މި ޖިސްމުގާ ވަނީ 11

******************

(މިހާރު)

ހިޔާލްތަކުން އެނބުރި އާދެވުނު އިރު އިޔާންގެ ދެލޮލުން ހުއްޓުމެއް ނެތި ކަރުނަތައް ފައިބަމުންދިޔައެވެ. އޭގެ ފަހުން އެތައް ފަހަރަކު އަމީރާ ހޯދުމަށް އިޔާން ސްޕެއިންއަށް ދިޔައެވެ. ނަމަވެސް މާޔޫސްކަން މަތީގައި ކަރު އެލުވާލައިގެން އެނބުރި އަންނަން ޖެހެނީއެވެ.

”އައި ވިޝް އައި ހޭޑް ނެވާރ މެޓް ޔަނާލް… އެހެން ނޫންނަމަ މިދުވަސް ދެކޭކަށް ނުޖެހުނީސް“

ހިތުގައި ފުންވެފައިވީ ހިތާމަތަކަށް ތަސައްލީއެއް ލިބުނީ ރީއާގެ ތުއްތުއަޑު، އޭނާގެ ކަންފަތުގައި ޖެހިފައެވެ. ކަރުނަތައް ފުހެލަމުން އިޔާން ތެދުވީ ރީއާގެ ގާތައް ދިޔުމަށެވެ.

***

އަރައިގެން އައި އިރާއިއެކު ”ވައިޓް ބްރީޒް“ ގޭގެ އެތެރެ ފެންނަނީ ފުދޭވަރަކަށް ހަލަބޮލިކޮންނެވެ. ގޭގެ ފުރަގަހަށް އޮންނަ މާމެލާމެލީގެ ބަގީޗާގެ ތެރޭގައި، މާދަމާ  އޮންނަ  ހާއްސަ ހަފްލާއަކަށް ތައްޔާރު ކުރަނީއެވެ. ކޮންމެ މޭޒެއްގެ ވަށައިގެން ހަތަރު ގޮނޑި ބެހެއްޓުމަށްފަހު، ގޮނޑިތަކުގެ ވަށައިގެން ހުދު ފޮތި އަޅާފައި އޭގެ މަތިން ގޮނޑީގެ ލެނގޭބައި ވަށައިގެން ނޫކުލައިގެ ލޭސް ފޮތިން ޓައީ ބައްޓަން އަންނާނެހެން އައްސާލާފައި ހުއްޓެވެ. ވިހި ވަރަކަށް މޭޒު ހުރިއިރު، ކޮންމެ މޭޒެއް ވެސް ހުދު ލޭސް ފޮތިން ރީތި ގޮތަކަށް ޒީނަތްތެރި ކުރެވިފައި ވެއެވެ.

ކުޑަ ސްޓޭޖް ކޮޅުގައި ހުދުކުލައިގެ ޝާހީ ގޮތެއްހުރި ދެމީހުންގެ ޖާގައިގެ ސޯފާއެއް ބެހެއްޓިފައި ވެއެވެ. އޭގެ ފަހަތައް ވާހެން ތައްޔާރު ކުރަމުން ދިޔަ ބޯޑު ނުނިމި ހުރިއިރު، އޭގެ ވަށައިގެން ދެ މީހަކު އުޅެމުންދިޔައެވެ.

“ އެވްރީތިންގް ހޭޒް ޓް ބީ ޕާފެކްޓް.. ނޮޓް އަ ސިންގަލް މިސްޓޭކް!“  މަސައްކަތްތެރިންނަށް އިއްވާލަމުން ވިޝާމް އިށީންދެލީ ވަކިން ހުރި ގޮނޑިއެއްގައެވެ. އެންމެން އެއްފަހަރާ ”ޔެސް ސާރ“ ބުނެ އަނެއްކާ ވެސް މަސައްކަތައިގެން ކުރިއަށް ދިޔައެވެ. އެމީހުންގެ މަސައްކަތުގައި ވީ ފަރުވާތެރިކަމާއި ފާޑުވެރިކަން ފެނި ވިޝާމްއަށް ހަމަޖެހުމުގެ ނޭވާއެއް ދޫކޮށްލެވުނެވެ.

”ތިއްތިބޭ.. ގާތް ގަނޑަކަށް ނިމުނީ ދޯ؟“ ވިޝާމް ފަސް އެނބުރުނީ ސަދަފްގެ އަޑަށެވެ. ޗޮކްލެޓް ކުލައިގެ ހޫޑީ އަކާއި ކަޅު ސޯޓެއްގައި ހުރިއިރު އޭނާގެ އެއްއަތުގައި ބޫޓެއް އޮތެވެ. އަނެއް އަތުގައި ކުޑަވަރެއްގެ ފެންފުޅި އެއް އޮތެވެ. މޫނުމަތީގައި ދަލުގެ އަސަރު ހުރުމުން އެއައީ ޖިމަށް ގޮސްފައިކަން ދެނެގަންނާކަށް މާ އުނދަގުލެއް ނޫނެވެ. ކަނދުރާއާއި ހަމައަށް އޮތް ދިގު އިސްތަށިގަނޑު އޮތީ ދަލުގެ ސަބަބުން ތަތްލާފައެވެ.

”އަހާނ.. ގުޑް މޯނިންގ ޝެޑީ…ޔާހް.. މި އޭރިއާ ގާތްގަނޑަކަށް ނިމެނީ.. އެކަމަކު މިތާގެ ވަށައިގެން ކުރަން ހުރި އެއްވެސް ކަމެއް ނުނިމޭ.. ޝެޑީ އާއި ދޮންބެ އަންނަން ދެން މި މަޑު ކުރީ“ ވިޝާމް ހިނިތުންވެލިއެވެ.

”ރަތަން ..ދެ ކޮފީ “ ގޭތެރެއިން ނުކުތް ރަތަން ފެނި ވިޝާމް ގޮވާލިއެވެ. ރަތަން އަކީ ބަންގްލަދޭޝްއަށް ނިސްބަތް ވާ މުސްލިމެކެވެ. އެގޭގައި އެންމެ ދުވަސްވީ މަސައްކަތު މީހާ ވެސް މެއެވެ. އަދަބްވެރިކަމާއި އެކު ބޯޖަހާލާފައި އޭނާ އެތެރެއިން ވަދެގެން ދިޔައެވެ.

”ކޮބާތަ ޝެޑީ ރޭގަ ދައްކަން އުޅުނު ވާޙަކަ“ ރަތަން ގެނައި ދެތަށި ކޮފީ އިން އެއް ތަށީގައި ހިފަމުން ވިޝާމް އަހައިލިއެވެ. އޭނ ވާހަކަ ނުފަށާ އިންނަން ފެށުމުން ވިޝާމް ނިތް އެއްލިއެވެ.

ސަދަފްއަށް ވިޝާމްގެ މޫނަށް ބަލައިލެވުނީ ހަމަ ބުނަންވީ ބާއޭ ހީވެފައެވެ.އެ ވާހަކަ ބުނެފިނަމަ ޔަގީނުން ވެސް ވިޝާމް އެހާ ހަމަޖެހިގެން ނީންނާނެއެވެ. ސަދަފްއަށް އިރުކޮޅަކު އެކަމާއި ވިސްނާލަން ޖެހުނެވެ.

”ކަމެއް ގޯސް ވީތަ“

”ނޫނޭ..މި..މި..މަންމަ ބުނި ކުޑައްތަ ގާތުގަ ބުނީމޭ މަންހާ އާއި މާހާ ގޮވައިގެން މިކޮޅަށް ޗޭންޖް ވާން “ ތުންފަތުގައި ދައިގަންނަމުން ސަދަފް ބުނެލިއެވެ. ވިޝާމް ހިތްހަމަނުޖެހިދާނެ ކަމުގެ ބިރަށް ސަދަފް އިނީ އިސްޖަހައިގެންނެވެ. ނަމަވެސް އިރުކޮޅެއް ވީ އިރު ވެސް ވިޝާމްގެ ފަރާތުން އެއްވެސް ކަހަލަ ’ރިއެކްޝަން‘ އެއް ނުފެނުމުން އޭނާ ބަލައިލިއެވެ. އެ މޫނުމަތިން  އެކަމާއި ފޫހިވެފައި އިންވަރު ހާމަވިނަމަ ވެސް ހައިރާން ކަމުގެ އަސަރެއް ނުވެއެވެ.

”ރޭގަ ބައްޕަ ބުނި“ ވިޝާމްގެ ޖަވާބަކީ އެއީއެވެ. އިތުރަކަށް އޭނާގެ ފުށުން އެކަމާއި ގުޅޭ އެއްވެސް ބަހެއް ނީއްވައެވެ. އިސްޖަހައިގެން އިނދެ މަޑުމަޑުން ކޮފީ ތަށިން އެތި ފޮދެއް ބޯލިއެވެ.

”އިފް ޔޫ ޑޯންޓް މައިންޑް ކެން އައި އާސްކް ޔޫ ސަމްތިންގް؟“ ސަދަފް އަހާލިއެވެ. ވިޝާމް ޖަވާބު ދިނީ ބޮލުގެ އިޝާރާތުންނެވެ.

”އިނގޭ އަހަންނަށް އެކަނިކަން މިކަންތައް ގަނޑު އެނގޭނީ.. އެކަމަކު ވެސް ތިއްތިބޭ ގެ ހިތުގަ އޮތް އެއްޗެއް އަހަންނަކަށް ވެސް ނޭނގޭ..ޑޫ ޔޫ ހޭވް .. މްމްމް.. މީ..މީ އެއްވެސް ކަހަލަ ފީލިންގްސް ފޯރ ހާ؟“ ސަދަފްގެ ސުވާލް، ވިޝާމް ކޮށްލީ އަމިއްލަ ހިތާއެވެ. ހުދު އޭނާ އުޅެ އުޅެގެން ވެސް އެ ސުވާލްގެ ޖަވާބު ހޯދިފައެއް ނުވެއެވެ. އެނގެނީ އަދި އަދަށް ދާންދެން ވެސް އެ ނޫން އަންހެން ކުއްޖަކާ މެދު ނުވިސްނޭ ކަމެވެ. ހައްގުން ކަމަކާއި ނުލާ  އެ އަންހެން ކުއްޖާއަށް އަދިއަދަށް ދާންދެން ވެސް ރުޅި ބާލަމުން ދާއިރު އެއީ ކޮންކަމެއްގެ ބަދަލްކަމެއް ހުދު ވިޝާމްއަކަށް ވެސް ނޭނގެއެވެ.

ވިޝާމް ދެލޯ މަރާލަމުން ގޮނޑީގެ ތެރޭގައި ހަމަ ޖެހިލަމުން ހަށަމް ބަނދެލިއެވެ. އޭނާ ވިސްނަމުން ދިޔައީ އޭނާގެ ހިތުގައިވާ އިޙްސާސްތަކައި ދުރުވެވޭނެ ގޮތަކާއި މެދުގައެވެ. އޭނާ ބޭނުން ވަނީ އެ އަންހެން ކުއްޖާގެ ހިޔާލް ތަކާއި ދުރުވުމަށެވެ. ނުވިސްނަން މަސައްކަތް ކުރި ނަމަވެސް ވިސްނެނީއެވެ. އޭނާގެ ހިތައް މީހެއްގެ ނުބައި ސިހުރެއް ޖެހިފައި ވަނީބާއޭ އެތައް ފަހަރު ހިތައް އަރައެވެ. އެއީ ލަދުވެތި ހިޔާލްތަކެއް ކަމުގައި ހިތާއި ސިކުނޑިން ވަނީ އިއްތިފާގްވެފައެވެ. ހިތައް އަރަމުން ދިޔައީ މަންހާއާއި ފިލާނެ ގޮތެކެވެ. ދުވަސްކޮޅަކަށް އިޔާންގެ އެޕާރޓްމަންޓަށް ބަދަލްވާން ވެސް ހިތައް އެރިއެވެ.

“އިޓްސް އޯކޭ … އިފް އިޓްސް ހާޑް ފޮރ ޔޫ އައިލް ހޭންޑްލް އިޓް“

”ޝެޑީ ކިހިނެތް.. ކުޑާއްތަ ޝެޑީ ދެކެ ކަމަކާއި ނުލާ އަންނަ ރުޅިގަނޑު އެނގެއެންނު.. ބިކޯޒް އޮފް ދެޓް ކުޑަ ކުޑަ އިބިލިސް މާހާ“ އަނގަޔަށް ވައްތަރެއް ޖައްސާލަމުން ވިޝާމް ބުނެލިއެވެ. ސަދަފް  ފެށީ ހޭށެވެ.

”އެ ކުޑަ ހަންޑިއެއީ ހަމަ މުސީބާތެއް.. ހުރި ގޮތައް ހުރި ނުހޮރުއްޕާނެއް.. ހާދަ ފޫއްސެއް ވެއޭ…“ ސަދަފް ވެސް މޫނު ކުނި ކޮށްލި ގޮތުން ވިޝާމް ވެސް ހޭންފެށިއެވެ.

”އެއްޗެއް އަހާލަންތަ އަދި“ އަނެއްކާވެސް ސަދަފް އަހާލިއެވެ. ވިޝާމް ބޯ ޖަހައިލުމުން ސަދަފް އަސްލު ދައްކަން އައި ޥާހަކަ ފެށިއެވެ.

”މި އި..އިޔާން..އަދިވެސް އަހަރެން ދެކެ އެހާ ރުޅި އާދޭތަ؟“

ވިޝާމް މޫނަށް ސީރިއަސްކަން ވެރީ އެސުވާލުންނެވެ. ސަދަފް ދުރު ބަލަހައްޓައިގެން އިން އިރު އެ ދެލޮލުގައި ބަނދެވިފައިވާ މާނަ ކުރަން ދަތި ޝުއޫރުތަކެއް ވެއެވެ. އެ މޫނުމަތިން މޮޅިވެރިކަމެއް ވެސް ފެންނަމުން ދިޔަހެން ވެސް ވިޝާމްއަށް ހީވިއެވެ. ނަމަވެސް އެކަމަށް އެއްވެސް އެއްޗެއް ބުނާކަށް ވިޝާމް ބޭނުމެއް ނުވެއެވެ. އިޔާންއާއި ސަދަފްގެ ދެމެދުގައި ހިނގި ކަންތައްގަނޑަށް ފަހު ސަދަފް އާއި ވިޝާމްގެ ގުޅުން ވެސް ރަނގަޅުވީ އަހަރެއް ވީފަހުންނެވެ. އެދުވަސްތައް އަނބުރާ އިޔާދަ ވާކަށް ވިޝާމްގެ ހިތެއް ނޭދެއެވެ. އެއަށްވުރެން މިހާރު އޮތް ގޮތައް ދެމީހުން ވާހަކަ ނުދައްކާ ތިބެން ވެސް މާ ރަނގަޅު ކަމަށް ވިޝާމްއަށް ގަބޫލް ކުރެވެއެވެ.

”އޮފްކޯޒް.. މްމްމް ލެޓްސް ގޯ އިންސައިޑް ބްރޭކީއެއް.. ވަރަށް ބަނޑުހައި “ ކޮފީ ޖޯޑު، އޭނާ އިން ގޮނޑީގެ މައްޗަށް ދޫކޮށްލާފައި ވިޝާމް ހިނގައިގަތެވެ.

ސަދަފް އެއްޗެއް ބުނަން އުޅެފައިމެ މާޔޫސްވެފައި ހުރެ ވިޝާމްގެ ފަހަތުން ހިނގައިގަތެވެ. އެވާހަކަ ދައްކަން މަސައްކަތް ކުރި ނަމަވެސް ވިޝާމްގެ އަމަލްތައް ހުންނާނީ އެހެންކަން މާކުރިންވެސް ސަދަފްއަށް އެނގޭ ކަހަލައެވެ.

ދެ ޒުވާނުން އެތެރެއަށް ވަތްއިރު ފުރަތަމަ ވެސް ކަންފަތްތަކުގައި ހަރުލައިގެން ދިޔައީ އާމިލާގެ އަޑެވެ.

”މާއިންއަށް އެނގޭތަ ތިހެން އުޅުނީމަ، ބައްޕަގެ ގަދަރާއި އަގު ތި ވައްޓާލެވެނީ ޕަބްލިކް ހޮޅޯވައްޓަކަށް ކަމެއް.. ނުވަތަ ކަންމަތީ އާންޓީމެންގެ ޖޯލި ފަތީގަ ދެކެވޭ އެބޯޅޭ މިބޯޅޭ ވާޙަކައަކަށް ކަމެއް..  ކިހާ ތާހިރް ވާނެތަ އަހުމަދު ހައިކަލްގެ ހަގު ދަރި އުޅެނީ މި ފާޑަށޭ މީހުން ކީމަ“ ވެފައިވީ ދެރައާއި އައިސް ހުރި ރުޅި އެކުވެގެން އާމިލާގެއަޑު އައީ ނުހަނު ބާރަށެވެ.

މާއިންއަށް ކަހާތާ ހިރުވާ ވެސް ނުލާ ފަދައެވެ. ގަދަ ރަތް ކުލަ ޖައްސާފައި ވާ ދިގު އިސްތަށިގަނޑު ފަހަތައް ހުޅިޖަހާފައި، ވަނީ އައްސާފައެވެ. ތުނބުޅިވެސް ދިގުވެފައި ހުރިއިރު މިއިން ދުވަހަކު ކޮށި ފާޑެއް ނުޖަހައެވެ. ނުވިތާކަށް ގަދަ ރަތްކުލައިން ހުރީ ހައިލައިޓް ކޮށްފައެވެ.  ކަރުގައި ވެސް ދެތިން ރިހި ފަށް އަޅާފައި އޮތް އިރު އަތާއި ފައިގާ ވަނީ އެ ޒާތުގެ ރިހި ފަށްތަކުން ފުރާލެވިފައެވެ. ގަޔަށް ދޫ ޓީޝާޓްގައި އޭނާގެ ހަށިގަނޑުން އެއްވެސް ހިސާބެއް ލައްވާ ނުލައެވެ.  މޭޒު މައްޗަށް ދެފައި އަރުވާލައިގެން ހަމަޖެހިގެން ޕާން ފޮއްޗެއް ކާލަ ކާލާ އިނެވެ. އާމިލާ ދައްކަމުން ދިޔަ އެއްވެސް ވާހަކައަކަށް އޭނާގެ ސަމާލް ކަމެއް ނެތެވެ. މާއިން އިން ގޮތް ފެނި ވިޝާމްގެ ގާތައް ރުޅި އަންނަ ގޮތްވިއެވެ.

”ދޮންބެ ދައްތާ.. ކިހިނެތް ވީ“ ސަދަފް އަހައިލީ އެއްކައިރީގައި ހުރި ނާޔާގެ ގާތުގައެވެ. ނާޔާ ދައްކައިލި އޭނާގެ ފޯނެވެ. ސަދަފް ބަލައިލި ހިނދު ފުރަތަމަވެސް ފެނިގެން ދަނީ ފޭސްބުކްގައި ދިވެހިންގެ ފުށުން ’ވައިރަލް‘ ވާ ހަބަރުތައް ގެނެސްދާ ޕޭޖްއަކަށް ލާފައިވާ ވީޑިއޯ ކޮޅެކެވެ.

”ރާއްޖޭގެ މައްޝޫރު ވިޔަފާރިވެރިންގެ ދަރިން އުޅެމުންދާ ގޮތް މި ފެންނަނީ..ޕަބްލިކް ތަންތާގައި ދުންފަތުގެ އިސްތިއުމާލް ކޮށް ޅަދަރީންނަށް ނަމޫނާ ދެއްކުމުގައި އަވަދިނެތި“  ފޮޓޯގެ މަތީގައިވާ ލިއުންކޮޅު ކިޔާލުމަށްފަހު އޭގައިވީ ވީޑިއޯ އަޅުވާލި ހިނދު ސަދަފްގެ މޫނު ބަނަވިއެވެ. ފެނިގެންދަނީ ރާއްޖޭގެ މައްޝޫރު ގޭންގްސްޓާރުން ތަކަކާއި އެކު މާއިން ސިނގިރޭޓް ބޯން ހުންނަ ވީޑިއޯއެކެވެ. އެމީހުންގެ މޫނުތަކުން އެކަނި ވެސް  އެއީ ކިހާ ފެންވަރެއްގެ ބައެއްކަން ހާމަވާ ވަރުވެއެވެ.އެހެން ތިބި އިރުވެސް ހީވަނީ މަސްތުގެ ހާލަތުގައި ވާހެންނެވެ. ދެލޯ ކުޑަވެ ވަޅުވަދެފައި ވީ އިރު ތުންފަތް ކަޅެވެ. އެތަނުގައި ތިބި ކޮންމެ މީހަކީ ވެސް އެތައް ކުށެއް ކޮށް އެކި ފަހަރު މަތިން ޖަލަށް ލެވިފައި، ކޮންމެވެސް ސިޔާސީ މީހެއްގެ ނުފޫޒުން މިނިވަން ވެފައިވާ މީހުންނެވެ.  އެއީ އާންމުންގެ ތެރޭގައި ނުރައްކާ ލޭބަލް އެޅިފައިވާ މީހުންނެވެ.

”މާއިންއަށް އެނގޭތަ މިއިން އެންމެ އެއްޗެއް ދޮންބެއާއި ބައްޕައާއި ހަމައަށް ދިޔަސް ދެން ވާނެ ގޮތް؟“ ވިޝާމްގެ ނަފްސަށް ވެރިވަމުންދިޔަ ރުޅިވެރިކަން ކޮންޓްރޯލް ކުރަމުން މަޑުމައިތިރިކަމާއި އެކު އަހައިލިއެވެ. މިފަހަރު ވެސް މާއިންގެ އަނގަޔަކުން ބަހެއް ނީއްވާލައެވެ. އެގޮތުގައި ކާން އިނެވެ.

”މާއިން..މަ ރުޅި އަރުވަން ނޫޅެ ވާހަކަ ދައްކަ ފާނަންތަ!..“ ދެލޯ މަޜާލައިގެން ހުރެ ވިޝާމް އަދިވެސް ބެލީ ކެތްތެރިވެވޭތޯއެވެ. އޭނާގެ ރުޅި އެއީ ގޭގެ އެންމެނަށް ވެސް ކޮންޓްރޯލް ކުރުވަން އުނދަގޫ ރުޅިއެކެވެ. އެރުޅީގައި މީހަކު މަރާއިލެވުނަސް އޭނާއަށް ނޭނގޭނެއެވެ. ނަމަވެސް އޭނާގެ މިޒާޖު ހުންނަގޮތުން،  އަސްލު ރުޅިއަކީ މަދުމީހަކަށް މެނުވީ ނުފެންނާނެ ސިފައެކެވެ.

”ދެން މަންމަމެން ވެސް މާ ބޮޑު އިޝޫއަކަށް ހަދަނިއޭ..  ގާލްފްރެންޑް ދޯކާ ދިނީމާ ލައިފް ސަކް ވެގެން ބިނޑިއެއް އަނބުރާލީ އޭ.. ހާދަ ބޮލަށް އުނދަގޫ ވެއޭ ގެއަށް ވަންނަ ތަނުން ހޭބަލި ވެގެން އަނގަގަދަ ކުރަންޏާ“ މާއިން މޭޒު ދޮށުން ތެދުވަމުން ބުނި ޖުމްލައިން އެންމެންނަށް ލިބުނީ ހައިރާންކަމެކެވެ. އެހާ ލަދު ކުޑަ ކޮށްލާފައި ގޭގެ އެއްވެސް ކުއްޖަކު އާމިލާއަދި ހައިކަލްގެ ކުރިމަތީގައި މީގެ ކުރިން  ދުވަހަކު ވެސް ވާހަކަ ދައްކާފައި ނުވެއެވެ. އަނގަމަތީގައި އަތް އެޅުނު އިރު އާމިލާގެ ދެލޮލުން ކަރުނައައެވެ.

”މާއިންން..“ ވިޝާމްއަކަށް އިތުރަކަށް ނުހުރެވުނެވެ.ދިޔަ ބާރު މިނުގައި މާއިންގެ މޫނުމައްޗަށް އޭނާގެ އަތުގެ ގޮށްމުށުގެ ހަމަލާއެއް އަރުވާލިއެވެ. އައިސްހުރި ރުޅިން މުޅިމީހާ ތުރުތުރު އަޅައިގަތެވެ. އެވަރަކުން ހިތެއް ނުފުރުނެވެ. ދެވަނަ ހަމަލާ ދޭން އުޅުނު ހިނދު ސަދަފް އޭނާ ހިފެހެއްޓިއެވެ.

”ތިއްތިބޭ އޭނާގެ ފެންވަރަށް ނުވެއްޓޭ..“ ސަދަފްގެ މަސައްކަތް ހީވީ ވިޝާމް ގަދަހަދާވަރުން ބޭކާރުވާން އުޅުނު ހެންނެވެ. ގޭތެރޭގައި އަޑުގަދަ ވާތީ މަސައްކަތު މީހުންވެސް، ފަހަރަކު މީހަކު އަންނަމުން ދިޔައެވެ.

”އެކަކަށް ވެސް އަހަރެންގެ ގައިގަ ޖަހާކަށް ނުޖެހޭނެ..“ ވެފައިވީ ތަދުން މާއިން އޮތީ ތިރިއަށް ވެއްޓިފައެވެ. އެހެން އޮވެގެން ވެސް ބެލީ ގަދަކަން ދެއްކޭތޯއެވެ.

”ނާ..ނާޔޫ..ޔުމާންއަށް ގޮވާބަލަ“ އާމިލާއަށް ރޯން ފެށުނެވެ. ތެޅިގަނެފައި ނާޔާ ވެސް ދުއްވައިގަތީ ޔުމާން ވީތަނެއް ބަލާށެވެ.

”ތިއްތިބޭ.. ނޫން.. ނޫން.. ބަލާ މަންމައަށް ވެފަ ހުރި ގޮތް “ ސަދަފްއަށް ވިޝާމް ހުއްޓުވަން ވީ އުނދަގޫ ކަމަކަށެވެ. ނޯކަރުން ވެސް އެހީވަމުން ދިޔަނަމަވެސް އެކަންތައް ކާމިޔާބެއް ނުވިއެވެ. އެމީހުން ހިފަހައްޓައިގެން ތިއްބާވެސް އަތް ފޮޅުވާލާފައި ދެވަނަ ހަމަލާ މާއިންގެ އަނގަ މައްޗަށް ވިޝާމް އަރުވާލިއެވެ.

”ކަލޭ ހީކުރީތަ ޖަހަން ނުކެރޭނެ އޭ“ މި ފަހަރު ވިސާމްގެ މޫނުމަތީގައި މާއިން ވެސް ޖެހިއެވެ.

”ދަރިފުޅާ.. ނޫން.. ދެކުދިން ހުއްޓަބަލަ…“ އާމިލާ ރޮމުން ރޮމުން ވިޝާމްގެ އުޅާބޯށީގައި ބައްދާލުމުން ކިތަންމެ ރުޅިގަދަ ވެފައި ހުރި ނަމަވެސް ވިޝާމްގެ ރުޅި މަޑުވާ ގޮތްވިއެވެ.

”ސޮރީ މަންމާ.. އަހަންނަށް މިއަދު ކެތްނުވީ ހަމަ.. ސޮރީ“ އާމިލާގެ ގައިގާ ބައްދާލި ހިނދު ވިޝާމްދެލޯ މަރާލެވުނެވެ. ދެންމެ އާމިލާ ނުހިފެހެއްޓިނަމަ އޭނާގެ އަތުން މާއިންގެ އަތެއް ފަޔެއް މިއަދު ބިނދުނީހެވެ.

”މިތާ ނުހުރެ ދެންވެސް މައްޗަށް ދޭ“ ޑައިނިން ޓޭބަލް މަތީގައި ހުރި ޓިޝޫ ފޮށިން ދެތިން ޓިޝޫ މާއިންގެ އަތައް ލައްވާލަމުން ސަދަފް، އޭނާ ދޮރާއި ދިމާލަށް ކޮއްޕާލިއެވެ. އަނގަމަތިން ލޭ އަންނަމުން ދިޔައިރު އެތަން ތަނުގައި ޓިޝޫތައް ޖައްސާލައިގެން ހުރެ މާއިން ނުކުމެގެން ދިޔައެވެ.

”ކިހިނެތް މިވަނީ“ ޔުމާންއާއި ހައިކަލްއަށް އާދެވުނު އިރު ހުރިހާކަމެއް ވެ ނިމިއްޖެއެވެ. ނާޔާ އިޝާރާތް ކޮށްލުމުން ޔުމާން ދިޔައީ މާއިން ހޯދުމަށް މައްޗަށެވެ. ތަނުގައި ތިބި ނޯކަރުންނަށް ވެސް އަތުގެ އިޝާރާތުން މިވަގުތު ދިޔުމަށް އެދުނެވެ.

“ކިހިނެތްތަ ވީ“ ވިޝާމްގެ ތުންފަތް ކައިރިން ފެޅިފައި ހުރުމުން، ހައިކަލް ހައިރާންވިއެވެ. އެކަކުވެސް އެސުވާލަށް ޖަވާބު ނުދިނުމުން އޭނާ ގޮސް ހުއްޓުނީ ރޮމުން ދިޔަ އާމިލާގާތުގައެވެ.

”އާދޭ މަލަންކޮޅެއް އަޅާލަން“ ލިވިންގްރޫމު ކަބަޑަކުން ހޯދާލައިގެން ގެނައި ފަސްޓްއެއިޑް ބޮކްސް ހިފައިގެން ނާޔާ އައެވެ. ވިޝާމް އިށީނުމާއި އެކު ނާޔާ ބޭސް އަޅާލަ ދޭންފެށިއެވެ.

****

“އެނދުން ތެދުވަން ބޭނުން ނުވެފައި އަމީރާ އޮތެވެ. އެހެން ދުވަސް ދުވަހު އަރައިގެން އަންނަ އިރާއި އެކު ބަނދިގެއަށް ދާ މީހާ މިއަދު މެންދުރު ވީ އިރުވެސް ނުދިއުމުން، ލޯލާ ހޯދަން އަންނާނެ ކަން އަމީރާއަށް އެނގުނެވެ. އެކަމަށް އަމީރާ އޮތީ ތައްޔާރު ވެގެންނެވެ. އެކަމަކީ ޒަންޔާ ބުނެދިން ގޮތައް އެމީހުންގެ ހާއްސަ ރޭވުމުގެ ދަށުން އަމީރާ ކުރާ ފުރަތަމަ ކަންތަކެވެ.

ވީވެސް އެހެންނެވެ. އެހެން އޮންނަ ތާ އިރުގަނޑެއް ފަހުން ލޯލާ އައިސްވަނެވެ. އެނދުގެ ސިޑިން މައްޗަށް ލޯލާއަރަމުން ދިޔަ އަޑު އިވި ފުސްގޮތަކަށް މަންޒަރު ފެންނާނެ ހެން ލޯ މަރާލައިގެން އަމީރާ އޮތެވެ. ލޯލާ އަރާފައި އިރުކޮޅެއް ވަންދެން އަމީރާއަށް ބަލަ ހުއްޓެވެ.

”އެހެމް އެހެމް.. އެމީ.. އެމީ“ ކަރުކެހިލަމުން އަޑު ތުއިކޮށްލަމުން އާދައިގެ މަތިން އޭނާ އަމީރާއަށް ގޮވާ އުޅޭ ގޮތައް ގޮވާލިއެވެ. ފޫހިވެފައި އޮއެމެ އަމީރާ މޯޅިއަކަށް ދެމިލަމުން ކުޑަކޮން ލޯ ހުޅުވާލިއެވެ.

”ސޮރީ.. ވަރަށް ބޮޑަށް ބޮލުގައި ރިއްސާތީ އޮވެވުނީ..“ ބޮލުގައި އަތްލަމުން ޒާތަކަށް ކުކުރާލާފައި އަމީރާ ބުނެލިއެވެ.

”އަޅޭ ވަރަށް ބޮޑަށްތަ.. “ ލޯލާގެ މޫނުމަތިން ފެނުނު އަސަރުތަކުން އަމީރާ ގާތައް ރުޅި އަންނަ ގޮތްވިއެވެ. ކަނބޮޑުވެފައިވާ ފަދައަކުން މޭގައި އަތް އަޅައިގެން ހުރިއިރު ދެކޭ މީހަކަށް އެއީ އޭނާ ކުޅޭ ތަމްސީލެއްކަން ގައިމުވެސް އޮޅޭނެއެވެ. އެހާވެސް މޮޅެއެވެ. ދަތްތައް ޖައްސައިގެން އިނދެ އަމީރާ ބޯޖަހައިލިއެވެ.

”ބޭސް ކައިފިން ދެންމެ.. ހޫގޯ އަހައިފިނަމަ ބުނެދީ މިހެން.. ކޮޅަށް ނުހުރިވިދާނެ ކަމުގެ ބިރަށް މިއޮތީ“ އަމީރާ ބޭނުންވީ ވީހާވެސް އަވަހަކަށް ލޯލާ އެތަނުން ފޮނުވާލުމަށެވެ. ބޯޖަހާލާފައި އޭނާ ނުކުމެގެން ދިޔައީ ކަމެއް ބޮޑުވަންޏާ އަންގާލުމަށް ބުނެފައެވެ.

”ފިސާރި ރީތިކޮން ބުނާނަން“ ދަތްތައް ކާރުވައިގަންނަމުން އަމީރާ އެނދުން ތެދުވީ ލޯލާ ނުކުތުމުންނެވެ. ކޮޓަރި ތަޅުލުމަށްފަހު، އަލަމާރީގައި އޭނާއަށް ހާއްސަކުރެވިފައިވީ ބައިގެ ތަޅުލާ ވަތްގަނޑުން މާކިން ދިން ދަބަސް ނެގިއެވެ. އަމީރާ ދަބަސް ހުޅުވާލުމަށްފަހު ބެލީ އޭނާގެ ސާމާނު އެއަށް އަޅާލުމަށެވެ. ހުރިހާ އެއްޗެއް އެޅުމުން ދަބަހުގެ ޒިޕް ކަހާލަން އުޅުނު ހިނދު ފަހަތުގައި އިން ވަތްގަނޑުން ރަބަރު އަޑެއް ކީ އަޑު އިވި އަމީރާ އެ ވަތްގަނޑު ހުޅުވާލިއެވެ. ބަލައިލި އިރު ފައިލެކެވެ.

ފައިލް ތެރެއިން، އޭނާގެ އަތުން ހޫގޯ އަތުލި ޕާސްޕޯޓާއި އޯލެވެލް ނަތީޖާ ފެނުމުން ތަފާތު އަސަރެއް ހިތައް ކުރުވިއެވެ. އޭނާގެ ގާތައް ކުރީ ދެދުވަހު މާކިން ނައިސް ކުރިކަންތައް މިއީހެއްޔެވެ. މާކިންއަށް ޓަކައި އަމީރާގެ ހިތް ޝުކުރުން ފުރުނެވެ.

”ތޭންކިއު މާކް..ނޭނގޭ ކިހިނެތް ކަމެއް ވެސް ޝުކުރު އަދާކުރާނީ.. “ ދެލޯ ފުހެލަމުން އަމީރާ އެ ސާމާނު އަލުން ފައިލްތެރެއަށް ލުމަށްފަހު، ފައިލް ވެސް ވަތްގަނޑަށް ލާ ދަބަސް ރަނގަޅަށް ޕެކް ކޮށްލިއެވެ. ކުރިން ދަބަސް އިންތަނަށް ލުމަށްފަހު އަމީރާ ގަސްތުކުރީ މާކިންއަށް ގުޅާލުމަށެވެ.

”ހަލޯ .. އަމް ޑަން.. ވެއާރ އާރ ޔޫ ގާއީޒް..“

“ އަހަރެމެން ދެމީހުން މިތިބީ ތި ރޫމް ދޮރު ފެންނަ ހިސާބުގަ.. އެކަމަކު ހޫގޯ އާއި ލޯލާ ވަރަށް ރޮމޭންޓިކް ފިލްމެއް ތި ރޫމް ދޮރުމަތީގަ އެބަ ކުޅޭ ..އެހެންވެ ނުކުންނަން ނުބުނެވިފަ…އެބަ ގުޅަން އެނގޭ“ އަމީރާގެ ފޯނު ބޭއްވުމަށްފަހު މާކިން ބަލައިލީ ޒަންޔާގެ މޫނަށެވެ. އޭރު ޒަންޔާ އަނގަ ހަދައިގެން ހުރެ ބަލަމުން ދިޔައީ ހޫގޯއާއި ލޯލާ އުޅެމުން ދިޔަ ގޮތެވެ. އެހާ ހާމަ ތަނެއްގައި އެފަދަ ގައިގޯޅި ގޮތަކަށް އުޅެމުން ދިޔައިރު މީހަކު އައިސްފާނެ ކަމުގެ ބިރެއް ވެސް ނެތްފަދައެވެ.  މާކިންގެ ގާތައް ހިނި އަންނަ ގޮތް ވެފައި ހުރެ ޒަންޔާގެ ދެލޯ މަތީގައިއަތް އެޅިއެވެ. ދެމީހުން ތިބީ ސިޑިގޮޅި ބިތްދޮށުގައެވެ.

”މާކް އަތް ނަގާބަ ރިއަލް ލައިފްގަ މިކަހަލަ މަންޒަރެއް އަލަށޭ މިފެންނަނީ.. މުސްކުޅި ވީމަ ތެޅޭ ވައްތަރެއް.. ލަދުން ބޯހަލާކު“ މާކިންގެ އަތް އޭނާގެ ލޯމަތިން ނަގަން  އުޅުނެވެ. މާކިން އަތް ނުނެގުމުން ޒަންޔާ ދެލޯ އަޅާލިއެވެ. އެހެން ތިއްބާ އެމީހުން އެތަނުން އެންމެ ފަހުން ދާ ހިޔާލް ކުރިއެވެ.

”ފައިނަލީ.. “ މާކިން ބޮދަމުން ގޮސް މަޑުމަޑުން އަމީރާގެ ކޮޓަރީގެ ދޮރު ހުޅުވާލިއެވެ. އޭރު އޭނާ ވެސް ދަބަސް އަޅުވާލައިގެން ހުއްޓެވެ.  ތިންމީހުން އެކުއެކީގައި ނުކުމެ ފުރަތަމަ މިސްރާބު ޖެހީ ސިޑިއަށެވެ.

”ތިރީސް ފަންގިފިލާއަށް ވިޔަސް ނޯރ މޯ އޮޕްޝަންސް“ ސިޑީގެ ފުރަތަމަ ހަރު ގިރާކޮށްލަމުން މާކިން ބުނެލިއެވެ. އަމީޜާއާއި ޒަންޔާ ބަހެއް ނުބުނެއެވެ.  ކިތަންމެ އުނދަގޫވީ ނަމަވެސް އެ ނޫން ގޮތެއް ނެތެވެ. ލިފްޓްގައި ކެމެރާ ހުންނާތީ އަރާތަނުން އެނގޭނެއެވެ.

ލިފްޓަށް އަރައާރާ ހުއްޓާ އަމީރާގެ ފައިގާ އަޅުވާފައިވާ ޓެގް މަތިން ހަނދާންވެ ހުއްޓުން އެރިއެވެ. އެ އަޅާއިގެން ހުރިހާ ހިނދަކު އޭނާ ހަރަކާތްތެރިވާ ހުރިހާ މަންޒިލެއް އެމީހުންނަށް އެނގޭނެއެވެ.

”ގާއިޒް އައި ފޮގޮޓް.. “ ލާފައި ހުރި ޖީންސް ހިއްލާލާފައި އަމީރާ ދެއްކިއެވެ. އެއާއެކު މާކިންއަށް ބޮލުގައި ޖަހާލެވުނެވެ. ޒަންޔާ ވެސް ބަލައިލީ ދެން ހަނދާނެ ގޮތަކާއި މެދު ވިސްނާ ފަދައަކުންނެވެ.

”.ސޯ އެމީ ބޭގް  އަހަރެމެންގެ އަތައް ދީފަ ދޭ ބަދިގެ އަށް  ފުރަތަމަ.. އަހަރެމެން މި  ފައިބަނީ ހަމަ ސިޑިން .. ލިފްޓަށް އަރާ ގުޅާލީމަ.. ފައިވް ވަނަ ފްލޯރ އަށް އަރާފަ ގުޅާނަން.. ސޯ ބަދިގެއަށް ވަދެފަ ބަލާ ތި ހަލާކު ކޮށްލެވޭނެ ފަދަ އެއްޗެއް ހޯދޭތޯ.. ވަޅިއެއް ވިޔަސް… ބަހަނާއެއް ދައްކާފަ އެންމެ ތިރީގަ އިންނަ ސްޓޯރޭޖް ރޫމަށް ފައިބާ..“ ޒަންޔާގެ ހިޔާލް އިއްވާލިއެވެ. އެހިނދު އެ ހިޔާލް ކަމުގޮސްގެން މާކިންއާއި އަމީރާ ބޯޖަހައިލިއެވެ.

”ބަޓް ފޯނު ނުދައްކާތި އެއްވެސް ކެމެރާއަކަށް.. އެމީއަށް އެނގެއެންނު މިގޭގަ ކެމެރާ ހުންނާނެ ތަންތަން“ މާކިން ބުނެލިއެވެ.

”ޔެސް.. ގާއިޒް ބީ ސޭފް..“ އަމީރާގެ ދަބަސް ހިފައިގެން، ޒަންޔާ އާއި މާކިން ތިރިއަށް ފައިބަން ފެށުމުން، ގޮވާލެވުނެވެ. ސިޑީގެ އެންމެ ތިރީ ހަރުފަތުގައި އިށީންދެ އިން އިރު އިރުކޮޅަކާ ބެލެމުން ދިޔައީ އެ ޓެގަށެވެ. ވަޅިއެއްގެ އެހީގައި ފަސޭހަކަމާއި އެކު ޓެގް ނެއްޓިދާނެއެވެ. ނަމަވެސް ނައްޓާލަ ހިނދު ގޭގެ އެންމެންނަށް އެކަން އެނގެން ފަޅި ސިކުންތެއްވެސް  ނުނަގާނެއެވެ. އަމީޜާގެ ހަނދާނަށް އައީ އިޔާން ދޫކޮށްފައި ދިޔަ ދުވަހުގެ ހަނދާނެވެ.

އެދުވަހު އެގެއަށް އާދެވުނީ ވެފައިވީ ދެރައެއްގެ ބޮޑުކަމުންނެވެ. މިހާރު އެހެން ނުހެދުނު ނަމައޭ އެތައް ފަހަރަކު ހީވަމުންދެއެވެ. އެދުވަހު އެގޭގެ ދޮރުމައްޗަށް އާދެވުނު ހިނދު ދޮރުވާނުނަށް އޭނާ ފެނިގެން އަތުލައިގަނެގެން ހޫގޯގެ ކުރިމައްޗަށް ގެންގޮސް ހޫރުވާލިއެވެ. އެގެއިން ފިލައިގެން ދިޔުމުން އެކަމުގެ އަދަބެއްގެ ގޮތުގައި އޭނާގެ ގަޔަށް ހޫނުފެން އެޅިއެވެ. ހަށިގަނޑުގެ އެތަން މިތަނުގައި ޗާބޫކުން ތަޅާ ހެދިއެވެ. ގޭގެ ޕޫލްގެ ތެރެއަށް އެތައް ފަހަރަކު ގަންބާލިއެވެ. ދެން ދުވަހަކު ވެސް އެގެއިން ނުކުތުމުގެ ހިޔާލް ނުގެންގުޅޭ ވަރަށް އަނިޔާ ދިނެވެ. ޓެގް އެޅުވީ ދެނެވެ. ފުރަތަމަ ދުވަހު އަމީރާ ޓެގް ނައްޓާލިއެވެ. ނަމަވެސް ފަނަރަ ސިކުންތު ނުވަނީސް ހޫގޯގެ ހަތިޔާރު އެޅި ފައުޖު އޭނާގެ ވަށާލިއެވެ. އެދުވަހަށް ފަހު އެކަމުގެ ހިޔާލެއް އޭނާ ނުގެންގުޅެއެވެ.

”މި ހުރިޙާ ކަމެއް ވެސް ވީ އިޔާން އާ ހެދި….ދުވަހަކުވެސް މާފެއް ނުކުރާނަން.. އައި ހޭޓް ޔޫ.. އަ ހޭޓް ޔޫ ސޯ ސޯ އެންޑް ސޯ މަޗް!“ އަނގައިން އެ ބަސްތައް ބޭރުވި ނަމަވެސް ހިތުގައިވަނީ އެހެން ޖުމްލަތަކެކެވެ. ދެލޮލުން ފޭބި ކަރުނުތައް އޮހިގަތުމުގެ ކުރިން އަމީޜާ ބެލީ ހިންދާލެވޭތޯއެވެ. ނަމަވެސް އޭގެ ކުރިން ފައިބާފިއެވެ.

”އާހްހް.. އައި ހޭވް ޓް ބީ ސްޓްރޯންގް…އަމީރާ.. ސްޓޮޕް ކްރައިން .. ސްޓޮޕް އިޓް..“ދެލޯ ފުހެމުން ދިޔަނަމަވެސް، އިޔާންގެ ހަނދާން އާވާވަރުން ރޮވެނީއެވެ. އެގޮތުގައި އިރުކޮޅަކުއިންދާ މާކިން ގުޅިއެވެ. އެމީހުން ތިބީ ފަސްވަން ފްލޯގައި ކަމަށް ބުނުމުން ލަހެއްފަހެއް ނެތި އަމީރާ ލިފްޓަށް އެރިއެވެ.

އޭނާ ބަދިގެއަށް ވަތް އިރު ލޯލާ ފެންނާކަށް ނެތެވެ. އެތަން މިތަން ބަލަނިކޮން ކެބިނެޓް މަތީގައި އޮތް ކުޑަކުޑަ ތުނި ވަޅިއެއް އޭނާގެ ލޮލުގައި އަޅައިގަތެވެ. ވަރަށް ސިއްރުން ވަޅި ހޯދައިގެން ޖީބަށް ކޮށްޕާލިއެވެ.

”އޭޝްލީ ކޮބާ ތަ ލޯލާ..“ބަދިގެތެރޭގައި ހުރި މެއިޑެއްގެ ގާތުގައި އަމީޜާ އަހައިލިއެވެ.

”ބައެއް މީހުން ބައްޔޭ ކިޔާފައި ކޮޓަރީގައި އޮންނާތީ އޭނާ ވެއްޖެ ސްޓޯރޭޖްއަށް ސާމާނު ބަލައި ގޮސްފަ“ އޭޝްލީ ތުންހަދާލަމުން ބުނެލިއެވެ. އޭޝްލީގެ އެ ރުޅިވެރިކަމަކީ އާ ކަމަކަށް ނުވާތީ އަމީރާ އެކަމަކަށް ފަރުވާލެއް ނުބެހެއްޓިއެވެ.

”ޝިޓ**.. އަނެއް މުސީބާތް!“  ލިފްޓްގެ ތެރެއަށް އަލުން އަރަން އައި ވަގުތު ޖިނާން ފެނި ހިސާބަކަށް ހިތައް ބިރުވެރިކަން ވަނެވެ.

”ކޮންތާކަށް..؟“ ލިފްޓްގެ ނަމްބަރު ބޯޑުން ދިރިއަށް ދާ ނިޝާން ދިއްލިފައި ވާތައް ފެނި ޖިނާން ބަލަހައްޓާއިގެން ހުރީ ފާޑަކަށެވެ.

”ލޯލާ..ލޯލާ އާންޓީ ގާތައް… ވެއްޖެ ސްޓޯރޭޖް ރޫމްގަ“ އިތުރު ސުވާލެއް ކޮށްފާނެތީ އަމީރާ ހުރީ ޖެހިލުންވެފައެވެ. ފާޑާކަށް ބަލަން ހުރެފައި އެންމެ ފަހުން ޖިނާން ބޯޖަހައިލިއެވެ. ނަސީބަކުން އިތުރު ސުވާލެއް ވެސް ނުކުރެއެވެ.  ލިފްޓްގެ ދޮރު ލެއްޕުމުން ހިފަހައްޓާއިގެން ހުރި ނޭވާ ވެސް ބޭރުކޮށްލެވުނެވެ.

”ކިރިޔާ އެންނު“ މޭގައި އަތް އަޅައިގެން އަމީރާއަށް ހުރެވުނެވެ. ލިފްޓް ހުއްޓުމާއިއެކު އަމީރާ ދިޔައީ ސިޑީގޮޅިއަށެވެ. އެތާގައި ޒަންޔާއާއި މާކިން ތިބީ އޭނާގެ އިންތިޒާރުގައެވެ. އަމީޜާގެ ދަބަސް މާކިން ދިއްކޮށްލުމުން އަޅުވާލިއެވެ. ތިންމީހުން އަވަސް ހިނގުމުގައި މިސްރާބު ބެހެއްޓީ ގޭގެ އެންމެ ފުރަގަހަށް އޮންނަ ހިމަ މަގަށެވެ. އެ މަގު ހުރަސް ކުރަން ޖެހެނީ ހޫގޯގެ ކޮޓަރީގެ ކުރިމަތިން ކަމަށް ވުމުނަ އެންމެން ތިބީ ނޭވާ ހިފަހައްޓާލައިގެނެވެ. ނަސީބު ކަން ދިމާކުރި ގޮތުން އެ އެކަކަށް ވެސް ނުފެނި ތިންމީހުނަށް ދޮރާއި ހަމައަށް ދެވުނެވެ.

”ގާއިޒް ރެޑީ؟ އިޓްސް ޓާއިމް… ނައްޓާލާ ވަގުތުން ފެށިގެން އެމީހަކާއި އެމީހެއް.. ވީ ކޭން ކޯލް ފަހުން.. ރައިޓް؟“ ޒަންޔާ ކާޑް ނަގާ ދޮރުގައި ޖައްސަން ތައްޔާރު ވީ ހިނދު އަމީރާ ދިން ވަޅިން ޓެގް ނައްޓަން މާކިން ތައްޔާރުވިއެވެ. މާކިން ފުން ނޭވާއެއް ލާފައި  ޓެގުގައިވާ އިސްކޫރާއި ވަޅި ދިމާކޮށްލަމުން އަނބުރާލިއެވެ. އެހިނދު ވަރަށް ދުރުން ބަޔަކު ހަޅޭއްލަވައިގަން އަޑު އިވި އަމީރާއާއި ޒަންޔާ ބިރުން ތެޅިގަތެވެ.

”މާކް އަވަސް .. ދޭއާރ ކަމިންގް ..“ ބައިވަރު މީހުންތަކެއްގެ ދުވުމުގެ އަޑު އެއްފަހަރާ އިވެމުންދިޔައެވެ. ފަހަރަކަށް ވުރެން ފަހަރެއްގާތެވެ. ސިކުންތުކޮޅެއްގެ މަސައްކަތުން ޓެގް ނައްޓާލެވުނު އިރު، ދޮރުގައި ކާޑު ޖައްސެމަށް އިންނަ ހުސްތަންކޮޅުގައި ޒަންޔާ ކާޑު ޖައްސާލިއެވެ. އެއާއި އެކު ދަގަނޑު ކެހޭ އަޑަކާއި އެކު ދޮރު ހުޅުވުނެވެ.

“ އަމް ގޮނަ ބްލޮކް ދި ވޭއި..  ދޭއާރ ކަމިންގް.. ގާލްސް ގޯ.. މަށައް ނުބަލާ ދެމީހުން ދުވޭ.. އަހަރެން ސަލާމަތް ވާނަން އިންޝާﷲ“ މާކިން ބުނެލި އިރު ޖިނާން އާއި ހޫގޯގެ އިތުރުން އެތައް ގާޑުންނެއް އަންނަތަން ފެނުނެވެ. އެއިން ކޮންމެ މީހެއްގެ އަތުގައި ފިސްތޯލެއް އޮތެވެ.  ޒަންޔާއާއި އަމީރާ އެކުއެކީގައި ނޫނެކޭ ބުނެ ރޯންފެށިއެވެ.

”ގާއިޒް ޕްލީޒް.. މިހާވަރު ކޮށްފަ ތިހެން ނުހަދާ.. ހޫގޯ އަކަށް ނުކެރޭނެ މާބޮޑު ގޮތެއް ހަދާކަށް.. އަމް ގޮނަ ސާވައިވް..ޒަން ބަލައްޗޭ އެމީއަށް..ޝީ ކާންޓް ކްރޮސް ދި ރޯޑް..“ އެންމެ ފަހުން ދޮރާއި ދިމާލަށް މާކިން، އަމީރާ ކޮއްޕާލިއެވެ.

”ކީޕް ދިޒް..“ މާކިންގެ ޖީބަށް ކާޑް ލައްވާލަމުން ޒަންޔާ ނުކުތެވެ. އޭރުވެސް ޒަންޔާއަށް ދިޔައީ ރޮވެމުންނެވެ. އޭނާ ނުކުމެވުނީ ކިރިޔާއެވެ. ދޮރު ލެއްޕުނެވެ. މާކިންއަށް ލޯ މަޜާލެވުނު އިރު ދެލޮލުން ވެއްޓުނު ކަރުނުތިކި ކޯތާފަތްމަތިން ތިރިއަށް ވެއްޓުނެވެ. އެހިނދު އިވިގެންދިޔައި ކަންފަތް ބައްވެގެންދާ ފަދަ ބާރު ހުރި ގަދަފަދަ ވަޒަނުގެ އަޑެވެ. ވޭނީ އާހެއް އަޑާއި އެކު ލޭތައް ބުރައިގެންދިޔައެވެ.

****

(ނުނިމޭ)