މި ޖިސްމުގާ ވަނީ 12

”ގާއިޒް ޕްލީޒް.. މިހާވަރު ކޮށްފަ ތިހެން ނުހަދާ.. ހޫގޯ އަކަށް ނުކެރޭނެ މާބޮޑު ގޮތެއް ހަދާކަށް.. އަމް ގޮނަ ސާވައިވް..ޒަން ބަލައްޗޭ އެމީއަށް..ޝީ ކާންޓް ކްރޮސް ދި ރޯޑް..“ އެންމެ ފަހުން ދޮރާއި ދިމާލަށް މާކިން، އަމީރާ ކޮއްޕާލިއެވެ.

”ކީޕް ދިޒް..“ މާކިންގެ ޖީބަށް ކާޑް ލައްވާލަމުން ޒަންޔާ ނުކުތެވެ. އޭރުވެސް ޒަންޔާއަށް ދިޔައީ ރޮވެމުންނެވެ. އޭނާ ނުކުމެވުނީ ކިރިޔާއެވެ. ދޮރު ލެއްޕުނެވެ. މާކިންއަށް ލޯ މަޜާލެވުނު އިރު ދެލޮލުން ވެއްޓުނު ކަރުނުތިކި ކޯތާފަތްމަތިން ތިރިއަށް ވެއްޓުނެވެ. އެހިނދު އިވިގެންދިޔައި ކަންފަތް ބައްވެގެންދާ ފަދަ ބާރު ހުރި ގަދަފަދަ ވަޒަނުގެ އަޑެވެ. ވޭނީ އާހެއް އަޑާއި އެކު ލޭތައް ބުރައިގެންދިޔައެވެ.

****

އިވިގެން ދިޔަ ގަދަ ފަދަ ވަޒަނުގެ އަޑުން ދެއަންހެން ކުދިން ދިޔައީ ސިއްސައިގެންނެވެ. ރޮއިގެންފައި ދޮރާއި ދިމާލަށް އަލުން އާދެވުނެވެ.

”މަ..މާ..މާކް.. މާކް އާރ ޔޫ އޯލް ރައިޓް“  ތުރުތުރު އަޅަމުން ދިޔައިރު އަމީރާއަށް ދޮރުގައި ތަޅައިގަނެވުނެވެ. ނަމަވެސް އެތރެއިން އަޑެއް ނީވެއެވެ. ފިސްތޯލްގެ އަޑާއި އެކު މުޅިތަން ހަމަހިމޭން ވެފައިވީ ފަދައެވެ.

”މާކް..ރަނގަޅުހޭ…ޖަ..ޖަސް…ޖަސްޓް ލެޓް މީ އިން“ ލެއްޕިފައިވާ ދޮރުގައި ތަޅަމުން ދިޔައިރު އަމީރާއަށް ދިޔައީ ނުހަނު ބޮޑަށް ރޮވެމުންނެވެ. ޒަންޔާއަށް ވެސް ރޮވެމުން ދިޔައިރު އަމީރާގެ އަތް ދޮރުން ނެއްޓުވޭތޯ އޭނާ މަސައްކަތް ކުރަމުންދިޔައެވެ. އެމީހުންގެ އަޑު އިވިގެން އެތެރެއިން މީހަކު ނުކުތުމަކީ ވެސް ދުރުގާވާ ކަމެއް ނޫނެވެ. އެހެންވެއްޖެ ނަމަ ކުރި ހުރިހާ މަސައްކަތެއް ބޭކާރުވީއެވެ. މާކިން ދޫކޮށްލާފައި ކިތަންމެ ދާން ބޭނުން ނޫންކަމުގައި ވީނަމަވެސް، އެ ނޫން ގޮތެއް ނެތެވެ. މާކިންއަށް ކަމެއް ވީ ނަމަ ނޭގި ނުހުންނާނެއެވެ. މާކިންއަށް ، ހޫގޯ ކަމެއް ކޮށްފާނެ ހެނެއް ވެސް ހިއެއް ނުވެއެވެ.

”އެމީ.. އައި ތިންކް މާކިން އިޒް ފައިން..އެމީހުން އަތަކު ކާޑް އެއް ނީންނާނެ.. ހަމަ އެކަނި ކޯޑް ޖަހައިގެން ހުޅުވޭނީ.. މާކް އަތުގަ މިހާރު އެ ކާޑް އެއޮތީ …ލެޓްސް ގޯ އެމީހުން އަންނަ އަޑު އެއިވެނީ..  “ ދޮރުގައި އަނެއް ފަޅިން ކޯޑު ޖެހުމުން އިވޭ ބީޕް އަޑެއް އިވި ޒަންޔާއަށް ބުނެވުނެވެ. އޭނާގެ ޖުމްލަ ނުނިމެނީސް ދޮރުގެ އަތްގަނޑުގައި ހިފާލި އަޑުއިވުނެވެ. އަމީރާއަށް  ފަހަތައް ފަހަތައް ޖެހެވުނެވެ.

”ރަން ..ރަން“ ޒަންޔާ ހަޅޭއްލަވައިގަތެވެ. އަމީޜާއަށް ހަނދާނެ ގޮތެއް ނޭނގިފައި ހުއްޓާ ޒަންޔާ އޭނާގެ އަތައް ދަމާލައިގެން ހުރެ ދުއްވައިގަތެވެ. ދެވޭ ނުދެވޭއެއް ދެމީހުން ކުރެ އެކަކަށް ވެސް ނޭނގުނެވެ. އިރުއޮއްސެމުން ދިޔަ ވަގުތު ކަމުން މަގުތަކުގައި ދުއްވާ އެއްޗިހިނުގެ ބައި ބޯވެފައި ހިނގާ ބިނގާވެ ޢުޅޭ މީހުން ، އެމީހުން ދުވަމުން ދިޔަ މަގުގައި މަދެވެ.

”ޖި..ޖިނާ..ޖި..ޖިނާން..“ ފަހަތައް ބަލައިލެވުނު ހިނދު އަމީރާ އަށް ފުރަތަމަ ވެސް ފެނުނީ ޖިނާން އެވެ.އޭނާގެ ފަހަތުން އައި ހޫގޯގެ ބައިވެރިންނެވެ.  ދެ އަންހެންކުދިންނަށް ބާރުހުރި ފިރިހެނުންގެ ކުރިމަތީގައި ކުރެވޭނީ ވެސް ވަކި ކޮންކަމެއް ހެއްޔެވެ.

”އަމް ޓަޔާރޑް….އެ މީހުން..އެ..އެ އެމީހުން އަންނަނީ.. އަތުގަ..ހިފައިގެން ދުވަންޏާ މަޑުން ދުވެވެނީ.. ރަން .. ރަން ..އޭޒް ފާސްޓް އޭޒް ޔޫ ކޭން“ އެހިސާބުން އަމީރާގެ އަތުން ޒަންޔާ ދޫކޮށްލިއެވެ. މާނޭވާ ލެވެމުން ދިޔައިރު އަމީރާއަށް ހީވާ ހަށިން ވަރުދޫވާން އުޅޭހެންނެވެ. މަގުމަތީގައި ދުއްވަމުން ދިޔަ ވެހިކަލްތައް ފެނި އޭނާއަށް ވަމުން ދިޔަ ގޮތްތަކަށް ކެތްކުރަމުން ދުވަން މަސައްކަތް ކުރިއެވެ. މަގު ހުރަސް ކުރުމަކީ އޭނާއަށް ކުރެވޭނެ ކަމެއް ކަމެއް ނޫނެވެ. އަމީރާ ދުވަމުން ދިޔައީ މަގު ހުރިގޮތަށެވެ.  އެ ބޮޑު ގައުމުން އޭނާއަށް ހަމައެކަނި އެނގޭ މަންޒިލަކީ ލުއިސްއާއި މާރިއާގެ ގެއެވެ. އެގެޔާއި ހަމައަށް ދެވުމުގެ ކުރިން އޭނާ އަތުވާނެކަން އަމީރާއަށް އެނގެއެވެ. އިޔާންއާއި ބައްދަލް ވި ފިހާރާއާއި ވެސް ފުދޭވަރަކަށް ދުރުމިން އަދިވެސް އެބަހުއްޓެވެ. އެއްވެސް ވަރަކަށް ވަރު ނެތިގެން، ހަނި ގޯޅިއެއްގެ ތެރެއަށް ވަދެ އޭނާއަށް ހުއްޓެން މަޖުބޫރުވިއެވެ. ފަހަތް ބަލައިލި އިރު ޒަންޔާ ފެންނާކަށް ނެތެވެ. އަމީރާގެ ދެލޯ ބޮޑުވެ ވަށައިގެން ބަލައިލެވުނު އިރު ޒަންޔާގެ އެއްވެސް ހިލަމެއް ނެތެވެ.

”ޒަން…ޒަންޔާ.. ޒަންޔާ“ އަމީރާއަށް އަނގަމަތީގައި އަތްއެޅުނެވެ. ބޮލުގެ އިސްތަށިގަނޑުގެ ތެރެއަށް އަތް މަހާލައިގެން ހުރެ ދަމައިގަނެވުނީ ބޯ ހާސްވީވަރުންނެވެ. ހަނދާނެ އެއްވެސް ގޮތެއް އަމީރާގެ ސިކުނޑިއަކަށް ނުވިސްނުނެވެ. ގިސްލެވެމުން ދިޔައިރު ދަބަހުގެ ތެރެއިން ފޯނު ހޯދާލެވުނެވެ. އިތުރަށް ހާސްވާ ގޮތް ވިއެވެ. ދަބަހުގައި ފޯނެއް ނެތެވެ. އޭނާގެ ފައިން ޓެގް ނައްޓަން އުޅުނު ވަގުތު މާކިންގެ އަތައް ފޯނު ދެވުނު ހަނދާން ވީ ވެސް އެވަގުތުއެވެ.

”މޭބީ ޝީ ވެންޓް ދިޒް ވޭއި..ޝީ ކާންޓް ކްރޮސް އެނީ ރޯޑު “ އިވިގެން ދިޔައީ ޖިނާންގެ އަޑެވެ.  އަމީރާއަށް ރޮވެމުން ދިޔައިރު، ފަރާތް ފަރާތައް ނަޒަރް ހިންގާލެވުނުވެ.އެ މަގުގެ ކޮޅުން ޖިނާން ކުއްލިއަކަށް ނުކުންތަން ފެނި އަމީރާ ހިތް ނުހުއްޓުނީ ކިރިޔާއެވެ. ހިމަ ވެފައި ގޯޅިތައް ކުދި ކަމުން އެހިސާބުގައި ހުރި އިރުވެސް އޭނާގެ އަޑު ސާފްކޮން އިވެއެވެ. ޖިނާން ބަލައިލުމުގެ ކުރިން އެންމެ މަގަތައް ހުރި ގޭގެ އެތެރެއަށް އަމީރާ ދެމިގަތެވެ. އޭރު ދުވެފައި ބަޔަކު އައި އަޑު އިވެމުން ދިޔައެވެ. އެހިސާބުގައި ގިނައީ މީހުން ނޫޅޭ ގެތައް ކަމުން، ހިސާބުގަނޑު ފެންނަނީ ހަމަހިމޭން ކޮންނެވެ. ނުހަނު ސާފްކޮން ޖިނާންގެ އަޑޫ އެވަގުތު އަނެއްކާ ވެސް އިވިގެންދިޔައެވެ. މިފަހަރު އޭނާ ވަތްގެޔާއި ނުހަނު ގާތުންނެވެ.

”ޝީ އިޒްންޓް ހިޔާރ ..ލެޓްސް ގޯ .. އެންމެ ފަހުން ރޯޑް ކްރޮސް ކުރީ ހެން ހީވަނީ..މިވަރުން ދަންޏާ އޭނާގެ ރިޗް ޕޭރެންޓްސް ގާތައް ވެސަ ގޮސްފާނެ.. ކޮންމެ ގޮތެއް ހަދާފަ ވެސް މަ އޭނާ ހޯދާނަން.. މަށާ ހަމަ އިންނަން ޖެހޭނީ..އެހެންނޫނީ އޭނާ ދެން ފެންނަ ހިނދު މަ ބޭނުން ފުއްދާނީ ގަދަބާރުން.. “ އެ ސަރަހައްދު ދޫކޮށް ދަމުން ޖިނާން ބުނާ އަޑު އަމީރާގެ ކަންފަތައް އިވުނެވެ. ދެލޯ މަރާލެވުނު އިރު ލަތްވެގެން ހުރި ފާރުގައި ބޯ ޖައްސާލެވުނެވެ. ހުރިދިމާލަށް ތިރިވެވުނު އިރު، ދަބަސް މޭގެ ތެރޭގައި ބޮނޑިކޮށްލައިގެން ހުރެ ރޮމުން ދިޔަ ގޮތުން ފެން މީހެއްގެ ހިތް ފަޅައިގެން ދާވަރުވާނެއެވެ.އެ ކަރުނުތަކުގެ އެހާ ވޭން ގަދައެވެ. ހަދާނެ އެއްވެސް ގޮތެއް އަމީރާއަކަށް ނުވިސްނެއެވެ. ޒަންޔާއާއި މާކިންގެ މަތިން ހަނދާން ވުމުން އިތުރަށް ރޮވެމުންދިޔައެވެ. ލަގޮނޑިވަޅަށް ބާރުވާން ފެށުމުން މޭގައި އަތް ޖައްސާލެވުނެވެ..

”މިހުރިހާ ކަމެއް މި ވީ އިޔާންގެ ސަބަބުން…. ވައި .. ވައި… އިޔާން އަހަންނާއި ދިމާ ނުވި ނަމަ.. ކީއްވެ ފޮނި ހުވަފެންތައް ދައްކާ އަހަންނަށް އުއްމީދު އާކޮށްދިނީ؟ ކީއްވެ ދެވަނަ ފަހަރަށް މިވޭން ތަހައްމަލު ކުރަން ޖެއްސީ؟.. އެދުވަހު އިޔާން އާއި ދިމާ ނުވި ނަމަ ފަހަރުގައި އަހަރެން އެތާކަށް ދެވަނަ ފަހަރަކަށް ނުދިއައިސް.. އަހަންނަށް ލޯބި ވެވުނީ ވާން ހެޔޮ ވާ ވަރުގެ އިންސާނެއް ދެކެތަ؟ ވެދިޔަ ހުރިހާ ކަމަކަށް ފަހު ވެސް އިޔާންއާއި މެދު ވިސްނެނީ ކީއްވެތަ؟“ ހިތުގައި ވީ ޝަކުވާތައް  ކަރުނައިގެ ތެރެއިން ބޭރުކުރަމުން ދިޔައިރު އެ ހިތައް ކޮށްފައިވީ އަސަރު ކިތަންމެހާ ވެސް ބޮޑަކަށް ހާމަވަމުން ދެއެވެ.

“ވިހޭ ތަނުން އަހަރެން މަރާލި ނަމަ.. މައިންބަފައިންގެ ހައިސްޔަތުން އެދެމީހުންނަށް އެނގުނީ މިފަދަ އަނިޔާ ވެރި ހޮހޮޅައަކަށް ވައްޓާލަން ތަ“ އެހިތުގައި ވީއެތައް ހާސް ހިތްދަތި އިޙްސާސް ތަކެކެވެ. ހިމާޔަތެއް ނެތިފައި ވާ އާވާރާއެއް ފަދައެވެ. ދާނެ މިސްރާބެއް ނޭނގެއެވެ. އެހީއަށް އެދޭނީ ކާކުގެ ގާތުން ކަމެއް ނޭނގެއެވެ. ފުރާނަ އަތް މައްޗަށްލައިގެން އޭނާއަށް ހިމާޔަތް ދިނުމަށް އައި ދެ މީހުންކުރެ އެކެއްގެ ހާލެއް ވެސް މިހާރު އަމީރާއަކަށް ނޭނގެއެވެ. ހޫގޯގެ އަތްދަށުގައި މާކިން ވީއިރު ޒަންޔާވީ ހިސާބެއް ހޯދާނެ ގޮތެއް ވެސް އަމީރާއަކަށް ނުވިސްނެއެވެ.

”އާހް ..އައި ހޭވް ޓް ސާވައިވް.. އެއްވެސް މީހެއްގެ ގާތުން ބަދަލް ހިފާކަށް ބޭނުމެއް ނޫން.. އެކަމަކު އަހަރެން މިތަނަށް ދޫކޮށްލި އަމިއްލަ މައިންބަފައިން އަހަރެން އެއްލާލާފައި އުޅޭ އަރާމް ދިރިއުޅުން އެންމެ ފަހަރަކު ނަމަވެސް ދެކިލަން ބޭނުން“ ޖިނާންގެ ޖުމްލައިން ’މުއްސަނދި މައިންފައިން’ނޭ ބުނި ބުނުން އަމީރާގެ ސިކުނޑީގައި ބިންވަޅު ނެގިފައިވާތީ އިތުރަށް މަޑުކުރާކަށް ބޭނުމެއް ނުވިއެވެ. ނެތް ހިތްވަރު ދައްކައިގެން ތެދުވެ ދުނިޔެއާއި ކުރިމަތި ލާން އަމީރާ ބޭނުން ވިއެވެ.

”ލުއިސް އާއި މާރިއާގެ ގާތައް ދިޔުން ނޫން ގޮތެއް ނެތް..އިޔާން މެދުވެރިވެގެން ނަމަވެސް، އެންމެ ފުރަތަމަ ވެސް އެމީހުންގެ ފަރާތުން އަހަންނަށް ހިޔާ ވަހިކަން ލިބުނީ“ ދެލޯ ފުހެލަމުން އަމީރާ ދަބަސް ކޮނޑުގައި އަޅުވާލަމުން އެގޭ ތެރެއިން ނުކުމަތެވެ. ލައިގެން ހުރި ހޫޑީގެ ހުޑް ބޮލަށް މަހާލަމުން އަމީރާ، ފުރަތަމަ މިސްރާބު ޖެހީ އިޔާންއާއި ދިމާވި ފިހާރަ ހޯދުމަށެވެ. އެނޫން ގޮތަކަށް ލުއިސްގެ ގެޔަށް ދެވޭނެ އެއްވެސް ރާސްތާއެއް އަމީރާއަކަށް ނޭނގެއެވެ. މަގުމައްޗަށް ނުކުމަތް އިރު ޖިނާން މެންގެ އެއްވެސް ހިލަމެއް ނެތެވެ.

ފަނަރަ މިނެޓް ހިނގުނު ފަހުން އެ ފިހާރައާއި ހިސާބަށް އާދެވުނެވެ. ވަރަށް ހަނދާން ކުރަމުން އެ ފިހާރައިން މައި މަގަށް އަމީރާ ނުކުމެވުނު އިރު ދެފަރާތައް ބެލުނު އަދަދެއް ނޭނގެއެވެ. ދޭތެރެއަކުން އެ ހަނި ގޯޅީގެ ތެރެއިން ދާ ސައިކަލެއްގެ އަޑަށް ވެސް ސިހިގެން ދެއެވެ. އެފަދަ ހާލެއްގައި ބައިބޯ މަގަށް ނުކުމެވުނެވެ. އޭރު ފުދޭވަރަކަށް ބޮޑަށް ވަނީ މާހައުލަށް އަނދިރިކަން ވެރިވެފައެވެ. އެހިސާބަށް އާދެވުނު ހިނދު ކުރުވަމުން ދިޔަ ތަފާތު އަސަރުން އޭނާގެ ހިތުގައި ރިއްސަމުންދިޔައެވެ. އިޔާންއާއި ގުޅުނު ދުވަހުގެ ފަހުން ނުކުމެ އުޅޭ މަގަކީ އެއީއެވެ. ދެމީހުން އެކުގައި ދާ ލައިބްރަރީ ފެނުނު ހިނދު އަނެއްކާ ވެސް އަމީރާގެ ދެލޮލުން ފެންތައް ފައިބައިގަތެވެ. އިޔާން ދެކެ ރުޅި އަންނަން ހިތާއި ޒަމީރް އިއްތިފާގުން އެދެމުން ދިޔައިރު ސިކުނޑީގެ ކަނެއްގައި އެ ރީތި ސޫރައާއި އެ ހަނދާންތައް ހަރުޖަހާފައިވަނީ ކަނޑާ ނުގަނެވޭހާ ބޮޑަށެވެ.

ލުއިސްގެ ގޭ ފެނުނު ހިނދު ކަރުނުތަކާއި އެކުމެ ފުންނޭވާއެއް ދޫކޮށްލެވުނެވެ. ނަމަވެސް ކުރިއަށް އޮތީ މަގުހުރަސް ކުރަން ޖެހޭ ހިސާބެވެ. އެހިސާބުން ހަދާނެ ގޮތް ހުސްވިއެވެ. އެއީ އޭނާއަށް އެކަނިން ކުރިމަތި ލެވޭނޭ ވަރުގެ ކަމެއް ނޫނެވެ. ކާކުގެ ނަސީބެއް ކަމެއް ނޭނގެއެވެ. އެވަގުތުވީ ލުއިސް އާއި މާރިއާ ގެއިން ނުކުމަތް ވަގުތަށެވެ. ދެމީހުން ރީތި ވެގެން ތިބި ގޮތުން ހީވަނީ ތާކަށް ދާން އުޅޭހެންނެވެ.

”އަމީރާ .. ދެއާރ ޔޫ އާރ“ އަމީޜާގެ ކަންފަތައް އިވުނީ ޖިނާންގެ ނުބައިއަޑެވެ. ބަލައިލި އިރު ނުބައި ހިނިތުން ވުމެއްގައި އޭނާއާއި ދިހަވަރަކަށް ފޫޓު ދުރުގައި ޖިނާން ހުއްޓެވެ. މުޅި ކުއްޖާ ރޫރޫ އަޅައިގަތެވެ. އިތުރަކަށް ހުންނާކަށް ގަސްތެއް ނުކުރިއެވެ.

“މާރިއާ..ލުއިސް…ހެލްޕްޕް“ އަޑުގެ ކޮޅަށް އަމީރާއަށް ގޮވާލެވުނެވެ. އޭރު މަގުގެ ހިނގާ ބިނގާވެ އުޅޭ މީހުންނާއި ލުއިސްއާއި މާރިއާ ސިހިފައި ބަލައިލެވުނެވެ.

ފުރަތަމަ އަމީރާ ފެނުނީ ލުއިސްއަށެވެ. އޭނާގެ ދެލޯ ބޮޑުވެގެން ދިޔައިރު މާރިއާއަށް އަމީރާ ދައްކާލިއެވެ.

”އެމީ“ އަމީރާ ފެނުނު ހިނދު މާރިއާއަށް އަނގަމަތީގައި އަތް އެޅުނެވެ. އަތުގެ އިޝާރާތުން އައުމަށް މާރިއާ ބުނެލިއެވެ. އަމީރާއަށް މަގު ހުރަސް ކުރަން ނުކެރޭކަން މާރިއާ އެވަގުތު ހަނދާނުން ވެސް ކައްސާލީއެވެ.

”އެންމެ ފިޔަވަޅެއް އެޅިއަސް އެއީ ކަލޭގެ ނިމުން“

”އަހަރެން މަރުވިއަސް ކަލޭ އަކާ ނީންނާނަން“ ތުރުތުރު އަޅަމުން ދިޔައިރު އަމީޜާ ދިޔައި ހުރަސް ރޮނގާއި ކައިރިވަމުންނެވެ. ނަމަވެސް  ޖިނާން ވެސް ދިޔައީ އޭނާއާއި ގާތައް ފިޔަވަޅު ނަގަމުންނެވެ.

އެންމެ ފަހުން އަމީރާ މަގަށް ނުކުތެވެ. ތުރުތުރު އަޅާ ވަރުން ބިމުގައި ދެފައި ހަރުލާ ގޮތެއް ނުވިއެވެ. ޓްރެފިކް ލައިޓް ވެސް ނުހުއްޓެނީސް އަމީރާ ހުރަސް ރޮނގަށް އެރިގޮތުން މަގުގެ ދެފަރާތުގައި ތިބި މީހުން އޭނާގެ ނަމުން ގޮވަމުންދިޔައެވެ. ބާރު ސްޕީޑްގައި އަންނަމުން ދިޔަ ކާރާއި ސައިކަލް ވޫސް ލާފައި ދާއިރު އަމީރާގެ ހިތް ހުއްޓޭ ވަރުވިއެވެ. އެ ޥެހިކަލްތަކުން ރެކެވެނީ ވެސް ކިރިއަ ކިރިއާއެވެ. މަގުގެ މެދަކަށް ވުރެން ބޮޑުބައި ހުރަސް ކުރެވުނު ފަހުން އުޅެ އުޅެ އެންމެ ފިޔަވަޅެއް ވެސް ކުރިއަށް އަމީރާއަކަށް ނޭޅުނެވެ. މާ ބޮޑަށް ’ޕެނިކް’ވެ، އެ ހިސާބުގައި ހުއްޓެވުން އިރު ސިކުނޑީގެ ކޮންމެވެސް ހިސާބެއްގައި ފޮރުވިފައިވާ ހަނދާންތަކެއްގެ އަސަރްތައް ކުރުވަން ފަށައިފިއެވެ. ބޮލުގައި ރިއްސަމުން ދިޔައިރު އަމީރާގެ ހެއަށް ގޮތްވާން ފެށިއެވެ. އެހެން ހުއްޓާ އޭނާގެ ގަޔާއި ދިމާލަށް ބާރު ސްޕީޑުގައި އައި ކާރެއް ފެނުނެވެ. އެއްވެސް ހަރަކާތެއް ނުގެނެވުނެވެ. ކާރުގެ ބަރުގޮނާ ވަށަެިގެން އެއްވެ ތިބި މީހުންގެ ހަޅޭކުގެ އޭނާއަށް އިވުނީ ޙުވަފެނެއ ްފަދައިންނެވެ. އޭގެ ލައިޓްތައް އަމީރާގެ ދެލޮލަށް އެޅެމުން ދިޔައިރު، އެފަދަ މަންޒަރެއް އޭގެ ކުރިން ވެސް އޭނާ ތަޖުރިބާ ކޮށްފައިވާ ކަހަލަ އިޙްސާސެއް ކުރުވަމުން ދިޔައެވެ. ގައިގާ ކާރުން ޖެހުނުއިރު އަމީރާގެ ސިކުނޑީގެ ލޯގަނޑުގައި ވެސް އެފަދަ މަންޒަރެއް ކަޅާއި ހުދުންގެ މަންޒަރުތަކެއް ހެން ކުރެހިގެން ދިޔައެވެ. ލޯމެރިގެން ދިޔައިރު ފެނުނީ ކުޑަ އަންހެން ކުއްޖެއްގެ ގައިގާ އެފަދަ ގޮތަކަށް ކާރުން ޖެހުނު މަންޒަރެވެ.

****

ނިދިފައި އޮތް އާމިލާއަށް ހޭލެވުނީ ހުވަފެނެއް ފެނިގެންނެވެ. ކުއްލިއަކަށް ތެދުވެ އެނދުގެ ހެޑްބޯޑުގައި ލަތްވެގެން އިން އިރު އޭނާގެ ނޭވާ ވެސް ހީވީ އަރުތެރޭގައި ތާށިވެފައިވީ ހެންނެވެ. ދެފަރާތައް ބޯ ހޫރުވާލެނު އިރު އާމިލާއަށް ރޯންފެށުނެވެ.

”އާމީ.. ކިހިނެތް ވީ؟.. ތަނަކަށް ތަދުވަނީތަ؟..“ އާމިލާގެ ރުއިމުގެ އަޑު ކަންފަތުގައި ޖެހި ހައިކަލްއަށް ވެސް ސިހިފައި ހޭލެވުނީއެވެ. ”ކިހިނެތް ވީތަ.. ހުވަފެނެއް ފެނުނީދޯ؟“ ސައިޑް ޓޭބަލް މަތީގައި އިން ލައިޓް ޖައްސާލަމުން އާމިލާ ގެނެސް މޭގައި ލައްކޮށްލަމުން ނުހަނު ލޯބިން ހައިކަލް އެއްސެވެ. އޭނާގެ މޭގެ ތެރޭގައި ފޮރުވިލަމުން އާމިލާ ބޯޖަހައިލިއެވެ.

”ހައިކަލް.. އަ..އަމީ.. ފެނުނީ..އަހަރެމެންގެ އަމާޔާ .. އުސްތަނަކުން ވެއްޓޭތަން ފެނުނީ.. ހައިކަލް.. އަހަރެމެންގެ ދަރިފުޅު“ އަނެއްކާ ވެސް އާމިލާ ރޯންފެށިއެވެ. ހައިކަލް އަށް  ދޫކޮށްލެވުނީ ފުންނޭވާއެކެވެ. އެއީ ގިނަރޭރޭ އާމިލާގެ އާދައެވެ. ނަމަވެސް އެހާ ވަރަކަށް ނުރޮވެއެވެ. މިރޭ މާ ބޮޑަށް ރޮމުން ދާތީ ހައިކަލް ވެސް ހުރީ ނުތަނަވަސް ވާ ގޮތްވެފައެވެ.

”ޝޫޝްޝް.. ހުއްޓާލަ..އަހަރެމެންގެ އަމީ ދުނިޔޭގައި ހުރި ނަމަ އެއްވެސް ގެއްލުމެއް އިރާދުކުރެއްވިއްޔާ ނުވާނެ..ނުރ“

”ދުނިޔޭގަ ހުރި ނަމައޭ؟..އެހެން މީހުން ހެން….ހައިކަލް ވެސް ތި ވިސްނަނީ އެކުއްޖާ މަރުވީ ކަމަށް ތަ..؟ ހައު ކުޑް ޔޫ ؟“ ރޮއިގެންފައި އާމިލާ، ހައިކަލްގެ މޭގައި ތަޅައިގަތެވެ. ހައިކަލް ވަގުތުން ނޫނެކޭ ބުނެ ދެފަރާތައް ބޯހޫރުވާލިއެވެ.

”އާމީ…ހުއްޓާލަބަލަ އެހެންނެއް ނޫނޭ އަހަރެން މާނަ މިކުރީ.. އަމީއަށް އެއް ވެސް ގެއްލުމެއް ނުވެ ފެންނާނެ އިރާދުކުރެއްވިއްޔާ.. މީހަކަށް ނޭނގޭ އެ ދަރިފުޅު ފެނޭތޯ ﷲގެ ހަޟްރަތުގައި އަހަރެން ދުއާ ދަންނަވާ ވަރެއް.. އެކަލާނގެ ރަހުމަތުން އުއްމީދު ކަނޑާލާކަށް ނުވާނެއޭ އަހަރެން ހައި ނުކޮން މިކިޔަނީ… އަބަދުވެސް ވިސްނަން ވާނީ އެންމެ ރަނގަޅަށް“ އާމިލާގެ ބޮލުގައި ފިރުމާލަ ފިރުމާލަ ހައިކަލް އިންއިރު އޭނާގެ މޭގައި ބޮޑިވެލައިގެން އާމިލާ އޭރުވެސް ދިޔައީ ރޮމުންނެވެ. އެގޮތުގައި ރޮމުން ގޮސް އެންމެ ފަހުން އޭނައަށް ނިދި ޖެހިގެން ހައިކަލްގެ އަތްމައްޗަށް ދެމުނެވެ. ބާލީހެއްނަގައި، އާމިލާގެ ބޯ ބާލީހުގައި ރަނގަޅަށް ހަމަ ޖައްސުވާލަމުން މަގަތުގައި އޭނާވެސް އޯށޯވެލިއެވެ. ނިތް މަތީގައި އަތް ބާއްވާލައިގެން އޮތް އިރު ހައިކަލްގެ ދެލޮލުގައި ނިދީގެ އެއްވެސް އަސަރެއް މިހާރަކު ނުވެއެވެ.

”މްމްމް ބައްޕީ.. ބާރތްޑޭ ގިފްޓަކަށް އަމީ ބޭނުން ފަތަން ދަސްކުރަން.. ކޮއްކޮ ގޮވައިގެން މޫދަށް ދާން ހިނގާބަލަ “ އެންމެ ފަހުން އަމާޔާގެ ދުލުން އޭނާ ގާތު ބުނެލި ލޯބިވެތި ޖުމްލަތައް ހަނދާން ވެގެން ދިޔަ ހިނދު ކަރުނައިގެ ރޮނގުތައް ދެލޮލުން ފައިބައިގަތެވެ. އަމާޔާގެ އެންމެ ފަހު އުފަން ދުވަހު އޭނާ ބޭނުންވި ހުރިހާ ސާމާނެއް ހޯދާދިނުމަށްފަހު ހައިކަލް އެހުމުން ދިން ޖަވާބަކީ އެއީއެވެ. ނަމަވެސް އެ އެދުން އެ ލޯބި ދަރިފުޅަށް ފުރިހަމަ ނުކޮށްދެވެނީސް ވީ ނުވީއެއް ނޭނގި ގެއްލުނީއެވެ. އަހަރުތަކެއް ވެގެން ދިޔަ ނަމަވެސް ހައިކަލްގެ އުއްމީދަކަށް ބަދަލެއް ނާދެއެވެ. ދެލޯ މަރާލީ ލޮލުން ފައިބަމުން ދިޔަ ކަރުނުތައް އިތުރަށް ފޭބިޔަ ނުދިނުމަށެވެ.

***

އަމީރާގެ އެސްފިޔަތައް ލަސްލަހުން ހުޅުވާލި ހިނދު ފުރަތަމަ ވެސް ބޮލަށް ކުރަމުން ދިޔަ ބާރު އިޙްސާސްވެގެން ދިޔައެވެ.

”އާހްހް“ ބޮލުގައި އަތްލައިގެން އޮވެ ދެލޯ މަރާ ތަގުޅި ކޮށްލެވުނެވެ.

”ދަރިފުޅާ.. ހޭލެވުނީތަ؟ ތަދުވޭތަ؟ ބޮލުގައި ރިއްސަނީތަ؟“ އަމީރާ ބޮލުގައި އަތް އަޅުވާލައިގެން ތެދުވި ހިނދު މާރިއާއަށް ތެޅިގަނެފައި އައިސް ހުއްޓުނީ އަމީރާގެ އެނދުމަތީގައެވެ. ވާހަކަ ދެއްކޭ ވަރަށް ވުރެން ގަދަޔަށް ބޮލުގައި ވޭން އަޅަމުން ދާތީ އަމީރާ އާއެކޭ ބުނެ ބޮލުގައި ރިއްސަމުން ދިޔަ ވާހަކަ ބުނެލިއެވެ. އެނދުގެ މަތީ ގައިވާ ސްވިޗްތަކުން ރަތްކުލައިގެ ސްވިޗްއަށް މާރިއާ އޮއްބާލި ހިނދު މާގިނައިރެއް ނުވެ ޑޮކްޓަރުން ވަދެގެންއައެވެ.

އަމީރާގެ ހާލަތު ދެނެގަތުމަށް ޑޮކްޓަރުން މަސައްކަތް ކުރަމުން ދިޔަ ހިނދު މާރިއާ އާއި ލުއިސް  އެނދާއި ތަންކޮޅެއް ދުރުގައިވާ ސޯފާއެއްގައި އިށީނެވެ. މާރިއާއަށް ވިސްނެމުން ދިޔައީ އެކްސިޑެންޓްގެ ކުރިން އެމީހުން ފެނިގެން އަމީރާ ގޮވި ގަނޑީގައި، އޭޏާގެ ފަހަތުން އައި މީހުންނާއި މެދުގައިއެވެ. އެންމެ ކުރިއަށް ޒުވާން ފުރައިގެ ފިރިހެނަކު ހުރި އިރު އޭނާއަށް ވުރެން ބިޔަކޮން ކޯޓް ފަޓުލޫނުގައި ތިބި ހަތަރު ފިރިހެނުން ފަހަތުގައި ތިއްބެވެ. ޔަގީނުން ވެސް އެއީ އަމީރާގެ ދުޝްމަނުންނެވެ. އެހެންނޫންނަމަ މަގު ހުރަސްކުރަން ބިރު ގަންނަ ކުއްޖަކު އެފަދަ ގޮތަކަށް މަގު މައްޗަކަށް ނުނިކުންނާނެއެވެ.

”ލުއިސް ދެކުނިން ތަ އެމީގެ ފަހަތުން އައި ގްރޫޕް؟“ މާރިއާ އަހައިލިއެވެ. އިރުކޮޅަކު ހިމޭނުން އިނދެފައި ލުއިސް ބޯ ޖަހައިލއެވެ.

”ދެކުނިން… ކުރިއަށް ހުރި ޒުވަން ފިރިހެން ކުއްޖާ ކޮންމެ ވެސް ތާކުން ފެނުނު ހެން ހީވަނީ.. ނޫނީ ކޮންމެ ވެސް މީހަކާއި ވައްތަރީ“

”އޭންން.. ކާކު؟ “

”ނޭނގެ މާރިއާ..ވެދާނެ ހީވި ހީވުމަކަށް ވެސް.. ކޮންމެ އަކަށް އެމީހުން ތިބި ގޮތުން ހިޔެއް ނުވޭ އެމީއަށް މި ފަސްގަނޑު އިތުރަށް ރައްކާތެރި ވެދާނެ ހެންނެއް..“ ލުއިސްގެ ވާހަކަ މާރިއާ ބޯ ޖަހައިލިއެވެ. އޭނާ ވެސް ވިސްނަމުން ދިޔައީ އެކަމާއިއެވެ.

“އަމީރާގެ ހާލަތު މިވަގުތައް ރަނގަޅު…ވިއްސައިގެން ގޮސް ވެއްޓި ޖެހުނު އިރު ކޮނޑު ހުޅުން ނެއްޓިފަ އިނީ.. އެންމެ މަދުވެގެން ހަފްތާއެއް ވައްދެން ޝޯލްޑާރ އިމޯބަލައިޒާރ އަޅުވަން އެބަ ޖެހޭ…އޭގެ ފަހުން ބަލާފަ އިތުރު ގޯހެއް އުޅެންޏާ ސާޖަރީއެއް ވެސް ކުރަން ޖެހިދާނެ…ފައި އަދި އަތުގެ ބައެއް ހިސާބުތައް މަށައިގެން ގޮސްފައި ހުރި ނަމަވެސް މާ ބޮޑު އަނިޔާއެއް އިތުރަކަށް ފާހަގަ އެއް ނުވޭ ..ހީވާ ގޮތުން ކާރު އެގަޑީގަ މަޑުކޮށްލީމަ ކަންނޭގެ އަމީރާގެ ފުރާނަ ސަލާމަތް ވީ.. ނުހުއްޓާ ދިޔަ ނަމަ ވަރަށް ޑޭންޖާރ ވީސް.. “

ޑޮކްޓަރުގެ ވާހަކަތައް އިވުމުން މާރިއާއި އާއި ލުއިސްއަށް ދޫކޮށްލެވުނީ ހިތްހަމަ ޖެހުމުގެ ނޭވާއެކެވެ. އިތުރު ސުވާލެއް ނެތް ކަމުގައި ބުނުމުން ، ޑޮކްޓަރު ނުކުމެގެން ދިޔައެވެ. އޭރު ނަރުހަކު އަމީރާގެ އަތައް ގުޅާފައިވާ އައިވީ ކެނިއުލާގެ ތެރެއަށް އިންޖެކްޝަނެއް ޖެހުމުގައި އުޅެމުން ދިޔައެވެ. އެ  މަސައްކަތް ނިންމާފައި އޭނާ ނުކުމެގެން ދިޔުމުން ދެމީހުން، އަމީރާގެ އެނދައި ގާތްވެލިއެވެ.

”އެމީ.. އާރ ޔޫ އޯކޭ؟“ އަމީޜާގެ އަތުގައި ހިފާލަމުން އެނދުގެ މަގަތުގައި މާރިއާ އިށީންދެލިއެވެ. އެވަގުތުވެސް އަމީރާގެ ދެލޮލުގައި ބޮނޑިވެފައިވީ ކަރުނުތައް ފެނި މާރިއާއަށް ހިންދިރުވާލެވުނެވެ. އެހެން އޮވެފައި މަޑުމަޑުން ބޯޖަހާލިއެވެ.

”ލުކް އެމީ ..ކިހިނެތް ވެގެން މިއުޅެނީ .. ބޭބެ މެންނާއި ހިއްސާ ކުރީމަ އެހީއެއް ވެވޭނީ.. އެމީ  މަގު ހުރަސް ކުރަން އައި ވަގުތު، ފަހަތުގައި ޖައްސާފައި ތިބި މީހުންތައް ފެނުނު… އެއީ ކޮން ބައެއް؟ “ ލުއިސްގެ ސުވާލް އިވުމުން އަމީރާ އެނބުރިލީ އަނެއް ފަރާތަށެވެ. މިވަގުތު ވާހަކަ ދެއްކުމަށް ބޭނުން ނުވެފައިވާ އޮތް ކަހަލައެވެ. ލުއިސް މާރިއާގެ މޫނަށް ބަލައިލަމުން ހިތި ގޮތަކަށް ހީލިއެވެ.

އަމީރާ ވިސްނަމުން ދިޔައީ މާކިންއާއި ޒަންޔާއާއި މެދުގައެވެ. ޒަންޔާ އަޅެ ކޮބައިބާވެއެވެ. އެވަގުތު މާކިން އަތައް ފޯނު ނުދެވުނު ނަމައޭ މިހާރު އެތަކެއް ފަހަރަކު ހިތައް އަރާފިއެވެ. ނަމަވެސް ކުރާނެ ކަމެއް ނެތެވެ. އަމިއްލަ ބަދުނަސީބު ކަމާއި މެދު ވިސްނުނު ވަރަކަށް ހިތައް ކެތް ނުވާ މިންވަރަކަށް ވޭން އަޅަމުން ދިޔައެވެ. އެގޮތުގައި ރޯން އޮތްއިރު އޭނާއަށް ނިދުނު އިރެއް ވެސް ނޭނގެއެވެ.

އަމީރާއަށް ހޭލެވުނީ އާންމުކޮން ވެސް ހޭލާ ގަޑިއަށެވެ. އެލާމްއެއް ނެތިވެސް އަބަދު ހޭލާ ތީ އެގަޑިއަށް މިއަދުވެސް ފަސޭހަ ކަމާއިއެކު ހޭލެވުނީއެވެ. ލަސްލަހުން ދެލޯ ހުޅުވާލެވުނު އިރު ކޮޓަރީގެ ތެރޭގައިވާ ފަނޑު އަލިކަމުގެ ތެރެއިން ދުރުގައިވާ ސޯފާގައި ނިދިފައި މާރިއާ ފެނުނެވެ. އޭރު އައިވީ ވެސް ހުސްވެގެން ވަނީއައު ފުޅިއެއް ގުޅާފައެވެ. ފާރުގައި އިން ގަޑި ބަލައިލި އިރު ހައެއް ޖަހަނީއެވެ. އިރުކޮޅަކު އޮތުމަށްފަހު އަމީރާ ލަސްލަހުން އެނދުން ތެދުވެލިއެވެ. ނަމަވެސް އެކަން ކުރަންވީ ވޭނަކަށެވެ. ކަނާއަތް ފަރާތު ކޮނޑާއި އަތުގެ ބޮޑު ހިސާބެއް ކަޅުކުލައިގެ އިމޯބަލައިޒާރގެ ތެރޭގައިވީ އިރު  ހަދާލެވޭ އެންމެ ގޮތަކުން ވެސް ނުހަނު ބޮޑަށް ތަދު ވެއެވެ. ހިތްވަރުކޮށްލާފައި އެނދުން ތެދުވެ ، އައިވީ ސްޓޭންޑްގައި ހިފާލައިގެން އަމީރާ ފާހާނާއަށް ވަދެ ވުލޫ ކޮށްލިއެވެ. އެނދުގެ މަގަތުގައި ހުރި ކުޑަ ކަބަޑު ހުޅުވާލި އިރު އޭގެ ތެރޭގައި އޭނާގެ ދަބަސް އިންތަން ފެނި ހަމަޖެހުމުގެ ނޭވާއެއް ލެވުނެވެ.

ދަބަހުގެ ތެރޭގައިވީ މަދު ސާމާނުގެ ތެރެއިން އޭނާގެ ނަމާދުކުރަން ގެންގުޅޭ ބޮޑު ހެދުމާއި އިސްޓާކީނެއް ނެގިއެވެ. ހެދުން އިނީ، ބޯ ނިވާވާނެ ހެން ބުރުގާއަކާއި އެކުއެވެ. ނަމަވެސް ގިބްލައަކީ ކޮބައިކަމެއް ނޭގޭތީ ފަށަން ނުކެރިފައި ހުއްޓާ އޭނާ ސިހުނީ މާރިއާގެ އަޑު އިވިފައެވެ.

”ލެފްޓް ސައިޑް“ ފޯނުން ދައްކާލަމުން މާރިއާ ހީލިއެވެ. ސުކުރު އަދާކުރުމަށްފަހު އަމީރާވެސް ނަމާދުކުރުމައިގެން އަވަސްވެގަތެވެ. ފަހު ރަކްއަތުގައި ވަނިކޮން ލުއިސް ވަތް އަޑު އިވުނެވެ.

”ފީލިންގ އެނި ބެޓާ؟“ އަމީރާ ނަމާދުން އަވަދިވެގެން ލައިގެން ހުރި ސާމާނުތައް ދަބަހަށް ލާންވެގެން ހުއްޓާ ލުއިސް އަހާލިއެވެ. ބޯޖަހައިލަމުން އޭނާ އިށީންދެލީ މާރިއާގެ ގާތުގައި ހުސްތަންކޮޅުގައެވެ. ލުއިސް ދިއްކޮށްލީ އޭނާ ގެނައި ކާ އެއްޗިހި އަޅާފައިވާ ކޮތަޅެކެވެ.

”އައި ވޮނަ ޓޯކް“ އަމީރާގެ ޖުމްލައިން ދެމީހުން އަވަހަށް ބުނާށޭ ބުނެލިއެވެ. ފުންނޭވާއެއް ލާފައި އެންމެ ކުރިން ފަށައިގެން އަމީރާ ހުރިހާ ވާހަކައެއް ކިޔައިދިނެވެ. ހޫގޯ ގާތައް ދާން ޖެހުނު ގޮތުގެ ތަފްސީލެވެ. އެކަކަށް ވެސް އިތުބާރު ކުރުމަކީ ފަސޭހަކަމަކަށް ނުވިނަމަވެސް މާރިއާއާއި ލުއިސް އޭނާއަށް ދެރަ ގޮތެއް ހަދާފާނެހެން އަމީރާއަކަށް ހިއެއް ނުވެއެވެ. އުނދަގޫ ވެފައި ހުރެ ހުރިޙާ ވާޙަކައެއް ނިންމާލި އިރު ދެމީހުންގެ މޫނުމަތީގައި ވީ ހުސްކަމެވެ. އެކަކު އަނެއްކެއްގެ މޫނަށް ބަލައިލި އިރު ބުނާނެ އެއްޗެއް ނޭނގިފައިވާ ފަދައެވެ. ހައިރާން ކަމައި އެއްވަރަށް ނުތަވަސްކަން ވެސް ފެނެއެވެ.

”ހޫގޯ އޭ؟ ބާސެލޯނާ މާފިއާ ހޫގޯ؟“މާރިއާއަށް ގަބޫލް ނުކުރެވިފައި ހުރެ އެހުންނެވެ.. އަމީރާ ވަގުތުން ބޯޖަހައިލިއެވެ.

”އަނެއްކާ އެ ހޫގޯ އަކީ-..“ އެ ޖުމްލަ ފުރިހަމަ ކުރާކަށް މާރިއާ ބޭނުމެއް ނުވިއެވެ. އެ ބަސްތައް ވަނީ އޭނާގެ ހިތުގައިއެވެ. ލުއިސްގެ އަތައް ފިތާލި އިރު ހިތުގައި ވީ ނުތަނަވަސްކަން މޫނާއި ހިސާބުން ފާޅުވެއެވެ. އަމީރާގެ ވާހަކަ ތައް އޭނާއަށް ގަބޫލް ކުރެވުނެވެ. އަމީރާ ފެނުނު ވަގުތު ފަހަތުގައި ތިބި މީހުން ހެއްކަކަށް ފުދެއެވެ.

އަމީރާ އިން ތަނުން ތެދުވެ އަލުން ދަބަސް ކައިރިއަށް ގޮސް ހުޅުވާލާފައި ނެގީ އިޔާން ދިން ކޭޝްކާޑެވެ. އެއީ ދުވަހެއްގެ ކޮޅުން ވެސް އޭނާއަތްލަން ބޭނުންވި އެއްޗެއް ނޫނެވެ. ނަމަވެސް އޭގައި ނުޖެހި ވާނެ އިތުރު ގޮތެއް ފެންނަން  ނެތުމުން، މާރިއާގެ އަތައް، ލޯ މަރާލާފައި އަމީރާއަށް އެ ކާޑް ދިއްކޮށްލެވުނެވެ.

”މީ ކޯއްޗެއް އެމީ.. ކީކުރާ ކޭޝް ކާޑެއް؟“

”ރާއްޖެ ދާން ބޭނުން ވަނީ.. އެކޮޅުގަ ދާނެ ތަނެއް ނެތް.. ސްޓިލް އައި ވޮނަ ގޯ ވެއާރ އައި ބިލޯންގް..“ މާރިއާ ސުވާލްގެ ނަޒަރަކުން ބަލަހައްޓައިގެން އިނުމުން އަމީރާ އިތުރަށް ބުނެލިއެވެ.މާރިއާއަށް ބަލައިލެވުނީ ލުއިސްގެ މޫނަށެވެ. ލުއިސްއަށް ވެސް ބުނާނެ އެއްޗެއް ނޭނގުނެވެ.

****
(ނުނިމޭ)