއެވެ. ހާއްސަކޮން އޭނާ ނަށާފައި ހުރި ވީޑިއޯ އެކަކަށް ވެސް ފެންނާކަށް ބޭނުމެއް ނުވިއެވެ. އެންމެ ފަހުން ހަތިޔާރު ބަހައްޓާން ޖެހުނެވެ.

”ފައިން!! އައިލް ގޯ.. ހަނދާން ކުރާތި މިކަން ނިމުނީމަ ތި ޑިލީޓް ކޮށްލަން ޖެހޭނެ!“ އިންޒާރެއް ދިނުމަށްފަހު ލިއަމް ހިނގައިގަތުމުން، ދެމީހުން ހިނިއައިސް ތިބެ ބޯ ޖަހައިލިއެވެ.

”ގަންނަން ވީ އެއްޗިހި މެސެޖް ކޮށްލައިފިން… ބުނަން ނުކެރެންޏާ މެސެޖް ދައްކާލަ އެނގޭ އެމީހުންނަށް“ ޝާއިން ގޮވައިލުމުން ފަސް އެނބުރި އަނގަ ހަދާލާފައި ލިއަމް އަނެއްކާ ވެސް އެތެރެއަށް ވަނެވެ. އެހިނދު ދެމީހުން ހީގަތް އަޑު އިވުނެވެ.

ބޭސް ފިހާރަ ތެރެއަށް ވަތް އިރު ފުދޭވަރަކަށް މީހުން އުޅެއެވެ. ދެ ކައުންޓަރު ދޮށުގައި ދެ ކިއު އޮތެވެ. ބަހައްޓާފައި މެޝިނުން ނަމްބަރު ކޮޅެއް ނަގައިގެން އެންމެ ކުރީ ބަރީގައި ހުރި ގޮނޑިތަކުން ގޮނޑިއެއްގައި ގޮސް ޖައްސާލީ އޭނާގެ ކުރިއަށް ހަ މީހަކު އަދި ތިބުމުންނެވެ. ފޯނު ނަގައި ޝާއިން ފޮނުވި ލިސްޓް ބަލައިލި އިރު އޭނާގެ ދެލޮލުން ތަރިބުރައިގެން ނުދިޔައީ ކިރިޔާއެވެ. ރުޅިއައި ވަރުން ދަތް ފިލާ ކާރުވާލެވުނު ވަރުން އަނގައިގާ ލޭ ރަހަ ލިއެވެ. އެނުގަނެ ފިހާރައިން ނުކުންނަން އިންތަނުން ފޫ ހިއްލާލި ނަމަވެސް އެ ވީޑިއޯގެ މަތިން ހަނދާންވެ، މާޔޫސް ކަމާއިއެކު ދެލޯ މަރާލަމުން އަލުން އިށީނެވެ.

ބޮލުގައި ރިއްސާ ވަރުން ، ނިދަން އުޅެ އުޅެ ނުނިދިގެން، ގެޔާއި އެންމެ ގާތައް ހުރި ބޭސް ފިހާރައަށް ރުއާނާ ވަނީ ޕެއިން ކިލާރ އެއް ހޯދުމުގެ ނިޔަތުގައެވެ. ގޭ ކައިރި ކަމުން އޭނާ އައީ ވެސް  މަޑު ފިޔާތޮށި ކުލައިގެ ފަލަ ހަރުވާޅަކާއި އެކު އެކުލައިގެ ޓީޝާޓެއްގެ މަތިން ކަޅުކުލައިގެ ކެހެލި ކޯޓެއް ލައިގެންނެވެ.

ނަމްބަރު ކޮޅެއް ނަގައިގެން އެންމެ ފަހަތުގައިވާ ގޮނޑިބަރީގައި އިށީންދެލި އިރު ފަހަރަކު މީހަކު މަދުވަމުން ގޮސް އެންމެ ކުރީގައި އިން މީހާ ގޮސް ހުއްޓުނެވެ. އޭރު އަނެއް ކައުންޓަރު ދޮށުގައި ހުރި މީހާ ވެސް ނިމިގެން ނުކުމެއްޖެއެވެ. އޭނާއަށް ޖެހުމުން ގޮސް އަނގަހުޅުވާލަން އުޅުނު ހިނދު ހުއްޓުނީ ދަންނަ އަޑެއް އިވިފައެވެ.  ބަލައިލި އިރު ޖެހިގެން ހުރި ލިއަމް ފެނި ރުއާނާ ދިޔައީ ސިއްސައިގެންނެވެ. އޭރު ލިއަމްއަކަށް އޭނައެއް ނުފެނެއެވެ. ރުއާނާގެ ސަމާލުކަން ހުއްޓުނީ ލިއަމް ދައްކަމުން ދިޔަ ވާހަކައަށެވެ.

ކައުންޓަރު ފުރަގަހުގައި ހުރި ފާމަސިސްޓްއަށް ލިއަމް ފެނުމުން ހީލިއެވެ. މާސްކެއް ނާޅާ އެތަނަށް ވަދެވުނު މޮޔަ ހީވިއެވެ. އެއީ އަދްރެކްގެ ކުރީގެ ލޯބިވެރިއާ ކަމުން އޭނާއަށް ލިއަމް ނޭނގި ނުހުންނާނެތާއެވެ. ލަދުން ވިރެމުން ދިޔަ ނަމަވެސް ލިއަމް ދިޔައީ ހިތްވަރު ކުރަމުންނެވެ.

”މި ލިސްޓުގައި ހުރި ސާމާނު“  ލިއަމް ދެއްކި ލިސްޓް ފެނި، އޭނާ ގާތައް ހިސާބަކަށް ހިނިއައިސް ހުރެމެ ކަރުކެހިލަމުން އެޔަށް ސާމާނު އެއްކުރަމުން ދިޔައެވެ. އޭނާގެ ހަރަކާތްތައް ލަސްކަމުން ލިއަމްއަކަށް ކަމަކު ނުދިޔައެވެ. ލިއަމް ބޭނުންވީ ވީ އެންމެ އަވަހަކަށް އެތަނުން ނުކުތުމަށެވެ.

”އަ ބޮކްސް އޮފް ކޮންޑ*މް ވިޓް ޑިފަރެންޓް ފްލޭވާރސް..އެކްސްޓްރާ ލޯންގް؟… އަ ބޮކްސް އޮފް ލޫބ*.. އެންޑް އެ ބޮކްސް އޮފް ޕްރެގްނަންސީ ކިޓްސް..“ ނުހޭން މަސައްކަތް ކުރަމުން ދަނިކޮން ވެސް ޕާމަސިސްޓްއަށް ހެވެމުންދިޔައެވެ. ޖެހިގެން އިން ކައުންޓަރުގައި އިން ކުއްޖާއަށް ވެސް އެއަޑު  އިވިގެން ހެވިދާނެތީ ފާޑަކަށް ކަރުކެހިލައިފިއެވެ.

ލިއަމް ހައްތަހާ ބޮޑަށް ލަދު ގަންނަމުން ދިޔައެވެ. އިސް އުފުލާލަން ވެސް ނުކެރިފައި ހުރެ އެއަޑު އިވޭނެހެން ހީވާ ހިސާބެއްގައި އިތުރު މީހަކު ހުރިތޯ ވަށައިގެން ބަލައިލިއެވެ.އެއްލި ކަޅިއަކުން އޭނާއާއި ދިމާ ބަލަހައްޓައިގެން ޖެހިގެން ހުރި ކައުންޓަރުގައި ހުރި ރުއާނާ ފެނި ލިއަމް ދިޔައި ސިހިގެންނެވެ.. ސިކުންތު ކޮޅެއް ނުވަނީސް އަވަހަކަށް ލިއަމް އިސް ޖެހިއެވެ. ދުވަހަކު ލަދު ނުގަންނަ ވަރަށް ލިއަމް ލަދުގަތެވެ. ”އަމް ގޮނަ ކިލް ދޯސް ފަކ*ން އޭސ***“ އެ ޖުމްލަ އޮތީ ލިއަމްގެ ހިތުގައެވެ.

”ޑިފަރެންޓް ފްލޭވާރސް ޖަހާފަ އިނީމަ ނޭނގުނު.. މިތަނުގައި އެބަހުރި ޓޯޓަލް ތިރީސް ފްލޭވާރއެއް.. ބޮކްސް އެއްގައި އިންނަނީ ފަނަރަ“ އެއާއި އެކު ލިއަމް ތުންފަތް ހަފާލިއެވެ.

”އެކި ވައްތަރުން ހަމަ ކު..ކުރޭ“ ލިއަމްގެ އަޑު އައީ ކެނޑިގެންނެވެ. ދެބަސް ދޭތެރޭގައި ލިއަމް އަށް ރުއާނާއަށް ބަލައިލެވެއެވެ. ރުއާނާ އިސްޖަހައިގެން ހުރި ނަމަވެސް އޭނާގެ މޫނުމަތީގައި ކުލަވަރު ލިއަމްއަށް އޮތީ ސިއްރުވެފައެވެ.

ރުއާނާ ކޮލަށް ދޫ ހަރާލައިގެން ހުރިއިރު ލިއަމްގެ ކުރިމަތީގައި ހޭކަށް ބޭނުމެއް ނުވިއެވެ. އެކަމަކު އޭނާއަށް ކެތްވަނީ ކިރިއާއެވެ. ރުއާނާގެ ހިތައް ޒާތަކަށް ހުރީ އުނދަގޫ ވެސް ވެފައެވެ. ނަމަވެސް ދެވަނަ ސިކުންތު ދެފަރާތައް ބޯ ހޫރުވާލެވުނީ ލިއަމް ލޯބިވެރިއެއް ހުއްޓަސް އެއީ އޭނާއާއި ބެހޭކަމެއް ނޫން ކަމަށް ހިތައް ވިސްނައި ދެމުންނެވެ. އަދި ލިއަމް ކަމު ދިޔަނަމަވެސް ރަނގަޅުތާއެވެ. އެހެން ހުރެފައި ރުއާނާ ވަށްކަޅިން ބަލައިލި އިރު މޭޒުމަތީގައި ހުރި ސާމާނު ފެނި ލިއަމްގެ މޫނަށް ބަލައިލެވުނެވެ. ލިއަމް ގަނެފައި ހުރި ލަދު އެ މޫނުން ކިތަންމެ ވަރަކަށް ވެސް ފައުޅުވެއެވެ. ހީވަނީ ވަށްކަމެއް ކުރަނިކޮން ފަޅާއަރާފައި ހުރި ހެންނެވެ. ތުންފަތުގައި ޝަހާދަތް އިނގިލިން ހިފަހައްޓާލައިގެން ރުއާނާ ހުއްޓެވެ.

”ކޮންކަހަލަ ބޭގް އެއް ބޭނުން ވަނީ.. ޕްލާސްޓިކް އޯ ޕޭޕާރ؟“ އެ އަންހެން ކުއްޖާ އަވަސް ކުރަން ހިތުލާފައި ހުރި ހެން ހިއެއް ނުވެއެވެ. ހަރަކާތް އެހާ ލަހެވެ. ލިއަމްއަށް ދަތްކުނޑި ވިކައިގަނެވުނެވެ.

”ޑޫ އައި ލުކް ލައިކް އަ ޓައިމް މެޝިން؟“ އެހުރިގޮތައް ހުރެފައި ލިއަމް ބުނެލި ހިނދު ރުއާނާއަށް ހީ ނުގަނެވުނީ ކިރިއާއެވެ.

”މްމްހްމް.. ސޮރީ ސާރ… އޯލް އިން ވަން ގޯ! ދަ ފުލް ކޮމްބޯ ހިޔާރ“ ކޮތަޅުތައް ހަވާލު ކުރަމުން އޭނާ ބުނެލި ޖުމްލައިން ލިއަމްއަށް އިހުނަށް ވުރެން ބޮޑަށް ތުންފިއްތާލެވުނެވެ.

”އައި ވޯޒް ޖަސްޓް ގެޓިންގ ޕެއިންކިލާރސް.. ބަތް ދިޒް ކައިންޑް އޮފް ޕެއިން ލުކްސް ވޯރސް“ ހިނިގަނޑު އޮއްބަން ކުރި މަސައްކަތުން ރުއާނާގެ ބަނޑުގައި ވެސް ދިޔައީ ރިއްސަމުންނެވެ. ބޭސް ކާޑުތައް ދިއްކޮށްލުމުން އެއަށް ލާރި ދިނުމަށްފަހު ބާކީ ބައި ހޯދުމަށް ވެސް ނޫޅެ އެންމެ ފަހުން އެތަނުން އޭނާ ނުކުމަތެވެ. ނުކުތުމުގެ ކުރިން ނުހަނު ސިއްރުން އެ ސާމާނާއި އެކު ލިއަމްގެ ފޮޓޯއެއް ރުއާނާ ނެގިއެވެ. އެހެން ހެދުނީ ކީއްވެކަމެއް ރުއާނާއަކަށް ވެސް ނޭނގުނެވެ.

ލިއަމް ލާރި ދެއްކުމަށްފަހު ނުކުމަތް އިރު އަދްރެކްއާއި ޝާއިން ތިބީ ހޭށެވެ. ދެމީހުން އިޝާރާތުން ދައްކާލީ ރުއާނާއެވެ. އޭރު އޭނާ ހުރީ ތަންކޮޅެއް ކުރީގައެވެ. ލިއަމްގެ އަތުގައި ހުރި ކޮތަޅުތައް އެމީހުންގެ އަތައް ދިނުމަށްފަހު، މޫނު ހަދައިގެން  ހުރެ ހިނގައިގަތެވެ. އެމީހުން އަހަންފެށުމުން އެތެރޭގައި ހިނގި ކަންތައް ކިޔައިދިނެވެ. އެއާއި އެކު ދެމީހުން ހޭން ފެށި ގޮތައް ނުހުއްޓިއެވެ. ލޮލުން ފެން އަންނަން ދެން ހުނެވެ.

”ހަހަހަހާ.. އަހަންނަކަށް ނޭނގޭ އޭނާ ކަމެއް.. ނުކުތް ފަހުން ފެނުނީ.. އޭނާ ވެސް ހެމުން ނުކުތީ.. އަހަރެމެން ފެނުނީމަ ހިނިގަނޑު ހުއްޓިއްޖެ… ނިކަން ކިއުޓް ސްމައިލް އެއް ވެސް ދީފަ އެދިޔައީ“ އަދްރެކް އޭރުވެސް ހެނީއެވެ.

”މަށައް ޔަގީން ކައުންޓަރު މަންޖެއަށް ކަލޭކަށް އެނގުނީމަ ގަސްތުގައި ލަސްކުރީކަން.. ފުލް ކޮމްބޯ ޔޯ އަދި..ހަހަހަހާ“ ޝާއިންގެ ދެލޮލުން ދިޔައީ ފެން އަންނަނަމުންނެވެ.

”ބޭކާރު ވާހަކަ ނުދައްކާ އެ ވީޑިއޯ ޑިލީޓް ކުރޭ“ އަދްރެކް އެ ޑިލީޓް ކުރަން ނޫޅުމުން އޭނާގެ އަތުން ފޯނު އަތުލާފައި ލިއަމް އެ މަސައްކަތް ކުރިއެވެ. ލިއަމް ބަލައިލީ ރުއާނާ ކޮބައިތޯއެވެ. ނަމަވެސް އޭނާގެ އެއްވެސް ހިލަމެއް އޭރު ފެންނާކަށް ނެތެވެ. ހިސާބެއްގެ މާޔޫސްކަމެއް ހިތައް ވެރިވެގަތެވެ. ނަމަވެސް އެކަން ގަބޫލް ކުރަން ބޭނުންނުވުމުން ދެފަރާތައް ބޮހޫރުވާލިއެވެ.

އެ ސަކަރާތުގައި ތިބެ ތިން މީހުންނަށް މަންޒިލަށް ފޯރިއެވެ. ގޭތެރެއަށް ވަދެގެން ދިޔައިރު ފުރަތަމަ ވެސް ބައްދަލް ކުރީ ލިވިންގރޫމުގައި އިން ޔޫމީން އާއިއެވެ. އެމީހުންގެ އަތުގައި ހުރި ކޮތަޅުތައް ފެނިގެން އޭނާގެ ސުވާލްތައް އަމާޒުވުމުން، ކީވާން ގަންނަން ހަވާލު ކުރި ސާމާނު ކަމަށް ބުނެ ލިއަމް ވާހަކައެއް ހަދާލިއެވެ.

”ޑިއުޓީ އިން އައި ގޮތައް ކޮޓަރީގަ އެބައޮތް.. ނުވެސް ކައި“ ޔޫމީންގެ ޖަވާބުން ލިއަމް ހިނގައިގަތުމުން، ފަހަތުން އަދްރެކް އާއި ޝާއިން ލާނެތް ހިންޏެއް ހީލައިގެން އައެވެ. ޓަކި ޖަހާލުމުން ކީވާން ހުޅުވާފައޭ ބުނެ ގޮވައިލިއެވެ. އެތެރެއަށް ވަތް އިރު ކީވާން ނިކަން ހަމަޖެހިލާފައި ސޯފާގައި އިނެވެ. އަތުގައި ކޮފީ ތައްޓެއް ވެސް އިނެވެ.

”ބްރޯ .. ޕާސްޓް އިން އައި އެމެޖެންސީ ކޯލް ކިހިނެތް؟“ ނުލަފާ ހިންޏެއް ހީލައިގެން ޝާއިން އެއްސެވެ. އެއާއިއެކު ސޯފާގެ މަތިން ކުޝަން އެއް ނަގާ ކީވާން އެއްލާލިއެވެ.

”މިދެމީހުންގެ ފަރާތުން ދިން ހަދިޔާއެއް“ ގެނައި ކޮތަޅުތައް ކީވާންގެ އުނގުމައްޗަށް ލިއަމް އަޅާލިއެވެ. ކީވާންގެ ދެލޯ ދިޔައީ ބޮޑުވެގެންނެވެ. އަނގަހަދާލައިގެން އިން ގޮތުން ލިއަމްއަށް ވެސް ހެވުނެވެ.

”މަ  އަދި މީހަކާއި ނީންނަން..“

”މީހަކާއި ނީނަސް މިހާރު ދެމީހުން އެއް ފުރާޅެއްގެ ދަށުގަ އުޅެންޏާ މީގެ ބޭނުން ޖެހޭނެ ކަމަށް ވިސްނަން ވާނެ..“

”ކިހާ ދެރަ ކަމެއް“ އަދްރެކްގެ ޖުމްލައިން ކީވާން އިން ތަނުން ފުންމައިގެން އައިސް އޭނާގެ ބުރަކަށީގައި ނުހަނު  ބާރަށް ތަޅާއިގަތެވެ.

”އައްދޯއް…ތަދުވެއްޖެޔޭ.. ކޮބާ ކިހިނެތް ތަ އެ މަންޖެ ފެނުނީމަ ވީ؟“

”“ކިހިނެތް ތަ ވާނީ.. ޑިއުޓީ އިން އައި ގޮތައް ފުރަތަމަ ވެސް އޭނައާއި ދިމާވީ.. މަ ހަމަ ރަނގަޅަށް ވެސް ޝޮކް ޖެހިފަ ހުރީ..  ކިހިނެތް ދޯ އެނގޭނީ އޭނާ މިގޭގަ ހުންނާނެ ކަމަށް.. ކުޑަކޮން ވެސް ހިތައް ނާރުވަން.. އެކަމަކު ބުނަންތަ ފާޑަކަށް ހިތްހަމަ ޖެހުން އޭނަ ފެނުނީމަ… އަމް ޖަސްޓް ބޭޑް އެޓް އެކްސްޕްރެސިންގ“ އަދްރެކްގެ ސުވާލުން ކީވާންގެ މަޖާ މޫޑު ވަގުތުން ބަދަލްވެ ސީރިއަސްކަން ވެރިވިއެވެ. އޭނާގެ އަޑުން އެކަނި ވެސް އާލިއާ އަދިވެސް ހާއްސަކަން ހާމަވެއެވެ.

”މިއީ އަލުން އާލްއާއި އޮތް ގުޅުން ރަނގަޅުކޮށް ، މާފަށް އެދެން ރަނގަޅު ފުރުސަތެއް.. މޫނުމަތިން އެބަ އެނގޭ އޭނައާއި މެދު ވިސްނާކަން“ ކީވާންގެ ބުރަކަށީގައި ޖަހާލަމުން ލިއަމް ހިތްވަރު ދިނެވެ. އޭނާ ވަކި އެއްޗެއް ނުބުނެއެވެ. ސޯފާގައި ރަނގަޅަށް ހަމަޖެހި ދެލޯ މަރާލިއެވެ.

****

ހެނދުނުގެ ހިތްފަސޭހަ ވަގުތު ރާބިއު ބެލްކޮންޏަށް ނުކުމެލީ އޮފީހަށް ދިޔުމާއި ދޭތެރޭގައި އަދި ވަގުތުކޮޅެއް އޮތުމުންނެވެ. އަތުގައި ހުރި ކޮފީތަށި ލަސް ލަހުން ހުސްކުރަމުން ދިޔައެވެ. ފަޒާގައިވާ މަޑު ތެތްފިނި ކަމާއި އެކު ހަރުލާފައިވަނީ، ބެލްކޮނީގެ އެކި ހިސާބުތަކުގައި ކުދި ޕޮޓްތަކުގައި، ރުއާނާ ހައްދާފައިވާ ކުދި ކުދި މެގްނޯލިއާ ގަސްތަކުގައި އަޅާފައިވާ މާތަކުންނެވެ. ހުދާއި މަޑު ފިޔާތޮށި ކުލައިގެ އެ މާތަކަކީ ރުއާނާގެ ހިތެވެ. ގޭގައި އުޅޭނަމަ ގިނަ ވަގުތު ހޭދަ ކޮށްލަނީ ބެލްކޮނީގައެވެ.

ބެލްކޮނީގެ ފަޑީގައި ކޮފީ މަގު ބަހައްޓާފައި، ގަސްތަކަށް ފެން ޖެހުމަށް ހާއްސަކޮން އިންނަ ކުރައަކަށް ފެންއަޅައިގެން އައެވެ. ގަސްތަކަށް ފެން ދީފައި ، ޕޮޓުތަކުގެ ތިރިއަށް ވެރިފައިވާ ކުދި ފަތްތައް ސާފްކޮށްލިއެވެ.

”ރުއާ… ދަރިފުޅު ނުހޭލަނީ ތަ؟.. ”ބެލްކޮންޏާއި ޖެހިގެން އެންމެ މަގަތައް ހުރި ރުއާނާގެ ކޮޓަރީގެ ދޮރަށް ނަޒަރެއް ދެމުން ރާބިއު ގޮވާލިއެވެ.

”ނޫން… ރެޑީ ވަނީ“ ރުއާނާގެ އަޑު އިވުމުން، ރާބިއު އަލުން ބެލްކޮންޏަށް ނުކުމެލިއެވެ. ކޮފީ މަގު އިން ތަނުން ނަގަން ގޮސް  ބޭރަށް ނަޒަރު ހިންގާލެވުނީ ވަކި އެއްޗެއް ހިތައް އަރައިގެންނެއް ނޫނެވެ. އޭނާއަށް ސިހުން ގެނުވީ އެންމެ ތިރީގައިވާ، އޭނާ އޭނާގެ މޫނަށް ޒުވާން ފިރިހެނަކު ބަލަހައްޓާއިގެން ހުރިތަން ފެނިއެވެ.  ފަނަރަ ވަނަ ފަންގިފިލާގެ ބެލްކޮނީ ނަމަވެސް ތިރީގައިވާ މަންޒަރުތައް އޭނާގެ ދެލޮލަށް ނުހަނު ސާފެވެ. ތިރީގައި އިސް އުފުލާލައިގެން އެހުރި ފަރާތުގެ މޫނު ފެންނަމުން ދިޔައިރު ރާބިއު ތުރުތުރު އަޅާއިގަތެވެ. އަތުގައި ހުރި ކޮފީތަށި ދެފަރާތައް ތެޅެމުން ގޮސް ބަނޑުން ވީ އިރު ވެސް ނޭނގުނެވެ. މީހާ ދެލޯ ބޮޑުވެފައިވީ އިރު ހަމަހޭވެރިކަން ވެގެން ފަހަތައް ފިޔަވަޅު އަޅަމުން ދިޔައެވެ. ނަމަވެސް ހުއްޓެން މަޖުބޫރުވީ ކަންފަތް ދޮށުގައި ގުގުމާލި އަޑުންނެވެ.

”ރުއާނާގެ އުމުރުން ސައުބީސް އަހަރުވަނީ.. މިހާރު އޭނާއަށް ހުރިހާ ކަމެއް އެނގޭ … ދެން އޭނަ ފޮރުވައިގެން ފިލަން ދިޔުމުގެ ބޭނުމެއް ނެތް.. ރުއާނާ ބަލައި ވަރަށް އަވަހަށް އަންނާނަން.. އެއީ އަހަރެމެންގެ ލޭ.. ކަލޭއަކަށް އެއްވެސް ހައްގެއް ނެތް އޭނާގެ މައްޗަކަށް… ރުއާނާއަށް ވެސް ޖެހޭނީ ގޮތް ދޫކޮށްފަ އަހަރެމެންނާއި ގުޅެން“ އޭނާގެ ރަތް ތުންފަތުގައި ފޭދިފައި ހުރީ ނުލަފާ ހިނިތުން ވުމެކެވެ. މޫނާއި ހަށިގަނޑުގައިވާ އޮމާން ހަންގަނޑަށް އަރަނީ ހުދު ކުލައެވެ. ކޮނޑަށް ވުރެން ތިރިއަށް ހުރި ދިގު އިސްތަށިގަނޑު މިނިވަން ކަމާއިއެކު ވިހުރެމުން ދިޔައެވެ. ލާފައި ހުރި ޖެކެޓްގެ ހުޑް ބޮލުގައި އަޅުވާލާފައި ހުރި ގޮތުން ސިއްރުވެރިގޮތެއް ހުއްޓެވެ.

”ބިލާލް ބުނަން ވާހަކައެއް!..އެއީ ކަލޭމެންގެ ލެއެއް ނޫން..އެއީ މަގޭ ދަރިއެއް..އަހަންނަކާއި ރުއާ ވަތްކެއް ނުކުރެވޭނެ ދުވަހަކުވެސް..!“ ރެއިލިންގައި ދެއަތުން އަޅުވާލި އިރު ރާބިއު ނަޒަރު އެ ޒުވާނާއި ހުރީ ސީދާ ވެފައެވެ. އެހާ ދުރުން ވެސް އެކަކު އަނެއްކަކާއި ވާހަކަ ދެއްކުމުގެ ގާބިލްކަން ލިބިފައިވެއެވެ. ރާބިއުގެ މޫނުން ރުޅިވެރިކަން ދައްކަން މަސައްކަތް ކުރި ނަމަވެސް އޭނާގެ ހިތް ބިރުން ތެޅި ފޮޅެމުން ދިޔައެވެ. މާޒީގައި ހިނގާފައިވާ ހާދިސާއިން އަރައި ގަނެވުނު ތާ ގިނަ ދުވަސްތަކެއް ނުވެ އަލުން އެ ޟަފްހާ ހުޅުވެން އުޅޭނީބާއޭ ހީވަމުންދިޔައެވެ. މިހާރުވެސް ނުރައްކަލުގެ ރަނގަބީލްތައް ސިކުނޑީގެ ކަނެއްގައި ޖަހާލައިފިއެވެ.

”ތިއެއް ބަލާ ދެން… “ ޖެހިލި ލުއި ވައިރޯޅިއެއް ފަދައިން، އިސާހިތަކު ރާބިއުގެ ލޯމަތިން ބިލާލް ގެއްލުނެވެ. އެހުރިހާ އިރު ހިފަހައްޓާލައިގެން ހުރި ނޭވާތައް ރާބިއުއަށް ދޫކުރެވެމުން ދިޔައިރު ރެއިލިންގައި ހިފާލެވިފައިވި އަތައް ބާރުވަމުންދިޔައެވެ. ރެއިލިންގައި އަތުން ހިފައި ބާރުކޮށްގެން ހުރި ހިސާބަށް ލޭ އަރައިގެން ދިޔައެވެ.

”ބައްޕާ ރުއާ މިދަނީ“ ރާބިއު ސިހުނީ ރުއާނާގެ އަޑަށެވެ. ކަރުނުތައް ފުހެލަމުން ރާބިއު އައީ ރުއާނާ ގޮވައިގެން ދިޔުމަށެވެ.  ރާބިއު ހުރިގޮތުން ރުއާނާ ސުވާލް ކޮށްލިއެވެ.

“ބައްޕަ ރަނގަޅޭ ދަރިފުޅާ“ރުއާނާގެ ފަރާތުން އިތުރު ސުވާލެއް ކުރިމަތި ވެދާނެ ކަމުގެ ބިރަށް ރާބިއު ގަދަކަމުން ހީލިއެވެ.

ހަލުވި ދުވެލީގައި ކާރު އައިސް، ޔުނިވާސިޓީ ދޮރުމައްޗަށް ހުއްޓުމާއި އެކު ރުއާނާ ފޭބިއެވެ. އޭރު އެދިމާލަށް އައި އީތަން ފެނި އޭނާ އަތުން ހަނާ އަޅާލިއެވެ. އީތަން އަރާ ހަމަކުރުމުން ރުއާނާ އެތެރެއަށް ވަންނަން ދިޔަ ވަގުތު ރާބިއު ގޮވާލިއެވެ.

”ޑިއުޓީ ނިމުނީމަ ކޯލް މީ… އެކަނި އަންނަން ނޫޅޭއްޗޭ… ތަނުން ބޭރަށް އެންމެ ފިޔަވަޅެއް ވެސް އެކަނި ނާޅާތި..“ ރާބިއު ކިތަންމެ ލޯބިން ބުނެލި ނަމަވެސް އެ ޖުމްލަތަކުގައި ހިސާބެއްގެ އިންޒާރެއް ވިއެވެ. އެކަން ފަހްމް ވީ ކަންނޭގެއެވެ. ރުއާނާ ބޯ ޖަހައިލިއެވެ. ރާބިއު ބަދަލްވެފައި ޠަބީއަތުން ރުއާނާ ސުވާލް އުފެދުނެވެ. ނަމަވެސް އީތަން ވެސް ގާތުގައި ހުރުމުން ފަހުން އަހަން ހިތައް އަރުވާލިއެވެ.

”އަންކަލް ހާސް ނުވޭ.. ރުއާ އަށް  ބަލާނަން.. އަހަރެން މީ ރުއާގެ ގާތް އެކުވެރިއެއް“ ރާބިއުގެ ކަންބޮޑުވުން ފެނި އީތަން ބުނެލިއެވެ. އޭނާ ހީކުރީ އަންހެން ކުއްޖަކަށް ވުމުން ރާބިއު މާ ބޮޑަށް ކަންބޮޑުވަނީ ކަމަށެވެ.

“ ތޭންކިއު އީތަން“ ރާބިއު ހީލަމުން ކާރު ދުއްވާލިއެވެ.

”ރުއާ.. ޔޫ އާރ ސޯ ލަކީ .. އެހާ ކެއަރިންގ ބައްޕައެއް ލިބުނީތީ“ އީތަން ހިތިގޮތަކަށް ހީލިއެވެ. އޭރު ދެޒުވާނުންނަށް މަޑުކޮށްލީ ލިފްޓާއި ގާތުގައެވެ.

”އީތަންގެ ފެމެލީ ކޮބާ؟“

ރުއާނާގެ ސުވާލާއި އެކު އީތަންގެ މުޅި މޫނު ބަދަލްވެދިޔަ ގޮތް ފެނި ރުއާނާއަށް ތުންފަތުގައި ދަތް އަޅާލެވުނެވެ. އެ އަސަރުތަކުން ހީވީ ބުނަން ނުވާ ވަރުގެ ޖުމްލައެއް ބުނެވުނު ހެންނެވެ.

”އަމް ސޯ ސޮރީ“

”އަމް އޭން އޯފަން.. ލިބުނު ސްކޮލާރޝިޕް  އެއްގަ މިކޮޅަށް ކިޔަވަން އައީ“

”ޑޯންޓް ބީ ސޮރީ .. އިރާދުކުރެއްވިއްޔާ މިހާރު ތިވަނީ އަމިއްލަ ފައި މައްޗަށް ތެދުވެވިފަ… އައި ހާޑް ބައެއް ފަހަރު އަސްލު ޕޭރަންޓްސް އަށް ވުރެން ސްޓެޕްސް ނޫނީ އެޑޮޕްޓް ކުރާ ޕޭރެންޓްސް މާ ރަނގަޅޭ.. ސަމް އިނގޭ… އެކްޗްއަލީ އައި-“ ރުއާނާ ވިސްނާލިއެވެ. އީތަންއަށް ވެފައި ހުރި ގޮތުން އޭނާގެ ހަޔާތުގައި އެންމެ ބޮޑު އެއް ސިއްރު ބުނެދޭން ވީބާއޭ ހިތައް އެރިއެވެ.  ނަމަވެސް އަދި ފަހުންނޭ ހިތައް އަރާ އެހިޔާލް ދޫ ކޮށްލިއެވެ.

“ވަޓް؟ ކީކޭ ބުނަން ތިއުޅެނީ؟“ އީތަން އަހައިލިއެވެ.

ހިނިތުންވެލަމުން ރުއާނާ ދެފަރާތައް ބޯހޫރުވާލިއެވެ. އޭރު ލިފްޓް ތިރިއަށް އައިސް ހުރުމުން ލަސްނުކޮށް އެތެރެއަށް ވަނެވެ. އެމީހުންގެ ފަހަތުން އިތުރު ބަޔަކު ވެސް ވަނުމުން ބަލައިލި އިރު ކީވާން އާއި ޝާއިންގެ ފަހަތުން ވަތް ލިއަމް ފެނި ރުއާނާއަށް ބަލައިލެވުނެވެ. ލިއަމްގެ ނަޒަރު ވެސް ރުއާނާގެ މޫނަށް ހުއްޓި ފިޔަވަޅުތައް މަޑު ޖެހުނެވެ.

”ދޮރު ހުރަސް ބަލި ޖެހުނީ ތަ ދޮންބޭ“ ލިއަމްގެ ފަހަތުން ވައިން އިޒްވާއަށް ބުނެވުނެވެ. އޭނާ ދޮރުމަތީގައި ހުރިގޮތުން އިޒްވާއަށް ހުރީ ނުވަދެވިފައެވެ. އިޒްވާއަށް ތަން ދެމުން ލިއަމް ހުއްޓިލީ އެއްފަޜާތުގައި އެވެ. ޝާއިންއާއި ކީވާން ހެމުން ދިޔަތަން ފެނި ލިއަމް ބަލައިލީ އިންޒާރުގެ ނަޒަރަކުންނެވެ. ރުޅި ގަދަވެފައި ހުރިނަމަވެސް، އޭނާއަށް ރުއާނާ ދައްކަމުން ދެމީހުން ޖައްސަމުން ދިޔަ ވައްތަރު ތަކުން ލިއަމްއަށް ހެވުނެވެ. އެހެން މީހުންނަށް ފަހްމް ނުވަނެހާ ސިއްރުން ރުއާނާގެ މޫނަށް އޭނާ ބަލައިލި އިރު ހުރީ އިސްޖަހައިގެންނެވެ.

ރޭގެ ހަނދާން އާވެ، ބޭއިހްތިޔާރުގައި ރުއާނާއަށް ހެވެން އުޅުނެވެ. އިސްތަށިގަނޑުން ބައެއް މޫނުމައްޗަށް ތިރިކޮށްލައިގެން ހުރެ އިސްޖަހައިލީ އެކަން ފާޅުނުކުރުމަށެވެ. އޭނާ ފެނުމުން ޝާއިން އާއި ކީވާން ވެސް ނުހެއުމަށް ކަރުކެހެމުން ދިޔަ ގޮތުން  ވަކިން ރުއާނާއަށް ކޮންޓްރޯލް ކުރަން އުނދަގޫ ވިއެވެ.

”ކީއްވެތަ ތިހެނީ މާ ވަރަކަށް؟“ ކީވާންގެ އަތުގައި ޖަހާލަމުން އިޒްވާ އަހައިލިއެވެ. އޭނާ ރައްދެއް ނުދިނެވެ. އަތުގެ އިޝާރާތުން މަޑުކޮށްލުމަށް ބުނެލިއެވެ.

”ރުއާ.. ބަލީތަ؟ ..ތާކަށް ތަދުވަނީތަ؟“ ލިފްޓް ހުއްޓުމާއި އެކު އެހެން މީހުންނަށް ވުރެން ކުރިން އިޒްވާގެ އަތުގައި ހިފައިގެން ރުއާނާ ނުކުތެވެ. އެހެން މީހުން ނުފެންނަ ހިސާބަކަށް ދެވުމުން އެހުރިހާ އިރު ހިފަހައްޓަމުން ދިޔަ ހިނިގަނޑު ދޫކޮށްލިއެވެ. ލިއަމް ފެނުމުން އޭނާއަށް އިޙްތިޔާރުން ބޭރުގައި ހަމަ ހެވުނީއެވެ. ރުއާނާގެ ލޮލުން  ފެން އަންނަމުން ދިޔައިރު  އިޒްވާ އާއި އީތަން، އެކަކު އަނެއްކަކުގެ މޫނަށް ބަލަހައްޓައިގެން ތިއްބެވެ. ވީގޮތެއް ނޭނގުނު ނަމަވެސް ރުއާނާ ހޭވަރުން އިޒްވާ އާއި އީތަންއަށް ވެސް ތިބެވުނީ ހިނިއައިހެވެ.

”ވަޓްސް ރޯންގް ދޫނި؟ ހާދަ ވަރަކަށޭ ތިހެނީ؟“ ރުއާނާ ނުހުއްޓުމުން އިޒްވާ އޭނާގެ ގައިގާ ވިކާޅިއެވެ. މިއިން ދުވަހަކު ވެސް ރުއާނާ އެހާ ވަރަށް ހޭތަނެއް އޭނާ ނުދެކެއެވެ.

”ކްލާސް ގާއިޒް!“ އިޒްވާ ފަސް އެނބުރުނީ ފަހަތުން ލިއަމްގެ އަޑުއަހާފައެވެ. އެއާއިއެކު ހެމުން ދިޔަ ރުއާނާގެ އަޑުވެސް ވަގުތުން ހުއްޓުނެވެ. ލިއަމް ބަލައިލާފަ ވެސް މަޑު ނުކޮށް ކްލާހަށް ވަނެވެ.  އިޒްވާ ވެސް ރުއާނާގެ އަތުގައި ހިފައިގެން ކްލާހަށް ވަނެވެ.

”ގޭގަ ވީ ކަމެއްގެ މަތިން ކުއްލިއަކަށް ހަނދާންވީ.. އަނެއްހެން މާ ބޮޑު ކަމެއް ނުވޭ“ އިޒްވާ ދެތިން ފަހަރު ސުވާލްކޮށްލުމުން ރުއާނާ ޖަވާބު ދިނެވެ. ނަމަވެސް އިޒްވާ އާއި އީތަން ނުހުއްޓުމުން އެމީހުންނަށް ގަބޫލް ކުރެވޭ ވަރު ވާޙަކަ އެއް ހަދާލައިގެން ކިޔައިދިނެވެ. ނޫނީ ދެމީހުންގެ ސުވަލްތައް ނުހުއްޓޭނެކަން އޭނާ ދަނެއެވެ.

ކްލާސް ފެށިގެން ނިމެންދެން ލިއަމްގެ ކަޅި ދެ ހިނދު ހިނދުކޮޅުން ރުއާނާގެ މޫނަށް ހުއްޓެއެވެ. ނަމަވެސް އެހެން މީހަކަށް ފަހްމް ނުވާނެހަ ސިއްރުންނެވެ. ފިލާވަޅުތައް ހަދަމުން ދިޔަ އިރު އެކަމަށް ސަމާލްކަން ދީގެން އިނދެފައި ތަންކޮޅެއް ނޭނގުނީ ކަންނޭގެއެވެ. ނިތްކުރިއަށް ރޫ އަރުވާލައިގެން އިނދެ ފަންސޫރު ކަންފަތް ދޮށައް ހަރާލިއެވެ. އެ މައުސޫމް އަދާތަކަށް، ނޭގުމެއްގެ ތެރޭގައި ނަމަވެސް ލިއަމްގެ ހިތް ދިޔައީ ލެނބެމުންނެވެ.

”އިޒީ.. ޑޫ ޔޫ ހޭޥް އެނީ އައިޑިއާ އެބައުޓް ދިސް ޗާރޓް؟“ އިޒްވާގެ އަތުގައި ކޮއްޓާލަމުން ރުއާނާ އެހި ސުވާލު ކިތަންމެ ސިއްރުން ބުނެލި ކަމުގައި ވިޔަސް ލިއަމްގެ ކަންފަތައް އެއަޑު ސާފްކޮން އިވުނެވެ. ލިއަމްގެ ތުންފަތުގައި ދުވެލީ ހިނިތުންވުމެކެވެ.

”އިޒީއަށް ވެސް ނޭގިފަ މި އިނީ ތި ސުވާލް .. އާސްކް ހިމް؟“ ލިއަމްއަށް އިޝާރާތް ކޮށްލަމުން އިޒްވާ ބުނެލިއެވެ. އޭނާ އަދި އެ ސުވާލައި ހަމައަށް ދާން ވަރަށް ގިނަ ސުވާލް ނުހަދާ ވެސް ހުއްޓެވެ. ރުއާނާ ބަލައިލި އިރު އޭނާގެ މޫނަށް ލިއަމް ބަލަހައްޓާއިގެން އިންތަން ފެނުނެވެ. ލިއަމްގެ ދެލޮލާއި ހަތަރު ކަޅި ހަމަވި ވަގުތު ރުއާނާގެ ހިތައް ހީވީ އައިސްކިއުބުތަކެއް އަޅާލިހެންނެވެ. އެ ދެލޮލުގައި ވަނީ ކޮންފަދަ ޖާދޫ އެއްކަމެއް ނޭނގެއެވެ. މުޅި ހަށިން ހީބިހި ހަލުވާލިއެވެ. އެ ތޫނު ނަޒަރުން ނަގަންވީ ކޮން މާނައެއްބާއެވެ.

އަލަށް އައި ދުވަހު ސުވާލް ކުރި ގޮތައް އޭނާއާއި ލިއަމް ވާހަކައެއް ނުދައްކައެވެ. ރުއާނާ ވެސް ނުދައްކައެވެ. ލިއަމްގެ މޫނުން ނަޒަރު ވަކިކޮށްލަމުން ފަސްޖެހިފައި ހުރެމެ ރުއާނާ އަތް ހިއްލާލިއެވެ. އޭނާ އަތް ނެގީ އިތުރު އެއްވެސް ގޮތެއް ނެތިގެންނެވެ. ރުއާނާގެ ހިތް ވިރިގެންދާ ފަދަ ހިނިތުންވުމެއް ރައްދު ކުރުމަށްފަހު ލިއަމް، މޭޒު ދަށުން ތެދުވެ އައިސް ހުއްޓުނީ ރުއާނާގެ މޭޒުގެ މަގަތުގައެވެ. ލިއަމް އެއްޗެއް ނުބުނުމުން ރުއާނާ އިނގިލިން ނޭނގޭ ސުވާލް ދައްކާލިއެވެ. ލިއަމް ކިޔައިދޭންފެށިއެވެ. އެ ފިރިހެންވަންތަ އަޑު އެހާ ގާތުން އިވެމުން ދިޔައިރު ރުއާނާގެ ހަށީގައި ވީ ހުރިހާ ނާރުތަކަކާއި އެ ނާރުތަކުގައި ހިނގަމުން ދިޔަ ލޭގެ ހިނގުން އިޙްސާސްވަމުން ދިޔައެވެ. އޭނާ ބޭނުންކޮށްފައި ހުރި ފިރިހެން ސެންޓްގެ ވަހގެ އަސަރު ރުއާނާގެ ސިކުނޑިއާއި ހަމައަށް ފޯރިއެވެ. ލިއަމްގެ މޫނަށް ނުބަލަން މަސައްކަތް ކުރަމުން ދިޔަ ނަމަވެސް ބައެއްފަހަރު އޭނާގެ ހިތް ލަގަނުން ދޫވަމުން ދިޔައެވެ.

***

(ނުނިމޭ)