އެޕިސޯޑު 20
“އީވާ” އީވާ ފުރިހަމަ ކުރަމުން އައި ޖުމްލަ ހުއްޓުމަކަށް އައީ މުޅިތަން ގުޑައިގެން ދާ ފަދަ ބާރު އަޑަކުން އޭނާއަށް ގޮވާލި އަޑާއި އެކު ވަރުހުރި އެތިފަހަރެއް އޭނާގެ މޫނު މައްޗަށް އަރައިގެން ދިޔުމުންނެވެ. ވީ ތަދުން މޫނުމައްޗަށް އެނބުރުން އަރައިގެން ދިޔަ އިރު ދެފައިވެސް ބިންމަތީގާ ހަރުލާ ގޮތެއް ނުވިއެވެ. މޫނުމަތީގައި އަތް އަޅުވާލައިގެން ހުރެ ލަސްލަހުން މޫނު ހިއްލާލި އިރު ރުޅި އައިސް ރަތްވެފައި އެހުރީ އަޒީޒެވެ. އޭނާގެ ކައިރީގައި ދިނާޔާ ހުރި އިރު އޭނާގެ މޫނުމަތިން ވެސް ފެންނަނީ އިންތިހާ ދަރަޖައިގެ ރުޅިވެރިކަމެވެ.
***
“އީވާ..ތީތަ މަންމަ ދަރިފުޅަށް ދަސްކޮށްދިން ތަރުބިއްޔަތަކީ.. މުއްސަނދިކަމަކީ ވަގުތީ އުފަލެއް…މާދަމާ ވެސް މި މުއްސަނދިކަމުގެ ބަދަލުގަ ފަޤީރު ނިކަމެތިންގެ ގޮތުގަ އުޅެން ޖެހިދާނެ.. މި މުއްސަނދިކަން ހޯދުނީ ބައްޕަގެ މަސައްކަތުން..އެކަމަކު އެކަމުގައި އަޒީޒް ބޮޑާ ނުވާހާ މިންވަރަށް އީވާ ބޮޑާ ވެއްޖެ…އަހަންނަށް އަދި މި އެނގުނީ ރަމް މެން މިގެއަށް ނާންނަ ސަބަބު..ކިހާ ބޮޑުކަމެއް އީވާ ތި އަހަރެމެންނަށް ކުރިމަތި ކުރުވީ.. ނޭނގޭތަ އެއީ ކިހާ ގާތް ބައެއް ކަމެއް” އެނދުމައްޗަށް ޖެހިގަނެވުނު އިރު އޭނާ އިނީ ހަދާނެ ގޮތް ހުސްވެފައެވެ. ފަހަކަށް އައިސް ރަމްލާއާއި ޝާފިއު އެގެއަށް އައުން މަދުކަން އޭނާއަށް ވެސް އެގެއެވެ. ރަމްލާއަކީ އޭނާގެ ވަރަށް ގާތް އެކުވެރިއެކެވެ. ހާއްސަކޮން ޝާފިއު އާއި އަޒީޒްގެ އޮންނަނީ ވަރުގަދަ ގުޅުމެކެވެ. އަޒީޒް ވިޔަފާރި ފެށުމުގެ ކުރިންވެސް ޝާފިއުއާއި ދެމީހުން އެގުޅުން އެގޮތުގައި އޮވެއެވެ. އީވާ އެކުރި ކަމަކުން އޭނާ ނުހަނު ލަދުގަތެވެ.
“ކިހިނެތް އެމީހުންނާ ކުރިމަތިލާނީ ވެސް” ދިނާޔާ އަށް މަޑުމަޑުން ބުނެވުނެވެ. އޭނާ އަޒީޒްއާއި ދިމާ ބަލައިލި އިރު އަޒީޒްގެ މޫނުމަތީގައި ވަނީ ރުޅިވެރިކަމެވެ. މާޔޫސްކަމެވެ. އިތުރު އެއްޗެއް ނުބުނެ އަޒީޒް ހަރު ހިނގުމުގައި ހުރެ އެތަނުން ނުކުތެވެ. އޭނާގެ ފަހަތުން ދިނާޔާ ވެސް ނުކުންނަން ދަމުން އީވާއާއި ދިމަ ބަލައިލިއެވެ. އޭރުވެސް އިން ގޮތައް މޫނުގައި އަތް އަޅައިގެން އިނެވެ.
“އީވް ދެންވެސް އެއްޗެއް ވިސްނޭނެ ކަމަށް ހީކުރަން..އެހެން އިރަކުން މި ވާހަކަ ދައްކާނީދެން.. އާދޭ ނިދަން ޖައްސާލަން” ކިތަންމެ ވާހަކަ ދައްކަން ބޭނުންވެފައި ވީ ނަމަވެސް މިވަގުތު އެއްވެސް އެއްޗެއް ބުނުން ރަނގަޅެއް ނުވާނެކަން އަލާޜާ ދެނެގަތެވެ. އީވާގެ ރުޅި އޭނާއަށް އިޙްސާސްވީއެވެ.
“ދޮންތަ ނިދާ..އަހަރެން ދާނަން އަހަރެންގެ ރޫމަށް” އަލާރާއަށް އެއްޗެއް ބުނެވުމުގެ ކުރިން އީވާ ނުކުމެގެން ދިޔައެވެ.
“އޯހް ގޯޑް..އައިމް ސްކެއާރޑް ޓް ބީ އެލޯން” އެކަނި ހުންނަން އަލާރާ އަދިވެސް ޖެހިލުން ވެއެވެ. ނުފެނުނު ކަމުގައިވީ ނަމަވެސް އެހެން ހުރިހާ ހިއްސެއް ބަޜާބަރަށް މަސައްކަތް ކުރެއެވެ. މީހެއްގެ އަޑު އިވޭ ހިސާބެއްގައި ހުރެވޭތޯ އަބަދުވެސް ބަލައެވެ. އޭނާ އެކަނި ނުބަހައްޓުވަން އެހެން މީހުން ވެސް މަސައްކަތްކުރާކަން އޭނަ ދަނެއެވެ. ނަމަވެސް އީވާގެ ސަބަބުން އެންމެ ފަހުން އޭނާއަށް ޖެހުނީ އެކަނި އޮންނާށެވެ.
“އާހް..މިވީގޮތުން އެކަނި ވެސް ނިދާ ހަދާލަން ކެރެން އެބަ ޖެހޭ..މި އީވްގަނޑު ވެސް ހާދަ ބޭބީއޭ…އަދި ރަނގަޅު އެއްޗެއް ބުނީމަ ވެސް އެހެރީ ވީވަރު.. ކުރިން ގައިމު އެއީ އެހެން އުޅުނު ކުއްޖެއް ވެސް ނޫން…އަދި ދެތިން ފަހަރު ނަސޭހަތް ދެނިކޮން ވިސްނޭނެ..މްމް ދެން ޖައްސާކަންވީ ކަންނޭގެ..” އަމިއްލަ ނަފްސަށް އިވޭވަރަށް އަލާރާ ވާހަކަ ދައްކަމުން އެނދު ފަޑީގައި ހިފަހައްޓަލައިގެން ހުރެ މަޑުމަޑުން އެނދުގައި އިށީނެވެ. އެނދުގައި އޮށޯވެލި ނަމަވެސް ދެލޮލުގައި ނިދީގެ އެއްވެސް އަސަރެއް ނެތެވެ. ހަމަޖެހެން މަސައްކަތް ކުރިނަމަވެސް އެކަނިވެރިކަން އިޙްސާސްވާ ވަރުން ހިތުގައި ބިރުވެރިކަން ވެސް ދިޔައީ އިންތިޙާއަށް އުފެދެމުންނެވެ.
“ޔަގީން މަންމަ އަންނާނެ އެކަނި އޮތް ވާހަކަ ބުނެފިއްޔާ.. ފަތިހު ހޭލާ ގޮތައް މަންމަގެ ބިޒީ ޝެޑިއުލް ފަށަންވާއިރަށް ރެސްޓް ވެސް ބޭނުންވާނެ.. ސޯ މަންމައަށް އުނދަގު ކުރާކަށް ވެސް ނުކެރޭނެ.. ދެންންން ވަޓް ޓް ޑޫ…އަމް ޓޫ ސްކެއާޑް” ކަންނެޔޮ ބާލީހުގައި ދެއަތުން ބާރަށް ބައްދައިގަނެގެން އޮތް އިރު ކިރިޔާ ވެސް އަޑެއް އިވޭތޯ އޭނާ އޮތީ ކަންފަތް ދިއްކޮށްގެންނެވެ. އެހެން އޮތްވަ ޒެވިއަލްގެ މަތިން ހަނދާންވިއެވެ.
“އީވް ކަންތަކޭ ޒެވް ވެސް ހުރީސް އެހެން ނޫންނަމަ..ހު-” ހުއްޓުމެއް ނެތި އަމިއްލަ ނަފްސަށް އިވޭވަރަށް އަޑުލަމުން ދިޔަ އަލާރާއަށް ސިހުމެއް ލިބުނީ ބެލްކޮނީގެ ތެރެއިން އިވިގެން ދިޔަ އަޑުންނެވެ. މީހަކު ފުންމާލި ކަހަލަ އަޑެވެ. މަޑުމަޑުން އިވިލި ނަމަވެސް އިވިދާނެ އަޑަކަށް ސަމާލުކަން ދީގެން އޮތްވަރުން އޭނާއަށް ފަހުމްވީއެވެ. މުޅި ކުއްޖާ ދާހިތްލައިގަތެވެ. ބިރުންގޮސް މާނޭވާ ލެވެންފެށިއެވެ.
އެނދުން ތެދުވެވުން އިރެއް ވެސް އަލާރާއަށް ރެއަކާނުލިއެވެ. އަތްވެސް ހުރަސް ނުކޮށްލާ ދުއްވައިގަތުމުން އެކިތަންތާގައި ލައިގަންނަމުން ކަހަލަ ގޮތަކަށް ދޮރާއި ހިސާބަށް އޭނާއަށް ދެވުނެވެ. އޭރު ބެލްކޮނިން މީހެއްގެ ފިޔަވަޅުއަޑު އިވެމުންދިޔައެވެ. އަލާރާ އަޑުން އަޑުނަގާ ހަޅޭއްލަވައިގަތީ ކޮޓަރީގެ ދޮރުން ނުކުމެވުމުންނެވެ. އޭރު ކޮޓަރިތެރޭގައި ހުރި މީހަކު ކޮޓަރިތެރެއަށް ވަދެއްޖެއެވެ.
ކޮޓަރި އާއި ލިވިންގްރޫމުގައި ހިނގާ އުޅުނަސް އެހިސާބުގައި އޭނާއަށް އުޅެން ނޭނގޭތީ ކުރިއަށްދާނީ ވެސް ކިހިނެތްހެއްޔެވެ. އެއްފަރާތެއްގައި ސިޑި ހުންނައިރު ކުރިއަށް ފިޔަވަޅެއް އެޅޭކަށްވެސް ނެތެވެ. ކަރު ފަޅައިގެން ދާހާ ބާރަށް އަލާރާ ހަޅޭއްލެވިއެވެ. ރޮވެމުންދިޔައިރު މޫނުމަތިން ބިރުގަނެފައިވާ ވަރު ހާމަވެއެވެ.
“އަލާ ދައްތާ…ދައްތާ…” އެހެން ހުއްޓާ ކުއްލިއަކަށް ދުވެފައި އައި ލިއާނާގެ އަޑު ދުރުން އިވިގެން ހުރިދިމާލަށް އަލާރާއަށް ތިރިވެވުނެވެ. ލެވެމުން ދިޔަ އަވަސް ނޭވާތައް ހަމައަކަށް އަޅުވާލުމަށް މޭގައި އަތް ޖައްސާލި އިރު ހޯސްލާފާއި ދެލޮލުން ކަރުނަތައް ފައިބަމުން ދިޔައެވެ. އޭރު ކޮޓަރި ތެރޭގައި ހުރި މީހާ އަވަސް ފިޔަވަޅު ތަކެއްގައި ބެލްކޮންޏާއި ދިމާލަށް ދިޔަ އަޑު އަލާރާއަށް އިވުނެވެ. ހުރި ދިމާލަށް ތިރިވެވުނު އިރު ރޮވެމުން ދިޔަ އަޑު އަނގައިން ވެސް ބޭރުވަމުން ދިޔައެވެ.
“ކިހިނެތް ވީ… ދައްތާ ކިހިނެތް ވީ” ދުވެލާފާއި އައި ލިއާނާ ހުރީ މާނޭވާ ލެވިފައެވެ. ފުރަތަމަ ވެސް އަލާރާ ރޯތަން ފެނި އޭނާގެ ހިތައް ވަދެފައިވި ބިރުވެރިކަން ދެގުނަ ވިއެވެ.
“ލި..ލިއާ..މީހަކު.. ބަލާލަބަ ބެލްކޮނީ..މީހަކު ހުރިތޯ…އަވަސް އަ” އަލާރާގެ ޖުމްލަ ނުނިކުމެވެނީ ލިއާނާ ދުވެފައި މިސްރާބު ޖެހީ ބެލްކޮނީއަށެވެ. ލިއާނާ ދިޔައިރު ބެލްކޮނީގައި އެއްވެސް ހިލަމެއް ވާކަށް ނެތެވެ. ދުރުދުރަށް ދާންދެން ވެސް ފެންނަނީ ސެކިއުރިޓީންނެވެ.
“ދައްތާ އެއްވެސް ހިލަމެއް ނެތް މިތާކު..އެކަނި ހުންނަން ކެރޭނެތަ… އެބަ އަންނަން ސެކިއުރިޓީންގެ ގާތައް ގޮސްލާފަ…” އަލާރާ ބޯޖަހާލިތަން ފެނި ލިއާނާ ދާނ ހިނގައިގަތެވެ.
“ލިއާ..މީހަކު އެހިޔަސް އިހަށް ނުބުނެދީ މަޑުކޮށްލާ މިކަންތައް..އިތުރު މީހަކަށް އެނގިއްޖެޔާ މުޅި ގޭތެރެ ހަލަބޮލި ވެދާނެ..އަދި ހީވަނީ އެމީހަކު އަތުވާނެހެން ..އެކޮޅުގަ ސެކިއުރިޓީން ތިބިއްޔާ މީހެއްގެ ހިލަމެއް ނުވެ މިގެއިން ނުކުންނަން ފުދޭވަރަކަށް ވަގުތު ނަގާނެ..އެންޑު ބީ ކެއާރފުލް” ވިސްނުންތެރިކަމާއެކު އަލާރާ ބުނެލި އަޑަށް ލިއާނާވެސް ވިސްނާލުމަށް ފަހު ބޯޖަހައިލިއެވެ. އެންމެ ސިކުންތެއް ވެސް ލަސް ނުކޮށް ދިޔައެވެ.
ލިއާނާ ބޭރަށް ނުކުމައިން ތަން ފެނިގެން އެވަގުތު ތިބި ސެކިއުރިޓީންގެ އެންމެ އިސް މީހަކަށް ހުރި ނަވާޒް އޭނާގެ ގާތައް އައިސް ސުވާލްކުރިއެވެ.
“މްމްމް.. ފިނިކޮށްލަން މި ނުކުތީ..”ލިއާނާގެ ޖަވާބު އިވިފައި އެހެންހޭ ބުނެ އޭނާ ވެސް އިތުރު ސުވާލެއް ނުކޮށް ދިޔައެވެ. ލިއާނާ ހިނގަމުން ގޮސް މުޅި ގޮތިތެރެ ހެން ބެލުނު އިރު ގޭގައި ގާޑު ނުކުރާ އެންމެ ތަންކޮޅެއް ވެސް ނެތެވެ. ހުރިހާ ދިމާލެއްގައިވެސް ސެކިއުރިޓީން ވިއެވެ. ހިސާބަކަށް ލިއާނާ ހައިރާން ވާގޮތްވިއެވެ.
“ވަޓް ދަ…ގޭތެރޭ މިހާ މީހުން ތިބި އިރު އޭނާ ކިހިނެތް އެ ވަނީ އެ ކޮޓަރިއަށް.. މިތާކު ނެތޭ ފާރުމަތިން ވެސް ފުންމާލެވޭނެ ގޮތެއް…މުޅި ގޯތި ތެރެ އެއްކޮން ބެލިއްޖެ.. އަލާ ދައްތަ ބުނިހެން އަދި ނުކުމެގެން އޭނާއަށް ފިލޭނެހޭ ޓައިމް އެއް ވެސް ނުލިބޭ …މިހާ ގިނަ މީހުން ތިބި އިރު ހިސާބަކަށް ވަގުތު ވެސް ބޭނުންވާނެ.. މްމްމްމް އެހެންވީމަ އަދި ބަލާލަން ވީ ..މިގޭތެރޭގަ ވާނެހެން ހީވަނީ” ލިއާނާ އަނެއްކާ ވެސް ފެށީ މުޅި ގޯތި ތެރެ ފާސް ކުރުމުގެ މަސައްކަތެވެ. މުޅި ކުއްޖާގެ ގައިން ދާހިތްލާ ފޯވެފައިވީ އިރު ވަރުބަލި ކަމެއް ވެސް އިޙްސާސް ކުރެވެމުންދިޔައެވެ. ނަމަވެސް ހިތްވަރު ދޫކޮށްލާކަށް ބޭނުމެއް ނުވިއެވެ.
“އާހްހް ދެވަނަ ފަހަރަށް ބަލާ ނިމުނީ..އަދި އެބަ އިންބަ ނުބެލޭ ތަންކޮޅެއް” ވެފައި ހުރި ވަރުބަލި ކަމާއި އެކު ލިއާނާއަށް އުނަގަނޑުގައި އަތް އަޅުވާލެވުނެވެ. ނިތުގައި ވިދަމުން ދިޔަ ދާ ތިކިތައް ފުހެލަމުން އަނެއްކާ ވެސް ހިނގައިގަތެވެ.
“މްމްމް..އޭންން..ސްވިމިންގް ޕޫލް އޭރިއާ..ދެވަނަ ފަހަރަށް ބެލި އިރު ވެސް އެތަނެއް ނުބެލޭ ދޯ” ކުއްލިއަކަށް ނުބެލޭ ހިސާބެއް އޮތްކަން ހަނދާންވިއެވެ. އެންމެ ސިކުންތެއް ވެސް ލަސްނުކޮށް ލިއާނާ މިސްރާބު ޖެހީ އެހިސާބަށް ދިއުމަށެވެ.
އެހިސާބުގައި އެއްވެސް ސެކިއުރިޓީ މީހަކު ފެންނާކަށް ނެތެވެ. ފަތާ ފެންގަނޑުގެ ކައިރީގައިވާ ބަގީޗާއާއި އީސްޓަން ބަޑްގެ ގަސްތާކުގެ ތެރޭގައިވާ ގާޑެން ލައިޓްތަކުން އޮރެންޖާއި ރީނދުލުގެ އެކި ކުލަތަކުގެ އަލިތައް ތަނަށް ފެތުރިފައިވާ އިރު ހިތްގައިމް ގޮތެއް ހުއްޓެވެ. ފަތާފެންގަނޑުން ވެސް މީހެއްގެ ހިލަމެއް ނުވާތީ ދެން މިސްރާބު ޖެހީ ބަގީޗާއަށެވެ. އެތަނަށް ވަންނަން ދިޔައިރު ފުދޭވަރަކަށް ހިތުގައި ބިރުވެރިކަމެއް އުފެދިގެން ދިޔައެވެ. އެހެން ހިސާބުތަކަށް ވުރެން އެތާގައި ހުރި އަލިކަން ފަނޑެވެ.
“ގާޑެން ހާދަ އަނދިރި ކޮށްލައިގެން މިއުޅެނީ މިރޭ .. ސޯ ސްޓްރޭންޖް…އަނެއްކާ…އަނެއްކާ އެމީހާ ފިލަންވެގެން މިތަނަށް ވަނީބާ… ” ހިތްބިރުގަނެފައި ހުރި ލިއާނާ އިތުރަށް ސިހުނީ ގަސްތަކުގެ ތެރެއިން އެންމެ ބިއްދޮށަށް ހުރި ފިނިފެންމާ ގަސްބޮނޑި ތެޅިލި އަޑެވެ. ފުރަތަމަ ފަހަރަށް ހީވިގޮތެއް ކަމަށް ހީކޮށްގެން ހުއްޓާ ދެވަނަ ފަހަރަށް ފެނުނީ އެދިމާލުން ކަޅުކުލައިގެ އަންނައުނުން ފޮރުވިގެން ހުރި މީހަކު ނުކުމެގެން އައިތަނެވެ. ލިއާނާގެ ދެލޯ ބޮޑުވެގެން ދިޔައެވެ. ލިބުނު ކުއްލި ސިހުމުގައި އަޑުގެ ނެތްތަނެއް ހަޅޭއްލަވައި ނުގަނެވުނީ ކިރިއާއެވެ.
ގަނެފައި ހުރި ބިރު ކަނޑުވާލާފައި ލިއާނާ ކުރިއަށް ދިއައީ އެއި ކާކުތޯ ބަލަން ކޮންމެހެން ވެސް ބޭނުންވެފައި ހުރުމުންނެވެ. “ނިކަން ދޭބަލަ.. ބަލާ ނަން މިރޭ މީ ކާކު ތޯ.. މިގޭގެ މީހުންނަށް އަނިޔާ ވެރިވަމުންދުވާ އިރު މީނަގެ ބޭނުމެއް ވެސް އޮންނަން ވާނެ އެންނު… ” އެއްފަރާތަކަށް ވެއްޓިފައި އޮތް ގާބުރިއެއް ނަގާ އަތައް ހެޔޮވަރު ކޮށްލައިގެން ހުރެ އެމީހާއާއި ދިމާލަށް ދުއްވައިގަތެވެ. އެ މީހަކަށް ހަރަކާތެއް ކުރެވުމުގެ ކުރިން އަތުގައި އޮތް ގާބުރި ލިއާނާ އަމާޒުކޮށްލި އޭނާގެ ބޮލަށެވެ. އެއާއެކު ތަދުވި ވަރުން އޭނާ އަޑެއް ލައްވާލިއެވެ.
“ކަލޭ އަށް މިކަމުގެ ހަސްކާ ދައްކާލާނަން އެނގޭ..” ބޮލުގައި އަތް އަޅާއިގެން ހުރެ އޭނާ މިސްރާބުޖެހީ އެތަނުން ދުވެ ފިލާށޭވެ. އޭނާގެ އަޑު އިވުނު ހިނދު ފުދޭވަރަކަށް ދަންނަކަމެއް އެއަޑުގައި ހުރިހެން ލިއާނާއަށް ހީވިއެވެ. ނަމަވެސް އެކަމާ ވިސްނާކަށް އެވަގުތު އޭނާއަކަށް ނޫޅެވުނެވެ. އޭނާ ދުއްވައިގަތުމުން ލިއާނާ އެއަށް ވުރެން ހުށިޔާރެވެ. ބާރަކަށް އޭނައާއި ދިމާލަށް އައެވެ.
“ކަލޭ ދައްކަން ބޭނުންވާ ހަސްކާ އެއް ހަމަ ދައްކަން ވީ..މަށެއް ނުގަނޭ ކަލޭ ދެކެ ބިރެއް… ކަލޭގެ މޫނު ބަލާފަ މިތަނުން މަދާނީ…ޕޮލިހަށް ވެސް ގުޅާފަ ހަވާލު ވެސް ކުރާނަން.. ތިހެން ދޭ އިންޒާރަކަށް ގުޑާނެ މީހެއް ނޫން މަ މީ… ދައްކާ މޫނު” ލިއާނާ ހިފައިގަތީ އޭނާ ލާފައި ހުރި ގަމީޙުގެ ގިރުވާނުގައެވެ. ނިއްކުރިން ފައިބަމުން ލޭތަކުން އޭނާ ހުރީ ތަތްތެޅިފައެވެ.
ލިއާނާގެ އަތް ނައްޓުވާލަން އޭނާއަކަށް މާ ބޮޑުކަމަކަށް ނުވިއެވެ. ބޮޑު ފިރިހެނެއްގެ ކައިރިން ނާޒުކު އަންހެންކުއްޖަކަށް ފަސޭހައިން ކާމިޔާބު ލިބޭނެހެއްޔެވެ. ލިއާނާގެ އަތް ފޮޅުވާލުމަށް ފަހު ދުރަށް ހޫރައިލި ގޮތައް ޖެހުނީ ތިރީގައި އަތުރާފައިހުރި ގާތަކުގެ މައްޗަށެވެ. ދެފަޔަށް ވީ ތަދުން ލޮލުން ފެން އައިއެވެ.
“މަންމާ..ދޮންބޭ…މީހެކޭ” އެހިސާބުން މީހެއްގެ އެހީއަށް އެދެން އޭނާއަށް މަޖުބޫރުވިއެވެ. ބާރަށް ހަޅޭއްލަވަމުން ދިޔައެވެ. ހަދާނެ ގޮތް ހުސްވެގެން އެމީހަކު ދެފަރާތައް އެނބުރޭތަން ފެނުމުން ލިއާނާ ނުލަފާ ހިންޏެއް ހީލައިގެން އިނެވެ.
އަނެއްކާ ވެސް އިންތަނުން ތެދުވެ ކުރިން އޭނާ ޒަހަމްކޮށްލި ގާގަނޑު ދުރުގައި އޮތްތަން ފެނިގެން ދާން ދުއްވައިގައިން ހިނދު ފަހަތުން އައި މީހަކު ބާރުހުރި އެއްޗަކުން ލިއާނާގެ ބޮލަށް އަރުވާލި ހަމަލާއިން ހުރިދިމާލަށް ވެއްޓުނެވެ.
***
ނުނިދިގެން ދެފަރާތައް އެނބުރި އެނބުރި އޮތް އަރްކާން އެންމެ ފަހުން ތިރިއަށް ދިޔައީ ކޮފީއެއް ބޯލަން ބޭރަށް ނުކުމެލުމުގެ ބޭނުމުގައެވެ. ކަޅު ހޫޑީއާއި ސޯޓެއްގައި ހުރިއިރު ތަފާތުގޮތެއް ހުރިނަމަވެސް އެ ރީތިކަމަކަށް ބަދަލެއް ނާދެއެވެ. ތިރިއަށް އައި އަރްކާންގެ ލޮލުގައި އެންމެ ފުރަތަމަވެސް އަޅާއިގަތީ ހުޅުވާފައިވާ ގޭގެ ބޮޑު ދޮރެވެ. ކޮފީއެއް ހަދާލައިގެން އޭނާ ބޭރަށް ނުކުތެވެ.
“ނަވާޒް.. ދޮރު ހުޅުވާފަ މިހުރީ ކިހިނެތް ވީ” އަރްކާން ފެނިގެން ކައިރިއަށް ހުއްޓުނު ނަވާޒްގެ ގާތު އޭނާ އަހައިލިއެވެ.
“ލިއާ ވެއްޖެ ބޭރުގަ… ފިނިކޮށްލަން ވެގެން ނުކުމެއޭ ބުނީ” ނަވާޒް ކިޔައިދިނުމުން އަރްކާންއަށް ނިއްއަރުވާލެވުނެވެ. ދުނިޔެ މައްޗަށް އެންމެ ވައިރޯޅި އެއް ވެސް ނުވާއިރު ގޭގެ ކޮޓަރިއަށް މާ ފިނިވާނެ ކަން ގައިމެވެ. އޭނާ ގާތައް ހިނިވެސް އައެވެ.
“ކިހާ ފިންޏެއް ވާނެ.. ނަވާޒްމެން ވެސް ތި ތިބީ ވާ ފިނިން ދާހިއްލާ ގަނެފަ” އަރްކާންގެ ޖުމްލަ އިވި ނުހޭން ހުއްޓާވެސް ނަވާޒްގެ ގާތައް ހިނިއައެވެ.
“ކޮބާ މަންނޫން އާއި ރަސަލް..އެމީހުން އޮފް ދުވަހެއް ދޯ..” ކޮފީ ތަށި ތުބުގައި ޖަހައިލަމުން ހިނގައިގެން އަރްކާން އަށް ހުއްޓުން އެރީ ބަގީޗާއާއި ދިމާލުން ފުރޭނިގެން އައިހަޅޭކެއްގެ އަޑަކުންނެވެ. އަރްކާން އަށް ބަލައިލެވުނީ ނަވާޒްއާއި ދިމާލެވެ.
“ލިއާ..” ކުއްލިއަކަށް ނަވާޒް ބުނެލުމާއި އެކު އަތުގައި ހުރި ކޮފީތަށި ވެސް ދޫކޮށްލުމަށްފަހު އަރްކާން އެދިމާލަށް ދުއްވައިގަތެވެ. އޭނާގެ ފަހަތުން ނަވާޒް އާއި ދެތިން ގާޑުން ދިޔައެވެ.
ބަގީޗާގެ ތެރެއަށް ވައިން އަރްކާންގެ ލޮލުގައި އެންމެ ފުރަތަމަ ވެސް އަޅައިގަތީ ތިރިއަށް ވެއްޓިފައި އޮތް ލިއާނާއެވެ. އޭނާގެ ކައިރީގައި ހުރި ލޭތަން ފެނި އަރްކާންގެ މެޔަށް ގުޑުން އަރައިގެން ދިޔައެވެ.
“ލިއާނާ..އޭތް..ލިއާ..ލޯ ހުޅުވަބަލަ..އަހަރެން ބިރު ނުގަންނުވާ ބަލަ ލިއާ..” ލިއާނާގެ ކައިރިއަށް ޖެހިގަނެވުނު އިރު އެމޫނުކޮޅު ފެނި އަރްކާންގެ ހީވީ ތޫނު ހަންޖަރެއް ހަރާލިހެންނެވެ. ކިރިޔަ ކިރިޔާ ދެލޯ ހުޅުވުން އިރު އަނެއްކާ ވެސް ލިއާނާގެ ދެލޯ މެރުނެވެ. ކޮންމެވެސް އެއްޗެއް ބުނަންވެގެން ދެ ތުންފަތް ހަރަކާތް ކޮށްލި ނަމަވެސް ހަށިގަނޑުގައި ވަރެއް ނެތުމުން އެކަން ކާމިޔާބު ވާގޮތެއް ނުވިއެވެ.
“ޝޫޝްޝް..މި ގެންދަނީ ގެޔަށް..ހޭންގިން ދެއާރ..” އިތުރަށް މަޑުނުކޮށް އަތްދަނޑިމައްޗަށް އުފުލާލައިގެން ދުވެލާފައި އަރްކާން ވަނީ ގެޔަށެވެ. ލިވިންގްރޫމު ސޯފާގައި ލިއާނާ ބާއްވާލުމަށްފަހު ނަވާޒު ގެނަ ފެންތައްޓަކުން ފެންފޮދެއް ލިއާނާގެ މޫނުގައި ހާކާލިއެވެ.
“އަރްކާން އަހަންނަށް ހީވަނީ ލިއާގެ ބޯ ފަޅައިގެން ގޮސްފަ ހެން..ޒެވް އަށް ގުޅާފަ ގެނޭ..އަހަރެން މިދަނީ ކާރު ނެރެން.. ނޭނގޭ ކިހާ ގެއްލުމެއް ކަމެއް ލިބިފަ ހުރީ” ސޯފާގައި އޭނާ ބާއްވާފައި އޮތް ހިސާބުގައި އޭރު ފެވެމުންދިޔަ ލޭތަކަށް ނަޒަރެއް ދެމުން ނަވާޒްބުނެލިއެވެ. އޭނާ އަވަސް ކުރުމަށް ބުނި ނަމަވެސް އަރްކާން އިނީ ހަދާނެ ގޮތެއް ނޭނގިފައެވެ. ޒެވިއަލްއާއި ވާހަކަ ނުދައްކާތާ ހަ އަހަރު ވެއްޖެއެވެ. އެ ހިތްވަރެއް ވެސް މިއަދު އޭނާގެ ކިބަޔަކު ނެތެވެ. އޭނާއަށް ދެން ބަލައިލެވުނީ ލިއާނާގެ މޫނަށެވެ. ލިއާނާ އޮތް ހާލުން މަޖުބޫރު ވެއްޖެއެވެ. ދެލޯ މެރިފައި އޮތް މޫނުމައްޗަށް ވެސް ހުދުކަމެއް ވެސް ވެއެވެ. ހަށިގަނޑު އެވަރަށް ލޭ ބޭރުވީމަ ވެސް ވާނީ އެކަހަލަ ގޮތެއްތާއެވެ. ލަސްނުކޮށް ފޯނު ނަގާފައި ޒެވިއަލްގެ ނަމްބަރު ޖަހައިލިއެވެ. އެ ނަމްބަރަކީ މީގެ ހައަހަރު ކުރިން ވެސް ޒެވިއަލް ގެންގުޅުނު ނަމްބަރެވެ. އަދިވެސް އަރްކާން އެ ނަމްބަރު ހިތުދަހެވެ.
ފޯނު ރިންގުވަމުން ދިޔައިރު އަރްކާން ހިތުގެ ހަމަނުޖެހުނު ވަނީ ނެގިފައެވެ. ހިތައް އުނދަގޫވަނީއެވެ. ދެރަ ވަނީއެވެ. ރުޅިގަދަވަނީއެވެ. ފުރަތަމަ ފަހަރަށް ފޯނު ރިންގުވަމުން ގޮސް ކެނޑުނު އިރު ވެސް އޭނާ ފޯނެއް ނުނެގިއެވެ. ދެވަނަ ބުރަށް ރިންގުވުމާއި އެކު ނަގައިފިއެވެ. ނަމަވެސް އަނގަޔަކުން ބަހެއް ނުބުނެވެ.
“މްމް..މީ..މީ.. ވަރަށް އަވަހަށް ތިރިއަށް އާދެބަލަ ..ލިއާނާ އަށް ކަމެއް ވެގެން..އަ” އަރްކާންގެ ޖުމްލަ ނުނިމެނީސް ޒެވިއަލް އެއްޗެއް ނުބުނެ ފޯނު ކަނޑާލައިއެވެ. އޭރު ކާރު ރެޑީ ކަމަށް ބުނެ ނަޥާޒް ވެސް އައިސްފިއެވެ. ޒެވިއަލް ނާންނަނީސް ދާންވީ ބާ އޭ ނޫނީ މަޑުކުރާނީބާއޭ ހީވެ އަރްކާންއަށް އިނދެވުނެވެ.
“އަރްކާން އެ މަންޖެ ގޮވައިގެން އަވަހަށް އާދޭ.. މިހާރުވެސް މާ ލަސް ވެއްޖެ.. ޒެވްއަށް ނިދިފަ ކަންނޭގެ.. އަހަރެން އެބަ ގުޅަން” ޒެވިއަލްއަށް ގުޅުމަށް ނަވާޒް ފޯނު ނެގި ހިނދު ލިފްޓުން ފައިބައިގެން ޒެވިއަލް އެދިމާލަށް ދުވެފައި އަންތަން ފެނުނެވެ. އޭރު އަރްކާން ލިއާނާ ނަގައިގަނެގެން ބޭރަށް ނުކުންނަނީއެވެ.
“ކިހިނެތް ވީ ލިއާއަށް..” ޒެވިއަލް ސުވާލް ކުރީ ކާރަށް އަރައިފައެވެ. ނަވާޒް ކާރު ދުއްވަން އިން އިރު އޭނައާއި ޖެހިގެން އަރްކާން އިނެވެ. ޒެވިއަލްގެ އުނގުމަތީގައި އޮތް ލިއާނާގެ ބޮލުގައި ފިރުމާލަމުން ދިޔައިރު ލިއާނާ އޮތްގޮތް ފެނި ފެންކަޅިވިއެވެ.
ނަވާޒް ކުރުގޮތަކަށް އެމީހުންނަށް ފެނުނު މަންޒަރު ކިޔައިދިނެވެ. “އަސްލު ކަން ހިނގާދިޔަ ގޮތް އެނގޭނީ ލިއާއަށް ހޭވެރިކަން ލިބުނީމަ… ހިޔެއް ނުވޭ އާދައިގެ ކަމެއް ހެންނެއް..ގާޑުން ވެސް ބަލާފަ ބުނި އެއްވެސް މީހެއްގެ ހިލަމެއް ނުވާ ޥާހަކަ…އަނެއްކާ އެދިމާލަކީ ފާރެއް މަތިން ވެސް ފުންމާލެވޭހެން ހުރިތަނެއް ނޫން” ނަވާޒްގެ ސީރިއަސް މޫނުމަތިން ވެސް ލިއާނާއާއި މެދު ކަންބޮޑުވެފައި ވީ ވަރު ހާމަވެއެވެ.
އެހުރިހާއިރު އަރްކާން އިނީ އެއްޗެއް ނުބުނެއެވެ. ނަމަވެސް ގެޔަށް ދެވުނުހާ އަވަހަކަށް ލިއާނާއަށް އެހެން ދިމާވާން މެދުވެރިވި ސަބަބު ހޯދަން އޭނާ އަޒުމް ކަނޑައެޅިއެވެ. ނަވާޒް އެހެން ބުނި ނަމަވެސް އެއީ ގެޔަށް މީހަކު ވަދެގެން ދިން ހަމަލާއެއްކަން އޭނާ ދެނެގަނެވުނެވެ. ނަމަވެސް އެހާ ވަރުގަދަ ސެކިއުރިޓީއެއް އޮއްވާ މިފަދަކަމެއް ތަކުރާރްކޮން ހިނގަމުން ދާތީ އަޖައިބުވިއެވެ. ފުރަތަމަ އަލާރާއެވެ. ދެން އީވާ އެވެ. މިފަހަރު ލިއާނާއެވެ. ކޮންމެވެސް ކަންތައް ގަނޑެއް އެބަ ހިނގައެވެ. ލޯ ގަނޑުން ލިއާނާގެ މޫނު ފެނުނު ހިނދު އަރްކާން އަނެއްކާވެސް ފުންނޭވާއެއް ދޫކޮށްލެވުނެވެ.
******
އެޕިސޯޑު 21
އެހުރިހާއިރު އަރްކާން އިނީ އެއްޗެއް ނުބުނެއެވެ. ނަމަވެސް ގެޔަށް ދެވުނުހާ އަވަހަކަށް ލިއާނާއަށް އެހެން ދިމާވާން މެދުވެރިވި ސަބަބު ހޯދަން އޭނާ އަޒުމް ކަނޑައެޅިއެވެ. ނަވާޒް އެހެން ބުނި ނަމަވެސް އެއީ ގެޔަށް މީހަކު ވަދެގެން ދިން ހަމަލާއެއްކަން އޭނާ ދެނެގަނެވުނެވެ. ނަމަވެސް އެހާ ވަރުގަދަ ސެކިއުރިޓީއެއް އޮއްވާ މިފަދަކަމެއް ތަކުރާރްކޮން ހިނގަމުން ދާތީ އަޖައިބުވިއެވެ. ފުރަތަމަ އަލާރާއެވެ. ދެން އީވާ އެވެ. މިފަހަރު ލިއާނާއެވެ. ކޮންމެވެސް ކަންތައް ގަނޑެއް އެބަ ހިނގައެވެ. ލޯ ގަނޑުން ލިއާނާގެ މޫނު ފެނުނު ހިނދު އަރްކާން އަނެއްކާވެސް ފުންނޭވާއެއް ދޫކޮށްލެވުނެވެ.
ލިއާނާގެ ހަބަރު އަލާރާއަށް ލިބުނީ ހެނދުނު ކާންދޭން ދިނާޔާއައިސް އެވާހަކަ ބުނުމުންނެވެ. އަލާރާގެ ބޮލަށް އެބުރުން އަރައިގެން ދިޔައެވެ. ރޭގައި ލިއާނާ ލަސްވުމުން އޭނާ ހީކުރީ މީހަކު ނުފެނުމުން ނިދަން ދިޔައީ ކަމަށެވެ. ރުޅިމަޑުވެގެން ފަހުން އީވާ ވެސް ކޮޓަރިއަށް އައުމުން އޭނާއަށް ވެސް ނިދުނީއެވެ. އެންމެ ފުރަތަމަ ވެސް އޭނާ ބޭނުން ވީ ލިއާނާގެ ހާލުބެލުމަށެވެ.
“ދޮންބެ ބުނި ހޭއެރީމަ އޭ އައީ..ފަހުން ޒެވްއަށް ގުޅީމަ ބުނި ބޮލުގައި ރިއްސާވަރުން އިންޖެކެޝަނެއް ޖެހި ވާހަކަ..އެޖެހި ފަހުން ނިދާފަ އޭ ބުނީ އޮތީ.. ވަރަށް ބޮޑަށް ލިއާގެ ބޮލަށް އަނިޔާ ވެފަ ހުރީ..ވެއްޓިފަ ޖެހުނު ގޮތަކުން ކަންނޭގެ…. ސެކިއުރިޓީން ތިއްބަ އެފަދަ ކަމެއް އަނެއްކާ ވެސް ތަކުރާރް ވެގެންދިޔައީމަ ބައްޕަ ވަރަށް ކަންބޮނޑު ވެފަ އެހުންނަނީ.. ބައްޕަ ވެސް ވެއްޖެ ހޮސްޕިޓަލްގަ.. މަންމަ ވެސް މިއަދު ނުދާނަން އޮފީހަކަށް..އީވް އައީމަ ދެންދާނީ ހޮސްޕިޓަލްއަށް… ދަރިފުޅު ކަމެއް ބޭނުން ވެއްޖެޔޭ ބުނެލާ އީވް ކައިރީގަ..މާމަ ވެސް އަންނާނެ އިރުކޮޅަކުން..” ދިނާޔާ ތަށިތައް ހިފައިގެން ނުކުންނަން ދަމުން ބުނެލިއެވެ.
އަލާރާ ބޯޖަހައިލިއެވެ. ދިނާޔާ ނުކުން ކަން ޔަގީން ވެގެން އޭނާ ލައްގަނެގެން އިން ބާލީސް ދޮށަށް އަތް ކޮއްޕާލާފައި ފޯނު ނެގިއެވެ. ފުރަތަމަ ވެސް ޒެވިއަލްގެ މަތިން ހަނދާންގެ ތުންފަތައް ފެވިލީ ރީތި ހިނިތުންވުމެކެވެ. “އައި މިސް ހިމް އޯލް ރެޑީ..” އެ ލޯބިވެތި ހިނިތުންވުމުގައި އިނދެ ކިޔާލެވުނު އިރު ނޭނގުމުގެ ތެރޭގައި އޭނާއަށް އިނދެވުނީ ވޮއިސް ރެކޯޑިންގްއަށް ލެވިފައެވެ. އެ ފޮނުވާލެވުނު އިރު ވެސް އޭނައަށް ރެއަކާ ނުލިއެވެ. އެހެން އިންދާ ސިހުނީ ވޮއިސްމެސެޖެއް ލިބުމުން އިވޭ ބީޕްއަޑުންނެވެ. އީވާ ކިޔައި ދިންހެން މެދުގައި އިން ފިތައް އޮބާލުމުން އިވިގެން ދިޔައީ ޒެވިއަލް ފޮނުވި ވޮއިސް އެކެވެ.
“ކާކު މަތިން މިސް ވެގެން ތިއުޅެނީ..” އެ އަޑުވި އަލާރާގެ ދެލޯ ބޮޑުވިއެވެ. ޒެވިއަލްއަށް އޭނާގެ ހިތުގަ ހުންނަ އެއްޗެހިވެސް އެނގެނީބާއޭ ހިތައް އެރިއެވެ. އެވަރުންވެސް އޭނާއަށް އެ ވޮއިސް ފޮނުވުން ކަމެއް ނޭނގުނެވެ.
“ވަޓް ޔޫ މީން..އާރ ޔޫ ޑްރީމިން” އަލާރާ މެސެޖް ފޮނުވާލިއެވެ.
“ނޫނޭ.. އައި މިސް ހިމް އޯލް ރެޑީ އޭ ކިޔާފަ އަލާ ވޮއިސް އެއް ފޮނުވީމަ.. ޝަވަން މަތިން މިސްވެގެންތަ ތިއުޅެނީ..” ޒެވިއަލްގެ ޖުމްލައިވި އަލާރާގެ މޫނު ރަތްވިއެވެ. ވެގެންދިޔަ ގޮތް ވެސް ފަހުމް ވީދެނެވެ. ގަތްލަދުން މޫނުމަތީގައި ބާލީސް އަޅާލައިގެން އޮވެ ތޫލި އަޑަކުން ހަޅޭއްލަވައިގަތެވެ.
“ވަޓް ދަ ހެލް އާރ ޑުއިން އަލާރާ.. އާރ ޔޫ ކްރޭޒީ…އިޑިއަޓް.އާހްހް..މަންމާ” އެނދުމަތީގައި ދެފައި ތަޅައިގެން ހިނދުވެސް އޭނާގެ މޫނު ރަތްކަމުން ހީވަނީ ޓޮމާޓޯ އެއްހެންނެވެ. “އާހް އާހް އައި ކޭންޓް ފޭސް ހިމް އެނީމޯރ…ލަދުން ހަލާކު.. އެކަމަކު ލިއާގެ ހަބަރެއް ވެސް ބަލަން އެބަޖެހޭ..” ބަންޑުން އޮވެ އަނެއްކާ ވެސް އަލާރާ ހަޅޭއްލަވައިގަތެވެ. އެހެން އޮތްވާ އަނެއްކާ ވެސް ސިހުނީ ފޯނު ވޮއިސް މެސެޖެއް އައި އަޑުއިވިގެންނެވެ.
“ލުކްސް ލައިކް ސަމްވަން އިޒް މިސިންގް ޝަވަން..” ޒެވިއަލް އަނެއްކާ އެހެން ބުނުމުން އަލާރާގެ ހިތައް އުނދަގޫވެގެން ދިޔައެވެ. ހަމަ ގައިމްވެސް ޝަވަންގެ މަތިން އޭނާ ކުރިން ހަނދާންވާހެން މިހާރު ހަނދާނެއް ނުވެއެވެ. ނަމަވެސް ޒެވިއަލްގެ މަތިން އޭނާ އަބަދުވެސް ހަނދާންވެއެވެ. ދުވަހުގެ ބޮޑުބައި ކައިރީގައި ހޭދަކޮށްފައި ފަސްމިނެޓްއަށް ކައިރިން ދިޔަސް ވެސްމެއެވެ. އަންނާނެ އިރަކަށް އިންތިޒާރުކުރެވެއެވެ. ޒެވިއަލްއާއި ގާތުގައި ވުމަށް ހިތް އެދެވެއެވެ. އޭނާއަށް އަންނަމުން މިދާ ބަދަލްތަކުން ހިތުގައި ނުތަނަވަސްކަމެއް ވަނީ އުފެދިފައެވެ.
“މްމްމް.. ހައުސް ލިއާ..ހޭލާފަތަ” އިތުރަށް ބުނާނެ އެއްޗެއް އަލާރާއަކަށް ނޭނގުނެވެ. ހިތައް ވަމުން ދިޔައީ ޒާތެއްގެ އުނދަގުލެކެވެ.
“ކުރިއަށް ވުރެން ރަނގަޅު.. އަދި ނުހޭލަ… ” ޒެވިއަލްގެ ޖަވާބުން އަލާރާގެ ހިތައް ހަމަޖެހުމެއް ލިބުނެވެ. ޒެވިއަލް ފޮނުވާފައި ހުރި ވޮއިސް މެސެޖްތައް އެތައް އިރެއް ވަންދެން ޕްލޭކޮށްލަ ކޮށްލަ އަލާރާ އޮތެވެ. އެ ފިރިހެންވަންތަ އަޑު އިވިލާ ކޮންމެ ފަހަރަކު ގައިން ހީބިހި ހަލުވާލައެވެ.
****
ދިނާޔާއާއި އަޒީޒް ތިބުމުން ޒެވިއަލް ގެޔަށް ދާން މިސްރާބުޖެހީ ގޭގެ ސެކިއުރިޓީ އޮފިސަރު ރަސަލް ގުޅާފައި އައުމަށް އެދުމުންނެވެ. ގެއަށްއައިސް އެންމެ ފުރަތަމަ ވެސް އނާ ދިޔައީ އެގޭގެ ސެކިއުރިޓީންނަށް ހާއްސަ ކުރެވިފައިވާ ބަޔަށެވެ. އޭނަ އެތެރެއަށް ވަދެ ވަދެ ހުއްޓާ ފަހަތުގައި މީހަކު ހުރިހެން ހީވެގެން ބަލައިލިހިނދު އަރްކާން ފެނުމުން ހިސާބަކަށް ހައިރާންވިއެވެ. އަރްކާން ބަލަހައްޓައިގެން ހުރިނަމަވެސް ބަހަކުން ބަހެއް ނުބުނެ ޒެވިއަލް އެތެރެއަށް ވަނެވެ. ރޭގެ ކަންތަކަށް ޝުކުރު އަދާކުރަން ހިތް ބާރު އަޅަމުން ދިޔައިރު އޭނާއާއި އަނގައިން ބުނުމަށް ސިކުނޑި މުޅިންދެކޮޅެވެ. ރޭގައި ފުރަތަމަ އަރްކާން ގުޅުމުން ޒެވިއަލް އިނީ ހަނދާނެ ގޮތެއް ވެސް ނޭގިފައެވެ. ފުރަތަމަ ފަހަރަށް ރިންގް ވެގެން ގޮސް ކެނޑުނު އިރުވެސް ހަރަކާތެއް ވެސް ގެންނަން ނޭނގިފައެވެ. އޭނާ ހީކުރީ އޮޅުމަކުންކަމަށެވެ. ނަމަވެސް ދެވަނަފަހަރަށް އަރްކާން ގުޅަން ފެށުމުން ބޮޑުކަމެއް ވީއޭ ހިތާ ނެގީއެވެ. ކަމަކަށް ވާވަރުގެ ކަމެއް ނުހިނގާ ނަމަ އަރްކާން ނުގުޅާނެކަން އޭނާދަނެއެވެ.
އޮފީހުގައި އުޅެފައި އަރްކާން ގެޔަށް އައީ ރަސަލް ގުޅުމުންނެވެ. ނުހަނު މަސައްކަތް ބުރަ ދުވަހެއް ނަމަވެސް ހިނގާދިޔަ ހާދިސާއަށް ފަހު އޭނާގެ ހުރިހާ ސަމާލުކަމެއް ހުއްޓިފައި ވަނީ އެކަމަށެވެ. އަދިވެސް އޭނާއަށް ސިފަވަނީ ރޭގައި ލިއާނާ އޮތް ހާލަތެވެ. އޭނާގެ ހިތައް އެހާ އުނދަގޫ ވި ވަގުތެއް ހަޔާތުގައި ވެސް އައި ކަމެއް ނޭނގެއެވެ.
“ސީސީޓީޥީ ފޫޓޭޖް ތައް ދައްކާލަން ވެގެން ބުނީ… އިތުރު މީހަކުވެސް އެބައުޅޭ އެ ހަމަލާދިން މީހާގެ އިތުރަށް” ރަސަލް އިތުރު މީހެކޭ ބުނުމުން ޒެވިއަލްއަށް ކީކޭހޭ އަހައިލެވުނެވެ. އެޅުވިގެންދިޔަ ފޫޓޭޖްތައް ފެންނާނެހެން ރަސަލް ޑެސްކްޓޮޕް އަނބުރާލަދިނެވެ.
“ލިއާ އުޅުނު ގޮތުން ހީވަނީ ލިއާއަށް މީހަކު އުޅޭކަން އެނގިގެން ހަމަ އުޅުނުހެން … ބަލާ މިފެންނަނީ ދެތިންފަހަރަށް ލިއާ މުޅި ގޯތި ތެރެ ބަލާތަން ..ސެކިއުރިޓީން ތިބޭ ހިސާބެއްގައި ވިއްޔާ ލިއާ ވަރަށް ނޯމަލް ކޮން އުޅެފަ ހުރީ.. މިގޭގަ ސެކިއުރިޓީން ނުތިބޭނީ ހަމައެކަނި ބެކްޔާޑްގަ..އެއީ އެހިސާބަކީ ވަށައިގެން ވެސް މަތިން އެރޭނެ އެއްވެސް ގޮތެއް ނީންނަ އޭރިއާ އަކަށް ވާތީ.. އެ ނޫން ކޮންމެ ހިސާބެއްގަ ތިބޭނެ މީހުން.. އެކަމަކު ބެކްޔާޑްގަ ވެސް ކެމެރާ ހުންނާނެ” ރަސަލް ދައްކަމުން ދިޔަ ފޫޓޭޖްތަކުން ޒެވިއަލްއަށް ހުރެވުނީ ހަމަ ރަނގަޅަށް ވެސް ޝޮކްއެއްގައެވެ. ލިއާނާ އުޅެފައި ހުރިގޮތް ވަރަށް ރަނގަޅަށް ހުރިހާ ކެމެރާއަކުން ރަސަލް ދައްކަމުން ދިޔައެވެ. އެންމެފަހުން ގާޑެންގެ ކައިރީގައ މަޑުކޮށްގެން ހުރެފައި ކުއްލިއަކަށް ދުއްވައިގަތީ ގާގަނޑެއް ހިފައިގެންނެވެ. އެހިސާބު ޒޫމްކޮށްލުމަށްފަހު ރަސަލް ދެއްކިއިރު މީހަކު ހުއްޓާފެނުނެވެ. ނަމަވެސް ކަޅު އެއްޗިހިނުގައި މޫނު ފޮރުވައިގެން ހުރުމުން ސިފަ އެނގޭ ވަރެއް ނުވިއެވެ.
ލިއާނާ ގާގަނޑު އެއްލާލުމަށްފަހު އެމީހާ ޒަހަމް ކޮށްލި ގޮތުން ޒެވިއަލް ދެލޯ ބޮޑުވިއެވެ. އަރްކާންއަށް ވެސް ހުރެވުނީ އަނގަ ނަގައިގެންނެވެ. އެ ދެމީހުންނަށް ވެފައި ތިބި ގޮތުން އެ ސީރިއަސް ވަގުތުގައި ވެސް ރަސަލްއަށް ހެވުނެވެ.
ލިއާނާ ދުވެފައި ގޮސް އެމީހެއްގެ ގަމީހުގެ ގިރުވާނުގައި ހިފާ ދަމައިގަނެ މޫނު ބަލަން އުޅުނު ވަގުތު ދުރަށް ކޮށްޕާލި ގޮތްފެނި ޒެވިއަލްގެ އަތް މުށްކެވުނެވެ. ޔަގީނުންވެސް ލިއާނަގެ ފަޔަށް އަނިޔާ ވާނެއެވެ. ހޭ އެރި އިރު ފައި ގެ ވާހަކަ ލިއާނާ ނުބުނުމުން ޒެވިއަލް ހައިރާންވިއެވެ.
“މި އަޅުގަނޑު ބުނި ވާހަކަ..ބަލާ” ލިއާނާ ވައްޓައިލުމުން ވެސް ތެދުވެ ދެވަނަ ހަމަލާ އުޅުން ވަގުތު ފަހަތުން އައި މީހަކު އަތުގައި އޮތް ދިގު ދަނޑިބުރި އެއްފާޑު އެއްޗަކުން ލިއާނާގެ ބޮލުގައި ޖަހައިލިއެވެ. ފަހަތުން އައި މީހާ ވެސް ހުރީ ކަޅު އެއްޗިހިނުގައި ފޮރުވިގެންނެވެ. ބަލާ ބެލުމަށް އަންހެނެއް ހެން ވެސް ހީވެއެވެ. ދެމީހުން އެތަނުން ނުކުމެގެން ގޮސް ވަނީ ބަގީޗާގެ ތެރެއަށެވެ. ދެން ފެނުނީ އެތަނަށް އަރްކާންއާއި ނަވާޒް އައިސް ލިއާނާ ގެންދިޔަ މަންޒަރެވެ.
“ދެން ނެތް އެއްވެސް ކެމެރާއަކަށް އަރާފައެއް ފަހުން ގޮސް ގާޑެން ވެސް ބެލިން ..އެއްވެސް ހިލަމެއް ނުވޭ.. ލަފާކުރެވެނީ އަލާއަށް ހަމަލާ ދިން ދުވަހު މިގެއަށް ވައިން ގޮތައް ހެން ރޭގެ އެމީހުން ނުކުތީ..ލިއާގެ ހަބަރު ލިބިގެން އެންމެ ތެޅިގެން ވަގުތު ގާތްގަނޑަކަށް ފަސް ވަރަކަށް މިނެޓް ވާނީ އެހިސާބުގަ މީހަކު ނެތި.. އެންމެނަށް ވެސް ޝޮކް އެއް ލިބުނީ.. އެހެންވެ އެވަގުތު ދެވުނީ އެހިސާބުގަ ތިބި މީހުންނަށް ވެސް..އެމީހުން އެނބުރި ސްޕޮޓްއަށް ދިޔައިރު އެ ގަސް ކައިރީގަ އޮތް ވާގަނޑެއް..” ރަސަލް ކިއައިދިން ވާހަކަ ތަކުން ޒެވިއަލް އިތުރަށް ރުޅިގަދަވިއެވެ.
” މީގެ ފަހުން ބެކްޔާޑްގަ ވެސް މީހުން ތިބެން ވާނެ ..” އަރްކާންއަށް ފޯނު ކޯލެއް އައުމުން އެތަނުން ނުކުންނަން ދަމުން ބުނެލިއެވެ. ދަމުން ރަސަލްގެ ގާތު އައުމަށް ބުނެލިއެވެ. އެމީހުން ނުކުންއިރު އަޒީޒް އައިސްވަނެވެ.
“ދައްތަ ވެއްޖެ ލިއާގެ ގާތު ..މިއަދު ހިއްސާދާރުންގެ ބައްދަލްވުމެއް އޮތީމަ ކޮންމެހެން ވެސް އެގަޑިއަށް އޮފީހަށް ދާން ޖެހިގެން މިއައީ.. ޒެވް އެއްޗެއް ކައިފިންތަ” ޒެވިއަލްގެ ކޮނޑުގައި ޖަހާލަމުން އަޒީޒް އަހައިލިއެވެ. ޒެވިއަލް ޖަވާބުދިނީ ބޮލުގެ އިޝާރާތުންނެވެ. އޭނާގެ މޫނުމަތީގައިވި ކަންބޮޑުވުން އަޒީޒް ދެނެގަތެވެ.
“ޒެވް..އިރާދުކުރެއްވިއްޔާ ރަނގަޅުވާނެ ހުރިހާ ކަމެއް ވެސް.. މިހާރު ޕޮލިހުންވެސް އެމަސައްކަތުގަ އެއުޅެނީ.. އެމީހުންގެ އެހީ މިޙާރު އެބަ ބޭނުންވޭ ގާޑުކުރަން” އަޒީޒް ދޫކޮށްލީ ފިނި ނޭވާއެކެވެ. ތަކުރާރްވެގެން ގޭތެރޭގައި މިހިނގަމުންދާ ކަންތަކުން އެހެން ގޮތަކަށް ވިސްނަން އޭނައަށް ވެސް މިހާރު މަޖުބޫރެވެ.
“އަލާ އާއި އީވްގެ ކޭސްގަ ވެސް ޕޮލިހުންނަށް ނުކުރެވުނު މާ ބޮޑުކަމެއް.. ބޭބެ ދެން ތިބުނީ ރަނގަޅު ކަމެއް”
“އޭރު އަލާ އެދުނީ އެކަންތައް މަޑު ޖައްސާލަން ..އެކްސިޑެންޓަށްފަހު އަސްލު އެހާ ގިނަ ދުވަސް ތަކެއް ނުވޭ މިކަމެއް ޖެހުނީ..ޕޮލިހުންގެ ސުވާލްތަކަށް ޖަވާބު ދޭނެހާ ހިތްވަރެއް ދެމީހުން ކުރެ އެކަކުގެ ގަޔަކުވެސް އޭރު ނެތް..އެރޭ ހިނގައިދިޔަ ހާދިސާގެ ތަފްސީލެއް ވެސް ދޭކަށް ނޭނގުނު.. އީވް އަށް ވެސް ބުނަން އެނގުނީ ކަޅު އެއްޗިހުނުގަ ފޮރުވިފަ ހުރި މީހަކު ހަމަލާ ދިނީއޭ.. އެމީހެއްގެ ސިފަ އެއް ވެސް އަދި މައުލޫމާތެއް ވެސް ބުނާކަށް ނޭނގުނު … ޒެވްއަށް ވެސް ފެނުނެއްނު އަލާއަށް ވެފަ އޮތް ވަރު..ދެން އެހެންވެ އަލާ ޑިޕްރެސް ވެދާނެތީ ހުއްޓާލަން ޖެހުނީ..” އަޒީޒް ބުނަމުން ދިޔަ ވާހަކަތައް ވެސް ޒެވިއަލްއަށް ގަބޫލް ކުރެވުނެވެ. ނަމަވެސް ދެން އޭނާ ދޫދީގެންނެއް ނުހުންނާނެއެވެ. ލިއާނާއާއި ކުޅުމަށްފަހު އެމީހަކަށް އެހެން ދުރުގައެއް ނުހުރެވޭނެއެވެ. ދެން އެމީހަކަށް ޖެހޭނި އޭނައާއި ކުރިމަތިލާށެވެ.
“އަޒީޒްސާރ.. އަރްކާން ބުނީ އެ ގަސް ކަނޑާލުމަށް ފަހު އެހިސާބު ފާރުއުސްކުރުމަށް” ރަސަލް އައިސް ބުނެލި ވާހަކައަކުން އަޒީޒްއަށް ނިތް އަރުވާލެވުނެވެ. ޒެވިއަލްއަށްވެސް ވީ އެފަދަ ގޮތެކެވެ. އެގަހަކީ ކުޑައިރުން އަރްކާން މާ ގަޔާވާ ގަހެކެވެ. މިއަދު ހާލަތު ތަފާތު ނަމަވެސް ގަސް ކަނޑާލަން ބުނެފާނެއެކޭ އެކަކުގެ ހިތަކަށް ވެސް ނާރައެވެ.
“އެންމެ ރަނގަޅު އަރްކާން ބުނެފިއްޔާ އެކަމާ އުޅޭ” އަޒީޒް އޭރުވެސް ހުރީ އެ ހައިރާން ކަމުގައެވެ.
“ބޭބޭ ގޮސްލީ މިވަގުތު” ޒެވިއަލް އެތަނުން ނުކުމެގެން ދިޔައިރުވެސް ހިތާއި ސިކުނޑި އަށް ވެރިވެފައިވީ އަރްކާންގެ އާދަޔާއި ހިލާފްކަމެވެ. އަރްކާން އަނެއްކާ އެހުރީ ހަމައިގާ ބާއޭ ވެސް އެތައް ފަހަރަކު ހިތައް އެރިއެވެ.
”ޝުކުރު އަދާކުރަން ދާންވީބަ.. ނޫނީ ނުދާންވީބަ… މަކުޑަކޮން ވެސް ނެތް އޭނައާއި ވާހަކަ ދައްކާ ހިތެއް” ޒެވިއަލްއަށް ހުރެވުނީ އަނގަޔަށް ވައްތަރެއް ޖައްސައިގެންނެވެ. ހައަހަރު ވަންދެން އެދޭތެރޭގަ އޮތް ދުޝްމަންކަން އެހާ ފަސޭހައިން ނުފިލާނެއެވެ. މާޒީ ހަނދާންވާ ކޮންމެ ފަހަރަކު ޒެވިއަލްގެ ހިތާއި މުޅި ރޫހަށް ވެރިވެގަންނަނީ އާދަޔާއިހިލާފް ރުޅިވެރިކަމެކެވެ. “އަމިއްލައަކަށް ނުދާނަން…އެހާ ފަސޭހައިން ހަނދާނެއް ނުނެތޭނެ..” އެ ދިގު އިސްތަށިގަނޑުގައި އަތް ފުނާއަޅާލިއިރު ޒެވިއަލްގެ ކޯކަށިގަނޑަށް ވާންވެލިއެވެ.
ޒެވިއަލް ގޮސް ވަނީ އަލާރާގެ ކޮޓަރިއަށެވެ. ޓަކި ޖަހައިލުމުން ހުޅުވީ އީވާއެވެ. ޒެވިއަލް ފެނުމުން ރީތި ހިނިތުންވުމެއްގައި ހުރެ އޭނާ ނުކުތީ ދަމުން އެނގިލާށޭ ބުނުމަށްފަހުއެވެ.
“ކޮބާ އަދިވެސް ޝަވަން މަތިން ހަނދާންވެފަތަ” ޒެވިއަލް ގޮސް ހުއްޓުނީ ބެލްކޮނީގެ ރެއިލިންގްގައި އަތް އަޅުވާލައިގެން ހުރި އަލާރާގެ އެއްފަރާތަކަށް ވާހެންނެވެ. އެއް އަތް ރެއިންގް ގައި އަލުވާލައިގެން އަނެއްއަތުން ލައިގެން ހުރި ޖިންސްގެ ޖީބަށް އަތް ޖަހައިލާއިގެން ހުރިއިރު އެ ރީތިކަން އިހުނަށް ވުރެން ބޮޑަށް ހާމަވެއެވެ. ޝަވަންގެ ނަން ބުނުމުން އަލާރާގެ މޫނުމަތިން ދައްކަމުންދިޔަ ފޫހިކަމުން ޒެވިއަލް ހުރީ ނަގަންވީ މާނައެއް ނޭނގިފައެވެ. އެއްޗެއް ނުބުނެ ހުރިގޮތުން ހީވީ އޭނާ ރުޅިއައިސްހުރިކަން ޒެވިއަލްއަށް އަނގާލިހެންނެވެ. މައުސޫމް މޫނުމައްޗަށް ވެރިކުރުވަމުން ދިޔަ ކުލަތަކުން ޒެވިއަލްގެ ހިތް ލޯބިން ބަނޑުން ވަމުން ދިޔައެވެ. ކަޅި ޖަހާ ނުލާ ބަލަން ހުރިއިރު ހިތުގެ އެންމެ ހިމަ ނާރަށް ވެސް އިހްސާސް ވެލިއެވެ.
“އަނެއްކާ މަ މަތިންތަ މިސް ވެގެން އުޅުނީ..” ޒެވިއަލް ބުނެލި ޖުމްލައިން ތެޅިގަނެފައި އަލާރައަށް އެނބުރިގަނެވުނެވެ. މޫނަށް ވެރިވީ ފިޔާތޮއްޓާއި ރަތުގެ ކުލަވަރު އަމިއްލަ ނަފްސަށް ވެސް އިހްސާސް ވެލިއެވެ. ކުރިން ހުރި ފޫހިކަމުގެ ބަދަލްގައި މިހާރު މޫނުން ފެންނަން ހުރީ ލަދުރަކި ކަމެވެ.
“ބުނީމަ އެއްނު އެނގޭނީ ވެސް” އެ ފިރިހެން ވަންތަ އަޑު އަޑުމަޑުވެފައި އައިލެއް ފިރިހެންވަންތަ ކަމުން އަލާރާގެ ގައިން ހީބިހި ހަލުވާލިއެވެ.
“ކީއްވެ އެއްޗެއް ނުބުނެ ތިހުރީ..މްމްމް އެނގިއްޖެ .. މަ ނުގޮސްގެން ދޯ ތިހުރީ.. އެހެންވިއްޔާ މި ދަނީ…” އަލާރާގެ މޫނަށް ވެރިވި ކުލަވަރުން ޒެވިއަލްއަށް ޖަވާބު ލިބުނެވެ. ޒެވިއަލްގެ ހިތުގައި ކުޅެލީ އުފާވެރި ރާގެކެވެ. އަލާރާގެ މޫނުން ފެނިލި ލަދުރަކި ކަމުން އޭނާ ބޭނުންވީ އިތުރަށް ތަޅުވާލާށެވެ.
“ނޫން..ނޫން..ވެއިޓް” އަލާރާއަށް އަވަސް އަވަހަށް ބުނެލެވުނެވެ. ޒެވިއަލް ހުރީ އޭނާގެ ކުރިމަތީގައި އެނގޭތީ އަތް ހަރަކާތް ކޮށްލުމަށްފަހު އޭނާ ޒެވިއަލްގެ އަތުގައި ހިފައިލިއެވެ. ޒެވިއަލް ހުރީ ބުނާނެ އެއްޗެއް ވެސް ނޭނގިފައެވެ.
“މްމްމް..އަ..އައި-” އަލާރާ އިސްޖަހައިގެން ބުނަން އުޅުނު ޖުމްލަ ހުއްޓާލަން ޖެހުނީ ކޮޓަރިތެރެއިން އިވުނު އިތުރު އަޑެއް ސަބަބުންނެވެ.
”އަލާ..” ޝަވަން ބެލްކޮންޏާއި ދިމާލަށް އައި އަޑުއަހާފައި ޒެވިއަލްގެ އަތުގައި ހިފާލައިގެން ހުރި އަތް އަލާރާ ނައްޓުވާލިއެވެ. ޒެވިއަލްގެ މޫނުމަތިން އިރުކޮޅެއްގެ ކުރިން ފެންނަން ހުރި ރީތި ހިނިތުންވުމުގެ އަސަރެއް މިހާރު އެމޫނަކު ނުވެއެވެ. އަލާރާ އަތް ނައްޓުވަލި ގޮތުން ހިތައް އުނދަގޫ ވިއެވެ.
“އަމް ގޮއިން..ހިއާޒް ޔޯ މޭން..” ޒެވިއަލް ނުކުމުގެ ދަމުން ބުނެލި ޖުމްލަ އަލާރާއަކަށް ކަމަކު ނުދިޔައެވެ. އެއްޗެއް ބުނަން ހިތައް އެރި ނަމަވެސް ޝަވަން ހުރުމުން އަނގަހުޅުވާލާކަށް ގަސްތެއް ނުކުރިއެވެ.
****
ބާރު ހިނގުމެއްގައި ޝަވަންގެ އޮފީސް ތެރެއަށް ވަދެގެން އައި ސޯފިއާ އައިސް ޖެހިގަތީ ސޯފާއަށެވެ. އެހެން އިންދާ ވަދެގެން އައީ ޝަވަންގެ ސެކެޓްރީ އާއިންއެވެ.
“ޝަވަން ސާރ މިވަގުތަކު ނެތް” އަދަބުވެރިކަމާއި އެކު އާއިން ބުނެލިއެވެ. ސޯފިއާ އަކީ ކާކުކަން އެނގޭތީ ހިސާބެއްގެ ނުތަވަސްކަމެއް އާއިންގެ މޫނުމަތީގައި ވިއެވެ.
“ތިކަން މަށައް ވެސް އެނގޭ.. އަލާރާ ހާ އަނދިރިއެއް ނޫން..އެހެންވީމަ ފެނޭ މިތާގަ ނެތް ކަން.. ކޮންތާކަށް ދިޔައީ” ރުންކުރުކަމާއި ބޮޑާކަން ނޫން އަސަރެއް ސޯފިޔާގެ ރާގުގައި ނެތެވެ.
“އަލާރާ މެޑަމް ކައިރިއަށް ދުރުވީ..އަންނާނެ ކަމަށް ބުނި ގަޑިއަކީ ދެގަޑި ބައި..”
“ގުޅާފަ ބުނޭ މަ އައިސް އެބަ އިނޭ..ހަމަ މިހާރު އަންނާށޭ.. ކަންކަމާއި އުޅެމުން ވެސް އަދިވެސް އެ އަންހެނާ ގަނޑު ފަހަތުން ތަ އެ ދުވެ ނަގަނީ..ބޮޑު މުސީބާތެއް ހުވާ.. މަރުވާކަށް ވެސް ނޫޅުނެއްނު” ސޯފިޔާގެ ބަސްމަގު ހުރިގޮތުން އާއިން އަޖައިބެއް ނުވެއެވެ. އެއީ ކޮންމެ ދުވަހަކުވެސް އައިސް އޭނާގެ ވާހަކަތައް ހުންނަގޮތެވެ. ސޯފިއާ ބުނިގޮތައް އޭނާ ޝަވަންއަށް ގުޅައިލުމަށްފަހު އެކަން އަނގާލިއެވެ.
“ސާރ ބުނުއްވީ އަންނަނީ ކަމުގަ..މިވަގުތު އަޅުގަނޑު ގޮސްލީ” އާއިން ނުކުމެގެން ދިއުމުން ސޯފިއާ ތުން އަނބުރާލިއެވެ. ދިހަ މިނެޓް ފާއިތުވެގެން ވެގެން ދިޔައިރު ވެސް ޝަވަން ނައުމުން ސޯފިއާ އިންތިހާއަށް ރުޅި ގަދަވިއެވެ. އެންމެ ފަހުން ނުކުމުގެން ދާން ހިނގައި ގައިން ހިނދު ޝަވަން އައިސް ވަންތަން ފެނުމުން ސޯފިއާ މޫނު ފުސް ކޮށްލިއެވެ.
“މަ އޭނަ ކައިރިއަށް ގޮސް ހުއްޓުނު ތަނާ ގުޅާފަ ބުނީ..މިއައީ ހަމަ…. ރޭގަ ކިހިނެތް ވީ” ސޯފިއާ ގެ ކުރިމައްޗަށްހުރި ސޯފާގައި އިށީންނަމުން ޝަވަން ރޯކޮށްލީ ސިނގިރޭޓެކެވެ.
”އޭނަ ނުބުނޭތަ…މަ ނުދިޔަ ނަމަ އެ ސޮރު ކޯޓުވީސް…” ސޯފިއާ ޖަހައިލީ ހިނިގަނޑެކެވެ. ޝަވަންގެ ތުންފަތް މަތީގައިވެސް ދުވެލީ މަލާމާތުގެ ހިނިތުންވުމެކެވެ.
“އެއްޗެއް ބުނެވޭނެތަ..ހަހަހަހާ..އޭނަ އެންމެ ހަރަކާތެއް ގެނެޔަސް މުޅި ގޭ އެބަ އެލާޓްއަށް އާދޭ.. ވަރަށް ބޮޑަށް ޝުކުރިއްޔާ ރޭގަ ތިކޮށްދިން ކަންތަކަށް..”
“އިޓްސް ނަތިންގ.. ކޮން ކަމެއް ކުރިއަށް އޮތީ” ސަވަންގެ ތައުރީފީ ބަހެއް އިވުމުން ސޯފިއާ ހުރީ ފޮނިވާ ގޮތްވެފައެވެ. ވާހަކަ ދެއްކުނީވެސް އަޑު ތުއިކޮށްލައިގެންނެވެ.
“އިޓްސް ޖަސްޓް ބިގްނިންގ.. އެ އާއިލާ ފަނާ ކޮށްލާފަ ހުއްޓާލާނީ… އަހަރެންގެ ކޮއްކޮއަށް އިންސާފް ނުލިބުނުތާ އެއިން ކަމެއް އެމީހުން ނެތް މިއަދަކު ހަނދާނެއް.. އޭގެ ބަދަލް އެމީހުންނަށް ލިބެންޖެހޭނެ.. އެހެން އެކަކު ބައިވެރި ނުވިއަސް އަހަރެން މިހުރީ އެންމެ ފަހު ނޭވާއަށް ދާންދެން ވެސް މިކަމުގައި ދެމިހުރެ އެކަކަށް ވެސް ނުހުއްޓުވޭނެ..” ފިލްޓަރަށް ދަމާލުމަށްފަހު ދޫކޮށްލި ދުންތައް ޝަވަންގެ މޫނުމަތީގައި އެނބުރުނު އިރު އޭނަގެ ދެލޮލުގައިވަނީ ބަދަލްހިފުމުގެ ރޫހެވެ.
****
“ސާރ..އެންކްރިޕްޓް ވެފަ އިން ބޭންކް އެކައުންޓް ނަމްބާރ ދެނެގަނެވިއްޖެ.. އެކޮޅުން އެބަ އިން ފޮނުވާފަ..” އަރްކާންގެ ކެބިންގެ ތެރެއަށް ވައިން ޝުހާދު ދިއްކޮށްލި ފައިލްގައި އަރްކާން ހިފިއެވެ.
“ފާތިމަތު ސާރާ” އެކައުންޓް ނަމްބަރުގެ ތިރިއަށް ފެންނަން އިން ނަން ކިޔާލި އިރު އަރްކާންއަށް އެކައްޗެއް ވެސް ނުވިސްނުނެވެ.
“ފާތިމަތު ސާރާ އެއީ އެކައުންޓު ނަމްބަރުގެ ވެރިފަރާތް..ކޮމްޕެނީގަ އެބައުޅޭ ސާރާ ކިޔާ ހަ ފަރާތެއް ..އެއިން އެއްވެސްމީހެއްގެ އެކައުންޓް ނަމްބަރާއި މި ނަމްބަރެއް މެޗްއެއް ނުވޭ… އެކިގޮތް ގޮތުން ބަލާފިން..” ޝުހާދު އިތުރަށް ބުނެލިއެވެ.
“ޔަގީނުންވެސް މިއީ ކޮމްޕެނީގަ މަސައްކަތް ކުރާ ކޮންމެ ވެސް މީހެއްގެ ކަމެއް.. ކޮމްޕެނީއިން ބޭރު މީހަކަށް މިފަދަ އަމަލެއް ނުހިންގޭނެ.. ހާއްސަކޮން ފައިސާގެ ކަމަކަށް އަތެއް ނުފޯރުވޭނެ…އަމިއްލަ ނަން ނޫން އިތުރު ނަމެއްގެ ނަންމަތީގަ އެކައުންޓް ކްރިއޭޓްކޮށްގެން އުޅެނީ ކަމަށް ވެސް ވެދާނެ..އެހެންވެއްޖެޔާ ހޯދުމަކީ ވެސް އުނދަގޫ ކަމަކަށް ވާނީ..ދެން ޖެހޭނީ އަނެއްކާ ވެސް ބޭންކް އާއި ކޮންޓެކެޓް ކުރަން.. އަހަރެން އިންނާނީ އިތުރު އިޝޫއެއް އުޅެންޏާ ޝުހާދު ގުޅާނެ ވާހަކަ އެކޮޅަށް އިންފޯމްކޮށްލާފަ.. މިހާރު ޝުހާދުއަށް ހަވާލުވެވިފަ ހުރި ހުރިހާ މަސައްކަތެއް ބަހައްޓާފަ މިކަމާއި އުޅޭ…ވީހާވެސް އަވަހަކަ މިކަމަށް ހައްލެއް ހޯދަން އެބަޖެހޭ.. މްމްމް…ހަމްދީމެންގެ އޮފީހަށް ދާން އެބަ ޖެހޭ މީޓީންގ އަކަށް.. ” އަތުކުރީގައި އަޅާފައިވާ ގަނޑިއަށް ނަޒަރެއް ދެމުން އިށީންދެ އިން ގޮނޑިން އަރްކާން ތެދުވިއެވެ.
“އަޅުގަނޑު ދާނެތޯ..” ، “ނޫނޭ ޝުހާދު މަޑުކުރޭ..އެހާ ގިނަ އިރަކަށް ނޫން މިދަނީ.. މަށައް ފަނަރަ މިނެޓް އެމީހުންނަށް ދެވެން އިނީ” ބިއްރޫލި މޭޒުމަތީގައި އޮތް ކަޅުކުލައިގެ ރޭބަން އައިނު ނަގައިގެން އަރްކާން ދިޔުމަށް ނުކުތެވެ. ގަދަ ޗޮކްލެޓްކުލައިގެ ގަމީހާއި ކަޅުކުލައިގެ ޓްރައުޒާގައި އަރްކާންގެ ރީތިކަމަކަށް ބަދަލެއް ނާދެއެވެ. އަޅައިގެން ހުރި ކަޅުކުލައިގެ ހިމަ ދިގު ޓައީއަށް ދަމާލަމުން އައިނު އަޅައިލިއެވެ.
ކާރު ދުއްވަމުން ދިޔައިރު އަރްކާންގެ ހިތައް ވެރިވެގަނެފައިވީ އެވަގުތުވެސް ލިއާނާގެ ހިޔާލްތަކެވެ. ހޭއެރި ކަމަށް ޑޮކްޓަރު ބުނެލި ހިނދު އަރްކާން ނުކުމެގެން އައީ އެތެރެއަށް ނުވަދެއެވެ.އޭނާ އެތެރެއަށް ވަންނަން ވީ ކޮން ހައިސިއްޔަތަކުން ބާއޭ ހީވެ ކިތަންމެ ވަންނަން ހިތް އެދުނު ނަމަވެސް ފަސްޖެހެވުނީއެވެ. ނަވާޒްގެ ފަރާތުން ހާލު ރަނގަޅުކަން އެނގުނު ނަމަވެސް ލިއާނާ ދުށުމަށް ހިތް އެދެވެނީއެވެ.
“އޭމް އައި މިސިން ހާރ..”އަރްކާން ދޫކޮށްލީ ފުންނޭވާއެކެވެ. ސިކުނޑިއަށް ބުރަ ބޮޑުވެފައިވީ ދަނޑިވަޅެއްގައި ވެސް ލިއާނާގެ ހިޔާލްތަކުން ހިތައް ފިނިކަން ލިބެނީ އާދަޔައި ހިލާފް ގޮތަކަށެވެ. “އައި ޝުޑް ވިޒިޓް ހާރ.. ކުރީ ފަހަރުގެ ކަންތަކަށް ފޮގިވް ވެސް ކުރީއެއް ނޫން އަދިވެސް.. ވައި އައި ފީލް ލައިކް އައި މިސް ހާރ ..އާހްހް” އަރްކާން ތުންފަތުގައި ދައިގަނެގެން އިނެވެ. ލިއާނާގެ ހިޔާލްތަކުގައި އިނދެ އަންނަން ވީ މަންޒިލަށް އާދެވުނު ލެއް ވެސް ހީވީ މާ އަވަސް ހެންނެވެ.
ޕާކިން އޭރިއާގައި ކާރު ޕާކު ކުރުމަށްފަހު ސީޓް ބެލްޓް ނައްޓާލަމުން ދިޔަ އަރްކާންއަށް އެއްލި ކަޅިއަކުން ފެނުނު ސޫރައަކުން ހުއްޓުން އެރިއެވެ. އޭނާގެ ފަހަތުން ދެން ނުކުން މީހާ ފެނި އަރްކާންގެ ދެލޯ ދިޔައީ ބޮޑުވެގެންނެވެ. ކާރުގެ ހުންގާނުގައި ހިފާ ބާރުކޮށްލިއިރު ރުޅިގަދަވެގެން ގޮސް މީހާގެ މޫނު ރަތްވިއެވެ. ކާރުތެރެއިން ފައިބައިގެން އެދިމާލަށް ދިޔަ ހިނދު މަގުމަތީގައި އޮތް ކަޅުކުލައިގެ ވޭންއަކަށް އެދެމީހުން އަރައިގެން ދިޔައެވެ. ތޮފިތައް އަޅައިގެން ތިބި ނަމަވެސް އެމީހުންނެއް އަރްކާންއަކަށް ނޯޅޭނެއެވެ. ފޯނު ނަގައި އޭނާ ތައްޔާރުވީ އެހަބަރު ދޭން އެންމެ އައުލާ ކަން ބޮޑު ފަރާތައް ދިނުމަށެވެ.
***
ލިއާނާ ކައިރިއަށް ދިޔުމަށް ގެއިން ނުކުމެ ނުކުމެ ހުރި ޒެވިއަލް ހުއްޓުނީ ފޯނު ވައިބްރޭޓްވި އަޑަށެވެ. ފާރަށް ލައްގަނެލައިގެން ހުރެ ފޯނު ނަގާ ބަލާލިއިރު އަރްކާންގެ މެސެޖްއެކެވެ. “އައްދޭ މީނަ ހާދަ ވަރަކަށް މަ މަތިން ހަނދާން ވެގެން މިއުޅެނީ..”ފާޑަކަށް އަނގަހަދާލައިގެން ހުރެ ޒެވިއަލް އެ މެސެޖް ބަލައިލިހިނދު ދެލޯ ދިޔައީ ބޮޑުވެގެންނެވެ.
“ވަޓް ދަ ހެލް” ދަތްތަކަށް ބާރުވި އިރު ރުޅިގަދަވެގެން ޒެވިއަލް ތުރުތުރުއަޅައެވެ. ވާނުވާ ނޭނގޭވަރުވިއެވެ. “ގާތިލުން މިނިވަން ވެއްޖެ” އަރްކާން ފޮނުވި ފޮޓޯއާއި އޭގެ ތިރީގައިވާ މެސެޖް ދެވަނަ ފަހަރަށް ބަލައިލި ހިނދު ޒެވިއަލްއަށް ފާރަށް ބާރުހުރި ގޮށްމުށުގެ ހަމަލާއެއް ދެވުނެވެ. މީހާ ތުރުތުރު އަޅަމުންދިޔައިރު މޫނުމަތިން ފެނިގެންދަނީ ރުޅީގެ އިންތިހާއެވެ.
***
(ނުނިމޭ)
