ހިރާސް 2 (04)

ލިއަމްގެ މޫނަށް ބަލަހައްޓައިގެން ހުރިއިރު ރުއާނާއަށް ތުންފިއްތާލެވުނެވެ. ލިއަމްއަކީ އިޒްވާގެ ބޭބެ ކަމަށް ވަންޏާ އިއްޔެ އޭނާ ސަލާމަތް ކޮށްދިނީ ވެސް ލިއަމް އެވެ. އަނެއްކޮޅުން މިއަދު ލިފްޓްގެ ކައިރިން ހިނގާދިޔަ ހާދިސާ ހަނދާންވެ، ރުއާނާއަށް ދެލޯ މަރާލެވުނީ ލަދުގަތް ވަރުންނެވެ.  އުފުލާލައިގެން ލިއަމް، އޭނާ ހޮސްޕިޓަލަށް ގެނަގޮތެއް ސިފަކޮށްލާކަށް ރުއާނާއަކަށް ނުކެރުނެވެ. ހައްތަހާ ލަދުގަންނަމުން ދިޔައެވެ. އޭނާ އިސް އުފުލާލި އިރު ލިއަމް ސިދާ އޭނާގެ މޫނަށް ބަލަހައްޓައިގެން ހުރި ތަން ފެނި ރުއާނާއަށް ވެސް ބަލަހައްޓައިގެން ހުރެވުނެވެ.

***

”ހެލޯ..ހެލޯ“ ރުއާނާއަށް ހަމަބިމަށް އާދެވި، ކަޅި ދުރުކޮށްލެވުނީ އޭނާއަށް ލިއަމް ގޮވަނިކޮންނެވެ.

ރުއާނާ ބަލައިލިއިރު ކުލާހުގެ ހުރިހާ ކުދިންހެން އޭނާއަށް ބަލަހައްޓައިގެން ތިބުމުން ލަދުން ގޮސް ހީވީ ވިރެން އުޅުނުހެންނެވެ. މޫނުމައްޗަށް ވެރިވެގަތް ޖަންބުކުލަ ފޮރުވާލަމުން އިސްޖަހައިލިއެވެ. އެހެން އިންދާ ލިއަމް އެދިމާލަށް އަންނަތަން ފެނި އަމިއްލަ އަތުގައި ރުއާނާއަށް ވިކައި ގަނެވުނެވެ.

”އަމް ޓޯކިންގ ޓް ޔޫ“ ލިއަމްގެ އަޑު ދާދި ގާތުން އިވުނު ހިނދު ރުއާނާއަށް ހިންދިރުވާލެވުނެވެ. ރުއާނާއަށް ލިއަމް ކުރިން ދެއްކި ވާހަކައެއް ވެސް މާ ރަނގަޅަކަށް ނޭނގެއެވެ. ދޭނެ ޖަވާބެއް ނޭނގި އޭނާއަށް ބަލައިލެވުނީ އިޒްވާގެ މޫނަށެވެ. ހާސްވެފައި އިންވަރުން، އިޒްވާ އިޝާރާތުން ބުނެދޭން މަސައްކަތް ކުރި އެއްޗެއް ވެސް މާ ރަނގަޅަކަށް އޭނާއަކަށް ނަގައެއް ނުގަނެވުނެވެ. އިޒްވާ މޭގައި އަތް ޖައްސާލާފައި ބުނެލި ގޮތުން އޭނާ ހީކުރީ ތައާރަފް އެއް ދޭން ބުނެލީ ކަމަށެވެ. އެންމެ ފަހުން ރުއާނާ ތެދުވެ ލިއަމްގެ މޫނަށް ބަލައިލިއެވެ.

”ރުއާނާ ރާބިއު.. މްމްމް“ ރުއާނާއަށް އިތުރަށް ބުނާނެ އެއްޗެއް ނޭނގުނެވެ. އޭނާ އިށީންތަނުން އޭރު ކްލާހުގެ ބައެއް ކުދިން ސިއްރު ސިއްރުން ހޭތަން ފެނި ހިސާބަކަށް ރުއާނާގެ ތަބިއަތު ގޯސްވިއެވެ. ލިއަމް ދެއްކި ވާހަކަ އަޑުއެހުނު ނަމައޭ އެތައް ފަހަރަކު ހިތައް އަރަމުން ދިޔައެވެ.

”އިޒް ދެޓް؟“ ލިއަމް ބުނެލި އަޑު އިވި ރުއާނާ އިސް އުފުލާލިއެވެ.

”ވަޓް“ ރުއާނާ ދެބުމަ ހިއްލާލަމުން މަޑުމަޑުން އަހައިލިއެވެ. ރުއާނާގެ މޫނަށް ބަލަހައްޓާއިގެން ހުރެފައި ލިއަމް ދެފަރާތައް ބޯހޫރުވާލިއެވެ. އިތުރަށް އެއްޗެއް ނުބުނެ ލިއަމް އެ މޭޒު ކައިރިން ދިޔައެވެ. ލިއަމް ކުލާހުގެ މެދަކަށް ހުއްޓިފައި ކިޔަވައިދޭން ފެށި ގޮތުން ކަމެއް ވީހެން ވެސް ހީނުވެއެވެ. އޭގެ ފަހުން ރުއާނާއާއި ދިމާ އޭނާ އެންމެ ފަހަރަކު ވެސް ބަލާނުލިއެވެ.

އެގޮތުގައި ކުލާސް ނިމުނު އިރު ވެސް ދޭތެރެއަކުން ރުއާނާއާއި ދިމާ ބަލައިލަމުން ފަހަރަކު ކުއްޖަކު ހީލައެވެ. ރުއާނާއަށް އަނގަހަދާލެވުނެވެ. އިޒްވާ ވެސް ފާޑަކަށް ހިނިއައިސްފައި އިނުމުން ރުއާނާއަކަށް އެއްޗެއް އަހާލާކަށް ވެސް ނުކެރުނެވެ.

”ވަޓް ހެޕެންޑް؟“ ޖެހިގެން އޮތް ކްލާސް ފެށުމުގެ ކުރިން ،ރެސްޓް ރޫމަށްއަށް ގޮސް އައުމަށް އިޒްވާ ނުކުތުމުން، އީތަންއަށް ގޮވާލަމުން ރުއާނާ އަހައިލިއެވެ. އީތަންގެ މޫނުމަތިން ވެސް އެހިނދު ފެނިލީ ލާނެތް ހިނިތުންވުމެކެވެ.

”ރުއާ އިނީ ސާރ ގެ މޫނަށް ބަލަހައްޓައިގެން.. ސޯ ..އެހެންވެ ސާރ ގޮވާލީ…ދެތިން ފަހަރަކު ސާރ ގޮވާލުމުން ވެސް ރުއާ ޖަވާބެއް ނުދިން.. ދެން އިޒްވާގެ މޫނަށް ބަލައިލީމެންނު.. އިޒްވާ އަސްލު އިޝާރާތް ކޮށްލީ އެއްޗެއް ނުބުނެ އިންނަން.. އެކަމަކު ޔޫ ސްޓޫޑް އަޕް އެންޑް ސެއިޑް ޔުއާރ ނޭމް..“  އީތަންގެ ޖަވާބުން ރުއާނާ ލަދުން ގޮސް މޭޒުގައި ބޯޖެހިއެވެ. އޭރު ދެމީހުންގެ ވާހަކަ އިވޭ  ހިސާބުގައި ލޫކް ވެސް އިންއިރު، އޭނާއަށް ވެސް ދިޔައީ ހެވެމުންނެވެ. ޓީޝާޓް ފުދޭވަރަކަށް މައްޗަށް ހިއްލާލަމުން އަނގަ ފޮރުވާލައިގެން އިނދެ ލޫކް ހުނެވެ.

”ވަޓް.. ރިއަލީ“ މޭޒުގައި ބޯ އެޅި ގޮތައް މޭޒުގައި ރުއާނާ ބޯ ތަޅަން ފެށިއެވެ. ލަދުން ގޮސް މުޅި ކުއްޖާގެ ގައިން ހީބިހި ނަގަމުންދިޔައެވެ.

”އިޓްސް އޯކޭ އޭ.. ލެޓްމީ ޓެލް ޔޫ ސަމްތިންގ އާފްޓާރ ދި ސެޝަން“ އީތަން ހެމުން ހެމުން ބުނެލިއެވެ. ރުއާނާ އުޅެމުން ދިޔަ ގޮތުން އީތަންއަށް ސިފަވެގެން ދިޔައީ ކުޑަކުއްޖެއްގެ ޅަ މިޒާޖެވެ. އެއޮތްގޮތައް އޮވެފައި ރުއާނާ ބޯ ހިތްލާލީ އިޒްވާ އަންނަ ހަބަރު އީތަން ދިނުމުންނެވެ.

އިޒްވާއައިސް ވަނުމުން ، ރީތި ހިނިތުންވުމަކުން ރުއާނާ ތުންފަތް ފަވާލިއެވެ. އެމަންޒަރު ފެނި އީތަންއާއި ލޫކް އިހުނަށް ވުރެން ގަދައަށް ދިޔައީ ހެމުންނެވެ. ދެމީހުންނަށް ލޯ އަޅާލަމުން ކްލާހުގެ ކިޔަވައިދެމުން ދިޔަ އެއްޗިހި އަޑުއެހުމަށް ރުއާނާ މައްސޫލްވިއެވެ.

ކްލާސްތައް ނިމިގެން ރުއާނާ ނުކުތޯ އީތަންއާއި އެކުގައެވެ. އިޒްވާއާއި ލޫކް ތަންކޮޅެއް ކުރިން ވަނީ ގޮހެވެ. ދެމީހުން މިސްރާބް ހުރީ ހޮސްޕިޓަލް ފްލޯތަކަށް ދިޔުމަށް ހުންނަ ލިފްޓްތަކާއި ދިމާލަށެވެ.

”ކީކޭތަ އީތަން އެގަޑީގަ ބުނަން އުޅުނީ“ ލިފްޓަށް އަރާފައި، ހަނދާންވެގެން ރުއާނާ އަހައިލިއެވެ. ފުރަތަމަ ވެސް އީތަން ހޭންފެށީއެވެ.

”އަސްލު ސާރ ވެސް ހުރީ ރުއާ އާއި ދިމާ ބަލަހައްޓައިގެން.. އެއީ އިޒްވާގެ ބޭބެ ކަން އެނގުނީމަ އޭނާ އިންދާ މިހެން ނުބުނީ..“

”ވަޓް..!“ ހައިރާންވެގެން ރުއާނާ އެހުނެވެ. އީތަން ލާނެތް ހިނިތުންވުމުގައި ހުރެ ބޯޖަހައިލިއެވެ.

”އެކަމަކު-“

”ކޮން އެކަމަކުއެއް.. ހަމަ އެންމެންނަށް ވެސް ފެންނާނެއޭ އެ މަންޒަރު އެހެންވެ އެހާ ވަރަކަށް އެހެވުނީ އަސްލު.. ޕްލަސް ރުއާގެ އިންޓްރޯ..ދެޓްވޯޒް ފަނީ މައި ގާލް.. އޯހް މައިގޯޑް ލިއަމް ސާރ ހަމަ ރަނގަޅަށް ވެސް ސްޕީޗްލެސް ވެފަ ހުރީ ހަހަހަހާ“

”ދެން އީތަން ހަނދާން ނުކޮށްދީބަ އެ ކަންތަކުގެ މަތިން.. ވަރަށް ލަދު ގަނެއްޖެ ސަހާދަތް“ ތުންފިއްތާލަމުން ރުއާނާ ދެލޯ އަޅާއިލިއެވެ.

”ޑޯންޓް ބީ.. ވީ ވިލް މީޓް ހިމް އަ ލޮޓް އިން ދި ފިއުޗާރ..ހަހްހާ“

”ވަޓް ޑޫ މީން“

”ލެޓްސް ދޯ..އެހާ އަވަހަށް  ސްޕޮއިލް ކުރަނިކޮން ތި ފޭސް އަށް އަރާ ފައިބާ ކުލަވަރު ނުފެނިދާނެ ހަހަހްހާ“ އޭރު ލިފްޓު ވެސް ހުއްޓުމާއި އެކު އީތަން ހެމުން ހެމުން ނުކުތެވެ. ރުއާނާ އަނގަ ހަދާލައިގެން ހުރެ އޭނާގެ ފަހަތުން ނުކުތެވެ.

ދެމީހުންނަށް ވެސް ފުރަތަމަ ދާން ޖެހުނީ ކޮންފަރެންސް ހޯލަށެވެ. ތަނަށް ވައިން އިރު ތިރީހަކަށް ކަށް ޑޮކްޓަރުން ތިއްބެވެ. އެއްބަޔަކު އަޅިކުލައިގެ ސްކްރަބް ތަކުގެ މަތިން ހުދު ކޯޓް އަޅާލައިގެން ތިބި އިރު އަނެއްބަޔަކު އާދައިގެ އަންނައުނުގެ މަތިން ހުދު ކޯޓު އަޅުވާލައިގެން ތިއްބެވެ.  އެންމެ ފަހަތު ބަރީގައި ތިބީ އަލަށް ހޮސްޕިޓަލާއި ގުޅުނު ޑޮކްޓަރުންނެވެ. އެތަނުން ރުއާނާގެ ނަން ޖަހާފައިވާ ގޮނޑީގައި އިށީންދެލިއެވެ. އީތަންގެ ގޮޑި ތަންކޮޅެއް ކުރީގައި އިނެވެ. ރުއާނާ ހޯދާލީ އިޒްވާއެވެ. އޭނާގެ ކައިރީގައި ތިބި ދެ އަންހެން ކުދިން ހީލާފައި ސަލާމަށް އަތް ދިއްކޮށްލުމުން ރުއާނާ ވެސް ސަލާމް ބަލައިގަނެ އެކުދިންނާއި ވާހަކަ ދައްކާލިއެވެ.

އިޒްވާ ނައިސް ލަސްވާން ފެށުމުން، ރުއާނާ ފޯނު ނެގީ އޭނާ ކޮބައިތޯ ގުޅާލުމުގެ ނިޔަތުގައެވެ. އެ ހިނދު ދޮރު ހުޅުވާލާފައި އިޒްވާއާއި ލޫކް އެތެރެއަށް ވަދެގެން އަންތަން ފެނި ހީލެވުނެވެ. ކަންދިމާކުރި ގޮތުން އިޒްވާގެ ގޮނޑި އިނީ އޭނާގާތުގައިއެވެ. ލޫކް ގޮސް އިށީނީ އީތަންގެ ގާތުގައެވެ.

”ސޮރީ ލަވް.. މި ލޫކްގެ އެއްޗެއް ގެއްލިގެން ތިރިއަށް ގޮސްފައި މިއައީ“ އިޒްވާ އައިސް އިށީން ހިނދު، ސްޓޭޖް މައްޗަށް އެރީ ކީވާން އެވެ. އޭނާ އެރުމަށްފަހު ޕްރޮޖެކްޓާރ އޮންކޮށްލަމުން ޕްރެޒެންޓޭޝަނެއް އަޅުވާލިއެވެ.

”ގުޑް އީވްނިންގ އެވްރީވަން..އަމް ޑޮކްޓާރ ކީވާން، ސީނިއާރ ކޮންސަލްޓަންޓް އެޓް ޒެންޓްރަސް މެޑިކަލް ޔުނިވާސިޓީ އެންޑް ދި އެސިސްޓެންޓް ހެޑް އޮފް ނިއުރޮލޮޖީ ޑިޕާރޓްމަންޓް.. ފުރަތަމަ ވެސް ހުރިހާ ކުދިންގެ ގާތުން ނިހާޔަތައް މާފަށް އެދެން .. އިއްޔެއަކީ ޓްރާންސްފާރ ވި ކުދިންގެ ފަސްޓް ޑޭއަށް ވެފައި މި ބައްދަލްވުން މިއީ އަސްލު އިއްޔެއަށް ތާވަލް ކުރެވުނު ބައްދަލް ވުމެއް.. ނަމަވެސް ދިމާވި ކުޑަ ކަމާކާއި ގުޅިގެން މިމީޓިން އިއްޔެ ކެންސަލް ކޮށްލަން ޖެހުމުން ނިހާޔަތައް މާފަށް އެދެން.. ހާޒިރްވި ހުރިހާ ކުދިންނަށް މަރްހާބާ ..އަޅުގަނޑަށް ހަވާލުވެފައިވަނީ ޒެންޓްރަސްގެ ތައާރަފް އެއް ދިނުމަށް.. އެއަށް ފަހު އަޅުގަނޑުމެންގެ ސީއީއޯ އަދި ނިއުރޮލޮޖީ ޑިޕާޓްމަންޓްގެ ހެޑް ހުރިހާ ކުދިންނާއި ބައްދަލް ކުރުން އިންނާނެ..ސޯ ލެޓްސް ބިގިން“ ކީވާން ވާހަކަ ދައްކަމުން ދިޔައިރު މޫނުމަތިން ފެންނަން ހުރީ ހަރުދަނާ ކަމެވެ. ގަދަ ނޫކުލައިގެ ގަމީސް ކަޅު ޖީންސްގެ ދަށައް ޖަހާފައިވާ އިރު އޭގެ މަތިން ހުދު ކޯޓު ލާފައިވާގޮތުން ނުހަނު ސްމާޓެވެ. އޭނާގެ ޝަހުސިއްޔަތު ވަރުގަދަކަން ހާމަވެއެވެ. ތަފްސީލާއި އެކު ޒެންޓްރަސް ހޮސްޕިޓާލާއި ޔުނީވާސިޓީގެ ހުރިހާ މައުލޫމާތެއް ކިޔައިދެމުން ދިޔައި ނުހަނު ފުރިހަމަ ކަމާއި އެކުއެވެ.

ޝައުގުވެރިކަމާއި އެކު ރުއާނާ އިނީ ކީވާން ދައްކަމުން ދިޔަ ހުރިހާ ވާހަކައެއް އަޑު އަހާށެވެ. އެހެން އިންދާ ކޮންފަރެންސް ހޯލުގެ އެންމެ ފަހަތައް އިންނަ ދޮރު ހުޅުވުނު އަޑު އިވިގެން ރުއާނާ ބަލައިލިއެވެ. އޭރު ވެސް އެހެން ކުދިން ތިބީ ކީވާންއަށް ނަޒަރު ހުއްޓާއިގެން ކަމުން އެ އަޑަށް ސަމާލްކަމެއް ނުދެވުނެވެ.

ރުއާނާ ބަލަހައްޓައިގެން އިންދާ، ވަދެގެން އައީ ލިއަމްއެވެ. އަޅިކުލައިގެން ސްކްރަބްގެ މަތިން ހުދުކުލައިގެ ޑޮކްޓާރ ކޯޓުގައި ވައިން އިރު އޭނާގެ ފިރިހެންވަންތަ  ހިނގުމުގައި އައިސް އިށީނީ ރުއާނާ އިން ބަރީގައި، އިޒްވާގެ މަގަތުގައި އިން ހުސްގޮނޑީގައެވެ. ޕްރޮޖެކްޓާރ އެޅުވުމަށްޓަކައި ތަނުގައިވާ ގިނަ ލައިޓްތައް ނިއްވާލާފައި ވުމުން ވެރިވެފައިވަނީ ފަނޑު އަލިކަމެކެވެ.

”ސޯ ހޭންޑްސަމް“ އެ އަލިކަމުގައިވެސް ލިއަމްގެ ރީތި ސޫރަ ފެނުނު ހިނދު ރުއާނާގެ ނަފްސަށް އިވޭ ވަރަށް ބުނެވުނެވެ. އެ ރީތިކަމަށް ގެއްލި އިންނަ އޭނާގެ ޒަމީރް އެދި ގޮވަމުންދިޔައެވެ. ގޮނޑީގައި އިށީންނަމުން ރުއާނާގެ މޫނަށް ލިއަމް ބަލައިލި ނަޒަރު ފެނި،ރުއާނާގެ ހިތް ހީވާ ފިނިވެގެން ގޮސް ރޫޅިގެންފާނެހެންނެވެ. ލިއަމްއާއި ދިމާ މާގިނައިން ބަލަން ނުކެރިގެން ރުއާނަ އިސްޖަހައިލި އެވެ. ހެނދުނު ހާދިސާ ހަނދާންވެ ލަދު ގަންނަނީއެވެ.

”ދޮންބޭ.. ކޮބާ ނިމުނީތަ“ ލިއަމްގެ ގައިގާ ބައްދާލަމުން އިޒްވާ ލޯބިގޮތަކަށް ހީލިއެވެ. އިޒްވާގެ ނޭފަތުގައި ހިފާލަމުން ލިއަމް ބޯޖަހައިލިއެވެ.

”ބަލާބަ އެ ކިވީ ހުރިލެއް ސީރިއަސްކަން.. ނުވެސް ގުޅޭ..“

”ހެހެ އިޒީ ދައްކާ ވާހަކަ… ސީރިއަސް ވާން ޖެހޭ ތަންތާގަ ސީރިއަސް ވާން ވެސް ވާނެތާ.. ބައި ދި ވޭ.. ޔެން އާއި ލޫތްގެ ވެޑިންގ އެނިވާސަރީ މާދަމާ ދޯ.. މާދަމާ ދޮންބެ އެބައޮތް ހަތަރު ސާޖަރީ.. އައި ޑޯންޓް ތިންގް އައި ކެން މޭކް އިޓް“

”ނޯ ވޭ ދޮންބެ.. އޭރުން ޔެން ތިއްތަ އާއި ލޫތް ތިއްތި، އިޒީއާއި ދިމާލަށް އަންނާނީ ކިހިނެތް.. ދޭ ވިލް ކިލް މީ އިންސްޓެޑް“ އިޒްވާ ދެލޯ އަޅާލައިގެން އިނެވެ. ލިއަމް އެންމެ ފަހުން ބޯޖަހައިލީ ލޫތް ވަދެގެން އަންނަތަން ފެނިއެވެ. ލޫތް އައިސް އިށީނީ  އެމީހުންގެ ފަހަތު ބަރިން އެދިމާލަށް ވާހެން އިން ގޮނޑީގައެވެ.

”އައްދޭ.. ކާޑިއޯ ޑިޕާޓްމަންޓް މީޓިންގް އެއް ނޫނޭ މިއީ.. މަގު އޮޅިގެންތަ ތިވަދެވުނީ“ ލިއަމް ދިމާކޮށްލުމުން ލޫތް ފެށީ ހޭށެވެ. އިޒްވާގާތައް ވެސް ހިނިއައެވެ. ލޫތް  މަސައްކަތް ކުރަނީ ކާޑިއޮލޮޖިސްޓް ޑިޕާޓްމަންގައެވެ.

”ދެން ހަމަ ބަލާނުލާ ނުހުރެވިގެން މިއައީ.. ކިހިނެތްވީތަ ދޮންބެ މިއަދު އިންޓްރޯ ވާން ތިއުޅެނީ.. ފުރަތަމަ އެޑީ ބުނީމަ ނުކުރަން ގަބޫލެއް ވެސް.. އެހެންވެ ހަމަ މިއައީ ލޮލުން ދެކި އަތުން ހިފަން.. ފޯރ ދި ފަސްޓް ޓައިމް އެވާރ ހަމަ މިގޮތައް ސްޓޭޖްއަކަށް އަރަން އެއްބަސް ތިވީ.. ދޮންބެ ސީއީއޯ އަށް ވީ ފަހުން ވެސް ކިތައް ބެޗް ގޮސްފި….. ވައި ޓްޑޭ؟ ސަޑެންލީ ވައި؟ޑިޑް އައި މިސް ސަމްތިންގް؟“ ލިއަމްގެ ކޮނޑުގައި އޮޅުލައި ގަންނަމުން ލޫތް އެތައް ބައިވަރު ސުވާލްތަކެއް އެއްފަހަރާ ކޮށްލިއެވެ. އެހިނދު ލިއަމްއަށް ސިއްރު ނަޒަރެއް، އިސްޖެހިފައި އިން ރުއާނާގެ މޫނަށް ދެވުނެވެ. ދެވަނަ ފަހަރަށް ލޫތް އެހި ވަގުތު ވީ ކީވާން ވެސް ސްޕީޗް  ނިންމާލާފައި އޭނާއަށް ގޮވި ވަގުތަށެވެ.

”މީޓިން ފެށި ވަގުތު އަޅުގަނޑު ބުނެލާފައި ވާނީ ސީއީއޯ ބައްދަލްކުރާނެ ވާހަކަ.. ހަމަ ގައިމުވެސް ތިކުދިންނަށް އާ މޫނަކަށް ނުވާނެ.. ހީ އިޒް އަ ލީޑާރ، އަ ޑޮކްޓާރ އެންޑް އޯލްސޯ އަ ޕްރޮފެސާރ ޓޫ.. ޕްލީޒް ވެލްކަމް އަވާރ ސީއީއޯ އެންޑް ހެޑް އޮފް ދި ނިއުރޮލޮޖީ ޑިޕާރޓްމަންޓް.. ޑޮކްޓާރ ލިއަމް“ ކީވާންގެ އަޑާއިއެކު، މުޅި ތަނުގައި ގުގުމާލީ ހުރިހާ އެންމެންގެ އަތްތިލަ ބަޑިތަކުގެ އަޑުތަކުންނެވެ.

ލިއަމް އިންތަނުން ތެދުވެގެން ދިޔަ ހިނދު ރުއާނާއަށް ބަލަހައްޓައިގެން އިނދެވުނީ ދެލޯ ބޮޑުކޮށްލައިގެންނެވެ. އެއީ މުޅިން އާ ހަބަރެކެވެ. ލިއަމްއަކީ އެ ތަނުގެ ވެރިޔާ ކަމެއް އޭނާ ނުދެނެ ހުއްޓެވެ. ރުއާނާއަށް އަނގަމަތީގައި އަތް އެޅުނެވެ. އިޒްވާއަށް ބަލައިލި އިރު އޭނާ ލާނެތް ގޮތަކަށް ހެވިފައި ބަލަހައްޓާއިގެން އިނުމުން ނިތް އަރުވާލެވުނެވެ.

”އިޒީ އާރ ޔޫ ގައިޒް-“

”ޔެސް.. ޔެސް ޒެންޓްރަސް އިޒް މައި ގްރޭންޑް ފާދާރސް ހާރޓް..ހެހެހެ.. ބިފޯރ، މައި ފާދަރ އޯންޑް އިޓް.. އެންޑް ނައު ދޮންބެ އިޒް ދި ޗެއާރމަން އެންޑް ސީއީއޯ އޮފް ދި ކޮމްޕެނީ..  ހީ މޭ ލުކް ޔަންގް ބަޓް ހީ އިޒް ތާރޓީ އިޔާރޒް އޯލްޑް ހެހެ.. އެންޑް ފަހަތުގަ މި އިނީ އިޒީގެ އަންކަލްގެ ޓްވިންގެ ތެރެއިން އެލްޑެސްޓް.. މައި ތިއްތިބެ ..އެއީ ޑިރެކްޓާރ… އެންޑް އޭނާގެ ޓްވިން އެއީ ޕައިލެޓް އެއް.. ނޭމް އަކީ..ނޫ..ނޫހް“ އެންމެ ފަހު ދެ ޖުމްލަ ބުނެލި އިރު ހިސާބަކަށް އިޒްވާގެ އަޑު އައީ ކެނޑިގެންނެވެ. ނޫހްގެ ނަން ބުނުމަކީ ވެސް އިޒްވާއަށް ފަސޭހަކަމަކަށް ނުވިއެވެ. އެ މޫނުމައްޗަށް ވެރިވި އަސަރުތައް ފުހެލުމަށް އިޒްވާ ހީލިއެވެ.

އިޒްވާ ކިތަންމެ ވަރަކަށް ފޮރުވަން އުޅުނު ނަމަވެސް ނޫހުގެ ނަމާއި އެކު އެމޫނުން ފާޅުވި ތަފާތުތައް ރުއާނާއަށް ނަގައިގަނެވުނެވެ.  ލޫތްއާއި ނޫހްއަކީ އެއްމާބަނޑު ދެބެން ކަމުގައި ވަންޏާ ލޫތް އަށް ބޭބެ ގެ ނަމުން މުހާތަބުކޮށްފައި ނޫހްގެ ފުރިހަމަ ނަމުން އިޒްވާ އެބުނީ ކީއްވެބާއެވެ. ރުއާނާގެ ހިތުގައި ސުވާލް ތައް އުފެދުނެވެ. އިޒްވާގެ މޫނުމަތިން އެ ފެނުނު ކުލަވަރުތައް އެކަނިވެސް ރުއާނާއަށް އެއްޗެއް ހީވިއެވެ. ނަމަވެސް ރުއާނާ ހީލާފައި އިތުރަށް ސުވާލެއް ކުރާކަށް ނުހެދިއެވެ.

”ޑޮކްޓަރުންގެ މަސައްކަތަކީ ފަސޭހަ މަސައްކަތްތަކެއް ނޫން.. ނުނިދާ ހޭލާ އެތައް ވަގުތުތަކެއް އެބަ ޖެހޭ ހުސްކުރަން ޕޭޝަންޓުންނަށް..  އެ މީހުންގެ ފުރާނަ ސަލާމަތް ކުރުމަށްޓަކައި ކޮންމެފަދަ ގުރުބާނީއެއް ވެސް ވާންޖެހިދާނެ.. ކުއްލިއަކަށް އެއްފަހަރާ ބައިވަރު އެމެޖެންސީ ކޭސްތައް  އަތުވެދާނެ.. އަދި ކުރިމަތި ލާންޖެހޭނެ ސިޓުއޭޝަންސް ދެޓް ޓެސްޓް ބޯތް ، ޔުއާރ ސްކިލްސް އެންޑް ކެރެކްޓާރ. .ތީގެ ތެރޭގައި އެބައުޅޭ ތިންމަހަށް ފަހު އަދި ހަމަހަށް ފަހު ޑޮކްޓަރީ ހުވާ ކުރެވޭނެ ކުދިން.. އެއަށްފަހު ރަސްމީކޮން ނިއުރޮލޮޖިސްޓުންނަށް ވެގެންދާނީ.. ވަޒީފާގެ މާހައުލަށް އަލަށް ނުކުމަތް ކުދިން ވިސްނަންވާނެ ތަޖުރިބާ ނުކުރެވޭ އެތައް ކަމަކާއި ދެން ކުރިމަތިލާން ޖެހޭނެ ކަން.. ތޭންކިއު ފޯރ ގިވިން މީ ދިސް ޗާންސް.. އޯލް ދި  ބެސްޓް ޑޮކްޓާރސް…“އަމިއްލަ  ތައާރަފަކަށް ފަހު، ލިއަމް ވާހަކަދެއްކިއެވެ.

އެގޮތައް ވާހަކަ އެ ދެއްކީ މުޅީން އަލަށެވެ. އޭނާގެ އަޑު ހުރީ ކިހިނެތް ބާއޭ ވެސް ހީވިއެވެ. ލިއަމް ބަލައިލި އިރު ރުއާނާ އިސްޖަހައިގެން އިންއިރު ބާކީ ތިބި ހުރިހާ އަންހެން ވެރިން ކަޅި ޖަހާ ނުލަމުން ދިޔަ ގޮތުން ވަކިން ބޮޑަށް ލިއަމްއަށް އުނދަގޫ ވަމުން ދިޔައެވެ.  ”މި އަންހެން ވެރިން ބަލާ ގޮތުން ހީވަނީ ގަނޑުފުށް ޖަހައިގެން މިތަނަށް އަރާ ހުރެވޭހެން.. ނޫނީ މޭކަޕް ކުރެވިފަ ހުރިހެން“  ހިތައް އަރަމުން ދިޔަ އެއްޗިހިނުން ލިއަމް ގާތައް ހިނިވެސްއައެވެ. ކީވާން ދޭތެރެއަކުން ފޯނު ދިއްކޮށްލާ ގޮތުން ފޮޓޯ ނަގަނީކަން ވިސްނި ލިއަމްއަށް ދެފަރާތައް ބޯ ހޫރުވާލެވުނެވެ. އޭނާގެ ވާހަކަ ނިންމާލާފައި އިތުރަށް މަޑުކުރަން ނުހަދާ ހޯލުން ނުކުތެވެ.

ބައްދަލުވުން ނިމި ތަނުގެ ތެރެއިން ނުކުމެވުނީ ގަޑި އިރެއް ވާން އުޅެނިކޮންނެވެ. އިޒްވާއާއިއެކު ރުއާނާ މިސްރާބު ޖެހީ އެމީހުންގެ ކޮޓަރިއަށެވެ. އިއްތިފާގުން ރުއާނާއަށް ލައްވާލީ އިޒްވާގެ ކޮޓަރިއެވެ.

”ވޯހް އަމް ސޯ ހެޕީ ދެމީހުން ވަން ރޫމް ޝެއާރ ކުރަން ލިބުނީމަ.. އަދި އެބަ އިން  ދޯ އިތުރު މޭޒެއް.. މީ ކާކުގެ“ ރުއާނާ އަހައިލިއެވެ. އެއާއެކު އިޒްވާގެ މޫނަށް ވައްތަރެއް ޖައްސާލަމުން އޭނަގެ މޭޒުގެ ގާތުގައި ހުރިއަށް ގޮނޑިއަށް ޖެހިގަތެވެ.

”ލާ .. ތި ވާހަކަ ނާހާ..އަޑު އެހިންތަ ޑޮކްޓާރ މައުވާގެ ވާޙަކަ.. ދެޓް ބިޗ*..އެއީ އޭނާގެ މޭޒު.. ދޮންބެ ފަހަތުން އަޅުވާލައިގެން އުޅޭ އަންހެނެއް އެއީ.. ދޮންބެއާއި ދިމާލަށް، އޭނާ ހުއްޓާ ބަލައިލެވުނަސް އެ ދިޔައީ އެމީހެއްގެ ޒަމާން.. މިދޭތެރެއިން ނާރސް ކުއްޖަކު ނޭފަތް ވެސް ފަޅާލި.. އިތުރު އަންހެން ޑޮކްޓާރ އެއް ސިޑީން ވައްޓާލާ އޭނާގެ ފައި ބިންދާލި.. އޭނައަށް ވާނިންގް ވެސް ދީ ދީ އެޗް އާރ މީހުން ވެސް ވަރުބަލި ވެފަ ކަންނޭގެ އެތިބެނީ..ސަސްޕެންޑް ކުރެވުނު އަދަދެއް ވެސް ނޭނގޭ..އެކަމަކު އޭނާގެ ބައްޕައަކީ ބޯޑް މެމްބާރ އެއް .. އެހެންވެ ކާފަ ބުނެގެން އޭނާ ކަނޑާ ނުލާ މިތާގަ ބަހައްޓާފަ އެހުރީ… އޭނާއަށް މަޑުން ހުންނަން ކެރޭނީ ހަމައެކަނި އަހަރެންގެ ކައިރީގަ.. އެހެންވެ މި ރޫމްގަ ބައިންދަނީ“ އިޒްވާ އެއް ނޭވާއިން ކިޔައިދިން ވާހަކަތަކުން ރުއާނާ ދެލޯ ބޮޑުވިއެވެ.  ހިސާބަކަށް ކަންބޮޑުވިއެވެ. ޑޮކްޓާރ މައުވާގެ ވާހަކަ އަދި އިފައި ނެތަސް މިހާ އަވަހަށް އޭނާ ދެކެ ރުއާނާ ބިރުގަނެއްޖެއެވެ.

”އާރ ޔޫ ސީރިއަސް؟ އެކަމަކު އެހާ ބޮޑަށް ޑޮކްޓާރ މައުޥާ ގޯހިއްޔާ ސައިކޭޓްރިސްޓެއް ގާތައް ފޮނުވާ ނުލާ އެހުރީ ކީއްވެތަ.. މި ދެން ޖޯކެއްނު ލިއަމްއާއި ދިމާ އޮޅިގެން ބަލައިލިއޭ ކިޔާފަ މީހުންނަށް އަނިޔާ ކުރާ ހިސާބަށް ދާކަށް ނުވެ އެންނު.. ވަޓް އަ ސައިކޯ-“

”އެކްސް ކިއުޒް މީ.. ޔޫ ލިލް ބިޗ*“ ރުއާނާ ޖުމްލައަށް ފަހު ރަނގަޅާށް ހަމަނުޖެހެވެނީސް ދޮރު ކައިރިން އިވުނީ އަންހެނެއްގެ އަޑެވެ. ރުއާނާ ބަލައިލި އިރު ކަކުލުން މައްޗަށް ހުރި ހެދުންކޮޅެއްގެ މަތިން ހުދުކުލައިގެ ޑޮކްޓަރު ކޯޓު ލައިގެން ހުރި، ޒުވާން އަންހެން ކުއްޖެކެވެ. ގަދައަށް މޭކަޕްކޮށްފައި ހުރި އިރު ތުންފަތް ވެސް ހުރީ ރަތްކަން ގަދަ ލިޕްސްޓިކަކުން ފަވާލާފައެވެ. ފަންފަން ބްލޮންޑް އިސްތަށިކޮޅު އުނަގަނޑާއި ހަމައަށް ހުއްޓެވެ. އަރައިގެން ހުރި ހައިހީލްގައި އޭނާގެ އަސްލު އިސްކޮޅަށް ވުރެން ދިގުކަމުން ރުއާނާއާއި އިޒްވާ  އަރަނީ އޭނާގެ ކޮނޑާއި ހިސާބަށެވެ. އޭނާގެ ދޮން މޫނުމަތީގައި ވަނީ އަލިފާން ފަދަ ރުޅިވެރިކަމެކެވެ. ދެބުމަ ގޮއްޖަހާލައިގެން ހުރެ  އައިސް ހުއްޓުނީ ސީދާ ރުއާނާގެ ކުރިމަތީގައެވެ.

ބަލާކަށް ނުހުރެ ރުއާނާގެ މޫނުމަތީގައި އަތުން ގައިހުރި ބާރެއްލާފައި ޖަހާލިއެވެ.

”މަންމާ…އާހްހް“ވީތަދުން ރުއާނާއަށް ތޫލި އަޑަކުން ހަލޭއްލަވައިގަނެވުނު ހިނދު، ހީވީ މުޅިތަން އެނބުރިގަތް ދިޔަހެންނެވެ. އޭނާއަށް މޭޒުގައި އަތް އަޅުވާ ނުލެވުނު ނަމަ އަރިއަޅާލީހެވެ.

އިޒްވާ ބަލާކަށް ނުހުރެ މޭޒުގެ މަތިން ފުންމައިގެން ގޮސް މައުވާގެ މޫނަމައްޗަށް ދެތިން އެތިފަހަރު އަރުވާލިއެވެ. މައުވާ ހުރިތަނަށް ވެއްޓުނު އިރުވެސް ގަދަ ހަދާލަމުން ދިމާ ކޮށްލީ އިޒްވާގެ ގައިގާ ވެސް ޖަހާށެވެ. ނަމަވެސް އިޒްވާ އެއަށް ވުރެން ހުޝިޔާރެވެ.

”ކަލޭ މޮޔަވީތަ.. ލަދު ކޮބާތަ.. ރުއާނާ އެބުނީ ހެޔޮކޮން.. ހަމަ ރަނގަޅާށް ވެސް ސައިކޭޓްރިސްޓެއްގެ ގާތައް ފޮނުވަން ވެފަ ތިހުރީ.. ދެން އެންމެ ފަހަރަކު އޭނާގެ ގައިގާ ޖެހިޔަސް ދުނިޔެ ދައްކާލާނަން.. ހަނދާން ކުރާތި“ އިޒްވާގެ އިންޒާރުން ވެސް ބިރުގަތީ ކަންނޭގެއެވެ.  އިތުރަކަށް ރުއާނާގެ ގައިގާ ޖަހާކަށް ނޫޅެއެވެ. ނަމަވެސް އޭނާގެ ދެލޮލުން ހީވީ އަލިފާން ކަނި ބުރަމުން ދިޔަ ހެންނެވެ.
”ހޫމް މީ ދޯ އެބުނާ ރުއާނާ އަކީ.. މަ އެއްޗެއް ކިޔައިގެންނެއް ވެސް ނޫން އެފާޑަށް ދެންމެ ކަލޭތި ވާހަކަ ދެއްކީ.. އަދި ނުވިތާކަށް މޮޅު ސްޓަންޓެއް ޖައްސައިގެން ލިއަމް ލިބޭނެ ކަމަށް ދޯ އުޅެގަތީ..އެއީ އަހަރެންގެ މީހެއް.. ދެވަނަ ފަހަރަށް ލިއަމް އާއި  ހެދި އުޅޭތަން ފެނިއްޖެނަމަ ހީ ކުރޭ އެއީ ކަލޭ މިތަނުގަ ހޭދަކުރެވޭނެ އެންމެ ފަހު ދުވަހޭ“ މައުވާ ނުކުމެގެން ދިޔައީ އިޒްވާއާއި ދިމާލަށް އެއްޗެއް ބުނަން ނުކެރޭނެތީ ރުއާނާއަށް  އިންޒާރު ދީފައެވެ. އިޒްވާ ޖެހި ކޯމަތީގައި އަތް އަޅާއިގެން ހުރެ މައުވާ ނުކުމެގަތް ދިޔަ ގޮތުން، އިޒްވާ ފެށި ހޭށެވެ.

އޭރުވެސް ކޯމަތިން ނަގަމުން ދިޔަ ދިލަ އެއްކޮން ނުކެނޑޭތީ ރުއާނާ ހުރީ ހޭންވެސް ނުކެރިފައެވެ. މައުވާ ކޮންމެފަދަ އެއްޗެއް ކިޔާފައި ދިޔަނަމަވެސް ރުއާނާ އެއަކަށް ރައްދެއް ދޭކަށް ނުހަދައެވެ.  މައުވާގެ އަތުގެ ނިޝާން ރީތިކޮން އަރާފައިވާއިރު އެހިސާބުވަނީ ނުހަނު ބޮޑަށް ރަތްވެފައެވެ.

”އަޅޭ މިއޮތް ކޮލެއް.. އެ އިބިލީސް އުޅުން މަ ހިތައް އަރާ މައުވާގެ ގައިން ފިލާނީ ކޮން ދުވަހަކުން ބާއޭ.. މަ ހުރީމަ ފަހުން އަތްލަން ނުކެރުނީ އެ.. ހަހް.. ހިނގާ ގަނޑުފެން އަޅަން“

“ ނޫނޭ އިޓްސް ފައިން ނައު..އެހާ ބޮޑަކަށް ތަދެއް ނުވޭ މިހާރު.. މާސްކަކުން މޫނު ފޮރުވާލީމަ އޯކޭ ވާނެ ކަންނޭގެ.. އެކަމަކު އިޒީ ހާދަ ޕްރޯ އޭ.. މިއޮތް އުސް މޭޒުމަތިން ވިއްޔަ ފުންމާލައިގެން ގޮސް އޭނާގެ މޫނުމަތީގަ ތިޔަ ތަޅައިގަތީ.. ވޯހް.. އިމްޕްރެސިވް“ ރުއާނާގެ ކޯތާފަތްމަތިން ދިލަ ނެގިނަމަވެސް، އިޒްވާގެ ކުރިމަތީގައި ބެލީ ސަކަޜާތް ޖަހާލެވޭތޯއެވެ. އެހެންނޫނީ އިޒްވާ އަނެއްކާ ވެސް ގޮސް މައުވާ ހުރިތާކުން ހޯދައިގެން އޭނާގެ ގައިގާ ޖަހާފާނެއެވެ.އެ ކަންތައް އެހާ ބޮޑުކަމަކަށް ހަދާކަށް ރުއާނާ ބޭނުމެއް ނުވިއެވެ. އަމިއްލައަށް ވެސް ގޯހެއް ހެދިފައިވާކަން ރުއާނާއަށް އިޙްސާސްވެއެވެ.

އިޒްވާ ޖަހައިލީ ހިނިގަނޑެކެވެ. އިރުކޮޅަކު ވާޙަކަ ދައްކާލަން ތިބެފައި ދެމީހުންވެސް މަސައްކަތައްނުކުންނަން ތެދުވިއެވެ.

ޗޭންޖިން ރޫމަށް ވަދެ ރުއާނާއަށް ހާއްސަކުރެވިފައިވާ ބައިން އޭނާގެ އަލަމާރި ހުޅުވާލި ހިނދު އޭގައިވާ އަޅި ކުލައިގެ ސްކްރަބް ފެނި އޭގައި އަތް ކާއްތާލެވުނެވެ. ރުއާނާގެ ތުންފަތުގައި ދުވެލީ ލޯބިވެތި ހިނިތުންވުމެކެވެ. ލާފައި ހުރި ހެދުން ބޭލުމަށްފަހު ސްކްރަބް ލިއެވެ. އޭގެ މަތިން ހުދު ކުލައިގެ ޑޮކްޓާރު ކޯޓް ލައިގެން ނުކުތެވެ ކޯޓުގެ ޖީބުގައި އިނގިރޭސި ބަހުން ”ޑޮކްޓާރ ރުއާނާ“ ޖަހާފައި ވާތަން ފެނި ރުއާނާއަށް އެ ހީލުން ފުންވިއެވެ.

ތައްޔާރުވެވުމުން، މޭޒުމަތީގައި އޮތް އޭނާގެ ކާޑު ނަގާ ޖީބުގައި ހަރުކޮށްލަމުން، އޭނާގެ ފައިލް ނަގާ ތައްޔާރުވާން ވެލިއެވެ. އޭރު އިޒްވާ ވެސް ދާން ވެގެން ނުކުމަތެވެ.

ދެމީހުން އެކުގައިނުކުމެ އިޒްވާއާއި ވަކިވީ މުޅިން ދެ ފްލޯއަކަށް އެރުމަށެވެ. ރުއާނާ ލިފްޓަށް އަރައިގެން ގޮސް ވަން ފްލޯރގައި  ފުރަތަމައަށް ހުރި ނާސިންގް ސްޓޭޝަންއަށް ވަނެވެ. އޭނާ ގޮސް ހުއްޓުމާއި އެކު ތަނުގައި  އެވަގުތު ތިބި ނަރުސް ކުދިންކޮޅާއި ދެ ޑޮކްޓަރުން ހިތްހެޔޮ ކަމާއި އެކު ހިނިތުންވެލިއެވެ. އެއިން ކޮންމެ މީހަކުވެސް އަމިއްލަ އަށް ތައާރަފް ވެލިއެވެ.

”ޑޮކްޓަރ އަދްރެކް އެދިޔައީ ހަމަ ޑޮކްޓަރ ރުއާނާ އައުމުން އަންގާލާށޭ ބުނެފަ.. ވެއިޓް ލެޓް މި ކޯލް ހިމް“ އެތަނުން އެ ނަރުހަކު ކޯޑްލެސް ފޯނު ނަގާ ކަންފަތުގައި ޖަހާލިއެވެ.

”ހީ އިޒް ކަމިންގ“

”ތޭންކިއު ނާރސް ސެރާ.. ކެން އައި އާސްކް ސަމްތިންގް..މައުވާ ވޯކް ކުރަނީ މި ފްލޯގަ ތަ.. އޯރ ތިރީގަ އިންނަ ނިއުރޮލޮޖީ ޑިޕާޓްމަންޓްގަ ތަ..“ ސެރާ އަށް ޝުކުރު އަދާކޮށްފައި ރުއާނާ އަހާލިއެވެ. މައުވާގެ އޭނާ ބުނެލީ ފުދޭވަރަކަށް މަޑުންނެވެ. އެއާއި އެކު ސެރާ އާއި ގާތުގައި ތިބި މީހުން ދެލޯ  ބޮޑުކޮށްލާފައި ފަހަތް ބަލަން ފެށުމުން ރުއާނާ ވެސް ފަހަތް ބަލައިލިއެވެ.

”ޑެވިލްގެ ނަން ގަންނަ އިރު އައިސް މިހުންނަނީ ކުރިމަތީ.. ވަޓް ދަ“ އަމިއްލަ ނަފްސަށް އިޥޭވަރަށް ރުއާނާ ބުނެލިއިރު ދަތްތައް ކާރުވާ ގަނެވުނެވެ. މައުވާ ދެލޯ އަޅާލައިގެން ހުރެ ރުއާނާއަށް ބަލަމުން ދިޔަގޮތުން ހިތްދިރުވާލެވުނެވެ. އޭރު ވެސް މައުވާގެ މޫނުމަތީގައި އިޒްވާ ޖެހިތަންތަން ނުހަނު ބޮޑަށް ރަތް އަރާލާފައި ހުއްޓެވެ. ހޭން ބޭނުން ނުވިއަސް އެކަމާއި ހުރެ ރުއާނާ ދިޔައީ ބަނޑަށް ހެމުންނެވެ.

”ޑޮކްޓާރ ރުއާނާ..“ މާހައުލަށް ވެރިވެފައިވީ ހަމަހިމޭންކަން ނެތި ދިޔައީ އަދްރެކް އައިސް ގޮވާލުމުންނެވެ. އަވަހަށް މައުވާގެ ކުރިމަތިން ދާންވެގެން ރުއާނާ ދިޔައީ ކުޑަކޮން ދުވެލާފައެވެ.

***

ސާޖަރީތައް ނިންމާލުމަށްފަހު ލިއަމް ކޮޓަރިއަށް ވަންނަން އައި އިރު ހުރީ ހިސާބަކަށް ލޮޑުވެފައެވެ. މޭޒު ދަށުގައިވާ ގޮނޑީގެ ތެރެއަށް ޖެހިގަނެވުނު ގޮތައް ދެލޯ މަރާލެވުނެވެ. ޑިއުޓީ ވެސް ނިމިފައި ވީ ނަމަވެސް، މީހާކާއި ބައްދަލް ކޮށްލަން ގަޑިއެއް ބުނެފައިވާތީ ގެއަށްދެވޭ ކަށް ވެސް ނެތެވެ. އެ ގަޑިއަށް، ކޮންމެހެން ވެސް ނުކުންނަން އެބަޖެހެއެވެ. އެހެން އޮތްވާ ފޯނު ރިންގް ވާން ފެށުމުން ޖީބުން ފޯނު ނަގާ ހަލޯއޭ ބުނެލީ، ގުޅަނީ އިޒްވާކަން އެނގޭތީއެވެ.

”ދޮންބޭ.. ކާފަ ކައިރީގަ ބުނެގެން ވެސް ކަމެއް ކޮށްބަލަ މައުވާއަށް.. އެނގޭތަ އޭނަ މިއަދު ކުރިކަމެއް.. އެ މައުވާ މިއަދުވެސް އިޒީގެ ފްރެންޑަކަށް، ހައްގުން ކަމަކާއި ނުލާ އަނިޔާކޮށްފަ ގޮސް އެއުޅެނީ.. އިޒީ ވަކި މަޑުން ހުންނާނެތަ.. އޭނާ އެންމެ ފަހަރަކު ޖެހީ އެކަމަކު އިޒީ ޖެހިން ހަތަރު ފަހަރު.. މިވަރުން ދަންޏާ އޭނާގެ ސަބަބުން އިޒީ ކަންނޭގެ ގޮޅިއަށް ދާން ޖެހޭނީ“ ފުރަތަމަވެސް އަހަން ޖެހުނީ އިޒްވާގެ ޝަކުވާ ތަކެވެ. ލިއަމްގެ ގާތައް ހިނިއަންނަ ގޮތްވެފައި ހުރެ، މައުވާ ޖެހީ ކާކުގެ ގައިގާ ތޯ ސުވާލް ކުރިއެވެ.

”ރުއާ..ރުއާގެ ގައިގަ ޖެހީ“ އެ ހުރިހާ އިރު ލޯ މަރައިގެން އޮވެފައި ރުއާނާގެ ނަން އިވުނު ހިނދު ލިއަމް ދެލޯ ހުޅުވާލިއެވެ.

“ އަސްލު ވީ ގޮތަކީ…“ އިޒްވާ އެ ވާހަކަ ތަފްސީލާއި އެކު ކިޔައިދިނެވެ. އެހިނދު ލިއަމްގެ ނަފްސަށް ހިސާބަކަށް ރުޅިވެރިކަން ވަނެވެ. އިޒްވާގެ ވާހަކަ ތަކުން ރުއާނާއަށް  މިހާރު އެ މާހައުލު ރައްކާތެރި ނޫންކަން ލިއަމްއަށް އެނގުނެވެ. މައުވާގެ އުނދަގޫ ޖެހޭ އަންހެން ކުދިންނަށް ވާގޮތް އެއީ ލިއަމް އަލަކަށް ދުށްކަމެއް ނޫނެވެ.  އެކަމަކު އިތުރު ފިޔަވަޅެއް ނާޅާ އޭނާ މަޑުކޮށްލީ އިތުރަށް މައުވާގެ ފަރާތުން ކަމެއް ފެނޭތޯ ބެލުމަށް ހިތުލަމުންނެވެ.

”އިޒ-”އިޒްވާއަށް ޖަވާބްދޭން ހުޅުވާލި އަނގަ ލައްޕާލަން ޖެހުނީ ކޮޓަރިތެރެއަށް ވަދެގެންއައި ފިނިވައިރޯޅީގެ ސަބަބުންނެވެ. އޭނާގެ މޭޒުމަތިވާ ގަނޑުތައް ވެސް ކޮޓަރީގެ ތެރޭގައި އުދުހިގަތެވެ. މޭޒު އިންނަނީ ކުޑަދޮރާއި ދިމާލަށް ވާހެންނެވެ. އިޒްވާގެ ގާތުގައި މަޑުކޮށްލުމަށް ބުނެ، ގޮނޑިން ތެދުވެގެން ކުޑަދޮރުގެ ގާތައް ދިޔައިރު އެދިމާލުގެ ޓައިލްސް މައްޗަށް ވެއްޓިފައިވާ ކަޅުކުލައިގެ ވިދުމެއް ހުރި ދޫނިފަތެއް ފެނި ލިއަމްގެ މޫނުމަތީގައި ދުވެލީ ހިނިތުންވުމެކެވެ.

“ އިޒީ… ވިލް ކޯލް ޔޫ-“ ކުޑަދޮރުންބޭރު ބަލައިލި އިރު އެންމެ ތިރީގައި ކަޅުކުލައިގެ ހޫޑީ އެއްގައި ހުރި ޒުވާނާ ފެނި އިޒްވާގެ ކޯލް ކަނޑާލަމުން އޭނާގެ ފޯނު ތިރިކޮށްލިއެވެ. ލިއަމް ކުޑަދޮރުގެ މައްޗަށް އެރިއެވެ. އާދައިގެ މީހަކަށް އެތަނުގައި ހުންނައިރު ތިރިން އެކައްޗެއް ވެސް ނުފެންނާނެއެވެ. ނަމަވެސް އެންމެ ތިރީގައި ގަހެއްގެ ނިވަލުގައި ހުރި ޒުވާނާ އަތް ހޫރާލިތަން ވެސް ލިއަމްއަށް ރީތިކޮން ފެނުނެވެ.

އެ އުސް ކުޑަ ދޮރުގެ މަތިން ތިރިއަށް ލިއަމް ފުންމައިލިއެވެ. މަދު ސިކުންތުކޮޅެއްގެ ތެރޭގައި އޭނާ އައިސް ހުރީ އެ ޒުވާނާގެ ކުރިމަތީގައެވެ. އޭރު ލިއަމްގެ އަޅިކުލައިގެ ދެލޮލުގެ ކަޅީގެ ވަށައިގެން، ކްރިމްސަން ކުލައިން ވިދަމުންދިޔައެވެ.

”ލެޓްސް ގޯ ސަމްވެއާރ އެލްސް“ އެ ޒުވާނާގެ ބަރު އަޑުން އިއްވާލިއެވެ. އޭނާ އިޝާރާތް ކޮށްލީ، އިމާރާތުގެ ފުރަގަހަށެވެ. ލިއަމް ބޯޖަހައިލަމުން ދެފަރާތައް ނަޒަރު ހިންގާލީ ވަށައިގެން މީހަކު ވޭތޯއެވެ. ނަސީބަކުން މީހެއްގެ ހިލަމެއް ފެންނާކަށް ނެތެވެ. ހިތްހަމަޖެހިފައި ހުރެ ހަލުވިމިނުގައި ދެޒުވާނުން މިސްރާބު ޖެހި އެ ބޮޑު އިމާރާތުގެ ފުރަގަހަށެވެ. އާދައިގެ އިންސާނަކަށް އެ މަންޒަރުން ސިފަވެގެންދާނީ ޖެހިލި ވައިރޯޅިއެއް ފަދައިންނެވެ.

”ވަޓްސް ރޯންގް“

”ހީވާ ގޮތުން އެމީހުންނަށް ފަހްމެއް ވީ ކަންނޭގެ .. ދޭ އާރ އާފްޓާރ މީ.. އަހަރެންގެ ހަމައެކަނި އެދުމަކީ އާލިއާ ސަލާމަތް ކޮށްދިނުން.. އޭރުން ހަމަޖެހިގެން އަހަންނަށް، ލިއަމްއަށް އެހީ ވެވޭނީ..އާލިއާ އަކީ އަހަރެންގެ އާއިލާގަ ހަމައެކަނި ހުރި ފަރާތް.. އިޒްވާއަށް ގެއްލުމެއް ލިބެން ލިއަމް ނޭދޭނެ .. ހަމަ އެގޮތް އަހަންނަށް ވެސް ވާނީ“ އޭނާގެ ކޮންމެ ޖުމްލައަކާއި މެދު ލިއަމްއަށް ވިސްނާލަން ޖެހުނެވެ.

”ޒައްޔާނު… ހާސް ނުޥޭ.. އަހަރެން ހުއްޓަ އާލިއާ އަކަށް އެއްވެސް ކަމެއް ނުވާނެ.. އެ ޔަގީންކަން އަހަރެން ދެން.. “ ޒައްޔާނުގެ ކޮނޑުގައި  ޖަހާލަމުން ލިއަމް ޔަގީންކަން ދިނެވެ. ޒައްޔާނުގެ އެ ކަންބޮޑުވުން ލިއަމްއަށް އިޙްސާސްވެއެވެ. ހޫޑީގެ ހުޑް ބޮލުގައި އަޅުވާލެވިފައިވީ ގޮތުން އޭނާގެ މޫނު ނުފެނެއެވެ. ނަމަވެސް ލިއަމްގެ ޖުމްލަތަކުން ޒައްޔާންއަށް ހަމަޖެހުން ލިބިއްޖެކަން އެ އަޑުން އެކަނިވެސް ލިއަމްއަށް އިޙްސާސްވިއެވެ.

”އެމީހުންގެ ތެރެއިން ބަޔަކު އަހަރެން ގޭގައި ނެތް ވަގުތު ބަލާފަ އާލިއާ އާއި ދެފަހަރަށް ދިމާ ކޮށްލައިފި މިހާރު.. އެކަމުގެ ސަބަބުން އޭނާ އެވަނީ ބޮޑު ބިރުވެރިކަމެއްގެ ތެރޭގަ..“ ޒައްޔާން ބުނެލިއެވެ.

”އެހެން ހަބަރެއް ވެސް ދޭން އައީ“

”ކޮން ހަބަރެއް“ ލިއަމް އަހާލިއެވެ. އެހިނދު ޒައްޔާން ދެކޮޅު ބަލައިލިއެވެ.

”ލިއަމްގެ ޕޭރެންޓްސް ގެއްލުނު ދުވަހު ދިމާވި އަންހެންކުއްޖާގެ ބާތްމާކް އެއް އުނަގަނޑުން ދުށްވާހަކަ ބުނީމެންނު.. އޭގެ ފަހުން އެކަހަލަ އެއްވެސް ނިޝާނެއް ފެނުންތަ އެއްވެސް ގޮތަކުން އެއްވެސް އަންހެން ކުއްޖެއްގެ ފަރާތުން“

”ނޫން ނުފެނޭ.. ކިހިނެތް ފެންނާނީ ވެސް“ ލިއަމް ދެފަރާތައް ބޯ ހޫރުވާލަމުން ބުނެލިއެވެ.

“ ވަރަށް ދުވަސްކޮށްފަ އެހިސާބަށް މީގެ މަހެއް ކުރިން ދާން ފެށީ..އެދުވަހުން ފެށިގެން އެތަނުގެ ދޮރު ފެންނަ ހިސާބު އެކަމަކު ތަންކޮޅެއް ދުރުގައި އެދިމާލަށް ބަލަން ހުރޭ  ފިރިހެނެއް.. .. ފުރަތަމަ ދެދުވަހު ފެނުނީމަ މާ ބޮޑު އެއްޗެއް ހިތަކަށް ނާރާ..އެކަމަކު ތިންވަނަ ދުވަހު ފެނުނީމަ ޝައްކެއް ވީ..އޭގެ ފަހުން ކޮންމެ ދުވަހަކު އޭނާ އެތާގަ ހުރޭ.. ފަހަތުން ފެންނާތީ އޭނާގެ މޫނެއް ނުފެނޭ .. ހަމައެކަނި  އެނގެނީ…“

ޒައްޔާނުގެ ވާހަކައިން ލިއަމްއަށް ހައިރާންކަމެއް ލިބުނެވެ. ޒައްޔާނު ގާތު އިތުރަށް ކިޔައިދިނުމަށް ލިއަމް އެދުނެވެ.

”އޭނާ ދުވަހަކު ވެސް އެގޭގެ އެތެރެއަކަށް ވަންނާކަށް ނޫޅޭ.. މިއަދު ކުއްލިއަކަށް ބަލަން ހުރެފައި އޭނާ އެތެރެއަށް ވަނީ..އަހަންނަށް ވެސް ލިބުނީ ހައިރާންކަމެއް.. އޭނާގެ ފަސްފަހަތުން އެތެރެއަށް ވަދެ، އޭނައަށް ،އަހަރެން ނުފެންނާނެ ގޮތައް ހުރީ.. އެހާއިރު ވަންދެން އަހަރެން ހީކުރީ އާދައިގެ އިންސާނެއް ކަމަށް .. އެކަމަކު ލިބުނީ ހަމަ ޝޮކެއް.. އެއީ އާދައިގެ އިންސާނެއް ނަމަ، އެގޮތައް އަހަރެން ހުއްޓަ އޭނާގެ ލޮލަކަށް، އަހަންނެއް ނުފެންނާނެ..   އެކަމަކު ކުއްލިއަކަށް ހެދި ނުހެދި އެއް ނޭނގޭ މުޅިތަން ހުދު ދުމަކުން ފުސްވާން ފެށީ.. އައި ނައި ތަނެއް ވެސް ނޭނގޭ..ފެނުނީ ކުރިމަތިން އޭނާ ފާޅުވިތަން.. އަނެއްކާ އޭނާގެ މޫނުން ދެލޯ ނޫން އިތުރު ތަނެއް ނުފެނޭ… އޭނަ ބުނީ ތިއީ ކާކު ހޭ.. އަހަންނަކަށް ޖަވާބެއް ނުދެވުނު..އެހެން ހުއްޓާ އޭނާ ގޮސްފި..ވަރަށް ދިގުކޮން ހުރީ.. އުނަގަނޑާއި ހަމައަށް އަރާ ހުދުހުދު އިސްތަށިގަނޑެއް އަދި މަޑު ފެހިކުލައިގެ ދެކަޅި..ޔާސިރްބެ  މެން ހާ ކަންނޭގެ އޭނާ ވާނީ“ ޒައްޔާން ކިޔައިދިނެވެ. އޭރު ލިއަމްގެ މޫނުން ހައިރާންކަމާއި ނުތަނަސްކަމުގެ އަސަރުތައް އިންތިހާއަށް ފެންނަން ވިއެވެ.

”ލިއަމް ޔަގީނުން ވެސް އެއީ އަހަރެމެންގެ ތެރެއިން މީހެއް ނޫން.. އެކަމަކު އަހަރެމެން ނަސްލުގެ މީހެއް“

”އަހަރެމެންގެ ނަސްލު؟ އެކަމަކު ހައު އިޒް އިޓް ޕޮސިބަލް؟ އޭނާއަށް ޒައްޔާންގެ އަސްލު ސޫރަ ފެންނާނެ ތަ.“. ނޫނީ ތި ގޮތައް މޫނު ފޮރުވައިގެންތަ ހުންނާނީ؟“

”ހީ ސޯ މައި ފޭސް..އެކަމަކު މިބުނާހެން މާސްކެއް އަޅާފަ ހުރީމަ އޭނާގެ މޫނު އަހަރެން ނުދެކެން.. އެދެލޯ އެކަނި ފެންނަނީ“ ދެރަ ވެލާފައި ޒައްޔާނު ބުނެލިއެވެ. އެއާއި އެކު ލިއަމްއަށް ދެލޯ މަރާލެވުނެވެ. ހާސްކަމުގެ ނޭވާތައް ހުއްޓުމެއް ނެތި ބޭރުކުރެވެމުން ދާންފެށުނެވެ. ޒައްޔާނުގެ ސޫރައިން އެކަނިވެސް އޭނާ އެއީ ކާކުގެ ދަރިއެއް ކަން އެނގޭނެއެވެ. އޭރުން އޭނާއަށް ހަމަލާއެއް ދޭކަށް ވެސް އެއިން މީހަކު ފަހަކަށް ނުޖެހޭނެއެވެ.

ޒައްޔާނުގެ މައިންބަފައިންނާއި އާއިލާއަކީ އެ ބިމުގެ ވެރިންގެ ކައިރީގައި ކުށްވެރިންނެވެ. ނަމަވެސް އޭގައި ޒައްޔާންއާއި އޭނާގެ ކޮއްކޮގެ އެއްވެސް ކުށެއް ނެތެވެ. އަދި އެއާއިލާގެ ވެސް ކުށެއް ނެތެވެ. ޒައްޔާންގެ މަންމަ ހަނާގެ ފުރާނަ އެމީހުން ދުއްވާލާފައި ވާއިރު،އެއާއިލާގެ ބާކީ ތިބި މެމްބަރުންނާއި އެދެމީހުން އެއީ އެމީހުންގެ ޝިކާރައެވެ. ދުޝްމަނުން އެމީހުންގެ ފުރާނައަށް ދަހިވެތިވެފައި ތިބޭތާ އެތައް ދުވަހެއް ވެއްޖެއެވެ. އޭރުން ސުރެން ޒައްޔާނު އަދި އާލިއާއަށް މަޖުބޫރުވެފައި ވަނީ ފޮރުވިގެންއުޅޭށެވެ.

ދެން ކަންތައް ކުރާނެ ގޮތަކާއިމެދު ވާހަކަ ދެއްކުމަށް އިރުކޮޅަކު ތިބުމަށްފަހު ޒައްޔާން ދާން ވެގެން ނުކުތުމުން ލިއަމްވެސް އެތެރެއަށް ވަންނަން ދިޔައެވެ.  އޭރުވެސް އޭނާގެ ސިކުނޑީގައި ގުގުމާލާފައިވަނީ އެކުވެރިއާ ދެއްކި ވާހަކަ ތަކާއި މެދުގައެވެ. އެތައް ފަހަރު ޒައްޔާނު ގާތު ދެން އެ ކަންތަކާއި ނޫޅެން ބުނަން ހިތައް އެރިއެވެ. އޭނާ ބުނި ނަމަވެސް ޒައްޔާނު ނުހުއްޓާނެކަން ވެސް ލިއަމް ދަނެއެވެ. އާލިއާއާއި ޒައްޔާނުގެ މަންމަގެ ފުރާނަ އެހާ އަނިޔާވެރި ގޮތަކަށް ދިޔުމުން އޭނާ ހުއްޓާނުލާނެ ވާހަކަ އެތައް ފަހަރު ވަނީ ބުނެފައެވެ. ސިކުނޑީގައި ހައިޖާނު ގަނޑު ބޮޑުވެފައިވާ ވަރުން އެތެރެއަށް ގޮސް ގޮސްފައިވެސް ، އޭނާފާރުގައި ލެގިލަމުން ޖީބުގައި އޮތް ސިނގިރޭޓް ފޮށި ނެގިއެވެ. ސިނގިރޭޓް ރޯކޮށްލަމުން ތުމުގައި ޖަހާލިއެވެ. އެތެރެއަށް ދަމާލަމުން ދުން ބުރުވާލިއެވެ. ހާސްވެ މީހާ ނުތަވަސްކަމާއި މާޔޫސީކަމުގެ ދުނިޔެއަށް ފީނައިގަނެވުމުން ހަމަޖެހުން ލިބޭތޯ މަސައްކަތް ކުރެވެނީ ގިނަފަހަރު އެހެންނެވެ.

”އާހްހް.. ކިހިނެތް ބާ ހަނދާންވީ.. ދޮންތަ އަށް ގުޅާލަންވީ ކަންނޭގެ..“ވަރަށް ވިސްނަން ހުރެފައި ލިއަމް ގުޅާލީ ޔޫމީންއަށެވެ.

”ދޮންތާ ކަމަކު އޭ.. ގޭގަ ކުއްޖަކު ބަހައްޓާލަ ދެވިދާނެތަ…“ ޔޫމީން ހަލޯ ބުނުމުން ފުރަތަމަ ވެސް އޭނާ އަހައިލިއެވެ. އެހިނދު  ހައިރާންވެފައި ހުރެމެ ސުވާލްތައް އޮއްސާލިއެވެ.

”ދަރިފުޅާ.. އަންހެން ކުއްޖެކޭ؟ ކޮން ކުއްޖެއް އެއީ؟ ތިތަނުގެ ޑޮކްޓަރެއްތަ.. ؟ތިތަނުން ދިމާވި ކުއްޖެއްތަ؟. އިޒް ދެޓް ޔުއާރ ޖީ އެފް؟ “ ޔޫމީންގެ ސުވާލްތައް އިވި ލިއަމްއަށް ދެލޯ މަރާލެވުނެވެ. ހިނިވެސް އައެވެ. ނަމަވެސް ބޮލުގައި ރިއްސައިގަނެފައި ހުރުމުން އެހާ ގިނަ ވާހަކަ ތަކެއް ދައްކަން އެވަގުތު ލިއަމް ބޭނުމެއް ނުވިއެވެ.

“ އިޓްސް އާލިއާ.. ކީވާންގެ އެކްސް.. “ އެންމެ ފަހުން ލިއަމް ބުނެލިއެވެ. އެހިނދު ޔޫމީންގެ ބަސް ހުއްޓުނެވެ.

***

(ނުނިމޭ)